تازيون خبرون

Daily Archives: November 6, 2015

آپريشن ضرب عضب آخري دهشتگرد جي خاتمي تائين جاري رهندو: صدر/وزيراعظم

اسلام آباد (بيورو) صدر ۽ وزيراعظم ڪراچي ۽ فاٽا سميت ملڪ ۾ امن امان جي مجموعي صورتحال تي اطمينان جو اظهار ڪندي چيو آهي ته دهشتگردي خلاف آپريشن ضرب عضب جاري آهي، آخري دهشتگرد جي خاتمي تائين آپريشن جاري رهندو. ايوان صدر اسلام آباد ۾ وزيراعظم نواز شريف، صدر ممنون حسين سان ملاقات ڪئي، جنهن دوران قومي معاملن تي ڳالهيون ڪيون ويون. ٻنهي اڳواڻن ۾ دهشتگردي خلاف جنگ آپريشن ضرب عضب، ڪراچي ۽ فاٽا سميت سڄي ملڪ ۾ امن امان جي صورتحال توڙي زلزلي متاثرن جي بحالي تي به ڳالهيون ڪيون ويون. ذريعن موجب، صدر ممنون ۽ وزيراعظم نواز شريف، ڪراچي ۽ فاٽا سميت سڄي ملڪ ۾ امن امان جي مجموعي صورتحال تي اطمينان جو اظهار ڪيو. ٻنهي اڳواڻن اتفاق ڪيو ته دهشتگردي خلاف جاري آپريشن ضرب عضب آخري دهشتگرد جي خاتمي تائين جاري رهندي ۽ ايندڙ نسلن کي پر امن پاڪستان ڏنو ويندو.

 

ڪابينا ڪميٽي پاران ملڪ جَي وڌيڪ 69 سرڪاري يونٽس جِي نجڪاري جي سفارش

اسلام آباد (بيورو) ڪابينا ڪميٽي، ملڪ جَي وڌيڪ 69 سرڪاري يونٽس جِي نجڪاري جي سفارش ڪري ڇڏي، ناڻي واري وزير اسحاق ڊار چيو آهي ته گڏيل مفادن واري ڪائونسل پاران اسٽيل ملز جي نجڪاري جي منظوري ڏني وئي آهي، سينيٽر طاهر مشهدي جو چوڻ آهي ته حڪومت جي غلط رويي سبب وفاق ڪمزور ٿي رهيو آهي. چيئرمين ميان رضا رباني جي صدارت هيٺ سينيٽ جو اجلاس ٿيو، جنهن ۾ مختلف معاملن تي بحث ڪيو ويو. ناڻي واري وزارت 5سالن دوران آيل ٻوڏ بابت لکت ۾ جواب جمع ڪرائيندي ڄاڻايو ته 11،2010۽ 15 ۾ ٻوڏ سبب ملڪي معيشت کي 14 ارب، 16 ڪروڙ ڊالرز جو نقصان ٿيو، جڏهن ته پرڏيهي ملڪن پاران متاثرن لاءِ 70 ڪروڙ ڊالرز امداد ڏني وئي. اسحاق ڊار چيو ته ڪابينا ڪميٽي 69 سرڪاري يونٽس جي نجڪاري جي سفارش ڪئي آهي، جڏهن ته ٽن سالن دوران 5 يونٽس جي نجڪاري وارو عمل مڪمل ٿي چڪو آهي. سينيٽر سردار اعظم موسيٰ خيل چيو ته وفاق سنڌي، پشتو ۽ بلوچن کي نظر انداز ڪري رهيو آهي، جڏهن ته وفاقي ادارن ۾ننڍن صوبن جي ماڻهن کي نوڪريون نه ملڻ ظلم آهي. هن چيو ته حڪومت رڳو پنجاب ئي پاڪستان سمجهي ٿي، اهڙو ملڪ نه کپي، جنهن ۾ صوبن کي برابري جا حق ملڻ بدران نظر انداز ڪيو وڃي. سينيٽر طاهر مشهدي چيو ته حڪومت جي غلط ورتاءُ سبب وفاق ڪمزور ٿي رهيوآهي، جڏهن ته ادارن جي ڪارڪردگي به مايوس ڪندڙ آهي. سنڌ جي صنعت ۽ پيدوار واري وزارت طرفان سينيٽ کي آگاهي ڏني وئي ته اسٽيل ملز جي ملازمن کي گارنٽي جي ادائيگي لاءِ 3 ارب رپيا گهربل آهن. صنعت ۽ پيداوار واري وزارت چيو ته اسٽيل ملز جي ملازمن لاءِ پينشن لاءِ ڪابه اسڪيم ناهي جوڙي وئي، جنهن سبب ملازمن ۾ بيچيني پکڙيل آهي. اسٽيل ملز جي نجڪاري جي حوالي سان ناڻي واري وزارت سينيٽ کي لکت ۾ آگاهي ڏني ته گڏيل مفادن واري ڪائونسل اسٽيل ملز جي نجڪاري جي منظوري ڏئي ڇڏي آهي. اسحاق ڊار چيو ته ڪابينا ملڪ جي مختلف سرڪاري ادارن جي 69 يونٽس کي خانگائڻ جي سفارش ڪئي آهي، جڏهن ته 3سالن دوران 5يونٽس جي نجڪاري وارو عمل مڪمل ٿي ويو آهي. پيٽروليم واري وزير شاهد خاقان عباسي چيو ته نجڪاري ادارن جي ملازمن جو تحفظ ڪيو ويندو.

