تازيون خبرون

Daily Archives: October 28, 2015

سياسي ۽ عسڪري قيادت جو هنگامي اجلاس، زلزلي متاثر علائقن ۾ امدادي سرگرميون تيز ڪرڻ جي هدايت

اسلام آباد (بيورو) وزير اعظم نواز شريف زلزلي متاثر علائقن ۾ امدادي سرگرميون تيز ڪرڻ جي هدايت ڪندي چيو آهي ته وفاقي حڪومت متاثرن کي اڪيلو نه ڇڏيندي، متاثرن جي بحالي لاءِ هر ممڪن وسيلا استعمال ڪيا ويندا، جڏهن ته هو متاثر علائقن جو پاڻ دورو ڪندو. ملڪ ۾ خوفناڪ زلزلي کانپوءِ واري صورتحال تي ويچارڻ لاءِ پي ايم هائوس اسلام آباد ۾ وزير اعظم نواز شريف جي هيٺ هنگامي اجلاس ٿيو. اجلاس ۾ آرمي چيف جنرل راحيل شريف، ڊي جي آءِ ايس آءِ ليفٽيننٽ ميجر رضوان اختر، وفاقي وزير اسحاق ڊار ۽ نيشنل ڊزاسٽر مئنيجمينٽ اٿارٽي جي چيئرمين سميت ٻين اعليٰ عملدارن شرڪت ڪئي. اجلاس ۾ اين ڊي ايم اي پاران وزير اعظم کي زلزلي سبب ٿيل نقصان ۽ متاثر علائقن ۾ هلندڙ امدادي سرگرمين بابت تفصيلي بريفنگ ڏني وئي. اين ڊي ايم اي ٻڌايو ته زلزلي سبب سڄي ملڪ ۾ 200کان وڌيڪ انساني جانيون ضايع ٿيون آهن، جڏهن ته سڀ کان وڌيڪ نقصان ڪي پي ڪي ۾ ٿيو آهي. اين ڊي ايم اي چيئرمين چيو ته زلزلي سبب سڀ کان وڌيڪ مالاڪنڊ ڊويز متاثر ٿيو آهي، متاثر علائقن ۾ امدادي سرگرميون جاري آهن. وزير اعظم نواز شريف اين ڊي ايم اي کي هدايت ڪئي آهي ته متاثر علائقن ۾ امدادي سرگرميون وڌيڪ تيز ڪيون وڃن ۽ متاثرن کي کاڌ خوراڪ سميت گهربل سهولتون فراهم ڪيون وڃن. وزير اعظم چيو ته هن ڏکئي وقت ۾ متاثرن کي اڪيلو نه ڇڏيو ويندو، وفاقي حڪومت متاثرن کي کاڌ خوراڪ سميت هر شيءِ جي فراهمي يقيني بڻائيندي. اجلاس ۾ فيصلو ڪيو ويو ته زلزلي متاثر علائقن ۾ سول توڙي ملٽري ادارا گڏجي ڪم ڪندا، جڏهن ته وزير اعظم نواز شريف متاثر علائقن جو دورو پڻ ڪندو.

 

