تازيون خبرون

Daily Archives: November 19, 2015

سنڌ جي 14 ضلعن ۾ مڪاني چونڊن جو دنگل اڄ ٿيندو، 81 يوسيز ۾ چونڊ ملتوي

اسلام آباد/ڪراچي (نمائندن وٽانِ) سنڌ ۾ مڪاني چونڊن جي ٻئي مرحلي لاءِ 14 ضلعن ۾ پولنگ اڄ ٿيندي، جملي طور 5 هزار کان وڌيڪ سيٽن لاءِ 14 هزارن کان وڌيڪ اميدوارن وچ ۾ دنگل آهي، اليڪشن ڪميشن سمورو چونڊ سامان ريٽرنگ آفيسرن کي فراهم ڪري ڇڏيو آهي، بدين ۾ ڇڪتاڻ سبب فوج ۽ رينجرز پهريائين مقرر ڪئي وئي آهي، جڏهن ٻين 13 ضلعن ۾ فوج مقرر آهي، مڪاني چونڊن جي ٻئي مرحلي ۾ 19 نومبر تي صوبي جي 15 ضلعن ۾ پولنگ ٿيڻي هئي، سيڪيورٽي خدشن سبب سانگهڙ ۾ چونڊون ملتوي ڪيون ويون آهن، هاڻ صوبي جي 14 ضلعن ۾ پولنگ ٿيندي، جن ۾ حيدرآباد، سجاول، ٺٽو، بدين، ٽنڊو محمد خان، ٽنڊو الهيار، نوشهرو فيروز، ڄامشورو، دادو، ميرپور خاص، عمر ڪوٽ ۽ ٿرپارڪر شامل آهن، اليڪشن ڪميشن مطابق جملي 5875 سينٽن لاءِ 15208 اميدوار ميدان ۾ هئا جن ۾ 1134 سيٽن تي اميدوار بنا مقابلي ڪامياب ٿي ويا آهن هاڻ 56 سئو کان وڌيڪ سيٽن لاءِ 14 هزارن کان وڌيڪ اميدوارن وچ ۾ دنگل آهي، هن مرحلي ۾ ٽائون ڪميٽين جا ڪونسلز، ميونسپل ڪميٽين جا ڪونسلر، ضلعي ڪميٽِين جا ڪونسلر، يو سي چيئرمين، يو سي وائيس چيئرمين، يو سي وارڊ ڪونسلر، يونين ڪميٽي چيئرمين، وائيس چيئرمين ۽ يونين ڪميٽي وارڊ ڪونسلرز جي چونڊ ٿيندي، جملي طور 6461 پولنگ اسٽيشن ۽ 13776 پولنگ بوٿ قائم ڪيا ويا آهن، 22 سئو کان وڌيڪ پولنگ اسٽيشن نهايت حساس، 2550 حساس ۽ 17 سئو پولنگ اسٽيشن نارمل قرار ڏنيون ويون آهن، بدامني جي خطري سبب جملي طور 57 هزار کان وڌيڪ سيڪيورٽي اهلڪار مقرر ڪيا ويا آهن، جن ۾ 24 سئو کان وڌيڪ فوجي اهلڪار، 4 هزار کان وڌيڪ رينجرز ۽ 51 هزار پوليس اهلڪار شامل آهن. بدين کي نهايت حساس قرار ڏنو ويو آهي، جملي طور 71 لک کان وڌيڪ ووٽر ووٽ ڏيندا، جملي طور 65 هزار کان وڌيڪ چونڊ عملو نگراني ڪندو، پولنگ خميس تي صبح ساڍي 7 وڳي کان شام ساڍي 5 وڳي تائين بنا ڪنهن وقفي جي جاري رهندي ۽ پرزائيڊنگ آفيسرن کي مئجسٽريٽ اول درجي جا اختيار ڏنا ويا آهن جيڪي قانون جي خلاف وزري ڪندڙن خلاف ٿڏي تي ڪارروائي جو اختيار رکن