تازيون خبرون

Daily Archives: October 19, 2015

آمر مشرف جي حڪومت عدالتي حڪم باوجود ڪارساز سانحي جي ايف آءِ آر داخل نه ڪئي: پيپلز پارٽي

ڪراچي(اسٽاف رپورٽر ) پاڪستان پيپلز پارٽي سنڌ پاران 18 آڪٽومبر 2007 تي ٿيل ڪارساز سانحي جي شهيدن جي 8 ورسي عقيدت ۽ احترام سان ڪراچي سميت سنڌ جي سمورن ضلعن ۾ ملهائي وئي. اهم تقريب پيپلز پارٽي ڪراچي ڊويزن پاران واقعي واري هنڌ شهيدن جي يادگار ڪارساز سانحي ڪراچي وٽ ڪوٺائي وئي جتي بلاول ڀٽو زرداري، بختاور ڀٽو زرداري، آصفه ڀٽو زرداري ۽ سيد قائم علي شاهه گڏ شرڪت ڪري شهيدن جي يادگار کي خراج عقيدت پيش ڪرڻ لاءِ گل رکيا ۽ فاتحه خواني ڪئي. آصف علي زرداري پاران پ پ ڪراچي ڊويزن جي اڳواڻن يادگار تي گل چاڙهيا ان کان اڳ اسپيڪر سنڌ اسيمبلي آغا سراج دراني، نثار احمد کهڙو، شرميلا فاروقي، شهلا رضا، وقار مهدي، راشد حسين رباني، محمد صديق ابو ڀائي، نجمي عالم، سعيد چاوله، راجا رزاق، قاسم بلوچ سميت ٻين پارٽي اڳواڻن ۽ جيالن پڻ تقريب ۾ شرڪت ڪئي ۽ شهيدن جي يادگار تي گل رکي کين زبردست خراجِ عقيدت پيش ڪيو. ان کانپوءِ پ پ ڪراچي ڊويزن پاران ڪارساز شهيدن جي ايصال ثواب لاءِ قرآن خواني ڪئي وئي.   تعليم ۽ اطلاعات واري سينيئر صوبائي وزير نثار احمد کهڙو 18 آڪٽوبر سانحه جي شهيدن جي يادگار تي آچر ڏينهن حاضري ڀري ۽ شهيدن جي يادگار تي گلن جي چادر چاڙهي فاتحه خواني ڪئي. ان موقعي تي هن ميڊيا سان ڳالهائيندي چيو ته آمر مشرف جي حڪومت عدالت جي حڪم باوجود ڪارساز سانحه جي ايف آءِ آر داخل نه ڪئي وئي. هن چيو ته پير پاڳاري شهيد محترمه بينظير ڀٽو جي حوالي سان ڳالهايو پر ان وقت ذوالفقار مرزا خاموش رهيو  ۽ نبيل گبول ڪڏهن پارٽي ۾ اچي ٿو ته ڪڏهن وڃي ٿو . صوبائي وزير چيو ته ڪيتريون ئي پارٽيون پي پي جي خلاف آهن پر پي پي پي انهن سان مقابلو ڪرڻ ڄاڻي ٿي. هن چيو ته ماضي ۾ به پيپلز پارٽي جي خلاف اتحاد ٺهندا رهيا آهن پر انهن سان ڪو به فرق نٿو پوي.

 

