تازيون خبرون

Monthly Archives: December 2015

نئين نسل کي پرامن ۽ روشن پاڪستان ڏينداسين، جتي نفرت جو نعرو نه هجي: نواز شريف

پشاور (مانيٽرنگ ڊيسڪ) پشاور جي آرمي پبلڪ اسڪول سانحي کي سال مڪمل ٿي ويو، شهيدن جي پهرين ورسي ملهائي پئي وڃي، شهيد ٻارڙن ۽ استادن کي ڀيٽا پيش ڪرڻ لاءِ آرمي پبلڪ اسڪول ۾ مک تقريب ۾ وزيراعظم نواز شريف، چيئرمين جوائنٽ چيفس آف اسٽاف ڪميٽي جنرل راشد محمود، آرمي چيف جنرل راحيل شريف سميت ٽنهي هٿياربند فوج جي سربراهن، عمران خان، چئني صوبن جي وڏن وزيرن ۽ وفاقي شرڪت ڪئي، شهيدن جي وارثن کي ميڊل ۽ سرٽيفڪيٽ ڏنا. پنهنجي جانين جو نذرانو ڏئي سڄي قوم کي متحد ڪندڙ آرمي پبلڪ اسڪول سانحي جي شهيدن جي اڄ پهرين ورسي جي موقعي تي کين خراج عقيدت پيش ڪرڻ لاءِ سنڌ سميت سڄي ملڪ ۾ تقريبون منعقد ڪيون ويون آهن. ملڪ جي ننڍن وڏن شهرن ۾ آرمي پبلڪ اسڪول جي شهيدن جي روح کي ايثال ثواب پهچائڻ لاءِ قرآن خواني جو به سلسلو جاري آهي. آرمي پبلڪ اسڪول پشاور ۾ سانحي جي شهيدن کي ڀيٽا پيش ڪرڻ ۽ سندن والدين سان اظهار يڪجهتي لاءِ مک تقريب منعقد ڪئي وئي. تقريب ۾ وزيراعظم نواز شريف، چيئرمين جوائنٽ چيفس آف اسٽاف ڪميٽي جنرل راشد محمود، آرمي چيف جنرل راحيل شريف سميت ٽنهي هٿياربند فوج جي سربراهن، تحريڪ انصاف جي چيئرمين عمران خان، چئني صوبن جي وڏن وزيرن، وفاقي گهرو وزير چوڌري نثار، اسحاق ڊار، خواجا آصف، گورنر ڪي پي ڪي سردار مهتاب عباسي شرڪت ڪئي. تقريب ۾ آزاد ڪشمير جي وزيراعظم چوڌري عبدالمجيد، سينيٽ جو ڊپٽي چيئرمين مولانا عبدالغفور حيدري، گلگت بلتستان جي وڏي وزير، گورنر، جماعت اسلامي جي امير سراج الحق سميت شهيدن جي وارثن، اسڪول جي شاگردن ۽ استادن به شرڪت ڪئي. تقريب دوران وزيراعظم نواز شريف، چيئرمين جوائنٽ چيفس آف اسٽاف ڪميٽي جنرل راشد محمود، پنجاب جي وڏي وزير شهباز شريف، سنڌ جي وڏي وزير سيد قائم علي شاهه، وزيراعليٰ بلوچستان عبدالمالڪ بلوچ، ڪي پي ڪي جي وڏي وزير پرويز خٽڪ، گورنر ڪي پي ڪي سردار مهتاب عباسي، آزاد ڪشمير جي وزيراعظم چوڌري عبدالمجيد، گلگت بلتستان جي وڏي وزير ۽ ٻين سانحي ۾ شهيد ٿيل ٻارڙن ۽ استادن جي وارثن کي ميڊل ۽ سرٽيفڪيٽ ڏنا. ان کان اڳ پشاور سانحي ۾ شهيد ٿيلن جي وارثن جو تقريب ۾ پهچڻ تي وزيراعظم نواز شريف ۽ آرمي چيف جنرل راحيل شريف سميت سموري سياسي ۽ عسڪري قيادت اٿي بيهي استقبال ڪيو. وزيراعظم نواز شريف ۽ آرمي چيف جنرل راحيل شريف شهيد ٿيل ٻارڙن جي وارثن سان ملاقات ڪئي ۽ کين آٿت ڏني. ان کان آرمي چيف جنرل راحيل شريف آرمي پبلڪ اسڪول ۾ پهچڻ تي شاگردن ۽ انهن جي والدين جي آجيان ڪئي. وزيراعظم نواز شريف پشاور ۾ شهيد آرمي پبلڪ اسڪول جي پهرين ورسي جي موقعي تي ٿيندڙ تقريب کي خطاب ڪندي وزيراعظم چيو ته 16 ڊسمبر 2014ع تي آرمي پبلڪ اسڪول جي قرآن پاڪ جي تلاوت ۽ ٻارن جي تراني ٻڌڻ واريون ڀتيون ڌماڪن سان ڌڏي ويون ۽ ڪيترائي معصوم ٻار اسان کان هميشه جي لاءِ وڇڙي