تازيون خبرون

Daily Archives: October 14, 2015

ڪراچي ۾ جهوپڙين مٿان مٽي جي ڇپ ڪرڻ سبب 7 ٻارڙن سميت 13 ڄڻا دٻجي فوت

ڪراچي (اسٽاف رپورٽر) ڪراچي جي علائقي گلستان جوهر ۾ جهوپڙين تي مٽيءَ جـِي ڇِپ ڪِرڻ سبب بهاولپور ۽ ملتان واسي ٽن عورتن ۽ 7 ٻارن سميت 13 ڄڻا دٻجي فوت ٿي ويا، جن جا مڙهه اڄ اباڻن علائقن ڏانهن روانا ڪيا ويا، جڏهن ته ڪمشنر جاچ ڪميٽي قائم ڪري ورتي آهي. گلستان جوهر جـَي بلاڪ نمبر هڪ ۾ خالي پيل پلاٽ تي قائم جهوپڙين تي رات دير سان ڀرسان واري ٽڪريءَ تان مٽي جـِي ڇپ ڪري پئي. مٽيءَ جِي ڇپ ڪرڻ سبب 25 ورهين جو غلام فريد، سندس گهرواري ريحانا، 12 ورهين جي مائرا، 5 ورهين جي مقدس، 3 ورهين جي صدف،2 ورهين جو محمد احمد ۽ 4 مهينن جي ظاهرا ٿڏي تي دٻجي فوت ٿي ويا. حادثي سبب فوت ٿيلن ۾ 50 ورهين جو محمد ايوب، 45 ورهين جِي سندس گهرواري نسرين، 26 ورهين جو خورشيد، 20ورهين جي سندس گهرواري فاطمه، سندن 2 پٽ آزان ۽ ايان عباس پڻ شامل آهن. رينجرز، پوليس ۽ امدادي ٽيمن پهچي فوتين جا لاش ملبي هيٺان ڪڍي ايڌي جَي سردخاني منتقل ڪيا. حادثي ۾ فوت ٿيل 8 ڄڻن جو تعلق پنجاب جَي شهر بهاولپور ۽ 5 جو تعلق ملتان سان ٻڌايو پيو وڃي، جن جا لاش ضروري ڪارروائي بعد اڄ اباڻن علائقن ڏانهن اماڻيا ويندا. ايس ايس پي اوڀر جاويد جسڪاڻي ميڊيا کي ٻڌايو ته ظاهري طور واقعو قدرتي آفت لڳي رهيو آهي، پر دهشتگردي جي عنصر به نظرانداز نٿو ڪري سگهجي. هـُن چيو ته واقعي واري هنڌ تان شاهديون هٿ ڪيون ويون آهن، جن جي روشني ۾ جاچ پڻ شروع ڪئي وئي آهي. جاويد جسڪاڻي چيو ته جهوپڙين واري پلاٽن جا 2 دعويدار سامهون آيا آهن، جن ۾ هڪ ڊي ايس پي ۽ ٻيو عام شهري شامل آهي. ايس ايس پي اوڀر، شڪ ڏيکاريو ته گهڻو ڪري زمين چائنا ڪٽنگ اچي ٿي پر جاچ کان اڳ حتمي طور ڪجهه به نٿو چئي سگهجي. ٻئي طرف وزيراعظم ميان نواز شريف، سنڌ جي گورنر ڊاڪٽر عشرت العباد، آغا سراج دراني، ناصر شاهه ۽ شهباز شريف واقعي تي ڏک جو اظهار ڪيو آهي. وزيراعظم، لاڳاپيل اختيارين کي هدايت ڪئي آهي ته واقعي ۾ حياتيون وڃائيندڙن جَي وارثن جِي هر ممڪن مدد ڪئي وڃي. هوڏانهن ڪراچي جي ڪمشنر شعيب صديقي مٽي جي ڇپ ڪِرڻ واري واقعي جي جاچ لاءِ انڪوائري ڪميٽي جوڙي ڇڏي آهي. ڊپٽي ڪمشنر آصف جان صديقي ڪميٽي جو سربراهه هوندو، جڏهن ته ڪميٽي ۾ ايس ايس پي ايسٽ، ڊائريڪٽر لينڊ ۽ ميونسپل سروسز جو ڊائريڪٽر شامل آهن. ڪميٽي واقعي جو مختلف رُخن کان جائزو وٺڻ بعد سڀاڻي شام تائين ڪمشنر کي رپورٽ پيش ڪندي.

