تازيون خبرون

Daily Archives: October 3, 2015

عالمي دنيا خطي ۾ مستقبل امن چاهي ٿي ته ڪشمير مسئلو حل ڪرائي: آرمي چيف

لنڊن(مانيٽرنگ ڊيسڪ) چيف آف آرمي جنرل راحيل شريف چيو آهي ته پاڪستان سيڪيورٽي صورتحال، معاشي ترقي لاءِ بهتر ٿي رهيو آهي،ڪشمير اڻپورو ايجنڊا آهي،عالمي برادري حل ڪرڻ ۾ مدد ڪري،پاڪستان افغانستان ۾ مستقل امن لاءِ ڪوششون جاري رکندو.تفصيل مطابق آرمي چيف جنرل راحيل شريف رائل يونائيٽڊ سروسز انسٽيٽوٽ جو دورو ڪيو جتي ٿنڪ ٽينڪ کي خطاب

ڪندي چيو ته سيڪيورٽي صورتحال سٺي ٿيڻ سان پاڪستان معاشي ترقي طرف روان دوان آهي ۽ هاڻي پاڪستان مخالف پروپيگنڊا ختم ٿيڻ کپي.پاڪ فوج سيڪيورٽي صورتحال برقرار رکڻ لاءِ ڪوششوون جاري رکندي.سندس چوڻ هو ته امن لاءِ ڪشمير مسئلي جو حل ضروري آهي ڇو ته سڀئي مسئلا ڪشمير مسئلي سان ڳنڍيل آهن ،عالمي برادري هن کي حل ڪرڻ ۾ مدد ڪري.آرمي چيف چيو ته ڀارت جي  پاڪستان خلاف اڻ سڌي ريت حڪمت عملي جا خطي تي منفي اثر پون ٿا.جنرل راحيل شريف جو وڌيڪ چوڻ هو ته افغانستان سان ڀائرن وارو تعلق ۽ رت جو رشتو آهي،افغانستان ۾ مستقل امن لاءِ امن خراب ڪندڙن تي ڪڙي نظر رکڻي پوندي، جڏهن ته پاڪستان افغانستان ۾ امن لاءِ مدد ڪندو رهندو.

 

ڀارت ڪراچي، بلوچستان ۽ فاٽا ۾دهشتگردن جي مدد  ڪري رهيو آهي: پاڪستان

نيويارڪ (مانيٽرنگ ڊيسڪ) پاڪستان ڀارت جي دهشتگردي ۾ملوث هئڻ جا ثبوت گڏيل قومن کي پيش ڪندي چيو آهي ته ڀارت ڪراچي، بلوچستان ۽ فاٽا ۾دهشتگردن جي مدد  ڪري رهيو آهي، عالمي برادري معاملي کي  حل جوڳو بڻائي خطي ۾ پيدا ٿيل ڇڪتاڻ جي خاتمي ۾پنهنجو ڪردار ادا ڪري. نيو يارڪ ۾گڏيل قومن ۾ پاڪستان جي مستقل سفير مليحه لوڌي ثبوتن تي ٻڌل دستاويز  گڏيل قومن جي سيڪريٽري جنرل بان ڪي مون حوالي ڪيا. مليحه لوڌي جو چوڻ هو ته  بلوچستان، فاٽا ۽ ڪراچي ۾ ٿيندڙ دهشتگردي  ۾ ڀارت ملوث آهي ۽ ڀارت دهشتگردن کي مدد فراهم ڪري رهيو آهي . قومي سلامتي جي صلاحڪار سرتاج عزيز پڻ تصديق ڪندي چيو آهي  ته پاڪستان ڀارت سان متعلق 3 ڊوزيئر گڏيل قومن کي فراهم ڪيا آهن.  نيويارڪ ۾ ميڊيا کي بريفنگ ڏيندي هن چيو ته ڊوزيئر ڊاڪٽر مليحه لوڌي پاڻ گڏيل قومن جي سيڪريٽري جنرل بان ڪي مون حوالي ڪيا.  سرتاج عزيز موجب ڊوزيئر ۾ ڀارتي دهستگردي جا اهي وڊيوز، آڊيوز ٽيپ ۽ لکت ۾ثبوت شامل آهي، جن ۾ ڀارت ڪراچي، بلوچستان ۽ فاٽا ۾ دهشتگردن جي سپورٽ ڪندي نظر اچي رهيو  آهي. سرتاج عزيز چيو ته هاڻي اها ڳالهه ڪنهن کان به ڳجهي ناهي رهي ته ڀارت ڪراچي، بلوچستان ۽ فاٽا ۾دهشتگردن جي مدد  ڪري رهيو آهي، اسان ان حوالي سان دنيا جي 15ملڪن جي پرڏيهي وزيرن کي پڻ ڀارتي جارحيت کان آگاهه ڪري چڪا آهيون. سرتاج عزيز چيو ته ڀارت جنگبندي جي ڀڃڪڙي ڪرڻ سان گڏ پاڪستان ۾رياستي دهشتگردي ڪري رهيو آهي،  هــُو ڳالهيون ڪرڻ چاهيون ٿا پر ڀارت ڳالهين کان ڀڄڻ لاءِ الزام تراشي شروع ڪري ڇڏي آهي.

