تازيون خبرون

Daily Archives: December 2, 2015

ڪراچي ۾ ملٽري پوليس جي گاڏي تي دهشتگردن جو حملو، 2 اهلڪار شهيد

ڪراچي (اسٽاف رپورٽر) ڪراچي ۾ ايم اي جناح روڊ تي ملٽري پوليس جي گاڏي تي اڻڄاتل ماڻهن جي فائرنگ جي نتيجي ۾ 2 اهلڪارشهيد ٿي ويا.پوليس ذريعن مطابق ايم اي جناح روڊ تي تبت سينٽر جي ويجهو ملٽري پوليس جي گاڏي تي اڻڄاتل ماڻهن ٻنهي پاسن کان فائرنگ ڪئي، جنهن جي نتيجي ۾ ٻه اهلڪار سخت زخمي ٿي ويا. جن کي طبي مدد لاءِ جناح اسپتال موڪليو ويو ، جتي زخمن جا سور نه سهندي ٻئي اهلڪار شهيد ٿي ويا. پوليس، رينجرز ۽ حساس ادارن جي اهلڪارن فائرنگ واري هنڌ پهچي ڪڙو چاڙهي ڇڏيو ۽ ثبوت گڏ ڪري ورتا، شهيد ٿي ويل اهلڪارن جي سڃاڻپ حوالدار ارشد ۽ لانس نائڪ راشد جي نالن سان ٿي آهي.سنڌ جي وڏي وزير سيد قائم علي شاهه واقعي جو نوٽيس وٺندي آئي جي سنڌ کان رپورٽ گهري ورتي آهي، جڏهن ته صدر ممنون حسين ۽ وزيراعظم نواز شريف واقعي جي سخت لفظن ۾ مذمت ڪئي آهي، آئي ايس پي آر تصديق ڪئي آهي ته فائرنگ ملٽري پوليس جي گاڏي تي ڪئي وئي، جنهن ۾ سوار ٻنهي اهلڪارن کي مٿي ۾ گوليون لڳيون ۽ اهي شهيد ٿي ويا، اي آئي جي ڪراچي مشتاق مهر ٻڌايو ته ملٽري پوليس جي گاڏي تي ٻٽون ٻڌل هٿياربندن فائرنگ ڪئي، ذريعن مطابق واقعي واري هنڌان هڪ شڪي ماڻحو کي گرفتار ڪري اڻڄاتل هنڌ نيو ويو. ڪراچي ۾ آرمي جي ٻن جوانن تي حملي جي صدر ممنون حسين، وزيراعظم نواز شريف، گورنر سنڌ، وڏي وزير، صوبائي گهرو وزير ۽ ٻين سخت لفظن ۾ مذمت ڪئي آهي، گورنر سنڌ ۽ وڏي وزير واقعي جي رپورٽ طلب ڪري ورتي، وزيراعظم جو چوڻ آهي ته قربانيون ڏيندڙ بهادر جوانن تي کيس فخر آهي، امن ۽ استحڪام ڪراچي جو مستقبل آهي. ڪراچي جي ايم اي جناح روڊ تي هٿياربندن جي فائرنگ ۾ ملٽري پوليس جي ٻن اهلڪارن شهادت جي صدر ممنون حسين سخت لفظن ۾ مذمت ڪئي آهي. وزيراعظم نواز شريف آرمي جي ٻن جوانن جي شهادت جي سخت مذمت ڪندي ڏکويل خاندانن سان همدردي جو اظهار ڪيو آهي.وزيراعظم نواز شريف چيو آهي ته اهڙن بزدلاڻي حملن سان سندن حوصلا ڪمزور نه ٿيندا، جوانن پاڪستان جي امن لاءِ پنهنجون جانيون قربان ڪيون آهن، قربانيون ڏيندڙ بهادر جوانن تي کيس فخر آهي، امن ۽ استحڪام ڪراچي جو مستقبل آهي.گورنر سنڌ ڊاڪٽر عشرت العباد، وڏي وزير سيد قائم علي شاهه ۽ صوبائي گهرو وزير سهيل انور سيال فائرنگ جي واقعي جو نوٽيس ورتو، آءِ جي سنڌ پوليس ۽ ڪراچي پوليس جي چيف کان رپورٽ طلب ڪئي وئي آهي، جڏهن ته پوليس کي واقعي ۾ ملوث جوابدارن کي جلد کان جلد گرفتار ڪرڻ جي پڻ هدايت ڪئي وئي آهي. وڏي وزير سيد قائم علي شاهه ڪور ڪمانڊر ڪراچي ليفٽيننٽ جنرل نويد مختار سان فون تي رابطو ڪيو، جنهن دوران وڏي وزير اهلڪارن جي شهادت تي ڏک جو اظهار ۽ ڄاڻ کان آگاهه ڪيو.