 

وفاقي حڪومت ڪالاباغ ڊيم ٺاهڻ لاءِ هلندڙ ڪوششن جي باضابطا طور تصديق ڪري ڇڏي

اسلام آباد (بيورو) مسلم ليگ نون مئل گهوڙي ڪالاباغ ڊيم کي ٻيهر جيئارڻ جــِي ڪوشش ڪئي آهي، پاڻي ۽ بجلي جي وزارت، ڪالاباغ ڊيم سميت ستن ڊيمن جي منصوبابندي جاري آهي، ڪالاباغ ڊيم جي تفصيلي ڊزائن ۽ ٽينڊر جا دستاويز 1988ع کان مڪمل آهن. سينيٽ جو اجلاس چيئرمين رضا رباني جي صدارت هيٺ جاري آهي. پاڻي ذخيرن جي منصوبن بابت پاڻي ۽ بجلي واري وزارت پاران لکت ۾ جواب ۾ چيو ويو آهي ته ڪالاباغ ڊيم سميت 7 ڊيمن جي منصوبابندي ڪئي پئي وڃي. جواب ۾ چيو ويو ته ڪالاباغ ڊيم جي تفصيلي ڊزائن ۽ ٽينڊر دستاويز 1988ع کان مڪمل آهن جڏهن ته منصوبي تي عملدرآمد حڪومت جي فيصلي کانپوءِ ئي ٿيندو. پاڻي ۽ بجلي واري وزارت موجب دراوت، شيوڪ منڊا ڊيم، ٽانڪ، ونڊر، گاورڪ ۽ پاپن ڊيمن جي منصوبابندي جاري آهي. اجلاس دوران مخالف ڌر جي ميمبرن حڪومت پاران منيٰ سانحي جا مڪمل تفصيل ڏيڻ ۾ ناڪامي تي ايوان مان واڪ آئوٽ ڪيو. مذهبي معاملن واري وزير سردار يوسف چيو ته منيٰ سانحي ۾ 99 پاڪستاني شهيد ٿيا آهن. سردار يوسف چيو ته سعودي اختيارين طرفان 70 حاجين جي تصديق ڪري سندن تدفين ڪئي وئي جڏهن ته ڪجهه ماڻهو اهڙا آهن جن جي وارثن سندن شهادت جي تصديق ڪئي. اجلاس دوران پ پ سينيٽر سسئي پليجي ٺٽي ضلعي جي ڳوٺن مان 50 ٽرانسفارمر لاهڻ تي ڌيان ڇڪايو نوٽيس پيش ڪيو. سسئي پليجو چيو ته ٽرانسفارمر لاهڻ مڪاني چونڊن کان اڳ سياسي انتظامي ڪارروائي آهي. ان موقعي تي پاڻي ۽ بجلي واري وفاقي وزير خواجا آصف چيو ته ٺٽي جي ڳوٺن مان لاٿل رڳو 19 ٽرانسفارمرز تي 88 لک 41 هزار رهتون آهن. هن چيو ته ٽرانسفارمر لاهڻ جي معاملي جو مڪاني چونڊن سان ڪو تعلق ناهي ۽ نه ئي اها انتقامي ڪارروائي آهي. خواجا آصف چيو ته ڪراچي واٽر بورڊ ۽ واسا حيدرآباد ڏانهن اربين رپيا رهيل آهن، انهن جا ڪنيڪشن ناهن ڪاٽيا. ان موقعي تي سينيٽ چيئرمين رضا رباني چيو ته ننڍن واهپيدارن جو ٽرانسفارمر لاهڻ جي پاليسي تي نظرثاني ڪئي وڃي. اجلاس دوران ناڻي بابت اسٽينڊنگ ڪميٽيءَ اسٽيٽ بينڪ جو ترميمي بل پيش ڪيو، جيڪو اتفاق راءِ سان منظور ڪيو ويو.

