تازيون خبرون

Daily Archives: October 1, 2015

واٽر بورڊ مان هڪ کان 17 گريڊ جا 188 گوسڙو بطرف، نوٽيفڪيشن جاري

ڪراچي (اي پي پي) ڪراچي واٽر اينڊ سيوريج بورڊ مان گريڊ هڪ کان 17 تائين جا 188 گوسڙو ملازم برطرف ڪيا ويا ۽ سندن پگهارون بند ڪيون ويون. تفصيل موجب مڪاني ادارن واري صوبائي وزير ۽ چيئرمين واٽر بورڊ ناصر حسين شاهه جي هدايتن ۽ منظوري سان ايم ڊي واٽر بورڊ مصباح الدين فريد ڪراچي واٽر اينڊ سيوريج بورڊ جي گوسڙو ملازمن خلاف ڪارروائي ڪندي گريڊ 1 ک ان 17 گريڊتائين جي مختلف ڪيڊرز جي 188 ملازمن کي ڊگهي عرصي کان ڊيوٽي تان غير حاضر رهڻ جي بنياد تي نوڪري مان برطرف ڪري ڇڏيو آهي. اربع ڏينهن جاري ڪيل پڌرائي موجب اهي آفيسر ۽ ملازم ڊگهي موڪل تي هئا ۽ موڪل ختم ٿيڻ بعد به بنا اطلاع پنهنجي ڊيوٽي تان لڳاتار غيرحاضر هئا، ڄاڻايل ملازمن کي واٽر بورڊ جي هيومن ريسورسز اينڊ ايڊمن کاتي ڊيوٽي تي حاضري ۽ سبب ڄاڻايو جا نوٽيس جاري ڪيا، سندن پاران جواب نه ملڻ تي انهن سڀني آفيسرن ۽ ملازمن کي شوڪاز جي طور تي هيومن ريسورسز ڊپارٽمينٽ پاران 26 جولاءِ 2015ع تي مختلف اخبارن ۾ حتمي نوٽيس شايع ڪرايا ويا جن ۾ کين 7 ڏينهن اندر جواب داخل ڪرڻ يا ڊيوٽي تي حاضر ٿيڻ جي مهلت ڏني وئي هئي پر انهن ملازمن نه نوٽيسن جو جواب ڏنو ۽ نه ئي ڊيوٽي تي حاضر ٿيا جنهن جي بنياد تي سڀني قانوني تقاضائن کي پورو ڪندي ايم ڊي واٽر بورڊ چيئرمين واٽر بورڊ جي منظوري سان انهن سڀني ملازمن کي فوري طور برطرف ڪري ڇڏيو آهي، جن ۾ سب انجنيئر 8، اسسٽنٽ انجنيئر 10، ڪمپيوٽر آپريٽر 4، فورمين 2، سپروائيزر 4، جونيئرڪلارڪ 11،ليب اٽينڊنٽ 1، سيڪيورٽي آرم گارڊ 4، والو مين 4،فٽر 4،ڊرائيور1 ،مڪينڪ 1،بيلدار 18، چوڪيدار 8،نائب قاصد11، هيلپر 21، ڊيٽا اسسٽنٽ 1،مالهي1،ورڪ سپروائيزر 2، سب انسپيڪٽر 2، مشين آپريٽر 1، مشين اٽينڊنٽ، هيلٿ ورڪر 39، قلي 11، ٽريسر 1، سوئيپر 5،لائين گارڊ 13، اليڪٽريشن 3، ڪلينر 1، سب انسپيڪٽر 2 شامل آهن. واٽر بورڊ جي هيومن ريسورسز اينڊ ايڊمن کاتي انهن ملازمن جي برطرفي جا حڪم جاري ڪري ڇڏيا آهن ۽ انهن جون پگهارون بند ڪيون ويون آهن.