 

پاڪستان جو 4 نقاطي امن فارمولو هڪ ڀيرو وري رد،دهشتگردي ڇڏيو ۽ ڳالهيون ڪيو: سشما سوراج

نيويارڪ (م.ڊ) ڀارت هڪ ڀيرو وري پاڪستان طرفان گڏيل قومن ۾ پيش ڪيل 4 نقاطي امن فارمولو رد ڪندي دهشتگردي جي خاتمي جو رينگٽ ورجايو آهي. گڏيل قومن جي جنرل اسيمبلي کي خطاب ڪندي ڀارتي پرڏيهي وزير سشما سوراج چيو ته وزيراعظم نواز شريف طرفان امن لاءِ 4 تجويزون پيش ڪيون ويون، پر اسان چئون ٿا ته هڪ ئي تجويز ڪافي آهي، جيڪڏهن ڳالهين سان ڪو حل نڪري ته ڀارت سمورا نبيري جوڳا مسئلا ڳالهين ذريعي حل ڪرڻ لاءِ تيار آهي. هن چيو ته اسان جي هڪ ئي تجويز آهي ته دهشتگردي ڇڏيو ۽ ڳالهيون ڪيو. ڀارتي پرڏيهي وزير چيو ته دهشتگردي کي رياستي پاليسي طور اختيار ڪرڻ قبولڻ جوڳو ناهي ۽ جيڪي ملڪ دهشتگردن کي پناهه ۽ هٿيار ڏين ٿا، انهن خلاف عالمي برادري کي اٿي بيهڻو پوندو. سندس چوڻ هو ته دهشتگردن جو ڪو مذهب ناهي هوندو، انهن ۾ سٺي ۽ خراب جو فرق نه هجڻ گهرجي، هن چيو ته دهشتگردي گهٽ ٿي آهي پر ان کي وڌائيندڙ ملڪن جو مقابلو ناهي ڪيو ويو، عالمي دهشتگردي کي رڳو عالمي ڪارروائي سان ئي ختم ڪري سگهجي ٿو. سشما سوراج چيو ته طاقت جي استعمال سان دنيا ۾ مسئلا وڌي رهيا آهن، ڀارت گذريل 25 سالن کان دهشتگردي کي منهن ڏئي رهيو آهي، جڏهن ته عالمي امن مشن لاءِ ڀارت هن وقت تائين هڪ لک 80 هزار فوجي ڏئي چڪو آهي پر جيڪي ملڪ امن مشن ۾ وڌيڪ فوج ڏين ٿا، انهن  جي ٻڌي ئي نه ٿي وڃي.