 

 

سنڌ حڪومت پاران پراپرٽي ٽيڪس ڪمپيوٽرائزڊ ڪرڻ جو فيصلو

ڪراچي (اسٽاف رپورٽر) سنڌ حڪومت پراپرٽي ٽيڪس ڪمپيوٽرائزڊ ڪرڻ جو فيصلو ڪري ورتو آهي، وڏي وزير سيد قائم علي شاهه چيو آهي ته گاڏين جي چيڪنگ لاءِ جديد قسم جي اوزارن جو بندوبست ڪيو پيو وڃي.وڏي وزير سيد قائم علي شاهه جي صدارت هيٺ ايڪسائيز اينڊ ٽيڪسيشن جو اجلاس ٿيو، جنهن ۾ صوبائي وزير سيد مراد علي شاهه، گيانچند ايسراڻي ۽ ٻين عملدارن شرڪت ڪئي.اجلاس دوران ايڪسائيز کاتي جي ٽيڪس اوڳاڙي واري ڪارڪردگي جو جائزو ورتو ويو، جنهن دوران بريفنگ ڏيندي وڏي وزير کي آگاهه ڪيو ويو ته 45 بلين روپين جي ٽيڪس اوڳاڙي جو ٽاسڪ ڏنو ويو هو، جيڪو ٽارگيٽ 27 سيڪڙو پورو ڪيو آهي.ان موقعي تي ٽيڪس اوڳاڙي واري ڪم کي ڪم کي ڪمپيوٽرائزڊ ڪرڻ جو فيصلو ڪيو ويو. سنڌ جي ايڪسائيز ۽ ٽيڪسيشن کاتي هلندڙ مالي سان ۾ جولاءِ کان سيپٽمبر 2015 جي پهرين ڪوارٽر دوارن 41.5 رپين جي ٽارگيٽ جي مقابلي ۾ 27 سيڪڙو جي وصوليءَ سان 11.2 بلين رپيا وصول ڪيا. اهڙن خيال جو اظهار اڄ سي ايم هائوس ۾ منعقد ٿيل اجلاس ۾ ايڪسائيز ۽ ٽيڪسيشن واري صوبائي وزير گيانچند اسراڻي سنڌ جي وڏي وزير سيد قائم علي شاهه کي پنهنجي کاتي جي ڪارڪردگي بابت بريفنگ ڏيندي ڪيو. اجلاس ۾ ناڻي ۽ انرجي وارو صوبائي وزير سيد مراد علي شاهه، ايڪسائير ۽ ٽيسيشن کاتي وارو وزير گيانچند اسراڻي، چيف سيڪريٽري صديق ميمڻ، ايڊيشنل چيف سيڪريٽري (ڊولپمينٽ) اعجاز علي خان، ناڻي وارو سيڪريٽري سهيل راجپوت، سيڪريٽري ايڪسائيز، ڊي جي ايڪسائيز ۽ ٽيڪسيشن شبير شيخ ۽ ٻيا لاڳاپيل کاتي جا آفيسر موجود هئا. ايڪسائيز ۽ ٽيڪسيشن کاتي واري وزير گيانچند اسراڻي بريفنگ دوران وڏي وزير کي ٻڌايو ته ايڪسائيز، ٽيڪسيشن ۽ نارڪوٽيڪس کاتو سڀ کان اهم ريوينو ۽ ٽيڪس وصول ڪندڙ ادارو آهي، جيڪو حڪومت جا مالي وسيلا وڌائڻ ۾ اهم ڪرادار ادا ڪندو آهي. هن  چيو ته سندس کاتو ستن مختلف قسمن جا ٽيڪس وصول ڪندو آهي جن ۾ انفرا اسٽريڪچر سيس، موٽر وهيڪل ٽيڪس، ايڪسائيز ڊيوٽي، ٽيڪس آن پروفيشن، ٽريڊرز، ڪالنگ ۽ امپلائيمينٽ (ٽي پي ٽي سي اينڊ اي) ڪاٽن في، پراپرٽي ٽيڪس ۽ اينٽرٽينمينٽ ڊيوٽي شامل آهن. پنهنجي کاتي جي سالياني هدف ۽ ٽي ماهي وصولين جا تفصيل ڏيندي صوبائي وزير گيانچند چيو تهسندس کاتي موٽر وهيڪل ٽيڪس جي 5.5 بلين جي ٽارگيٽ جي مد ۾ 1.2 بلين وصول ڪيا آهن، جڏهن ته ايڪسائيز اين ايڪٽمينٽ جي 4.8 بلين جي هدف جي وصولي 786 ملين، انفرا اسٽريڪچر سيس جي 28 بلين جي هدف مان 7.2 بلين وصول ڪيا ويا آهن. انهيءَ کان علاوه ڪاٽن في جي 500 ملين ٽارگيٽ جي هدف ۾  35.7 ملين وصول ڪيا. پروفيشنل ٽيڪس جي 410 ملين جي ٽارگيٽ ۾ 133.9 ملين وصول ڪيا، پراپرٽي ٽيڪس جي 2.44 بلين جي مد ۾ 784.8 ملين جي وصولي ٿي ۽ انٽرٽينمينٽ ٽيڪس جي 100 ملين جي ٽارگيٽ ۾ 13.4 ملين وصول ٿي چڪا آهن.