تازيون خبرون

Daily Archives: November 26, 2015

اسفند يار ولي جي نواز شريف سان ملاقات، وزيراعظم چين پاڪستان راهداري رٿا تي کيس مطمئين ڪري ڇڏيو

اسلام آباد (اين اين آءِ) وزيراعظم نواز شريف چين پاڪستان راهداري رٿا جي حوالي سان عوامي نيشنل پارٽي جي سربراهه اسفند يار ولي کي مطمئين ڪيو آهي ۽ هن رٿا جي اولهندي روٽ کي هاءِ بدران موٽر وي ۾ تبديل ڪرڻ جا حڪم جاري ڪيا آهن، اسفند يار ولي چيو آهي ته فاٽا ۾ روڊ ٺهڻ سان اتان جي معدنيات مان فائدو وٺي سگهجي ٿو، خميس تي افغانستان جي دوري تي وڃي رهيا آهيون، گڏجي ويهڻ سان اعتماد پيدا ٿيندو، قومي ايڪشن تي مڪمل عمل نه پيو ٿئي جيئن ٿيڻ گهرجي ها، وزيراعظم سان ملاقات کانپوءِ ميڊيا سان ڳالهائيندي اسفند يار ولي چيو ته وزيراعظم سان ملاقات جنهن ۾ ان سان گڏ لنچ به ڪئي، ملاقات ۾ چين پاڪستان راهداري بابت تفصيلي ڳالهه ٻولهه ٿئي، وزيراعظم اولهندي روٽ جي هاءِ وي کي موٽر وي ۾ تبديل ڪرڻ جو حڪم ڏنو آهي، انڊسٽري زون بابت وزيراعظم پيرس دوري کانپوءِ آگاهه ڪندو، هن چيو ته چين کي سنڪيانگ ۾ جيڪي مسئلا آهن اهي مسئلا اسان کي فاٽا ۾ آهن، چين کي جيڪي مسئلا تبت ۾ هئا اهي اسان کي بلوچستان ۾ آهن، هن چيو ته هڪ روڊ سڄي فاٽا مان لنگهي وڃي ته اتي موجود ملڪ جي 80 سيڪڙو معدنيات مان فائدو حاصل ڪري سگهجي ٿو، ناڻي وزير کي فنڊ پيدا ڪرڻ جو طريڪو اچي ٿو، ڪميٽي جي سفارشن کانپوءِ سمورين پارٽين کي گهرائي اعتماد ۾ ورتو وڃي.

 

قومي اسيمبلي ۾ لوڊشيڊنگ خلاف احتجاج، بل ادا نه ڪندڙ کي بجلي نه ملندي: وفاقي حڪومت

