تازيون خبرون

Daily Archives: November 6, 2015

مذهب ۽ ذات جي بنياد تي ورهاست نه صرف خوفناڪ پر قبولڻ جوڳي به نه آهي: سونم ڪپور

نئين دهلي(شوبز نيوز) بالي ووڊ اداڪاره سونم ڪپور چيو آهي ته مذهب ۽ ذات جي بنياد تي ورهاست نه صرف خوفناڪ پر قبولڻ جوڳي به نه آهي، سلمان

خان سان پريم رتن ڌن پايو جي اشتهاري مهم دوران هڪ تقريب کي خطاب ڪندي هن چيو ته جيڪا ڳالهه به بنا ڪنهن ثبوت جي چئي وئي هجي اها قبولڻ جوڳي نه هوندي. سونم ڪپور سلمان خان جي ڀارت ۾ عدم برداشت جي حوالي سان بيان تي تنقيدي سوالن جو جواب ڏيڻ لاءِ پاڻ اڳيان وڌي مائيڪ ورتو ۽ سندس خيال ۾ هوءَ خالن خان ئي تنقيد جو بهتر جواب ڏئي سگهي ٿي. هن چيو ته اڄڪلهه مذهب، ذات ۽ فرقن جي نالي تي ڳالهيون ڪيون پيون وڃن جيڪي نفرت واريون آهن.

 

سينا ملر فلمي ڪردار لاءِ گنجو ٿيڻ جي خواهش ڏيکاري ڇڏي

لاس اينجلس: هالي ووڊ اداڪاره سينا ملر جي فلمي ڪردار لاءِ گنجي ٿيڻ جي خواهش ظاهر ڪئي آهي. سينا ملر پنهنجي تازي ڳالهين ۾ چيو ته پنهنجي هر فلم ۾ مختلف نظر اچڻ چاهيان ٿي. ان لاءِ گنجو به ٿيڻو پيو ته تيار آهيان. سينا چيو ته منهنجا وار خوبصورت آهن پر مون کي انهن سان دلچسپي ناهي.اداڪاره جو وڌيڪ چوڻ هيو ته مونکي پنهنجي وارن ۾ ڪا دلچسپي ناهي فلمي ڪردار نڀائڻ لاءِ ڪنهن به حد تائين وڃڻو پيو ته ويندس

 

شارجا ٽيسٽ ۾ انگلينڊ کي مات،پاڪستان سيريز کٽي ٻي پوزيشن تي پهچي ويو

شارجا:پاڪستان ڪرڪيٽ ٽيم انگينڊ کي 156 رنسن تي گهمائي نه رڳو آخري ٽيسٽ پر سيريز به پنهنجي نالي ڪري ورتي ۽ ان سان گڏ آئي سي سي جي ٽيسٽ رينڪنگ ۾ پڻ ٻي پوزيشن ماڻي ورتي.شارجا ۾ آخري ٽيست ميچ جي اڄ آخري ڏينهن تي، پاڪستاني اسپن بالرن انگلينڊ جي گورن کي گهمائي لاٿو، ڏينهن جي شروعات ۾ انگلينڊ 2وڪيٽن جي نقصان تي 46 رنسن سان ميدان ۾ لٿي ، ميچ جي آخري ڏينهن تي رهيل 8 رانديگر رڳو 104 رنسون ٺاهي سگهيا، ڪپتان ايلسٽر ڪُڪُ اڪيلي سِر مزاحمت ڪندي 63 رنسون ٺاهيون، جڏهن ته انگلينڊ جا 6 رانديگر ڊبل فگرز ۾ ئي نه پهچي سگهيا،معين علي ۽ عادل راشد 22، 22، رنسون ٺاهي سگهيا.پاڪستان طرفان ياسر شاهه4، شعيب ملڪ 3، ذوالفقار بابر2،جڏهن ته راحت علي هڪ وڪيٽ ورتي.واضح هجي ته پاڪستان پهرين اننگ ۾ 234 ۽ ٻي اننگ ۾ 355 رنسون ٺاهيون هيون، جڏهن ته انگلينڊ پهرين اننگ ۾ 306 رنسون ٺاهيون ۽ ان کي ڪاميابي لاءِ 284 رنسن جو ٽارگيٽ مليو هو.

