تازيون خبرون

Daily Archives: October 16, 2015

ڪنهن ٻئي انسان مان پنهنجي لاءِ محبت جي توقع رکڻ اجايو آهي: ريکا

ممبئي(شوبز نيوز) بالي ووڊ جي ليجنڊ اداڪاره ريکا محبت تي يقين نٿي رکي. ريکا پنهنجي هڪ تازي ڳالهه ٻولهه ۾ چيو ته سندس نظر ۾ محبت جي تشريح هميشه لاءِ بدلجي چُڪي آهي، تنهن لاءِ هوءَ ٻين جي محبت تي يقين نٿي رکي. هوءَ سمجهي ٿي ته ڪنهن ٻئي انسان مان محبت جي توقع رکڻ اجائي آهي. ريکا جو چوڻ آهي ته جڏهن پنهنجو پاڻ يعني پنهنجي ذات ۾ ايترو ڪجهه ڏيڻ ۽ وٺڻ جو موجود آهي ته پوءِ ڪنهن ٻئي مان اها ڳالهه چاهڻ جي اسان توقع ڇو ڪندا آهيون.

 

اميتاڀ بچن نئين شو ”آج ڪي رات هي زندگي“ جي ميزباني ڪندو

ممبئي (شوبز نيوز) بالي ووڊ جو ليجنڊ اداڪار اميتاڀ بچن ننڍي اسڪرين جي نئين شو ”آج ڪي رات هي زندگي“ جي ميزباني ڪندو. ڀارتي ميڊيا ذريعن موجب اهو شو معاشري لاءِ غير معمولي ماڻهن ۾ رحم دلي جو جذبو اجاگر ڪرڻ لاءِ پيش ڪيو ويندو. شو جي ميزباني اميتاڀ بچن ڪندو جيڪو 18 آڪٽوبر تي اسٽار پلس تان نشر ٿيندو. اميتاڀ جو چوڻ آهي ته کيس خوشي آهي ته هو ان شو ذريعي معاشري ۾ هاڪاري رجحانن کي هٿي وٺرائڻ جو ذريعو بڻجندو. هن چيو ته اسان کي هر روز ناڪاري رجحانن جو منهن ڏسڻُ پوي ٿو، اخبارن ۽ ٽي وي تي به اهڙيون خبرون پڙهڻ ۽ ڏسڻ لاءِ ملن ٿيون.ان جي باوجود به اسان کي ڪجهه سٺا ماڻهو ۽ سٺيون ڳالهيون نظر اچن ٿيون.

 

پاڪ ڀارت ڪرڪيٽ سيريز بابت 8 کان 10 ڏينهن اندر هلندڙ مهيني جي آخر تائين فيصلو ٿي ويندو: پي سي بي چيئرمين

لاهور(اسپورٽس نيوز) پاڪستان ڪرڪيٽ بورڊ جي چيئرمين شهريار خان چيو آهي ته پاڪ ڀارت ڪرڪيٽ سيريز جي باري ۾ فيصلو 8 کان 10 ڏينهن اندر يا هلندڙ مهيني جي آخر تائين ٿي ويندو. قذافي اسٽيڊيم لاهور ۾ دائريڪٽر ميڊيا امجد ڀٽي سان گڏ پريس ڪانفرنس کي خطاب ڪندي پي سي بي جي چيئرمين چيو ته آءِ سي سي جي تازي ٿيل اجلاس ۾ سندس ملاقات ڀارتي ڪرڪيٽ بورڊ بي سي سي آءِ جي سيڪريٽري انوراگ ٺاڪر سان ٿي هئي ۽ آءِ سي سي جي صدر سري نواسن جي مشوري تي مون ڀارتي ڪرڪيٽ بورڊ جي نئين صدر ششناڪ منوهر سان فون تي ڳالهايو هو ته هن ٻڌايو ته ڀارتي بورڊ پاڪستان سان سيريز جي مسئلي کي حل ڪرڻ چاهي ٿو ۽ بي سي سي آءِ جي ڪميٽي جي ايندڙ اجلاس ۾ پاڪ ڀارت سيريز ڪرائڻ جي مسئلي تي بحث ڪيو ويندو ۽ ان بعد هو پنهنجي حڪومت سان ان جي منظوري کان پي سي بي کي آگاهه ڪندو، بي سي سي آءِ جو صدر پاڪ ڀارت سيريز جو خواهشمند آهي ۽ ڀارت جي دوري جي دعوت ڏني آهي، ايندڙ هفتي تائين ڀارت ويندس. پي سي بي چيئرمين چيو ته بي سي سي آءِ جي صدر يقين ڏياريو آهي ته ڀارتي بورڊ پي سي بي سان سٺا ناتا چاهي ٿو ۽ هو پي سي بي جو نقصان ٿيڻ نه ڏيندو، شهريار خان چيو ته پاڪ ڀارت سيريز لاءِ ڀارتي بورڊ پهريان ته ٺپ جواب ڏنو هو پر هاڻي اميد آهي ته ان حوالي سان 8 کان 10 ڏينهن اندر ڀارتي بورڊ جو جواب ملي ويندو اهو ها يا نه ۾ هوندو، جيڪڏهن ڀارتي بورڊ متبادل جاءِ جي تجويز ڏني ته ان کي پي سي بي گورننگ بورڊ ۾ آندو ويندو، آءِ سي سي جي اجلاس دوران پاڪستان ۾ انٽرنيشنل ڪرڪيٽ جي بحالي لاءِ ٺاهيل ٽاسڪ فورس جي سربراهه جائز ڪلارڪ به چيو آهي ته هو پاڻ پاڪ ڀارت سيريز ڪرائڻ لاءِ پنهنجو اثر رسوخ استعمال ڪندو، شهريار خان چيو ته زمبابوي جي ٽيم ۽ بنگلاديش جي عورتاڻين ٽيمن جا پاڪستان جا دورا آءِ سي سي کي ڏسڻ گهرجن، پي سي بي چيئرمين چيو ته پي ايس ايل ۾ هاڻي تائين دنيا جي 152 رانديگرن کيڏڻ جي خواهش ظاهر ڪئي آهي.

