تازيون خبرون

Daily Archives: November 24, 2015

مڪاني چونڊن ۾ عوام 2013ع جي چونڊ نتيجن تي مهر لڳائي ڇڏي:وزيراعظم

لاهور (بيورو) وزيراعظم نواز شريف چيو آهي ته مڪاني چونڊن ۾ عوام مسلم ليگ نون تي مڪمل اعتماد جو اظهار ڪيو ۽ 2013ع جي چونڊ نتيجن تي مهر لڳائي ڇڏي،حڪومت،ميگا رٿائن ذريعي عوام جا بنيادي مسئلا حل ڪرڻ جي ڪوشش ڪئي پئي وڃي،تاريخي زرعي پيڪيج جو هارين کي رليف فراهم ڪيو پيو وڃي. لاهور ۾ وزيراعظم نواز شريف جي صدارت هيٺ اجلاس ٿيو. اجلاس ۾ ڳالهائيندي وزيراعظم چيو ته مڪاني چونڊن جي پهرين ۽ ٻئي مرحلي ۾ عوام نون ليگ تي ڀرپور اعتماد ڪيو ۽ 2013ع وارين عام چونڊن جي نتيجن تي مهر لڳائي ڇڏي. نواز شريف چيو ته زلزلي متاثرن جي مدد لاءِ وقت ضايع ڪرڻ کانسواءِ ڪم ڪيو ويو آهي ۽ هـُو امدادي سرگرمين جو پاڻ جائزو وٺي رهيو آهي. هن چيو ته گريٽر اقبال پارڪ منصونو تاريخي اهميت رکي ٿو جنهن تي عملدرآمد دوران تاريخي اهميت کي اجاگر ڪيو وڃي. اجلاس ۾ پنجاب جي وڏي وزير شهباز شريف، ريلوي واري وفاقي وزير خواجا سعد رفيق، پارلياماني سيڪريٽري صحت خواجا عمران نذير ۽ ٻين اختيارين شرڪت ڪئي.

 

پاڪ فوج کي خطي کان ٻاهر وڌيڪ ڪنهن به فوجي مشن تي نه اماڻڻ جو اعلان

واشنگٽن (م.ڊ) پاڪستان واضح ڪيو آهي ته پاڪ فوج کي خطي کان ٻاهر وڌيڪ ڪنهن به فوجي مشن تي نه اماڻيو ويندو، پاڪ فوج جي عام رابطن واري اداري آئي ايس پي آر جي ڊائريڪٽر جنرل ليفٽيننٽ جنرل عاصم سليم باوجوه آرمي چيف جنرل راحيل شريف جي آمريڪي دوري جي پڄاڻي تي پريس بريفنگ ڏيندي چيو ته پاڪستان جا هڪ لک 82 هزار فوجي جوان پهرين ئي پاڪ – افغان سرحد تي مقرر آهن، اهڙي صورتحال ۾ پاڪستان وڌيڪ ڪنهن مشن ۾ شامل ٿيڻ جو بار سهي نه ٿو سگهي.هن چيو ته وچ اوڀر جي ملڪن ۾ پير ڄمائيندڙ دهشتگرد تنظيم داعش هاڻ عالمي خطرو بڻجي چڪي آهي، جنهن کي سڀني ملڪن کي گڏجي منهن ڏيڻو پوندو، سندس چوڻ هو ته خوشقسمتي سان داعش جي حمايت ڪندڙن ۽ همدردن ان وقت پاڪستان ۾ قدم رکڻ جي ڪوشش ڪئي، جڏهن عوام دهشتگردي مان تنگ اچي چڪو هو، ان ڪري پاڪستاني قوم هر قسم جي دهشتگردي کي رد ڪري ڇڏيو، پاڪ فوج جي ترجمان آمريڪا طرفان جوهري ٺاهه جو معاملو اٿارڻ بابت سوال جي جواب ۾ چيو ته جوهري ٺاهه جي معاملي تي پاڪستان بلڪل چٽو ڪيو ته ان جو اهو پروگرام پرڏيهي خطرن کان بچاءَ لاءِ آهي، هن ٻڌايو ته آرمي چيف جنرل راحيل شريف آمريڪي دوري دوران پاڪستان جي اندروني معاملن ۾ ڀارتي مداخلت جي حوالي سان وزيراعظم نواز شريف جي دوري دوران جمع ڪرايل ڊوزيئر جي حوالي سان ڪابه ڳالهه ٻولهه نه ڪئي. سندس چوڻ هو ته ان قسم جا معاملا اهڙن دورن ۽ ملاقاتن بدران مناسب موقعي تي سفارتي سطح تي اٿاريا ويندا آهن، ليفٽيننٽ جنرل عاصم سليم باجوه جو چوڻ هو ته جنرل راحيل شريف ۽ آمريڪي قيادت ۾ ملاقاتن دوران ٻطرفن دفاعي لاڳاپن، خطي جي سلامتي ۽ افغانستان جي صورحال تي خيالن جي ڏي وٺ ٿي. هن چيو ته آرمي چيف دوري دوران نائب آمريڪي صدر جو بائيڊن، پرڏيهي سيڪريٽري جان ڪيري ۽ بچاءَ واري وزير ايشٽن ڪارٽر سوڌو اعليٰ آمريڪي قيادت سان ملاقاتون ڪيون، پاڪ فوج جي ترجمان ٻڌايو ته آرمي چيف جي دوري دوران آمريڪي قيادت سامهون ڪشمير مسئلو به اٿاريو ويو، جنهن جو خطي جي امن ۽ سلامتي لاءِ حل ڪڍڻ لازمي آهي، ليفٽيننٽ جنرل عاصم سليم باجوه افغان سرچاءَ واري عمل بابت چيو ته پاڪستان ۽ آمريڪا ٻنهي جو ان ڳالهه تي اتفاق آهي ته سرچاءَ واري عمل ۾ وڌيڪ دير نه ٿيڻ گهرجي ۽ ان کي بنا ڪنهن رنڊڪ جي اڳتي وڌڻ گهرجي.

