تازيون خبرون

Daily Archives: November 24, 2015

پرينيتي چوپڙا ثانيا مرزا کي سندس ئي ريڪيٽ سان آشيرواد ڏئي ڇڏيو

ممبئي (شوبز نيوز) بالي ووڊ اداڪارا پرينيتي چوپڙا ڀارتي ٽينس اسٽار ثانيا مرزا کي سندس ئي ريڪيٽ سان آشيرواد ڏئي ڇڏيو، 29 ورهين جي پرينيتي چوپڙا ٽوئٽر تي هڪ تصوير ونڊي آهي، جنهن ۾ ثانيا مرزا کي پنهنجي ئي ريڪي سان کانئس آشيرواد وٺندي ڏسي سگهجي ٿو، پرينيتي لکيو آهي ته جيتوڻيڪ ثانيا کي ضرورت ناهي پر مان پوءِ به کيس آشيرواد ڏئي رهيا آهيان ۽ اهو به سندس ئي ريڪيٽ سان! ڇا ته ڏينهن آهي. ثانيا به اها تصوير ٽوئٽر تي ونڊي ۽ ان سان گڏ اهو به لکيو ته ڇا ته زبردست ڏينهن آهي، جو پرينيتي مونکي آشيرواد ڏئي رهي آهي.

 

عمر شريف جي ڪاميڊيءَ جي اسٽائل جو ديوانو آهيان: جاني ليور

ممبئي(اي پي پي) بالي ووڊ ڪاميڊين جاني ليور چيو آهي ته مان پاڪستاني ڪاميڊين ۽ ميزبان عمر شريف جو وڏو فين ۽ ديوانو آهيان. پنهنجي هڪ تازي انٽرويو ۾ جاني ليور چيو ته هن بالي ووڊ جي ٺهندڙ اٽڪل 85 سيڪڙو فلمن ۾ ڪم ڪيو آهي اها فلم ڪنهن به نسل لاءِ ڪنهن به مضمون تي ٺهندڙ ڇو نه هجي مون کي فلمساز اهو چوندا آهن ته جاني تو هرحال ۾ اسان جي فلم ۾ ڪندي پر هاڻي مان پنهنجي ڪردار جي چونڊ ۾ سليڪٽو ٿي ويو آهيان ڇو ته مان سمجهان ٿو ته مان پنهنجي هڪ سُڃاڻپ قائم ڪري ورتي آهي ان کي برقرار رکڻ لاءِ مان سليڪٽو ٿيڻ چاهيان ٿو.

 