پارٽي کي ڪمزور ۽ مخالفن کي مضبوط ڪندڙن کي نه ڇڏيو ويندو: نواز شريف

اسلام آباد (بيورو) وزيراعظم نوازشريف مسلم ليگ (ن) جا اندروني اختلاف ختم ڪرڻ لاءِ جو ٽاسڪ شهباز شريف کي ڏئي ڇڏيو آهي.وزيراعظم هڪٻئي خلاف بيان بازي ڪندڙ وزيرن ۽ اڳواڻن کي خبردار ڪيو آهي ته جنهن کي شڪايت آهي پارٽي جي قيادت سان ڳالهائي، ٻين کي تنقيد جو موقعو ڏيندڙن سان ڪابه رعايت نه ڪئي ويندي. وزيرن جي جهيڙن ۽ کلي عام هڪ ٻئي خلاف بيان بازي، مڪاني چونڊن ۾ فيصل آباد ۾ پارٽي جي اندروني دشمنين ۽ پوءِ سنڌ ۾ به ٽڪيٽن جي ورهاست تي هلڙبازي ۽ پارٽي جي اندروني اختلاف نوازشريف لاءِ مٿي جو سور بڻجي ويا آهن. رائي ونڊ ۾ وفاقي ۽ صوبائي وزيرن ۽ سينيئر اڳواڻن جي مشوارت اجلاس ۾ وزيراعطم سخت ڪاوڙ جو اظهار ڪندي اختلاف ٻاهر آڻيندڙن کي وارننگ ڏني آهي آهي ته جيڪڏهن پارٽي کي ڪمزور ۽ مخالفن کي مضبوط ڪندرن کي نه ڇڏيو ويندو،جيڪڏهن ڪنهن کي شڪايت آهي ته اُهو پارٽي قيادت سان رابطو ڪري. ذريعن موجب وزيراعظم نوازشريف وزيرن ۽ پارٽي جي سينيئر اڳواڻن وچ ۾ اختلافن تي ڪاوڙ جو اظهار ڪندي چيو ته ان سان مخالفن کي تنقيد جو موقعو ملندو ۽ پارٽي ڪمزور ٿيندي. هن اختلاف ختم ڪرڻ جي ذميواري پنجاب جي وڏي وزير ميان نوازشريف کي ڏئي ڇڏي آهي.

 

وفاقي حڪومت ڪراچي ۾ امن قائم ڪرائڻ ۾ ڪامياب ٿي آهي: پرويز رشيد

لاهور (بيورو) سڌ سماءَ واري وفاقي وزير پرويز رشيد چيو آهي ته وفاقي حڪومت ڪراچي ۾ امن قائم ڪرائڻ ۾ ڪامياب ٿي وئي آهي،آپريشن ضرب عضب جي نتيجن جي به سڄي دنيا ساراهه پئي ڪري،ڀارتي مداخلت جا سمورا ثبوت گڏيل قومن کي فراهم ڪري ڇڏيا،جڏهن ته اين اي 122 جي چونڊ نتيجن ڌانڌليءَ جي سمورن الزامن کي رد ڪيو آهي. لاهور ۾ ميڊيا سان ڳالهائيندي سڌ سماءَ واري وفاقي وزير پرويز رشيد چيو ته ن ليگ جي حڪومت سنڌ جي راڄڌاني واري شهر ڪراچي ۾ امن قائم ڪرائڻ واري مشن ۾ ڪاميابي حاصل ڪئي آهي. پرويز رشيد جو چوڻ هو ته ڪراچي ۾ امن قائم ٿيڻ سان عوام جو اعتماد به بحال ٿيو آهي ۽ شهرين آزاديءَ جو جشن توڙي عيدون ڀرپور نموني ملهايون. هن چيو ته دهشتگرديءَ خلاف آپريشن ۾ وڏيون ڪاميابيون مليون آهن، جن جي سڄي دنيا ساراهه ڪري رهي رهي آهي، سندن حڪومت کان اڳ چيو پئي ويو ته دهشتگرد ملڪ تي قبضو ڪري وٺندا. سڌ سماءَ واري وزير، معمول موجب عمران خان کي به ڇتي تنقيد جو نشانو بڻائيندي چيو ته ننڍي چونڊ جي نتيجن سان پي ٽي آءِ جا ڌانڌلين وارا الزام رد ٿي ويا ۽ مينڊيٽ چوري ٿيڻ وارو شڪ به غلط ثابت ٿيو. هن چيو ته ڌرڻي ۾ بدتميزي جون سموريون حدون پار ڪيون ويون،پر هنن صبر ڪيو،ڪپتان ۽ قادريءَ جي لشڪر پي ٽي وي توڙي پارليامينٽ تي حملا پڻ ڪرايا. سندس چوڻ هو ته اليڪشن ٽربيونلز جا اڪثر فيصلا به ن ليگ جي حق ۾ آيا. پنهنجي حڪومت جا ڪارناما ڳڻائيندي پرويز رشيد چيو ته ماضيءَ ۾ 20 ڪلاڪ لوڊشيڊنگ ٿيندي هئي،جنهن ۾ گهٽتائي آندي وئي آهي،نواز ليگ جي سرڪار سمورين حالتن جو ڄمي مقابلو ڪيو. وفاقي وزير پرويز رشيد اهو پڻ ٻڌايو ته پاڪستان، ڀارتي مداخلت جا سمورا ثبوت گڏيل قومن کي فراهم ڪري ڇڏيا آهن،جڏهن ته وزيراعظم آمريڪي دوري دوران صدر براڪ اوباما سان ڀارت، افغانستان ۽ ٻين معاملن تي خيالن جي ڏي وٺ ڪندو. هڪ سوال جي جواب سڌ سماءَ واري وزير پرويز رشيد واضح ڪيو ته پاڪستان، پنهنجي وزيراعظم ۽ عوام جي حفاظت ڪرڻ ڄاڻي ٿو.