 

دهشتگردي خلاف ميڊيا به فرنٽ تي وڙهي رهيو آهي، سڀ گڏجي خاتمو ڪنداسين: پرويز رشيد

فيصل آباد (اين اين آءِ) سڌ سماءَ جي وزير پرويز رشيد چيو آهي ته دهشتگردي خلاف ميڊيا به فرنٽ تي وڙهي رهيو آهي، سڀ گڏجي دهشتگردي جو خاتمو ڪنداسين، ننڍن شهرن ۾ ميڊيا هائوسز جي سيڪيورٽي لاءِ انتطام ڪيا ويندا، اڱاري تي صحافتي تنظيمن پارليامينٽ ٻاهران مظاهرو ڪيو، مظاهري ۾ صحافي اڳواڻن، اليڪٽرانڪ ۽ پرنٽ ميڊيا سان تعلق رکندڙ صحافين جي وڏي انگ خانگي ٽي وي ( دنيا نيوز) سان ٻڌي جو اظهار ڪيو، وفاقي وزير پرويز رشيد مظاهري ۾ شرڪت ڪئي، ان موقعي تي خطاب ڪندي هن چيو ته صحافين کي نشانو بڻائڻ جو خطرو موجود هو، ميڊيا تي حملي ۾ ملوث جوابدارن جي ڳچي ۾ انصاف جو فندو ضرور پهچندو، پرويز رشيد چيو ته ميڊيا به فرنٽ تي وڙهي رهيو آهي، دهشتگردي جو گڏجي مقابلو ڪنداسين، ننڍن شهرن ۾ ميڊيا هائوس جي سيڪيورٽي جا انتطام ڪيا ويندا، هن چيو ته عوام دهشتگردي خلاف وڏيون قربانيون ڏنيون آهن، آپريشن ضرب عضب ۾ گهڻيون ڪاميابيون مليون آهن ان سبب دهشتگردي جا واقعا گهٽجي ويا آهن، هن چيو ته چينل جي آفيس تي حملو مذمت جوڳو آهي، وزيراعظم نواز شريف سميت سموري قيادت هن حملي جي مذڪت ڪئي هئي، حملي ۾ ملوث جوابدارن کي آخري انجام تائين پهچائينداسين.

