تازيون خبرون

Monthly Archives: November 2015

امن عمل ۾ رنڊڪ وجهندڙ کي بخش نه ڪيو ويندو: چوڌري نثار

اسلام آباد (بيورو) وفاقي گهرو وزير چوڌري نثار علي خان چيو آهي ته قومي ايڪشن پلان تي عملدرآمد جاري آهي، امن عمل ۾ رنڊڪ وجهندڙ کي بخش نه ڪيو ويندو. اسلام آباد ۾ وفاقي گهرو وزير چوڌري نثار علي خان سان سينيٽر مير حاصل بزنجي ملاقات ڪئي، جنهن دوران ملڪ جي موجوده سياسي صورتحال تي خيالن جي ڏي وٺ ڪئي وئي. ذريعن موجب،ملاقات دوران چوڌري نثار علي خان قومي ايڪشن پلان تي عملدرآمد ۽ حڪومتي حڪمت عملي بابت حاصل بزنجي کي آگاهه ڪيو. چوڌري نثار چيو ته حڪومت امن جي بحالي لاءِ جوڳا قدم کڻي رهي آهي، نيشنل ايڪشن پلان تي عملدرآمد يقيني بڻائڻ لاءِ سمورا وسيلا ڪتب آندا ويندا.

 

پاڙيسرين سان بهتر لاڳاپا چاهيون ٿا، ضرب عضب آخري مرحلي ۾ داخل آهي: نواز شريف

ويليٽا (اين اين آءِ) پاڪستان ۽ برطانيا دهشتگردي منظم ڏوهن ۽ غير قانوني مائگريشن کي روڪڻ لاءِ گڏجي ڪم ڪرڻ جو عزم ڪندي دولت مشترڪه جي حدفن کي حاصل ڪرڻ لاءِ گڏيل ڪوششن تي اتفاق ڪيو آهي وزيراعظم نوازشريف چيو ته پاڪستان قومي ايڪشن پلان جي تحت ملڪ مان دهشتگردي ۽ انتهاپسندي جي خاتمي لاءِ سخت ڪارروايون ڪري رهيو آهي. آپريشن ضرب عضب پنهنجي ڪامياب پڄاڻي طرف وڌي رهيو آهي ڀارت ۽ افغانستان سميت تمام پاڙيسري ملڪن سان دوستاڻا تعلق قائم رکڻ جا خواهشمند آهيون جڏهن ته وزيراعظم برطانوي وزيراعظم دهشتگردي ۽ انتهاپسندي جي خاتمي لاءِ پاڪستان جي ڪوششن کي ساراهيندي مضبوط معيشت ۽ سماجي اقتصادي ترقي کي حال ڪرڻ لاءِ مڪمل برطانوي حمايت جو يقين ڏياريو آهي. جمعي تي وزيراعظم محمد نوازشريف پنهنجي برطانوي هم منسب ڊيوڊ ڪيمرون سان سان دولت مشترڪه اجلاس جي سائيڊ لائنز تي ملاقات ڪئي ٻنهي اڳواڻن تجارت سرمائيڪاري ۽ سيڪيورٽي سميت ڪيترن ئي شعبن ۾ ويجهو تعاون جاري رکڻ تي اتفاق ڪيو پاڪستان ۽ برطانيا جا وزيراعظم پنهنجي ملڪن جي سيڪيورٽي ۽ خوشحالي لاءِ گڏجي ڪم ڪرڻ تي اتفاق ڪيو. ٻنهي وزيراعظم دهشتگردي وڏن ڏوهن ۽ غير قانوني مائيگريشن کي روڪڻ لاءِ گڏجي ڪم ڪرڻ جو عزم به ڪيو. نوازشريف چيو ته پاڪستان برطانيا کي هڪ ويجهو دوست ۽ قابل اعتماد شريڪ ٿيندڙ سمجهي ٿو. هن چيو ته ٻنهي ملڪن وچ ۾ ٻطرفو تعلق مضبوط بنيادن تي قائم آهي. هن چيو ته اسٽريٽجڪ ڳالهين جي سلسلي ۾ پاڪ برطانيا تعاون جي حوالي سان ٿيندڙ اڳڀرائي تي اطمينان جو اظهار ڪندي چيو ته تجارت سرمائيڪاري ثقافت تعليم ۽ سيڪيورٽي جي شعبن ۾ تازو روڊ ميپ جي سبب تعلقات کي مضبوطي حاصل ٿي آهي. وزيراعظم چيو ته پاڪستان دهشتگردي جي تمام شڪلين ۽ حالتن جي مذمت ڪري ٿو ۽ ان کي پئرس ۾ پيش ايندڙ هلندڙ واقعن تي گهرو ڏک ٿيو آهي. پاڪ برطانيا وزيراعظم عالمي ۽ علائقائي اهميت جي معاملن تي به خيالن جي ڏي وٺ ڪئي.

