تازيون خبرون

Daily Archives: November 18, 2015

سنڌ سرڪار ڪمنڊ جي اگهه تي سسبڊي ڏيڻ کان انڪار ڪري ڇڏيو

ڪراچي (اسٽاف رپورٽر)  وزير اعليٰ سنڌ سيد قائم علي شاهه چيو آهي ته هن ڪمند جو اگهه مقرر ڪرڻ جي لاءِ آبادگارن ۽ مل مالڪن جي نمائيندن سان الڳ الڳ ملاقاتون ڪيون آهن، ملاقات ۾ ڪمند جي ايندڙ فصل جو اگهه مقرر ڪرڻ جي حوالي سان ڳالهه ٻولهه ڪئي وئي آهي. ان موقعي تي وزير اعليٰ سنڌ سيد قائم علي شاهه هلندڙ سال ڪمند جي اگهه تي سبسڊي ڏيڻ کان انڪار ڪري ڇڏيو آهي. اجلاس ۾ زراعت جو صوبائي وزير علي نواز خان مهر، چيف سيڪريٽري سنڌ محمد صديق ميمڻ، وڏي وزير جو پرنسپل سيڪريٽري علم الدين بلو، سيڪريٽري زراعت گلزار شيخ، ڪين ڪمشنر  ۽ ٻين لاڳاپيل عملدارن شرڪت ڪئي. شوگر مل ايسوسيئيشن جي نمائيندن سان ملاقات ۾ وڏي وزير چيو ته  هلندڙ مالي سال ۾ سنڌ حڪومت وٽ سبسڊي ڏيڻ جي لاءِ مالي سگهه ناهي ۽ گذريل سال به اسان ترقياتي فنڊن مان سبسڊي فراهم ڪئي هئي جيڪا هن سال ممڪن ناهي، ان جي لاءِ ٻئي ڌريون گڏجي گڏيل رضامندي سان ڪمند جو اگهه مقرر ڪن. پاسما جي نمائيندن چيو ته گذريل سال  هنن کنڊ جي 1.3 ملين ٽن مقامي کپت جي مقابلي ۾ 1.8 ملين ٽن پيداوار ڪئي هئي ۽ ان حساب سان 8 لک ٽن وڌيڪ کنڊ انهن جي گودام ۾ پيل رهي.  هنن چيو ته قومي ۽ عالمي مارڪيٽ ۾ کنڊ جي قيمت هيٺ مٿي ٿيندي رهي ۽ پاڙيسري ملڪن ۾ به کنڊ جي پيداوار وڌيڪ ٿي ان جي ڪري هو وڌيڪ کنڊ بر آمد به نه ڪري سگهيا. هنن حڪومت تي روز ڀريو ته ڪمند جو اگهه 165 روپيا في مڻ مقرر ڪيو وڃي  جنهن تي وزير اعليٰ سنڌ سيد قائم علي شاهه  چيو ته اهو اگهه مناسب ناهي، ان ڪري وڏي وزير پاسما وارن کي مناسب اگهه مقرر ڪرڻ جي تجويز ڏيڻ لاءِ وقت ڏنو. وڏي وزير چيو ته منهنجي خواهش آهي ته ڪمند جو اگهه مل مالڪن ۽ آبادگارن جي گڏيل رضامندي سان طئي ٿئي. وڏي وزير آبادگارن سان الڳ ملاقات پڻ ڪئي جنهن ۾ آبادگارن ڪمند جو اگهه 185 روپيا في مڻ مقرر ڪرڻ جو مطالبو ڪيو. وڏي وزير چيو ته انهن جي تجويز ڪيل قيمت جي حوالي سان مل مالڪن سان ڳالهائيندس ۽ ٻنهي ڌرين جي لاءِ قابل قبول قيمت مقرر ڪئي ويندي. آبادگارن جي وفد جي سربراهي ڊاڪٽر نديم قمر، زاهد ڀرڳڙي ۽ ٻيا ڪري رهيا هئا.