مصباح الحق کانسواءِ پاڪستان ٽيم لاءِ انگلينڊ ڪنڊن جي سيج هوندي: جيفري  بائيڪاٽ

لنڊن (اسپورٽس نيوز) انگلينڊ جي اڳوڻي ڪپتان ۽ موجودا ڪرڪيٽ ماهر جيفري  بائيڪاٽ خبردار ڪيو آهي ته مصباح الحق کانسواءِ پاڪستان ڪرڪيٽ ٽيم لاءِ انگلينڊ ڪنڊن جي سيج هوندي،مهمان بيٽسمينن کي جيمز اينڊرسن ۽ اسٽورٽ براڊ کي منهن ڏيڻ صولو نه هوندو.پنهنجي هڪ انٽرويو ۾ جيفري بائيڪاٽ جو چوڻ هو ته پاڪستان ڪرڪيٽ ٽيم تازو انگلينڊ کي ٽيسٽ سيريز ۾ مات ڏني پر ون ڊي سيريز ۾ ڪاميابي سندن قدم نه چومي سگهي.ايندڙ سال پاڪستان کي انگلينڊ  جو دورو ڪرڻو آهي،جيڪو پاڪستان ٽيم  جو 2010 ع جي فڪسنگ اسڪينڊل کانپوءِ انگلينڊ ملڪ ۾ پهريون دورو هوندو،هڪ ڀيرو ٻيهر ڪرپشن جا الزام پاڪستان مٿان لڳي سگهن ٿا،جيفري بائيڪاٽ ان حوالي سان چوي ٿو ته هِن اسڪينڊل کانپوءِ پاڪستاني رانديگرن جو رويو بهتر ٿيو ۽ پاڻ کي ڪنٽرول ۾ رکيو آهي،اصل اهميت ڪپتان جي هوندي آهي ته هو ٽيم لاءِ ڪهڙي ”ٽون“ ٿو تيار ڪري ۽ پاڪستان وٽ مصباح الحق جي شڪل ۾ بهترين ڪپتان موجود آهي جيڪڏهن هو ايندڙ سال انگلينڊ جي دوري تي اچي ٿو ته پاڻ کي ۽ رانديگرن کي ٿڌو رکي ۽ جيڪڏهن صباح الحق نه ٿو اچي ته پاڪستان ڪرڪيٽ بورڊ کي ڪنهن سُٺي ڪپتان جي ڳولا هيئنر کان ڪرڻ گهرجي،نه ته هڪ ڀيرو ٻيهر انگلينڊ جو دورو پاڪستان لاءِ مسئلا کڻي سگهي ٿو.انگلينڊ اڳوڻي ڪپتان جيفر بائيڪاٽ چٽو چيو ته پاڪستان جي بيٽنگ لائن انگلينڊ  ڪنڊيشنز ۾ وڏي آزمائش هوندي،اسٽورٽ براڊ،جيمز اينڊرسن ۽ ٻين فاسٽ بالرن جي سامهون بيٽنگ ڪرڻ پاڪستان ٽيم لاءِ انتهائي مشڪل هوندو،هتي اڳ ۾ ئي بال حوا  ۾ سوئنگ ڪري ٿو ۽ مان عرب عمارات ۾ ٿيندڙ مقابلن ۾ به پاڪستاني بيٽسمينن کي  سوئنگ بال کي ڪيڏڻ کان ڪيٻائيندي ڏٺو،سندس وڌيڪ چوڻ هو ته منهنجي يارڪشائر ۾ يونس خان سان ملاقات ٿي هو وڏو بااخلاق ۽ پريشان ڪندڙ بيٽسمين آهي،بائيڪاٽ جو چوڻ آهي ته يونس خان ۽ جاويد ميانداد دنيا جا بهترين رانديگر آهن،مون پنهنجي وقت ۾ گيري سوبرز جو سڀ کان وڏو رڪارڊ ٽوڙيو پوءِ منهنجو رڪارڊ سنيل گواسڪر ٽوڙيو،ان جو اهو مطلب ناهي ته مان سوبرز کان وڏو رانديگر ٿي ويو آهيان يا سنيل گواسڪر مونکان وڏو رانديگرٿي ويو،ان لاءِ ڪنهن به رانديگر جون رنسون گهڻيون ڏسي ان کي وڏو رانديگر چوڻ به سُٺو ناهي هوندو،پر مان پنهنجي ڪيريئر ۾ يونس خان کي وڏو رانديگر،وڏو انسان ۽ سُٺو دوست ڏٺو،سندس چوڻ هو ته پاڪستان ڪرڪيٽ ٽيم کي نقصان پهچائيندڙ ڪرڪيٽر محمد عامر،سلمان بٽ ۽ محمد آصف پنهنجون سزائون ڪاٽي چڪا آهن،مان انهن کي سڄي زندگي راند کان پري رهڻ جو سوچي رهيو هُس ۽ ٽنهي رانديگرن جو مخالف به هيس، پر  کين هاڻي راند کيڏڻ جي اجازت ڏني وڃي،جيڪڏهن عامر هاڻي ڪا به غلطي ڪندو ته پوءِ سوچي ڇڏي ته ڪرڪيٽ لاءِ کين دروازا بند آهن.

 

ٽي ملڪي يوٿ ڪرڪيٽ ٽورنامينٽ، ڀارت ۽ بنگلاديش وچ ۾ اڄ کيڏي ويندي

ڪولڪته(اسپورٽس نيوز) ٽي ملڪي يوٿ ڪرڪيت ٽورنامينٽ ڀارت ۽ بنگلاديش جي انڊر 19 ٽيمن وچ ۾ ميچ (اڄ) اڱاري واري ڏينهن ڪولڪته ۾ کيڏي ويندي. ٽي ملڪي انڊر 19 ٽورنامينٽ ڀارت ۾ جاري آهي، جنهن ۾ ڀارت بنگلاديش ۽ افغانستان جون ٽيمون حصو وٺي رهيون آهن. ميزبان ٽيم ٻئي ميچون کٽي پوائنٽس ٽيبل تي سڀ کان اڳيان آهي. بنگلاديش هڪ ميچ ۾ ڪاميابي حاصل ڪئي آهي جڏهن ته افغانستان ٻه ميچون کيڏيون ۽ ٻنهي ۾ ڪاميابي حاصل نه ٿي سگهي، ٽورنامينٽ جو پنجون ميچ 25 نومبر تي افغانستان ۽بنگلاديش جڏهن ته ڇهون ۽ آخري ميچ 27 نومبر تي کيڏيو ويندو. ٻن ٽاپ ٽيمن وچ ۾ فائنل 29 نومبر تي ٿيندو.