 

سنڌ ڪابينا ۾ اهم تبديليون، سڌ سماءَ جو کاتو مولابخش چانڊيو حوالي، نوٽيڪيشن جاري

ڪراچي (اين اين آءِ) وزيراعليٰ سنڌ سيد قائم علي شاهه دبئي کان ڪراچي پهچندي ئي سنڌ ڪابينه ۾ تبديليون ڪري ڇڏيون جمعي تي موڪل جي موقعي تي حڪومت سنڌ جي جاري ڪيل نوٽيفڪيشن مطابق اڳوڻي صوبائي بلديات واري وزير سيد ناصر حسين شاهه کي خوراڪ کاتي جو قلمدان سونپيو ويو آهي صوبائي وزير ڄام خان شورو کان لائيو اسٽاڪ جو قلمدان واپس وٺي انکي بلديات جو وزير بڻايو ويو آهي پيپلزپارٽي جو اڳواڻ ۽ اڳوڻو وفاقي وزير مولابخش چانڊيو کي وزيراعليٰ سنڌ جو اطلاع وارو مشير مقرر ڪيو آهي جڏهن ته فياض بٽ کي ويراعليٰ جو معاون خصوصي مقرر ڪري ان کي پبلڪ هيلٿ انجنيئرنگ ۽ ڳوٺاڻي ترقي جو قلمدان ڏنو ويو آهي ان جو عهدو صوبائي وزير جي برابر هوندو واضح رهي ته سنڌ ڪابينه ۾ تبديلي جو فيصلو دبئي ۾ پاڪستان پيپلزپارٽي جي شريڪ چيئرمين آصف علي زرداري جي صدارت هيٺ صلاح مشوري کان پوءِ اجلاس ڪيو ويو هو. اجلاس ۾ بيورو ڪريسي ۾ به وڏي پئماني تي فيصلو ڪيو ويو هو انهن فيصلن جي روشني ۾ سنڌ ڪابينه ۾ وڌيڪ ردوبدل ٿي سگهي ٿو جڏهن ته بيورو ڪريسي ۾ وڏي پئماني تي تبديلين جو انتظار ڪيو پيو وڃي سيد ناصر حسين شاهه کان 18 نومبر تي بلديات جو قلمدان ورتو ويو هو جڏهن ته 19 نومبر تي سنڌ ۾ ٻئي مرحلي جون چونڊون ٿيڻيون هيون. ان تي گهوٽڪي جي مهر برادران ۽ ناصر حسين شاهه دبئي پهچي ويا هاڻي انهن کي خوراڪ جو قلمدان ڏنو ويو آهي جيڪو منظور وساڻ کان واپس ورتو ويو آهي. منظور حسين وساڻ کي هاڻي معدنيات ۽ معدني ترقي ۽ اينٽي ڪرپشن جو قلمدان ڏنو ويوآهي جڏهن ته سينيئر وزير نثار کهڙو کان به اطلاعات جو قلمدان واپس وٺي مولابخش چانڊيو کي ڏنو ويو آهي سينيئر وزير نثار کهڙو وٽ تعليم کاتي جو قلمدان رهندو.