ملٽري پوليس تي حملي کانپوءِ ڪراچي آپريشن وڌيڪ تيز ڪرڻ جو اعلان

اسلام آباد (بيورو) وفاقي حڪومت ايم ڪيو ايم اڳواڻ ڊاڪٽر عمران فاروق جي قتل ڪيس جي ايف آءِ آر پاڪستان ۾ داخل ڪرڻ جو فيصلو ڪري ورتو، چوڌري نثار چيو آهي ته عمران فاروق قتل ڪيس هاءِ پروفائيل ڪيس آهي، ڪراچي آپريشن کي وڌيڪ تيز ڪيو ويندو.اسلام آباد ۾ پريس ڪانفرنس ڪندي وفاقي گهرو وزير چوڌري نثار چيو ته هو ڪراچي ۾ دهشتگردي جي واقعي جي سخت لفظن ۾ مذمت ڪري ٿو، ڪراچي آپريشن ۾ ڪابه گهٽتائي نه ايندي، اهڙن واقعن سان آپريشن ۾ وڌيڪ تيزي ايندي..چوڌري نثار چيو ته ملڪ جي هر حصي ۾ دهشتگردن جو مقابلو ڪيو ويندو، دهشتگرد ملڪ جي ڪنهن به ڪنڊ ۾ هجن، انهنکي منهن ٽوڙ جواب ڏنو ويندو…. وفاقي گهرو وزير چيو ته ملڪ ۾ پهريون ڀيرو عالمي اين جي اوز کي قانون جي دائري ۾ آڻڻ جي ڪوشش ڪئي وئي آهي، 129 اين جي اوز باقاعده رجسٽريشن لاءِ درخواست ڏني آهي، رجسٽريشن جي تاريخ ۾ هڪ مهيني جي واڌ ڪئي وئي آهي….. چوڌري نثار علي چيو ته ڊاڪٽر عمران فاروق جي قتل ڪيس جي ايف آءِ آر پاڪستان ۾ داخل ڪرڻ جو فيصلو ڪيو ويو آهي، ڊاڪٽر عمران فاروق قتل ڪيس هاءِ پروفائيل ڪيس آهي،.وفاقي گهرو وزير چيو ته ڊاڪٽر عمران فاروق قتل ڪيس جي اسڪاٽ لينڊ يارڊ سان گڏ پاڪستاني اداره به جاچ ڪري رهيا آهن،جوابدارن کي ڪٽهڙي ۾ آڻڻ لاءِ حڪومت ڪردار ادا ڪندي.

 

ملڪ ۾ ترقي ۽ خوشحالي جي نئين صبح جلد اڀرندي: ممنون حسين

اسلام آباد (اين اين آءِ) صدر ممنون حسين چيو آهي ته ملڪ ۾ ترقي ۽ خوشحالي جي نئين صبح جلد ايندي ۽ وطن عزيز پرامن طاقتور ۽ ترقي يافته ملڪن جي حيثيت سان اڀرندو جنهن جا عوام جي معيار زندگي تي انتهائي مثبت اثر پوندا صدر اها ڳالهه ڪامسيٽس انسٽيٽيوٽ آف انفارميشن ٽيڪنالوجي جي 28هين ڪانووڪيشن کي خطاب ڪندي ڪئي. صدر ان موقعي تي چيو ته ملڪ ۾ جاري ترقياتي منصوبن سبب ملڪ ۾ خرابيون ختم ٿي وينديون ڇو ته هاڻي ملڪ ۾ ڌانڌلي جو دور ختم ٿي چڪو آهي ۽ هاڻي ملڪ انشاءالله بهتري طرف ويندو ۽ اقوام متحده ۾ انتهائي بلند مقام حاصل ڪندو هن شاگردن ۽ شاگردياڻين کي هدايت ڪئي ته هو پنهنجي ديني ۽ اعليٰ اقدار جي مطابق اعليٰ ترين تعليم حاصل ڪن ۽ پنهنجي پاڪستاني شناخت تي ڪڏهن به ڪو ڏکيو وقت نه اچڻ ڏين ڇو ته اهو ئي ترقي ۽ سربلندي جو راز آهي هن چيو ته ان مقصد لاءِ تعليمي ادارن ۽ تمام اسٽيڪ هولڊرن کي حڪومت سان تعاون ڪندي نصاب کي جديد تقاضائن سان هم آهنگ ڪيو وڃي. صدر چيو ته حڪومت تعليم سان گڏوگڏ اقتصادي استحڪام لاءِ به وڏي جدوجهد ڪري رهي آهي جنهن پاڪ چين اقتصادي شاهراه ۽ بجلي جي پيداوار جا ڪيترائي منصوبا شامل آهن. صدر ان تاثر جي ترديد ڪئي ته موجوده دور ۾ ٻاهرين قرضن ۾ اضافو ٿيو آهي هن چيو ته هلندر دور ۾ ماضي جي قرضن جي ادائيگي لاءِ قرض ورتا ويا جنهن جي نتيجي ۾ ڪيترائي غير ملڪي قرض ادا ڪيا ويا آهن. ان موقعي تي نمايان پوزيشن حاصل ڪندڙ شاگردن ۾ ميڊل ۽ ڪامياب شاگردن ۾ صندون به ورهايون ويون.