ٿا، سنڌ ۾ پهرين مرحلي ۾ پ پ جي ڀرپور ڪاميابي کانپوءِ ٻئي مرحلي ۾ پ پ کي مختلف ضلعن ۾ سخت مزاحمت کي منهن ڏيڻو پيو آهي، سڀ کان وڌيڪ مزاحمت وارو ضلعو بدين آهي جتي پ پ جي باغي اڳواڻ ڊاڪٽر ذوالفقار مرزا پنهنجي سربراهي ۾ هڪ مضبوط اتحاد جوڙيو آهي ۽ جهيڙي جا خدشا ظاهر ڪيا پيا وڃن. ٻئي طرف اليڪشن ڪميشن تڪبندين بابت عدالتي فيصلي جي روشني ۾ سنڌ جي 81 لوڪل ڪائونسلن ۾ سڀاڻي ٿيندڙ مڪاني چونڊون روڪي ڇڏيون آهن، اسلام آباد ۾ اليڪشن ڪميشن جي اجلاس کانپوءِ ميڊيِا کي بريفنگ ڏيندي سيڪريٽري بابر يعقوب ٻڌايو ته تڪبندين جي حوالي سان عدالتي فيصلي جي روشني ۾ سنڌ جي 81 لوڪل ڪائونسلن ۾ سڀاڻي ٿيندڙ مڪاني چونڊون روڪڻ جو فيصلو ڪيو ويو آهي، هن ٻڌايو ته متاثر علائقن ۾ 15 ڏينهن اندر نئين سر تڪبنديون ڪيون وينديون ۽ ان ڏس ۾ سنڌ حڪومت کي چيو ويندو ته ان حوالي سان قانون مطابق ڪارروائي ڪئي وڃي. بابر يعقوب ٻڌايو ته سنڌ جي جن ضلعن ۽ شهرن ۾ يونين ڪائونسلن جون چونڊون روڪيون ويون آهن، انهن ۾ حيدرآباد، شهيد بينظير آباد(نوابشاهه)، نوشهروفيروز، ميرپورخاص، ٿرپارڪر، ڄامشورو ۽ ٽنڊو الهيار شامل آهن، سندس چوڻ هو ته فيصلي مطابق سڀاڻي شهيد بينظيرآباد جي ٻن ۽ نوشهري فيروز جي 17 يوسيز ۾ چونڊون نه ٿينديون، اهڙي ريت ميرپورخاص جي شجاع آباد ۽ ٿررپاڪر جي ميونيسپل ڪميٽي جي چونڊ روڪي وئي آهي، اليڪشن ڪميشن جي سيڪريٽري مطابق ٿرپارڪر جي 6 يونين ڪائونسلن ۽ ٽنڊوالهيار سوڌو حيدرآباد ڊويزن جي ٻن ميونپسل ڪميٽيتن تي چونڊ روڪي وئي آهي، هن ٻڌايو ته ڄامشوري ۾ ٽن ۽ بدين ۾ 5 يونين ڪميٽين تي سڀاڻي چونڊ نه ٿيندي، بابر يعقوب مطابق گڏيل طور ميرپورخاص جي 25، حيدرآباد جي 24 ۽ شهيد بينظير آباد ڊويزن جي 32 لوڪل ڪائونسلن ۾ مڪاني چونڊ روڪي وئي آهي هوڏانهن پاڪستان پيپلز پارٽي جي چئيرمين بلاول ڀٽو زرداري مڪاني چونڊن جي ٻئي مرحلي ۾ چونڊن کان هڪ ڏينهن اڳ 81 يونين ڪائونسلز ۾ چونڊون نه ڪرائڻ واري فيصلي کي تڪراري چئي ڇڏيو آهي. سماجي رابطن واري ويب سائيٽ ٽوئيٽر تي پنهنجي نياپي ۾ بلاول ڀٽو زرداري چيو آهي ته سنڌ ۾ چونڊن کان هڪ ڏينهن اڳ يونين ڪائونسلز جون چونڊون روڪڻ تڪراري قدم آهي.