 

عثمان خواجه ڪيويز خلاف سينچري اسڪور ڪري پنهنجي سليڪشن صحيح ثابت ڪري ڇڏي

برسبين(اي پي پي) پاڪستاني ڄائي آسٽريلوي بيٽسمين عثمان خواجه نيوزيلينڊ خلاف پهرين ٽيسٽ ۾ شاندار سينچري اسڪور ڪري پنهنجي سليڪشن کي صحيح ثابت ڪري ڇڏيو، سندس ڪيريئر جي اها پهرين سينچريآهي. گذريل ڏينهن برسبين ۾ نيوزيلينڊ خلاف ٽيسٽ جي پهرين ڏينهن عثمان خواجه بهترين ڪارڪردگيءَ جو مظاهرو ڪيو ۽ ڪيريئر جي پهرين سينچري اسڪور ڪئي هو 102 رنسن سان ناٽ آئوٽ رهيو.

 

درازا واقعو ۽ سياسي ڄار…!Long way: وينگس

پاڪستان جي سياست کي سمجهڻ لاءِ تاريخ جي ورقن کي اُٿلائڻو پوندو ۽ پوءِ ڪيترائي رُخ آساني سان سمجهه ۾ اچي ويندا، اڄ جي سياست ڪا نئين ناهي، ان ۾ هاڻي به گذريل سياسي عڪس نظر اچي پيو. سياست ۾ جيڪو ڪجهه ٿئي ٿو، ان جي پٺيان ڪو نه ڪو سبب ضرور هوندو آهي، هر شيءِ بي سبب ناهي. اسان وٽ جڏهن به ڪا وڏي تبديلي يا لانگ ٽرم لاءِ ڪنهن کي اچڻو هوندو آهي ته ان لاءِ ماحول به خاص طرح سان جوڙيو وڃي پيو ته جيئن ڪنهن کي ڪو وجهه نه ملي سگهي.

شهيد ذوالفقار علي ڀٽو کي آيل ڦاهي سڀني کي ياد آهي، ان جي ڪيس کي ڪيئن ۽ ڪهڙي انداز سان جوڙيو ويو، هاڻي ڪجهه به ڳجهو ناهي، تاريخ سڀ ڪجهه وائکو ڪري چڪي آهي. جيڪڏهن ڪير مڃڻ نه ٿو چاهي ته اها ان جي مرضي، پر سچ کان انڪار نٿو ڪري سگهجي. ان ۾ ڪو شڪ ناهي ته شهيد ڀٽوز جي پارٽي، هاڻوڪي پارٽي کان گهڻي منفرد آهي ۽ عوام کي سنڌ حڪومت بيزار ڪرڻ ۾ وس ناهي گهٽايو. صوبائي حڪومتن کان وٺي وفاقي حڪومت تائين ڪنهن جي به بهتر ڪارڪردگي ناهي رهي، مسلم ليگ (ن) ۽ پيپلز پارٽي گذريل دورن کان وٺي حڪومتون ڪنديون پيون اچن، انهن جي عوام ڏانهن پرفارمنس زيرو رهي ۽ بوگس حڪومت ۾ ڪي پي ڪي ۽ بلوچستان به پٺتي ناهن.

هاڻي سنڌ حڪومت تي ڳالهائينداسين ته انهن جي حڪومت سنڌ ۾ ڪيئن رهي آهي؟ صوبائي حڪومت مٿان ڪا تنقيد ٿئي ٿي ته يقينن وزيرن کي دفاع ڪرڻ گهرجي، ٻيو انهن وٽ دفاع کانسواءِ بچيو ئي ڇا آهي! وزيرن کي پنهنجي دفاع کان ڪير روڪي نه ٿو، پر دفاع ڪندڙ جو چهرو به لفظن سان ساٿ ڏئي ته ڳالهه به سمجهه ۾ اچي…!

سنڌ جي جهڙي حالت ٿي وئي آهي، ان کان هو انڪار ڪيئن ٿا ڪري سگهن؟ ڳالهه صرف ٻن روڊن يا اسپتالن جي تعمير تائين ناهي، عوام جي چهرن ۾ جهاتي پائي ڏسو، جن جا چهرا اداس ٿي چڪا آهن. پ پ حڪومت ۾ سنڌ کي ڇا مليو؟ کڻي اڄ سوال ڦيرائي لکون ٿا ته پنهنجي ئي دوري حڪومت ۾ پيپلز پارٽي کي ڇا مليو؟ ڇا ان انداز سان پ پ جو جوش عوام ۾ آهي؟!