 

ڪالا باغ ڊيم رٿا مئل گهوڙو آهي جنهن کي اٿاري حڪومت کي بيوقوف بڻايو پيو وڃي: خورشيد شاهه

سکر (بيورو) قومي اسيمبلي ۾ مخالف ڌر جي اڳواڻ خورشيد چيو آهي ته ڪالا باغ ڊيم مئل گهوڙو آهي جنهن جي ذريعي حڪومت کي ڦاسايو پيو وڃي. سکر ۾ ميڊيا سان ڳالهائيندي سيد خورشيد شاهه چيو ته ڪالا باغ ڊيم واري رٿا کي ٽنهي ننڍن صوبن جي اسيمبلين رد ڪري ڇڏيو آهي. هن چيو ته ڪالا باغ ڊيم رٿا جي ڳالهه ڪرڻ وارا بيوقوفن جي جنت ۾ رهن ٿا. وزيراعظم جي آمريڪا واري دوري بابت ڳالهائيندي سيد خورشيد شاهه چيو ته نواز شريف کي دوري لاءِ سمورين سياسي پارٽين کي اعتماد ۾ وٺڻ گهرجي هان. قومي اسيمبلي جي مخالف ڌر اڳواڻ چيو ته، وزيراعظم نوازشريف کي امريڪا جي دوري دوران ڀارت واري معاملي سميت پاڪ-ايران گيس پائپ لائن واري مسئلي تي به ڳالهيون ڪرڻ گهرجن. مڪاني چونڊن جي حوالسي سان ڳالهائيندي پيپلز پارٽي جي اڳواڻ چيو ته لوڪل باڊيز واري اليڪشن ۾ هميشا حڪمران پارٽي ئي ڪامياب ٿيندي آهي. هن چيو ته سنڌ اندر مڪاني چونڊن ۾ پيپلز پارٽي ڪامياب ٿي رهي آهي، پر عوام ووٽ ان کي ڏيندو آهي جيڪو سندن مسئلا حل ڪندو آهي.

 

امداد شاهه جي پارٽي ۾ شموليت جي آجيان، پ پ قيادت کان ڪارڪنن تائين تاريخ رت سان رڱيل آهي: نثار کهڙو