 

پاڪستان جون دهشتگردي خلاف ڪارروايون عالمي امن لاءِ اهم آهن: آمريڪا جو اعتراف

واشنگٽن(م.ڊ) آرمي چيف جنرل راحيل شريف واشنگٽن ۾ آرميڪي پرڏيهي وزير جان ڪيري سان ملاقات ڪئي آهي، جنرل راحيل شريف آمريڪي پرڏيهي وزير سان ملاقات جي لاءِ اسٽيٽ ڊپارٽمينٽ پهتو ته ان جو شاندار استقبال ڪيو ويو، جنرل راحيل شريف ۽ جان ڪيري جي ملاقات انتهائي خوش گوار ماحول ۾ ٿي، ٻنهي اڳوڻن آمريڪا ۽ پاڪستان جي وچ ۾ دفاعي تعاون ۽ ٻه طرفن لاڳاپن کان علاوه خطي ۽ عامي سيڪيورٽي صورتحال سميت گڏيل دلچسپي وارن معاملن تي خيالن جي ڏي وٺ ڪئي، ملاقات ۾ افغانستان جي حوالي سان به خاص ڳالهه بولهه ڪئي وئي، جنرل راحيل شريف آمريڪي پرڏيهي وزير کي پاڪ فوج جي طرفان دهشتگردن خلاف ڪيون ويندڙ ڪاررواين ۽ آپريشن ضرب عضب جي ڪاميابين بابت آگاهه ڪيو، آمريڪي پرڏيهي وزير جان ڪيري پاڪستان کي آمريڪا جو اهم اسٽريٽجڪ پارٽنر قرار ڏيندي چيو ته پاڪستان دهشتگردي جي خلاف مثار ڪندڙ ڪاررواين جي ذريعي خطي ۽ عالمي امن و استحڪام ۾ نهايت اهم ڪردار ادا ڪري رهيو آهي.

 

مڪاني چونڊن دوران هر صورت ۾ امن برقرار رکيو وڃي: وڏو وزير

ڪراچي(اسٽاف رپورٽر) ڊي جي رينجرز سنڌ ميجر جنرل بلال اڪبر سنڌ جي وڏي وزير قائن علي شاهه کي صوبي جي 14 ضلعن ۾ اڄ ٿيندڙ مڪاني چونڊن جي حوالي سان کنيل سيڪيورٽي قدمن تي تفصيلي بريفنگ ڏني. ذريعن مطابق ڊي جي رينجرز ميجر جنرل بلال اڪبر وزير اعليٰ هائوس ڪراچي ۾ وڏي وزير سنڌ سيد قائم علي شاهه سان ملاقات ئيي. ملاقات دوران اڄ خميس تي ٿيندڙ مڪاني چونڊن دوران امن امان ۽ سيڪيورٽي انتظامن تي تفصيلي ڳالهه ٻولهه ڪئي وئي.ڊي جي رينجرز ميجر جنرل بلال اڪبر 14 ضلعن ۾ رينجرز اهلڪارن جي مقرري جي حوالي سان وڏي وزير کي بريفنگ ڏني، ان موقعي تي وڏي وزير جو چوڻ هو ته مڪاني چونڊن جي موقعي تي سي ڪيورٽي کي يقيني بڻايو وڃي ۽ امن امان جي صورتحال کي هر صورت ۾ برقرار رکيو وڃي.

 

صدر ممنون حسين ايل اين جي رٿا کي ڪلين چٽ ڏئي ڇڏي

اسلام آباد (اين اين آءِ) پاڪستان جي صدر ممنون حسين چيو آهي ته ايل اين جي رٿا شفاف ۽ بدعنواني کان پاڪ آهي، ان سان ملڪ ۾ توانائي جون ضرورتون پوريون ٿينديون، صدر کي ايل اين جي رٿا تي ايوان صدر ۾ بريفنگ ڏني وئي، صدر ممنون حسين کي پيٽروليم ۽ قدرتي وسيلن جي وفاقي وزير شاهد خاقان عباسي بريفنگ ڏني، ان موقعي تي صدر چيو ته ملڪ ۾ توانائي جون ضرورتون پوريون ڪرڻ لاءِ ايل اين جي رٿا ضروري آهي، صدر ان موقعي تي هدايت ڪئي ته گهٽ خرچ ۽ وڌيڪ افاديت وارا منصوبا جوڙيا وڃن ته جئين ملڪ ۾ توانائي جو بحران ختم ٿي سگهي.