 

رگبي ورلڊ ڪپ جي ڪوارٽر فائنل مرحلي جي شروعات سڀاڻي ٿيندي

لنڊن (اسپورٽس نيوز) اٺين رگبي ورلڊ ڪپ جو ڪوارٽر فائنل مرحلو (سڀاڻي) ڇنڇر کان شروع ٿيندو، ميگا ايونٽ جو لاشٽ ايٽ مرحلو 17 آڪٽوبر کان شروع ٿيندو، انگلينڊ ۾ جاري ميگا ايونٽ پڄاڻي جي آخري مرحلي ۾ آهي ۽ ٽاپ 8 ٽيمن بهترين ڪارڪردگي کان پوءِ ڪوارٽر فائنل ۾ جاءِ ٺاهي ورتي آهي، جن ۾ دفاعي چيمپين نيوزيلينڊ، ڏکڻ آفريقا، ويلز، فرانس، آئرلينڊ، ارجنٽائن، اسڪاٽ لينڊ ۽ آسٽريليا شامل آهن، ايونٽ جو ڪوارٽر فائنل 17 ۽ 18 آڪٽوبر تي کيڏي ويندو.

 

ڪڪرا ڪربلا جا………..شهيدن جي سوڳ ۾ سنڌ جي ايڪتا جو سفر: بيدار جعفري

سنڌ واسين جو سلام پهچي ڪربلا جي پاڪ ۽ پوتر خاڪ تي جنهن ۾ شامل شهيدن جي خون جي خوشبو سڄي سنسار کي حق ۽ سچ لاءِ سر گهورڻ جي دائمي دعوت ڏئي ٿي. سنڌ جو سادات خاص طور تي اهلبيت رسول صه سان رشتو ئي ته اهڙو آهي جو هن موسم ۾ سڄي سنڌ هڪ عزا خانو بڻجي ويندي آهي. صوفين جي سڳوري سنڌ جو حسن ئي نرالو آهي جو هتان جا سمورا رهواسي سوڳ ۾ مومن ۽ مولائي نظر ايندا آهن. ڀلا ايئن هجي به ڇو نه ! حيدر عه جي غلامن منجهان جڏهن هڪ ننڍڙو مدح خوان سائين شمشيرالحيدري اسان کان موڪلائي رهيو هيو ته سندس ساهه ۽ سرير جو رشتو ناتو تيستائين قائم رهيو جيستائين سندس گهر وارا سيراندي تي سندس مٿي مٿان ناد_علي عه جو ورد پڙهندا رهيا ، پوءِ مولا علي عه جي شهادت جو ڏهاڙو 21 رمضان آيو ۽ ٺيڪ مولا جي شهادت جي وقت يعني پرهه ڦٽي کان پوءِ سندس روح جو پکيئڙو اڏامي ويو، پوءِ دنيا چيو ته واقعي هي ديوانو حيدري هو، تڏهن ئي ته هو چوندو هو ته ”هزارن ۾ حيدري آهيان“ ۽ هاڻي مونکي ياد اچي ويو علي حسن چانڊيو ! جڏهن آئون سندس ڪتب خاني تي نظر ڦيرائيندو هوس ته مونکي سندس هزارن قيمتي ڪتابن ۾ شاهه نجف جو نسخو ” نهج البلاغه “ به نمايان ۽ نروار نظر ايندو هو ۽ جمال نقوي، سبط حسن ،امام علي نازش ۽ سجاد ظهير جيان هي روشن خيال اڳواڻ چوندو هو ته ذوالفقار علي ڀٽي جڏهن ملڪ ۾ ليبر لا پي ٺاهيو ته ان وقت علامه نصير الاجتهادي سندس اڳيان حضرت علي عه جو ڪلام پيش