 

پئرس واقعي ۾ ملوث دهشتگردن جو تعلق ڪنهن به مذهب ۽ انسانيت سان ناهي، اهي حيوان آهن: خورشيد شاهه

اسلام آباد(اي پي پي) قومي اسيمبلي ۾ مخالف ڌر جي اڳواڻ سيد خورشيد احمد شاهه پئرس دهشتگردي جي واقعن ۾ ٿيل جاني نقصان تي افسوس ڪرڻ لاءِ فرانس جي سفارتخاني وڃي همدردي ڪندي تعزيت ڪئي. سومر ڏينهن سيد خورشيد احمد شاهه جڏهن فرانس جي سفارتخاني پهتو ته اتي عورت سفارتڪار سندس استقبال ڪيو. سيد خورشيد شاهه فرانس جي سفارتخاني جي فرسٽ سيڪريٽري سان فرانس ۾ دهشتگردي جي واقعن تي افسوسو جو اظهار ڪيو ۽ جاني نقصان تي ڏک جو اظهار ڪندي تعزيت ڪئي.ان موقعي تي چيو ته واقعي ۾ ملوث دهشتگردن جو تعلق ڪنهن به مذهب ۽ انسانيت سان ناهي اهي حيوان آهن جيڪي انسانيت جا ويري آهن. هن چيو ته عالمي برادري گ0جي انهن جو خاتمو آڻي سگهي ٿي. هن چيو ته پاڪستان به ڪيتري عرصي کان دهشتگردي جو متاثر آهي ۽ ان جنگ ۾ تمام گهڻو جاني ۽ مالي نقصان برداشت ڪيو آهي. هن چيو ته اسان ان بي رحم دهشتگردي ۾ پنهنجي اڳواڻ بينظير ڀٽو جي حياتي به وڃائي چڪا آهيون. هن ان موقعي تي سفارتخاني ۾ رکيل ڪتاب تي پنهنجا تاصرات به لکيا.

 

امين فهيم پارٽي جو انمول اثاثو هو، پ پ جو بنياد لاهور ۾ رکيو ويو پر  ان جي واڌ ويجهه هالا ۾  ٿي : قائم علي شاهه

حيدرآباد (بيورو) سنڌ جي وڏي وزير سيدقائم علي شاهه چيو آهي ته مخدوم امين فهيم جي وڇوڙي سان نه رڳو سروري جماعت پر ان سان گڏوگڏ پاڪستان پيپلزپارٽي گهري ڏک ۽ غم ۾ مبتلا آهي . مرحوم مخدوم امين فهيم وڏين خوبين جو مالڪ هو هو نه رڳو هڪ سياستدان هو پر  اديب، شاعر ۽ نفيس شخصيت جو مالڪ  پڻ هو جنهن ملڪ ۽ جمهوريت لاءِ وڏي جدوجهد ڪئي . هن چيو ته هو پارٽي  جو وائيس چيئرمن هو پر سندس حيثيت پارٽي ۾  ان کان به وڌيڪ هئي. سومر ڏينهن هالا ۾ مرحوم مخدوم امين فهيم  جي  ٽيجهي جي موقعي تي  ميڊيا سان ڳالهائي رهيو هو. وڏي وزير چيو ته مخدوم امين فهيم سياست ، جمهوريت ۽ عوام  جي حقن  ۽  ڀٽو جي مشن  لاءِ  جدوجهد ڪئي ۽ پ پ پ سان جهڙي طرح  سندس والد مرحوم وفادار  رهيو اهڙي طرح مرحوم  امين فهيم به شهيد ذوالفقار  ڀٽو  ۽ شهيد محترمه بينظير ڀٽو  سان مرڻ تائين  وفاداري نڀائي. هن چيو ته جيتوڻيڪ پاڪستان پيپلزپارٽي جو بنياد لاهور ۾ رکيو ويو پر  ان جي واڌ ويجهه هالا ۾  ٿي . هن چيو ته مرحوم  جي مخالفن طرفان کيس ڪيترائي ڀيرا  وزير اعظم  بڻائڻ جي آڇ ڪئي وئي جنهن کي هن پارٽي جي ڪري رد ڪيو . هو پنهنجي والد وانگر  ثابت قدم رهيو ۽ ڪڏهن به ذاتي مفادن کي ترجيح  نه ڏني ۽ هميشه پارٽي  جي مفاد ۾ ڪم ڪيو. هن چيو ته مخدوم امين فهيم  جي لاڏاڻي  سان  نه فقط  پاڪستان پيپلزپارٽي  پر سڄي ملڪ  جو نقصان  ٿيو آهي ۽ اهو خال صدين تائين ڀري نٿو سگهجي. هن چيو ته اميد آهي ته  مخدوم صاحب جو ڪٽنب به پنهنجن بزرگن جي نقش قدم تي هلندي پ پ پ ۽ عوام جي حقن لاءِ نوجوان قيادت بلاول ڀٽو جا هٿ مضبوط  ڪندا . ان کان اڳ  هزارين مريدن ۽ سروري جماعت  جي خليفن ۽ مختلف قومن جي سردارن  جي موجودگي ۾ سروري جماعت جي 19 هين روحاني پيشوا  مخدوم جميل الزمان جي دستاربندي ڪئي وئي . ان موقعي تي ايم اين اي فريال ٽالپر ، نڌ اسيمبلي جو سپيڪر آغا سراج دراني ،  چوڌري اعتزاز احسن، پنجاب جو اڳوڻو گورنر لطيف کوسا، پير مظهر الحق ، ميان منظور وٽو ، ڄام مدد علي ، ڄام معشوق علي ، ايم اين اي روشن  جوڻيجو ، عبدالحئي بلوچ ، ڊاڪٽر سهراب سرڪي ، عرفان الله مروت ، صوبائي سيڪريٽري احمد بخش ناريجو، سنڌ جي وڏي وزير جو پرنسپل سيڪريٽري علم الدين بلو ، اصغر جوڻيجو ، ڊي سي مٽياري غلام مرتضيٰ شيخ ، ايس ايس، پي  امجد شيخ ۽ ٻيون  اهم شخصيتون  موجود هيون.