 

پاڪ آمريڪا لاڳاپا: نجم سيٺي

فوجي سربراهه جنرل راحيل شريف اڄ ڪلهه آمريڪا ۾ آهي ۽ آمريڪا جي سول ۽ فوجي عملدارن سان خطي جي استحڪام جي پسمنظر ۾ پاڪستان جي قومي سلامتيءَ جي معاملن تي ڳالهيون ٻولهيون ڪري رهيو آهي. آمريڪين جي دلچسپيءَ جو محور افغانستان آهي، تنهن ڪري هو پاڪستان جي سول سرڪار بدران سڌي طرح فوجي سربراهه سان ڳالهيون ڪرڻ ٿا چاهن. هو ڄاڻن ٿا ته اهڙن معاملن ۾ فوجي سربراهه جو حڪم هلندو آهي. سو اها ڪا نئين ڳالهه ناهي ڇو جو پاڪستان ۽ آمريڪا جي لاڳاپن جي سيڪيورٽيءَ واري پاسي کي هميشه واضح اهميت حاصل رهي آهي. 1950ع ۽ ان کانپوءِ وارن ڏهاڪن ۾ پاڪستان سيٽو ۽ سينٽو معاهدن جو حصو بڻيو. جنرل ايوب خان ۽ آمريڪي صدر ايسن هاور ۾ سٺا ۽ دوستاڻا لاڳاپا هئا. ويجهر وارن ڏهاڪن ۾ خاص ڪري افغان جهاد دوران اسان ڏٺو ته جنرل ضياءُ الحق ۽ صدر رونالڊ ريگن وچ ۾ ويجها لاڳاپيا هئا. نائين اليون کانپوءِ دهشتگرديءَ خلاف شروع ٿيل جنگ ۾ جنرل پرويز مشرف ۽ صدر بش ۽ بعد ۾ جنرل ڪياني ايڊمرل مائيڪ مولن وچ ۾ چڱي ويجهڙائي هئي.

پر ماضي ۽ حال ۾ فرق هي آهي ته هن وقت پاڪستان جي قومي سلامتيءَ جي حوالي سان مفاد خطي ۾ آمريڪي مفادن سان مطابقت نه ٿا رکن. آمريڪا ۽ پاڪستان وچ ۾ بي اعتماديءَ جو هڪ وڏو ڪارڻ مفادن ۾ هم آهنگيءَ جو نه هئڻ آهي. فوجي سربراهه جي موجوده دوري دوران ٽي معاملا غور هيٺ آيا هوندا. اهي ٽئي هڪ حوالي سان هڪ ٻئي سان سلهاڙيل آهن. پاڪستان ۽ آمريڪا ٻئي افغانستان کي پرامن ۽ مضبوط ڏسڻ گهرن ٿا. ٻئي ملڪ اشرف غنيءَ جي سرڪار ۽ طالبان کي امن جي راهه تي قدم اڳتي وڌائيندي ڏسڻ گهرن ٿا. پر افغانستان ۾ مفاهمت جي عمل کي اڳتي وڌائڻ لاءِ گهربل پاڪستاني ڪوششن جي راهه ۾ ڪي رڪاوٽون ضرور آهن. اهي رڪاوٽون غني سرڪار ۾ شامل غير پشتون طاقتور عنصر ۽ ڀارت آهن. ٻنهي افغان حڪومت ۽ طالبان جي نمائندن وچ ۾ ٿيل ڳالهين جي ٻئي مرحلي تي عين وقت تي ملا عمر جي وفات جو اعلان ڪري ناڪام بڻائي ڇڏيو. موت جي خبر ٻڌندي ئي افغان طالبان ڳالهيون ئي معطل ڪري ڇڏيون ۽ سندن صفن ۾ تحريڪ جي قيادت لاءِ ڊوڙ شروع ٿي وئي. افغان فوج ۽ انٽيليجنس ايجنسيون به پاڪستاني طالبان کي اتر اوڀر افغانستان ۾ پناهه ڏيون ويٺا آهن. جڏهن ته ڀارتي ايجنسيون بلوچستان ۽ ڪراچيءَ ۾ ٿيندڙ دهشتگرديءَ جي سرپرستي ڪري رهيون آهن. بداعتمادي ۽ ٻنهي ملڪن ۾ وڌندڙ شڪ سبب ٻنهي ملڪن ۾ ڏي وٺ، مثال طور جيئن اسان حقاني نيٽ ورڪ جون سرگرميون روڪيون ۽ اهي ملا فضل االله مان يا اسان ڪشمير جهاد مان هٿ ڪڍئون ۽ ڀارتي ايجنسيون بلوچستان ۽ ڪراچيءَ ۾ گروهن جي ڳجهي مدد تان هٿ کڻي وڃن، جن جو ڪو امڪان نظر نه ٿو اچي. يقيني طور آمريڪا پاڪستان ۽ ڀارت وچ ۾ اهڙن معاملن جي حل ۾ اهم ڪردار ادا ڪري سگهي ٿو. ان جي ثالثي (جيڪڏهن اهو ايئن ڪرڻ چاهيندو هجي) پاڪستان ۽ ڀارت ۽ پاڪستان ۽ افغانستان وچ ۾ ڇڪتاڻ گهٽائي سگهي ٿي. تنهن ڪري هاڻي ”ڊو مور“ جو آمريڪين جو وارو آهي. عمليت پسنديءَ جي به گهرج آهي ته پاڪستان سان تعاون، افغانستان تي ساليانو 10 ارب ڊالر خرچ ڪرڻ کان وڌيڪ فائديمند ثابت ٿيندو. جيڪڏهن پاڪستان کي ساليانو هڪ ارب ڊالر به فراهم ڪيا وڃن ته پاڪستان طالبان خلاف اثرائتو آپريشن ڪري سگهي ٿو. جنرل راحيل شريف آمريڪين کي قائل ڪرڻ جي ڪوشش ڪئي هوندي ته سرحدن تي ڇڪتاڻ وڌائڻ ۽ اعتماد وارو ماحول خراب ڪرڻ جو ذميوار پاڪستان نه پر ڀارت آهي. آمريڪين لاءِ هي ڳالهه سمجهڻ آسان هوندي ته جڏهن پاڪستان جي فوج اندروني طور طالبان ۽ انتهاپسندن خلاف جنگ ۾ رُڌل آهي ته اها اوڀر واري سرحد تي ڇيڙڇاڙ نه ٿي ڪري سگهي. اها ته چاهيندي ته اوڀر واري سرحد تي خاموشي هجي ته جيئن اهو سمورو ڌيان اولهه واري سرحد ۽ ملڪ جي ٻين حصن تي ڏئي سگهي. ملڪي حالتن کي نظر ۾ رکندي فوج نه ٿي چاهي ته ان جي هڪ وڌي حصي کي سرحدي چوڪيءَ لاءِ بيهڻو پئي. ڀارت جي مودي سرڪار ئي آهي جيڪا پاڪستان ۽ افغانستان جي غني سرڪار وچ ۾ بي اعتماديءَ جي فضا وڌائي رهي آهي، ڇو جو اهو (ڀارت) چاهي ٿو ته صدر غني به هڪ ٻيو حامد ڪارزئي بڻجي، جيڪو گهڻو ڪري ڀارت تي ئي ڀاڙيندو هو.