حيدرآباد (اي پي پي) سيد امداد علي شاهه ڄاموٽ پنهنجن ساٿين سميت پي ٽي آئي کي ڇڏي پيپلز پارٽي ۾ شموليت اختيار ڪري ورتي آهي ان سلسلي ۾ گذريل رات دير سان مٽياري ڀرسان سيد امداد علي شاهه ڄاموٽ جي رهائشگاهه واقع   جيئندل ڪوٽ ۾ وڏي عوامي ميڙ کي خطاب ڪندي اطلاعات ۽ تعليم واري سينئر صوبائي وزير نثار احمد کهڙو چيو ته امداد علي شاهه ڄاموٽ جي پيپلز پارٽي ۾ شموليت سان پارٽي مضبوط ٿيندي هن چيو ته پ پ پ هڪ عوامي پارٽي آهي ۽ عوام جي خدمت ۾ يقين رکي ٿي اهو ئي سبب آهي جو اڄ سوين ماڻهو ٻيون سياسي جماعتون ڇڏي پيپلز پارٽي ۾ شامل ٿي رهيا آهن جڏهن ته قيادت کان وٺي ڪارڪن تائين پارٽي جي تاريخ رت سان رنڱيل آهي ۽ رت جي آبياري سبب ئي اڄ تائين زنده آهي هن چيو ته کيس خوشي ٿي آهي ڇاڪاڻ ته اهو ئي گهر آهي ۽ اهو ئي نالو آهي جنهن جا وڏا پ پ پ جي محبوب قائد شهيد ذوالفقار علي ڀٽي جا ساٿي هئا ۽ پ پ پ جي بانيڪارن ۾ شامل هئا هن چيوته ڀٽو صاحب سدائين غريب عوام کي اڳيان آڻڻ لاءِ جدوجهد ڪئي هن چيو ته شهيد ذوالفقار علي ڀٽو هڪ عظيم اڳواڻ هو جنهن جي سوچ غريبن جي خدمت ڪرڻ هئي هن چيو ته ڀٽو صاحب جي نياڻي شهيد محترمه بينظير ڀٽو به پنهنجي سڄي زندگي غريب عوام لاءِ جاکوڙيندي پنهنجي جان قربان ڪري ڇڏي هن چيو ته اليڪشن اچڻي وڃڻي شيءَ آهي پر پ پ پ ڪڏهن به آمرن جي حمايت نه ڪئي آهي، هن چيو ته هن وقت امداد علي شاهه ڄاموٽ پارٽي ۾ شموليت اختيار ڪئي آهي ۽ هاڻي سندس اها ذميواري آهي ته هو مڪاني ادارن وارين چونڊن ۾ پ پ پ جي اميدوارن کي ڪامياب ڪرائڻ لاءِ پنهنجو ڪردار ادا ڪري ان موقعي تي ميڊيا جي نمائندن سان ڳالهائيندي چيو ته ايم ڪيو ايم جون استيعفا واپس وٺڻ ۽ حڪومت ۾ شامل ٿيڻ ٻه الڳ ڳالهيون آهن. انهن کي مستعفي نه سمجهڻ گهرجي. مٽياري ۾ استادن کي پگهارون نه ملڻ جي حوالي سان پڇيل سوال تي هن چيو ته سال 2012 ۾ جيڪي استاد ڀرتي ڪيا ويا هئا ان معاملي جي جاچ ڪئي پئي وڃي جڏهن ته تازو ڀرتي ڪيل 17 هزار اين ٽي ايس ٽيسٽ پاس استاد جيڪي ميرٽ تي ڀرتي ڪيا ويا آهن انهن جي پگهارن جو ڪو به مسئلو نه آهي هن چيو ته پ پ پ هميشه روزگار ڏيندي آهي پر ڪنهن کان روزگار کسيندي نه آهي   هن وقت اليڪشن ڪميشن پاران ڀرتين تي پابندي مڙهيل آهي ۽ چونڊن واري مرحلي کانپوءِ هڪ دفعو ٻيهر بيروزگار نوجوانن کي روزگار ڏيڻ جو سلسلو شروع ڪيو ويندو نيئن تڪبندين جي حوالي سان هن چيو ته سمورين تڪبندين تي اعتراض نه آهن 80 يا 90 تڪبندين اعتراض داخل ڪيا ويا آهن جنهن لاءِ سنڌ حڪومت اليڪشن ڪميشن کي اپيل ڪئي آهي .   ڪرپشن ۽ بدامني جي حوالي سان هن چيو ته سنڌ ۾ امن امان جو مسئلو نه آهي جنهن جو وڏو ثبوت اهو آهي ته سنڌ ۾ واپار جي   رجحان ۾ اضافي سميت صنعتون قائم ٿي رهيون آهن جنهن سان روزگار جا نوان موقعا پڻ فراهم ٿي رهيا آهن   ۽ ماڻهن جي قوت خريد ۾ پڻ اضافو ٿيو آهي   هن بدعنواني جي حوالي سان چيو ته   الزام ته هر ڪنهن تي لڳائي سگهجي ٿو پر انهن الزامن کي ثابت ڪرڻ لاءِ   عدالتون کليل آهن ۽ بدعنواني ۾ ملوث ماڻهن کي عدالتون ئي سزائون ڏئي سگهن ٿيون امن امان جي حوالي سان هن چيو ته سنڌ ۾ امن واري صورتحال ڪافي بهتر ٿي آهي   پ پ پ ۾ ڌڙا بندي جي حوالي سان هن چيو ته اهو پهريون ڀيرو آهي جو بلدياتي چونڊون پارٽي بنيادن تي ٿي رهيون آهن جنهن جو ڪريڊٽ پڻ   پ پ پ   ڏانهن وڃي ٿو. ميڙاڪي کي خطاب ڪندي ساٿين سميت پيپلز پارٽي ۾ شموليت اختيار ڪندڙ سيد امداد علي شاهه ڄاموٽ چيو ته ماضي ۾ کيس نظر انداز ڪيو ويو جنهن ڪري هن مجبور ٿي پي ٽي آئي ۾ شموليت اختيار ڪئي هئي پر هن وقت پنهنجن ساٿين جي مشاورت سان پ پ پ ۾ غير مشروط شموليت اختيار ڪئي آهي ۽ هاڻي سندس مرڻ جيئڻ پ پ پ سان آهي ان موقعي تي ايم اين اي سيد امير علي شاهه ڄامو ٽ ، ايم اين اي شگفته جماڻي ، ايم پي اي ڊاڪٽر مخدوم رفيق الزمان کان علاوه پ پ پ جي مقامي اڳواڻن پڻ خطاب ڪيو   ۽ عوام جي وڏي انگ شرڪت ڪئي.