اسلام آباد (بيورو) قومي اسيمبلي اينٽي مني لانڊرنگ ترميمي بل سميت مختلف بلز جي منظوري ڏئي ڇڏي آهي، ايوان ۾ پ پ ميمبرز لوڊشيڊنگ خلاف احتجاج ڪندي وزيراعظم نواز شريف کان نوٽيس وٺڻ جو مطالبو ڪيو آهي، مملڪتي وزير عابد شير علي جو چوڻ آهي ته جيڪو بل ادا نه ڪندو، ان کي بجلي نه ڏني ويندي. قومي اسيمبلي جو اجلاس ڊپٽي اسپيڪر مرتضيٰ جاويد عباسي جي صدارت هيٺ ٿيو، جنهن ۾ وزيراعظم نواز شريف به شرڪت ڪئي. اجلاس جي شروعات ۾ ميانوالي ويجهو جهاز حادثي ۾ شهيد ٿيل ايئرفورس جي پائليٽ مريم مختيار جي روح کي ايثال ثواب پهچائڻ لاءِ فاتح خواني ڪئي وئي. ايوان ۾ وزيراعظم نواز شريف جي موجودگي دوران پ پ ميمبرز سنڌ ۾ اڻ اعلانيل لوڊشيڊنگ خلاف احتجاج ڪيو. پ پ ايم اين اي شگفتا جماڻي چيو ته بدين سميت سنڌ ۾ 18 کان 20 ڪلاڪن تائين لوڊشيڊنگ ڪئي پئي وڃي، وزيراعظم کي اپيل آهي ته سنڌ ۾ بجلي جي بندش جو نوٽيس وٺي. پاڻي ۽ بجلي واري وفاقي وزير مملڪتي وزير عابد شير علي چيو ته حڪومت لوڊشيڊنگ جي خاتمي لاءِ قدم کڻي رهي آهي، پر جيڪو بل ادا نه ڪندو، ان کي بجلي به نه ملندي. پاڻي ۽ بجلي واري وفاقي وزير خواجه آصف چيو ته پيپلزپارٽي کي خبر آهي ته بدين ۾ ڇا ٿي رهيو آهي، رڳو الزام نه هنيا وڃن ٻڌايو وڃي ته ڪهڙن علائقن ۾ 18 کان 20 ڪلاڪ بجلي بند آهي. اجلاس ۾ ناڻي واري وفاقي وزير اسحاق ڊار سينيٽ مان منظوري بعد اينٽي مني لانڊرنگ ۾ ترميم جو بل پيش ڪيو، جنهن جي ايوان پاران اتفاق راءِ سان منظوري ڏني وئي، بل تحت دهشتگردن جي مالي معاونت ڪندڙ ۽ مني لانڊرنگ جي روڪٿام بابت حڪمت عملي واضح ڪئي ويندي، مني لانڊرنگ ۽ دهشتگردن جي مالي معاونت بابت نه صرف رپورٽس تيار ڪيون وينديون پر انهن تي عمل درآمد به يقيني بڻايو ويندو. بل تحت دهشتگردن جي فنڊنگ روڪي ويندي، اهڙا ماڻهو جن جو واسطو دهشتگردي يا اهڙي سرگرمين ۾ ملوث تنظيمن سان هوندو، انهن خلاف به ڪارروائي ڪئي ويندي. ايوان ۾ ڪمپني آرڊيننس 1984  ۽ اسٽاڪ ايڪسچينج ايڪٽ 2012 ۾ ترميم واري بلز جي منظوري ڏني وئي، جڏهن ته جي يو آءِ سربراهه مولانا فضل الرحمان ۽ پي ٽي آءِ جي شيرين مزاري جي مخالفت سبب هلال اٿارٽي جي قيام بابت ترميم بل جي منظوري سڀاڻي تائين ملتوي ڪئي وئي.

 

ڀارتي جارحيت جو دفاع ڪرڻ جي صلاحيت رکون ٿا: پاڪستان

استنبول (اين اين آءِ) وفاقي وزير خواجه آصف چيو آهي ته ڀارت جي جارحيت جو دفاع ڪرڻ جي مڪمل صلاحيت آهي، مودي جنهن انتهاپسنداڻي سوچ سان مٿي ويو اهڙي طرح زمين تي اچي رهيو آهي، ميڊيا سان ڳالهائيندي هن چيو ته داعش خلاف ترڪي ۽ روس پاڻ ۾ وڙهيا ته فائدو دهشتگردي کي ٿيندو، هن چيو ته جيڪڏهن ڀارت جي نيت صاف هجي ته پاڪستان پر خلوص لاڳاپن جو خواهشمند آهي، گذريل سالن ۾ ڀارت پاڻ ماحول خراب ڪيو ۽ وڇوٽيون وڌايون، امن لاءِ جيڪا ڪوشش ڪري سگهجي ٿي اها ڪرڻ گهرجي، هن چيو ته روس پاران ترڪي جي فضائي حدن جي خلاف ورزي تي ٻنهي ملڪن جا معاملا ڳالهه ٻولهه ذريعي حل ٿي سگهن ٿا، هن چيو ته پاڪستان کي ٽياڪڙي لاءِ آڇ ڪئي وئي ته ڪردار ادا ڪندو، هن چيو ته روس سان ٻن سالن کان بهتر لاڳاپا آهن پر ترڪي سان برادر اسلامي ملڪ وانگر مثالي لاڳاپا آهن.