 

عدالت جي لانڊري کي ذاتي جهيڙن جو گند صاف ڪرڻ لاءِ استعمال ٿيڻ نه ڏبو: سپريم ڪورٽ

اسلام آباد (بيورو) سـُپريم ڪورٽ، نيب ۾ ڊائريڪٽر جنرل طور مقرر 10 فوجي آفيسرن جي مقرري وارو معاملو چيف جسٽس ڏانهن موڪلي ڇڏيو آهي، جسٽس ثاقب نثار ريمارڪس ۾ چيو آهي ته عدالت جي لانڊري کي ذاتي جهيڙن جو گند صاف ڪرڻ لاءِ استعمال ٿيڻ نه ڏنو ويندو.  نيب بابت داخل مختلف درخواستن تي جسٽس ثاقب نثار جي سربراهي ۾ سپريم ڪورٽ جي ٽي رڪني بينچ ٻڌڻي ڪئي. انيتا تراب ڪيس ۾ درخواستگذار محمود اختر نقوي دليل ڏيندي چيو ته نيب ان ڪيس جي فيصلي جي ڀڃڪڙي ڪري توهين عدالت ڪئي آهي. محمود اختر نقوي چيو ته فوج مان 10 آفيسر نيب۾ آيا، جن کي ڊائريڪٽر جنرل مقرر ڪيو ويو آهي پر سپريم ڪورٽ جي فيصلي باوجود کين اصلي کاتن ۾ واپس ناهي موڪليو ويو. عدالت، فوجي آفيسرن جي نيب ۾ مقرري وارو معاملو چيف جسٽس ڏانهن موڪلي ڇڏيو. بحريه ٽائون جي زمينن بابت ڪيس ۾ ريمارڪس ڏيندي جسٽس ثاقب نثار چيو ته هتي ڪو به وڏو يا ننڍو ناهي، انصاف قانون موجب ئي ٿيندو آهي پر ذاتي جهيڙن کي عدالت ۾ آڻڻ بدران ٻاهر حل ڪيو وڃي. جسٽس نثار  چيو ته توهين عدالت جي ڪارروائي انصاف ۾ رنڊڪ وجهي ته ان خلاف توهين عدالت جي ڪارروائي هلائي سگهي ٿي، فائدو کڻندڙ ڌر خلاف توهين عدالت ڪارروائي نٿي ٿي سگهي. جسٽس ثاقب نثار چيو ته هو قاضي نه پر جج آهي، هتي قانون موجود آهي، فيصلا ميرٽ تي ڪيا ويندا.

 

ڪالاباغ ڊيم جي ڳالهه نٿو ڪريان پر پاڻي ذخيرو ڪرڻ لاءِ ڊيم ٺهڻ ضروري آهن: ارسا چيئرمين

اسلام آباد (بيورو) ارسا جي ايڊوائيزري ڪميٽي ربيع ۾ صوبن کي پاڻي جي ورڇ 91 واري ٺاهه بدران 13 ٽو تحت ڪرڻ جو فيصلو ڪري ورتو آهي، ارسا جي چيئرمين جو چوڻ آهي ته خريف جي مند ۾ گهڻو پاڻي ضايع ٿي چڪو آهي، تنهن ڪري صوبن کي ربيع ۾ 14 سيڪڙو کوٽ جي حساب سان پاڻي ڏنو ويندو. اسلام آباد ۾ چيئرمين رقيب خان جي صدارت هيٺ ارسا جي ايڊوائيزري ڪميٽيءَ جو اجلاس ٿيو، جنهن ۾ ٽن صوبن جي ميمبرز ۽ سنڌ جي ايڊيشنل سيڪريٽري شرڪت ڪئي. اجلاس ۾ ربيع ۾ صوبن کي پاڻي  جي ورڇ ۽ پاڻي ذخيرو ڪرڻ سميت مختلف معاملن جو جائزو ورتو ويندو. اجلاس ۾ فيصلو ڪيو ويو ته ربيع لاءِ صوبن کي پاڻي 91 ٺاهه بدران تيرنهن ٽو معاهديتحت ڏنو ويندو. ارسا چيئرمين رقيب خان چيو ته پهرين اپريل کان 20 سيپٽمبر تائين 36 ايڪڙ ملين فٽ پاڻي سمنڊ ۾ ضايع ٿي ويو آهي، تنهن ڪري صوبن کي ربيع ۾ 14 سيڪڙو گهٽ پاڻي فراهم ڪيو ويندو. ارسا چيئرمين چيو ته ربيع ۾ سنڌ کي 12 ملين ايڪڙ فوٽ،پنجاب کي 17 ملين ايڪڙ فوٽ، بلوچستان کي هڪ ملين ايڪڙ فوٽ ۽ خيبرپختونخواهه کي زيرو ڏهائي 7 ملين ايڪڙ فوٽ پاڻي فراهم ڪيو ويندو. پنجاب جي ميمبر رائو ارشاد چيو ته رڳو هڪ ملين ايڪڙ فوٽ جي قيمت 60 ارب رپيا آهي، 36 ملين ايڪڙ فوٽ جي قيمت ڪيتري هوندي، ان جو  حساب لڳايو وڃي ته وڏو پاڻي ضايع ٿيو آهي. پنجاب جي ميمبر چيو ته جيڪڏهن ڪالاباغ ڊيم، ڀاشا، ۽ اکوڙي ڊيم ٺهن ها ته ايترو پاڻي ضايع نه ٿئي ها. ارسا چيئرمين چيو ته هو ڪالاباغ ڊيم جي ڳالهه نٿو ڪري پر پاڻي ذخيرو ڪرڻ لاءِ ڊيم ٺهڻ ضروري آهن. اجلاس ۾ سنڌ جي ايڊيشنل سيڪريٽري پنجاب پاران چشما جهلم لنڪ ڪئنال ذريعي سنڌ جو پاڻي کڻڻ تي احتجاج رڪارڊ ڪرايو. سنڌ جي ميمبر چيو ته کين خاطري ڪرائي وڃي ته پنجاب چشما جهلم لنڪ ذريعي سنڌ جو پاڻي نه کڻندو، جنهن تي ارسا چيئرمين معاملو حل ڪرڻ جي خاطري ڪرائي. اجلاس ۾ بلوچستان جي ميمبر وري سنڌ مٿان پاڻي چوري جو الزام لڳائيندي احتجاج ڪيو، جنهن تي سنڌ جي ميمبر کيس خاطري ڪرائي ته گڏ ويهي معاملو حل ڪيو ويندو.