 

وڏي وزير قائم علي شاهه ڪي ايم سي کي ڏنل 300 ايڪڙ زمين واپس وٺي ڇڏي

لاهور(م.ڊ) ايم ڪيو ايم جي سربراهه الطاف حسين جو قسم تي ڏنل بيان لاهور هائيڪورٽ ۾ جمع ڪرايو ويو آهي، اهو بيان الطاف حسين جي وڪيل عاصما جهانگير جمع ڪرايو، الطاف حسين قسم تي ڏنل بيان ۾ چيو آهي ته جيڪڏهن منهنجي بيانن سان ڪنهن جي دل ڏکي آهي ته مان معافي ٿو وٺان، منهنجي بيانن کي ٽوڙي مروڙي پيش ڪيو ويو. هن چيو ته عدالت پاران سندس بيانن تي پابندي اظهار جي راءِ واري آزادي جي ڀڃڪڙي آهي، متحده سربراه بيان ۾ چيو ته کيس پاڪستان پنهنجي ساهه کان وڌيڪ پيارو آهي ۽ ملڪ لاءِ غلط ٻولي ڳالهائڻ جو سوچي به نه ٿو سگهان. هن چيو ته آئين، نظام تي تنقيد ڪرڻ جو جيترو حق ڏنو آهي، هو ان مطابق ئي ڳالهائيندو آهي.هوڏانهن نجي ٽي وي چينل جي رپورٽ مطابق الطاف حسين پنهنجي بيانن تي معافي ناهي ورتي پر افسوس جو اظهار ڪيو آهي.

 

هٿرادو بجلي لوڊشيڊنگ ۽ صارفين ڏانهن واڌو بلز موڪلڻ واري رپورٽ جاري ٿيڻ بعد نيپرا ۽ حڪومت ۾ تڪرار تيز پاڻي ۽ بجلي وزاري وزارت غلط بلنگ، ميٽرن جي خرابي ۽ لوڊشيڊنگ بابت رپورٽ تي نيپرا کان انگ اکر گهري ورتا

اسلام آباد (بيورو) هٿرادو بجلي لوڊشيڊنگ ۽ صارفين ڏانهن واڌو بلز موڪلڻ واري رپورٽ جاري ٿيڻ بعد نيپرا ۽ حڪومت ۾ تڪرار تيز ٿي ويو آهي، پاڻي ۽ بجلي واري وزارت، نيپرا کان اها ڊيٽا طلب ڪري ورتي آهي، جنهن جي بنياد تي 70 سيڪڙو ميٽرڪ خراب هئڻ جي دعويٰ ڪئي وئي هئي. نيپرا پاران صارفين ڏانهن 70 سيڪڙو واڌ بل موڪلڻ بابت رپورٽ جاري ڪرڻ بعد پاڻي ۽ بجلي واري وزارت نيپرا ڏانهن خط لکيو آهي. خط ۾ چيو ويو آهي ته سستي ۽ مهانگي بجلي جي يونٽس جو تعين ڪندڙ ٽي او يو ميٽرز بلڪل صحيح نموني سان ڪم ڪري رهيا آهن، نيپرا ڪهڙن بنيادن تي ٽو او يو ميٽرز کي خراب يا پراڻو قرار ڏنو هو.  خط ۾ چيو ويو آهي ته نيپرا ٽائيم آف يوز ميٽرز جا فصيل فراهم ڪرڻ سان گڏ اها ڊيٽا به فراهم  ڪري، جنهن جي بنياد تي بجلي جا ميٽر خراب هئڻ جي دعويٰ ڪئي وئي هئي. پاڻي ۽ بجلي واري وزارت، نيپرا کان ميٽرڪ چيڪ ڪندڙ ٽيم ۽ ان تجربي توڙي مهارت جا تفصيل به طلب ڪري ورتا آهن. پاڻي ۽ بجلي واري وزارت چيو آهي ته نيپرا ٻڌائي ته ٽي او يو ميٽرز جي ڪارڪردگي جاچڻ لاءِ ڪهڙي سمپل سائيز ٺاهي وئي هئي ۽ ڪهڙن علائقن ۾ ميٽر چيڪ ڪيا ويا هئا. واضح رهي ته نيپرا پنهنجي رپورٽ ۾ چيو هو ته ملڪ ۾ بجلي جي لوڊشيڊنگ هٿرادو ڪئي پئي وڃي، نئون ميٽر سسٽم خراب هئڻ سبب صارفين ڏانهن 70 سيڪڙو واڌو بل موڪليا ويندا آهن.