ويا، ان سانحي سڄي قوم کي ڌوڏي ڇڏيو ۽ سڄي قوم جي دلين ان سور کي محسوس ڪيو. هن چيو ته 16 ڊسمبر جي واقعي اسان جي دلين کي چيري ضرور ڇڏيو پر اسان کي پاڻ ۾ اتفاق ۽ اتحاد جي ڏور ۾ پوئي ڇڏيو. هن چيو ته اسان وڇڙيل ٻارن جي والدين جي دلي ڪيفيت کي سمجهي سگهون ٿا ۽ انهن جي صبر ۽ سڪون لاءِ دعاڳو آهيون، پر والدين کي ياد رکڻ گهرجي ته انهن جي معصوم ٻارن جي رت سڄي قوم کي متحد ڪري پاڪستان جي راهه جو تعين ڪيو. هن چيو ته والدين سان واعدو آهي ته شهيد ٻارن جي رت جي هڪ هڪ ڦڙي جو حساب ورتو ويندو، وزيراعظم چيو ته سانحي کانپوءِ هر پاڪستاني جي دل ۾ اهو سوال پيدا ٿيو ته انسانيت کان وانجهيل اهي وحشي ڪنهن نرمي جا مستحق آهن يا نه ۽ ڇا اهو وقت ناهي ته دهشتگردن کي ڪيفر ڪردار تائين پهچايو وڃي؟ هن چيو ته آئون سانحي جي خبر ٻڌندي ئي پشاور پهتو هئس ۽ پشاور جي زمين تي قدم رکندي ئي معصوم ٻارن جي رت کيس دهشتگردن خلاف فيصلائتي ضرب لڳائڻ جي فيصلي تائين پهچائي ڇڏيو هو، هن چيو ته سانحي کانپوءِ سياسي ۽ فوجي قيادت گڏ ويٺي ته محسوس ٿيو ته دهشتگردن جي خلاف فيصلائتي ضرب تي ڪنهن کي اختلاف نه آهي ۽ معصوم ٻارن جي رت سڄي قوم کي متحد ڪري ڇڏيو، ان اتحاد جي نتيجي ۾ نيشنل ايڪشن پلان بڻيو ۽ ملڪ جي سياسي ۽ عسڪري قيادت سميت سڄي ان پڪي عزم سان گڏ بيٺي ته ملڪ کي دهشتگردن کان پاڪ ڪري ساهه کڻڻو آهي. وزيراعظم محمد نواز شريف چيو ته سانحي کانپوءِ اسان سڀ هڪ ٿي ان مشن جي پڄاڻي ۾ مصروف آهيون، هن چيو ته پاڪ فوج جنرل راحيل شريف جي قيادت ۾ بي پناهه ڪاميابيون حاصل ڪيون، آپريشن ضرب عضب جي هر ڪاميابي ۾ انهن ئي معصوم ٻارن جو رت ڳالهائي رهيو آهي، آپريشن ضرب عضب ۾ دهشتگردن چيلهه ٽوڙي ڇڏي آهي، انهن جون پناهه گاهون ۽ انفراسٽرڪچر تباهه ڪيو ويو آهي ۽ اهو ڏينهن پري ناهي جڏهن دهشتگردي جو سدائين جي لاءِ خاتمو ٿي ويندو. هن ان موقعي تي اعلان ڪيو ته 16 ڊسمبر کي علم جي قومي ڏهاڙي جي عزم طور ملهايو ويندو ۽ پاڪستان جي ڪنڊ ڪڙڇ کي علم جي روشني سان منور ڪري علم جو ڏيئو وسائيندڙن جو وجود سدائين جي لاءِ ختم ڪيو ويندو، هن چيو ته آئون چاهيان ٿو ته هر سال جڏهن اسان انهن شهيد ٻارن کي انهن جي استادن سان گڏ ياد ڪريون ته اسان اهو به ياد رکون ته جهالت جي اونداهي کي ختم ڪرڻو آهي، هن ان موقعي تي آرمي پبلڪ اسڪول يونيورسٽي قائم ڪرڻ جو به اعلان ڪيو، هن چيو ته خوشحالي جو سج به علم جي روشني سان اڀرندو آهي، اسان نئين نسل کي پرامن ۽ روشن پاڪستان ڏينداسين، جتي نفرت جو نعرو نه پر هم آهنگي ۽ اتفاق ۽ اتحاد جا نغما گونجندا. پاڪستان جي ڪنڊ ڪڙڇ امن جو گهوارو هوندي. هن چيو ته پاڪستان سڀ کان وڏي شهر ڪراچي کي ڏوهن کان پاڪ ڪرڻ ۽ ڊگهي امن جو گهوارو بڻائڻ جي لاءِ ڪوششون ڪري رهيا آهيون، جڏهن ته حڪومتي قدمن جي نتيجي ۾ بلوچستان جي صورتحال ۾ به نمايان بهتري آئي آهي. هن چيو ته دهشتگردي جي خاتمي سان گڏوگڏ توانائي بحران تي پڻ ضابطو آڻڻ لاءِ ڪوششون جاري آهن.