انهيءَ موقعي تي سنڌ جي وڏو وزير سيد قائم علي شاهه چيو ته ايڪسائيز اينڊ ٽيڪسيشن طرفان پراپرٽي ٽيڪس جي ٽارگيٽ ۽ ان جي وصولي تسلي بخشنه آهي، باقي ان کان سواءِ مثبت وصوليون ٿيون آهن. هن چيو ته پراپرٽي ٽيڪس جون وصوليون وڌائڻ لاءِ ذريعا موجود آهن ۽ انهيءَ سلسلي ۾ وصوليءَ جي اندازن ٽارگيٽ کان وٺي وصولي ڪرڻ تائين جي پوري عمل کي ڪمپيوٽرائيز ڪيو وڃي، هن کاتي جي آفيسرن کي هدايت ڪئي ته اهي تازي کان پراپرٽي سروري ڪن ڇاڪاڻ ته آخري سروي 2001ع ۾ ٿيو هو جڏهن ته قانون موجب کاتي کي هر 5 سالن کان پوءِ پراپرٽي جو تازو سروي ڪرڻو آهي. ناڻي واري سيڪريٽري سهيل راجپوت پنهنجي خيالن جو اظهار ڪندي ٻڌايو ته هندستان جي شهر بنگلور ۾ پراپرٽي ٽيڪس جي مد ۾ 40 بلين رپيا وصول ڪيا ويا آهن جڏهن ته ڪراچي بنگلور جي آبادي جي لحاظ کان تقريبن ٻيڻو  شهر آهي ۽ اسان پراپرٽي ٽيڪس جي وصول گهڻي حد تائين وڌائي سگهون ٿا. ڊائريڪٽر جنرل ايڪسائيز ۽ ٽيڪسيشن شبير شيخ اجلاس کي ٻڌايو ته هلندڙ سال جنوري کان نومبر تائين کاتي 7000 ڪلو گرام چرس، 4125 ڪلو گرام ڀنگ، 9 ڪلو گرام افيم، 96 غير ملڪي شراب جون بوتلون ضبط ڪيون ۽ 63 ڄڻا گرفتار ڪري انهن خلاف 57 ڪيس داخل ڪيا ويا. هن وڌيڪ ٻڌايو ته سندس کاتي چار آپگهاتي جيڪٽس، چار ڊيٽونيٽر، چار ريمورٽ ڪنٽرول واريون آپگهاتي جيڪٽس، ٽي راڪيٽ لانچر، 12 راڪيٽ ٽيوب، هڪ 107 ايم ايم جو راڪيٽ، چار هينڊ گرنيڊ، 108 ميگزين، 3550 گوليون ۽ 1260 ڪلاشنڪوف پڻ هٿ ڪيون آهن. انهيءَ موقعي تي ايڪسائيز ۽ ٽيڪسيشن واري وزير ٻڌايو ته سندس کاتي طرفان نيشنل ۽ انڊس هاءِ وي جي مختلف هنڌن تي 8 چيڪ پوسٽون به قائم ڪيو ويون آهن. وڏي وزير  سيد قائم علي شاهه ايڪسائيز ۽ ٽيڪسيشن کاتي کي هدايت ڪئي ته هاءِ ويز تي چيڪنگ لاءِ جديد ترين آلات خريد ڪيا وڃن ۽ جديد ٽيڪنالوجي مان فائدو وٺندي ٿوري وقت ۾ وڌيڪ ٽريفڪ جي چڪاس ڪري سگهجي ٿي ته جيئن مسافرن کي ٽريفڪ جام کي منهن نه ڏيڻو پئي. وڏي وزير چيف سيڪريٽري سنڌ کي هدايت ڪئي ته هو کاتي خلاف عدالتي ڪيسن کي ذاتي طور تي مانيٽر ڪري ۽ انهيءَ سلسلي ۾ انفرا اسٽيڪچر سيس خلاف ڪيس ڪافي ورهين کان هلي رهيو آهي جنهن  جي مڪمل پيروي ڪئي وڃي.