 

ڀارت سان جلد ڳالهيون بحال ڪرڻ چاهيون ٿا: خواجه آصف

بيجنگ (اي پي پي) بچاءَ واري وزير خواجه محمد آصف افغان مسئلي جي پرامن نبيري ۽ مضبوط توڙي مستحڪم افغانستان لاءِ چين جي ڪوششن ۽ قدمن جي آجيان ڪندي چيو آهي ته پاڪستان ۽ خطي جي سلامتي لاءِ هڪ مستحڪم ۽ پرامن افغانستان ضروري آهي، امن ۽ استحڪام ذريعي ئي پاڪ چين اقتصادي لنگهه جي فائدن مان صحيح معنيٰ ۾ لاڀ حاصل ڪري سگهجي ٿو، گذرگاهه سان خطي ۾ ترقي ۽ خوشحالي جي نئين دور جي شروعات ٿيندي، اها ڳالهه هن آچر ڏينهن بيجنگ ۾ جيانگ شان فورم جي افتتاحي ويهڪ کي ”علائقي دهشتگردي، سبب ۽ حل“ جي عنوان تي خطاب ڪندي ڪئي، هن چيو ته چين افغانستان جي مسئلي جي پرامن حل ۽ مستحڪم افغانستان لاءِ فعال ۽ موثر ڪوششون ڪري رهيو آهي، جيڪو سٺو سنوڻ آهي، هن خطي جي عوام جي بنيادي خدشن جي ازالي جي ضرورت تي زور ڏنو، جنهن جي نتيجي ۾ عسڪريت پسند عنصرن کي لاڳاپيل معاشرن ۾ جاءِ ملي ٿي، بچاءَ واري وزير دهشتگردي ۽ عسڪريت پسندي جي خطرن کي منهن ڏيڻ لاءِ جوابي حڪمت عملي جوڙڻ جي ضرورت تي زور ڏنو، ان سان گڏ هن هڪ جامع سماجي، اقتصادي ۽ سياسي سڌارن واري پيڪيج جي ضرورت کي پڻ اجاگر ڪيو، هن دهشتگردي جي سمورين صورتن جي مذمت ڪئي ۽ عالمي برادري کي چيو ته اها خطي مان دهشتگردي جي بنيادي سببن جي تدارڪ ۽ ازالي لاءِ پنهنجون ذميواريون نڀائي، بچاءَ واري وزير ڪشمير ۽ فلسطين جهڙن مسئلن جي حل جي ضرورت تي زور ڏيندي چيو ته انهن خطن ۾ انساني حقن جون سنگين ڀڃڪڙيون ٿي رهيون آهن، عالمي برادري کي انهن علائقن ۾ انساني حقن جي ڀڃڪڙين جو ازالو ڪرڻ گهرجي ۽ انهن واعدن تي عمل ڪرڻ گهرجي جيڪي اتي جي عوام سان ڪيا ويا آهن، هن چيو ته پاڪستان افغان جنگ دوران 30 لک جي لڳ ڀڳ افغان ڀائرن کي پناهه ڏني، افغانستان ۾ عدم استحڪام جا خراب اثر پاڪستان تي پيا آهن ۽ پاڪستان متاثر ٿيو آهي، دهشتگردي خلاف جنگ ۾ اسان جي 60 هزار جي لڳ ڀڳ شهرين جون جانيون ويون آهن، جڏهن ته اربين ڊالرن جو نقصان پڻ ٿيو آهي.

