تازيون خبرون

Daily Archives: October 2, 2015

اتر وزيرستان ۾ جيٽ جهازن جي بمباري، 25 دهشتگرد مارجي ويا

اُتر وزيرستان (مانيٽرنگ ڊيسڪ) پاڪ فوج جون دهشتگردن خلاف ڪارروايون جاري آهن، اتر وزيرستان جي دتا خيل واري علائقي ۾ سڪيورٽي فورسز پاران جيٽ جهازن ذريعي بمباري ۾ وڌيڪ 25 دهشتگرد مارجي ويا،جڏهن ته ڪجهه ٿاڪ به تباهه ڪيا ويا. پاڪ فوج جو دهشتگردن خلاف ضرب عضب آپريشن ڪاميابيءَ سان جاري آهي. آءِ ايس پي آر موجب اتر وزيرستان جي دتا خيل واري علائقي ۾ پاڪ افغان سرحد ويجهو دهشتگردن جي ٿاڪن تي جيٽ جهازن ذريعي بمباري ڪئي وئي. بمباري جي نتيجي ۾ 25 دهشتگرد مارجي ويا ۽ ڪيترائي زخمي ٿي پيا،جڏهن ته سندن ڪجهه ٿاڪ به تباهه ڪيا ويا. پاڪ فوج ڪاميابي سان جاري آپريشن ضرب عضب ۾ دهشتگردن کي هن وقت تائين ڳرو جاني ۽ مالي نقصان رسايو آهي، جڏهن ته ڪيترائي دهشتگرد سرحد پار ڪري افغانستان پڻ فرار ٿي ويا آهن.

 

حقيقي زندگي ۾ ماءُ هئڻ فلم ۾ ماءُ جو ڪردار نڀائڻ ۾ مددگار ثابت ٿيو : ايشوريا راءِ

ممبئي(شوبز نيوز) بالي ووڊ اداڪاره ايشوريا راءِ بچن چيوآهي ته ماءُ طور هوءَ پنهنجي نئين فلم ”جذبه” ۾ پنهنجي ڪردار کي حقيقي معنيٰ ۾ ادا ڪري رهي آهي. ڀارت جي سڌ سماءَ وارن ذريعن مطابق ايشوريا راءِ فلم ”جذبه” ۾ ماءُ جو ڪردار ادا ڪري رهي آهي. لا ڪاليج ۾ فلم جي مشهوري دوران هن چيو ته حقيقي زندگي ۾ ماءُ جو تجربو ٿيڻ فلم ۾ ماءُ جو ڪردار بهتر نموني ادا ڪرڻ ۾ مددگار ثابت ٿيو آهي. هن چيو ته ڪنهن به ڪردار کي بهترين طريقي سان نڀائڻ لاءِ ان ۾ چائي جو نظر اچڻ ضروري آهي ۽ تجربو ان کي حقيقي بڻائي ڇڏي ٿو. فلم ”جذبه” 9 آڪٽوبر تي رليز ٿيندي.

 

ٽيلر سوئفٽ سان منهنجي دوستي ناياب آهي: سلينا گومز

لنڊن (شوبز نيوز) هالي ووڊ جي پاپ اسٽار سيلينا گومز چيو آهي ته ٽيلر سوئفٽ سان منهنجي دوستي ناياب آهي، پنهنجي هڪ بيان ۾ هن چيو ته ٽيلر سوئفٽ سان دوستي ايتري گهري هئڻ جو مون کي پاڻ به يقين نه اچي رهيو آهي، هن چيو ته اسان هڪ ٻئي لاءِ جنوني آهيون ۽ ان جو سبب اهو آهي ته اسان ٻنهي جي هڪ ٻئي جي زندگين ۾ منفرد اهميت ۽ جاءِ آهي، سيلينا گومز چيو ته مون کي ٽيلر سان پنهنجي دوستي تمام گهڻي پياري به آهي.