 

نواب اڪبر بگٽي بلوچستان ۾ بهتري جو خواهشمند هو، سندس قتل صوبي جي مسئلن جو حل نه هو: خواجا سعد رفيق

لاهور (بيورو) ريلوي واري وفاقي وزير خواجه سعد رفيق چيو آهي ته نواب اڪبر بگٽي جو قتل بلوچستان جي مسئلن جو حل نه هو، عبدالمالڪ بلوچ صوبي جي مسئلن جي حل لاءِ سنجيده ڪوششون ورتيون آهن، بلوچستان جي سياسي استحڪام تي ڪا به سوديبازي نه ڪئي ويندي. لاهور ۾ بلوچستان بابت سيمينار کي خطاب ڪندي وفاقي وزير خواجه سعد رفيق چيو ته بلوچستان ۾ قومي ۽ سياسي جماعتن جون پاڙون مضبوط نه آهن، ماضي ۾ بلوچ عوام جي مسئلن کي سمجهڻ ۽ انهن کي حل ڪرڻ جي ڪوشش نه ڪئي وئي. هن چيو ته نواب اڪبر بگٽي بلوچستان جي عوام جا مسئلا حل ڪرڻ چاهي پيو، اڪبر بگٽي جو قتل بلوچستان جي مسئلن جو حل نه هو. خواجه سعد رفيق چيو ته ڊاڪٽر عبدالمالڪ ايمانداري سان ڪم ڪري بلوچستان جي عوام جا مسئلا حل ڪرڻ لاءِ سنجيده ڪوششون ورتيون آهن، مالڪ بلوچ هميشه بلوچ عوام جي حقن جي جنگ وڙهي آهي. ريلوي واري وفاقي وزير وڌيڪ چيو ته بلوچستان جي عوام ۾ سياسي شعور اچي چڪو آهي، موجوده حڪومت جي ڪوششن بعد صوبي جون حالتون بهتر ٿيون آهن. تقريب کي خطاب ڪندي ترقي ۽ رٿابندي واري وفاقي وزير احسن اقبال چيو ته آمريت  ۾ پاڪستان کي وڏو نقصان پهچايو ويو، عوام جي شموليت سان ئي پاڪستان ترقي جي رستي تي هلي سگهي ٿو. احسن اقبال چيو ته جمهوريت جي ڪري ئي اڄ بلوچستان ۾ قومي ترانا وڄي رهيا آهن ۽ قومي جهنڊا ڦڙڪي رهيو آهي.

 

بينظير ڀـُٽو قتل ڪيس: مارڪ سيگل جي وڊيو لنڪ ذريعي رڪارڊ ڪيل بيان خلاف درخواست خارج