 

پاڪستان پاران ڀارتي هندو انتهاپسند تنظيم شيوِ سينا جي دهشتگردي تي عالمي برادري کان نوٽيس وٺڻ جو مطالبو

اسلام آباد (بيورو) پاڪستان، ڀارتي هندو انتهاپسند تنظيم شيوِ سينا جي دهشتگردي تي عالمي برادري کان نوٽيس وٺڻ جو مطالبو ڪري ڇڏيو آهي، پرڏيهي ترجمان چيو آهي ته والاريل ڪشمير ۾ حريت اڳواڻن جي گرفتاري ڪشميرين جي آواز کي دٻائڻ جي ڪوشش آهي، افغان حڪومت درخواست ڪئي ته مفاهمتي عمل ۾ ٻيهر ڪردار ادا ڪيو ويندو. اسلام آباد ۾ ميڊيا کي هفتيوار بريفنگ ڏيندي پرڏيهي ترجمان قاضي خليل الله چيو ته پاڪستان کي ڀارت ۾ وڌندڙ هندو انتهاپسندي تي سخت ڳڻتي آهي، هندو انتهاپسندن پاڪستاني شهرين کي به نشانو بڻايو آهي. هـُن چيو ته عالمي برادري کي ڀارت جي هندو انتهاپسند تنظيم شيوِ سينا جي دهشتگردي جو نوٽيس وٺڻ گهرجي. هڪ سوال جي جواب ۾ پرڏيهي ترجمان چيو ته پاڪستان والاريل ڪشمير ۾ حريت اڳواڻن جي گرفتاري جي مذمت ڪري ٿو، اهڙيون گرفتاريون ڪشميرين جي حق جي آواز کي دٻائڻ جي ڪوشش آهي. پاڪستان کي گڏيل قومن جي انساني حقن بابت ڪميٽي جي ميمبرشپ نه ملڻ بابت سوال جي جواب ۾ پرڏيهي ترجمان چيو ته اسلام آباد کي 105ووٽ مليا، ڪيترائي ملڪ ووٽ ڏيڻ جي خاطري ڪرائڻ باوجود آخري وقت ۾ دوکو ڪري ويا. افغان صورتحال بابت سوال جي جواب ۾ قاضي خليل الله چيو ته طالبان ۾ دڙا بندي انهن جو اندروني معاملو آهي، پاڪستان افغانستان ۾ امن ۽ مفاهمتي عمل جي حمايت ڪري ٿو، افغان حڪومت جيڪڏهن ڳالهين لاءِ درخواست ڪئي ته ڪردار ادا ڪيو ويندو.