 

پاڪستان جي عورتاڻي ڪرڪيٽ ٽيم بنگلاديش جي ٽيم کي 34 رنسن تان شڪست ڏئي سيريز ڪلين سوئپ ڪري ورتي

ڪراچي(اسپورٽس نيوز) پاڪستان جي عورتاڻي ڪرڪيٽ ٽيم بنگلاديش جي ٽيم کي 34 رنسن تان شڪست ڏئي سيريز ڪلين سوئپ ڪري ورتي. پاڪستان جي ٽيم پهريان بيٽنگ ڪندي مقرر 20 اوورن ۾ 6 وڪيٽن جي نق

صان تي 114 رنسون ٺاهيون. بسمه معروف 44 رنسن جي شاندار اننگ کيڏي. مهمان ٽيم هدف پٺيان لڳندي 7 وڪيٽن جي نقصان تي 80 رنسون ٺاهي سگهي. بنگلاديش طرفان رومانه احمد 27 رنسون ٺاهيون. ندا ڊار ۽ سميه صديقي 2-2 وڪيٽون ورتيون. بسمه معروف کي ميچ ۽ سيريز جي بهترين رانديگرياڻي قرار ڏنو ويو.

 

آءِ سي سي ون ڊي ڪرڪيٽ جي نئين ريڪننگ جاري ڪري ڇڏي، پاڪستان جي 2017 چئمپينز ٽرافي ۾ شرڪت جي تصديق

اسلام آباد (اسپورٽس نيوز) انٽرنيشنل ڪرڪيٽ ڪائونسل ون ڊي ڪرڪيٽ جي نئين رينڪنگ جاري ڪندي پاڪستان جي 2017 جي چئمپينز ٽرافي ۾ شرڪت جي تصديق ڪري ڇڏي آهي. بنگلاديش خلاف سيريز ۾ 0-3 جي شڪست کانپوءِ پاڪستان عالمي درجا بندي ۾ نائين پوزيشن تي پهتو هيو جنهن کانپوءِ قومي ٽيم جي 2017 جي آءِ سي سي ايونٽ ۾ شرڪت مشڪوق ٿي وئي هئي پاڪستان جو آءِ سي سي رينڪنگ ۾ شرڪت لاءِ بنگلاديش ۽ ويسٽ انڊيز سان مقابلو هيو جتي ان کي 30 سيپٽمبر 2015 کان اڳ 8 درجي تي پهچڻو هيو پاڪستان پهريان زمبابوي ۽ پوءِ سريلنڪا خلاف سيريز ۾ ڪاميابي ماڻي ايونٽ ۾ شرڪت جا امڪان چٽا ڪري ورتا هئا اظهر علي اليون هن وقت آءِ سي سي جي درجابندي ۾ اٺين نمبر تي موجود آهي. ان کان پوائنٽس هيٺ بيسٽ ايڊين پهريون ڀيرو ناڪام ٿي 8 ملڪي چئمپينز ٽرافي پهرين کان 18 جون 2017 تائين انگلينڊ ۾ کيڏي ويندي جنهن ۾ ڀارت، ڏکڻ آفريڪا، آسٽريليا، انگلينڊ، سريلنڪا، نيوزيلينڊ ، پاڪستان ۽ بنگلاديش جون ٽيمون شرڪت ڪنديون.

 

جهونو جوڳي ۽ ڪرنٽ افيئر: يار محمد شاهه

سان اڳ ئي چيو ته هي اضحيٰ واري عيد آهي، فرمائشي پروگرام، جنهن ۾ جيڪي به مهانگا ڍور ڍڳا ٻڪر ٻڙا ورتا ويا جن جي واقعي ريمپ تي ڪيٽ واڪ ٿي ۽ ٽي وي تي انهن جا نالا به ورتا ويا هئا، جن ۾ شاهه رخ، سلمان خان، شان وغيره. انهن مان شاهه رخ نالي هڪ وهڙو وٺي آيا ۽ سڄي پاڙي جا اهي غريب ٻار جن جا وڏا مائٽ ان ڏينهن جي انتظار ۾ هوندا آهن ته اسان ٻاڪري عيد تي گوشت کائينداسين، اهي حسرتون کڻي غريب ٻار انهن اميرن جي در تي گوشت وٺڻ لاءِ اس ۾ بيهي بيهي ٿڪجي پيا ٻارن اندر گوشت تقسيم ڪرڻ جا جملا ٻڌي مايوس ٿي ويا.