 

وزيراعظم فيس گهٽ ڪرڻ کان انڪار ڪندڙ نجي اسڪولز کي سيل ڪرڻ جو حڪم ڏئي ڇڏيو

اسلام آباد (بيورو) وزيراعظم نواز شريف فيس گهٽ ڪرڻ کان انڪار ڪندڙ نجي اسڪولز کي سيل ڪرڻ جو حڪم ڏئي ڇڏيو آهي. وزيراعظم نواز شريف نجي اسڪولز پاران فيسن ۾ گهٽتائي کان انڪار جو سختيءَ سان نوٽيس ورتو آهي. وزيراعظم نواز شريف، فيس نه گهٽائيندڙ نجي اسڪولز کي سيل ڪرڻ جو حڪم ڏيندي شاگردن جي والدين جي شڪايتن لاءِ سيل قائم ڪري ڇڏيو آهي. وزيراعظم نواز شريف جو چوڻ آهي ته جيڪڏهن نجي اسڪول جي انتظاميه شاگردن جي وارثن کي حراسان ڪري ته اهي ڪمپلين سيل ۾ شڪايت داخل ڪري سگهن ٿا.

 

آرمي چيف جي لنڊن ۾ برطانوي هٿياربند فوج جي سربراهه سان ملاقات

راولپنڊي (م.ڊ) پاڪ فوج جي سربراهه  جنرل راحيل شريف برطانيا جي 3 ڏينهن جي سرڪاري دوري دوران برطانوي ڊفينس فورسز جي چيف آف اسٽاف جنرل سر جان نڪولس رينالڊس سان ملاقات ڪئي. آئي ايس پي آر جي ڊائريڪٽجنرل طرفان جاري ڪيل ٽوئيٽ پيغام مطابق گڏجاڻي ۾ ٻنهي ملڪن جي هٿياربند فوج جي گڏيل دلچسپي جي معاملن، علائقائي سلامتي ۽ دفاعي سهڪار جي حوالي سان خيالن جي ڏي وٺ ڪئي وئي.

 

نيب جي نگراني لاءِ ڪميٽي يا ڪميشن جوڙڻ جو مطالبو، سڄي ملڪ جو احتساب ڪندڙ اداري جو احتساب ڪير ڪندو؟ رضا رباني