 

عوام کي رليف ڏيڻ لاءِ سمورا وسيلا ڪتب آندا وينداۡ: نواز شريف

اسلام آباد (بيورو) وزير اعظم نواز شريف چيو آهي ته ترقياتي منصوبا مقرر وقت تي مڪمل ڪري رٿائن  ۾ شفافيت يقيني بڻائي وڃي، غلفت ڪندڙن کي معاف نه ڪيو ويندو. پي ايم هائوس اسلام آباد ۾ وزير اعظم نواز شريف سان ترقي ۽ رٿابندي واري وفاقي وزير احسن اقبال ملاقات ڪئي. ملاقات ۾ احسن اقبال ترقياتي رٿائن سميت مختلف معاملن تي وزير اعظم نواز شريف کي تفصيلي بريفنگ ڏني. نواز شريف چيو ته ملڪ ۾ ترقياتي رٿائن جو ڄار وڇايو ويو آهي، منصوبن ۾ شفافيت يقيني بڻائڻ حڪومت جي اولين ترجيح آهي. وزير اعظم ترقياتي منصوبا مقرر وقت تي مڪمل ڪرڻ جي هدايت ڪندي چيو ته رٿائن ۾ دير جو سبب بڻجندڙ عملدارن خلاف ڪارروائي ڪئي ويندي. نواز شريف وڌيڪ چيو ته حڪومت ترقياتي منصوبا مقرر وقت تي مڪمل ڪرڻ لاءِ پرعزم آهي، عوام کي رليف ڏيڻ لاءِ سمورا وسيلا ڪتب آندا ويندا.

 

عمران خان چونڊن کان اڳ مولا جٽ ۽ پوءِ يملا جٽ بڻجي ويندو آهي: پرويز رشيد

اسلام آباد (اين اين آءِ) سڌسماءَ جي وفاقي وزير سينيٽر پرويز رشيد چيو آهي ته عمران خان چونڊن کان اڳ مولا جٽ ۽ پوءِ يملا جٽ بڻجي ويندو آهي پاڪستان خطي ۾ امن جو خواهشمند آهي ڀارتي ڏاڍ امن جي رستي ۾ سڀ کان وڏي رنڊڪ آهي ڀارت جي ننڍڙي سوچ مذمت جوڳي آهي ميڊيا سان ڳالهائيندي وفاقي وزير چيو ته ضمني اليڪشن ۾ عمران خان جا الزام ۽ (ن) ليگ جي شفافيت وچ ۾ مقابلو هو اين اي 122 جي چونڊ عمران خان جي الزامن ۽ (ن) ليگ جي موقف جي صداقت وچ ۾ جن ۾ عمران خان ڪوڙو ۽ الزام خان ثابت ٿيو (ن) ليگ جو موقف سچ ثابت ٿيو آهي هن چيو ته ڀارت ۾ غلام علي ۽ خورشيد قصوري سان ننڍڙي سوچ جو مظاهرو ڪيو ويو جنهن جي مذمت ڪيون ٿا.

 

مارچ 2018 تائين بجلي جي لوڊشيڊنگ تي مڪمل طور ضابطو اچي ويندو: اسحاق ڊارجي دعويٰ

اسلام آباد (بيورو) ناڻي واري وفاقي وزير اسحاق ڊار دعويٰ ڪئي آهي ته مارچ 2018 تائين بجلي جي لوڊشيڊنگ تي مڪمل طور ضابطو اچي ويندو، ايف بي آر ۾سڌارا اهم معاملو آهي، ٽئڪس روينيو ۾ شفافيت يقيني بڻائي وڃي. اسلام آباد ۾ ناڻي واري وفاقي وزير اسحاق ڊار جي صدارت هيٺ اهم اجلاس ٿيو، جنهن ۾ ايف بي آر ۾ سڌارن لاءِ ڪميٽي قائم ڪرڻ جي هدايت ڪئي وئي. اسحاق ڊار چيو ته ايف بي آر ۾سڌارا اهم معاملو آهي، جڏهن ته ٽئڪس روينيو ۾ شفافيت يقيني بڻائي وڃي. هن چيو ته ايف بي آر جي اهم مئسلن تي ڌيان ڏنو وڃي، نظام ۾ بهتري لاءِ ٻين ملڪ جي تجربن مان فائدو وٺڻ گهرجي، جڏهن ته روينيو ۾ واڌ ۽ ٽئڪس باقيدارن کي سهولت ڏيڻ حڪومت جي اولين ترجيح آهي. ٻئي پاسي تقريب کي خطاب ڪندي اسحاق ڊار دعويٰ ڪئي ته توانائي شعبن ۾ تيزي سان ڪم  جاري آهي، مارچ 2018ع تائين بجلي جي لوڊشيڊنگ تي ضابطو اچي ويندو. اسحاق ڊار وڌيڪ چيو ته مخالف ترقياتي منصوبن تي تنقيد بدران هاڪاري سياست ڪن، حڪومت بجلي بحران جي حل لاءِ سنجيدگي سان ڪم ڪري رهي آهي.