 

درازا سانحو: آصف زرداري 7 نومبر تي اهم اڳواڻن جو اجلاس گهرائي ورتو، راڄوڻي لاءِ ڪوششون به جاري

ڪراچي (اسٽاف رپورٽر) پ پ جي شريڪ چيئرمين ۽ اڳوڻي صدر آصف علي زرداري درازا سانحي واري صورتحال تي غور ويچار لاءِ 7 نومبر تي پارٽي جي اهم اڳواڻن جو اجلاس دبئي ۾ طلب ڪري ورتو آهي. اڳوڻي صدر پاران ڇنڇر واري ڏينهن طلب ڪيل اجلاس ۾ پ پ چيئرمين بلاول ڀٽو زرداري، وڏو وزير سيد قائم علي شاهه، فريال ٽالپر، شيري رحمان، مراد علي شاهه، سهيل انور سيال ۽ ٻيا شرڪت ڪندا. اجلاس ۾ درازا واقعي واري صورتحال خاص طور تي پير پاڳاري پاران 7 نومبر تي ڪنگري هائوس ڪراچي تي حر جماعت جي خليفن، شهيدن جي وارثن ۽ معززن جي سڏايل اجلاس ۾ جيڪي فيصلا ڪيا ويندا انهن فيصلن جي روشني ۾ غور ڪيو ويندو ۽ اڳتي لاءِ حڪمت عملي جوڙي ويندي. ٻئي پاسي، پ پ جي ذميوار اڳواڻن نجي ٽي وي کي ٻڌايو ته پ پ قيادت معاملي جو راڄوڻي طور تي حل ڪرڻ واري ڪوششن ۾ رُڌل آهي. ان ڏس ۾ اڳوڻي وزير اعظم يوسف رضا گيلاني ۽ خورشيد شاهه کي ٽاسڪ ڏنو ويندو.اهو پڻ ٻڌايو ويو آهي يوسف رضا گيلاني ڪجهه ڏينهن اندر پير پاڳاري سان ملاقات ڪري معاملي جي حل لاءِ راهه هموار ڪندو. ٻئي دور ۾ خورشيد شاهه ۽ يوسف رضا گيلاني باضابطه طور تي ڳالهين واري عملي کي اڳتي وڌائيندا ته جئين معاملي جو ڳالهين ذريعي حل ڪڍيو وڃي.

 