 

ازبڪستان جي دوري دوران وزيراعظم جي امام بخاري جي مزار تي حاضري، آزادي اسڪوائر پهچي شهيدن جي يادگار تي گل رکيا

تاشقند(مانيٽرنگ ڊيسڪ) ازبڪستان جي دوري تي پهتل وزيراعظم نواز شريف آزادي اسڪوائر پهچي شهيدن جي يادگار تي گل رکيا آهن، وزيراعظم نواز شريف ثمر قند پهچي روحاني بزرگ امام بخاري جي مزار تي به حاضري ڀري آهي. ازبڪستان جي دوري تي پهتل وزيراعظم نواز شريف تاشقند ۾ آزادي اسڪوائر پهتو ته فوجي جٿن کيس سلامي ڏني، ان موقعيتي خاتون اول ڪلثوم نواز، خاص معاون طارق فاطمي ۽ قومي سلامتي بابت صلاحڪار ليفٽيننٽ جنرل رٽائرڊ ناصر جنجوعا پڻ ساڻس گڏ هئا. وزيراعظم نواز شريف آزادي اسڪوائر تي قائم ازبڪستان جي سينيٽ سميت ٻين اهم قومي عمارتن جو به دورو ڪيو، جڏهن ته وزيراعظم شهيد جي يادگار تي پڻ گل رکيا. تاشقند کانپوءِ وزيراعظم نواز شريف، ازبڪستان جي شهر ثمر پهتو، جتي ازبڪ وزيراعظم شفقت مرزا ايوب ۽ ثمر قند جي گورنر سندس آجيان ڪئي.  وزيراعظم نواز شريف، ثمر قند ۾ روحاني بزرگ امام بخاري جي مزار تي حاضري ڀري گلن جي چادر چاڙهي.

 

نندي پور پاور پراجيڪٽ، سڀئي انگ اکر غلط ڏيکاريا ويا هئا، جاچ رپورٽ پوري ڪري ڇڏي آهي: خواجا آصف

اسلام آباد (بيورو) وفاقي پاڻي ۽ بجلي واري وزير خواجا آصف جو چوڻ آهي ته نندي پور پاور پراجيڪٽ بابت جاچ رپورٽ تيار ٿي وئي آهي، رٿا جي ڪل لاڳت 58 ارب رپيا ۽ بجلي جي اپت 430 ميگاواٽ آهي. اسان جي وقت ۾ جيڪوخرچ آيو،ان کي به رپورٽ ۾ شامل ڪيو ويو آهي.ذريعن مطابق خواجا آصف جو چوڻ هو ته نندي پور پاور پراجيڪٽ بابت مختلف چوٻول هلي رهيا هئا ۽ چيو ويو ته  ان پراجيڪٽ جي بجيٽ 2 ارب رپين کان وڌي 84 ارب تائين پهچي وئي آهي. اهو به چيو ويو آهي ته نندي پور مان 400 ميگاواٽ بجلي پيدا نٿي ٿي سگهي. هن چيو ته ان پراجيڪٽ جي لاڳت، اپت ۽ بند رهڻ بابت سڀئي انگ اکر غلط آهن، ڇو ته ان تي 51 ارب رپيا خرچ ٿيا آهن ۽ 84 ارب رپيا لاڳت جو انڪار ته نيپرا به ڪري چڪي آهي.سندس چوڻ هو ته نندي پور پاور پراجيڪٽ اپريل 2011ع ۾ پورو ٿيڻو هو پر ڏنل وقت تي پورو نه ٿيڻ جي ڪري خرچن ۾ واڌ ٿي ۽ رٿا ۾ دير به گذريل حڪومت ۾ ٿي هئي. سندس چوڻ هو ته جڏهن مسلم ليگ ن جي حڪومت آئي ته  ان وقت تائين 65 سيڪڙو ڪم پورو ٿي چڪو هو. گهڻي مشينري ڪراچي پورٽ ۽ چائنا ۾ پئي هئي، جن جي خرچ  ۾ ڏينهون ڏينهن واڌ ٿي رهي هئي ۽ اهو ئي سبب آهي ته ان جي لاڳت ۾ به واڌ ٿي آهي.