 

حڪومت ۽ قومي ادارن تي ڪوڙ فريب ۽ بدنيتي تي ٻڌل تنقيد ۽ بي معنيٰ الزامن جي سياست ختم ٿيڻ گهرجي: صدر

فيصل آباد (اين اين آءِ) پاڪستان جي صدر ممنون حسين چيو آهي ته حڪومت ۽ قومي ادارن تيڪوڙ فريب ۽ بدنيتي تي ٻڌل تنقيد ۽ بي معنيٰ الزامن جي سياست ختم ٿيڻ گهرجي ته جيئن ملڪ کي ترقي جي دڳ تي آڻي سگهجي صدر اها ڳالهه فيصل آباد ۾ پاڪستان ٽيڪسٽائيل ايسوسيئيشن جي اهتمام هيٺ ايڪسپورٽ ايڪسيلينس ايوارڊ جي تقريب کي خطاب ڪندي ڪئي تقريب ۾ پنجاب جي گورنر محمد رفيق رجوانا پڻ موجود هو صدر ان موقعي تي ايوارڊ پڻ ورهايا جن ۾ فيصل آباد چيمبر آف ڪامرس اينڊ انڊسٽري جو صدر چوڌري محمد نواز ايف پي سي سي آءِ جو صدر ميان محمد ادريس ۽ فيصل آباد جا ٻيا صنعتڪار شامل هئا صدر چيو ته ملڪ ۾ توانائي جا مسئلا حل ڪرڻ جي سلسلي ۾ ايل اين جي گهرائڻ جو فيصلو الله جي نعمت جي حيثيت رکي ٿو ان ڏس ۾ ڪئي ويندڙ تنقيد بي معنيٰ ۽ الزام مڪمل طور تي غلط آهن اهڙي طرح ننديپور رٿا ۾ به هڪ پئسي جي بدديانتي ناهي ٿي هن چيو ته جيڪي ماڻهو پاڻ ڪجهه نٿا ڪن اهي ٻين کي به ڪم ڪرڻ کان روڪڻ جي ڪوشش ڪن ٿا هي سلسلو هاڻي ختم ٿيڻ گهرجي هن چيو ته ڪجهه ماڻهن ان جي ذات تي به الزام مڙهيا آهن صدر چيو ته موجوده حڪومت جون پاليسيون درست آهن ۽ اهي قومي مسئلن جي حل لاءِ سنجيدگي ۽ اخلاص سان ڪم ڪري رهي آهي پوري قوم ۽ خاص طور تي تاجرن کي ان ڏس ۾ حڪومت جو ساٿ ڏيڻ گهرجي. تقريب کي پاڪستان ٽيڪسٽائيل ايڪسپورٽرز ايسوسيئيشن جي چيئرمين اصغر خان ۽ گروپ ليڊر احمد ڪمال پڻ خطاب ڪيو.

 

اسفند يار ولي جي نواز شريف سان ملاقات، وزيراعظم چين پاڪستان راهداري رٿا تي کيس مطمئين ڪري ڇڏيو