 

 

ذميواراڻي سياست ۽ صحافت کانسواءِ ملڪ ترقي نه ٿو ڪري سگهي: سعد رفيق

لاهور(بيورو) ريلوي واري وفاقي وزير خواجا سعد رفيق چيو آهي ته ذميواراڻي سياست ۽ صحافت کانسواءِ ملڪ ترقي نه ٿو ڪري سگهي، اسان سڀني کي سنجيدگي سان ملڪي ترقي ۾ حصو وٺڻ گهرجي. لاهور ۾ تقريب کي خطاب ڪندي سعد رفيق چيو ته اليڪٽرانڪ ميڊيا غلط هلندڙ خبرن جي وضاحت به  نشر ڪري. هن چيو ته اسان کي قوم کي مايوسي وارو نياپو ڏيڻ بدران هالڪاري پيغام ڏيڻ گهرجي. وفاقي وزير جو چوڻ هو ته ماضِي ۾ سياسي پارٽين تي پابندي مڙهي وئي، اسان جي ملڪ ۾ جمهوريت هاڻ وڌي رهي آهي، اسان سڀني کي گڏجي ان کي مضبوط ڪرڻو آهي ته جيئن اڳتي ڪابه قوت جمهوريت تي راتاهو نه هڻي سگهي.

 

سانحي ڪارساز جي ايف آئي آر ۾ پرويز مشرف ۽ ارباب رحيم جو نالو شامل ڪيو وڃي: آغا سراج دراني

ڪراچي(اسٽاف رپورٽر) سنڌ اسيمبلي جي اسپيڪر آغا سراج دراني جو چوڻ آهي تن بينظير ڀٽو جي وطن واپسي جي موقعي تي کيس سيڪيورٽي نه ڏني وئي هئي، انڪري سانحي ڪارساز جي ايف آئي آر ۾ پرويز مشرف ۽ ان وقت جي وڏي وزير ارباب غلام رحيم جو نالو شامل ڪيو وڃي. ڪراچي ۾ ميڊيا سان ڳالهائيندي سنڌ اسيمبلي جي اسپيڪر چيو ته پيپلز پارٽي بينظير ڀٽو جي پارٽي آهي، اسان جي اڳواڻن ملڪ بچائڻ لاءِ پنهنجو رت ست ڏنو آهي، نبيل گبول ڪڏهن به جانثار نه هو، جو پنهنجي مفاد جي لاءِ پارٽي ۾ آيو هو، اڄ ان جو حشر ڏسڻ وٽان آهي، اهڙا ئي ماڻهو پارٽي جي خلاف ڳالهائي رهيا آهن. هن چيو ته بينظير ڀٽو جڏهن  وطن ڏانهن واپس پئي آئي ته کيس سيڪيورٽي نه ڏني وئي هئي، ان لاءِ سانحي ڪارساز جي ايف آئي آر ۾ پرويز مشرف ۽ ان وقت جي وڏي وزير ارباب غلام رحيم جو نالو وڌو وڃي. سانحي ڪارساز ڪيس ۾ هو پاڻ کي گواهي لاءِ پيش ڪري ٿو. ايم ڪيوايم جي استعيفائن بابت اسپيڪر چيو ته ايم ڪيو ايم جي ميمبرن جي استعيفائن جي ڇنڊ ڇاڻ هلي رهي آهي، ايم ڪيوايم جي11 ميمبرن فيڪس تي استعيفائون موڪليون هيون، فيڪس تي موڪليل استعيفائن جي تصديق ڪئي پئي وڃي، ايم ڪيوايم جي استعيفائن جي منظوري يا رد ٿيڻ بابت اڃان ڪجهه نٿو چئي سگهجي.

 