ڪنهن ڀڇيو ته بابا هيءَ ران وارو گوشت، ڪنهن کي چيو ويو اهو چاچا جن جي گهر، سيني وارو ماما جن جي باقي بچيل گوشت اسانجي فرج ۾ رکرائي ڇڏيو کل ڪاسائي کي وهٽ ڪهڻ عيوض ڏئي ڇڏجو اهو ٻڌي سڀني غريبن جا منهن لهي ويا، مايوسيءَ مان سڀ وڄڻ لڳا ته ان وقت مالڪن دروازو کولي اوجهريون آنڊا ٻاهر اڇليا، غير مسلم ٻارڙا وري ڪنهن ٻي فرمائشي قرباني ڪندڙ جي در تي هليا ويا ۽ مون جڏهن ان گهٽيءَ مان جا سيٺين جي گهٽي سڏبي آهي، ان مان لنگهڻ جي ڪوشش ڪئيءَ اها سڄي گهٽي اوجهرين ۽ آنڊن سان ڀري پئي هئي ۽ ڪتن جا ڍِڳ انهن کي کائيندي پاڻ ۾ وڙهيا پي پر غير مسلم ڇوڪرن انهن کان اوجهريون ڇڏائيندي چيو ته اڙي چريا پاڻ کي اوجهريون ۽ آنڊا ڪتن کان ڦري قائم ڪبابيءَ کي صاف ڪري ڏيڻون آهن، جن مان وري آنڊي ويڙهيون ۽ اوجهريءَ جو اسپيشل ٻوڙ ٺاهي انهن ئي اميرن کي وڪرو ڪري ڏيندو پر منهنجا هي عيد وارا ڪپڙا ڇورن ڇنڊا هڻي خراب ڪري ڇڏيا آهن هاڻ ٻڌايو وڏيري جي ووٽن جي سڏ جو پير ڪيئنه ڀريان، جهونو جوڳي سڀڪجهه يڪ ساهي چئي ويو.

ڪامريڊ سليم تنقيد ڪندي چيو ميان جهونا جوڳي جهڳي هئي خالي وقت پيو وڄائين جيئن سعودي ۾ اسانجي گم ٿيل حاجين جي شهادت جي تعداد ۾ آهسته آهسته پيو. اضافو ٿئي ۽ خبر نه آهي ته پاڪستان جي شهيد ٿيل حاجين جو مڪمل تعداد ڪڏهن ٻڌائيندا 1997.ع ۾ مني ۾ باهه لڳي هزارين حاجي شهيد ٿي ويا، پر پاڪستانين جي شهيدن جو اعلان آهسته آهسته پي ڪيائون  هن وقت ايران جا 110 کن حاجي شهيد ٿيا آهن ته سڄي ملڪ ۾ سعودي جي انتظاميه خلاف ايران ۾ احتجاج هلن پيا ۽ ٻين ملڪن ۾ به جيئن جيئن شهيدن جا نالا اعلان پيا ٿين تيئن تيئن انهن ملڪن ۾ به احتجاج شروع ٿي رهيا آهن،

پاڪستان جي گم ٿيل حاجين جي تعداد کانپوءِ شهيدن جا انگ اکر به ان خوف کان آهسته آهسته ٻڌايا پيا وڃن، ان کان اڳ به هر سال شيطان کي پٿرين هڻڻ ۾ سوين ماڻهو مرندا هئا ۽ باهه به اڪثر لڳندي رهي آهي، ڪعبته الله ۽ سڄو مڪو اهڙو امن جو شهر ۽ علائقو آهي جنهن ۾ خداوند عالم هر نبيءَ کي ان امن جي شهر ۾ خون خرابو ڪرڻ کان منع ڪئي آهي، امام حسين کي جڏهن اطلاع مليو ته مڪي ۾ سندن خلاف سازش تيار ٿي آهي ته تڏهن امام حسين جبل رحمت وٽ حج جي نيت عمره ۾ تبديل ڪري احرام تبديل ڪيائون صرف ان ڪري ته جيئن مڪي ۾ خون خرابو نه ٿئي رت نه وهي.