 

ملٽري پوليس تي حملي جو مقصد آپريشن ضرب عضب کي ڪمزور ڪرڻ آهي: آرمي چيف

راولپنڊي(بيورو) چيف آف آرمي اسٽاف جنرل راحيل شريف ڳجهين ايجنسين کي هدايت ڪئي آهي ته ملٽري پوليس تي حملو ڪندڙن کي جيترو تڪڙو ٿي سگهي گرفتار ڪيو وڃي. آرمي چيف  حملي ۾ شهيد ٿيندڙ ملٽري پوليساهلڪارن  کي عقيدت جي ڀيٽا ڏني. آئي ايس پي آر پاران جاري هڪ بيان ۾ آرمي چيف چيو آهي ته ملٽري پوليس تي حملي جو مقصد آپريشن ضرب عضب کي ڪمزور ڪرڻ آهي پر دهشتگردن جي بزدلاڻا ڪاررواين سان قومي ارادو ڪمزور نٿو ٿي سگهي.سندس چوڻ هو ته پاڪ وطن جي ڌرتي تان هر قسم جي دهشتگردي ختم ڪرڻ لاءِ پاڪ فوج جا ارادا مضبوط آهن.

 

مڪاني چونڊن ۾ ن ليگ کي تمام گهڻيون ڪاميابيون مليون، کٽيندڙ 90 سيڪڙو آزاد اميدوار به اسان جا آهن: وزير اعظم

لنڊن (اين اين آءِ) وزيراعظم نوازشريف چيو آهي ته مڪاني چونڊن ۾ مسلم ليگ (ن) کي تمام گهڻيون ڪاميابيون مليون آهن کٽيندڙ 90 سيڪڙوآزاد اميدور به اسان جا ئي آهن صحافين سان ڳالهائيندي وزيراعظم نوازشريف چيو ته (ن) ليگ ڪيترن ئي تڪن ۾ ٽڪيٽ نه ڏيئي غلطي ڪئي ٽڪيٽ ڏي ها ته شهر جون سيٽون ٻيڻيون ٿي وڃن ها ايتري تعداد ۾ آزاد اميدور ڪامياب نه ٿين ها مڪاني چونڊن ۾ اسلام آباد جا ڪيترائي تڪ کليل ڇڏيا ايئن نه ڪيون ها ته مسلم ليگ (ن) جو ڪاميابي جو تناسب اڃا وڌيڪ هجي ها.

 