وفاقي حڪومت جو مڪمل طور تباهه ٿيل گهر مالڪ کي 1-1 لک ڏيڻ جو اعلان

پشاور(م.ڊ) ملڪي تاريخ جي بدترين زلزلي تباهي مچائي ڇڏي آهي، حياتيون وڃائيندڙن جو انگ 3 سئو 28 ۽ زخمين جو انگ 1800 کان وڌي ويو آهي، جاني نقصان ۾ واڌ جو خدشو برقرار آهي، جڏهن ته متاثر علائقن ۾ ريسڪيو آپريشن جاري آهي. گذريل ڏينهن آيل خطرناڪ زلزلي خيبرپختونخواهه، فاٽا، گلگت بلتستان ۽ ٻين علائقن ۾ تباهي مچائي ڇڏي آهي. زلزلي سبب مختلف علائقن ۾ فوتين جو انگ وڌي 3 سئو 28 ٿي ويو،جڏهن ته زخمي ٿيل 18 سئو کان وڌيڪ ماڻهن جو مختلف اسپتالن ۾ علاج هلندڙ آهي. ڊاڪٽرن جو چوڻ آهي ته زخمين مان ڪيترن ئي ڄڻن جي حالت ڳڻتيءَ جوڳي آهي، تنهنڪري فوتين جو انگ وڌي سگهي ٿو. پي ڊي ايم اي جي رپورٽ موجب سڀ کان وڌيڪ متاثر علائقن ۾ چترال ۽ شانگلا شامل آهن جتي امدادي ڪمن جي شروعات ڪئي وئي آهي. رپورٽ ۾ چيو ويو ته شانگلا ۾ 38، چترال ۾ 29، لوئر دير 22، اپر دير 15، تورغر 15، اپر ڪوهستان 11، بونير 8، پشاور، مردان ۽ چارسده 3 – 3، نوشهره، صوابي، مالاڪنڊ ٻه – 2، مانسهره ۽ هنگو هڪ – هڪ ماڻهو فوت ٿيو. پي ڊي ايم اي جي رپورٽ موجب سڄي صوبي ۾ 2 هزار 97 گهر مڪمل طور تباهه ٿي ويا. ٻئي طرف وزيراعظم هائوس اسلام آباد ۾ قائم ڪيل ڪرائسز مئنيجمينٽ سيل، زلزلي سبب 229 ڄڻن جي فوت ٿيڻ ۽ 1561 ڄڻن جَي زخمي ٿيڻ جي تصديق ڪئي آهي. پي ايم ڪرائسز مئنيجمينٽ سيل موجب، زلزلي سبب خيبر پختونخواهه سڀ کان وڌيڪ متاثر ٿيو آهي، جتي 184 ماڻهو فوت ۽ 1423 زخمي ٿيا آهن. پڌرائي ۾ چيو ويو آهي ته فاٽا ۾ زلزلي سبب 26 ماڻهن حياتيون وڃايون، جڏهن ته 89 ماڻهو زخمي ٿيا. پي ايم ڪرائسز مئنيجمينٽ سيل موجب، زلزلي سبب پنجاب ۾ 6 ماڻهو فوت ۽ 10 زخمي ٿيا، جڏهن ته گلگت بلتستان ۾ به 6 ماڻهو زلزلي جي ور چڙهي ويا. هوڏانهن زلزلي متاثر علائقن ۾ پاڪ فوج جون امدادي ڪارروايون جاري آهن. آءِ ايس پي آر موجب، زلزلي سبب متاثر ٿيل قراقرم هاءِ وي کي ڪليئر ڪري ٻن هيليڪاپٽرن، سي ون-ٿرٽي جهاز توڙي زميني رستي سان 27 ٽن سامان ڪي پي ڪي ۽ گلگت بلتستان اماڻيو ويو آهي. امدادي سامان ۾ 2500 کائڻ پيئڻ جون شيون شامل آهن، جڏهن ته ڊاڪٽرن جون واڌو ٽيمون، هڪ هزار خيما ۽ ڪمبل به روانو ڪيا ويا آهن. آءِ ايس پي آر جو چوڻ آهي ته زلزلي متاثر علائقن ۾ 26 رليف ڪيمپون قائم ڪري متاثرن ۾ امدادي سامان ورهايو پيو وڃي. زلزلي سبب خيبرپختونخواهه ۽ گلگت بلتستان ۾ وڏو نقصان ٿيو آهي ۽ متاثر علائقن ۾ چوطرف تباهيءَ جا منظر ڏسڻ لاءِ ملي رهيا آهن. ٻئي طرف وزيراعظم نواز شريف چيو آهي ته زلزلي سبب تباهه ٿيل ڪي پي ڪي جي ضلعي شانگلا ۾ متاثرن جي بحالي لاءِ خيبرپختونخواهه جي وڏي وزير جي مشاورت کانپوءِ پئڪيج جو اعلان ڪيو ويندو، جڏهن ته متاثرن کي اڪيلو نه ڇڏيو ويندو. شانگلا ۾ زلزلي متاثرن کي خطاب ڪندي وزيراعظم نواز شريف چيو ته زلزلي سبب سڀ کان وڌيڪ شانگلا ضلعو متاثر ٿيو آهي. هن چيو ته عملدارن جي بريفنگ دوران سمجهڻ جي ڪوشش ڪئي ته نقصان ڪيترو ٿيو آهي، پرويز خٽڪ سان مشاورت بعد متاثرن لاءِ پئڪيج جو اعلان ڪيو ويندو. وزيراعظم چيو ته پاڪ فوج جي  خيبرپختونخواهه جي زلزلي متاثر علائقن ۾ ڀرپور امدادي سرگرمين تي آرمي چيف جنرل راحيل شريف جا ٿورائتا آهيون. نواز شريف جو چوڻ هو ته متاثرن جي هر ممڪن مدد ڪئي ويندي، زلزلي سبب ٽٽل پلز ۽ رستن جي ٻيهر تعمير لاءِ به اين ڊي ايم اي کي هدايتون جاري ڪيون آهن. هن چيو ته تباهه ٿيل گهرن ۽ ٻين نقصانن جو ڪاٿو لڳايو پيو وڃي، جنهن بعد متاثرن سان سٺي پئڪيج جو اعلان ڪيو ويندو ۽ متاثرن کي اهڙو پئڪيج ڏنو ويندو، جنهن ذريعي هو پهريان کان بهتر گهر ٺاهي سگهن. ان کان اڳ وزير اعظم نواز شريف زلزلي متاثر علائقن جي دوري تي شانگلا پهتو، جتي کيس امدادي ڪارورواين ۽ زلزلي سبب ٿيل نقصان بابت بريفنگ ڏني وئي. وزير اعظم کي بريفنگ ۾ ٻڌايو ويو ته شانگلا ۾ زلزلي سبب 49 ماڻهو فوت ۽ ڪيترائي ئي زخمي ٿيا آهن، متاثر علائقن ۾امدادي سرگرميون جاري آهن. بريفنگ ۾ چيو ويو ته شانگلا ۾ زلزلي کان اڳ تيز برسات ٿي ٿئي، سيءَ سبب ڪمبل ۽ ٽينٽ جي سخت ضرورت آهي. ان موقعي تي وزيراعظم هدايت ڪئي ته متاثرن کي ٽينٽ ۽ ڪمبلز سان گڏ هر ممڪن سهولتون فراهم ڪيون وڃن.