 

زلزلي سٽيلن جي اهنجن کان باخبر آهيان، وزير اعظم سان به ڳالهائيندس: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته زلزلي سٽيلن جي اهنجن کان باخبر آهيان،ان تي پارليامينٽ تي به دٻاءُ وڌو آهي ۽ وزيراعظم سان ڳالهائيندس، صوبائي حڪومت کي به درخواست آهي ته اها ٻيون مصروفيتون ختم ڪري متاثرن جي آخري متاثر جي بحالي لاءِ قدم کڻي، سنڌ حڪومت پاران به متاثرن جي به جوڳي مدد ڪنداسين، متاثر هن مشڪل ۾ پاڻ کي اڪيلو نه سمجهن، پ پ انهن سان گڏ آهي، پ پ جا جيالا خدمت ڪندا رهندا، اهڙن خيالن جو اظهار هن هڪ ڏينهن جي بونير دوري تي پارٽي صدر جوهر علي خان جي رهائشگاهه ڊگر ۾ زلزلي سٽيلن ۽ پارٽي ڪارڪنن کي خطاب ڪندي ڪيو ، ان سان گڏ فيصل ڪريم ڪنڊي، قمر زمان ڪائرا، زائر علي شاهه، صوبائي صدر خانزادا خان، محمد ڪريم ڊار ۽ صوبائي جنرل سيڪريٽري همايون خان به موجود هئا.

 

خورشيد شاهه سان اختلافن جون خبرون رد، ناصر شاهه کان قلمدان واپس وٺڻ پارٽي قيادت جو اختيار آهي: نثار کهڙو

ڪراچي (اي پي پي) سنڌ جي اطلاعات واري سينيئر وزير نثار احمد کهڙي چيو آهي ته پارٽي قيادت ۽ حڪومت وزارتن ۾ تبديلي جي مجاز آهي ۽ قيادت ڪنهن به وزير کان کاتي جو قلمدان واپس وٺي سگهي ٿي ۽ ڪنهن به وزير کي هٽائي سگهي ٿي، ناصر شاهه کان مڪاني ادارن واري کاتي جو قلمدان واپس وٺڻ جو سبب سندس خورشيد شاهه سان اختلاف نه آهن، ناصر شاهه جڏهن وزارت جو حلف کڻي رهيو هو ته خورشيد شاهه ان تقريب ۾ موجود هو. اهڙن خيالن جو اظهار هن اربع ڏينهن ڪراچيءَ جي مقامي هوٽل ۾ لياري يونيورسٽيءَ جي هڪ تقريب کانپوءِ ميڊيا سان ڳالهائيندي ڪيو. هڪ سوال جي جواب ۾ نثار احمد کهڙو چيو ته ايم ڪيو ايم جي ٻيهر سنڌ اسيمبليءَ ۾ واپسيءَ سٺو عمل آهي، جنهن تي کين خوش آمديد چئون ٿا ۽ هاڻي هو بهتر طريقي سان قانونسازي ۾ حصو وٺي سگهن ٿا. ايم ڪيو ايم جي حڪومت ۾ شموليت بابت هڪ سوال جي جواب ۾ هن چيو ته ايم ڪيو ايم جي سنڌ حڪومت ۾ شموليت متعلق پيپلز پارٽي سولوفلائيٽ ڪرڻ يا اڪيلي سر اڏام ڪرڻ تي يقين نه رکي، هاڻي اهو  دارومدار ايم ڪيو ايم تي آهي ته هو سنڌ حڪومت ۾ شموليت لاءِ ڪيترو رستو وڌائين ٿا. هن چيو ته ماضيءَ ۾ 5 سال سڀئي جماعتون پيپلز پارٽيءَ جون اتحادي رهيون آهن، ان لاءِ هاڻي به پيپلز پارٽي اڪيلي اڏام جي عادي ناهي. هن چيو ته گڏل فهم سان عوام سان مسئلا وڌيڪ حل ٿيندا ۽ وڌيڪ بهتر ڪم ٿيندو. هن چيو ته پاڻ ۾ اختلاف نه هجڻ گهرجن هاڻي سنڌ جي وڌيڪ بهتريءَ لاءِ گڏجي ڪم ڪرڻ جو ماحول بهتر پيدا ٿيو آهي. هن چيو ته سڀني جماعتن جي آپريشن تي اتفاق سان اڄ سنڌ ۾ امن امان بهتر ٿيو آهي ۽ ڀنگ عيوض اغوا، ڀتي خوري ۽ ٽارگيٽ ڪلنگ جو خاتمو ٿيو آهي. نثار احمد کهڙو چيو ته اسين پهريان ئي چيو هو ته ايم ڪيو ايم کي استعيفائون نه ڏيڻ گهرجن ها ڇاڪاڻ ته احتجاجي طور تي استعيفائون نه ڏنيون وينديون آهن نه ئي احتجاجي استعيفائون قبول ڪيون وينديون آهن، ان لاءِ ايم ڪيو ايم جون استعيفائون قبول نه ڪيون ويون.