 

سنڌ اسيمبلي ۾ رينجرز جي اختيارن جو مشروط ٺهراءُ منظور، مخالف ڌر جو احتجاج، واڪ آئوٽ

ڪراچي (اين اين آءِ) سنڌ اسيمبلي رينجرز جي وڌيڪ هڪ سال جي مقرري لاءِ قرارداد منظور ڪري ورتو آهي، هن قرارداد ۾ رينجرز جا اختيار محدود ڪيا ويا آهن ۽ کين ڪنهن به اهم شخصيت جي گرفتاري ۽ سرڪاري آفيس تي ڇاپي کان اڳ وڏي وزير کان اجازت ضرور وٺڻي پوندي، اسپيڪر سنڌ اسيمبلي آغا سراج دراني جي صدارت ۾ اجلاس شروع ٿيو، قرارداد گهرو وزير سهيل انور سيال اسيمبلي ۾ پيش ڪيو، اپوزيشن ايجنڊا جون ڪاپيون ڦاڙي ڇڏيون، اجلاس ۾

گوڙ ڪندي واڪ آئوٽ ڪيو، قرارداد جي متن ۾ چيو ته سنڌ ۾ رينجرز کي 12 مهينن لاءِ مقرر ڪيو وڃي، سنڌ حڪومت جي اجازت کانسواءِ شڪ جي بنياد تي رينجرز ڪنهن کي حراست ۾ نه وٺي سگهندي، ۽ سنڌ حڪومت جي اجازت کانسواءِ ڪنهن سرڪاري اسڪول تي ڇاپو نه لڳي سگهندو، گذريل هڪ هفتي کان ڪراچي آپريشن خاص ڪردار ادا ڪندڙ فورس جي اختيارن ۾ واڌ جو معاملو وفاق ۽ سنڌ حڪومت وچ ۾ تڪراري بڻيل هو ۽ ٻنهي پاسن کان بيان جاري ٿي رهيا هئا، قرارداد ۾ چيو ويو ته سڌي ريت دهشتگردي سان تعلق نه هئڻ تي گرفتاري لاءِ وڏي وزير سان رابطو ڪرڻو پوندو، سرڪاري آفيس تي ڇاپي لاءِ اجازت گهربل هوندي، قرارداد کي ايوان ۾ پيش ڪيو ويو ته به شرطن سان منظور ڪيو ويو، قرارداد مطابق رينجرز کي وڌيڪ هڪ سال لاءِ صوبي ۾ مقرر ڪيو ويو آهي، مسودي مطابق رينجرز صرف ٽارگيٽ ڪلرز،م ڀتي خورن، قاتلن ۽ ڏوهارين خلاف ڪارروائي ڪندي، ڪنهن به شخص جنهن جو سڌ سنئون دهشتگردي سان تعلق نه آهي ان کي گرفتار ڪرڻ لاءِ وڏي وزير سان رابطو ڪرڻو پوندو. قرارداد ايوان ۾ پيش ٿي ته راءِ شماري دوران ايم ڪيو ايم سميت اپوزيشن پارٽين احتجاج ڪيو، گوڙ ڪندا ميمبر سيٽن تي اٿي بيٺا ۽ ڪاپيون ڦاڙيون، احتجاج ڪندڙ ميمبرن کي مخاطب ٿيندي اسپيڪر چيو ته جنهن قرارداد لاءِ گوڙ ڪيو پيو ويو، ان جو ايوان ۾ اچڻ تي احتجاج افسوسناڪ آهي، اسپيڪر جي ريمارڪس جي باوجود اپوزيشن جو احتجاج جاري رهيو، اجلاس ۾ پشاور شهيدن لاءِ دعا ڪئي وئي جنهن کانپوءِ رينجرز اختيارن جو مشروط قرارداد سنڌ جي گهرو وزير سهيل انور سيال پيش ڪيو جنهن فوري طور منظور ڪيو ويو.