بينظير ڀٽو قتل ڪيس: مارڪ سيگل جي بيان خلاف پرويز مشرف جي درخواست ٻڌڻي لاءِ منظور

راولپنڊي (بيورو) راولپنڊي جَي دهشتگردي ٽوڙ عدالت بينظير ڀٽو قتل ڪيس ۾ آمريڪي صحافي مارڪ سيگل جي بيان خلاف اڳوڻي صدر پرويز مشرف جي درخواست ٻڌڻي لاءِ منظور ڪري ورتي آهي، مارڪ سيگل جرح ملتوي ٿيڻ تي مايوسي  جو اظهار ڪيو. شهيد بينظير ڀٽو قتل ڪيس جي ٻڌڻي دهشتگردي ٽوڙ عدالت ۾ شروع ٿي ته مشرف جي وڪيل فيصل چوڌري مارڪ سيگل جي ڏنل بيان خلاف درخواست ڏني. مشرف جي وڪيل پنهنجي درخواست ۾ موقف اختيار ڪيو آهي ته آمريڪي شهري جيڪو وڊيو لنڪ ذريعي بيان رڪارڊ ڪرايو آهي ان جي قانون ۾ ڪا به حيثيت نه آهي ۽ مارڪ سيگل به فاروق ايڇ نائڪ جو لکيل بيان پڙهيو هو. سرڪاري وڪيل معاملي تي برطانوي خابرو اداري سان ڳالهائيندي چيو ته مشرف جي هڪ وڪيل اڳ به اهڙي قسم جي درخواست داخل ڪئي هئي، جنهن کي عدالت رد ڪندي بيان رڪارڊ ڪرڻ جو حڪم ڏنو هو. ٻئي پاسي جرح ملتوي ٿيڻ تي آمريڪي صحافي مارڪ سيگل مايوسي جو اظهار ڪيو. واضح رهي ته امريڪي صحافي مارڪ سيگل شهيد بينظير ڀٽو جي قتل جو ذميوار پرويز مشرف کي قرار ڏنو هو.

 

خيرپور واقعي جو ڪيس داخل ڪيو ويو آهي، ملوث اصل جوابدارن کي جلد گرفتار ڪيو ويندو: نثار کهڙو

ڪراچي(اسٽاف رپورٽر): سنڌ جي اطلاعات واري سينيئر وزير نثار احمد کهڙو چيو آهي ته پير صاحب پاڳاري کي سنجيده ۽ ذميوار شخصيت سمجهون ٿا ان ڪري هو خيرپور واقعي تي غير جمهوري رويو اختيار نه ڪندو ۽ اميد آهي ته هو پنهنجي جماعت جي اجلاس ۾ خيرپور واقعي تي بدلو وٺڻ جي عمل کي به غور هيٺ نه آڻيندو. اهڙن خيالن جو اظهار هن خميس ڏينهن ڪراچيءَ جي مقامي هوٽل ۾ پلڊاٽ پاران اطلاع تائين رسائي واري قانون بابت ڪوٺايل سيمينار کي خطاب ۽ بعد ۾ صحافين سان ڳالهائيندي ڪيو. هن چيو ته خيرپور واقعي تي جاچ ڪاميٽي ڪم ڪري رهي آهي ۽ جاچ ڪاميٽي جي سربراهي ڪندڙ آفيسر تي عوام جو پڻ اعتماد آهي جڏهن ته عدالتي ڪميشن پڻ جاچ ڪندي. هن چيو ته خيرپور واقعي جو ڪيس داخل ڪيو ويو آهي ۽ واقعي ۾ ملوث اصل جوابدارن کي جلد گرفتار ڪيو ويندو. هن چيو ته مڪاني چونڊن جي ٻئي مرحلي ۾ فوج کي اسٽينڊ باءِ رکڻ لاءِ اليڪشن ڪميشن کي لکيو ويندو. هن چيو ته چونڊن جي پهرين مرحلي ۾ رينجرز پولنگ اسٽيشنن جي حدن ۾ پيٽرولنگ تي مقرر هئي جڏهن ته هاڻي رينجرز کي حساس پولنگ اسٽيشنن تي مقرر ڪيو ويندو ۽ امن امان برقرار رکڻ لاءِ پوليس سان گڏ ريپڊ ريسپانس فورس پڻ مقرر هوندي.  ان کان اڳ اطلاعات تائين رسائي واري قانون بابت ڳالهائيندي نثار احمد کهڙو چيو ته ان قانون جو ڊرافٽ تيار ڪري ڪابينا کي اُماڻيو ويو آهي جنهن جي منظوريءَ کان پوءِ اهو بل جي صورت ۾ سنڌ اسيمبلي ۾ پيش ڪيو ويندو. هن چيو ته اطلاعات تائين رسائي واري اهو قانون هڪ بهترين ۽ موثر قانون آهي جيڪو خيبرپختونخواه ۽ پنجاب حڪومت طرفان تيار ڪيل قانون ۽ وفاقي حڪومت طرفان تياري هيٺ قانون کان ڪنهن به صورت ۾ گھٽ نه آهي. هن چيو ته سنڌ حڪومت طرفان تيار ڪيل اهو قانون سرڪار جي مڙني معاملن کي صاف ۽ شفاف رکڻ جو هڪ جامع دستاويز آهي هن چيو ته پاڪستان قائم ٿيڻ کان وٺي هتان جي عوام کي ڳالهائڻ جي حق کان محروم رکيو ويو، جمهوريت لاءِ جدوجھد ڪندڙ سياستدانن کي بدنام ڪيو ويو ۽ صحافت کي سخت قسم جي سينسرشپ جو نشانو بڻايو ويو هن چيو ته اهو اعزاز پاڪستان جي ٻن مقبول سياسي جماعتن کي حاصل آهي جنهن پهريون ڀيرو عوام کي پنهنجي راءِ جي اظهار جو حق ڏنو ۽ 18 هين ترميم ۾ اطلاعات تائين رسائي کي شهرين جي بنيادي حق طور تسليم ڪيو ويو. هن چيو ته سنڌ اسيمبلي عوام جي حقن خاص ڪري سماج جي ڪمزور طبقن جھڙوڪ عورتن، ٻارن ۽ اقليتي برداري جي حقن جي تحفظ لاءِ قابل تعريف قانون تيار ڪيا آهن هن چيو ته سنڌ اسيمبلي جي ڪارروائي سيٽلائيٽ ٽي وي چينلس تان سڌي طرح نشر ٿيڻ، سوالن ۽ جوابن جي وقفي ۽ صحافين جي موجودگي ۾ پبلڪ اڪائونٽس ڪاميٽي جون گڏجاڻيون ٿيڻ سان سرڪاري معاملا صاف ۽ شفاف رکڻ ۾ تمام گھڻي مدد ملي آهي، سيمينار کي ايم پي اي مهتاب اڪبر راشدي، ريحان هاشمي کانسواءِ پنجاب ۽ خيبرپختونخواه جي انفارميشن ڪمشنرن ۽ پلڊاٽ جي جوائن ڊائريڪٽر آسيه رياض ۽ ٻين پڻ خطاب ڪيو.