ڪراچي (اسٽاف رپورٽر) سينيٽ جي چيئرمين ميان رضا رباني چيو آهي ته ڪير به مقدس ڳئون ناهي، احتساب سڀني جو ٿيڻ گهرجي، نيب جي نگراني لاءِ ڪميٽي يا ڪميشن جوڙي وڃي. ڪراچي جي وفاقي اردو يونيورسٽي ۾ خطاب ڪندي رضا رباني چيو ته سڄي ملڪ جو احتساب ڪندڙ اداري جو احتساب ڪير ڪندو؟ هن چيو ته سول ۽ ملٽري بيورو ڪريسي صافشفاف ناهي، خاص عدالتن ۾ سڀني جو ٽرائل ٿيڻ گهرجي. سندس چوڻ هو ته سياستدانن ڪرپشن ڪئي آهي پر باقي سڄو پاڪستان به صاف ناهي، ڪميٽي جوڙي وڃي ته اها ماضي جي غلطين کي به ڏسي. هن چيو ته مان ڪرپٽ سياسي ورڪرن جو بچاءُ نه ٿو ڪيان پر اسان کي هن ڌرتي لاءِ ئي جيئڻو ۽ مرڻو آهي. سينيٽ چيئرمين چيو ته پاڪستانيت تڏهن ايندي، جڏهن نوجوان اهو محسوس ڪندا ته اهي هن ملڪ جا مالڪ آهن. هن چيو ته نصاب مان پاڪستان جي تاريخ ڪڍي وئي آهي، پاڪستان جا نوجوان ملڪ جي تاريخ کان اڻڄاڻ آهن، جڏهن مان پاڻ پنهجي تاريخ کان اڻڄاڻ هوندس ته ٻين کي ڇا ٻڌائيندس؟ رضا رباني مطالبو ڪيو ته هڪ ڪميشن جوڙي وڃي، جيڪا ملڪي تاريخ مقرر ڪري.

 

بلاول ڀٽو زرداري شارٽ ڪٽ ۾ پارٽي چيئرمين بڻيو، جنهن سان پارٽي کي ڪو به فائدو ناهي رسيو: عمران خان

لاهور(بيورو) پاڪستان تحريڪ انصاف جي چيئرمين عمران خان چيو آهي ته هو لاهور کي جاڳائڻ آيو آهي، ليگي امپائرن جي موجودگي ۾ به اسان اين اي 122 تي ننڍي چونڊ کٽينداسين.لاهور پهچڻ کانپوءِ ميڊيا سان ڳالهائيندي عمران  خان چيو ته اليڪشن ڪميشن ۽ مسلمي ليگ (ن) گڏجي عام چونڊن ۾ ڌانڌلي ڪئي، 53 هزار غلطين جي اعتراف کانپوءِ به ڪنهن کي سزا ڇو نه ملي؟ هن چيو ته نواز شريف پنهنجو امپائر بيهاري کيڏندو هو، ڇا اياز صادق به پنهنجو امپائر بيهاريندو؟ سندس چوڻ هو ته مان اڪيلو ڪپتان آهيان، جيڪو ڀارتي امپائرن جي موجودگي ۾ ڀارت کان کٽي آيو هو. پي ٽي آئي چيئرمين چيو ته ايچيسن مان پڙهيل اسپيڪر صاحب به پنهنجي امپائر سان گڏ ميچ کيڏي رهيو آهي ۽ سوچي پيو ته اسپيڪر بڻجي ويندو. هن چيو ته شهباز شريف ساڍن اٺن سالن تائين منع نامي پويان لڪندو رهيو، ريلوي واري وزير سعد رفيق به اسٽي آرڊر جو سهارو ورتو. سندس چوڻ هو ته ڌانڌلي تان پردو کڻڻ جو مقصد ڪرپٽ ماڻهن کي وائکو ڪرڻ هو، هڪ لک 84 هزار ووٽن مان 53 هزار ڪوڙا نڪتا، هاڻ ڌانڌلي ٿيڻ نه ڏينداسين، هڪ هڪ پولنگ اسٽيشن تي اسان جا ماڻهو بيٺل هوندا. عمران خان چيو ته جيڪڏهن ان قسم جي ئي اليڪشن ٿيندي رهي ته پڙهيل لکيل ماڻهو اسيمبلين ۾ نه ويندا، اليڪشن ڪميشن جو ڪم غلطيون ٻڌائڻ آهي، چونڊ نظام ٺيڪ ڪرڻ کانپوءِ ئي ملڪ ۾ تبديلي ايندي. هن چيو ته اسان کي گلو بٽن تي يقين ناهي، ان ڪري چونڊن لاءِ فوج ۽ رينجرز جو مطالبو ڪيو، هن چيو ته سڀني گڏجي ڌانڌلي ڪئي، ان ڪري ڪير به نه پڪڙيو ويو، حالتون ڇڪتاڻ واريون ٿين ها ته سڄو الزام اسان تي ٿاَڦيو وڃي ها. عمران خان چيو ته نندي پور پاور پراجيڪٽ کي 22 اربن مان 88 اربن تي پهچايو ويو پر اسان جي قيادت رڳو دهشتگردي جو راڳ پئي ڳائي. عمران خان چيو آهي ته سنڌ ۽ پنجاب ۾ قائم شاهي حڪومتون هڪٻئي جو دفاع ڪري رهيون آهن، بلاول ڀٽو زرداري شارٽ ڪٽ ۾ پارٽي چيئرمين بڻيو، جنهن سان پارٽي کي ڪو به فائدو ناهي رسيو. سنڌ ۽ پنجاب ۾ شاهي حڪومتون قائم آهن، جيڪي هڪٻئي جو دفاع ڪري رهيون آهن، ڪرپٽ نظام جي خاتمي لاءِ جدوجهد جاري رهندي.  عمران خان چيو ته حڪومت 10 ارب رپيا رڳو اشتهاري مهم تي خرچ ڪري چڪي آهي، فلائي اورز ۽ ميٽرو بس بدران عوام تي سيڙپڪاري ٿيڻ گهرجي.