 

عهد ڪيون ٿا ته دهشتگردي جي خاتمي تائين سک سان نه ويهنداسين: پرويز رشيد

اسلام آباد (اين اين آءِ) سڌسماءَ جي وفاقي وزير پرويز رشيد جو چوڻ آهي ته عهد ڪيون ٿا ته ان وقت تائين سک سان نه ويهنداسين جيستائين پاڪستان مان دهشتگردي ۽ انتهاپسندي ختم نه ٿيندي پشاور جي شهيدن جي ورسي جي موقعي تي هڪ بيان ۾ وفاقي وزير چيو ته اسان جا ٻارڙا اسان جو مستقبل آهي پنهنجي مستقبل سان ڪنهن کي نه کيڏڻ ڏينداسين معصوم شهيدن جي وارثن جو غم لفظن ۾ بيان ڪرڻ ممڪن نه آهي سندس چوڻ هو ته پاڪستان جي تاريخ ۾ 16 ڊسمبر کي ڪاري ڏهاڙي جي طور ياد رکيو ويندو اختلاف وساري دهشتگردي خلاف متحد ٿي اٿڻ تي قوم خراج تحسين جي مستحق آهي پرويز رشيد وڌيڪ چيو ته پاڪستاني قوم دنيا کي واضح پيغام ڏنو آهته دهشتگردن جي اسان جي معاشري ثقافت ۽ مذهب ۾ ڪائي جڳهه نه آهي دهشتگردن جو ڪوئي مذهب ۽ نظريو نه آهي.

 

اسيمبلي ۾ جمهوريت کي گهٽو ڏنو ويو، رينجرز کي پورا اختيار ڏنا وڃن: مخالف ڌر جو مطالبو

ڪراچي (اسٽاف رپورٽر) سنڌ اسيمبلي ۾ مخالف پارٽين جي ميمبرن رينجرز جي اختيارن کي شرطن تي  ڪرڻ واري ٺهراءُ کي رد ڪندي ان کي نيشنل ايڪشن پلان جي ڀڃڪڙي ۽ پيپلز پارٽي جي ڪرپٽ ماڻهن کي بچائڻ جي ڪوشس قرار ڏيندي ان کي رد ڪري ڇڏيو آهي ۽ ان جي خلاف سخت احتجاج ڪيو آهي. ذريعن مطابق سنڌ جي اڳوڻي گهرو وزير ارباب غلام رحيم جو چوڻ آهي ته اسان چورن ۽ ڦورن  کي تحفظ ڏيڻ واري ڪنهن به ٺهراءُ کي نٿا مڃون،شهيدن جي ڏهاڙي جي موقعي تي ٺهراءُ آڻي مزاق اڏايو ويو آهي، ٺهراءُ جو مقصد رڳو پ پ جي ڪرپٽ قيادت،اڳواڻن ۽ ڊاڪٽر عاصم کي بچائڻ آهي.ايم ڪيوايم جي خواجا اظهار الحسن چيو ته اڄ ايوان ۾ هٺ ۽ هوڏ سان ٺهراءُ آندو ويو آهي،اڄ شهيدن جي ڏهاڙي تي ائين نه ٿيڻ گهرجي ها،اڄ جمهوريت کي گهٽو ڏنو ويو آهي،پيپلز پارٽي هميشا مخالف پارٽي کي ڪيرايو آهي.خواجا اظهار الحسن مطالبو ڪندي چيو ته رينجرز کي پورا اختيار ڏنا وڃن.ٺهراءُ جو چٽو مطلب آهي ته حڪومت کي ڪجهه نه چيو وڃي.