 

مون سان به شهيد ڀٽو جيان غداري ڪئي وئي، سازشن کان ڊڄڻ وارو ناهيان: بلاول ڀٽو

حيدرآباد (اي پي پي) پاڪستان پيپلزپارٽي جي چيئرمين بلاول ڀٽو زرداري چيو آهي ته هن جن کي چاچو سمجهيو انهن سندس ساٿ ڇڏي ڏنو ۽ ساڻس به شهيد ذوالفقار علي ڀٽو وانگر غداري ڪندي شهيد محترمه بينظير ڀٽو جي پارٽِي کي غير مستحڪم ڪرڻ جي سازش ڪئي وئي. هن چيو ته بدين جي رهواسين کي قتل جون ڌمڪيون ڏئي عوام جو رستو روڪڻ جي ڪوشش ڪئي پئي وڃي جڏهن ته ادارا گهري ننڍ ستل آهن ۽ انهن ماڻهن کي ڪير روڪڻ وارو ناهي پر مان شهيد بينظير ڀٽو جو پٽ آهيان ۽ اهڙن ماڻهن کان ڊڄڻ وارو نه آهيان جيڪو شخص بينظير ڀٽو کي ڀيڻ چوندو هو، اڄ اهو مخالفن سان گڏ آهي ۽ اهو مخالفن جي ڪڇ ۾ ويٺو آهي ۽ ان پ پ پ کي بدين ضلعي مان ختم ڪرڻ جو سوچيو آهي پر مان کيس ٻڌائڻ گهران ٿو ته پ پ پ غريبن جي دلين ۾ سمايل آهي، جيڪا نسلن تائين منتقل ٿيندي رهندي ۽ ان جي محبت ختم نٿي ٿي سگهي. اهڙو اظهار هن اڱاري ڏينهن ضلعي بدين ۾ الله والا چوڪ تي عوامي جلسي کي خطاب ڪندي ڪيو. هن چيو ته بدين جي عوام جهڙي طرح شهيد ذوالفقار علي ڀٽو ۽ شهيد محترمه بينظير ڀٽو جي شاندار آجيان ڪئي هئي ائين ئي اڄ منهنجي به تاريخي آجيان ڪئي آهي جنهن لاءِ مان سندن تمام گهڻو ٿورائتو آهيان. هن چيو ته شهيد ذوالفقار علي ڀٽو ۽ شهيد راڻي محترمه بينظير ڀٽو جي ڇڏيل مشن کي عوام جي مدد سان مڪمل ڪيو ويندو. هن چيو ته ماضي ۾ شهيد ذوالفقار علي ڀٽو بدين کي ضلعي جو درجو ڏنو هو ۽ ضلعي ۾ ڪاليج، بجلي، گئس ۽ ٻيون بي مثال ترقياتي اسڪيمون ڏنيون ويون. ان کان علاوه محترمه بينظير ڀٽو بينظير انڪم سپورٽ پروگرام شروع ڪري غريب عوام جي گهرن جو چلهو ٻاريو. هن چيو ته مان عوام ۽ عوام مون سان گڏ آهي ۽ کين ڪڏهن به اڪيلو نه ڇڏيو ويندو. هن چيو ته چاچو عمران خان چوي ٿو ته مونکي سياست نٿي اچي ۽ مان کيس ٻڌائڻ گهران ٿو آئون پنهنجي ننڍي ڄمار ۾ جلاوطن به رهيس ۽ پنهنجي والد کي جيل ۾ قيد ۽ سندس ڪٽيل زبان به ڏٺم جڏهن ته پنهنجي امڙ کي ان ملڪ لاءِ قربان ٿيندي به ڏٺو پوءِ به چاچو عمران چوي ٿو ته مونکي سياست نٿي اچي. هن چيو ته شهيد بينظير ڀٽو وڏن وڏن آمرن سان مقابلو ڪيو ۽ انهن کي کي شڪست ڏئي وڏا وڏا بت ڪرائي ڇڏيا. هن چيو ته سياست عوام جي حمايت ۽ سندن خدمت سان ٿئي ٿي جيڪا اسانجي رت ۾ شامل آهي ۽ اسين سياست کي عبادت سمجهندا آهيون. هن عوامي پرجوش نعرن جو جواب ڏيندي چيو ته 19 نومبر تي بلدياتي چونڊن ۾ تير تي ٺپو هڻي شهيد محترمه بينظير کي خراج تحسين پيش ڪيو ويندو. هن چيو ته 19 نومبر تي تير ئي تير هلندو مرزا يا ڪو ٻيو نه هلندو. هن آخر ۾ اهو نعرو هڻندي پنهنجي خطاب جي پڄاڻي ڪئي ته يا ا لله يارسول بينظير بي قصور. ان موقعي تي سينيئر صوبائي وزير اطلاعات ۽ تعليم نثار احمد کهڙو، صوبائي وزير اعجاز جکراڻي، ايم اين اي شگفته جماڻي، صوبائي وزير ڊاڪٽر سڪندر مينڌرو، اڳوڻي سينيٽر ياسمين شاهه، ڊاڪٽر خالده مينڌرو، اڳوڻي صلاحڪار اطلاعات جميل سومرو، ايم اين اي سردار ڪمال خان چانگ، ايم پي اي نواز چانڊيو ۽ ٻيا پڻ موجود هئا.