ڪيو هو ۽ پوءِ سڀني کي پورهيت جي پگهر سڪڻ کان اڳ اجرت ادا ڪرڻ وارو فلسفو سمجهه ۾ اچي ويو هو . پر دوستو ! اوهان کي خبر آهي ته هن سال جڏهن علي حسن اسان کان اڻ موڪلايو هليو ويو ته وڇوڙِي جو اهو ڏينهن 15 رمضان يعني امام حسن مجتبيٰ عه جي ولادت جو ڏينهن هو. سنڌ جو عاشق غلام محمد جعفري راڻيپور وارو اسان کان عاشور جي ڏينهن وڇڙي ويو هو. پر خبر اٿو ته ڪامريڊ حيدر بخش جتوئي جنهن سڀ کان پهريائين ” جيئي سنڌ جيئي سنڌ ، جام محبت پيئي سنڌ ………..“جو نعرو هنيو هو ۽ اهو به لکيو هو سنڌ ۾ ڪو به يزيد پليد پيدا نه ٿيندو سو اسان کان ڪهڙي ڏينهن موڪلائي ويو هو ، اهو به هڪ راز آهي………………. سنڌ وارن جي محمد صه ، علي عه ، فاطمه عه ، حسن عه ، حسين عه ۽ انهن عظيم هستين جي نالن سان ڪيتري ته محبت آهي جو اوهان کي اهي نالا سنڌ جي هر گهر ، هر گام ۽ هر گهٽي ۾ نظر ايندا . دور ڀلي ڪهڙو به هجي ، بني اميه ، بني عباس کان وٺي اڄوڪي آمريڪي چرخي توڙي سندس پاليل ڇاڙتن جا ڇيهه هجن پر پوءِ به سنڌ جي وک وک تي اهو ذڪر عام نظر ايندو .سنڌ ۾ شهيدن جي مزارن مٿان هر هنڌ حضرت عباس جو علم پاڪ نظر ايندو آهي . جڏهن جڏهن به سنڌ جو ارڏو عاشق بشير خان قريشي پنهنجي اباڻي ڳوٺ رتيديري ويندي هو ته هو سڀ کان پهريان ئي وڃي جسٽس ديدار حسين شاهه وارن جي قديم ترين وڏي علم پاڪ هيٺ حاضري ڏيند هو، نياز ۽ نوڙت ۾ سندس تڪيو ڪلام هوندو هو” اسان ته سيدن جا غلام آهيون.“ آزادي جي هن سرواڻ جو اهو اشارو ته سائين جي ايم سيد ڏانهن هوندو هو پر جڏهن سائين محبوب علي شاهه ساڻس ڀاڪر پائي بي تحاشا محبت ڪندو هو ته ڪامريڊ بشير سائين کي ڪن ۾ سرٻاٽ ڪندي وينتي ڪندو هو سائين! منهنجو ڪفن ڪربلا مان آڻجو ۽ ٿيو به ائين جو سائين محبوب شاهه جڏهن ڪامريڊ جو غسل علامه اياز قمي کان ڪرايو ته هن سوڳوار سيد اشڪبار اکين سان چيو ها اسين حاضر آهيون ۽ توکي سنڌ جو آخري تحفو اجرڪ ۽ مالڪن جي آخري امانت ڪربلا جو ڪفن ڏيون ٿا ۽ پوءِ سندس قبر ۾ ڪربلا جي مقدس مٽي به رکي وئي ۽ اهائي ته سر زمين آهي جتي شهيدن تلوارن ۽ تيرن جي وسڪاري ۾ آخري سجدا ڏنا هئا.