پ پ گهٽ ۾ گهٽ بلدياتي چونڊن دوران 8 ضلعن ۾ جنهن انداز سان کٽي آهي، ان تي تنقيدي نظر وجهون ٿا ته اها ئي خبر پوي ٿي ته صرف تڪن تي کٽي اچڻ سان پيپلز پارٽي عوام جي اداس دلين کي کٽيو ناهي. ها! ووٽ مليا آهن پر ڪيئن مليا، ان جي به خبر پيپلز پارٽي کي چڱي ريت آهي.

شهيد محترمه بينظير ڀٽو جڏهن پيپلز پارٽي کي سنڀاليو، ان وقت عوام ان جي زبان هئي، مخالف ڳالهائڻ دوران سوچيندا هئا ته ڪٿي ڪير عام ماڻهو تکو جواب نه ڏئي ڇڏي، هاڻي پ پ ڪٿي بيٺي آهي؟

پيپلز پارٽي کي بلدياتي چونڊن دوران خوش نه پر جاچڻ گهرجي ته انهن کي ڇا ان انداز سان کٽڻ گهربو هو يا عوام جي هر تڪ تان پورا ووٽ حاصل ڪرڻ گهربا هئا!

حڪومت سنڌ، بلدياتي چونڊن ۾ پنهنجو ڀرم بچائي وئي، پر سنڌ حڪومت کي اڳتي ٽف ٽائيم ملندو. بلدياتي چونڊن دوران درازا واقعو صرف 12 جانين جو نقصان ناهي، اهو اڳتي هلي ڪري سياسي گيم رچائيندو. درازا واقعو ڇو ٿيو؟ ان جي ٽائيمنگ به ڏسڻ گهرجي.

تعجب آهي ته هڪ پارٽي جا ماڻهو زندگي وڃائي ويهن ٿا ۽ اها پارٽي انتهائي صبر جو مظاهرو ڪندي صرف بيان جاري ڪري رهي آهي ۽ حڪومتي ڌر کي ڏوهي قرار ڏنو پيو وڃي. سنڌ حڪومت کي سوچي سمجهي سخت قدم ۽ قانون کڻڻ گهربا هئا، پر ائين نه ٿيو ۽ درازا واقعي هڪ نئون محاذ کوليو آهي.

ٿوري دير لاءِ سوچڻ گهرجي ته آخر پيپلزپارٽي فنڪشنل ليگ سان مهاڏو ڇو اٽڪائيندي؟ يا واضح ڪري لکون ٿا ته حڪومتي ڌر ائين ڪيئن ڪري سگهي ٿي؟ ان کي خبر آهي ته ان سان مشڪلاتون پيدا ٿينديون. ان کان وڌيڪ پارٽي جي مزاجن کي ڏٺو ويندو آهي ته اهي سياسي مزاج ان قسم جا رکن ٿا، پيپلز پارٽي جو اهڙو مزاج ناهي رهيو ته اهي بندوق جي سياست ڪن. حڪومتي ڪارڪردگي تي هزارين اختلاف پنهنجي جاءِ تي، سياسي مزاج جي خبر سڀني کي آهي ته پيپلزپارٽي ائين نه ٿي ڪري سگهي. درازا واقعي کان پوءِ سنڌ حڪومت جي وزيرن کي بيوقوفاڻا بيان ڏيڻ کان پاسو ڪرڻ گهربو هو، ڪيس کي عدالتي جاچ ڏانهن کڻي وڃڻ لاءِ وزيراعليٰ سنڌ چئي ڇڏيو، ان کانپوءِ ميڊيا آڏو پوري رپورٽ پيش ڪرڻ گهربي هئي.

فنڪشنل ليگ الزام هڻي پئي سگهي پر پيپلز پارٽي جي وزير کي بيان نه ڏيڻ گهرجي ها، ڪنهن به حساس معاملي کي سنڀالڻ لاءِ سنجيدگي جو مظاهرو ڪرڻ انتهائي ضروري هوندو آهي. پاڪستان پوري طرح سان جمهوري ملڪ ناهي ۽ نه ئي وري حڪومتي ٽائيم فريم کي پورو ڪرڻ سان ڪا جمهوريت اچي ويندي ۽ ائين سمجهجي ته بلدياتي چونڊون امن و امان سان گذري وينديون.