 

 

ڪي پي ڪي ۾ زلزلي سبب 184 ماڻهو فوت، 1456 زخمي ٿيا: پي ڊي ايم اي

پشاور(اي پي پي) سومر تي خيبر پختونخواه سميت ملڪ جي اڪثر علائقن ۾ آيل تاريخ جي شديد زلزلي ۾ خيبر پختونخواه صوبي ۾ 184 ماڻهو فوت، جڏهن ته1456 زخمي ٿيا آهن، تباهي پکيڙيندڙ زلزلي سبب 2097 گهر پڻ تباهه ٿي ويا. صوبائي ڊزاسٽر مئنجمينٽ اٿارٽي (پي ڊي ايم اي) موجب سومر تي آيل 8.1 جي شدت جي زلزلي سبب خيبر پختونخواه صوبو سڀني کان وڌيڪ متاثر ٿيو. جتي اڱاري جي صبح تائين رپورٽ ٿيل تفصيل موجب 184 مناڻهو فوت جڏهن ته 1456 زخمي ٿيا آهن. پي ڊي ايم اي موجب زلزلي سبب 2097 گهر تباهه ٿيا. اٿارٽي طرفان 7 ٽيمون فوري طور جوڙيون ويون آهن، جيڪي زلزلي متاثر ضلعن جو دؤرو ڪري نه رڳو متاثرن کي فوري رليف فراهم ڪنديون پر ان کان علاوه زلزلي سبب ٿيندڙ نقصانن جو پڻ جائزو وٺنديون. پي ڊي ايم اي موجب زلزلي سبب سڀني کان وڌيڪ فوتگيون شانگله ضلعي ۾ ٿيون جتي 38 ماڻهو فوت ٿيا، اهڙيءَ طرح چترال ۾ 29، سوات 28، لوئر دير 22، اپر دير ۾ 15، طورغر 15، ڪوهستان اپر 11، بونير 8، چارسده، پشاور ۽ مردان ۾ 3-3، نوشهره، صوابي، مالاڪنڊ ۽ ڪوهستان لوئر ۾ 2-2 جڏهن ته مانسهره ۽ هنگو ۾ هڪ هڪ ماڻهو شهيد ٿيا. مجموعي طور تي زخمي ٿيل 1456 ماڻهن ۾ سڀني کان وڌيڪ زخمي لوئر دير ۾ 248، چترال 200، پشاور 165، سوات 161، اپر دير 147، مردان 101، بونير 95، اپر ڪوهستان 85، شانگله 80، مالاڪنڊ 78، ڪوهاٽ 21، صوابي، تورغر، بٽگرام 15-15، نوشهره 14، مانسهره 4، ڪوهستان 3، جڏهن ته بنون ۽ هنگو ۾ هڪ هڪ شخص زخمي ٿيڻ جا اطلاع آهن.