 

 آرمي پبلڪ اسڪول کي يونيورسٽي جو درجو،16 ڊسمبر تعليم جو قومي ڏينهن ملهائڻ جواعلان

پشاور (م.ڊ) آرمي پبلڪ اسڪول پشاور ۾ ٿيندڙ مُک تقريب کي خطاب ڪندي وزيراعظم نواز شريف چيو ته هڪ سال پهرين ڏُک ڀريو واقعو پيش آيو، ڏسندي ئي ڏسندي ڪيترائي مسقتبل جا ساٿي اسان کان وڇڙي ويا.سندس چوڻ هو ته پوري قوم هن سانحي جو ڏُک محسوس ڪيو۽ ٻارڙن جا ترانا ٻڌڻ واريون ڀتون ڌمڪان جي آواز سان گونجي اٿيون،انسانن جو مقابلو انهن سان ئي ڪري سگهجي ٿو جيڪي انسان هجن.وزيراعظم جو چوڻ هو ته سانحي کانپوءِ فوجي ۽ سياسي قيادت گڏجي ڪري فيصلو ڪيو ته هاڻي دهشتگردن جي چيلهه ڀڃڻي آهي، جنهن لاءِ گڏيل فيصلي کانپوءِ قومي اسيمبلي مان قانون پاس ڪرائي آپريشن ضرب عضب شروع ڪيو، هر ويڙهه ۾ شهيد شاگردن جو رت ڳالهائي رهيو آهي.آپريشن ضرب عضب دهشتگردن جي چيلهه ڀڃي ڇڏي آهي،اهو ڏينهن پري ناهي جڏهن دهشتگردن جو قلعو جڙ کان ڪڍي ٻاهر اچلايو ويندو.وزيراعظم نواز شريف وڌيڪ چيو ته پاڪستان جو هر علائقو امن جو علائقو بڻائينداسين ڪٿي به اهو تصور نه ڪيو ويندو ته هي علائقو ڪنهن ڦلاڻي شخص جو آهي هي علائقو ڪنهن ٻئي جو آهي،بس هر جڳهه تي پاڪستان ۽ امن جو نالو هوندو.تقريب کي خطاب ڪندي وزيراعظم چيو ته 16 ڊسمبر جي خطرناڪ واقعي اسانکي پاڻ ۾ ڳنڍي ڇڏيو، اسانجو مذهب چئي ٿو ته شهيد جيئرا هوندا آهن.16 ڊسمبر جو واقعو نه وسرندڙ واقعو آهي،ان موقعي تي وزيراعظم 16 ڊسمبر کي تعليم جو قومي ڏينهن ملهائڻ جو اعلان ڪيو ۽ آرمي پبلڪ اسڪول کي يونيورسٽي بڻائڻ جو به اعلان ڪيو.

 

اي پي سي جي شهيدن کي خراج عقيدت پيش ڪرڻ لاءِ زرداري هائوس ۾ تقريب، بلاول ڀٽو زرداري شريڪ، سوئيٽ هوم جي ٻارڙن دعائيه نظم ٻڌايا