 

پاڪستان عالمي امن ۽ سلامتي جي قيام لاءِ پنهنجي شرڪت کي ذميواري سمجهي ٿو: جنرل راحيل شريف

راولپنڊي (اين اين آءِ) چيف آف آرمي اسٽاف جنرل راحيل شريف چيو آهي ته پاڪستان عالمي امن ۽ سلامتي جي قيام لاءِ پنهنجي شرڪت کي هڪ ذميواري سمجهي ٿو ملڪ ۾ آپريشن ضرب عضب جي باوجود گڏيل قومن جي ڇٽي هيٺ قيام امن جا 6 مشن جي لاءِ پاڪستان پنهنجا فوجي موڪليا آهن پاڪ فوج جي آفيسرن ۽ جوانن قيام امن جي آپريشن ۾ پنهنجي جرئت ۽ بهادري سان ڏيکاري آهي. پاڪستان قيام امن آپريشن جي اڀرندڙ چئلينجن کي منهن ڏيڻ لاءِ پرعزم آهي. اقوام متحده جي تحت آئبري ڪوسٽ ۾ قيام امن مشن ۾ مقرر پاڪستاني فوج سان ملاقات ڪئي ۽ سڄو ڏينهن انهن سان گڏ گذاريو آرمي چيف پاڪ فوج جي آفيسرن ۽ جوانن جي پيشاورانه صلاحيت ۽ گڏيل قومن جي ڇٽي هيٺ هڪ محفوظ دنيا لاءِ امن کي هٿي ڏيڻ ۽ استحڪام خاطر ان جي عزم کي ساراهيو جنرل راحيل شريف چيو ته پاڪستان قيام امن آپريشن جي اڀرندڙ چئلنجن کي منهن ڏيڻ لاءِ پرعزم آهي آئبري ڪوسٽ جي صدر پاڪستاني فوجين جي شاندار ڪارڪردگي تي انهن کي ڀرپور خراج تحسين پيش ڪئي.

 

ڪي ڪي خيل ۾ جيٽ جهازن جي بمباري، 21 دهشتگرد مارجي ويا

پشاور (م.ڊ) سيڪيورٽي ذريعن مطابق  پاڪ هوائي جيٽ جهازن جي خيبر ايجنسي جي وادي تيراهه جي علائقي  ڪوڪي خيل ۾ دهشتگردن جي ٺڪاڻن کي نشانو بڻايو ويو.ذريعن مطابق ڪارروائي ۾ 21 دهشتگرد مارجي ويا جڏهن ته سندس ڪيترن ئي ٺڪاڻن کي تباهه ڪيو ويو.ياد رهي ته وفاق جي انتظام هيٺ پاڪ افغان سرحد تي قائم ڏکڻ وزيرستان،خيبر ايجنسي ۽ اورڪزئي ايجنسي سوڌو  7 ايجنسين کي دهشتگردن جو محفوظ ٺڪاڻو سمجهيو ويندو آهي.حڪومت ۽ پابندي مڙهيل تنظيم تحريڪ طالبان  وچ ۾ امن جون ڳالهيون ناڪام ۽ ڪراچي ايئرپورٽ تي حملي کانپوءِ پاڪ فوج 15 جون تي ڏکڻ وزيرستان  ۾ آپريشن ضرب عضب  شروع ڪيو هو.ڏکڻ وزيرستان جي تعلقي مير علي کي دهشتگردن کان خالي ڪرائڻ کانپوءِ  سيڪيورٽي  فورسز آپريشن جو دائرو ڏکڻ وزيرستان جي علائقن تائين وڌائي ڇڏيو.ان کان پهرين خيبر ايجنسي ۽ ان جي ويجهن علائقن ۾  آپريشن “خيبر ون” ۽ “آپريشن خيبر ٽو” هيٺ سيڪيورٽي  فورسز ڪاررواين جي شروعات ڪئي هئي.جيڪي هاڻي ختم ٿي چڪيون آهن.