دهشتگرد جيترا حملا ڪندا اسان جو عزم اوترو مضبوط ٿيندو: پرويز رشيد

اسلام آباد (اين اين آءِ) وفاقي سڌسماءَ واري وزير سينيٽر پرويز رشيد چيو آهي ته دهشتگرد ڀڄندي بزدلاڻيون ڪارروايون ڪري رهيا آهن اسان انهن جو پيچو ڪندا رهنداسين دهشتگردن کي انهن جي ٺڪاڻن سميت ختم ڪرڻ اسان جي ذميواري آهي ۽ ان سلسلي ۾ قوم مڪمل طور تي متحد آهي دهشتگردي جي خلاف آپريشن کي منطقي نتيجي تائين پهچائينداسين دهشتگرد ڪيترا به حڪلا ڪندا اسان جو عزم اوترو مضبوط ٿيندو ڪراچي ۾ سيڪيورٽي اهلڪارن تي حملي ۾ ٻن اهلڪارن جي شهادت جي واقعي تي ردعمل جو اظهار ڪندي ميڊيا سان ڳالهائڻ دوران اطلاعات واري وزير چيو ته اسان ان واقعي جي شديد مذمت ڪيون ٿا ۽ تمام شهيدن کي خراج عقيدت پيش ڪيون ٿا جيڪي ملڪ جي لاءِ جانين جو نذرانو ڏيئي رهيا آهن هن چيو ته حڪومتي قدمن ۽ انهن ڪارروائين جي نتيجي ۾ اڄ جو پاڪستان وڌيڪ پرامن ۽ وڌيڪ محفوظ آهي. دهشتگرد ڀڄي رهيا آهن ۽ اهڙي قسم جون ڪارروايون ڪري رهيا آهن هڪ سوال جي جواب ۾ هن چيو ته وزيراعليٰ سنڌ اپيڪس ڪميٽي جو اجلاس گهرايو آهي جنهن ۾ هو تمام صورتحال جو جائزو وٺندو ۽ پنهنجي ذميواري پوري ڪندو.

 

بجلي ٽن مهينن ۾ آڻڻ جو واعدو هو، وزيراعظم غلط بياني تي معافي وٺي: خورشيد شاهه

سکر (اين اين آءِ) قومي اسيمبلي ۾ اپوزيشن ليڊر خورشيد شاهه چيو ته حڪومت ٽن مهينن ۾ بجلي آڻڻ جو واعدو ڪيو هو هاڻي 2018 جون ڳالهيون ٿي رهيون آهن وزيراعظم غلط بياني ڪرڻ تي قوم کان معافي وٺي جيڪڏهن معيشت ٺيڪ آهي ته حڪومت قرض ڇو وٺي رهي آهي حڪومت کي پنجاب کان علاوه ڪنهن ٻئي صوبي تي به توجهه ڏيڻ گهرجي پارليمينٽ ۾ جيڪي ڳالهيون ڪيون وڃن ٿيون اهي عوام کي ٻڌايون وڃن اهڙن خيالن جو اظهار هن سکر ۾ ميڊيا سان ڳالهائيندي ڪيو هن حڪومت کي تنقيد جو نشانو بڻائيندي چيو ته حڪومت هر ٽئين مهيني نئين نئين بجليٽ پيش ڪري ٿي حڪومت مهانگائي ۽ پگهارن ۾ توازن نه رکيو آهي شين تي وڌيڪ ٽيڪس مڙهيو پيو وڃي. جنهن سان عوام جون مشڪلاتون وڌي رهيون آهن هن چيو ته چانورن جي آبادگارن کي تمام گهڻو نقصان ٿي رهيو آهي بجلي مهانگي ٿي رهي آهي خورشيد شاهه چيو ته وفاقي حڪومت کي پنجاب کان علاوه ٻين صوبن تي توجهه ڏيڻ گهرجي.

 

سنڌ جي وڏي وزير ۽ بلاول ڀٽو زرداري جو ڪور ڪمانڊر ڪراچي کي فون، دهشتگردن خلاف ويڙهه ۾ فوج سان گڏ آهيون: پيپلز پارٽي

ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري چيو آهي ته پيپلز پارٽي دهشتگردن خلاف ويڙهه ۾ پاڪ فوج سان گڏ آهي،سندس چوڻ هو ته اسان جي پنهنجي پارٽي دهشتگردن هٿان شهيد ٿي آهي، اسان ڪئين ٿا انهن کي وساري سگهون.بلاول ڀٽو زرداري ڪراچي ڪور ڪمانڊر جنرل نويد مختيار کي فون ڪري ملٽري پوليس واقعي تي شهيد اهلڪارن جي  تعزيت  ڪئي ۽ ڏک جو اظاهر ڪيو سندس چوڻ هو ته  اهڙي قسم جا بزدلاڻا حملا فوج ۽ قوم کي ڊيڄاري يا ڪمزور ڪري نٿا سگهن. پاڪستان جو دشمن اسان جو دشمن آهي،انهن جي خلاف هي ويڙهه وڙهنداسين. بلاول ڀٽو شهيد جوانن کي عقيدت جي ڀيٽا ڏني. فوجي جوانن جي شهادت تي بلاول ڀٽو زرداري پنهنجو لياري وارو دورو روڪي ڇڏيو. ٻئي طرف سنڌ جي وڏي وزير سيد قائم علي شاهه ڪورڪمانڊر ڪراچي ليفٽيننٽ جنرل نويد مختار کي ٽيليفون ڪيو آهي. وڏي وزير جي ترجمان موجب وڏي وزير ڪورڪمانڊر ڪراچي سان ملٽري پوليس جي اهلڪارن جي شهادت تي ڳڻتي جو اظهار ڪيو. وڏي وزير سيد قائم علي شاهه ڪورڪمانڊر ڪراچي کي جانچ بابت حڪم کان آگاهه ڪيو. وڏي وزير واقعي تي صوبائي ايپڪس ڪميٽي جو اجلاس سڀاڻي طلب ڪيو آهي.

