تازيون خبرون

Daily Archives: November 3, 2015

راهداري منصوبي سميت سمورا ترقياتي منصوبا وقت سر مڪمل ڪيا وڃن: نواز شريف

اسلام آباد/باجوڙ ايجنسي (مانيٽرنگ ڊيسڪ) وزيراعظم نواز شريف، چيو آهي ته زلزلي متاثرن جي بحالي لاءِ هر ممڪن ڪوشش ڪئي ويندي ۽ متاثرن جي بحالي واري ڪم ۾ ڪا به ڪوتاهي برادشت نه ڪبي، تباهه ٿيل گهرن جي ٻيهر اڏاوت لاءِ منصوبابندي ڪئي وئي آهي. وزيراعظم نواز شريف زلزلي متاثر علائقي باجوڙ ايجنسي دورو ڪري صورتحال جو جائزو ورتو ۽ کيس نقصانن توڙي امدادي ڪمن بابت بريفنگ ڏني وئي. زلزلي متاثرن کي خطاب ڪندي وزيراعظم چيو ته زلزلي سبب تباهه ٿيل گهرن جي ٻيهر اڏاوت لاءِ منصوبابندي ڪئي وئي آهي. نواز شريف چيو ته زلزلي متاثر سڀاڻي کان امدادي چيڪ ڪيش ڪرائي سگهن ٿا، جڏهن ته امدادي چيڪ جان جو معاوضو ناهي. ان کان اڳ وزيراعظم نواز شريف زلزلي متاثر علائقي تيمر گره پهتو جتي هن متاثرن ۾ امدادي رقم جا چيڪ ورهايا. تقريب کي خطاب ڪندي وزيراعظم چيو ته متاثرن جي بحالي لاءِ هر ممڪن ڪوشش ڪئي ويندي، زلزلي سبب ٿيل نقصان کي وساري نه ٿو سگهجي. هن چيو ته متاثرن جي بحالي واري ڪم ۾ ڪا به ڪوتاهي برادشت نه ڪئي ويندي، امدادي رقم جا چيڪ ورهائڻ جو عمل شروع ٿي چڪو آهي. نواز شريف چيو ته هـُو زلزلي متاثرن جي ڏک ۾ برابر جا شريڪ آهن، ٿڌ وڌڻ کان اڳ متاثرن جا گهر نئين سر تعمير ٿي ويندا. تيمر گره جي دوري دوران خيبر پختون خواهه جو گورنر، وفاقي وزير پرويز رشيد ۽ انجنيئر امير مقام به وزيراعظم سان گڏ هئا. جـِي او سي سوات ميجر جنرل نادر وزيراعظم کي زلزلي جي نقصانن ۽ امدادي سرگرمين بابت بريفنگ ڏني. وزيراعظم کي بريفنگ ۾ ٻڌايو ويو ته مالاڪنڊ ڊويزن ۾ زلزلي سبب 44 هزار گهرن کي نقصان پهتو جڏهن ته 15 هزار گهر مڪمل طور تباهه ٿي ويا. بريفنگ ۾ ٻڌايو ويو ته زلزلي متاثرن ۾ 20 هزار خيما ۽ 25 هزار ڪمبل ورهيا ويا آهن. ٻئي طرف وزيراعظم نواز شريف، اقتصادي راهداري منصوبي تي ڪم ڪندڙ چيني انجنيئرز ۽ پاڪستان ۾ رهندڙ چيني شهرين جي سڪيورٽي وڌائڻ جو حڪم ڏيندي چيو آهي ته چيني شهرين جي سڪيورٽي بابت ڪا به غلفت برداشت نه ڪئي ويندي، راهداري منصوبو خطي جي تبديل بدلائي ڇڏيندو. اسلام آباد ۾ وزيراعظم نواز شريف جي صدارت هيٺ اقتصادي راهداري منصوبي بابت جائزي اجلاس ٿيو، جنهن ۾ ترقي ۽ رٿابندي واري وفاقي وزير احسن اقبال وزيراعظم کي تفصيلي بريفنگ ڏني. ان موقعي تي وزيراعظم نواز شريف هدايت ڪئي ته اقتصادي راهداري منصوبي سميت سمورا ترقياتي منصوبا وقت سر مڪمل ڪيا وڃن. وزيراعظم نوازشريف چيو ته چين پاڪستان جو ويجهو دوست ۽ اهم پارٽنر آهي،  گهرو وزارت ملڪ اندر رهندڙ چيني شهرين ۽ راهداري منصوبي تي ڪم ڪندڙ انجنيئرز جي سڪيورٽي  يقيني بڻائي. وزيراعظم نوازشريف، چيو ته چيني شهرين جي سڪيورٽي ۾ ڪا به غفلت برداشت نه ڪئي ويندي. وزيراعظم وڌيڪ چيو ته اقتصادي راهداري منصوبي سا نه صرف پاڪستان ۾ ترقي ٿيندي پر منصوبو خطي جي تقدير بدلائي ڇڏيندو.