پر هن دفعي سڄي دنيا ڏٺو آسمان مان کينيوڻي يا بجلي ان ڪرين جي جوائنٽ تي ڪري جنهن کانپوءِ ان کي باهه لڳي ۽ لوهه ڳرندو رهيو ۽ پوءِ جهڪ ۽ طوفان اهڙو لڳو جو ڪرين ڳنڍ واري جاءِ تي ڪمزور ٿي چڪي هئي ۽ ڪرين جي ڪري ۽ حاجين جي طواف دوران خون وهڻ ۽ ڪرين جي هيٺيان دٻجي سوين حاجي شهيد ٿيا ۽ ان کانپوءِ شيطان کي پٿريون هڻندي موجوده بادشاهه جي فرزند جي پروٽوڪول محافظن جيڪو پروٽوڪول ڪيو ته عوامي پريشر وڌي ويو ۽ هڪ پاسي جي ديوار ڪرڻ کانپوءِ عوام گهٽ ۽ گرميءَ ۾ دٻجي بنا ڪو رت وهائڻ جي گُهٽجي مرندا رهيا جن نوجوان شهيدن جو گهڻو تعداد هو. جيڪي اڳئيي سڀ طاقت جي زور تي ڌڪ هڻي طواف ڪرڻ، حجراسود چمڻ ۽ شيطان کي پٿريون هڻڻ ۾ هڪٻئي کان گوءِ کڻندا رهندا آهن، بهرالحال سوشل ميڊيا تي خبر آهي ته سعودي حڪومت شهزادي جي حفاظت ڪندڙن 14 ڄڻن جا سر قلم ڪري ڇڏيا آهن.

مواليءَ چيو ته ادا انهن ويچارن ته هڪ شهزادي کي بچائڻ لاءِ پنهنجا سر ۽ ست سو کان وڌيڪ حاجي شهيد ڪرايا، اهو سڀ الله جو انسانن کان ناراضپو آهي، سعودي حڪومت جي ٻي وڏي طاقت ۽ سرمائڪار بن لادن جنهنجي تعميراتي ڪمپنيءَ جو سعودي پاڻ قرضي آهي، تنهن هاڻ هنن جا ٺيڪا رد ڪري ڇڏيا آهن، پر جيڪا نشاني خوني چنڊ گرهڻ جي ذريعي اسانکي ڏيکاري وئي آهي، ان تي ته انگريز سائنسدان ٿا چون ته اها دنيا جي خاتمي جي نشاني آهي، هيترو ڪجهه ٿيڻ ڏسڻ ۽ ٻڌڻ جي باوجود به ڇا اسان ۾ خوف خدا جاڳيو آهي؟ ڇا تو بهه ڪرڻ شروع ڪئي؟ ڇا هاڻ انسانن جو رت نه وهائڻ جو عهد ڪيو آهي؟ جيڪي ڪيو آهي ان جون معافيون گهريون آهن، ڇا داعش، القاعده ۽ طالبان وارا سلسله بند ٿي ويا؟ اڙي چريا پاڻ هميشه چوندا آهيون ته آمريڪا پن منهن واري بلا آه، آمريڪا هاڻ اسانجي مسلم ملڪن ۾ خوني انقلاب لاءِ ايترو ته خون وهايو آهي جو هاڻ ته فوجي جنرل به آمريڪي سازش تحت ملندڙ پاور کان لنوائڻ لڳا آهن،

سڀڪجهه ٿي به رهيو آهي، پر بي يقيني هراداري ۾ آهي ڪنهنکي ۾ ڪنهن تي اعتبار نه آهي، سنڌ جي 16 ضلعن ۾ نيون تڪبنديون، 15 ٽائون ڪميٽيون ختم، سنڌ حڪومت پاران سپريم ڪورٽ ۾ وڃڻ جو اعلان، ٻئي طرف سياستڪارن کي سوڙهو ڪرڻ لاءِ ايف آءِ کي به پوليس جهڙا اختيار ملي ويا آهن، هاڻ هو ملڪ ۾ ڪنهنکي به 90 ڏينهن لاءِ حراست ۾ رکي سگهن ٿا،