سنڌ اندرمحرم ۾ سلام جو اندازو به نرالو هوندو آهي. ڀنل اکين سان ٻئي کي سلام ڪندڙ ڪارن ڪپڙن وارو عزادار چوندو ” ياحسين عه “ ۽ سمورا ٻڌنڌڙ جواب ڏيندا ” واليءِ حسين “ !!! ۽ جڏهن ڪنهن به ڪنڊ مان اوچتو اوچتو فضائن کي چيريندڙ آواز ” علي مولا، حيدر مولا “ …….. يا ” يا حسين عه يا حسين عه“ ڪنهن جي ڪنن تائين پهچندو ته اهو ضرور فرش عزا تي پهچي ويندو. امام حسين عه جي بزم سڀني جي لاءِ هر وقت کليل آهي. تڏهن ئي ته مير انيس چيو هو ته:

مهلت جو اجل دي تو غينمت اسي جانو

آماده هو روني پي سعادت اسي جانو

آنسو نڪل آئين تو عبادت اسي جانو

ايذا هو جو محفل مين تو راحت اسي جانو

دربار معليٰ هي ولي ابن ولي ڪا

جاري هي يه سب فيض حسين ابن علي ڪا

 

سنڌ منهنجي سمورين محبتن جو مرڪز آهي. جنت البقيع ، رياض الجنت ، بهشت زهرا عه ، مشهد مقدس ۽ دامن نجف مان هر هڪ مقدس ماڳ جو مان ۽ مرتبو پنهنجي پنهنجي جاءِ تي ڏاڍو مٿڀرو آهي پر جڏهن مونکي سنڌ جي قدم گاهه مولا علي عه ، درگاهه عبدالله شاهه غازي يا ڀلاري ڀٽ ڌڻي جي ڀونءِ جو تصور دل ۽ دماغ ۾ ايندو اهي ته من انهن ماڳن تي وڃڻ لاءِ آتو رهندو آهي پر ان کان وڌيڪ سنڌ واسين جون نسبتون لفظ حسين عه سان آهن. هزاره جتي به آباد ٿين هو سڀ کان پهريائين   زمين جو هڪ ٽڪرو امام حسين عه جي نالي سان مخصوص ڪندا آهن حيدرآباد جو علائقو ” حسين آباد “ به اهڙن ڀاڳ ڀرين ٽڪرن مان آهي جنهن جي نسبت شهيد ڪربلا سان آهي . هر امام بارگاهه جي نسبت به امام حسين عه سان آهي تنهن ڪري سموري عرب ۽ عجم دنيا ۾ امام بارگاهه کي حسينيه چيو ويندو آهي . ڪراچي جو قديم عاشور خانو حسينيه ايرانيان ،ناظم آباد جو امام بارگاهه حسينيه سجاديه وغيرهه ان جو مثال آهن.

ٿر جي مٽي ته ڄڻ ڪربلا جو مثال آهي، هن ڏس ۾ سنڌي لوڪ ادب جي استاد ڊاڪٽر پروفيسر عنايت حسين لغاري ، سائين غلام علي الانا ، ڊاڪٽر شوق يا سيوهڻ ڄائي مرثيه خوان پروفيسر سڪينه سمون ئي ڪجهه ٻڌائي سگهي ٿي پر جڏهن اسان کي ڪربلا جي رڻ ۾ امام حسين عه جا چيل هي لفظ ٻڌڻ ۾ اچن ٿا ته ڇڏيو ته اسان سنڌ وڃون تڏهن دل ۽ دماغ سوچڻ تي مجبور ٿين ٿا ته 61 هجري ۾ ڪهڙي ڳالهه هئي جنهن امام حسين عه کي هند / سنڌ ياد ڏياري هئي. ڪربلا جي قضئي بعد ظالمن جي ظلم کان بچڻ لاءِ سڀ کان وڌيڪ سيد اچي سنڌ ۾ آباد ٿيا ۽ پوءِ ٺٽي مان اسلام ۽ عزاداري جو ڪلچر سڄي هندستان ۾ داخل ٿيو.

سنڌ صوفين جي سر زمين آهي جتي سڀ ماڻهو ايڪتا سان رهن ٿا پر جڏهن رياستي ادارن عالمي قوتن جي اشاري سبب اتر وزيرستان ۽ محسود قبائل کي منظم طريقي سان سنڌ جي سمورن هاءِ ويز ، گذرگاهن ، شاهراهن تي آباد ڪرائي کين اڇي ۽ ڪاري جو مالڪ بڻايو آهي تڏهن کان سنڌ جي وجود لاءِ وڌيڪ خطرا پيدا ٿيا آهن. ڀورو ڀيل واقعي جا پيرا کڻو اهي وڃي يزيدي ٽولي سان ملندا ، جن کي آمريڪا ۽ عرب ملڪ اربين ڊالر ڏئي سنڌ ۾ طاقت ور ۽ انتها پسند قوت بڻائي رهيا آهن. سنڌ ۾ وڌندڙ انتهاپسندي ٻاهران ٻئي اچي ۽ ان ڪڌي ڪرتوت ۾ هتان جا ڪجهه رهبر نما رهزن به شامل آهن، آدم بوءِ آدم بوءِ ڪندڙ طبقا سڀ کان وڌيڪ نقصان امام حسين جي عزاداري کي پهچائڻ گهرن ٿا، انهن کي خبر آهي ته جتي حسينيت جو وجود آهي اتي يزيديت بيهي نه سگهندي.