 

دهشتگردي جي خاتمي لاءِ جنگ ۾ اسنيپرز جو ڪردار اهم آهي: آرمي چيف

راولپنڊي(بيورو) پاڪ فوج جي سربراهه جنرل راحيل شريف چيو آهي ته پاڪ فوج ۽ سويلين  ادارن سان گڏجي ملڪ کي دهشتگردي کان پاڪ ڪرائڻ لاءِ تربيتي مقابلا ڪيا ويندا، ملڪ جي جوانن کي ملڪي ۽ پرڏيهي سطح تي مقابلي لاءِ تيارڪيو وڃي، پاڪ فوج جي عام لاڳاپن واري شعبي  آءِ ايس پي آر پاران جاري ڪيل بيان مطابق جنرل راحيل شريف اهڙن خيالن جو اظهار جهلم ۾ 36 هين پاڪ آرمي رائفل ايسو سي ايشن جي پڄاڻي واري تقريب کي خطاب ڪندي ڪيو، جنرل راحيل شريف جهلم ويجهو فائرنگ رينج جو دورو ڪيو ۽ شوٽنگ ۾ ڪامياب جوانن ۾ ٽرافيون ورهايون، ان موقعي تي خطاب ڪندي آرمي چيف جو چوڻ هو ته ڪابه مشق مڪمل ٿيڻ ۾ تربيت اهم ڪردار ادا ڪري ٿي، دهشتگردي خلاف جنگ ۾ پاڪ فوج جون قربانيون ساراهه جوڳيون آهن، هن چيو  ته سنيپرز جو ڪردار دهشتگردي خلاف فيصلائتو آهي، شوٽر تربيتي مقابلن ۾ سموري ملڪ مان 33 سويلين سوڌو 800 ماڻهن شرڪت ڪئي، مقابلن ۾ ڪوسٽ گارڊ ، نيوي ۽ هوائي فوج جي جوانن سوڌو ايف سي ادارن پڻ حصو ورتو.

 