آمريڪين کي به اهو ڄاڻڻ ۾ گهري دلچسپي هوندي ته ڪٿي اسٽيبلشمينٽ پاڪستان ۾ سياسي ارادا ته نه ٿي رکي، يقيني طور اها پاڪستان ۾ سول فوجي لاڳاپن ۾ پيدا ٿيل رساڪشيءَ کان آگاهه هوندي ۽ پاڪستاني ميڊيا ذريعي ان کي اهو به علم هوندو ته اسان وٽ سولين وزيراعظم کان وڌيڪ فوجي سربراهه کي عوامي مقبوليت حاصل آهي. آمريڪا ڄاڻندو هوندو ته معاشري جا ڪجهه حلقا کيس سڀني مسئلن جو حل سمجهن ٿا. گذريل ڏينهن ۾ آءِ ايس پي آر جي پريس رليز حڪومت کي جواب ڏين تي مجبور ڪيو. آمريڪا کي اهو ڄاڻڻ ۾ به دلچسپي هوندي ته جنرل راحيل شريف جي ملازمت جي مدي ۾ توسيع وٺڻ وارن افواهن ۾ ڪيتري صداقت آهي. آمريڪا لاءِ پنهنجي پاليسين جي تسلسل لاءِ اهو ڄاڻن ضروري آهي.