مون کي ياد آهي ته مان بلدياتي چونڊن تي گذريل مهيني دوران پنهنجي دوست سان ڳالهه ٻولهه ڪئي، جنهن کلندي چيو ته هيل بلدياتي چونڊون خوني ٿينديون ۽ پوءِ تون ڪا وڏي تبديلي ڏسندينءَ؟

بلدياتي چونڊن دوران سنڌ ۽ پنجاب ۾ جهيڙا ٿيا، سنڌ ۾ درازا سانحو پيش آيو، اهو واقعو سنڌ حڪومت لاءِ سياسي ڄار ثابت ٿي سگهي ٿو ته ان ۾ سنڌ حڪومت کي ڦاسائي ڪيرايو وڃي. فنڪشنل ليگ جنهن انداز سان ردعمل ڏيکاري رهي آهي، ان جو ردعمل سياسي گهٽ پر ڪنهن جو انتظار وڌيڪ آهي، ڇا ڪنهن اشاري جو انتظار آهي؟

ائين ڪيئن ممڪن آهي جو هڪ سياسي پارٽي، جنهن بدلياتي چونڊن ۾ پورو نه کٽيو هجي ۽ مٿان 12 زندگيون ختم ٿي ويون هجن، ان ۾اهڙي چالاڪ سياسي خاموشي، ڪيترن پاسن ڏانهن اشارو ڪري رهي آهي. فنڪشنل ليگ چالاڪ سياسي خاموشي اختيار نه ڪري ها ته خدشا به پيدا نه ٿين ها پر انهن جي اهڙي چالاڪ سياسي خاموشي پٺيان، سياسي چال به ٿي سگهي ٿي. هڪ اهڙي موڙ تي جڏهن درازا سانحو پيش اچي ٿو، اتي نه وسارڻ گهرجي ته متحده اسيمبلي ۾واپس اچي رهي آهي. سنڌ حڪومت کي سڀاڻي جيڪڏهن ڪجهه نقصان پهتو ته ان ۾ متحده پيپلز پارٽي جو ساٿ ڏيندي! شايد متحده پ پ جو ساٿ نه ڏئي ۽ فنڪشنل ليگ جو ساٿ ڏيندي، ان ڪري سنڌ حڪومت کي سياسي طور تي ٽف ٽائيم ملي سگهي ٿو.

درازا جو سياسي فائدو ۽ سياسي نقصان ڪنهن کي پهتو؟! ان ۾ پ پ کي سياسي نقصان پهتو آهي ۽ سياسي فائدو فنڪشنل ليگ حاصل ڪري پئي، اهي خاموش نه ويهندا، بلدياتي چونڊن جي ٻئي مرحلي تائين سنڌ حڪومت جي لاءِ مشڪلاتون پيدا ڪيون وينديون. جاچ ٽيم جلدي رپورٽ نه ڏئي سگهندي، اهو به سوال آهي ته ڇا جاچ ٽيم جي رپورٽ کي فنڪشنل ليگ قبول ڪندي؟ فنڪشنل ليگ جاچ ٽيم جي رپورٽ کي جي منظور نه ٿي ڪري ته پوءِ اهي يقينن احتجاج ڪندا ۽ انهن جي احتجاج جو رُخ حڪومت ڏانهن ئي هوندو.

ان ۾ وفاقي حڪومت بچي ويندي، جيڪڏهن سڀاڻي پ پ جي حڪومت کي سوڙهو ڪيو ويو!

اسان کي وسارڻ نه گهرجي ته پنجاب حڪومت جي وزير راڻا ثناءُ الله مٿان به قتل جو الزام آهي، جي سنڌ حڪومت وئي ته پوءِ پنجاب حڪومت کي به ائين ئي سوڙهو ڪيو ويندو ۽ شايد ڪا تبديلي اچي وڃي، ڇاڪاڻ جو سياسي شطرنج جون چالون ملندڙ محسوس ٿي رهيون آهن. کڻي اهو مڃي وٺون ته سنڌ حڪومت ۽ ٻي ڪا حڪومت نه ويندي، جهڙي طرح بلدياتي چونڊون ٿيون آهن ۽ هاريندڙ پارٽين خاموشي اختيار ڪئي آهي، ان جي پٺيان سبب مختلف نظر پيا اچن.