پ پ حڪومت عورتن کي برابري وارا حق ڏيارڻ لاءِ ڪوشان آهي: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته سنڌ ملڪ جو پهريو ن صوبو آهي جتي گهريلو ملازمن جي تحفظ لاءِ قانون سازيءَ وارو بل تيار ڪيو ويو آهي جيڪو اسيمبليءَ جي ايندڙ سيشن ۾ پيش ڪيو ويندو. هن چيو ته نياڻين جي تعليم ۽ عورتن جي ترقي جي ٻين منصوبن ۾ سنڌ حڪومت کي بيپناهه ڪاميابيون حاصل ٿيون آهن جنهن سبب صوبي اندر جنسي برابري ۽ عورتن جي اقتصادي ترقي جا نوان رستا کلي ويا آهن. هن وڌيڪ چيو ته سنڌ حڪومت جرگي واري نظام جي سخت خلاف آهي ۽ اهڙين سرگرمين خلاف سخت قدم کنيا پيا وڃن ۽ صوبي جي هر فرد کي ملڪ جي قانون تحت بلا امتياز انصاف جي فراهمي لاءِ قدم کنيا ويا آهن. اهڙن خيالن جو اظهار هن اڄ گڏيل قومن جي عورتن جي اداري ”يو اين وومين“ جي پاڪستان جي نمائندي جمشيد ايم قاضي جي سربراهي ۾ ايندڙ ٽي رڪني وفد سان سي ايم هائوس ۾ ملاقات دوران ڪيو. وفد ۾ مهوش ايم شاهه ۽ سنڌ جي پروگرام آفيسر ميڊم عظميٰ به شامل هئي. وڏي وزير يو اين وومين طرفان سنڌ جي 8 ضلعن ۾ عورتن جي اقتصادي ترقي بابت پروگرام جي واکاڻ ڪندي انهيءَ حوالي سان پنهنجي ڀرپور سهڪار جو يقين ڏياريو ۽ چيو ته پ پ پ حڪومت عورتن کي برابري وارا حق ڏيارڻ لاءِ ڀرپور ڪوشش ڪري رهي آهي. وفد سان ڳالهائيدي وڏي وزير چيو ته شهيد محترمه بينظير ڀٽو پاڪستان جي واحد اڳواڻ هئي جيڪا عورتن جي تعليم، روزگار ۽ اقتصادي ترقي جو سڀ کان وڌيڪ خيال رکندي هئي ۽ ان جي ويزن مطابق سنڌ سرڪار صوبي ۾ بي زمين هاري عورتن ۾ 65 هزار ايڪڙ زمين مفت ورهائي ۽ هارپي لاءِ ٻج، فرٽلائيزر ۽ مالي سهڪار به ڪيو. انهيءَ کان سواءِ سنڌ حڪومت صوبي ۾ نياڻين لاءِ گرلز يونيورسٽيون ۽ شهيد بينظير آباد ضلعي ۾ گرلز ڪيڊٽ ڪاليج به قائم ڪري رهي آهي ته جيئن صوبي ۾ نياڻين جي تعليم ۾ همت وڌائي سگهجي. جنهن ڪري صوبي جي ڪاليجن ۽ يونيورسٽين ۾ نياڻين جي تعداد اضافو ٿيو آهي. هن وڌيڪ ٻڌايو ته سنڌ پوليس ۾ عورتن جي همت وڌائڻ لاءِ ريگيولر ڀرتين کان سواءِ الڳ سان وومين ڪمانڊو فورس بڻائي وئي آهي. ان کان سواءِ سنڌ پوليس جي ضلعي سربراهه جي عهدي تي عورت پوليس آفيسرن کي مقرر ڪيو ويو آهي جنهن جا سٺا نتيجا حاصل ٿيا آهن. سنڌ جي وڏي وزير وفد کي وڌيڪ ٻڌايو ته سنڌ سرڪار پرائيمري ۽ سيڪنڊري سطح تي نياڻين لاءِ تعليم جي حوصلي افزائي ۽ داخلا کي وڌائڻ لاءِ شاگردياڻين کي وظيفو به فراهم ڪري رهي آهي ۽ تعليم جي مڪمل ٿيڻ تي سندن ڪوٽا سسٽم سان گڏ ميرٽ تي روزگار ڏنو پيو وڃي ۽ ضلعي ٿر پارڪر جهڙي پوئتي پيل علائقي سان تعلق رکندڙ عورتن کي روزگار جي موقعن ۾ ترجيح ڏني ويندي آهي. وزير اعليٰ سنڌ سيد قائم علي شاهه وفد کي وڌيڪ ٻڌايو ته سنڌ ملڪ جو پهريون صوبو آهي جتي گهريلو ملازمن جي تحفظ لاءِ قانون سازي جو بل تيار آهي جنهن کي اسيمبليءَ جي ايندڙ سيشن ۾ پيش ڪيو ويندو. هن چيو ته جرڳي سسٽم خلاف آهيون ۽ ان جي خلاف قدم کنيا پيا وڃن. هن چيو ته سنڌ حڪومت جي عورتن جي ڀلائي واري کاتي ۾ عورتن جي ترقي جي مختلف منصوبن تي ڪم ٿي رهيو آهي، جنهن لاءِ وڏي وزير وفد کي انهن منصوبن جو دورو ڪرڻ جي دعوت ڏني. انهيءَ موقعي تي وڏي وزير يو اين وومين جي وفد کي سنڌ جي 8 ضلعن ۾ عورتن کي اقتصادي لحاظ سان بااختيار بڻائڻ جي پروگرام لاءِ پنهنجي ڀرپور سهڪار جو يقين ڏياريو ۽ هن وفد کي سنڌ اندر سنڌ حڪومت جي پروجيڪٽس جي رهنمائي لاءِ ثقافت واري صلاحڪار شرميلا فاروقي ۽ ايم پي اي روبينا قائمخاني کي ٽاسڪ ڏنو. ان موقعي تي يو اين وومين جي پاڪستان ۾ نمائندي جمشيد ايم قاضيءَ وڏي وزير کي بريفنگ ڏيندي ملڪ ۾ عورتن جي حقن جي تحفظ، گهريلو ملازمن ۽ ورڪرن جي فلاح جي حوالي سان سنڌ صوبي جي کنيل قدمن جي واکاڻ ڪئي ۽ چيو ته چئني صوبن جي دوري بعد هو ان نتيجي تي پهتو آهي ته سنڌ صوبو ان لحاظ کان پوري پاڪستان ۾ پهرين نمبر تي آهي. هن وڏي وزير کي ٻڌايو ته انهن جو ادارو ميرپورخاص ۽ دادو ۾ ٻوڏ متاثر عورتن جي بحاليءَ تي ڪم ڪري رهيو آهي. هن وڌيڪ چيو ته يو اين وومين سنڌ جي 8 ضلعن حيدرآباد، سانگهڙ، گهوٽڪي، سکر ، ٺٽو، ميرپورخاص، ٿرپارڪر ۽ ڪراچي ۾ سرڪاري ۽ سول آرگنائزيشن جي مدد سان عورتن جي اقتصادي ترقي لاءِ ڪم ڪري رهيو آهي، جنهن لاءِ اسان انهن ضلعن جو دورو ڪري اتان جي سمورن اسٽيڪ هولڊرن سان ملاقات ڪرڻ چاهيون ٿا. وڏي وزير وفد کي صوبي ۾ انهن جي ڪم ۾ آيل رڪاوٽن جي حل ۽ سهولتون ڏيڻ جو يقين ڏياريو. وزير اعليٰ سنڌ جي پرنسپل سيڪريٽري علم الدين بلو به ملاقات ۾ شريڪ هو.