ڇا مسلم ليگ (ن) جي حڪومت ڄاڻي ٿي ته اسان جي اسٽيبلشمينٽ آمريڪا ۽ اهم ترين عرب ملڪن سان سڌي ريت هاٽ لائين قائم ڪرڻ جي ڪوشش ڪري رهي آهي؟ يقيني طور وزيراعظم آفيس ۾ ان تي ڪجهه ڳڻتي ضرور آهي، پر ان کي پڪ هئڻ گهرجي ته وزيراعظم ۽ فوجي سربراهه ۾ بهتر ورڪنگ رليشن شپ موجود آهي. جيڪڏهن فوجي سربراهه کي موقعي مان سياسي فائدو وٺڻو هجي ها ته گذريل سال عمران خان جي ڌرڻي مان ايئن ڪرڻ تمام آسان هو. اهڙي طرح وزيراعظم به پنهنجي سياسي وزن وڌائڻ لاءِ کيس ڪراچي آپريشن کان روڪي ٿي سگهيو پر هن ايئن نه ڪيو. فوجي سربراهه وزيراعظم تي پوندڙ بار کي فاٽا نيڻ جو فيصلو ڪندي گهٽائي ڇڏيو ۽ طالبان ۽ انهن جي همدردن کي للڪاريو. ايئن ڪندي هن آپريشن تي شڪ شهبا ڏيکاريندڙ اڳواڻن جهڙوڪ عمران خان جي غلط فهمي دور ڪري ڇڏي. فوجي سربراهه جي چٽي موقف سبب وزيراعظم لاءِ قومي اتفاق راءِ پيدا ڪرڻ آسان ٿي پيو. تنهن ڪري بهتر آهي ته ادارا اهڙي طرح گڏجي سڏجي ڪم ڪندا رهن ته جيئن ملڪ کي مشڪلات جي ڌنڌ مان ڪڍي بهتر رستي تي گامزن ڪري سگهجي

 

سروري جماعت جو مخدوم، سياست جو امين ۽ شاعريءَ جو فهيم!: وينگس

                         زندگي،

                         تون ڪيئن اچي ملينءَ،

                         ۽ تون ڪيئن نه موڪلائي هلي ويندينءَ،

                         ان ڏينهن صرف اکين ۾ لڙڪ ئي رهجي ويندا،

                         بس، غم جيڪو پٺتي رهجي ويندو. (هلينا)

هر روز ڪا نه ڪا خبر درد سان ڀريل اڳيان اچي ٿي، هاڻي درد ايترو وڌي ويو آ جو اندر به دانهن ڪري ٿو ته بس، وڌيڪ درد جو بار نه ٿو کڻي سگهان. زندگي عجيب يا اسان زندگي کي عجيب بڻايو آهي؟ پر ڇا به هجي، دنيا جي ڌرتي تي زندگي ائين ئي گذري ٿي، جيڪڏهن ڪجهه فرق آهي ته اهو صرف اصولن، پيار ۽ سچائي جو آهي، جيڪي انهن ٽن تلوارن تي هلن ٿا، زندگي سڄي درد ۾ گذري ٿي پر اهي دنيا جي سيني تي ڪنڌ مٿي ڪري هلن ٿا. زندگي جي سفر ۾ ڏونگر لتاڙي هلڻ ايترو آسان ناهي ڇو جو ان ۾ اندر ڀورا ڀورا ٿئي ٿو ۽ اندر جي ڀورجڻ جا آواز صرف پاڻ تائين رهجي وڃن ٿا.

مون کي هلينا جي نظم جون مٿيون سٽون مسلسل ياد اينديون رهيون. زندگي جي هيڏي سفر ۾ پٺيان رهجي ڇا ٿو وڃي صرف غم …!

اهڙو ئي قسم جو هڪ غم وري اسان جي حصي ۾ آيو آهي، محترم مخدوم امين فهيم صاحب جو وڇوڙو، جنهن پاڪستان جي سياست تلوار تي سفر ڪيو، اصولن ۽ وفا جي ڪينئري کي به کڻي هلندو رهيو.

آچر ڏهاڙي عبرت اخبار جي وڏي سرخي ”سروري جماعت جو مخدوم، سياست جو امين، شاعري جو فهيم“ بهترين لفنظن جي ان سيٽ جنهن محترم مخدوم امين فهيم جي زندگي جي سفر کي ڪجهه لفظن ۾ واضح ڪري ڇڏيو. ها! هو حقيقت ۾ سياست جو امين ئي هو ،جنهن وفا ڪئي ۽ سچائي سان قائم رهيو.

پاڪستان جي سياسي تلوار تي هلڻ، آسان ناهي ۽ اهو به ڀٽي جي پارٽي سان وفا ڪري هلڻ وڌيڪ مشڪل آهي. مخدوم امين فهيم، پاڪستان جي سياسي تلوار تي هليو ۽ ثابت قدم رهيو. مان جڏهن مخدوم امين فهيم صاحب کان انٽرويو ڪرڻ پئي چاهيو ته ان وقت پيپلز پارٽي اقتدار ۾ ۽ شهيد محترمه بينظير ڀٽو جي شهادت ٿي چڪي هئي.