سنڌ ۾ درازا واقعو، سياسي راند رچائيندو، 12 زندگين کي انصاف ته نه ملندو، پر سياسي چال ضرور کيڏي ويندي. درازا واقعو بظاهر ٻن ڌرين ۾ فائرنگ جو نتيجو هو، پر ان جي پٺيان ڪجهه نه ڪجهه ضرور هوندو. درازا واقعو، سياسي ڄار ثابت ٿي سگهي ٿو ۽ 12 زندگين جي خاموشي تي هيل سياسي خاموشي مختلف انداز سان اڳتي ايندي. سنڌ حڪومت ان واقعي کي ڪيئن حل ڪري سگهندي؟ جيڪڏهن پهرين ئي سخت حفاظتي قدم کنيا وڃن ها ته ائين نه ٿئي ها. سنڌ حڪومت هن ڀيري عوامي سپورٽ حاصل ڪري سگهندي، جي فنڪشنل ليگ مخالف پارٽين کي گڏ ڪري احتجاج ڪيو ۽ 12 جنازن جي لاءِ انصاف گهري ٿي ته سنڌ حڪومت کي مشڪلاتون ڏسڻيون پونديون. درازا واقعي تي سياست ٿيندي، ان جو جڙندڙ ڄار سنڌ حڪومت کي سوڙهو ڪري سگهي ٿو. درازا واقعي جي ڪا نه ڪا ڪڙي ضرور آهي، جيڪا ڄار جوڙڻ چاهي پئي ۽ 12 زندگين جي لاءِ انصاف وري به اڌورو رهجي ويندو…!

 

اسان جي مئاسين سفر ۾ او ساٿي…: سليم جروار

گذريل رات جو 11 بجي ڌاري اسڪردو جي دوست مظفر حسين وزير فون ڪري ڏکوئيندڙ لهجي ۾ ٻڌايو ته ”زمان خان محسود شهيد هو گئي هين…..“ اعتبار نه پيو اچي. ڪيبل بند هئڻ ڪري فوراً نيٽ تي ميڊيا جا چئنل ڳولڻ لڳس ته بي. بي. سي کان ويندي سمورن ملڪي چئنلن تي سندس تصوير سميت شهيد ٿيڻ جي تصديق ٿيل هئي، زمان خان محسود جو تعلق وزيرستان جي علائقي ٽانڪ سان هو. اهڙي خطرناڪ علائقي ۾ هُو اخبارن سان لاڳاپيل صحافي هئڻ سان گڏ انساني حقن لاءِ جاکوڙيندڙ متحرڪ ڪارڪن پڻ هو. انهيءَ ناتي ساڻس دوستي به هئي. گذريل مهيني جي آخري هفتي ۾ اسلام آباد ۾ ايڇ. آر. سي. پي پاران ٿيندڙ ورڪشاپ ۾ گڏ هئاسين، 28 آڪٽوبر تي منجهند ڌاري اسان ٻه ٽي ساٿي هوٽل جي گيٽ مان نڪري روانا ٿي رهيا هئاسين، هي موٽر سائيڪل اسٽارٽ ڪري رهيو هو. مون هڪل ڪري پڇيو مانس ته: ”لالا يه ڪهان سي آئي هي….“ ته مسڪرائيندي مذاق ۾ چوڻ لڳو ته وزيرستان سي اس پر آيا هون…. بس منهنجي اها ساڻس آخري ڳالهه ۽ منهنجي سامهون سندس آخري مسڪراهٽ هئي. انساني حقن واري ڪميشن جي زير انتظام انهيءَ ورڪشاپ ۾ ملڪ جي ڪنڊ ڪڙڇ مان ساٿي آيل هئا، پر هن ڀيري هو سمورن ۾ نرالو لڳي رهيو هو. ان جو سبب سندس روايتي پٺاڻڪي پڳڙي هئي، جيڪا هُو آخري ٻه ڏينهن مسلسل ٻڌي آيو هو. وڏي تُري سان ٻڌل پڳڙي سندس شخصيت ۾ اضافو ڪري رهي هئي، آخري ڏينهن يعني 27 آڪٽوبر تي هو اها پڳڙي ٻين دوستن جي مٿي تي وجهي ساڻن فوٽو ڪڍرائيندو رهيو ۽ سندس قتل جي خبر سان گڏ ڪافي چئنلز تي اها ئي پڳڙي ٻڌل تصوير هلندي رهي،