 

قدرتي آفتن کي منهن ڏيڻ لاءِ تربيتي ادارن جو قيام وقت جي اهم ضرورت آهي: صدر ممنون حسين

اسلام آباد (اين اين آءِ) صدر ممنون حسين چيو آهي ته قدرتي آفتن کي منهن ڏيڻ لاءِ تربيتي ادارن جو قيام وقت جي اهم ضرورت آهي ته جئين اهڙي قسم جي حادثي سان ٿيندڙ نقصان کي محدود ڪري سگهجي، صدر اها ڳالهه يونيورسٽي آف ڊبلن جي وفد سان ڳالهائيندي ڪئي، ان موقعي تي حلال احمر پاڪستان جو چيئرمين ڊاڪٽر سعيد الاهي مجود هو، صدر پاڪستان ۾ قدرتي آفتن کي منهن ڏيندڙ جي تربيت ۽ ادارن جي صلاحيت وڌائڻ لاءِ يونيورسٽي جي تعاون جو شڪريو ادا ڪيو ۽ اميد ڪئي ته آئرلينڊ پاران پاڪستان سان تعاون جو هي سلسلو جاري رهندو، صدر چيو ته پاڪستان کي نين بيمارين ۽ قدرتي آفتن کي منهن ڏيڻ لاءِ تربيتي يافته عملي جي ضرورت آهي، ان سلسلي ۾ ڊاڪٽر سعيد جي قيادت ۾ انجمن حلال احمر خاص خدمتون ادا ڪري رهي آهي، هن هدايت ڪئي ته انهن سرگرمين کي وڌيڪ موثر بڻايو وڃي.

 

مختلف ملڪن مان ملڪ نيڪالي ڏنل پاڪستانين جي واپسي لاءِ هڪ واضح ايس او پي بڻائڻ جي هدايت