ٿر جي مٽي سان واڳيل مشهور اديب محمد عثمان ڏيپلائي جو 70 ورهيه اڳ لکيل ڪتابچو ”شهيد ڪربلا“ ۽ 34 سال اڳ لکيل ڪتاب انقلاب ايران منهنجي هٿن ۾ آهن. سندس عظيم قلمي پورهئي جو ذڪر مونکان ممڪن ڪونهي پر دعويٰ سان چوان ٿو ته قيامت جي ڏينهن هي ڏاهو زاد راهه ۾ فقط هي ٻه پورهيا ئي پيش ڪري ته سندس منزلت مٿانهين نظر ايندي. لکي ٿو” پيروان حسين شهادت جو سبق سکن ته يزيدان وقت جي ظلمن کان دنيا کي نجات ڏيارڻ لاءِ سڀ ڪجهه قربان ڪرڻ جو سليقو حاصل ڪري سگهندا“

مبارڪ مائرن کي جن ڄڻيا ٻچڙا خدا ڪارڻ

خدا جي دين ڪارڻ ۽ محمد مصطفيٰ ڪارڻ

عمارت دين بر حق جي دوباره بڻجڻي آهي

شهيدن جو مقدس خون ٿو گهرجي بقا ڪارڻ

سنڌ جا سمورا رهواسي هن سوڳ ۾ شامل آهن، شال امام حسين عه جي امڙ سنڌ واسين مان راضِي رهي. سنڌ جي فضائن ۾ اڄ کان سيد ثابت علي شاهه ڪربلائي سان گڏ صوفي جهامنداس عاشق ، ديوي روپ ڪماري، ڪاڪا آڏواڻي ۽ ٻين انيڪ عزادارن جا مرثيه ، نوحا ، سلام ۽ ٻيا منظوم عقيدت ناما گونجڻ شروع ڪن ٿا.

 

خوراڪ جي کوٽ ۽ سرڪار جي ذميواري: محمد علي نقرچ

انسان کي زنده رهڻ لاءِ هوا، پاڻي ۽ خوراڪ جي ضرورت پوندي آهي، انهن ٽنهي شين مان ڪا هڪ نه ملي ته انسان گهڻو وقت زنده نه ٿو رهي سگهي، دنيا جي تخليق ۾ جاندار شين جي جيئڻ لاءِ هوا، پاڻي ۽ خوراڪ سميت ٻيا ذريعا پيدا ڪيا ويا جيئين انسان سميت هر جاندار شي ڌرتي تي رهي سگهي، وقت  گذرڻ سان گڏ انساني آبادي ۾ مسلسل اضافو ٿي رهيو آهي، ۽ اهو اڻ کٽ سلسلو اڃا تائين جاري آهي،دنيا ۾ هينئر جتي آبادي ۾ اضافو ٿيو آهي، اتي ان تي ڪنٽرول ڪرڻ لاءِ اپاءَ ورتا پيا وڃن ۽ گڏيل قومن سميت ٻيا ادارا آبادي تي ڪنٽرول لاءِ ڪم ڪري رهيا آهن، جيئين انسانن کي پنهنجو جيون گذارڻ لاءِ گهٽ کان گهٽ ڏکيائيون ٿين،

آبادي وڌڻ سان خاص ڪري پاڻي ۽ خوراڪ جي کوٽ جي مسئلن ڪر کنيو آهي، گلوبل هنگر انڊيڪس 2015ع  موجب دنيا ۾ 80 ڪروڙ ماڻهن کي پوري خوراڪ نه ملي رهي آهي، ۽ اهي خوراڪ جي مسئلن کي منهن ڏئي رهيا آهن، انٽرنيشنل فوڊ پاليسي ريسرچ انسٽيٽيوٽ، جنسرن ورلڊ وائيڊ ۽ اور ويلٿ هنگر الف جي تيار ڪيل رپورٽ ۾ چيو ويو آهي ته دنيا ۾ هٿياربند ويڙهاند سبب دنيا ۾ 80 ڪروڙ ماڻهن خوراڪ جي مسئلن کي منهن ڏئي رهيا آهن، جن مان دنيا جا 25 ملڪ اهڙا آهن، جتي هٿيار بند ويڙهه سبب خوراڪ جي صورتحال پريشاني واري يا ڳڻتي جوڳي آهي ۽  8 ملڪ اهڙا آهن، جتي صورتحال انتهائي خوفناڪ آهي، جن ۾ سينٽر آفريڪن ريپبلڪ 9 .46 پوائنٽ سان پهرين نمبر تي آهي، جتي خوراڪ جي صورتحال ڳڻتي واري آهي، لسٽ ۾ پاڪستان 11 هين ڀارت 25 هين نمبر تي آهن،