 

لاهور جي تڪ اين اي 122 تي صاف شفاف چونڊون ٿيون ته پيپلز پارٽي ڪاميابي ماڻيندي:بلاول ڀٽو

ڪراچي: پاڪستان پيپلزپارٽي جي چيئرمين بلاول ڀٽو زرداري چيو آهي ته لاهور جي  تڪ اين اي 122 تي ٿيندڙ ننڍي چونڊ ۾ تحريڪ انصاف ۽ نوازليگ جا اميدوارپنهنجي دولت لٽائي رهيا آهن ۽ اهي چونڊ مهم ۾ اليڪشن ڪميشن  پاران خرچن جي مقرر ڪيل حد کان وڌيڪ خرچ ڪري رهيا آهن، جيڪڏهن اليڪشن ڪميشن ان خلاف قدم نه کنيو ته اها ننڍي چونڊ مذاق بڻجي ويندي. ياد رهي ته انهي تڪ تي پاڪستان پيپلزپارٽي جو اميدوار بئريسٽرعامر حسن اڳ ئي اليڪشن ڪميشن کي شڪايت ڪري چڪو آهي ته سندس مخالف اميدوار نوازليگ جو اياز صادق ۽ پي ٽي آئي جو عليم خان پنهنجي چونڊ مهم دوران اليڪشن ڪميشن پاران مقرر ڪيل خرچن جي حد کان ٻيڻو چئوڻو خرچ ڪري رهيا آهن، بلاول ڀٽو زرداري وڌيڪ چيو ته پيپلزپارٽي جي ٻنهي مخالفن انهيءَ ننڍي چونڊ کي ارب پتين جي راند بڻائي ڇڏيو آهي ۽ ووٽرن کي خاموش تماشائي بڻايو ويو آهي،جڏهن ته اهي ارب پتي وڏي پئماني تي دولت لٽائي اها اليڪشن چوري ڪرڻ جي ڪوشش ڪري رهيا آهن. پيپلزپارٽي جي چيئرمين چيو ته پارٽي صاف طريقي جي اهڙي ڌانڌلي جي اجازت نه ڏيندي جنهن ۾ ناجائز طور حاصل ڪيل ناڻو استعمال ڪري ووٽرن کي متوجا ڪيو پيو وڃي، ڇاڪاڻ ته پاڪستان پيپلزپارٽي ئي ملڪ ۾ هڪ فرد- هڪ ووٽ جي پاليسي متعارف ڪرائي هئي. بلاول ڀٽو چيو ته اليڪشن ڪميشن جي ذميواري هئي ته اها نه رڳو نواز ليگ ۽ پي ٽي آئي جي اميدوارن جي اهڙن خرچن کي روڪي ها پر انهن خلاف اليڪشن جي ضابطا اخلاق تحت ڪارروائي ڪري ها ته جيئن انهي رجحان کي روڪي سگھجي ۽ سڀني اميدوارن کي مقرر ڪيل حد تائين خرچ ڪرڻ جو پابند بڻايو وڃي ها. بلاول ڀٽو زرداري چيو ته لاهور پاڪستان پيپلزپارٽي جي جنم جو شهر آهي جيڪڏهن اليڪشن ڪميشن ناڻو استعمال ٿيڻ کي روڪي انهي تڪ تي صاف ۽ شفاف چونڊون ڪرائڻ جون پنهنجون ذميواريون پوريون ڪيون ته پاڪستان پيپلزپارٽي جي اميدوار بئريسٽر عامر حسن ضرور ڪامياب ٿيندو.