جڏهن ته افغانستان تي ٿيل موجوده حملي ۽ قبضي کانپوءِ افغان چيف ايگيزيڪيوٽو واضح ٿو چوي ته پاڪستان سرحد پار کان حملا ڪندڙن جي مدد پيو ڪري، پاڪستان ۾ حقاني نيٽ ورڪ سوڌو دهشتگردن جون پناهه گاهون آهن، افغانستان جون حالتون خراب ڪرڻ ۾ پاڪستان جو هٿ آهي، اها تقرير جنرل اسيمبليءَ ۾ چيف ايگيزيڪيوٽو عبد الله عبدالله ڪئي ۽ ان کان پوءِ جنرل اسيمبليءَ ۾ اسانجي وزير اعظم جوابي تقرير ڪئي، پر هو ڪنهن به قوت کي مطمئن ڪري نه سگهيو، جڏهن ته ان موقعي تي داعشن کي منهن ڏيڻ لاءِ آمريڪي صدر اوباما ۽ روسي صدر پيوٽن ۾ ملاقات سلامتي ڪائونسل جي اجلاس دوران ٿي. ملاقات ۾ شامي تڪرار جي خاتمي ۽ داعش خلاف گڏجي ڪم ڪرڻ تي اتفاق ڪيو آهي، روس گڏيل قومن جي منظوري بعد داعش خلاف بمباري ڪندو، اهي سڀ عنوان الڳ الڳ پر سڀڪجهه آمريڪا جي ٿنڪ ٽيئنڪ جي مرضيءَ سان ئي ٿي رهيو آهي، اسانکي آءِ ايم ايف 50 ڪروڙ 20 لک ڊالر جي منظوري ڏئي ڇڏي،

اسان جا ادار فخر سان پيا چون ته اها رقم ملندي ته پوءِ اسانجي زر جا ذخيره تاريخ جي بلند ترين سطح تي 19 ارب ڊالرن کان به وڌي ويندا. جڏهن ته اسانجي چيف آف اسٽاف جنرل راحيل شريف چيو آهي ته پاڪ چين راهداري مان خطي جا ٻيا ملڪ به فائدو حاصل ڪري سگهن ٿا، يعني اسان جي اهم سربراهه جي سوچ آهي ته چين واري معاهدي کي ڪامياب ڪجي.

جڏهن ته آمريڪا اسان کان اهو به ڪم وري وٺڻ ٿو چاهي جيڪو اسان 11 سيپٽيمبر 1999 کان اڳن ڪندا هئاسين روس ٽٽڻ کانپوءِ طالبان  وارو دور وري پنهنجي ڳچيءَ  ۾ پئجي ويو آهي، آمريڪا ته انا کان وڏو ڪم وٺندي سڄي دنيا جي ملڪن کي دهشتگردي جي دلدل ۾ ڦاسائي ڇڏيو آهي ۽ پاڪستان به حقاني نيٽ ورڪ جي خالق ۽ ڪم وٺندڙ طور تنقيد جو نشانو ٿيندو رهيو آهي، اسان کي واپس انڊيا سان اٽڪائي ٻيهر ڪشمير جو مسئلو تازو ڪري اسانکي 65ع جي جنگ واري دور ڏانهن واپس ڌڪيو ويو آهي ۽ ساڳي طرح اسان کي نقلي طالبان جي ذريعي جيئن اڳ افغانستان سان اٽڪائي رکيو هو،

تيئن هاڻ به اسانجي لاءِ ساڳيو ڄار تيار ٿي چڪو آهي، اڳ به اهم ادارا، معاشي ادارا ۽ فارين پاليسي جا ادارا ڪلهه به آمريڪي ٿنڪ ٽينئڪ جي نصاب تي هليا ۽ هاڻ وري به اسان ساڳئي پگهار تي ڪم ڪرڻ لاءِ تيار آهيون ڏيهي پرڏيهي سازشي ادارن اسان لاءِ اهڙيون حالتون پيدا ڪري ڇڏيون آهن جو دنيا کي ته اسان تي اعتبار ئي نه رهيو آهي، پر هن ملڪ جي عوام مان اعتبار ۽ اعتماد ئي ختم ٿي ويو آهي، سياستدانن جي هر چر پر ۽ اعلان تي عوام کي ڪو به اعتماد نه آهي رهيو، آخر ۾ اهوئي عرض ڪندس ته هاڻ سنڌ جي مالڪي وارن قومي اڳواڻن ۽ قوم پرستن جا بيان ۽ منصوبه بندي يا احتجاج ته هاڻ سنڌي اخبارن ۾ به اندرون صفحن تي هليا ويا آهن، ان کان اڳ جو باقي بچيل سنڌ کي بقول گرهوڙي شريف جي ته ’’ جڏهن ڪڏهن سنڌڙي توکي قنڌارين جوکو‘‘. ان کان اڳ  ئي ڪو واهرو اچي ۽ سنڌين کي مالڪي ڏياري.