زمان خان محسود جو اهو ئي هن فاني دنيا جو آخري ڊگهو سفر ثابت ٿيو ۽ پنهنجي ماڳ پهچڻ بعد وزيرستان جي سنگدل ۽ انسان دشمن هٿن هن مسڪرائيندڙ انسان دوست چهري کي هميشه هميشه لاءِ خاموش ڪري ڇڏيو، زمان خان جي قتل کان هڪ ڏينهن پهرين دنيا ۾ صحافين جي تحفظ جي حوالي سان ڏيهاڙو ملهايو ويو ۽ پاڪستاLن کي صحافين لاءِ خطرناڪ ملڪن مان نائون نمبر قرار ڏنو ويو ۽ سچ ۾ هي ملڪ جيڪو عام شهرين جي جانين ۽ حقن جي تحفظ ڪرڻ ۾ ناڪام رهيو آهي ان ملڪ اندر وري عام شهرين جي آواز کي بلند ڪرڻ ۽ بنيادي حقن لاءِ جاکوڙيندڙ صحافين ۽ انساني حقن جي ڪارڪنن کي هدف بنائڻ به ڏکيو ناهي. شهرن، ٻهراڙين ۽ روڊ رستن تي بي سهارا ۽ خالي هٿين هلندڙ اهي صحافي ۽ انساني حقن جا ڪارڪن هر جاءِ تي ان سفاڪ هٿن لاءِ آسان ٽارگيٽ بڻجي رهيا آهن، انساني حقن جي تنظيم ۾ ڪم ڪرڻ دوران اسان پنهنجا ڪي ئي ساٿي وڇڙندي ڏٺا، باجوڙ جي زرطيف آفريدي، ملتان جي راشد رحمٰن، بلوچستان ۾ صديق عيدو ۽ نعيم صابر کانپوءِ زمان محسود اهي ساٿي هئا، جن سان سالن جو ساٿ هليو ۽ هن اڙانگهي سفر ۾ راتيون ۽ ڏينهن گڏ گذاريا. اهي ساٿي ڏينهن ڏٺي جو ٽارگيٽ بنجي ويا، پر ڪنهن به دوست مايوس ٿي خوف کائي پير پوئتي نه ڪيا. رياستي ادارن کان ويندي طالبان دهشتگردن ۽ انا پرست چوڌرين ۽ وڏيرن جي اک ۾ ڪنڊ بنيل اهي ساٿي پنهنجو ڪم جاري رکندا اچن، جبري گم ٿيندڙ جوانن جي نشاندهي هجي يا سماج جي پيڙهيل طبقن سان ٿيندڙ ناروا سلوڪ ملڪ جي ڪنڊ ڪڙڇ ۾ پکڙيل اهي ساٿي بغير ڪنهن معاوضي يا لالچ جي رپورٽنگ ڪندا رهيا آهن، پر افسوس ته هن رياست انهن جي تحفظ کي يقيني بنائڻ ته پري جي ڳالهه پر انهن جي بي گناهه خون سان انصاف به ناهي ڪيو، يتيمن، بي سهارا ۽ لاوارثن جيان مارجي ويل ساٿين جي ڏک ۽ سوڳ ۾ بچي ويل ساٿي احتجاج ته ڪري سگهن ٿا. کين ڀيٽا ڏيڻ لاءِ ميڻ بتيون ته ٻاري سگهن ٿا، پر ساڻن انصاف ڪرڻ ته رياست جي ذميواري آهي، بدقسمتيءَ سان ٻين جي حقن ۽ انصاف لاءِ جاکوڙيندڙن لاءِ ڄڻ انصاف جا در بند آهن.