 

اليڪشن ڪميشن وزيراعظم جي هاري پيڪيج کي چونڊ ضابطا اخلاق جي لتاڙ قرار ڏئي ڇڏيو، عمل روڪڻ جو حڪم

اسلام آباد (بيورو) اليڪشن ڪميشن وزيراعظم پاران اعلانيل هاري پيڪيج کي چونڊ ضابطا اخلاق جي ڀڃڪڙي قرار ڏيندي ان تي عمل روڪڻ جو حڪم ڏنو آهي. اسلام آباد ۾ ميڊيا کي ان ڪيميرا بريفنگ ڏيندي اليڪشن ڪميشن جي سيڪريٽري بابر يعقوب ٻڌايو ته 15 سيپٽمبر تي وزيراعظم نواز شريف هاري پيڪيج جو اعلان ڪيو، جنهن تي چونڊ ضابطا اخلاق جي لتاڙ جو سوال اٿيو. هن چيو ته اليڪشن ڪميشن پيڪيج جي اعلان جو نوٽيس وٺندي حڪومت جو موقف ٻڌو، خوراڪ کاتي جي سيڪريٽري ڪميشن کي حڪومتي موقف ٻڌايو، جنهن سان اليڪشن ڪميشن اتفاق نه ڪيو، اليڪشن ڪميشن جي سيڪريٽري جو چوڻ هو ته هاري پيڪيج جا ٽي نقطا ناڻي واري وزير جي بجيٽ تقرير جو حصو نه هئا، جنهن ڪري حڪومت کي في ايڪڙ زرعي قرض جي حد 2 هزارن مان وڌائي 4 هزار ڪرڻ ۽ هارين کي 5 هزار رپيا في ايڪڙ معاوضو ڏيڻ کان روڪيو ويو آهي. هن ٻڌايو ته حڪومت کي ڪپهه ۽ چانورن جي آبادگارن کي زرعي قرضن تي وياج ۾ 2 سيڪڙو رعايت ڏيڻ کان به روڪيو ويو آهي، اليڪشن ڪميشن جي سيڪريٽري مطابق حڪومت کي انهن ٽنهي شقن تي 4 ڊسمبر تائين عمل ڪرڻ کان روڪيو ويو آهي. واضح رهي ته هاري پيڪيج بابت اليڪشن ڪميشن گذريل ڏينهن خوراڪ ۽ سڌسماءَ جي سيڪريٽرين کي گهرائي هاري پيڪيج بابت حڪومتي موقف ٻڌو، جنهن کانپوءِ فيصلو محفوظ ڪري ڇڏيو هو، جيڪو اڄ جاري ڪيو ويو آهي.