امين فهيم صاحب تائين پهچڻ ۽ انٽرويو جو ٽائيم وٺڻ آسان نه هو، پر انٽرويو جو ٽائيم امين فهيم صاحب ڏنو، منهنجي ذهن ۾ ڪيترائي سوال هئا پر انهن سوالن ۾ اهو به جملو ڦري رهيو هو ته امين فهيم صاحب گهڻو ڳالهائيندو ناهي.

جيڪڏهن وڌيڪ سوالن جا جواب نه مليا ته ڇا مان صرف ڪجهه سوالن جي انٽرويو لاءِ وڃي رهي آهيان؟ مان اهو سوال پنهنجو پاڻ کان مسلسل ڪندي رهيس، خير اسان مخدوم امين فهيم صاحب جي ڪراچي واري گهر  پهتاسين.

امين فهيم صاحب، ڪجهه ماڻهن سان ڳالهه ٻولهه ڪري رهيو هو، اسان جي پهچڻ کان پوءِ امين فهيم صاحب مون کي کلندي چيو ته توهان جي ڪالم ۾ لڳل تصوير، ائين محسوس ڪرايو ته توهان جي عمر وڏي آهي،  but you are quite young مون جواب ڏيڻ کان پهرين پنهنجي اندر سان ڳالهائيندي چيو ته شايد انٽرويو ۾ مان صرف اهو پڇي سگهان، جيڪو پڇڻ چاهيان ٿي، مان امين فهيم صاحب جي مهرباني ادا ڪندي چيو ها… پر مان ايتري به ينگ ناهيان.

ان انٽرويو شروع ٿيڻ کان پهرين امين فهيم صاحب وٽ پيغام آيو ته ميٽنگ تي وڃڻو به آهي، جنهن تي مخدوم امين فهيم صاحب مون ڏانهن ڏسندي چيو، معاف ڪجو پر مون کي 30 منٽن کان پوءِ وڃڻو پوندو، توهان هر سوال ڪري سگهو ٿا ۽ انٽرويو جو باقي حصو ٻئي دفعي ۾ڪنداسين، جنهن تي مون انڪار نه ڪيو ۽ چيو خير 30 منٽن تائين ته انٽرويو ڪري سگهجي ٿو، ان دوران امين فهيم صاحب کلندي چيو ها … ڇو نه يقينن توهان انٽرويو شروع ڪريو!

مخدوم امين فهيم صاحب جي شخصيت انتهائيsober  هئي، مان پنهنجي زندگي ۾ انهن گهٽ ماڻهن سان ملي هونديس، جيڪي پنهنجي شخصيت ڪري مشهور هجن.

انٽرويو دوران مان امين فهيم صاحب کي مهربان ۽ committed ماڻهو طور ڏٺو، جيڪو شهيد ذوالفقار علي ڀٽو، شهيد محترمه بينظير ڀٽو ۽ ان جي پٽ بلاول ڀٽو سان گڏ رهيو. انٽرويو جيڪو 30 منٽن هلڻو هو، اهو 30 منٽن کان مٿي هليو ۽ مان پنهنجا پورا سوال ڪيا ۽ جڏهن آخر سوال ڪيو ته ان وقت مخدوم امين فهيم صاحب کلندي چيو ته توهان پورو انٽرويو ڪري ڇڏيو ۽ ٽائيم کي ڏسندي چيو، 30 منٽن کان گهڻو وقت ٿي ويو. انٽرويو دوران امين فهيم صاحب کي خبر ئي نه پئي ته ڪيترو وقت ٿي ويو.

انٽرويو ۾ مان مخدوم امين فهيم صاحب کان سخت سوال پڻ ڪيا، جيڪي انهن جي جماعت ۽ جمهوريت جي حوالي سان هئا، منهنجي ذهن ۾ سوال اُٿيو ته شايد هو ناراض ٿي وڃي، پر هڪ صحافي جي حيثيت سان مون وٽ سوال ڪرڻ جو بهترين موقعو هوندو آهي ۽ جنهن کي مان هر وقت استعمال ڪرڻ چاهيندي آهيان.

مخدوم امين فهيم صاحب ڪنهن به سوال تي ناراض نه ٿيا، پر هر سوال جو جواب ڏنو. شهيد محترمه بينظير ڀٽو جي سياست ۽ واپسي جي سوالن دوران هو غمزده ٿيا. مخدوم امين فهيم صاحب شهيد محترمه بينظير ڀٽو جي واپسي تي شيئر ڪندي چيو ته مان محترمه  بينظير ڀٽو کي ٻڌائڻ لاءِ ويس ته هوءَ واپس نه اچي، ڇاڪاڻ جو سندس زندگي کي خطرو هو. جڏهن مان شهيد محترمه بينظير ڀٽو جي گهر پهتس ۽ محترمه سان ملي ڪري ٻڌائڻ پئي چاهيو ته محترمه بينظير ڀٽو ان وقت ئي جواب ڏيندي چيو مخدوم صاحب، مون کي خبر ملي چڪي آهي ته هو مون کي نه ڇڏيندا، پر هاڻي مان عوام سان واعدو ڪري چڪي آهيان ۽ واپس نه موٽنديس، پوءِ ڀل منهنجي زندگي هلي وڃي.