اسلام آباد (اين اين آءِ) وفاقي گهرو وزير چوڌري نثار علي خان مختلف ملڪن مان ملڪ نيڪالي ڏنل پاڪستانين جي واپسي لاءِ هڪ واضح ايس او پي ٺاهڻ جي هدايت ڪندي چيو آهي ته ڪنهن پاڪستاني کي مڪمل معلومات حاصل ڪرڻ بنا واپس قبول نه ڪيو وڃي، سومر تي اجلاس ۾ هن هدايت ڪئي ته ڪنهن به شخص جي ملڪ بدر ڪرڻ جي صورت ۾ ان جي شهريت جو حتمي تعين ۽ ڊيپورٽ ٿيڻ جا سبب معلوم ڪيا وڃن، هن ان مقصد لاءِ ايس او پي ترتيب ڏيڻ ۽ پرڏيهي وزارت ۽ بيروني ملڪ پاڪستاني سفارتڪارن سان رابطي لاءِ گهرو وزارت جي اعليٰ سطحي ڪميٽي قائم ڪئي، گهرو وزير چيو ته ان ڳالهه کي يقيني بڻايو وڃي ته بيروني ملڪ سفارتڪارن مان ڪنهن به ملڪ نيڪال ڏنل شخص جا عارضي سفري دستاويز جاري ڪرڻ کان اڳ گهرو وزارت ان جي قائدن جي تصديق ڪري، ان ڏس ۾ هڪ هفتي واضح پاليسي پيپر تيار ڪري سمورن سفارتخانن کي اماڻيو وڃي، چوڌري نثار علي خان چيو ته اسان پاڪستان کي سڄي دنيا جي ڏوهارين جي رهائشگاهه بڻائڻ جي اجازت نٿا ڏئي سگهون، هن چيو ته اٽلي مان ملڪ نيڪالي ڏنل عثمان غني نالي شخص جو پشاور واقعي سميت دهشتگردي جي ڪنهن ڪارروائي سان ڪو تعلق ثابت ناهي ٿيو، گهرو وزير وزارت ۾ مختلف عهدن ۽ ذميوارين جي نئين سر تنظيم ڪرڻ جي هدايت ڪئي، اجلاس کي قومي ايڪشن پلان تي اڳڀرائي جي حوالي سان تفصيلي بريفنگ ڏني وئي، اجلاس کي ٻڌايو ويو ته گهرو وزير جي ڪوشش سان عالمن سڳورن ۽ حڪومت وچ ۾ مدرسن جي رجسٽريشن فارمن تي اتفاق ٿي ويو آهي، گهرو وزير چيو ته ملڪ جي سيڪيورٽي يقيني بڻائڻ ۽ دهشتگردن خلاف ڪارروائي لاءِ عالم سڳورن جو تعاون حوصلائتو آهي، عالمن جي تعاون ۽ رهنمائي کي قدر جي نگاهه سان ڏسون ٿا، هن چيو ته قوم جو حوصلو بلند رکڻ ۽ دهشتگردن جي گمراهه ڪندڙ پروپگنڊا کي ختم ڪرڻ لاءِ ميڊِيا جو ڪردار مثالي رهيو آهي، هن هدايت ڪئي ته اين سي ايم سي ۽ نيڪٽا کي پاڻ ۾ ضم ڪرڻ جو عمل هڪ هفتي ۾ مڪمل ڪيو وڃي، اجلاس ۾ پرڏيهي اين جي اوز جي رجسٽريشن لاءِ نئين ضابطڪار تي اڳڀرائي جو جائزو ورتو ويو، ۽ اجلاس کي اي سي ايل مان نالو خارج ڪرڻ جي تفيصل کان آگاهه ڪيو ويو، گهرو وزير چيو ته آئينده ڪو نالو ڪنهن ٺوس سبب کانسواءِ ايل سي ايل ۾ نه وڌو ويندو، گهرو وزارت جي اي سي ايل ڪميٽي پنهنجا اختيار استعمال ڪندي ان ڳالهه کي يقيني بڻائي ته نئين پاليسي تي ان جي روح مطابق عمل ڪيو وڃي.

 