پاڪستان ۾ مارجي ويل صحافين کي مڃتا ڏيندي پئرس جهڙي شهر ۾ ته روڊ ان جي نالي منسوب ٿي سگهن ٿا، پر هن ملڪ ۾ ته انهن لاءِ اهو به نٿو ڪيو وڃي. آخر اهڙو رويو ڇو؟اهو اهڙو سوال آهي، جيڪو پنهنجوپاڻ سان ڪري خاموش ٿي وڃجي ٿو. بيشڪ زندگي جو انت اچڻو آهي. ڪنهن به صورت ۾ زندگي کي فنا ٿيڻو آهي، پر سماج ۾ غير معمولي ڪردار ادا ڪندڙ ۽ سماج ۾ حقن ۽ انصاف لاءِ جاکوڙيندڙ ڪردارن جو غير فطري موت ان مشن ۽ مقصد کي ناڪام ڪرڻ جي اهڙي سازش آهي، جنهن ۾ ڪٿي ڪٿي لڳي ٿو ته رياست پاڻ به سڌي يا اڻ سڌي طرح ملوث آهي. ويجهي ماضي ۾ ڪيترن ئي صحافين کي نشانو بنايو ويو، ڪراچي جهڙي شهر ۾ صحافي محفوظ ناهن، پر حمله آور سيڪنڊن ۾ گم ٿي وڃن ٿا، انهن واقعن جا شاهد بي دردي سان رستي تان هٽايا وڃن ٿا، ڪروڙين روپين جا سرمائيدار مالڪ، وڏي پگهارن تي ويٺل ”بوس“ ته ايئرڪنڊيشن آفيسن مان حڪم جاري ڪري ”بريڪنگ نيوز“ وٺن ٿا، پر بريڪنگ نيوز ڏيندڙ صحافي جي وڃڻ پڄاڻا انهن جي گهر وارن ۽ ٻچن جي ڪهڙي حالت آهي، ڪو خبر وٺڻ لاءِ تيار ناهي هوندو. پوءِ به اهي باضمير انسان پنهنجي ڪم ۾ ڪو سمجهوتو ناهن ڪندا. سندن روح ۽ ضمير ۾ پلجندڙ سچائي وارو اهو جراثيم کين موت ۽ اذيت طرف ڌڪيندو رهي ٿو. سڀ ڪجهه ڄاڻيندي به خاموشي کانئن برداشت ناهي ٿيندي. زمان خان اخبارن، چئنلز ۽ انساني حقن واري ڪميشن تائين علائقي ۾ ٿيندڙ اقربا پروري، ناانصافي ۽ انساني حقن جي خلاف ورزي جون خبرون پهچائڻ سان گڏ انٽرنيٽ جهڙي جديد ٽيڪنالاجي ذريعي ٽوئيٽر تي ”گومل نيوز“ جي نالي سان اڪائونٽ ٺاهي. پل پل جي خبر دنيا تائين پهچائيندو رهيو، پر اڄ اها گومل نيوز سندس شهادت واري خبر کان به بي خبر آهي ڇو ته ان تي خبرون لوڊ ڪندڙ آڱريون ٻئي ڪنهن جي آڱرين جو نشانو بنجي ويون ۽ گومل نيوز وارو صفحو هڪ ڀيرو ٻيهر ڪورو جو ڪورو پيل آهي……

ماضي ۾ اهڙين ڊگهين شهادتن جيان اسان زمان خان جي شهادت تي به غم ۽ ڏک ڪنداسين، احتجاج ڪري سندس تصوير اڳيان ميڻ بتيون ٻاري ڀيٽا پيش ڪري سگهون ٿا، سندس خالي ڇڏيل صحافتي جاءِ تي ٻيو جاءِ وٺي ويندو، پر سندس ٽن معصوم نياڻين، ٻن پٽن ۽ بيوه بنيل گهرواري کي ته زندگي جو هر لمحو اذيت ڏيندو رهندو، شايد هن ملڪ ۽ هن سماج ۾ اهو سلسلو هلندو رهندو، جنهن جو انت اچڻو به آهي الئه نه…. پوءِ به قلم خاموش ناهي رهڻو. جنهن قلم ۾ اها طاقت آهي جو دنيا ۾ دهشت جي علامت بنيل هٿيارن سان ليس دهشتگرد به خوفزده آهن اهي ٻين سان مقابلو ڪرڻ بجاءِ ان قلم کي خاموش ڪرڻ ۾ رُڌل آهن

 