اسلام آباد (اين اين آءِ) وزيراعظم نواز شريف چين پاڪستان راهداري رٿا جي حوالي سان عوامي نيشنل پارٽي جي سربراهه اسفند يار ولي کي مطمئين ڪيو آهي ۽ هن رٿا جي اولهندي روٽ کي هاءِ بدران موٽر وي ۾ تبديل ڪرڻ جا حڪم جاري ڪيا آهن، اسفند يار ولي چيو آهي ته فاٽا ۾ روڊ ٺهڻ سان اتان جي معدنيات مان فائدو وٺي سگهجي ٿو، خميس تي افغانستان جي دوري تي وڃي رهيا آهيون، گڏجي ويهڻ سان اعتماد پيدا ٿيندو، قومي ايڪشن تي مڪمل عمل نه پيو ٿئي جيئن ٿيڻ گهرجي ها، وزيراعظم سان ملاقات کانپوءِ ميڊيا سان ڳالهائيندي اسفند يار ولي چيو ته وزيراعظم سان ملاقات جنهن ۾ ان سان گڏ لنچ به ڪئي، ملاقات ۾ چين پاڪستان راهداري بابت تفصيلي ڳالهه ٻولهه ٿئي، وزيراعظم اولهندي روٽ جي هاءِ وي کي موٽر وي ۾ تبديل ڪرڻ جو حڪم ڏنو آهي، انڊسٽري زون بابت وزيراعظم پيرس دوري کانپوءِ آگاهه ڪندو، هن چيو ته چين کي سنڪيانگ ۾ جيڪي مسئلا آهن اهي مسئلا اسان کي فاٽا ۾ آهن، چين کي جيڪي مسئلا تبت ۾ هئا اهي اسان کي بلوچستان ۾ آهن، هن چيو ته هڪ روڊ سڄي فاٽا مان لنگهي وڃي ته اتي موجود ملڪ جي 80 سيڪڙو معدنيات مان فائدو حاصل ڪري سگهجي ٿو، ناڻي وزير کي فنڊ پيدا ڪرڻ جو طريڪو اچي ٿو، ڪميٽي جي سفارشن کانپوءِ سمورين پارٽين کي گهرائي اعتماد ۾ ورتو وڃي.

 

دهشتگردي خلاف ڀرپور ڪارروائي تي جنرل راحيل شريف جي خدمتن جو اعتراف، برازيل اعليٰ ترين اعزاز ڏيئي ڇڏيو

برازيليه (مانيٽرنگ ڊيسڪ) برازيل جي حڪومت دهشتگردي جي خلاف ڀرپور ڪارروائي تي آرمي چيف جنرل راحيل شريف جي خدمتن جو اعتراف ڪندي کيس برازيل جو اعزاز آرڊر آف ميرٽ ڏنو آهي هي اعزاز خاص طور تي هڪ تقريب ۾ ڏنو ويو جنرل راحيل شريف پهريون ايشيائي فوجي سربراهه آهي جنهن کي برازيل پاران هي اعزاز ڏنو ويو آهي ان موقعي تي پيغام ۾ چيو ويو ته جنرل راحيل شريف کي دهشتگردي جي لعنت جي خلاف جرئتمندي سان وڙهڻ مختلف خطرن کي منهن ڏيندي ڪاميابي سان فوج جي قيادت ڪرڻ ۽ قوم کي مايوسي جي عالم ۾ اميد جو ڪرڻو ڏيڻ سميت خطي ۾ امن ۽ استحڪام جي فروغ لاءِ عظيم خدمتن تي هي اعزاز ڏنو ويو آهي.

 

جتي به وڃو رڳو گند جا ڍير لڳل آهن، ڇا صفائي لاءِ جنت مان فرشتا ايندا؟ : سپريم ڪورٽ