خيرپور سانحي جي عدالتي جاچ ڪرائي ويندي، سڀ ڪجهه سامهون اچي ويندو: نثار کهڙو

ڪراچي (اي پي پي) سنڌ جي اطلاعات ۽ تعليم واري سينيئر وزير نثار احمد کهڙي سومر ڏينهن ڪراچيءَ جي سائوٿ سٽي اسپتال ۾ داخل پاڪستان پيپلز پارٽيءَ پارليمينٽيرين جي صدر مخدوم امين فهيم جي عيادت ڪئي ۽ سندس صحت ۽ علاج بابت معلومات حاصل ڪئي. اسپتال ٻاهران ميڊيا سان ڳالهائيندي نثار احمد کهڙو چيو ته مخدوم امين فهيم پيپلز پارٽيءَ جي طاقت آهي، اسان جي دعا آهي ته الله تعاليٰ کيس جلد صحت عطا فرمائي. هن چيو ته خيرپور واقعي جي عدالتي جاچ ڪرائي پئي وڃي ۽ جاچ کانپوءِ سڀ ڪجهه سامهون اچي ويندو. هن چيو ته چونڊ واري ڏينهن تي هٿيار کڻي هلڻ تي قلم 144 لاڳو هجڻ باوجود ڪير هٿيار کڻي آيا ان بابت پڻ جاچ ۾ سڀ ڪجهه سامهون ايندو. هن چيو ته خيرپور واقعي تي افسوس آهي ۽ اهڙو واقعو نه ٿيڻ گهرجي ها. هن چيو ته حڪومت پاران سيڪيورٽي فراهم ڪئي وئي هئي پر چونڊ ضابطن ۽ قانون جي خلاف ورزي ٿي جنهن ڪري اهڙو واقعو پيش آيو. هن چيو ته انساني جان قيمتي هوندي آهي ۽ جيڪي انساني جانيون ضايع ٿيون آهن انهن تي افسوس آهي ۽  اهي اسان جي سنڌ جا ئي ماڻهو آهن. هن چيو ته مڪاني چونڊن جي ٻئي مرحلي ۾ سيڪيورٽي جا وڌيڪ بهتر انتظام ڪيا ويندا. هن چيو ته 8 ضلعن ۾ مڪاني چونڊن دوران خيرپور کانسواءِ ڪٿي به ڪو اڻوڻندڙ واقعو پيش نه آيو جڏهن ته مبصرن پڻ شفاف چونڊون ٿيڻ جي رپورٽ ڏني آهي. هن چيو ته پيپلز پارٽيءَ تي مڪاني چونڊون نه ڪرائڻ جا الزام  هڻندڙن جو منهن ڀت سان لڳي ويو آهي ۽ جيڪي وڏيون وڏيون ڳالهيون ڪندا هئا انهن کي شڪست ملي آهي. هن چيو ته جيڪي پيپلز پارٽيءَ کان کٽي نه ٿا سگهن اهي ئي ڌانڌلين جا الزام هڻي رهيا آهن، پيپلز پارٽي هر هنڌ آهي ۽ رهندي.

 

پ پ ميمبر قومي توڙي صوبائي اسيمبلين ۾ شيو سينا خلاف مذمتي ٺهراءُ پيش ڪن: بلاول ڀٽو جي هدايت

ڪراچي (اي پي پي) پاڪستان پيپلزپارٽي جي چيئرمين بلاول ڀٽو زرداري، قومي اسيمبلي، سينيٽ، صوبائي اسيمبلين ۽ آزاد ڪشمير اسيمبليءَ ۾ پاڪستان پيپلزپارٽي جي پارلياماني اڳواڻن کي هدايت ڪئي آهي ته اُهي شيو سينا جي دهشتگردن طرفان پاڪستان ۽ پاڪستاني شهرين کي ڌمڪيون ڏيڻ، ڀارت ۾ دلت ٻارن کي ساڙي مارڻ، ڀارتي وزير ۽ اڳوڻي ڀارتي فوجي سربراهه آر ڪي سنگهه طرفان دلت ٻارن بابت توهين آميز ريمارڪس ڏيڻ خلاف مذمتي ٺهراءَ ايوانن ۾ پيش ڪن، بلاول ڀٽو زرداري چيو آهي ته پوري دنيا کي ڀارت جي انهيءَ جنگي جنون جو نوٽيس وٺڻ گھرجي. واضح رهي ته پاڪستاني شهرين، مايه ناز ڳائڻي غلام علي، پاڪستاني اداڪارن ۽ ڀارت جو دورو ڪندڙ ڪرڪيٽ جي عملدارن کي ڌمڪيون ڏنيون پيون وڃن، ڀارتي شهر فريدآباد ۾ شيو سينا جي حامين ٻن دلت ٻارن کي زنده باه ڏيئي ساڙي ڇڏيو، ڀارتي مملڪتي وزير ۽ اڳوڻي فوجي سربراهه آر ڪي سنگهه انهي واقعي بابت ريمارڪس ڏيندي چيو هو ” جيڪڏهن ڪُتي کي پٿر لڳو ته ان جو الزام بي جي پي تي نه هڻو“، سندس انهي جملي پوري دنيا جي انساني حقن جي ڪارڪنن کي ڪاوڙائي وڌو هو، پاڪستان پيپلزپارٽي جاپارلياماني اڳواڻ پنهنجي پنهنجي چونڊيل ايوانن ۾ اهڙا ٺهراءُ پيش ڪندا.