 

سنڌ ڪابينا پاران گودامن ۾ پيل ڪڻڪ کي فوري طور وڌ کان وڌ لوڪل مارڪيٽن ۾ وڪرو ڪرڻ جو فيصلو

ڪراچي (اسٽاف رپورٽر) سنڌ جي وڏي وزير سيد قائم علي شاهه، گلستان جوهر واقعي جو نوٽيس وٺندي ڪمشنر ڪراچي ۽ آءِ جي سنڌ پوليس کان رپورٽ طلب ڪري ورتي. ڪراچي جَي علائقي گلستان جوهر ۾ 13 انساني جانيون ضايع ٿيڻ واري واقعي جو وڏي وزير سيد قائم علي شاهه سختيءَ سان نوٽيس ورتو. وڏي وزير، ڪمشنر ڪراچي شعيب صديقي کي هدايت ڪئي ته واقعي جي جاچ ڪري رپورٽ پيش ڪئي وڃي. سيد قائم علي شاهه، آءِ جي سنڌ پوليس غلام حيدر جمالي کي به واقعي جي جاچ ڪري رپورٽ پيش ڪرڻ جي هدايت ڪئي آهي .

 

ڪالا باغ ڊيم منصوبو ننڍن صوبن لاءِ خطرو آهي، 3 صوبا رد ڪري چڪا آهن: خورشيد شاهه

اسلام آباد (بيورو) مخالف ڌر جي اڳواڻ سيد خورشيد شاهه چيو آهي ته وفاقي وزير جي ڪالا باغ ڊيم تي ڏنل بيان بابت کيس حيرت ٿي آهي، ن ليگ ملڪ ۾ نئون تڪرار پيدا ڪرڻ چاهي ٿي، ن ليگ جي خيال ۾ ڪالاباغ ڊيم جي حمايت ۾ کين ووٽ ملندا. ڪالا باغ ڊيم تعمير ڪرڻ واري خواجه آصف جي بيان تي ردعمل ڏيندي مخالف ڌر جي اڳواڻ سيد خورشيد شاه ته تڪراري رٿا بابت وفاقي وزير جي بيان تي حيرت ٿي آهي. هن چيو ته ڪالا باغ ڊيم منصوبو ننڍن صوبن لاءِ خطرو آهي، جنهن کي 3 صوبا رد ڪري چڪا آهن. پ پ اڳواڻ چيو ته ن ليگ ملڪ ۾ نئون تڪرار پيدا ڪرڻ چاهي ٿي، ن ليگ جي خيال ۾ ڪالاباغ ڊيم جي حمايت ڪرڻ سان کين ووٽ ملندا. خورشيد شاهه چيو ته سنڌ ۾ جيڪو ٿئي پيو تنهن تي کين خدشا آهن، ڇا ڪرپشن رڳو سنڌ ۾ ٿئي پئي، ٻٽو معيار هاڻي ختم ٿيڻ گهرجي، پاڪستان کي هلائڻ لاءِ سموريون سياسي پارٽي متحد ٿين.

 