 

 

بک ستايلن ۽ بي گهر ماڻهن جي قيمت تي اورنج لائين نٿي هلي سگهي: خورشيد شاهه

چترال (بيورو) قومي اسيمبلي ۾ مخالف ڌر جي اڳواڻ خورشيد شاهه جو چوڻ آهي ته بک ستائلن ۽ بي گهر ماڻهن جي قيمت  تي اورينج لائين نٿي هلي سگهي. ميڊيا سان ڳالهائيندي سندس چوڻ هو ته  زلزلي سٽيل علائقن ۾ حقدارن کي برابري جي بنياد تي امداد ڏني وڃي.خورشي شاهه وڌيڪ چيو ته ڏکيائين جو شڪار ماڻهن جي مدد ڪرڻ سڀني جو گڏيل فرض آهي ۽ اهو قوت ڪنهن تي به اچي سگهي ٿو.

 

چيف اليڪشن ڪمشنر جو اليڪشن ڪميشن جي معاملن ۾ عدالتي مداخلت تي ڪاوڙ جو اظهار

اسلام آباد (بيورو) چيف اليڪشن ڪمشنر، جسٽس رٽائرڊ سردار رضا، اليڪشن ڪميشن جي معاملن ۾ عدالتي مداخلت تي ڪاوڙ جو اظهار ڪندي چيو آهي ته ووٽرز فهرستن مان نالا ڪڍڻ يا شامل ڪرڻ اي سي پي جو اختيار آهي، هاءِ ڪورٽ ان حوالي سان حڪم جاري ڪن پيون، ڇا هو 45 سالن کان جاٺا هڻي رهيا آهن.؟ چيف اليڪشن ڪمشنر جسٽس رٽائرڊ سردار رضا اسلام آباد ۾ مختلف درخواستن جي ٻڌڻي ڪئي. ان موقعي تي ريمارڪس ڏيندي چيف اليڪشن ڪمشنر چيو ته ووٽر فهرست ۾ نالا شامل ڪرڻ يا خارج ڪرڻ اليڪشن ڪميشن جو آئيني ۽ قانون اختيار آهي پر ان بابت به هاءِ ڪورٽس کين حڪم ڏئي رهيون آهن. هن چيو ته وڪيل ٻڌائي ته اليڪشن جي معاملن جو اختيار اليڪشن ڪميشن وٽ آهي يا اهڙا اختيار هاءِ ڪورٽس کي آهن. چيف اليڪشن ڪمشنر چيو ته هو 45 سالن کان جاٺا نه پيا هڻن، هاءِ ڪورٽس کين ووٽر فهرست ۾ نالو شامل ڪرڻ يا خارج ڪرڻ بابت ڪيئن پيون حڪم جاري ڪن. جسٽس رٽائرڊ سردا رضا چيو ته وڪيل اليڪشن جي معاملن ۾ اليڪشن ڪميشن سان رابطو ڪرڻ بدران هاءِ ڪورٽس جا حڪم کڻي ايندا آهن.