 

لاهور ۾ فيڪٽري واقعو، فوتين جو انگ 23 ٿي ويو، ڪيترائي اڃان ڦاٿل

لاهور (بيورو) لاهور ۾ پيش آيل فيڪٽري حادثي ۾ حياتيون وڃائيندڙ پورهيتن جو انگ 23 ٿي ويو، 80 کان وڌيڪ زخمين جو مختلف اسپتالن ۾ علاج هلندڙ آهي،جڏهن ته ڍيرن هيٺان دٻيل سَوَ کان وڌيڪ پورهيتن کي ڪڍڻ لاءِ فوجي جوانن جي مدد سان ريسڪيو آپريشن جاري آهي. گذريل ڏينهن لاهور جي سندر انڊسٽريل اسٽيٽ ۾ چار ماڙ فيڪٽري جي ڇت ڌماڪي سان ڊهڻ سبب سوين پورهيت دٻجي ويا هئا. هانءُ ڏاريندڙ حادثي کان ترت پوءِ ريسڪيو آپريشن شروع ڪندي 16 ڄڻن جا لاش ۽ 80 کان وڌيڪ زخمين کي ڪڍي اسپتال پهچايو ويو هو،جڏهن ته رات دير سان وڌيڪ ٽن ڄڻن جا مڙهه به ڪڍيا ويا، جنهن بعد فوتين جو انگ 19 ٿي ويو آهي. فيڪٽري حادثي ۾ زخمي ٿيل 80 کان وڌيڪ پورهيتن جو جو مختلف اسپتالن ۾ علاج هلندڙ آهي. اکين ڏٺن شاهدن جو چوڻ آهي ته ڊهي پيل فيڪٽريءَ جي ڍيرن هيٺان اڃا هڪ سئو کان وڌيڪ ماڻهو دٻيل آهن، جن جي ريسڪيو لاءِ پاڪ فوج، بحريه ٽائون ۽ ٻين ادارن جي مدد سان امدادي سرگرميون جاري آهن. ريسڪيو ذريعن موجب، مٽيءَ جي ڍيرن هيٺان دٻيل ڪيترن ئي ماڻهن جو پتو ناهي پئجي سگهيو،جنهن سبب فوتين جي انگ ۾ واڌ جو خدشو آهي. ٻئي پاسي پنجاب جي وڏي وزير ميان شهباز شريف حادثي جي جاچ جو حڪم ڏيندي چيو آهي ته ذميوارن خلاف قانوني ڪارروائي ڪئي ويندي. پنجاب جي وڏي وزير فوتين جي وارثن لاءِ 5، 5 لک رپيا معاوضي جو اعلان به ڪيو آهي،جڏهن ته وزيراعظم نواز شريف حادثي جي زخمين جو علاج سرڪاري خرچ تي ڪرائڻ جي هدايت پڻ ڪئي آهي.