تعليم سان ئي دنيا جي قومن جي چئلينز جو مقابلو ڪري سگهون ٿا: نثاراحمد کهڙو

ڪراچي (اين اين آءِ) دنيا جي قومن جي چئلينجز جو مقابلو ڪرڻ لاءِ شاگرد تعليم سان سرشار ٿي ميدان عمل ۾ اچن ڇو ته تعليم وقت جي اهم ضرورت آهي ۽ تعليم عام ڪرڻ لاءِ عوام ۾ شعور پيدا ڪرڻو پوندو حڪومت به تعليم کي هٿي ڏيڻ لاءِ ترجيحي بنيادن تي ڪم ڪري رهي آهي پر حڪومت سان گڏوگڏ پرائيويٽ تعليمي ادارن جي ذميواري آهي ته هو حڪومت جو ساٿ ڏين اهڙن خيالن جوا ظهار تعليم جي صوبائي وزير نثار کهڙو پرسٽين انسٽيٽيوٽ آف مئنجمينٽ سائنس اينڊ ٽيڪنالوجي جي سالياني ڪانوڪيشن کي خاص مهمان طور خطاب ڪندي ڪيو ان موقعي تي انسٽيٽيوٽ جو چيئرمين منور احمد، ايڊوائيزر عاصم نظير احمد ڊائريڪٽر جنرل محمد احمد جان فئڪلٽي ميمبرن شاگردن جي مٽن مائٽن ۽ شهر جي نيڪ مردن وڏي انگ ۾ شرڪت ڪئي. صوبائي وزير نثار کهڙو چيو ته هاڻي جديد دور ۾ سڄي دنيا ۾ هٿيارن جي ڊوڙ ختم ٿيندي پئي وڇي ڇو ته انهن قومن جديد ٽيڪنالوجي ۽ تعليم ذريعي حڪمراني جو پلان جوڙيو آهي اسان کي به هٿيار نه پر قلم سان ايئن ئي ڪرڻو پوندو ٻي صورت ۾ ايندڙ نسل اسان کي معاف نه ڪندو انلاءِ اسان کي سنجيدگي سان غور ڪري قلم ذريعي پنهنجو پاڻ کي پنهنجي قوم ۽ سوچ کي تبديل ڪرڻو پوندو ڇو ته بک بدحالي بيروزگاري مهانگائي ۽ دهشتگردي جهڙا مسئلا به اسان تعليم ۽ سمجهنداري روشن خيال برداشت ۽ تحمل سان ختم ڪري سگهون ٿا تنهنڪري شاگردن کي گهرجي ته پرسٽين انسٽيٽيوٽ جهڙي تعليمي اداري مان فائدو وٺڻ ۽ والدين ۽ استادن جو احترام ڪن ۽ تعليم کي ئي پنهنجو جهاد جو هٿيار بڻائين ڇو ته علم ئي مضبوط پليٽ فارم ترقي جي ضمانت آهي جنهن جي ذريعي اوهان کي بهترين روزگار جا موقعا پڻ ملندا. انسٽيٽيوٽ جي چيئرمين منور احمد چيو ته شاگرد قوم جي مستقبل جو سرمايو آهن ان لاءِ اسان جيڪا تعليم ڏيئي رهيا آهيون ان سان نئين نسل کي جديد ٽيڪنالوجي سان گڏوگڏ پنهنجن وسيلن مان به چڱي طرح فائدو وٺڻو پوندو ته جيئن ملڪ کي خوشحال بنائڻ لاءِ اهم ڪردار ادا ڪري سگهون. ڊائريڪٽر جنرل محمد احمد جان چيو ته هن وقت قوم کي نت نيئين چئلينجز کي منهن ڏيڻو پئجي رهيو آهي تنهنڪري شاگرد سائنسي ٽيڪنالوجي جي ذريعي ئي قوم جي معاشي نظام کي مستحڪم ۽ مضبوط بڻائي سگهن ٿا آخر ۾ خاص مهمان نٿار احمد کهڙو انسٽيٽيوٽ جي چيئرمين منور احمد ڊائريڪٽر جنرل محمد احمد جان شاگردن ۾ گولڊ ميڊل ۽ ڊگريون ورهايون.

 