محرم الحرام جي دوران سنڌ اندر هر صورت ۾ امن امان بحال رکيو ويندو: سهيل انور سيال

لاڙڪاڻو  (بيورو) محرم الحرام جي دوران سنڌ اندر هر صورت ۾ امن امان بحال رکيو ويندو ۽ قانون هٿ ۾ کڻڻ جي ڪنهن کي به اجازت نه ڏني ويندي. اهڙن خيالن جو اظهار سنڌ جي صوبائي گهرو وزير سهيل انور سيال اڄ ڪمشنر آفيس لاڙڪاڻو ۾ هڪ اعليٰ سطحي اجلاس جي صدارت ڪندي ڪيو. جنهن ۾ ڪمشنر لاڙڪاڻو ڊويزن جناب غلام اڪبر لغاري، ڊي آءِ جي لاڙڪاڻو جناب سائين رکيو ميراڻي، ڊپٽي ڪمشنر لاڙڪاڻو جناب جاويد علي جاگيراڻي، ڊپٽي ڪمشنر قمبرشهدادڪوٽ، شڪارپور، جيڪب آباد، ڪشمور ڪنڌڪوٽ ۽ ايس ايس پي لاڙڪاڻو، قمبرشهدادڪوٽ، جيڪب آباد، شڪارپور ۽ ڪمشور ڪنڌڪوٽ شرڪت ڪئي. ان موقعي تي ڊپٽي ڪمشنرن ۽ ايس ايس پيز پنهنجن پنهنجن ضلعن ۾ ڪيل انتظامن بابت صوبائي وزير کي بريفنگ ڏني ۽ محرم الحرام دوران ڪيل انتظامن جو جائزو ورتو ويو. ان موقعي تي صوبائي وزير، ايس ايس پيز کي هدايتون ڏنيون ته هو پنهنجن پنهنجن ضلعن اندر گشت کي وڌائن ۽ شرپسند عناصرن تي ڪڙي نظررکي وڃي، انهي سان گڏوگڏ ٽريفڪ جي نظام کي پڻ بهتر بڻايو وڃي ته جيئن محرم الحرام دوران عزادارن جي جلوسن کي ڪنهن به قسم جي تڪليف درپيش نه اچي ۽ جلوسن سان پوليس جي نفري جي موجودگي کي يقيني بڻايو وڃي. جڏهن ته امام بارگاهن، مجلس گاهن، مدرسن، مسجدن ۽ ٻين هنڌن تي سڪيورٽي جا انتظام سخت ڪيا وڃن. شهر جي داخلي ۽ خارجي رستن تي پڻ سڪيورٽي کي سخت ڪيووڃي. جڏهن ته سي سي ٽي وي ڪيمرائن جي ذريعي جلسن، جلوسن وغيره جي نگراني ڪئي وڃي، واڪ ٿرو گيٽس لڳايا وڃن ۽ حساس هنڌن جي وڌيڪ نگراني ڪئي وڃي. ان موقعي تي ضلعي جي ڊپٽي ڪمشنرن کي هدايت ڪئي ته هو صفائي سٿرائي، ڊرينيج ۽ لائيٽنگ کي يقيني بڻائن ۽ محرم الحرام دوران لوڊشيڊنگ کان پاسو ڪيو وڃي، اسپتالن ۾ ڊاڪٽرن توڙي دوائن جي موجودگي کي يقيني بڻايو وڃي ۽ ايمبولينس کي تيار رکيو وڃي. هن چيو ته پوليس سان گڏ رينجرس جا جوان به پنهنجون خدمتون سر انجام ڏيندا. هن چيو ته محرم الحرام دوران ڀائيچاري، محبت ۽ امن امان جي فضا کي قائم رکيو وڃي، انهي سان گڏوگڏ ضلعن ۾ ڪنٽرول روم قائم ڪيا وڃن ته جيئن ڪو به اڻوڻندڙ واقعو پيش نه اچي.

 

مالڪ بلوچ جي شهباز شريف سان ملاقات، صوبائي ڀائيچاري ۽ ملڪي صورتحال تي ڳالهيون

لاهور (م.ڊ) بلوچستان جي وڏي وزير ڊاڪٽر عبدالمالڪ بلوچ لاهور ۾ پنجاب جي وڏي وزير ميان شهباز شريف سان ملاقات ڪئي. جنهن دوران گڏيل دلچسپي جي معاملن، صوبائي ڀائيچاري ۽ ملڪ جي سياسي توڙي سيڪيورٽي واري صورتحال تي خيالن جي ڏي وٺ ڪئي وئي. ان موقعي تي شهباز شريف جو چوڻ هو ته اسان سڀني کي گڏجي اڳتي وڌڻو آهي، جنهن لاءِ صوبن وچ ۾ ڀا؟يچاري جي ماحول کي وڌيڪ هٿي ڏني پئي وڃي. هن چيو ته اسان پنجاب ۾ تعليمي پروگرامن ۾ ٻين صوبن جي شاگردن کي به شامل ڪيو آهي. پنجاب جي وڏي وزير چيو ته سندس حڪومت جي قدمن سان قومي ايڪي ۽ ڀائيچاري کي هٿي ملندي.