 

رينجرز ذوالفقار مرزا کي سيڪيورٽي ڏيڻ کان انڪار ڪري ڇڏيو

ڪراچي (اسٽاف رپورٽر) سنڌ هاءِ ڪورٽ رينجرزپاران  ڊاڪٽر ذوالفقار مرزا کي  سڪيورٽي فراهم ڪرڻ کان انڪار ڪرڻ ۽ ڌرين جا دليل ٻڌڻ بعد  ذوالفقار مرزا جي درخواست تي فيصلو محفوظ ڪري ڇڏيو آهي، جيڪو اڄ ئي ٻڌايو ويندو. سنڌ هاءِ ڪورٽ جي جسٽس نعمت الله ڦلپوٽو جي سربراهي ۾ بئنچ ڊاڪٽر ذوالفقار مرزا جي رينجرز جي سيڪيورٽي فراهم ڪرڻ بابت درخواست تي ٻڌڻي ڪئي. رينجرز سنڌ هاءِ ڪورٽ ۾ داخل ڪرايل جواب ۾ ڄاڻايو آهي ته رينجرز سنڌ  ۽خاص طور ڪراچي ۾ دهشتگردن خلاف جاري آپريشن ۾ مصروف آهي ۽ خير پور واقعي بعد امن امان برقرار رکڻ لاءِ سمورين پولنگ اسٽيشنز تي رينجرز کي مقرر ڪيو ويو آهي ان ڪري ڪنهن فرد کي سيڪيورٽي فراهم ڪرڻ وس ۾  نه آهي. ٻڌڻي دوران ذوالفقار مرزا جي وڪيل دليل ڏيندي چيو ته ايس ايس سيڪيورٽي پاران آءِ جي سنڌ کي ڏنل رپورٽ ۾ چيو ويو آهي ته ذوالفقار مرزا جي حياتي کي خطرو آهي ان ڪري کيس سيڪيورٽي فراهم ڪئي وڃي. ايڊو ڪيٽ جنرل عدالت ۾ سي ڊيز پيش ڪندي چيو ته ذوالفقار مرز ا جلسن ۾ گٿا لفظ ڳالهائي ماڻهن جا جذبا ڀڙڪائي رهيو آهي، هو نه ايم اين اي ۽نه ايم پي اي آهي ۽ نه وري مڪاني چونڊن جو اميدوار آهي. ايڊو ڪيٽ جنرل دليلن ۾ اهو به چيو آهي ته ذوالفقار مرزا هر پولنگ اسٽيشنز تي وڃي امن امان خراب ڪرڻ چاهي ٿو ۽ امن امان برقرار رکڻ لاءِ رينجرز کي به مقرر ڪيو ويو آهي.