’’واڪا ڪرڻ مون وس ٻڌڻ ڪم ٻروچ جو‘‘

عوامي اواز جي ٿورن سان

 

حج دوران پيش آيل حادثن جا پيرا کڻڻ گهرجن: نسيم بخاري

حصو ٻيو ۽ آخري

حڪومت هن وقت تائين دعوائون ڀل ڪيتريون به ڪري پر حقيقت ۾ ڪو به عوام دوست ڪردار ادا ڪري نه سگهي آهي. حڪومت کي ڪو فڪر نه ڪو الڪو، نه ڪا ڳڻتي نه ڪا بيچيني ۽ پريشاني ناهي. حڪومت ته ڀل حاجي سڳورن جي وارثن لاءِ معاوضا ڏيڻ واريون ڊاڙون هڻي، پر سوال اهو آهي ته ڇا ڪجهه ٽڪا پنهنجي پرين پيارن جو متبادل ٿي سگهن ٿا!؟ حاجي سڳورن جي حوالي سان سرڪار ڪرپشن جي حوالي سان شاندار ڪارڪردگي نڀائيندي آئي آهي. گذريل ڀيري حج اسڪينڊل جا چرچا دنيا جهان ٻڌا ۽ ڏٺا. مجبوريءَ ۾ نه چاهيندي به هڪڙي وفاقي وزير کي وزارت واري قرباني ڏيڻي پئي. مذهبي معاملن وارو اهو وزير يوسف رضا گيلاني جي وزارت اعظميٰ واري دور ۾ جيترو خوار ٿيو اها خواري خدا دشمن کي به نه ڏئي! ان تي لڳل الزام هڪڙي فرد جي بدنامي جو سبب نه هئا پر هن جيڪا سونهاري رکي هئي، اهي ان سونهاري جي سونهن کي به متاثر ڪري ويا. اهو ماڻهو هڪ وڏي حلقي جي نمائندگي ڪري هزارين ۽ لکين ماڻهن کي خطاب ڪندو هو. ان ڪري حج ڪرپشن وارو اسڪينڊل سندس پيروڪارن تي به وڄ وانگر ڪڙڪيو هو اها ڪرپشن هاڻ ايتري ته تيزيءَ سان پکڙي آهي جو هر ڪو ان گنگا مان شنان ڪرڻ جو شوقين ٿو ڏسجي!

سو اهڙي صورتحال ۾ پاڪستاني حاجين لاءِ پنهنجي حڪومت پاران تسلي جوڳا انتظام ڪرڻ وارين دعوائن کي ڪيترو سچ سمجهجي؟ اهي دعوائون جيڪڏهن درست هجن ها ته اڄ حاجي سڳورن جا هزارين خاندان ٻڏتر ۽ ٻائيتال جو شڪار نه بڻجن ها. رياست عوام جي ماءُ هوندي آهي، سعودي عرب ۾ پيش آيل واقعي کانپوءِ وقت جي وزيراعظم کي سمورا دورا ۽ سرگرميون معطل ڪري سعودي عرب پهچڻ کپندو هو، ڇو ته هن جي موجودگي سان ڪجهه وڌيڪ اثرائتا قدم کڄي پئي سگهيا، پر هو صاحب ولايت ويل آهي ۽ اڃا ڏهه يارنهن ڏينهن ٻاهرين ملڪن ۾ آڪسيجن کڻڻ جو ارادو رکي ٿو.

پاڪستان دنيا جي اُها واحد رياست آهي، جنهن کي پنهنجي ماڻهن جي جان ۽ مال جي ڪڏهن به ڪا پرواهه نه رهي آهي ۽ نه وري ڪڏهن ان ذميواري کي حڪومتن پنهنجو فرض سمجهي پورو ڪيو آهي! اهو ئي سبب آهي ته عوام به حڪومتن تي اعتماد نه ٿو ڪري.