اسلام آباد (بيورو) سـُپريم ڪورٽ، ماحولياتي گدلاڻ جي خاتمي بابت جوڳا قدم نه کڻڻ تي سخت ڪاوڙ جو اظهار ڪندي وفاق ۽ چئني صوبن کان رپورٽ طلب ڪري ورتي آهي، عدالت ريمارڪس ۾ چيو آهي ته ڪراچي سميت جتي به وڃو، هر طرف گند جا ڍير لڳا پيا آهن، ڇا صفائي ڪرڻ لاءِ جنت مان فرشتا ايندا.؟ چيف جسٽس، جسٽس انور ظهير جمالي جي سربراهي ۾ سپريم ڪورٽ جي ٽي رڪني بينچ ماحولياتي گدلاڻي جي خاتمي بابت پاڻمرادي نوٽيس جي ٻڌڻي ڪئي. ٻڌڻيءَ دوران وفاقي حڪومت پاران اٽارني جنرل ۽ چئني صوبن پاران ماحولياتي گدلاڻ جي خاتمي بابت رپورٽ پيش ڪئي، جنهن تي عدالت بي اعتمادي جو اظهار ڪيو. چيف جسٽس انور ظهير جمالي ريمارڪس ڏنا ته 2003 کان رڳو ڪاغذي  ڪارروايون ٿي رهيون آهن، 12 سال گذرڻ باوجود ڪي به عملي قدم ناهن کنيا ويا، ماحولياتي گدلاڻ جي خاتمي لاءِ ڪي به قدم ناهن کنيا وڃن. چيف جسٽس ريمارڪس ڏنا ته ڪراچي ۾ گندن جي ڍيرن کي باهه ڏني پئي وڃي، باهه جي دونهين سان آبادي وارا علائقا متاثر ٿي رهيا آهن. جسٽس اعجاز افضل ريمارڪس ڏنا ته ڪراچي ۾ سمنڊ تي هڪ منٽ به بيهڻ ڏکيو آهي، ڇا صفائي ڪرڻ لاءِ جنت مان فرشتا ايندا.؟ ڪي پي ڪي جي ايڊيشنل ايڊووڪيٽ جنرل قادر بلوچ چيو ته خيبرپختونخواهه ۾ ٻوٽا لڳائڻ لاءِ سونامي مهم شروع ڪئي وئي آهي، ان تي چيف جسٽس ريمارڪس ڏنا ته سونامي جو مطلب ته تباهي هوندو آهي، ڇا توهان ٻوٽن جي تباهي چاهيو ٿا.؟ خيبرپختونخواهه جي ايڊيشنل ايڊووڪيٽ جنرل چيو ته مهم جو نالو سونامي رکيو ويو آهي، هو تباهي نه پر ماحول جي بهتري چاهين ٿا. جسٽس اعجاز افضل ريمارڪس ڏنا ته ماحول جي بهتر جي ڳالهه بعد ۾ ڪيو، پهريان صوبي جون اسپتالون ڏسو ته انهن جو ڪهڙو حاصل آهي. عدالت، وفاق ۽ چئني صوبن کان ماحولياتي گدلاڻ جي خاتمي بابت رپورٽ طلب ڪندي ٻڌڻي ملتوي ڪري ڇڏي.

 

هاري پيڪيج ٽوپي ڊرامو،روڊ ٺاهڻ سان غربت ختم نه ٿيندي:خورشيد شاهه

سوات (م.ڊ) سوات ۾ ضلعي بار ايسوسيئشن ۽ هنگورا ۾ ضلعي صدر شمشير علي خان جي گهر تي ڪارڪنن سان خطاب ڪندي،قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته نواز شريف جي موٽروي ۽ ٻين ترقياتي رٿائن جي اعلانن سان غربت ختم نٿي ٿي سگهي،هاري پيڪيج به ٽوپي ڊرامو آهي،ڇو ته هاري بک مري رهيا آهن.سندس چوڻ هو ته يهودي گروهه مسلمانن جو اوڍڻ اوڙهي دهشتگردي ڪري رهيا آهن، جڏهن ته دهشتگردي پکيڙڻ وارا اڄ سپر پاور بڻيا ويٺا آهن،خورشيد شاهه جو چوڻ هو ته ڪنٽينر تي چڙهندڙن جي جمهوريت جي خلاف سازش پيپلز پارٽيءَ ناڪام بڻائي ، ان موقعي تي اڳوڻي وفاقي سُڌ سماءَ واري وزير قمر زمان قائرا ۽ ٻين به خطاب ڪيو.