 

پيپلزپارٽي ناصر شاهه کان عهدو واپس وٺي ڇڏيو، هو بنا وزارت جي وزير رهندو: نوٽيفڪيشن جاري

ڪراچي (اين اين آءِ) مڪاني چونڊن دوران سنڌ حڪومت اهم فيصلو ڪندي بلديات وزير ناصر حسين شاهه کان عهدو واپس وٺي ڇڏيو آهي هو هاڻي بنا کاتي جي وزير رهندو سنڌ حڪومت اڱاري ۽ اربع جي وچ واري رات اوچتو سرڪاري آفيسرن کي گهرائي ناصر حسين بلديات وزير جو قلمدان واپس وٺڻ جو نوٽيفڪيشن جاري ڪرائي ڇڏيو سروسز اينڊ جنرل ايڊمنسٽريشن کاتي پاران جاري نوٽيفڪيشن مطابق ناصر حسين شاهه بنا وزارت جي وزير رهندو جڏهن ته بلديات وزير جو قلمدان سنڌ جي وڏي وزير سيد قائم علي شاهه وٽ رهندو ٻئي پاسي ذريعن جو چوڻ آهي ته پيپزلپارٽي جي اعليٰ قيادت ناصر حسين شاهه کان ناراض هئي ان لاءِ ان کان قلمدان واپس ورتو ويو ذريعن جو چوڻ آهي ته پيپلزپارٽي جي قيادت کي ناصر شاهه ۽ ان جي پٽن بابت پارٽي کي شڪايتون ملي رهيون هيون واضح رهي ته ناصر حسين شاهه کي 23 جولاءِ 2015 تي بلديات کاتي جو قلمدان ڏنو ويو هو.

 

ڪوشش ڪنداسين ته ڪا به حڪومت پوليس ۾ مٽا سٽا نه ڪري سگهي: عمران خان

پشاور(پشاور) تحريڪ انصاف جي چيئرمين عمران خان چيو آهي ته ٿاڻو جڏهن ظلم جو اڏو بڻجي وڃي ته عوام اعتماد ناهي ڪندو، پوليس کي غير سياسي ڪرڻ تائين مسئلا حل نه ٿا ٿي سگهن. سنڌ ۾ شايد ئي تحريڪ انصاف جو ڪو نمائندو هجي ،جنهن جي خلاف ايف آئي آر نه ڪٽيل هجي. ڪهڙي پارٽي آهي جنهن ۾ چونڊون کٽڻ لاءِ پوليس جو استعمال ڪيو ويندو آهي. پشاور جي سي ٽي ڊي هيڊ ڪواٽر ۾ پوليس رپورٽنگ روم جي چڪاس ۽ پوليس لائينز ۾ پبلڪ لائينز ڪميٽي جي افتتاح کانپوءِ ميڊيا سان ڳالهائيندي عمران خان جو چوڻ هو ته جڏهن پوليس کان پاڻ قانون ٽوڙايو وڃي ته پوليس به قانون ٽوڙيندي.پنجاب جو عوام ٿاڻن کان ڊنل آهي. ميانوالي جي چونڊن کان پهرين ايماندار ڊي پي او کي بدلي ڪرڻ جي ڪوشش ڪئي وئي. اليڪشن ڪميشن جي پويان پئي ڊي پي او جي بدلي روڪرائي. پي ٽي آئي جي چئيرمين جو چوڻ هو ته اڄ خيبرپختونخوا جي اسڪولن ۾ 50 سيڪڙو بدران 90 سيڪڙو استاد حاضر آهن. سڀئي صوبا خيبرپختونخوا کان ئي سبق سکندا.عمران خان چيو ته هاڻي ماڻهن جا مسئلا انهن جي درن وٽ حل ٿيندا ۽ پوليس مدد ڪندي. پوليس ۾ ڀرتي لاءِ هاڻي گريجو ئيٽس اڳيان اچي رهيا آهن. پوليس کاتي ۾ اهڙيون تبديليون ڪري رهيا آهيون، جو ايندڙ حڪومت ڪنهن جي به هجي پر ان ۾ ڪا به مٽا سٽا نه ڪري سگهي.