هوءَ بهادر اڳواڻ هئي ۽ ڪيترن ئي تڪليفن باوجود به مقابلو ڪيو. امين فهيم صاحب وزيراعظم ٿيڻ واري معاملي تي به ڳالهايو، پر ڪا شڪايت نه ڪئي. شهيد محترمه بينظير ڀٽو، مون کي وزيراعظم ڪرڻ چاهي پئي. پر ائين نه ٿيو، ڇوته هر پارٽي جو نئون اڳواڻ پاڻ سان نئين ٽيم کڻي ايندو آهي.

مون کي ٿورو تعجب ٿيو ته جنهن اڳواڻ پارٽي سان وفا ڪئي ۽ ان کي وزيراعظم نه ٿيڻ تي به ڪو غصو نه هو. پر غم ضرور هو ته موٽ ۾ اهو ڪجهه به مليو، جنهن جو هو حقدار هو.

انٽرويو ختم ٿيڻ کان پوءِ مخدوم امين فهيم صاحب چانهه ڏانهن ڏسندي چيو ته توهان چانهه نه پيتي ۽ مان موٽ ۾ جواب ڏنو ته چانهه پيان هان ته انٽرويو پورو نه ٿي سگهي ها پر توهان جي مهرباني امين فهيم صاحب ۽ مخدوم امين فهيم صاحب کلندي چيو ته توهان جي چانهه مون تي ٿي.

پر انٽرويو  کان پوءِ وري ڪڏهن مان هن سان ملي نه سگهيس، ها ڪنهن ايشو تي بيان وٺڻ لاءِ فون تي ڳالهه ٻولهه ٿيندي هئي.

مخدوم امين فهيم صاحب پنهنجي شخصيت ۾ صوفي ماڻهو هو. جنهن ڪڏهن به پنهنجي ذات خاطر نه سوچيو. ان جي جڳهه تي ڪو ٻيو هجي ها ته شايد پارٽي جي خلاف ٿي بيهي ها پر هو ثابت قدم رهيو. پارٽي جي وفا تي مخدوم امين فهيم صاحب اهو به چيو هو ته جڏهن مان ڀٽي صاحب جي پارٽي ۾ شامل ٿيڻ پئي چاهيو ته بابا مون کان واعدو ورتو ته پيپلز پارٽي کان پوءِ ٻئي ڪنهن پارٽي ۾ ٻيهر شموليت اختيار نه ڪجانءِ، جي پارٽي ۾ نه رهي ته پوءِ ڀل سياست ڇڏي ڏجانءِ.

اهڙا ڪردار  هاڻي مشڪل سان ملن، جيڪي پارٽي سان وفا ڪن ۽ جمهوريت کي کڻي هلن. مخدوم امين فهيم صاحب، سنڌ جي سياست جو صوفي ۽ وفادار ڪردار رهندو، پيپلز پارٽي کي مشڪل سان وري ڪو ٻيهر امين فهيم جهڙو ماڻهو ملي سگهي. جنهن وقت بلاول ڀٽو کي شهيد محترمه بينظير ڀٽو کان پوءِ امين فهيم صاحب جي ڇانوَ جي ضرورت هئي هاڻي اها به هلي وئي.

امين فهيم ثابت ڪيو ته سياست ۾ صرف وزيراعظم يا وڏن عهدن جي ليبل جي ضرورت ناهي رهندي، پر سياست جي سيني ۾ ڌڙڪڻ لاءِ اصول ۽ وفا جي سگهه گهرجي ۽ اها امين فهيم صاحب وٽ هئي. هو سياست جي سيني ۾ ڌڙڪندو رهندو، اڄ جي دور ۾ به امين فهيم صاحب مفاد پرست سياست کي مات ڏيندي پنهنجن اصولن کي قائم رکيو. هڪ خال جيڪو وري نه ڀرجي سگهبو، پر جيڪو ڪجهه مخدوم امين فهيم پٺتي ڇڏيو، ان جا مثال هر هڪ ڏيندو رهندو.