 

برطانيا جي هائي ڪمشنر خورشيد شاهه سان ملاقات، پيرس حملن ۾ ٿيندڙ دهشتگردي سميت ٻين معاملن تي ڳالهيون

اسلام آباد (بيورو) برطانيا جي هائي ڪمشنر فلپ بارٽن جي قومي اسيمبلي ۾ مخالف ڌر اڳواڻ سيد خورشيد شاهه سان ملاقات، پيرس حملن ۾ ٿيندڙ دهشتگردي کانسواءِ ٻين معاملن تي ڳالهه ٻولهه ، ملاقات ۾ اتفاق ڪيو ويو ته دنيا ۾ وڌندڙ  دهشتگردي کي روڪڻ لاءِ گڏيل ڪوششو ڪيون وينديون،دهشتگردي هڪ اهڙو ناسور آهي  جنهن پوري دنيا کي پنهنجي لپيٽ ۾ آڻي ڇڏيو آهي، سید خورشید احمد شاهه برطانيا جي هائي ڪمشرن کي زلزلي کان متاثر مالاڪنڊ سوڌو ٻين علائقن بابت به پنهجن تازن دورن کان ڄاڻ ڏني خورشيد شاهه جو چوڻ هو ته مالاڪنڊ ۾ لکين ماڻهو زلزلي جي تباهي جو شڪار ٿيا آهن ۽ انهن جي بحالي اسان لاءِ هڪ چيلينج آهي،جڏهن ته فلپ بارٽن پاڪستان ۾ تعليم کي هٿي ڏيارڻ لاءِ تعاون ڪرڻ بابت به مخالف ڌُر جي اڳواڻ کي ڄاڻ ڏني.

 

حڪومتون اچڻيون وڃڻيون هونديون آهن ڪنهن جي پرواهه نه ڪيو پنهنجا فرض ايمانداريءَ سان نڀايو: چيف اليڪشن ڪمشنر

اسلام آباد (بيورو) حڪومتون اينديون رهنديو آهن،ڪنهن جي به پرواهه ڪرڻ بنا ڊيوٽي نڀايو.چيف اليڪشنر  ڪميشنر سردار رضا خان جو چوڻ آهي ته وزيراعظم،وفاقي وزير ۽ حڪومتون اينديون رهنديون آهن، ڪنهن جي به پرواهه نه ڪيو ۽ پنهنجي ڊيوٽي ايمانداريءَ سان نڀايو.چيف اليڪشنر ڪميشنر سردار رضا خان جي صدارت هيٺ مڪاني چونڊن جي ٽئين مرحلي جي تيارين بابت اهم اجلاس ٿيو.اجلاس ۾ ڊي آر اوز جي رپورٽ بابت فوج ۽ رينجرز مقررڪرڻ جي فيصلي تي غور ڪيو ويو.ان موقعي تي چيف الڪيشنر ڪمشنر اجلاس کي خطاب ڪندي چيو ته ڪنهن جي به پرواهه نه ڪيو پنهنجا فرض ايمانداريءَ سان نڀايو. سندس چوڻ هو ته سيڪيورٽي تي ڪنهن به قسم جو سمجهوتو نه ڪيو وڃي، مڙني آفيسرن تي فرض ٿو ٿئي ته سڀني پارٽين کي هڪ نظر سان ڏسن ۽ سڀني کي هڪ جهڙو ماحول ڏين،اجلاس ۾ پنجاب جو چيف سيڪريٽري،آئي جي پنجاب،پنجاب جي مڪاني ادارن جو سيڪريٽري،ڊي جي ملٽرآپريشن ۽ جي ايڇ ڪيو جا نمائندا شامل ٿيا.

 

اڳوڻي سينيٽ چيئرمين فاروق ايڇ نائيڪ جي بلاول ڀٽو سان ملاقات،سياسي صورتحال تي ڳالهيون

ڪراچي (اسٽاف رپورٽر) سينيٽ جي اڳوڻي چيئرمين ۽ ملڪ جي ناليواري قانوني ماهر فاروق ايڇ نائيڪ جي بلاول هائوس ۾ پاڪستان پيپلزپارٽي جي چيئرمين بلاول ڀٽو زرداري سان ملاقات،کيس  اڳوڻي صدر آصف علي زرداري جي احتساب عدالت مان ايس جي ايس ڪوٽيڪنا ڪيس مان باعزت بري ٿيڻ تي مبارڪون ڏنيون، بلاول ڀٽو زرداري ان ڪيس ۾ ڪيل محنت ۽ دليلن جي واکاڻ ڪئي جن ٻڌڻين دوران آصف علي زرداري کي انتقامي ڪارروائي جو نشانو بڻائڻ لاءِ داخل ڪرايل ٻن ڪوڙن ريفرنسز کي ڪوڙو ثابت ڪيو،ملاقات دوران فاروق ايڇ نائيڪ ملڪ جي سياسي صورتحال تي خيالن جي ڏي وٺ ڪئي ۽ سنڌ ۾ ٻن مرحلن ۾ ٿيل مڪاني چونڊن ۾ اٽڪل سئو سيڪڙو نتيجا حاصل ڪرڻ تي چيئرمين بلاول ڀٽو زرداري کي مبارڪباد ڏني.