 

ڀارت پاران والاريل ڪشمير تي قبضي کان انڪار تاريخ سان مذاق آهي: پرڏيهي ترجمان

اسلام آباد (بيورو) پرڏيهي ترجمان چيو آهي ته ڀارت پاران والاريل ڪشمير تي قبضي کان انڪار تاريخ سان مذاق آهي، ڪشميرين جي اخلاقي ۽ سفارتي حمايت جاري رکي ويندي. ڀارتي پرڏيهي وزير سشما سوراج جي جي پريس ڪانفرنس تي رد عمل ظاهر ڪندي پرڏيهي ترجمان قاضي خليل الله چيو ته ڀارت جو والاريل ڪشمير تي زبردستي قبضو آهي، هندوستاني فوج جي فائرنگ ۾ هڪ لک کان وڌيڪ  بيگناهه ڪشميري شهيد ٿي چڪا آهن. هن چيو ته ڀارت جي 7 لک کان وڌيڪ فوج والاريل ڪشمير ۾ موجود آهي،  ڀارت پاران والاريل ڪشمير تي قبضي کان انڪار ڪرڻ تاريخ سان مذاق آهي. پرڏيهي ترجمان چيو ته دنيا کي ڄاڻ آهي ته ڪشميرين تي ظلم ڪير پيو ڪري، ڪشميري پنهنجي حقن لاءِ جدوجهد ڪري رهيا آهن، اتان جي عوام جي اخلاقي ۽ سفارتي حمايت جاري رکي ويندي.

 

اڳوڻي صدر آمريڪي صحافي جي بيان کي ڪوڙو قرار ڏئي رد ڪري ڇڏيو، مارڪ سيگل سچو آهي ته بينظير ڀٽو جي ڪتاب ۾ هن ان سچائي جو ذڪر ڇو ناهي ڪيو؟: پرويز مشرف

اسلام آباد (بيورو) آل پاڪستان مسلم ليگ جي چيئرمين ۽ اڳوڻي صدر پرويز مشرف آمريڪي

صحا في مارڪ سيگل جي بيان کي رد ڪند ي چيو آهي ته اسندس بيان حقيقتن جي ابتڙ رڳو ڪوڙ تي ٻڌل مواد آهي، بيان تي حيرت ٿي، مارڪ سيگل جيڪڏهن سچو آهي ته هن پنهنجي ايڊيٽرشپ ۾ شايع ٿيل بينظير ڀٽو جي ڪتاب ۾ ان سچائي جو ذڪر ڇو نه ڪيو؟ جيڪڏ هن بينظير ڀٽو کي مون کان خطرو هو ته هن مون کان سيڪيورٽي ڇو گهري هئي؟ مخالف مارڪ سيگل جي بيان کي پاڪستان خلاف استعمال ڪرڻ چاهين ٿا، ان بيان جي جيتري به مذمت ڪئي وڃي، اها گهٽ آهي، پارٽي جي مرڪزي سيڪريٽري جنرل ڊاڪٽر محمد امجد سان ٽيليفون تي ڳالهائيند ي پرويز مشرف چيو ته محترمه بينظير ڀٽو سان سندس آمريڪا ۾ ڪو ٽيليفونڪ رابطو نه ٿيو هو ۽ نه ئي هن 2007 ۾ بينظير ڀٽو کي ٽيليفون ڪال ڪئي هئي، جنهن ڪال جو حوالو آمريڪي صحافي مارڪ سيگل ڏنو آهي، اهو ڪوڙ تي ٻڌ ل آهي ۽ اهڙي ڪوڙي بيان جي جيتري به مذ مت ڪئي وڃي اها گهٽ آهي،هن چيو ته اها پاڪستان جي مخالفن جي هڪ سازش آهي ته اهي مارڪ سيگل جي بيان کي پاڪستان خلاف استعمال ڪرڻ چاهين ٿا، سمجهه ۾ نه ٿو ا چي ته بار بار مارڪ سيگل کان ئي جاچ ڇو ٿي رهي آهي؟ اڳوڻي صدر چيو ته جيڪڏهن مارڪ سيگل ايترو ئي سچو آهي ته هن پنهنجي ادارت ۾ شايع ٿيل بينظير ڀٽو جي ڪتا ب ۾ ان ٽيليفونڪ ڪال جو ذڪر ڇو نه ڪيو؟ پرويز مشرف چيو ته بينظير ڀٽو کي جيڪڏهن مون کان خطرو هجي ها ته هوءَ مون کان سيڪيورٽي گهرڻ لاءِ رابطو نه ڪري ها، هن چيو ته 2007ع ۾ پاڪستان و اپس ا چڻ کان پهرين بينظير ڀٽو لکت ۾ مون سان سيڪيورٽي لاءِ رابطو ڪيو هو ۽ ان جي سيڪيورٽي سندس مرضي جي سيڪيورٽي آفيسرن کي ڏني وئي هئي، پرويز مشرف چيو ته مان سچائي تي مڪمل يقين رکندو آهيان.