راولپنڊي (بيورو) راولپنڊي جي دهشتگردي ٽوڙ عدالت، شهيد بينظير ڀـُٽو قتل ڪيس ۾ امريڪي صحافي مارڪ سيگل جي وڊيو لنڪ ذريعي رڪارڊ ڪيل بيان خلاف پرويز مشرف جي درخواست خارج ڪري ڇڏي آهي. راولپنڊي جي دهشتگردي ٽوڙ عدالت جي جج راءِ ايوب مارٿ، اڳوڻي وزيراعظم شهيد بينظير ڀٽو قتل ڪيس جي ٻڌڻي ڪئي. ٻڌڻيءَ دوران پرويز مشرف جي وڪيل بئريسٽر فروغ نسيم، امريڪي صحافي مارڪ سيگل جي وڊيو لنڪ ذريعي رڪارڊ ڪيل بيان خلاف داخل درخواست تي دليل ڏنا. بئريسٽر فروغ نسيم چيو ته امريڪي صحافي مارڪ سيگل جو وڊيو لنڪ ذريعي بيان قانون جي ابتڙ۽ ملڪ جي پاليسي خلاف آهي، امريڪي عدالتون وڊيو لنڪ ذريعي بيان رڪارڊ ناهن ڪنديون، هتي اهڙي اجازت ڇو پئي ڏني وڃي. فروغ نسيم چيو ته مارڪ سيگل جو وڊيو لنڪ ذريعي بيان رڪارڊ ڪرڻ ملڪ جي توهين آهي، عدالت کي استدعا آهي ته  مارڪ سيگل کي پاڪستان طلب ڪري بيان رڪارڊ ڪيو وڃي. ايف آءِ اي جي پراسڪيوٽر چوڌري اظهر چيو ته مارڪ سيگل جو بيان قانوني گهرجن موجب رڪارڊ ڪيو ويو، وڊيو لنڪ ذريعي بيان رڪارڊ ڪرڻ وقت مشرف جي قانوني ٽيم ڪو به اعتراض نه واريو هو، هاڻي ٽرائل کي ڊيگهه ڪرڻ لاءِ مختلف بهانا ڪيا پيا وڃن. عدالت، فروغ نسيم جا دليل مڪمل ٿيڻ  پرويز مشرف جي درخواست تي محفوظ ڪيل فيصلو ٻڌائيندي اهڙي درخواست خارج ڪئي. دهشتگردي ٽوڙ عدالت فيصلي ۾ چيو ته مشرف جو بيان قانون موجب رڪارڊ ڪيو ويو، بيان رڪارڊ ٿيڻ بعد اعتراض نٿو واري سگهجي.

 

عظيم سياستدان مرحوم مخدوم امين فهيم جو ٽيجهو ٿي گذريو، وڏي وزير سميت سياسي، سماجي ۽ مريدن جي وڏي انگ ۾ شرڪت

هالا (اي پي پي) پاڪستان جي عظيم سياستدان، شفيق انسان، سروري جماعت جي روحاني اڳواڻ ۽ سرور نوح جي 18 هين گادي نشين مرحوم مخدوم امين فهيم جو ٽيجهو سومر ڏينهن ٿي گذريو. ان موقعي تي سروري جماعت جي نئين روحاني پيشوا مخدوم جميل الزمان جي دستاربندي ڪئي وئي. مخدوم امين فهيم جي لاڏاڻي کانپوءِ سندس وڏي پٽ مخدوم ميل الزمان کي سروري جماعت جو 19 هون روحاني پيشوا مقرر ڪيو ويو آهي، ” اي پي پي“ جي رپورٽ مطابق مخدوم امين فهيم جي ٽيجهي جي موقعي تي سروري جماعت جي نئين روحاني پيشوا لاءِ مخدوم جميل الزمان جي دستاربندي ڪئي وئي. دستار بندي جي موقعي تي مختلف درگاهن جي گادي نشينن، مخدوم ڪٽنب جي ڀاتين ۽ مريدن وڏي انگ شرڪت ڪئي.ان موقعي تي پنهنجي مريدن کي مخاطب ٿيندي مخدوم جميل الزمان چيو ته 20 تاريخ کان اڳ هو پاڻ کي هڪ ٻار سمجهندو هو پر 20 تاريخ جي ڏکاري ڏينهن جڏهن سندس والد مخدوم امين فهيم لاڏاڻو ڪيو ته هاڻي هن مٿان وڏي ذميواري اچي وئي آهي. هن چيو ته وراثت ۾ مليل پڳ جون ذميواريون نڀائڻ لاءِ هو مڪمل ڪوشش ڪندو. هن اتي موجود مريدن ۽ ٻين کي چيو ته کيس دعا ڪن ته هو اها ذميواري ڀرپور نموني نڀائي سگهي ۽ ملڪ ۽ قوم جي خدمت بهتر نموني ڪري سگهي. هن پنهنجي مريدن کي هدايت ڪئي ته اهي ڪنهن سان اختلاف نه رکن ۽ ڀائپي ۽ رواداري وارو رستو اختيار ڪن. دستار بندي رسم بعد ٽيجهي جي رسمن ۾ سنڌ جي وڏي وزير سيد قائم علي شاهه، سنڌ اسيمبلي جي اسپيڪر آغا سراج دراني، پاڪستان پپلز پارٽي پنجاب جي صدر منظور وٽو، لطيف کوسا، ڄام مدد علي ۽ مختلف علائقن سان لاڳاپيل سروري جماعت جي خليفن ۽ مريدن وڏي انگ ۾ شرڪت ڪئي. ٽيجهي جو موقعي تي درگاهه سرور نوح سميت شهر جي اسڪولن ۽ گهرن ۾ قرآن خواني ۽ دعا جا پڻ انتظام ڪيا ويا هئا. سروري جماعت جو نئون روحاني پيشوا مخدوم جميل الزمان پ پ سنڌ جو نائب صدر ۽ روينيو وارو صوبائي وزير آهي، هو 19 ڪتابن جو ليکڪ آهي ۽ 2 ڀيرا سنڌ اسيمبلي جو ميمبر چونڊجي چڪو آهي.