 

اوقاف ۽ ثقافت کاتي ۾ اختلاف، قيوم سومرو ۽ شرميلا فاروقي پاران ڀٽ ڌڻيءَ جي ميلي جو ٻه ڀيرا 2 چادرون چاڙهي افتتاح

ڀٽ شاهه(رپورٽر) ڀٽ شاهه جي ميلي تان اوقاف ۽ ثقافت کاتن ۾ اختلاف، ٻه ڀيرا چادرون چاڙهي ڌار افتتاح ڪيو ويو،پهريون افتتاح اوقاف کاتي جي صوبائي صلاحڪار عبدالقيوم سومرو صبح 8 وڳي ڪيو ۽ جنهن کانپوءِ ثقافت کاتي جي صوبائي صلاحڪار شرميلا فاروقي کاتي جي دعوت نامي ۾ مقرر ڪيل وقت کان هڪ  ڪلاڪ اڳ درگاهه تي پهچي چادر چاڙهي ۽ عرس مبارڪ جي تقريبن جو افتتاح ڪيو. جڏهن ته درگاهه ڀٽائي جي گادينشين سيد وقار حسين شاهه لطيفي ٻنهي صوبائي صلاحڪارن کان اڳ ڪالهه رات ئي ڀٽ ڌڻيءَ جي مزار تي چادر چاڙهي شاهه سائينءَ جي 272 هين عرس مبارڪ جي تقريبن جو اعلان ڪري ڇڏيو هو.

 

پرويز مشرف خلاف سنگين غداري ڪيس جي نئين سر جاچ جو حڪم

اسلام آباد (بيورو) خاص عدالت اڳوڻي صدر پرويز مشرف خلاف سنگين غداري ڪيس جي نئين سر جاچ جو حڪم ڏنو آهي، عدالت سنگين غداري ڪيس ۾ گڏيل جاچ ڪميٽي جوڙڻ واري درخواست رد ڇڏي ۽ ايف آئي اي کي نئين سر جاچ جو حڪم ڏنو،عدالت اها به هدايت ڪئي آهي ته ڪيس جي جاچ پوري ڪري 17 ڊسمبر تي رپورٽ پيش ڪئي وڃي. عدالت پنهنجو محفوظ ڪيل فيصلو ٻڌائيندي حڪم ڏنو ته ڪيس جي مرڪزي ڏوهاري پرويز مشرف سوڏو ٽن شريڪ ڏهارين اڳوڻي وزيراعظم شوڪت عزيز، اڳوڻي چيف جسٽس عبدالحميد ڊوگر ۽ اڳوڻي وفاقي وزير زاهد حامد جا بيان قلمبند ڪري 17 ڊسمبر تائين رپورٽ پيش ڪئي وڃي ۽ جيڪڏهن رپورٽ پوري نه ٿئي ته ان مدي دوران ٿيندڙ اڳڀرائي بابت عدالت کي ٻڌايو وڃي، عدالت پنهنجي حڪم نامي ۾ قرار ڏنو ته غداري ڪيس جي جاچ ايف آئي اي ئي ڪندي، ڇو ته هي وفاق جو معاملو آهي ۽ جيڪڏهن ايف آئي اي عدالت ۾ هن مهل تائين پيش ڪيل رڪارڊ جو جائزو وٺڻ چاهي ته ان کي اها به اجازت هوندي، واضح هجي ته غداري ڪيس ۾ پرويز مشرف جي وڪيل بيرسٽر فروغ نسيم گڏيل جاچ ٽيم ٺاهڻ جي درخواست ڪئي هئي.