سعودي عرب ۾ ماڻهن جي انبوهه هيٺيان چٿجي ويل انسانن جا لاش ڪِرين ذريعي ائين گڏ ڪيا ويا، جيئن پاڻ وٽ مٽي، واري يا بجري کي ڪوڏر سان گڏ ڪيو ويندو آهي. اُهي انسان جيڪي مختلف ملڪن کان حج جي سعادت لاءِ سعودي عرب پهتا هئا، انهن سان اهڙو حشر ۽ انهن جي اهڙي پڄاڻيءَ کي ڇا چئجي؟ سعودي سرڪار کي ايتري سمڪ نه آئي آهي جو واقعو ٿي وڃڻ کانپوءِ وارين حالتن ۾ ڪو ذميواراڻو بيان ڏئي ۽ گهربل ڪارڪردگي جو مظاهرو ڪري. عرب شهزادا ۽ عرب حڪمران اسان جي وڏيرن جيان شاهاڻي ۽ عياش زندگي گذاريندا آهن. ان ڪري انهن ۾ انساني ۽ اخلاقي قدرن جي خوشبوءِ مڙئي گهٽ ئي ايندي آهي.

ضرورت ان ڳالهه جي آهي ته حج پاليسيءَ جي حوالي سان امڪاني خطرن وارن سڀني معاملن کي نه فقط نظر ۾ رکيو وڃي پر ترجيحي بنيادن تي خطرن جا اهڙا گهنڊ حاجي سڳورن کي اڳواٽ ٻڌايا به وڃن ته جيئن خطري جي گهنٽي وڄڻ شرط اهي احتياطي اپاءَ وٺي سگهن. حاجي سڳورن کي ماضيءَ ۾ پيش آيل سمورن حادثن ۽ انهن جي سببن کان باخبر رکڻ جي ضرورت آهي، ڇو ته جڏهن کين اڳواٽ اطلاع هوندو ته پڪ سان اهي پنهنجي بچاءَ لاءِ ڪجهه پاڻ به وِکون کڻندا. هت اهو سوال به اهميت اختيار ڪري ويو آهي ته گذريل 42 سالن کان پيش آيل حاجين سان حادثن بابت هيل تائين سچون پچون حقيقتون ڪيتري ايمانداريءَ سان عوام آڏو اچي سگهيون آهن؟ ڇو ته اهو هڪڙو نقطو ئي اسان کي هزارين حاجين جي حياتي وڃائجڻ وارو ڪارڻ ٻڌائي سگهي ٿو ۽ جن کان آگاهي وقت جي ضرورت به آهي. اسان جي پرنٽ ۽ اليڪٽرانڪ ميڊيا اهڙن واقعن جا وِچور ته وائکا ڪندي آئي آهي، پر بدقسمتي سان سبب گهٽ ئي سامهون آيا آهن، جيستائين سبب واضح نه ٿا ٿين، تيستائين ڪنهن به نتيجي تي پڄڻ ڏاڍو مشڪل هجي ٿو، ان ڪري اسان جي ذميواري آهي ته پاڻ اهڙي بحث مباحثي واري فضا جوڙيون، جيڪا حج دوران حادثن ۾ هزارين حاجين جي موت جا ڪارڻ ڳولهي ۽ جيڪي به ذميوار ڌريون آهن، تن جو گهيرو تنگ ڪريون.

 