اسلام آباد (اين اين آءِ) آرمي پبلڪ اسڪول پشاور جي شهيدن کي خراج عقيدت پيش ڪرڻ لاءِ زرداري هائوس اسلام آباد ۾ هڪ تقريب ٿي، بلاول ڀٽو زرداري هن تقريب ۾ شامل هو، ان موقعي تي قرآن خواني ڪئي وئي ۽ شهيدنلاءِ دعا پڻ ڪئي وئي، تقريب ۾ سوات ۽ وانا جي شهيدن جا ٻارڙا جن جو تعلق سويٽ هومز سان آهي خاص طور تي شرڪت ڪئي، تقريب ۾ اڳوڻو وزيراعظم راجا پرويز اشرف، شيري رحمان، قمر زمان ڪائرا، نئير حسين بخاري، عذار پيچوهو، روبنيا خالد، فيصل ڪريم ڪنڊي، ڊاڪٽر نفيسا شاهه، مهرين ڀٽو، چوڌري ياسين، زمرد خان، رحيم داد خان، رميش لال، مصطفيٰ نواز کوکر، فوزيا حبيب، جميل سومرو، نرگس فيض ملڪ، نورين سيال ۽ صاحبزاده ذوالفقار علي موجود هو، قرآني خواني کانپوءِ شهيدن جي ياد ۾ ميڻ بتيون ٻاريون ويون، ذريعن مطابق پ پ ڪي پي ڪي جي وفد زرداري هائوس ۾ پارٽي چيئرمين بلاول ڀٽو سان ملاقات ڪئي، ملاقات ڪندڙن ۾ رحيم داد خان، فيصل ڪريم ڪنڊي، لياقت شباب، همايون خان، اڪبر خان، ذوالفقار افغاني شامل هئا، وفد پارٽي چيئرمين کي ڪي پي ڪي جي تنظيمي معاملن کان آگاهه ڪيو، انساني حقن واري سيل جي ڪوآرڊينيٽر ڊاڪٽر نفيسا شاهه جي اڳواڻي ۾ وفد به چيئرمين سان ملاقات ڪئي ۽ ملڪ ۾ انساني حقن جي خلاف ورزي بابت رپورٽ پيش ڪئي.

 

وسيم اختر جي خلاف دهشتگردي جي قلمن هيٺ 5 ڪيس داخل

ڪراچي (اسٽاف رپورٽر) ڪراچي جي امڪاني مئير ۽ ايم ڪيوايم جي اڳواڻ وسيم اختر جي خلاف شهر جي مختلف ٿاڻن ۾ دهشتگردي جي قلمن هيٺ 5 ڪيس داخل آهن.ذريعن مطابق ايم ڪيوايم جي اڳواڻ جي خلاف ٿاڻي ملير ڪينٽ،سهراب ڳو ۽ سائيٽ سپر هاءِ وي ۾ 5 ڪيس داخل آهن.وسيم اختر جي خلاف الطاف حسين جي خطاب ۾ سهولتڪار،جڏهن ته مختلف ٽي وي ٽاڪ شوز ۾ حساس ادارن تي الزام لاڳائڻ کانپوءِ ڪيس داخل ڪيا ويا.وسيم اختر تي دهشتگردي جي قلمن هيٺ ڪيس داخل ڪيا ويا آهن،تازو ئي وسيم اختر تي رينجرز پاران سندس ساک کي چيهو رسائڻ تي 50 ڪروڙ رپيا ڏنڊ جي سنڌ هائيڪورٽ ۾ دعويٰ به داخل ڪئي وئي آهي.

 

ڊاڪٽر عاصم جي خلاف دهشتگردي جا ڪيس ختم ڪرڻ وارو خط ظاهر، ايس پي عارب مهر 10 ڊسمبر تي خط ذريعي ڊاڪٽر عاصم جي ڪيس ۾ دهشتگردي جا قلم ختم ڪرڻ جو حڪم ڏنو هو: ذريعا

ڪراچي (اسٽاف رپورٽر) سنڌ هائيرايجيوڪيشن ڪميشن جي چئيرمين ۽ اڳوڻي وفاقي وزير ڊاڪٽر عاصم حسين جي خلاف دهشتگردي جا ڪيس ختم ڪرڻ وارو خط ظاهر ٿي ويو. ايس ايس پي عارب مهر 10 ڊسمبر تي خط ذريعي ڊاڪٽر عاصم جي ڪيس ۾ دهشتگردي جا قلم ختم ڪرڻ جو حڪم ڏنو ڏنو هو.ذريعن مطابق ڊاڪٽر عاصم جيخلاف دهشتگردي جا ڪيس ختم ڪرڻ لاءِ لکيل خط اڳيان اچي ويو آهي.خط جي مطابق ايس ايس پي عارب مهر 10 ڊسمبر تي ڊاڪٽر عاصم جي ڪيس ۾ دهشتگردي جا قلم ختم ڪرڻ جو حڪم  ڏنو آهي.جاچ آفيسر الطاف حسين اعليٰ سياسي ۽ پوليس آفيسرن جي هدايت کانپوءِ عاصم حسين جي خلاف دهشتگردي جا قلم ختم ڪيا.دهشتگردي جا قلم ختم ڪرڻ بابت جمع ٿيندڙ رپورٽ به ميڊيا حاصل ڪري ورتي آهي.رپورٽ مطابق پوليس ڊاڪٽر عاصم کي دهشتگردن جو علان ۽ سهولت ڏيڻ جي ڪيس ۾ بي ڏوهي قرار ڏنو.ڊاڪٽر عاصم جي خلاف دهشتگردن جو اعلاج ڪرڻ جي ڪي به ثبوت نه مليا.پوليس جي 497 جي رپورٽ 21 ڊسمبر تي دهشتگرد ٽوڙ عدالت ۾ پيش ڪئي ويندي.