افغانستان، ڏکڻ  سوڊان، ڪانگو ۽ شام اهڙا ملڪ  آهن، جتان جو عوام خوراڪ جي کوٽ واري خوفناڪ صورتحال کي منهن ڏيئي رهيو آهي. پاڪستان ۾ 2015 ع  جي مقابلي ۾ کاڌ خوراڪ جي صورتحال ۾ 4.4 بهتري آئي آهي، پر پاڪستان جي مقابلي ۾ ڀارت خوراڪ جي صورتحال تي وڌيڪ بهتر ڪم ڪندي 5 .9 پوائنٽو بهتري آندي آهي، دنيا ۾ 2030 ع  تائين خوراڪ جي کوٽ کي ختم ڪرڻ واري عزم تي ڪم ڪيو پيو وڃي، ان حوالي سان ڪنسرت ورلڊ وائيڊ جي  چيف ايگزيڪيٽو  ڊومنڪ ميڪسورلي جو چوڻ آهي ته تڪراري ترقي کي پوئتي ڌڪي ڇڏي ٿو، امن کان سواءِ مفلسي ۽ خوراڪ جي کوٽ کي       2030ع    تائين ختم ڪرڻ ۾ ڪاميابي حاصل نه ڪري سگهجي. ان ڪري وقت اچي ويو آهي ته عالمي برادري تڪراري ٿيڻ کان روڪڻ لاءِ قدم کڻي ۽ مسئلن جي حل کي اولين ترجيح ڏني،

خوراڪ بابت 2015 ع جي رپورٽ تي نظر وجهجي ته اهو واقعي نظر ٿو اچي ته گڏيل قومن دنيا مان خوراڪ جي کوٽ لاءِ جيڪو پلان تيار ڪري ڪم شروع ڪيو، ان ۾ پري پري تائين ڪاميابي نظر نه ٿي اچي، ڇاڪاڻ ته دنيا ۾ هٿيار بند ويڙهه ۽ تڪرار وڌڻ بدران ڏينهون ڏينهن وڌي سگهجي ٿو ڇاڪاڻ ته گڏيل قومن جو اهم عزم ۽ ڪم آهي ته اها دنيا ۾ تڪرارن کي ختم ڪرائي ۽ امن ۽ ترقي جو ماحول پيدا ڪري،ان کانسواءِ گڏيل قومن جي اها به ذميواري آهي ته اها ميمبر ملڪن سان گڏجي 2030  ع ۾ خوراڪ جي کوٽ کي ختم ڪرڻ واري عزم تي عمل ڪري ان ڳالهه کي يقيني بڻائي ته مقرر وقت ۾ خوراڪ جي کوٽ کي منهن ڏيندڙ ملڪن جي سپورٽ ڪري ۽ اتان جي عوام کي بک ۽ ڏک جي صورتحال مان ٻاهر ڪري، پاڪستان به دنيا جي انهن ملڪن ۾ شامل آهي جتي خوراڪ جي کوٽ آهي، ملڪ جو عوام خوراڪ جي کوٽ، بدامني، بي چيني، مستحڪم معاشي پاليسيون نه هجڻ، روزگار سميت ٻين مسئلن کي گڏيل طور منهن ڏئي رهيو آهي،

گوبل هنگر انڊيڪس جي  رپورٽ موجب پاڪستان به بک ۽ بدحالي جو شڪار ملڪن جي لسٽ ۾ شامل  آهي، ۽ اهو 11 هين پوزيشن تي آهي، يقينن  اها صورتحال هڪ سرسبز ۽ زرعي ملڪ لاءِ ڳڻتي واري آهي، پاڪستان جو عوام دهشت گردي کي منهن ڏيڻ سان گڏ دهشتگردي کان وڌيڪ خطرناڪ مسئلن  خوراڪ ۽ پاڻي جي کوٽ واري مسئلن جي منهن ۾ ڌڪجي رهيو آهي، اها صورتحال خطرناڪ کان خطرناڪ ٿيندي پئي وڃي، ان صورتحال کان پاڪستان جا حڪمران ڀلي ڀت واقف به آهن،

ڇاڪاڻ ته پاڪستان گڏيل قومن ۾ 2030 ع تائين دنيا مان خوراڪ جي کوٽ کي ختم ڪرڻ واري منصوبي ۾ شامل آهي، ان باوجود حڪمران خوراڪ جي کوٽ کي ختم ڪرڻ لاءِ جامع پاليسي  جوڙڻ ۾ ناڪام ويا آهن،  حڪمرانن پاران خوراڪ ۽ معيشت بابت جامع منصوبا نه جوڙڻ ۽ عمل نه ڪرڻ سان دهشت گردي ۽ بد امني ۾ واڌ سان گڏ خوراڪ جي کوٽ به ڏينهون ڏينهن وڌي رهي آهي، غريب عوام به ٻه ويلا ماني لاءِ ڳڻتي جوڳي صورتحال ۾ پهچي رهيو آهي.