 

منيٰ سانحي ۾ 45 پاڪستاني حاجين جي شهيد ٿيڻ جي تصديق، گم ٿيل 63 ڄڻن جو پتو نه پئجي سگهيو

اسلام آباد (مانيٽرنگ ڊيسڪ) منيٰ سانحي ۾ 45 پاڪستاني حاجين جي شهيد ٿيڻ جي تصديق ٿي وئي، گــُم ٿيل 63 ڄڻن جو اڃا تائين پتو نه پئجي سگهيو جڏهن ته مڪي شريف ۾ علاج هيٺ 39 مان 29 پاڪستانين کي فارغ ڪيو ويو. حج جي سعادت ماڻڻ دوران منيٰ ۾ شيطان کي پٿريون هڻندي ڀاڄ سبب شهيد حاجين جو انگ 11 سئو ٿي ويو جن ۾ 45 پاڪستاني حاجي به شامل آهن. واقعي کانپوءِ پاڪستان جا 63 شهري اڃا تائين گم آهن جن جي ڳولا لاءِ پاڪستاني سفارتخاني ڪوششون تيز ڪري ڇڏيون آهن. مڪي شريف جي مختلف اسپتالن ۾ 39 پاڪستاني حاجين مان 29 ڄڻن کي فارغ ڪيو ويو جڏهن ته 10 حاجين کي طبي امداد ڏني پئي وڃي. مذهبي معاملن واري وزير سردار يوسف، مڪي جي اسپتالن ۾ علاج هيٺ پاڪستاني حاجين جي عيادت ڪئي ۽ حج ڊائريڪٽوريٽ کي هدايت ڪئي ته زخمين جي خاص سار سنڀالي لڌي وڃي. هڪ خابرو اداري موجب شهيدن ۽ گم ٿيل ماڻهن جا انگ اکر مختلف ملڪن جي اختيارين ۽ ميڊيا ذريعي گڏ ڪيا ويا آهن. انگن اکرن موجب منيٰ سانحي ۾ ايران جا 228 حاجي شهيد ٿيا ۽ 246 گم آهن، جڏهن ته مصر جا 78 حاجي، ڀارت جا 45 ۽ انڊونيشيا جا 41 حاجي شهيد ٿيا. آمريڪي فلم نائيجريا جا 22، ڪيميرون جا 20، آئيوري ڪوسٽ جا 14، چاڊ جا 11، الجيريا جا 9 ۽ صوماليه جا 8 حاجي سانحي ۾ شهيد ٿيا. سينيگال جا 7، مراڪش جا 5، لييبا ۽ تنزانيه جا 4 – 4 ڪينيا جا 3 ۽ تيونس جا 2 حاجي منيٰ سانحي ۾ شهيد ٿيا. انگن اکرن موجب آئيوري ڪوسٽ جا 77، سينيگال جا 57، مراڪش جا 34 ۽ ليبيا جا 16 حاجي گم به آهن جن جو ڪو به پتو نه پئجي سگهيو آهي.

 

قندوز ۾ ٻئي ڏينهن به چڪريون، 16 شهرين سميت 96 ويڙهاڪ مارجي ويا

واشنگٽن (اين اين آءِ) افعانستان جي اتر شهر قندوز کي طالبان جي قبضي مان ڇڏائڻ واري ويڙهه ٻئي به جاري رهي ۽ شهر جي ڪيترن ئي علائقن ۾ چڪريون جاري آهن چڪرين ۾ 16 عام شهرين سميت 96 ويڙهاڪ مارجي ويا، جڏهن ته 250 کان وڌيڪ ماڻهو زخمي ٿيا آهن، افغان فورسز جي فضائي حملن ۾ طالبان جو سربراهه ۽ ان جو نائب مارجي ويو پر طالبان ان خبر جي ترديد ڪئي آهي. جڏهن ته آمريڪا اعتراف ڪيو آهي ته قندوز تي طالبان جو قبضو افغانستان حڪومت لاءِ وڏو ڌچڪو آهي . جڏهن تهاسان کي يقين آهي ته افغان فوج شهر تي ٻيهر ڪنٽرول حاصل ڪرڻ ۾ ڪامياب ٿي ويندي قندوز ۾ موجود افغان فوج جي مدد لاءِ نيٽو جي پرڏيهي فوج جا خصوصي جٿا هاڻي شهر ۾ پهچي ويا انهن جي مدد لاءِ نيٽو جي پرڏيهي فوج جا خاص جٿا به هاڻي شهر ۾ پهچي ويا، هوڏانهن افغان صدر اشرف غني چيو آهي ته سڪيورٽي فورسز ڪجهه سرڪاري عمارتن تان طالبان جو قبضو ڇڏائي ورتو آهي.