 

عمران خان جي تقرير دوران شهيدن جي وارثن جو احتجاج، مطالبا پيش، اسان جي ڪوتاهي آهي ته ٻڌايو: ڪپتان

پشاور (م.ڊ) آرمي پبلڪ اسڪول ۾ آڪائيو لائبرري جي افتتاح جي موقعي تي عمران خان جي تقرير دوران شهيدن جي وارثن پاران احتجاج ۽ نعري بازي شروع ٿي وئي،جنهن تي پرويز خٽڪ کي به اسٽيج تي اچڻو پيو ۽ عمران خان شهيدن جي وارثن مان ڪجهه ماڻهن کي  اسٽيج تي گهرايو ۽ اسٽيج انهن لاءِ ڇڏيندي هدايت ڪئي ته  اسان جي ڪوتاهي آهي ته ٻڌايو،واري واري سان پنهنجا مطالبا پيش ڪيو،اسان کان جيڪو پڳو اهو ڪنداسين،ٻارن جي معاملي تي ڪنهن به قسم جي لاپرواهي نه ڪئي ويندي.ان کانپوءِ هڪ ٻار جي مائٽ ڳالهائيندي چيو ته عمران خان جي کنيل قدمن کي اسان ساراهيون ٿا پر اسان کي پلاٽ،پيسا يا گهر نه گهرجن،رڳو انصاف کپي.هڪ سال ۾ صوبائي حڪومت ڪهڙي ذميواري پوري ڪئي آهي؟آئي جي نااهلي جو اعتراف ڪيو پر  هن وقت تائين ان کي لاٿو ناهي ويو،اسان سان ڪيل واعدا اڄ تائين پورا ناهن ڪيا ويا،پشاور سانحي جي ذميوارن کي پڪڙڻ لاءِ جڊيشل ڪميشن جوڙي وڃي،سياستدان اچن وڃن ٿا پر شهيدن جي وارثن وٽ نٿا اچن.ان کانپوءِ عمران خان تقرير ڪندي چيو ته  سندس ماءُ ڪينسر جي مرض ۾ ورتل هئي ۽ ان ئي مرض ۾ هو لاڏاڻو ڪري وئي،ايمان وڏو ڪمزور ٿيو،اها ماءُ جيڪا ٻارن سان پيار ڪندي هئي اها وڇڙي وئي پر ان ئي دوران خبر پئي ته پاڪستان ۾ ڪو به  ڪينسر جو اسپتال ناهي ۽ اڄ شوڪت خانم کي هر ڪو ڄاڻي سڃاڻي ٿو،ان وقت خبر پئي ته الله تعاليٰ کي مون کان ڪو وڏو ڪم وٺڻو هو.هن چيو ته جڏهن جمائما کان ڌار ٿيس ۽ ٻار وڇڙيا ته گهڻو ڏک ٿيو،مان پاڻ پيءُ آهيان،شهيدن جو ڏک سمجهي سگهان ٿو،جيستائين توهان جو ڌرڻي تي اعتراض آهي ته اهو منهنجي ذات لاءِ نه هو،مون وٽ منهنجي ذات لاءِ هر ضرورت جي شي موجود آهي،عمران خان ٻڌايو ته ڌرڻي جي دوران شهيد ٻارڙن جون تصويرون ڏٺيون ته اهو فيصلو ڪيو هو ته سڀ ڪجهه ڇڏي انهن ظالمن جي پويان وڃڻو آهي،اها ڪابه سياست ناهي،عمران خان به هڪ انسان آهي،ٻار ته واپس نٿو آڻي سگهان،سڀ کان وڏي دعا اها آهي ته الله توهان کي صبر ڏئي.باقي وزيراعظم نوازشريف هڪ يونيورسٽي جو اعلان ڪيو،عمران خان شاگردن کي خوشي واري خبر ٻڌائي ته هري پور ۾ خيبرپختونخوا جي سڀ کان وڏي ۽ اسٽيٽ آف دي آرٽ ٽيڪنيڪل يونيورسٽي هري پور ۾ ٺاهي پئي وڃي،جيڪا شهيدن جي نالي تي ٺاهي ويندي ۽ جلد ئي ٺاهه تي صحيح ٿيڻ واري آهي.