 

ايم ڪيو ايم سنڌ ۾ به استعيفائون واپس وٺڻ لاءِ رابطو ڪيو آهي پر اهي جاچ پڙتال واري مرحلي ۾ آهن: آغا سراج دراني

لاڙڪاڻو (بيورو) سنڌ اسيمبليءَ جي اسپيڪر آغا سراج دراني چيو آهي ته ايم ڪيو ايم سنڌ ۾ به استعيفائون واپس وٺڻ لاءِ رابطو ڪيو آهي پر اهي جاچ پڙتال واري مرحلي ۾ آهن، پي ٽي آءِ محدود پارٽي ٿي وئي آهي، جنهن کي پنجاب جي ڪجهه علائقن کانسواءِ ڪٿي به موٽ نه ملي آهي.نئين ديري ۾ ميڊيا سان ڳالهائيندي آغا سراج دراني چيو ته بلاول ڀٽو زرداري کي سڪيورٽي خدشن سبب چونڊ مهم کان روڪيو پيو وڃي. هن چيو ته مڪاني چونڊن جي پهرين مرحلي ۾ پ پ مخالفن کي شڪست ڏئي آئينو ڏيکاريو، پنهنجي اميدوارن سامهون بيهندڙن کي پارٽي مان نيڪالي ڏيڻ جو فيصلو ڪيو آهي. آغا سراج دراني چيو ته ايم ڪيو ايم وارا وفاق ۾ پنهنجون استعيفائون واپس وٺن پيا ۽ سنڌ ۾ به استعيفائون واپس وٺڻ لاءِ رابطو ڪيو آهي پر جاچ پڙتال جاري آهي. سندس چوڻ هو ته عمران خان کي پنجاب جي ڪجھه علائقن کانسواءِ ٻين صوبن ۾ ڪابه موٽ ناهي ملي، تحريڪ انصاف محدود پارٽي بڻجي وئي آهي. سندس چوڻ هو ته اسيمبلي جي ايندڙ اجلاس ۾ احتساب بل سميت ٻيون  ترميمون آنديون پيون وڃن، جن جي منظوري ملي ويندي. اسپيڪر آغا سراج دراني پيپلز پارٽي ختم ٿيڻ بابت پير پاڳاري جو پنهنجو خيال آهي، جنهن تي ڪابه پابندي نه آهي.

 

اليڪشن ڪميشن، سنڌ ۽ پنجاب جي مڪاني چونڊن جي پهرين مرحلي جا مڪمل نتيجا 3 نومبر تائين موڪلڻ جي هدايت

اسلام آباد (بيورو) اليڪشن ڪميشن، سنڌ ۽ پنجاب جي مڪاني چونڊن جي پهرين مرحلي جا مڪمل نتيجا 3 نومبر تائين موڪلڻ جي هدايت ڪندي چيو آهي ته چونڊ خرچ جمع ڪرائڻ کانپوءِ اميدوارن جي ڪاميابي جو نوٽيفڪيشن جاري ڪيو ويندو. اليڪشن ڪميشن جي سيڪريٽري پاران سنڌ ۽ پنجاب جي اليڪشن ڪمشنرز ۽ ٻنهي صوبن جي ريٽرننگ آفيسرز ڏانهن خط لکيو ويو آهي. اليڪشن ڪميشن جو چوڻ آهي ته مڪاني چونڊن جا نتيجا اچڻ جو سلسلو جاري آهي پر ريٽرننگ آفيسر ٽي نومبر تائين مڪمل نتيجا موڪلڻ جا پابند آهن. اليڪشن ڪميشن موجب، اميدوارن پاران چونڊ خرچ جا تفصيل جمع ڪرائڻ کانپوءِ ڪاميابي جو نوٽيفڪيشن هڪ هفتي اندر جاري ڪيو ويندو. مڪاني چونڊن جي پهرين مرحلي ۾ سنڌ اندر پيپلزپارٽي ۽ پنجاب ۾ ن ليگ اڪثريت سان ڪاميابي ماڻي ورتي آهي، ٻي مرحلي لاءِ پولنگ 19 نومبر تي ٿيندي.