 

ملڪ ۾ زلزلي کانپوءِ به سنڌ ۽ پنجاب ۾ مڪاني چونڊون شيڊول موجب ڪرايون وينديون: اليڪشن ڪميشن

اسلام آباد (بيورو) اليڪشن ڪميشن چيو آهي ته ملڪ ۾ زلزلي کانپوءِ به سنڌ ۽ پنجاب ۾ مڪاني چونڊون شيڊول موجب ڪرايون وينديون، اليڪشن ملتوي ڪرڻ بابت ڪابه درخواست ناهي ملي. اليڪشن ڪميشن پاران جاري ڪيل بيان موجب، زلزلي باوجود سنڌ ۽ پنجاب ۾ مڪاني چونڊن جو شيڊول برقرار رهندو. اليڪشن ڪميشن جو چوڻ آهي ته زلزلي سبب سنڌ ۽ پنجاب جي لاڳاپيل ضلعن ۾ ڪوبه نقصان ناهي ٿيو، انڪري شيڊول ۾ ڪابه تبديلي نه ڪئي ويندي. بيان ۾ چيو ويو ته ٻنهي صوبن پاران مڪاني چونڊون ملتوي ڪرڻ بابت ڪابه درخواست ناهي ملي، انڪري بلدياتي اليڪشن جاري ڪيل شيڊول موجب ڪرايون وينديون. واضح رهي ته سنڌ جي اٺن ۽ پنجاب جي 12 ضلعن ۾ مڪاني چونڊن لاءِ پولنگ 31 آڪٽوبر تي ٿيندي.

 

مخالف اتحاد پ پ لاءِ ڪا نئين ڳالهه ناهي، مڪاني چونڊن ۾ 700 اميدوارن جي بنا مقابلي ڪامياتي پارٽي جي مقبوليت جو ثبوت آهي: نثار کهڙو