دنيا جو امن ۽ گڏيل قومون

دنيا جي مختلف مامرن تي کلئي نموني بحث توڙي تجويزون سامهون آيون آهن. جن ۾ انسانيت، جمهوريت، ملڪ  وچ ۾ برابري جي بنياد تي ناتا رکڻ ۽ اڳرائي توڙي انتهاپسندي ۽ دهشتگردي جي خاتمي تي اهم ڳالهيون ٿيون آهن. ان ۾ هڪ اهم ترين ڳالهه آمييڪا پاران ڪئي ويئي اهي جنهن چيو آهي ته ڪهن به ملڪ تي ڏاڍ ۽ پئسي وسيلي امن نه ٿو آڻي سگهجي. اجلاس جي افتتاحي سيشن کي خطاب ڪندي گڏيل قومن جي سيڪريٽري جنرل بان ڪي مون چيو ته اسان کي دنيا کي امن ڏيڻو آهي. گڏيل قومن جي چارٽر تي سختي سان عمل ڪرڻو آهي،  هن چيو ته اسان کي زندگيون بچائڻ لاءِ فنڊ نه پيا ملن، هن چيو ته  دنيا کي تباهه ڪرڻ آسان پر ان جو بچاءُ ڪرڻ ڏکيو عمل آهي. شام ۽ عراق جي پناهگيرن لاءِ قدم کڻڻا پوندا. هر ماڻهو کي پر امن طور جيئرو رهڻ جو حق ڏيڻو پوندو.هن چيو ته دنيا ۾ انسانيت جو نظام اڃا ناهي ٽُٽو، هن چيو ته گھرو ويڙهه ۾ ملوث ماڻهو پنهنجي ملڪن کي تباهه ڪري رهيا آهن. سمورا ليڊر آئيني حدن جي پاسداري ڪن. هن چيو ته ايران ۽ عالمي قوتن ۾ ايٽمي معاهدي جي آجيان ڪريون ٿا. يمن مسئلو ڳالهين ذريعي حل ڪيو وڃي.  اسرائيل ۽ فلسطين مسئلي جي حل لاءِ ڳالهين جي ميز تي اچن. اجلاس کي خطاب ڪندي آمريڪي صدر باراڪ اوباما چيو ته اسان عراق ۾ سبق سکي ورتو آهي ته طاقت ۽ پيسي جي زور تي ڪنهن به ملڪ ۾ امن نٿو آڻي سگھجي. علائقن تي قبضو ڪرڻ هاڻي طاقت جي علامت ناهي رهي. جنگيون عارضي حل  آهن. سندس چوڻ هو ته دنيا جو ڪو به ملڪ دهشت گردي کان بچيل ناهي. دنيا ۾ ماڻهن جي ڊپ مان فائدو ورتو پيو وڃي. اسين ڪيترين ئي وڏين قومن کي تباهه ٿيندي ڏسي رهيا آهيون، مسئلن کي منهن ڏيڻ لاءِ متحد ٿيڻو پوندو. هن چيو ته آمراڻا دور هميشه ڪمزور هوندا آهن، فوجي حل هميشه عارضي هوندو آهي. گڏيل قومن جي اصولن جمهوريت کي هٿي ڏيڻ ۾ مدد ڏني. دنيا کي خطرن ۾ واڌ اچي رهي آهي، اڪيلو آمريڪا دنيا لاءِ ڪجھه نٿو ڪري سگھي. آمريڪي صدر باراڪ اوباما پنهنجي خطاب ۾ وڌيڪ چيو ته جنرل اسيمبلي مختلف ملڪن سان گڏجي ٽين عالمي جنگ کي روڪڻ جون ڪوششون ڪري. هن چيو ته آمريڪا کي به ڪيترائي خطرا آهن. اسان کي ذاتي اختلافن منجھائي ڇڏيو. هر مسئلي جو حل ڳالهين سان ٿيڻ گھرجي. هن چيو ته شهرين ۽ اتحادين جي حفاظت لاءِ طاقت جو استعمال ڪرڻو پيو ته غور ڪيو ويندو. هن چيو ته يوڪرين جي مسئلي جي حل لاءِ گڏ ويهي ڳالهيون ڪرڻ جي ضرورت آهي. ايران سان ايٽمي معاهدو عالمي مضبوطي جي علامت آهي. ايران ايٽمي معاهدي جي ڀڃڪڙي ڪري رهيو هو، ان کي روڪڻ لاءِ ساڻس ايٽمي معاهدو ڪيو سين. هن الزام هنيو ته ايران پراڪسي وار ذريعي پاڙيسري ملڪن جو ماحول خراب ڪري رهيو آهي. روس سان جنگ جا خواهشمند ناهيون، روس يوڪرين ۾ جنگ مڙهي آهي، يوڪرين ۾ اسان جا ڪجھه مفاد آهن، اوباما وڌيڪ چيو ته آمريڪا چين سان ڳالهيون چاهي ٿو، اهو چوڻ غلط آهي ته سرد جنگ ٻيهر شروع ٿي چڪي آهي. هن چيو ته آمريڪا اين جي اوز ذريعي ڪا دهشت گردي نه پيو پکيڙي، اين جي اوز ذريعي عوام کي پنهنجي پيرن تي بيهاري رهيا آهيون.  امن لاءِ خدشن بدران اميدن جو دامن جهلڻ گھرجي.  باراڪ اوباما چيو ته داعش هڪ زهريلي ذهنيت جي علامت آهي، داعش اسلام جو چهرو چچرڻ جي ڪوشش ڪئي. هن چيو ته اسلام همدردي ۽ صبر جو دين آهي، داعش جهڙن نظرين کي روڪڻ جي سخت ضرورت آهي.