اصول ۽ وفا خاطر، اقتدار جي ڪرسي کي ٿڏيندڙ امين  فهيم صاحب، تاريخ جي ورقن تي هميشه ياد رهندو. ها! مخدوم امين فهيم، سروري جماعت جو اڳواڻ هو، پر ڪير اهو ٻڌائي سگهندو ته هو پنهنجي جماعت جي بنياد تي اڳيان آيو هجي، درحقيقت هو پنهنجي شخصيت خاطر ئي مشهور هو.

ڪاش! ننڍڙا بونا ڪردار، مخدوم امين فهيم جي ڪردار ۾ جهاتي پائي ڏسن ته پوءِ سمجهي سگهن ٿا، سياست صرف مفاد پرستي جي ليڪي تي ناهي هلندي، پر سياست جي تلوار تي هلڻ لاءِ اصول، وفا ۽ سچائي جي سگهه گهرجي. اهي ئي ڪردار سياست جي تلوار تي هلي پنهنجي ڇاپ تاريخ ۽ عوام جي دلين ۾ ڇڏي وڃن ٿا. سروري جماعت جو مخدوم، موڪلائي ويو، سياست جو امين موڪلائي ويو، شاعري جو فهيم، آخري ٻول ڳالهائي موڪلائي ويو.

اي سنڌ! تون هڪ شخصيت ۾ ٽئي باب موڪلائيندي ڏٺا. اسان مخدوم امين فهيم جي روپ ۾ اصول ۽ وفا جو باب بند ٿيندي ڏٺو، امين فهيم صاحب تي سياست جي ديوي به ڏک ڪندي هوندي. جنهن صرف وفا ڪئي ۽ جنهن وٽ سواءِ وفا ۽ اصولن جي ڪجهه به نه هو، مخدوم امين فهيم جهڙو ڪردار وري شايد ٻيهر واپس اچي سگهي، هن پنهنجي صوفي شخصيت سان هر هڪ کي مات ڏئي ڇڏي.

 

چيني سرڪار پاڪ-چين اقتصادي لنگهه کي 5 ساله منصوبي جو حصو بڻائي ڇڏيو

دنيا جي ملڪن مان چين واحد ملڪ آهي جنهن پاڪستان سان ڀائپي جو رشتو هر دور ۾ نڀايو آهي، شهيد ڀٽي پاران پوکيل دوستي جي ٻج هر دور ۾ پنهنجي محبت جو ثبوت ڏني آهي، جنگ هجي يا ڪاروباري معاملا چين پاڪستان جو ساٿ هر دور ۾ نڀايو آهي، ۽ ثابت قدم رهيو، حڪومتون تبديل ٿينديون رهيون پر دوستي جو رشتو ويتر مضبوط ٿيندو پئي ويو، جنهن جو تازو مثال موجوده دور حڪومت ۾ چين پاڪ – چين اقتصادي لنگهه واري رٿا کي پنهنجي 13هين 5 سالن واري ترقياتي منصوبي جو حصو بڻائي ڇڏيو آهي. جنهن سان خطي جي اقتصادي ۽ سماجي ترقي ۾ مدد ملندي. ڪميونسٽ پارٽي جي اجلاس ۾ پارٽي قيادت پاڪ – چين اقتصادي لنگهه جي رٿا بابت تجويزون پيش ڪيون . پاڪستان ۾ چين جي سفير سن وي ڊونگ چيو ته اها رٿا ترقي جون نيون راهون کوليندي. هن چيو ته رٿا جي تياري دوران جديد تحقيق بعد ان کي وچين ۽ ڊگهي مدي واري منصوبي تحت تيارڪيو ويو آهي. هن چيو ته چين جي صدر شي جنگ پنگ شاهراه ريشم جي روٽ کي اقتصادي بيلٽ ۾ تبديل ڪرڻ لاءِ تجويز پيش ڪئي ته جيئن 21هين صدي ۾ خطي جي گڏيل واپار کي هٿي ملي سگهي. پاڪ – چين اقتصادي راهداري منصوبو سلڪ روٽ جي نئينسر تعميرلاءِ هڪ بنيادي منصپبو آهي. جنهن تي سڄي دنيا جو ڌيان آهي. هن چيو ته منصوبي جي ويزن کي اسان جي قيادت، حڪومت جي گڏيل مشاورت ۽ چين جي سياسي قيادت جي ڀرپور حمايت حاصل آهي. چيني سفير چيو ته ان منصوبي سان پاڪ چين دوستي وڌيڪ مضبوط ۽ مستحڪم ٿيندي ۽ ٻنهي ملڪن جي عوام کي وڌيڪ ويجهو آڻيندي. هن اميد ظاهر ڪئي ته ان راهداري سان غربت جو خاتمو ۽ سماجي ترقي لاءِ نيون راهون کلنديون.