 

انتهاپسند هندو تنظيم شيوسينا عامر خان کي ڀارت ڇڏي پاڪستان وڃڻ جي ڌمڪي ڏئي ڇڏي

ممبئي (م.ڊ) بالي ووڊ جو مسٽر پرفيڪشنسٽ عامر خان ڀارت ۾ وڌندڙ اڻ سهپ ۽ انتهاپسندي خلاف بيان ڏيڻ تي ڏچي ۾ اچي ويو آهي،انتهاپسند هندو تنظيم شيوسينا چيو آهي ته جيڪڏهن عامر خان پاڻ کي هندستان ۾ غير محفوظ سمجهي ٿو ته پاڪستان هليو وڃي، جڏهن ته سندس بيان خلافڪانپور ۾ ڪيس پڻ داخل ڪيو ويو آهي، جنهن جي ٻڌڻي پهرين ڊسمبر تي ٿيندي، ڀارتي ميڊيا مطابق مهاراشٽر جي ماحوليات واري وزير ۽ شيوسينا جي سينيئر اڳواڻ رامداس ڪدم جو چوڻ آهي ته عامر خان هن مهل تائين هڪ مشهور اداڪار هو پر هاڻ اسان سمجهون ٿا ته اسان نانگ کي کير پيئاري رهيا هئا سين، جيڪڏهن هو هتي رهڻ نه ٿو چاهي ته پاڪستان هليو وڃي، واضح هجي ته هلندڙ هفتي نئين دهلي ۾ هڪ تقريب جي موقعي تي عامر خان جو چوڻ هو ته سندس گهرواري ڪرن رائو ٻارن جي حفاظت لاءِ کيس ملڪ ڇڏڻ جي تجويز ڏني، جيڪا مون لاءِ ڳڻتي جي گهڙي هئي. هن ان موقعي تي ملڪ ۾ وڌندڙ انتهاپسندي ۽ اڻ سهپ تي پڻ سوال اٿاريا ، سندس اهڙي بيان کانپوءِ هو وڏي ڏچي ۾ اچي ويو آهي، ڀارتي حڪمران پارٽي بي جي پي جي ترجمان شاهنواز حسين جو چوڻ هو ته عامر خان اهو نه وساري ته کيس هندستان ئي سپر اسٽار بڻايو آهي، ڀارت جي مختلف علائقن ۾ عامر خان مظاهرا به ٿيا ۽ سندس پوسٽرن تي ڪارو رنگ هارڻ سان گڏ اهي ڦاڙيا به ويا، جنهن کانپوءِ سندس گهرجي سيڪيورٽي وڌائي وئي آهي.

 

ماضي ۾ حڪومت ڪندڙن هڪٻئي جو پڇاڻو نه ڪيو ، هڪٻئي جي ڪرپشن تي ڪک ۽ ڍڪَ رکيا: سراج الحق

ڪراچي (اسٽاف رپورٽر) جماعت اسلامي جي امير سراج الحق چيو ته ڪراچي جي خوشحالي ۽ ترقي کي اڻٽر سمجهون ٿا ۽ ان لاءِ ئي تحريڪانصاف سان ٻڌي ڪري رهيا آهيون.28 نومبر تي  ڪراچي ۾ وڏي ريلي ڪڍي ويندي، جنهن ۾ عمران خان به شامل ٿيندو. ذريعن مطابق پريس ڪانفرنس ڪندي سراج الحق چيو ته ماضي ۾ حڪومت ڪندڙن هڪٻئي جو پڇاڻو نه ڪيو ۽ هڪٻئي جي ڪرپشن تي ڪک ۽ ڍڪَ رکيا. هاڻي به “اسٽيٽس ڪو” جون قوتون هڪ ٿي ويون آهن.سندس چوڻ هو ته مڪاني چونڊن تي هڪ وڏو سواليا نشان موجود آهي ۽ ڪيترائي شڪ آهن، 5 ڊسمبر تي سليڪشن نه پر اليڪشن چاهيون ٿا، اسان چاهيون ٿا ته آفيسرن جي مقرري جو عمل شفاف بڻايو وڃي ۽ پولنگ اسٽيشنز جي اندر فوج جي مقرري ضروري آهي. سراج الحق جو چوڻ هو ته 28 نومبر تي ڪراچي ۾ وڏي ريلي ڪڍي ويندي، جنهن ۾ عمران خان به شامل هوندو.