لاڙڪاڻو(اي پي پي) سنڌ جي اطلاعات کاتي واري سينيئر وزير نثار احمد کهڙو چيو آهي ته مخالف اتحاد پيپلز پارٽيءَ لاءِ ڪا نئين ڳالهه ناهن، اهڙن اتحادن سان پيپلز پارٽيءَ تي ڪو به فرق نه ٿو پوي، مڪاني چونڊن کان اڳ سنڌ ۾ 700 کان وڌيڪ اميدوارن جي بنا مقابلي ڪاميابيءَ سان مخالفن کي پيپلز پارٽيءَ جي مقبوليت جو اندازو ٿي ويو هوندو پر پيپلز پارٽي مقابلو ڪرڻ ڄاڻي ٿي، ان لاءِ مخالف چونڊن ۾ زور آزمائي ڪري ڏسن آمرن جي ساٿارين کي پنهنجي مقبوليت جي خبر پئجي ويندي. اهڙن خيالن جو اظهار هن اڱاري ڏينهن لاڙڪاڻي ۾ ميڊيا سان ڳالهائيندي ڪيو. هن چيو ته ڪجهه ڌرين کان اهو هضم نه ٿو ٿئي ته پيپلز پارٽيءَ جي حڪومت قائم هجي پر پيپلز پارٽي اهڙن ماڻهن جي دلين تي مڱ ڏريندي رهندي. هن چيو ته 1947ع ۾ ملڪ ٺهيو پر 1970ع تائين عوام کي ون ووٽ ون مين کان محروم رکيو ويو ۽ ملڪ ۾ لڳاتار سالن کان مارشل لائي دورن عوام ۽ عوامي نمائندن کي نشانو بڻايو ۽ جڏهن به عوام پنهنجو فيصلو مڃرائڻ جي ڳالهه ڪئي ته ان جي ڪڏهن عوام کي ڪوڙا هڻي ته ڪڏهن عوام تي گوليون وسائي سرڪوبي ڪئي وئي پر عوام آمرن جي ساٿارين سان مقابلو ڪرڻ ڄاڻي ٿو. هن هڪ سوال جي جواب ۾ چيو ته متحده قومي موومينٽ جو اسيمبلين مان استعيفائن وارو انتهائي قدم ڪنهن مسئلي جو حل نه هو پر ايم ڪيو ايم جي دوستن اسيمبلين مان استعيفائون واپس وٺڻ جو اعلان ته ڪيو آهي ته پر اڃا تائين سنڌ اسيمبليءَ ۾ واپس اچڻ بابت باضابطه آگاهه نه ڪيو آهي ۽ ڏسڻو اهو آهي ته هو ڪڏهن ٿا استعيفي واپس وٺي اسيمبليءَ ۾ اچن. هن چيو ته سڀني مسئلن جو حل جمهوريت ۾ ئي آهي، جمهوريت اڳتي هلندي ته عوام جو جمهوريت ۽ رياست ۾ اعتماد وڌندو باقي آمر جنرل پرويز مشرف جي بهادري ڏسي چڪا آهيون، هو ته عدالت ۾ به وڃڻ کان ڊڄندو آهي ۽ جڏهن به سندس عدالت ۾ وڃڻ جي ڳالهه ايندي آهي ته هو بيمار ٿي پوندو آهي. هن چيو ته شفاف احتساب لاءِ صوبائي احتساب ڪميشن جوڙي رهيا آهيون جنهن کي جلد سنڌ اسيمبليءَ ۾ منظوريءَ لاءِ پيش ڪيو ويندو ۽ هي اهڙو احتساب ڪميشن هوندو جنهن تي جانبداريءَ جا الزام نه لڳن.

 

بلاول ڀٽو سان رحمان ملڪ ۽ مخدوم رفيق زمان جي الڳ الڳ ملاقات

ڪراچي (اين اين آءِ) پاڪستان پيپلز پارٽي جي چيئرمين بلاول ڀٽو زرداري سان اڱاري تي پ پ اور سيز جي صدر ۽ اڳوڻي وفاقي گهرو وزير رحمان ملڪ ۽ پ پ جي ايم پي اي مخدوم رفيق زمان بلاول هائوس ۾ الڳ الڳ ملاقات ڪئي، سينيٽر رحمان ملڪ بلاول ڀٽو کي پيپلز پارٽي اوور سيز جي پارٽي تنظيمي معاملن تي بريفنگ ڏني ۽ پارٽي کي وڌيڪ فعال بڻائڻ جي حوالي سان حڪمت عملي تي خيالن جي ڏي وٺ ڪئي، ملاقات ۾ ڪي پي ڪي ۾ زلزلي سٽيلن سان همدردي جو اظهار ڪيو ويو ۽ چيو ويو ته پ پ زلزلي جي متاثرن جي رليف ۽بحالي جي ڪمن ۾ پنهنجن سمورن وسيلن جو استعمال ڪندي، بلاول ڀٽو چيو ته ڪي پي ڪي جي قيادت کي ان ڏس ۾ پهريائين هدايتون جاري ڪيون آهن، پ پ جي ايم پي اي مخدوم رفيق زمان پارٽي چيئرمين کي مٽِياري ضلعي جي سياسي صورتحال ۽ مڪاني چونڊن جي صورتحال کان آگاهه ڪيو ۽ ٻڌايو ته مٽِياري ضلعي جي 2 يوسيز مان پارٽي جا اميدوار بنا مقابلي ڪامياب ٿي چڪا آهن، جڏهن ته ضلعي ۾ مخالفن جي اتحاد باوجود پ پ جا سمورا اميدوار اڪثريت سان ڪامياب ٿيندا.