3 هفتا اڳ چئي ڇڏيو هو عمران نتيجا تسليم نه ڪندو: سردار اياز صادق

لاهور (بيورو) مسلم ليگ ن جي نئين چونڊيل قومي اسميبلي ميمبرن سردار اياز صادق چيو آهي ته مان 3 هفتا اڳ چئي ڇڏيو هو ته عمران خان نتيجا تسليم نه ڪندو، هي ٻٽو معيار نه آهي جو پي ٽي آءِ کي پي پي 147 مان ڪاميابي ملي ته ٺيڪ آهي، اين اي 122 مان هارائي ته ڌانڌلي ٿي وئي، عمران خان ۽ عليم خان کي گڏ شڪست ڏيڻ سان جماعت اسلامي، عوامي تحريڪ، عوامي مسلم ليگ سميت ان جي حمايت ڪندڙ جماعتن کي به شڪست ڏني، مصرورفيت سبب ضمني چونڊن جو تفيصيلي جائزو نه وٺي سگهيون آهيان، 2002، 2008، 2013 ۽ تازين چونڊن جي نتيجن جو جائزو وٺي ڪوتاهيون دور ڪنداسين، اهڙن خيالن جو اظهار هن فيروز روڊ تي ڳالهائيندي ڪيو، ان موقعي حافظ ميان نعمان ۽ چوڌري اختر رسول به موجود هئا، سردار اياز صادق چيو ته تڪ جو عوام ۽ ڪارڪنن جو دلي ٿورائتو آهيان، جن مون کي ٻيهر چونڊيو ۽ الله تعاليٰ مسلم ليگ ن کي فتح ڏني، ضمني چونڊن جي نتيجي سان 56 هزار ووٽن جي ڌانڌلي جو الزام ختم ٿي ويو آهي، هن چيو ته عمران خان ۽ تحريڪ انصاف جا دوست جيڪڏهن مونکي دوست سمجهن ٿا ته پيغام ڏيڻ چاهيان ٿو ته انا ڇڏي پاڪستان جي ڳالهه ڪريو، جيڪڏهن اسان هڪ ٿي وڃون ته پاڪستان ۾ سيڙپڪار به اچي سگهن ٿا، بجلي گيس جي لوڊشيڊنگ جهڙا مسئل حل ٿي سگهن ٿا، عمران خان کي درخواست آهي ته نوجوانن کي هو تربيت ڏئي جيڪا هو پنهنجن ٻارڙن کي ڏيڻ چاهي ٿو، جنهن ۾ وڏڙن جي عزت ۽ ٻارڙن سان پيار ڪرڻ شامل آهي، منهنجي هن کي اپيل آهي ته اڻوندڙ زبان بند ڪري، اڳواڻن بابت گٿا لفظ ڳالهائڻ مناسب نه آهن.

 

تحريڪ انصاف اين اي 122 ۾ ووٽن جي ٻيهر ڳڻپ لاءِ درخواست جمع ڪرائي ڇڏي

لاهور(بيورو) تحريڪ انصاف لاهور جي تڪ اين اي 122 ۾ پنهنجي اميدوار عليم خان جي مات کانپوءِ تڪ ۾ ووٽن جي ٻيهر ڳڻپ لاءِ درخواست جمع ڪرائي ڇڏي، جڏهن ته اليڪشن ڪميشن کان ووٽر فهرست به گهري ورتي آهي.ذريعن مطابق تحريڪ انصاف جي اڳواڻ عليم خان پارن ووٽن جي ٻيهر ڳڻپ لاءِ درخواست ريٽرننگ آفيسر کي جمع ڪرائي ڇڏي آهي، جنهن ۾ موقف ڏنو ويو آهي ته اين اي 122 جي ننڍين چونڊن ۾ ووٽن جي ڳڻپ تي شڪ آهي، ڇو ته چونڊن ۾ مخالف اميدوار کي گهٽ فرق سان ڪاميابي ملي آهي، ان ڪري ووٽن جي ڳڻپ ٻيهر ڪرائي وڃي،جڏهن ته درخواست ۾ رد ٿيل ووٽ ڏيکارڻ جو مطالبو به ڪيو ويو آهي.ٻئي پاسي تحريڪ انصاف جي اڳوان چوڌري سرور پاران سيڪريٽري اليڪشن ڪميشن بابر يعقوب کي خط لکيو ويو آهي ،جنهن ۾ اين اي 122 جي ووٽرن جي فهرست گهري وئي آهي، جڏهن ته تڪ مان ووٽن جي منتقلي جي معاملي کي به اٿاريو ويو آهي. تحريڪ انصاف جي خط ۾ ننڍين چونڊن جي موقعي تي تڪ مان ووٽن جي  ٻين تڪن ۾ منتقلي تي شڪن جو اظهار ڪيو ويو آهي،جڏهن ته ٻئي ٻين تڪن ۾ موڪليل ووٽن جو رڪارڊ به گهريو ويو آهي. تحريڪ انصاف 2013ع ۽ هاڻوڪين چونڊن ۾ نادرا جي ووٽر فهرستن جو رڪارڊ، 2013ع ۽ 2015ع جي ووٽر فهرستن سان ڀيٽ ٿيل رڪارڊ ۽ 2015ع ۾ اين اي 122 ۾ داخل نون ۽ خارج ٿيل ووٽن جو رڪارڊ به گهريو آهي. چوڌري سرور جو چوڻ آهي ته ووٽر فهرستن جو رڪارڊ تحريڪ انصاف جي ووٽرن جي شڪايت تي گهريو ويو آهي.