 

گپلن جو الزام: نيب ڄامشوري جي اڳوڻي ڊي سي سهيل اديب بچاڻي کي گرفتار ڪري ورتو

حيدرآباد (بيورو) نيب حيدرآباد ۾ ڪارروائي ڪري ڄامشوري جي اڳوڻي ڊپٽي ڪمشنر سهيل اديب بچاڻي کي گرفتار ڪري ورتو، سهيل اديب بچاڻي تي آر بي او ڊي جي زمين خريداريءَ ۾ گهپلن جو الزام آهي. حيدرآباد ۾ نيب ڪارروائي ڪري ڄامشوري ضلعي جي اڳوڻي ڊپٽي ڪمشنر سهيل اديب بچاڻي کي گرفتار ڪري ورتو آهي. نيب ترجمان موجب سهيل اديب بچاڻي جي گرفتاريءَ جي تصديق ڪندي چيو آهي ته کانئس وڌيڪ پڇاڳاڇا ڪئي پئي وڃي. ذريعن موجب سهيل اديب بچاڻي مٿان ڄامشوري ضلعي جي ڊپٽي ڪمشنر جي چارج دوران آر بي او ڊي سم نالي جي زمين ۾ گهپلن جو الزام آهي.

 

ڪراچي ۾ جهوپڙين کي باهه، 100 جهوپڙا سڙي رک، 7 ٻار گم

ڪراچي (اسٽاف رپورٽر) ڪراچي جي علائقي محمود آباد ۾ باهه لڳڻ سبب 100 کان وڌيڪ جهوپڙيون سڙي خاڪ ٿي ويون،جنهن کانپوءِ 6 کان 7 ٻارڙا گم آهن، رپورٽ مطابق محمود آباد جي جوڻيجو ٽائون ۾ موجود ڪکائين جهڳين کي اوچتو باهه وڪوڙي وئي، جنهن اک ڇنڀ ۾ سڀني جهڳين کي پنهنجي لپيٽ ۾ آڻي ڇڏيو، تيز هوا وري ٻرندي تي تيل جو ڪم ڪيو ۽ سڀ جهڳيون سڙي خاڪ جي ڍيرن ۾ مٽجي ويون، باهه لڳڻ سبب متاثر ٿيل ماڻهن پنهنجي مدد پاڻ هيٺ باهه وسائڻ جي ڪوشش ڪئي پرسندن هر ڪوشش ناڪام ٿي وئي، اطلاع ملڻ تي فائر برگيڊ پهچي باهه تي ضابطو آندو پر ان دوران هر شيءِ سڙي خاڪ ٿي چڪي هئي، باهه لڳڻ سبب 5 ماڻهو سڙيِ زخمي پڻ ٿي پيا، جڏهن ته متاثرن مطابق  باهه لڳڻ کانپوءِ سندن 6 کان 7 ٻارڙا گم آهن، وڏي وزير سيد قائم علي شاهه ٻارڙن جي گم ٿيڻ جو نوٽيس وٺندي چيف سيڪريٽري ۽ ڪراچي جي ڪمشنر کان رپورٽ گهرائي ورتي آهي.