 

پاڪ افغان سرحد کان حملي ۾ 7 ايف سي جوان شهيد

راولپنڊي (اين اين آءِ) پاڪ افغان سرحد پار حملي جي نتيجي ۾ ايف سي جا 7 جوان شهيد ٿي ويا آءِ ايس پي آر مطابق ڏکڻ وزيرستان ۾ انگور اڏا جي اتر اوڀر ۾ ايف سي جي چوڪي تي فائرنگ ۾ ايف سي جا 7 جوان شهيد ٿي ويا ذريعن مطابق ايف سي جي چيڪ پوسٽ تي حملو دهشتگردن پاران ڪيو ويو ياد رهي ته 3 مهينا اڳ جولاءِ ۾ به سرحد جي پاڪستاني چيڪ پوسٽ تي فائرنگ ڪئي ويئي هئي جنهن سان ٻه اهلڪار زخمي ٿيا هئا.

 

صوبي ۾ زلزلي سان 200 جي لڳ ڀڳ ماڻهو فوت ٿيا، آئينده لاءِ حفاظتي انتظامن کي يقيني بڻائيڻو پوندو: عمران خان

پشاور (اين اين آءِ) پاڪستان تحريڪ انصاف جي چيئرمين عمران خان چيو آهي ته خيبرپختونخواهه ۾ زلزلي سان 200 جي لڳ ڀڳ ماڻهو فوت ٿيا آهن آئينده لاءِ حفاظتي انتظامن کي يقيني بڻائڻو پوندو پاڪستان تحريڪ انصاف جي چيئرمين عمران خان پشاور جي ليڊي ريڊنگ اسپتال ۾ زلزلي سٽيلن جي عيادت ڪئي ۽ ان موقعي تي مڊيا سان ڳالهائيندي هن چيو ته آئينده زلزلي کان بچاءُ لاءِ عمارتن لاءِ حفاطتي انتظام ڪرڻا پوندا اهڙا علائقا جتي زلزلي اچڻ جا وڌيڪ امڪان آهن اتي حفاظتي انتظامن کي وڌيڪ موثر بنائڻ جي ضرورت آهي. وڏي وزير سان دير سوات ۽ شانگلا وڃي رهيو آهيان جتي سڀ کان وڌيڪ نقصان ٿيو آهي. هن وارثن ۽ ٻين ماڻهن کي ايمرجنسي وارڊ ۾ وڃڻ کان روڪيو هن چيو ته ميڊيا مرڪز سميت ڪنهن کي وارڊز اندر وڃڻ نه ڏنو ويندو ته جيئن مريض متاثر نه ٿين.

 