پاڪستان ۾ سنڌ، بلوچستان، خيبر پختونخواه توڙي پنجاب بدامني، دهشتگردي، پاڻي، خوراڪ ۽ ٻين مسئلن کي منهن ڏئي رهيا آهن، خاص ڪري بلوچستان ۾ هٿيار بند ويڙهه ۽ بک چوٽ چڙهيل آهي، سنڌ صوبي ۾ به خوراڪ جي کوٽ سان گڏ آلودگي ۽ پاڻي جو بحران وڌي رهيو آهي، خيبر پختونخواه ۽ پنجاب ۾ به دهشتگردي ، خوراڪ  توڙي ٻيا مسئلا وڌڻ ڪري عوام عذاب کي منهن ڏئي رهيو آهي،

سنڌ صوبو زراعت ۽ معدني وسيلن سان مالا مال هجڻ باوجود بل ۽ بيروزگاري جهڙن مسئلن کي منهن ڏئي پيو، ماحول ۾ تبديلي سان برساتون نه پوڻ ۽ ڏڪار واري صورتحال ٿر ڪاڇي توڙي ٻين علائقن ۾ ٻارڙن توڙي ٻڍن جو جانيون کسيون، ان باوجود اڃا تائين سنڌ حڪومت توري وفاق ان صورتحال کي منهن ڏيڻ لاءِ ڪابه جامع حڪمت عملي نه جوڙي آهي. جيڪڏهن پاڪستان جي حڪمرانن دهشتگردي خلاف آپريشن وانگر خوراڪ، پاڻي ماحوليات جي مسئلن کي اولين ترجيح نه ڏني  ته خوراڪ جي کوٽ جي صورتحال ڳڻتي جوڳي ٿيڻ سان  گڏ هٿن  مان نڪري ويندي صورتحال هٿن مان نڪرڻ کان اڳ ئي حڪمرانن کي عوام جي حال تي رحم ڪري، انهن جي جيئڻ لاءِ قدم کڻڻ  گهرجن، ڇاڪاڻ ته عوام کان ووٽ وٺندڙ حڪمران عوام جي فلاح بهبود  ۽ ان  جي زندگي جي بنيادي شين آبهوا، پاڻي، خوراڪ جهڙن مسئلن کي حل ڪرڻ لاءِ ذميوار آهي.

 