چونڊن جو ٻيو مرحلو ڇا پر امن ٿي سگهندو…؟

سنڌ ۾ مڪاني چونڊن جي پهرين مرحلي بعد ٻئي مرحلي جي شروعات کان پهرين مرحلي ۾ ٿيل خامين کي ختم ڪرڻ لاءِ گذريل ڏينهن وزير اعليٰ هائوس ۾ وڏي وزير سيد قائم علي شاھ جي صدارت هيٺ امن مان جو جائزو وٺڻ لاءِ اجلاس ٿيو، گڏجاڻي ۾ ڪيل فيصلن بابت صحافين کي بريفنگ ڏيندي اطلاعات ۽ تعليم جي سينيئر صوبائي وزير نثار احمد کهڙو چيو ته 19 نومبر تي صوبي جي 15 ضلعن ۾ ٿيندڙ مڪاني ادارن جي چونڊن جي موقعي تي هٿيار بند فوج کي تيار رهڻ لاءِ درخواست ڪئي ويندي، ان کانسواءِ ريپڊ ريسپانس فورس ۽ رينجرز جا اهلڪار به موجود هوندا ته جيئن اهي چونڊون مڪمل طور پر امن نموني ٿي سگھن، . هن چيو ته اهڙو فيصلو سياسي جماعتن پاران ٿيندڙ مطالبن کي آڏو رکي ڪيو ويو آهي. هن ٻڌايو ته چيف سيڪريٽري ۽ آءِ جي پوليس ايندڙ سومر ڏينهن چيف اليڪشن ڪمشنر سان ملاقات ڪري کيس چونڊن جي موقعي تي هٿيار بند فوج جي نوجوانن جي تيار رهڻ جي درخواست ڪندا. صوبائي وزير چيو ته 15 ضلعن ۾ 2820 پولنگ اسٽيشنن کي تمام گھڻوحساس ۽ 5571 پولنگ اسٽيشنن کي حساس قرار ڏنو يو آهي هن چيو ته ريپڊ ريسپانس فورس پنجن کان ستن منٽن اندر ڪنهن به اڻ وڻندڙ واقعي جي صورت ۾ ان هنڌ تي پهچي حالتن تي ڪنٽرول ڪندي. حڪومت ٽن ميمبرن تي ٻڌل هڪ ڪاميٽي جوڙي آهي جيڪا انهن 15 ضلعن ۾ سڪيورٽي جي ضرورتن بابت رپورٽ تيار ڪري حڪومت کي پيش ڪندي. حڪومت هٿيار کڻي هلڻ ۽ ان جي نمائش تي مڪمل پابندي مڙهي آهي ۽ ان قانون تي سختي سان عمل ڪرايو ويندو. هن انهن عناصرن کي تنقيد جو نشانو بڻايو جيڪي هر وقت حڪومت خلاف مڪاني ادارن جي چونڊن ۾ دير ڪرڻ جا الزام لڳائيندا هئا. وقت ثابت ڪري ڏيکاريو آهي ته موجوده عوامي حڪومت مڪاني ادارن جون چونڊون ڪرائي اختيار هيٺئين سطح تي چونڊيل نمائندن جي حوالي ڪرڻ ۾ پوري طرح مخلص آهي. موجوده حڪومت  مڪاني ادارن جي چونڊن دوران ووٽرس کي مڪمل طور تحفظ فراهم ڪرڻ جو عزم ڪيو آهي ۽ ان ۾ ڪنهن قسم جي ڪوتاهي نه ڪئي ويندي. هن اهو به چيو ته چونڊن جو پهريون مرحلو خيرپور واقعي کان سواءِ پر امن هو ۽ خيرپور واري وقعي تي اسان سڀني کي سخت افسوس آهي. حڪومت جا پهرين مرحلي ۾ کنيل قدم ۽ وري انهن قدمن کي نظر ۾ رکندي وڌيڪ بهتري آڻن جو فيصلو بهتر قدم آهي، ان ڪري اسان به سرڪار سڳوري کي اهو عرض رکنداسين ته مڪاني چونڊن ۾ ووٽرن کي پنهنجي ووٽ جو حق کليل نموني استعمال ڪرڻ جو حق حاصل هئي گهرجي، ووٽ جي بهاني هڪي ٻئي مٿان حملا ۽ قتل و غارت ڪنهن به نموني عوام جي حق ۾ نه آهي ان ڪري ان کي نه ورجايو وڃي.