 

طلاق جا ذميوار مان پاڻ ۽ عمران خان آهيون: ريحام

لنڊن (مانيٽرنگ ڊيسڪ) پاڪستان تحريڪ انصاف جي چيئرمين عمران خان جي اڳئين زال ريحام خان علحيدگي جي معاملي ۾ عمران خان جي ڀينرن جي ڪردار جي ترديد ڪري ڇڏي آهي ۽ لکيو آهي ته عمران خان سان شادي کان پوءِ پورو پاڪستان سسرال بڻجي ويو برطانوي اخبار ۾ ڇپيل ڪالم ۾ ڪاري جادو ۽ گهريلو سازشن جي خبرن کان پوءِ ريحام خان لکيو ته صرف هو ۽ ان جو مڙس پاڻ ۾ علحيدگي جا ذميوار آهن اسان پاڻ ۾ هڪ مضبوط شادي جي ٻنڌڻ کي قائم نه رکي سگهياسين ۽ صرف 10 مهينن ۾ هڪٻئي کان الڳ ٿي ويا سين طلاق لاءِ عمران خان جي ڀينرن پاران دٻاءُ جي ڳالهين ۾ ڪائي سچائي نه آهي ميڊيا رپورٽ مطابق ريحام خان پاڪستان جي اڳوڻي ڪرڪيٽر جي زال طور گذاريل گهڙيون به وڏي جذباتي انداز ۾ بيان ڪيون هن لکيو ته عمران خان سان شادي کان پوءِ سڄو پاڪستان ئي منهنجو سسرال بڻجي ويو سياست ۾ اچڻ بابت پنهنجين خواهشن بابت ڳالهائيندي ريحام خان چيو ته پي ٽي آءِ کيس ڪڏهن به کيس قبول ناهي ڪيو ۽ ڪيترن ئي اهم اڳواڻن ان جي خلاف باقاعده مهم هلائي ۽ موقف اختيار ڪيو ته هو پارٽي معاملن ۾ ان جي مداخلت نٿا چاهين جنهن کان پوءِ هلندڙ سال آگسٽ ۾ ئي پارٽي معاملن کان پري رهڻ جو فيصلو ڪيو ۽ ان تي منهنجو مڙس مون سان متفق هو.

 

فيملي سان گهڻو گڏ هوندي آهيان فلم انڊسٽري ۾ واپسي جو ارادو ناهي:ڪرشما ڪپور

ممبئي (شوبز نيوز) بالي ووڊ جي اداڪارا ڪرشما ڪپور جو چوڻ آهي ته ڪٽنب سان گهڻي رڌل هوندي آهيان، ان ڪري اڃان فلم انڊسٽري ۾ واپسي جو ڪو به ارادو ناهي.ڀارتي ميڊيا مطابق ڪرشما ڪپور “شگر” جي ڄاڻ جي حواليسان هڪ تقريب ۾ شامل ٿي،ان موقعي تي ميڊيا سان ڳالهائيندي هن چيو ته اڄ ڪلهه جي مصروف دور ۾ اسان کي پنهنجي صحت جو خاص خيال رکڻ گهرجي، مان تمام گهڻي سخت ڊائيٽ پلان سان پنهنجي زندگي گهاريندي آهيان، مان کاڌي جي گهڻي شوقين آهيان پر  جتي صحت جي ڳالهه ايندي اتي مان ڪو ه سمجهوتو ناهيان ڪندي، ڇو ته انسان جڏهن تندرست رهندو ته يقيني طور تي هو سٺي ۽ بهتر زندگي گهاري سگهي ٿو.

 

ميرا نجي ٽي وي چينل جي مارننگ شو جي پروڊيوسر کي رانبوٽا پائي زخمي ڪري ڇڏيو

لاهور (شوبز نيوز) اداڪارا ميرا نجي ٽي وي چينل جي مارننگ شو جي پروڊيوسر کي ننهن سان رانبوٽا پائي زخمي ڪري ڇڏيو، رپورٽن مطابق اداڪارا ميرا جڏهن مارننگ شو ۾ شامل ٿيڻ لاءِ پهتي ته ڪنهن ڳالهه تان پروڊيوسر سان سندس جهيڙو ٿي پيو، جنهن تي هوءَ ڪاوڙ ۾ ڳاڙهي ٿي وئي ۽ پروڊيوسر تي حملو ڪري ڏنائين، ميرا وڏن ننهن سان پروڊيوسر کي رانبوٽا پاتا، جنهن سبب سندس ٻانهن زخمي ٿي پئي ۽ رت وهندو رهيو، ان موقعي تي موجود ٻين ماڻهن وچ ۾ پئي جهيڙو ٽاري ڇڏيو.