دنيا ۾ خوراڪ جي کوٽ

انڊيڪس مطابق سڀ کان وڌيڪ خراب صورتحال جنگ متاثر مُلڪ سينٽرل آفريقن ريپبلڪن جي آهي، جيڪو سروي ڪيل 117 ملڪن جي فهرست ۾ پهرين نمبر تي آهي، ٻئي نمبر تي چاڊ ۽ ٽئين نمبر تي زيمبيا آهن. جڏهن ته ڏکڻ ايشيا ۾ پهرين نمبر تي افغانستان ۽ ٻئي نمبر تي پاڪستان اهڙا مُلڪ قرار ڏنا ويا آهن، جتي ماڻهو خوراڪ جي کوٽ کي مُنهن ڏئي رهيا آهن. واضح رهي ته هيءَ فهرست ڪنهن به مُلڪ جي ٽن عنصرن جي سراسري ڳڻپ، آبادي ۾ خوراڪ جي کوٽ، پنج ورهين جي ٻارن ۾ وزن جي گهٽتائي ۽ پنج سال کان گهٽ عمر وارن ٻارن جي موت جي شرح تحت ڪئي ويندي آهي. خبر ناهي اِها انڊيڪس اسان جي حڪمرانن جي نظر مان گذري به آهي الائي نه؟ ۽ جيڪڏهن گذري آهي ته اُها انڊيڪس سندن نراڙ تي پريشانيءَ جي گُهنجن جو سبب بڻجي سگهي به آهي الائي نه! پر هڪ اهڙي مُلڪ لاءِ اِها رپورٽ انتهائي ڳڻتيءَ جو باعث آهي، جيڪو آڱرين تي ڳڻڻ جيترن دُنيا جي طاقتور مُلڪن ۾ شامل ٿئي ٿو. اُهو خوراڪ جي کوٽ وارن 117 مُلڪن جي فهرست ۾ يارهين نمبر تي آهي، جڏهن ته اُن جي مقابلي ۾ پنجوڻ ڀيرا وڌيڪ آبادي رکندڙ ڀارت جي صورتحال گهڻي بهتر آهي ۽ اُهو 25 نمبر تي آهي. عام تاثر اِهوئي هو ته جهوپڙ پٽي ۽ فٽ پاٿ وارو سماجي ڍانچو رکندڙ هندستان ۾ وڌيڪ بُک ۽ غربت آهي پر هاڻوڪي انڊيڪس ٻُڌائي ٿي ته ڀارت ۾ بُک ۽ بدحالي جي صورتحال اهڙي ناهي جهڙي پاڻ واري مُلڪ جي آهي. انهيءَ بُک ۽ بدحاليءَ جو ڪارڻ توڻي جو دهشتگردي ۽ انتهاپسنديءَ کي قرار ڏنو پيو وڃي، پر هن مُلڪ ۾ انهي کان علاوه به ڪيترائي اهڙا ڪارڻ آهن جيڪي غربت جي شرح ۾ اضافي جو سبب بڻجي رهيا آهن. جيڪڏهن حقيقت جي نگاهه سان ڏسبو ته مُلڪ جي وجود کان اڄ تائين اسين پاڻ ۾ جمهوري رويا به پيدا ناهيون ڪري سگهيا. اڄ به اسان جي سياست تي سرمائيدار ۽ جاگيردار جو قبضو آهي، جنهن سدائين پنهنجي مخصوص مفادن کي اهميت ڏني آهي. اُن کي انهيءَ ڳالهه سان ڪڏهن به سروڪار ناهي رهيو ته ڪو ملڪ جي وڏي آبادي خوراڪ جهڙي بنيادي حق کان محروم آهي. اُن سرمائيدار ۽ جاگيردار انهيءَ ڳالهه جي پڻ ضرورت محسوس ناهي ڪئي ته ڪو سندن علائقا صحت جهڙين بنيادي سهولتن کان محروم آهن، نه ئي وري انهن ڪڏهن تعليم جهڙي روشنيءَ کي اهميت ڏني آهي، بلڪه انهن جي مفاد ۾ اِهو ئي آهي ته هتي جو ماڻهو غربت جي چڪيءَ ۾ پيسجندو رهي، بيماريون سندن صلاحيتن کي نپوڙي ناس ڪن ۽ ٻاٽ واري سماج ۾ جيئندي اُهي پڇاڻي يا سوال ڪرڻ واري شعور کان وانجهيل هجن. انهيءَ فارمولي تي حڪمران هجي يا مخالف ڌر اُنهي ساڳي روش رکي آهي. نتيجي ۾ هتي جي زندگي مسئلن جي ڌٻڻ بڻجي وئي آهي. اهڙي صورتحال ۾ افسوس وري اُنهن عقل جي انڌن تي ٿئي ٿو، جيڪي سڄاڻ هجڻ جون دعوائون ڪندا رهن ٿا. جيڪڏهن اُنهن سڄاڻ ڌرين توڙي شخصن کي ذرو به احساس هجي ها ته گلوبل هنگر انڊيڪس پڌري ٿيڻ کانپوءِ هتي رڻ ٻريل هجي ها، جو خوراڪ انسان جو سڀ کان بنيادي حق آهي، جيڪي ڌريون انهيءَ محروميءَ تي اکيون بند ڪيو ويٺيون آهن، اُهي آخر ٻيا ڪهڙا اُجالا آڻي سگهنديون. اهڙي ذميواريءَ کان اسين قومي ميڊيا کي پڻ آجو قرار نه ٿا ڏئي سگهون، جيڪا ڪنهن هڪ حلقي جي ضمني چونڊ وقت ته پل پل جي خبر ڏئي ٿي، پر هن هيڏي وڏي مسئلي تي آيل رپورٽ کي فقط ڪجهه سيڪنڊن ۾ گذاريو، محسوس ڪرائين ٿا ته اُنهن پنهنجا فرض پورا ڪري ورتا آهن! ۽ ائين جيڪڏهن ڏسنداسين ته سماج جو هر ذميوار فرد توڙي ادارو انهيءَ اهم مسئلي کان ڪن لاٽار ڪندي نظر ايندو. توڻي جو اِها ڳالهه هر عام توڙي خاص چڱيءَ پر ڄاڻي ٿو ته غربت هر برائيءَ جي ماءُ هوندي آهي، باوجود اُن جي انهيءَ اهم مسئلي تي ڪو ڌيان ڌرڻ لاءِ تيار ناهي.