 

اسلام آباد ۾ جماعت اسلامي جي ميزباني هيٺ ڪوٺايل آل پارٽيز ڪانفرنس ۾ فاٽا کي خيبرپختونخواهه ۾ شامل ڪرڻ بابت ٺهراءُ منظور

اسلام آباد (بيورو) جماعت اسلامي پاران ڪوٺايل آل پارٽيز ڪانفرنس ۾ فاٽا کي خيبرپختونخواهه جو حصو بڻائڻ بابت ٺهراءُ منظور  ڪيو ويو آهي، سياسي پارٽين فاٽا کي ڪي پي جي جي انتظام هيٺ آڻن لاءِ 22 هين آئيني ترميم جي حمايت جو به اعلان ڪري ڇڏيو آهي. اسلام آباد ۾ جماعت اسلامي پاران فاٽا ۾ سڌارن بابت آل پارٽيز ڪانفرنس ڪوٺائي وئي ، جنهن ۾ سراج الحق، قومي اسيمبلي ۾ اپوزيشن ليڊر خورشيد شاهه، ن ليگ جي اقبال ظفر جهڳڙا، آفتاب شيرپائو، عوامي نيشنل پارٽي جـِي بشريٰ گوهر، آخونزاده چٽان، ايم ڪيو ايم جي بئريسٽر سيف ۽ ٻين شرڪت ڪئي. ڪانفرنس کي خطاب ڪندي جماعت اسلامي جي امير سراج الحق چيو ته فاٽا ۾ سڌارن لاءِ آئيني ترميمون مڙهڻ بدران قابل قيادت ۽ عوام جي بل جي حمايت ڪيون ٿا. هن چيو ته هـُو هڪ ڪروڙ قابل عوام جي روشن مستقبل لاءِ روڊ ميپ ٺاهڻ چاهين ٿا، فاٽا جي عوام جي محبتن جو رخ پاڪستان طرف آهي. سراج الحق چيو ته افسوس آهي ته فاٽا جي عوام کي سندن آئيني حق هن وقت تائين ناهن ڏنا ويا، قبائلي عوام جي حقن لاءِ 22 هين ترميم جي حمايت ڪيون ٿا،  فاٽا مان ايف سي آر کي ختم ڪيو وڃي. اپوزيشن ليڊر خورشيد شاهه چيو ته فاٽا ۾ سڌارن بابت موجوده بل ۾ بهتري آڻڻ جي ضرورت آهي، 22 هين آئيني ترميم جي بل تي سڀني کي اعتماد ۾ وٺڻ جي ضرورت آهي. خورشيد شاهه چيو ته جيڪڏهن فاٽا کي ڪي پي ڪي ۾ شامل ڪيو وڃي ته پوءِ اين ايف سي تي به نظرثاني ٿيندي ۽ اسيمبلي جي سيٽن ۾ به تبديلي ايندي. اي پي سي ۾ سياسي پارٽين پاران فاٽا کي ڪي پي ڪي جي انتظام هيٺ آڻڻ بابت 22 هين ترميم جي حمايت ڪئي وئي، ان حوالي سان هڪ ٺهراءُ پڻ منظور ڪيو ويو. ٺهراءَ ۾ چيو ويو ته فاٽا مان ايف سي آر جهڙو سامراجي نظام ختم ڪيو وڃي ۽ فاٽا جي عوام کي صوبائي اسيمبلي ۾ نمائندگي ڏني وڃي. ٺهراءَ ۾ مطالبو ڪيو ويو ته سپريم ڪورٽ ۽ هاءِ ڪورٽ جو اختيار به فاٽا تائين وڌايو وڃي، جڏهن ته فاٽا جي تباهه ٿيل انفرا اسٽرڪچر لاءِ 500 ارب رپين جي ترقياتي پئڪيج جو اعلان ڪيو وڃي.