 

پ پ وفاق جي علامت آهي ۽ پيپلزپارٽي کي عوام جي ڀرپور حمايت حاصل آهي: قائم علي شاهه

ڪراچي (اين اين آءِ) سنڌ جي وڏي وزير سيد قائم علي شاهه يوم تاسيس جي موقعي تي ملير ۾ هڪ وڏي جلسي ڪرڻ تي پيپلزپارٽي جي چيئرمين بلاول ڀٽو زرداري کي مبارڪباد ڏيندي چيو ته هڪ وڏي جلسي جي انعقاد تي پيپلزپارٽي ڪراچي ڊويزن جا اڳواڻ به مبارڪ جا مستحڪم آهن هن چيو ته پيپلزپارٽي عوامي پارٽي آهي جنهن جون پاڙون عوام ۾ آهن ۽ پيپلزپارٽي وفاق جي علامت آهي ۽ پيپلزپارٽي کي عوام جي ڀرپور حمايت حاصل آهي. جنهن جو ثبوت هلندڙ مڪاني چونڊن جي ٻئي مرحلي ۾ عوام پيپلزپارٽي تي هڪ دفعو بيهر پنهنجي ڀرپور اعتماد جو اظهار ڪيو آهي. وڏي وزير چيو ته پيپلزپارٽي جي چيئرمين بلاول ڀٽو زرداري پيپلزپارٽي جي باني شهيد ذوالفقارعلي ڀٽو ۽ شهيد محترمه بينظير ڀٽو جي ويزن ۽ پيغام کي سڄي ملڪ ۾ عام ڪري رهيو آهي.

 

آپريشن ضرب عضب مڪمل ٿيڻ جو هي آخري سال آهي: اسحاق ڊار

لاهور (اين اين آءِ) خزاني جي وفاقي وزير اسحاق ڊار چيو آهي ته آپريشن ضرب عضب جو مڪمل ٿيڻ جو هي آخري سال آهي، صرف درآمد شين تي ڊيوٽي لاڳو ڪئي وئي آهي جيڪي ماڻهو درآمدي چاڪليٽ ۽ پنير کائين ٿا انهن کي ڪجهه ملڪ لاءِ به ڏيڻ گهرجي، ان آڙ ۾ جيڪڏهن مقامي شين جون قيمتون وڌايون ته انهن خلاف ڪارروائي ڪئي ويندي، آءِ ٽي جي شعبي ۾ پاڪستان تمام پوئتي آهي، پر هاڻ ان جي ترقي لاءِ قدم کنيا پيا وڃن، پاڪستان ۾ ٽيڪنالاجي پارڪ جو افتتاح ڪيو ويندو، اهڙن خيالن جو اظهار هن داتا درٻار جي هجوري ۾ ڪمپيوٽر ليب جو افتتاح ڪرڻ جي موقعي تي ميڊيا سان ڳالهائيندي ڪيو، هن چيو ته هلندڙ مالي سال جي پهرين 6 ماهي ۾ محصولات جي وصولي ۾ 40 ارب جي گهٽتائي هئي جنهن کي پورو ڪرڻ لاءِ ٽيڪس لڳايا ويا آهن، هن چيو ته نه صرف پاڪستان پر ٻاهرين دنيا ۾ به ڪمپيوٽر سان بابت تمام موقعا آهن ۽ ان قدم سان شاگردن کي پاڪستان ۽ ٻين ملڪن ۾ نوڪرين جا موقعا ملندا.