ڪراچي جي علائقي حيدري ۾ نامعلوم هٿياربندن جي فائرنگ ۾ 2 پوليس اهلڪار شهيد

ڪراچي(اسٽاف رپورٽر) ڪراچي ۾ پوليس اهلڪارن جي ٽارگيٽ ڪلنگ جو سلسلو جاري آهي،اڄ به حيدري ۾ 2 پوليس اهلڪارن کي ڊيوٽي دوران فائرنگ جو نشانو بڻايو ويو، جنهن سان ٻئي اهلڪار ٿڏي تي ئي شهيد ٿي ويا.پوليس مطابق ڪراچي جي علائقي حيدري نارٿ ناظم آباد ۾ اڻ ڄاتل دهشتگردن 2 پوليس اهلڪارن کي ڊيوٽي دوران فائرنگ جو نشانو بڻايو، جنهن ۾ هڪ اهلڪار ٿڏي تي ئي شهيد ٿي ويو، جڏهن ته ٻئي اهلڪار اسپتال ويندي رستي ۾ دم ڌڻي حوالي ڪيو، ٻنهي اهلڪارن جي سڃاڻپ اسلم ۽ شاهنواز جي نالن سان ٿي. پوليس جو چوڻ آهي ته ٻئي پوليس اهلڪار نارٿ ناظم آباد ٿاڻي ۾ مقرر هئا ۽ ڊيوٽي دوران ٻن موٽرسائيڪلن تي سوار4 دهشتگردن فائرنگ ڪئي، واقعي واري هنڌان 9ايم ايم جا خول هٿ ڪيا ويا آهن.

ڪارنهن الزام تحت قتل جا ذميوار ايس ايڇ اوز ۽ ايس ايس پيز آهن: عدالت

لاڙڪاڻو (بيورو) سنڌ هاءِ ڪورٽ صوبي اندر عورتن کي تحفظ فراهم ڪرڻ جو حڪم ڏيندي ريمارڪس ڏنا آهن ته نارين کي 2 ايڪڙ زمين ۽ ڪجهه پئسن خاطر ڪارنهن الزام مڙهي قتل ڪرڻ بعد بنا ڪفن جي دفنايو وڃي ٿو، قتل ۽ جرڳن جا ذميوار حدن جا ايس ايڇ اوز ۽ ايس ايس پيز آهن. سنڌ هاءِ ڪورٽ لاڙڪاڻي بئنچ ۾ عورتن جي 100 کان وڌيڪ تحفظ وارين درخواستن تي گڏيل ٻڌڻي ٿي، جنهن دوران درخواستگذارن جي وڪيلن پيش ٿي دليل ڏنا. درخواستگذارن جي وڪيلن عدالت کي ٻڌايو ته پوليس جرڳن تي پابندي باوجود وڏيرن، سردارن ۽ پيرن ڏانهن ليٽر لکي فيصلا ڪرائي رهي آهي، جنهن سبب عورتون دارالامان ۾ به محفوظ ناهن. وڪيلن وڌيڪ موقف اختيار ڪيو ته دارالامان مان عورتن کي ڪڍي گم ڪيو وڃي ٿو پر پوليس ڪوبه تحرڪ نه وٺي رهي آهي. ٻڌڻي دوران عدالت ريمارڪس ڏنا ته هر ٿاڻي جو ايس ايڇ اوز ۽ ايس ايس پيز ڪارنهن الزام هيٺ ڪنهن به ناري توڙي نوجوان جي قتل يا جرڳي جا ذميوار آهن. عدالت ريمارڪس ڏنا ته ڇوڪرين کي 2 ايڪڙ زمين ۽ ڪجهه پئسن خاطر ڪارنهن جو الزام هڻي قتل ڪري بنا ڪفن جي دفن ڪيو وڃي ٿو. عدالت وڌيڪ ريمارڪس ڏنا ته سپريم ڪورٽ وڏي وزير، وزيرن، مشيرن ۽ بااثرن جو غير قانوني حڪم نه مڃڻ جو حڪم ڏنو پر پوليس سندن ڪمداري ڪري رهي آهي. عدالت پنهنجي ريمارڪس ۾ وڌيڪ چيو ته پوليس اهلڪار صحيح ڊيوٽي نه ڪري رهيا آهن، جنهن سبب رڳو لاڙڪاڻي ڊويزن ۾ 60 هزار ڏوهاري روپوش آهن، جن جي تعداد ۾ ڏينهون ڏينهن واڌ ٿيندي پئي وڃي. عدالت عورتن کي تحفظ فراهم ڪرڻ جو زباني حڪم ڏيندي چيو ته اڳتي ڪٿي به قتل يا جرڳو ٿيو ته ذميوار حد جو ايس ايڇ او ۽ ايس ايس پي هوندا.