 

سانگهڙ واقعي ۾ مارجي ويل ٻن پوليس اهلڪارن سميت ٽن ڄڻن جا مڙهه مٽيءِ ماءُ حوالي

سانگهڙ (نمائندو) سانگهڙ ۾ پ پ ۽ فنڪشنل ليگ ڪارڪنن وچ ۾ جهيڙي جي نتيجي ۾ مارجي ويل ٻن پوليس اهلڪارن هڪ پ پ اڳواڻن جي ٽنڊو آدم ۾ تدفين ڪئي وئي ۽  پ پ اڳواڻ گل محمد مري جي اڄ جهول ۾ تدفين ڪئي ويندي، واقعي ۾ زخمي ٿيل 6 ڄڻن جو حيدرآباد ۽ نوابشاهه جي اسپتالن ۾ علاج جاري آهي، پوليس پاران چئن ڄڻن کي گرفتار ڪرڻ خلاف ف ليگ ڪارڪنن ٿاڻي آڏو احتجاجي مظاهرو ڪيو، جنهن دوران پوليس لٺبازي  ڪري مظاهرين کي ڇڙ وڇڙ ڪري ڇڏيو. گذريل ڏينهن سانگهڙ ۾ ف ليگ ۽ پ پ ڪارڪنن وچ ۾ جهيڙي جي نتيجي ۾ فائرنگ ۾ پوليس اهلڪار عاشق مري ۽ نبي بخش ڏيرو، پ پ اڳواڻ گل محمد مري ۽ گل محمد شاهه مارجي ويا هئا ۽ پ پ اڳواڻ فدا حسين ڏيرو  جي ڀائيٽي شير محمد ڏيرو سميت  6 ڄڻا زخمي ٿي پيا هئا. مارجي ويلن مان پوليس اهلڪار عاشق مري، نبي بخش ڏيرو ۽ پ پ اڳواڻ گل محمد شاهه جي ٽنڊو آدم ۾ تدفين ڪئي وئي، جڏهن ته واقعي جي سوڳ ۾ ٽنڊو آدم شهر مڪمل طور بند آهي. فائرنگ ۾ مارجي ويل پ پ اڳواڻ گل محمد مري جو اڄ جهول  ويجهو اباڻي ڳوٺ گل محمد مري ۾ مڙهه مٽيءَ ماءُ حوالي ڪيو ويندو. ڪارڪنن وچ ۾ جهيڙي دوران زخمي ٿيل پ پ اڳواڻ فدا حسين ڏيرو جي ڀائيٽي شير محمد ڏيرو سميت 6 ڄڻن جو حيدرآباد ۽ نوابشاهه جي اسپتالن ۾ علاج جاري آهي. پوليس جو چوڻ آهي ته واقعي بعد مختلف علائقن ۾ ڪاررايون ڪري چئن شڪي جوابدارن کي گرفتار ڪيو ويو، جن کان جاچ جاري آهي. چئن ڄڻن کي گرفتار ڪرڻ خلاف فنڪشنل ليگ ڪارڪنن ۽ وارث سانگهڙ ٿاڻي آڏو احتجاجي مظاهرو ڪري ڌرڻو هنيو، جنهن دوران پوليس لٺبازي ڪري مظاهرين کي ڇڙ وڇڙ ڪري ڇڏيو. مظاهرين جو چوڻ آهي ته پوليس بنا جواز سندن گهرن تي چڙهائي ڪري چادر ۽ چئو ديواري جو تقدس پامال ڪيو ڪيو ۽ چئن بيگناهه ماڻهن کي گرفتاري ڪري لاڪپ ڪيو آهي. هنن مطالبو ڪيو ته بيگناهه گرفتار ڪيل چئن ڄڻن کي بازياب ڪرائي بنا جواز گهرن تي چڙهايون ڪرڻ  جو سلسلو بند ڪيو وڃي.