 

عمر اڪمل ماڊل ريچل خان کي 50 ڪروڙ رپيا ڏنڊ جو نوٽيس اماڻي ڇڏيو

لاهور (اسپورٽس نيوز) قومي ڪرڪيٽر عمر اڪمل ناليواري ماڊل ريچل خان کي 50 ڪروڙ رپيا ڏنڊ جو نوٽيس اماڻي ڇڏيو، عمر اڪمل اهو نوٽيس پنهنجي وڪيل ذريعي ريچل خان کي اماڻيو، جنهن ۾ هن چيو آهي ته ماڊل ريچل بي بنياد الزام هڻي سندس ساک ۽ شهرت کي نقصان پهچائڻ جي ڪوشش ڪئي. عمر اڪمل جو نوٽيس ۾ چوڻ هو ته ريچل جيڪڏهن 15 ڏينهن اندر ڏنڊ جي رقم ڏيڻ سان گڏ لکت ۾ معافي نه ورتي ته قانوني ڪاروائي ڪئي ويندي.واضح هجي ته ريچل خان دعويٰ ڪئي هئي ته ناروي ۾ تقريب دوران عمر اڪمل ساڻس بدتميزي ڪئي، جنهن تي هن کيس ٿڦڙ وهائي ڪڍي ۽ هو زمين تي ڪري پيو، جنهن کانپوءِ کيس انتظاميا کڻائي وئي، ريچل جو اهو به چو ڻ هو ته تقريب ۾ عبدالرزاق، مصباح الحق، شعيب اختر ۽ ڀارتي اداڪارا ماهيما چوڌري ۽ روهيت شرما به موجود هئا، هن الزام هنيو ته عمر اڪمل مونکان پهرين ماهيما ۽ روهيت سان پڻ بدتميزي ڪئي.

 

پاڪستان ڪرڪيٽ ٽيم ايندڙ سال نيوزيلينڊ جو دورو ڪندي

ويلنگٽن (اسپورٽس نيوز) پاڪستاني ڪرڪيٽ ٽيم ايندڙ سال جنوري ۾ نيوزيلينڊ جو دورو ڪندي، گرين شرٽس دوري دوران ميزبان ٽيم خلاف 3 ٽي -20 ۽ 3 ون ڊي ميچن جي سيريز کيڏندي، ان سيريز دوران ويلنگٽن بيسن ريزرو اسٽيڊيم اٽڪل 11 سالن کان پوءِ ون ڊي انٽرنيشنل ميچ جي ميزباني ڪندي، جتي نيوزيلينڊ ۽ پاڪستان وچ ۾ پهرين ون ڊي ميچ جو شيڊول آهي، نيوزيلينڊ ڪرڪيٽ بورڊ موجب ٻنهي ٽيمن وچ ۾ 3 ٽي -20 ءٌ 3 هڪ ڏينهن وارين عالمي ميچن جي سيريز کيڏي ويندي، ٻنهي ٽيمن وچ ۾ ٽي- 20 سيريز جي پهرين ميچ 15 جنوري تي آڪلينڊ، ٻي ميچ 17 جنوري تي هملٽن جڏهن ته ٽئين ۽ آخري ميچ 22 جنوري تي کيڏي ويندي، ان کان پوءِ ٻنهي ٽيمن وچ ۾ ون ڊي سيريز جي پهرين ميچ 25 جنوري تي بيسن ريزرو، ٻين ميچ 28 جنوري تي نيپيئر جڏهن ته ٽئين ۽ آخري ميچ 31 جنوري تي آڪلينڊ ۾ کيڏي ويندي.