 

ذميواري سان ٿو چوان ته ايم ڪيو ايم جو قائد ۽ سندس پارٽي پاڪستاني آهي: فاروق ستار

لاهور(م.ڊ) ايم ڪيو ايم جي اڳواڻ ڊاڪٽر فاروق ستار چيو آهي ته مان ذميواري سان ٿو چوان ته ايم ڪيو ايم جو قائد ۽ سندس پارٽي پاڪستاني آهي. لاهور هائيڪورٽ ۾  ايم ڪيو ايم سربراهه خلاف غداري ڪيس جي ٻڌڻي کانپوءِ ميڊيا سان ڳالهائيندي ڊاڪٽر فاروق ستار چيو ته الطاف حسين جي بيان تي معافي به ورتي وئي پر پاڪستان ۾ ڪجهه ماڻهن کي محب وطن ۽ غدار هجڻ جو سرٽيفڪيٽ ڏنو وڃي ٿو. هن چيو ته پاڪستان ۾ آئين جي بالادستي هجڻ گهرجي، اسان پنهنجو موقف عدالت ۾ پيش ڪري ڇڏيو آهي پر اسان جو موقف اڃا ٻڌو ناهي ويو.

 

ڪراچي جي ميٽرڪ بورڊ ۾ 6 سئو کان وڌيڪ غير قانوني ڀرتين جو انڪشاف

ڪراچي (اسٽاف رپورٽر) ڪراچي جي ميٽرڪ بورڊ ۾ 6 سئو کان وڌيڪ غير قانوني ڀرتين جو انڪشاف ٿيو آهي. اينٽي ڪرپشن جي ذريعن موجب ڪراچي جي ميٽرڪ بورڊ ۾ 17هين ۽ 18هين گريڊ ۾ قائدن جي لتاڙ ڪري ڀرتيون ڪيون آهن. اينٽي ڪرپشن جي ذريعن وٽان مليل ڄاڻ موجب، بورڊ پاران ڀرتين کان اڳ اشتهار به شايع ڪرائڻ ضروري نه سمجهيو ۽ نه وري انٽرويوز ورتا ويا. ذريعن موجب ميٽرڪ بورڊ آفيس ۾ ضرورت کان وڌيڪ عملو مقرر ٿيل آهي. اينٽي ڪرپشن جي ذريعن جو چوڻ آهي ته بورڊ پاران جعلي ڊگريون جاري ڪرڻ واري معاملي جي جاچ به هلندڙ آهي،جڏهن ته ڇنڊڇاڻ اڃا مڪمل ناهي ٿي. اينٽي ڪرپشن جي ذريعن موجب ميٽرڪ بورڊ جي اختيارين پاران ڳري رقم عيوض امتحان ۾ ڪامياب ڪرائڻ جي جاچ به هلندڙ آهي.