 

سنڌ ۽ پنجاب جي پوليس حڪومتن جي هٿياربند ونگ بڻجي وئي آهي: عمران خان

ڊيرا اسماعيل خان (مانيٽرنگ ڊيسڪ) تحريڪ انصاف جي چيئرمين عمران خان 2018 تائين ڪي پي ڪي ۾ هڪ ارب ٻوٽا پوکڻ جو اعلان ڪندي چيو آهي ته سنڌ ۽ پنجاب جي پوليس حڪومتن جي هٿياربند ونگ بڻجي وئي آهي، ڪي پي ڪي جي پوليس مڪمل طور سياسي مداخلت کان پاڪ آهي. ڊيرا اسماعيل خان ۾ پريس ڪانفرنس ڪندي عمران خان چيو ته  هيل تائين 5 ڪروڙ ٻوٽا پوکي چڪا آهيون، 2018تائين هڪ ارب 20 ڪروڙ ٻوٽا لڳايا ويندا. هن چيو ته ٻيلا قائم ڪرڻ لاءِ ماڻهو پاڻمرادو زمين ڏئي رهيا آهن، ٻوٽا پوکڻ سان گلوبل وارمنگ ۾ گهٽتائي ايندي، ڪي پي ڪي سرڪار جي منصوبي کي سڄي دنيا ۾ ساراهيو پيو وڃي ۽ فنڊ به ملي رهيا آهن. عمران خان چيو ته ٽمبر مافيا خلاف هٿياربند فورس قائم ڪري رهيا آهيون،وڻن جي واڍي ڪندڙن کي بخش نه ڪيو ويندو. هڪ سوال جي جواب ۾ عمران خان چيو ته پنجاب ۾ پي ٽي آءِ جي اميدوارن تي ڪيس داخل ڪيا ويا، پنجاب ۾ ن ليگ پوليس جي مدد سان مڪاني چونڊ کٽي وئي، سنڌ ۾ به پ پ حڪومت پوليس جي مدد سان چونڊ وڙهي. پي ٽي آءِ سربراهه چيو ته خيبرپختونخواهه جي پوليس سياست کان پاڪ آهي پر پنجاب ۽ سنڌ جي پوليس حڪومتن جي هٿياربند ونگ بڻجي ويون آهن.

 

والاريل ڪشمير ۾ ڀارتي فوج جو هيليڪاپٽر ڪري تباهه،7 ڄڻا مارجي ويا

سري نگر (م.ڊ) والاريل ڪشمير ۾ ڀارتي فوج جو هيليڪاپٽر ڪري تباهه ٿي ويو، جنهن جي نتيجي ۾ 7 ماڻهو مارجي ويا، ميڊيا رپورٽن مطابق والاريل ڪشمير جي ڪٽرا واري علائقي ۾ ڀارتي فوج جو هيليڪاپٽر ڪري تباهه ٿي ويو،جنهن ۾ سوار 7 ڄڻا مارجي ويا، خبرن مطابق حادثي جو شڪار ٿيل هيليڪاپٽر ۾ هندو ياتري سوار هئا، جن کي وشنو ديوي مندر مان واپس آندو پئي ويو، ڀارتي فوج جو چوڻ آهي ته هيليڪاپٽر حادثي بابت جاچ جو حڪم ڏنو ويو آهي، في الحال اهو نه ٻڌائي چئي سگهجي ته حادثي جو ڪارڻ ڪهڙو هو.