تازيون خبرون

Monthly Archives: September 2015

شام جا پناهگ:Syrian Refugees! : وينگ

انسانن انسانيت کي وساري ڇڏيو يا وري انسانيت ڪيڏانهن هلي وئي آهي جو ڪنهن جي دل ۾ شام جي عوام لاءِ تڪليف ناهي. عيد ڏهاڙن دوران مان مسلسل ميڊيا ۽ خاص طور تي مسلم ملڪن کي ڏسندي رهيس ته ڪير ٿو شام جي بي گهر ٿيندڙ عوام لاءِ آواز اُٿاري.

ائين بلڪل ناهي جو ڪنهن آواز نه اُٿاريو، ها! پوپ فرانسس شام جي عوام لاءِ آواز به اُٿاريو ته انهن کي شيلٽر ڏيڻ جي ڳالهه به ڪئي. پوپ فرانسس جو آواز شام جي عوام لاءِ ٻڌندي خوشي ٿي ته دنيا جي سيني تي اڄ به همدرداڻو آواز موجود آهي.

پوپ فرانسس شام جي عوام لاءِ هر وقت آواز اُٿاريندو رهيو آهي، هڪ ڏکئي ۽ مشڪل گهڙين ۾ پوپ فرانسس همدردي جو هٿ اڳيان ڪندي انسانيت کي زنده رکيو آهي. پوپ فرانسس جي هتي ڳالهه ان ڪري ڪئي پئي وڃي ته پوپ فرانسس مذهبي اڳواڻ آهي، ان جي باوجود به فرانسس شام جي عوام لاءِ آواز اُٿاريو ۽ دنيا جي ستل دلين کي جهنجهوڙيو.

جيتوڻيڪ شام کي ڇڏي ايندڙ عوام کي يورپ جا ڪجهه ملڪ ۽ خاص طور تي آمريڪا پنهنجي ملڪ ۾ خوش آمديد ڪري رهيا آهن.

شام جا زخم ڪنهن ٻاهرين قوت طرفان لڳل ناهن، پر شام کي درد ڏيندڙ پنهنجا ئي حڪمران آهن، يقينن شام جي خلاف اهي ملڪ جيڪي مسلم ملڪن ۾ سني اڪثريت رکن ٿا، انهن جي اڻ سڌي يا سڌي مداخلت ضرور آهي ته جيئن هو پنهنجي حڪمراني مڊل ايسٽ تي قائم رکن، پر اهو ڪٿان جو انصاف آهي ته جڏهن شام جو عوام بشار الاسد کي حڪمراني ڪندي نه ٿو ڏسڻ چاهي، پوءِ ڪهڙي سبب بشار الاسد ڪرسي تي ويٺل آهي؟ ايترو ئي نه پر بشار الاسد جي جنهن انداز سان روس ۽ ايران مدد ڪن پيا، ان کي ڪنهن به حوالي سان نظرانداز نٿو ڪري سگهجي. بشار الاسد، ضد ڪري حڪمراني ڪري رهيو آهي، جيڪڏهن ان کي آمريت چئجي ته گهٽ ناهي، ڇاڪاڻ جو شام پوري طرح تباهه ٿئي پيو نه صرف ايترو پر ان سان گڏوگڏ عوام جي وڌندڙ لڏپلاڻ جو عمل ڳڻتي جوڳو آهي.

پنهنجو ملڪ هوندي جلاوطن ٿيڻو پيو، پنهنجو گهر هوندي بي گهر ٿي، ڌاري سرحد آڏو گذارشون ڪرڻيون پون ٿيون ته انهن کي شيلٽر ڏنو وڃي. حيرت ان ڳالهه جي آهي ته جڏهن فلسطين ۽ اسرائيل مسئلو ڪجهه ڏينهن لاءِ اُٿندو آهي ته پوري دنيا خاص طور تي مسلم ملڪن ۾ انسانيت جو ڊرم وڄڻ لڳندا آهن ۽ لانگ مارچ ڪري انسانيت جا سبق پڙهڻ کان وٺي لوڪل پريس ڪلب آڏو احتجاج ڪرڻ سان گڏ فنڊز جمع ڪيا ويندا آهن.

پر شام جي مسئلي تي مسلم ملڪن جا انسانيت جي حوالي سان ٺيڪدار ۽ حڪمران خاموش ڇو آهن؟

ڇا خاموشي ان ڪري ئي آهي جو خود سني اڪثريت رکندڙ مسلم ملڪ ۽ ان سان گڏ بشار الاسد کي ساٿ ڏيندڙ مسلم ملڪ ان سڄي تباهي ۾ شامل آهن؟ شام ۾ دهشتگرد گروپ داعش جي دهشتگردي تي به خاموشي آهي.

داعش جي خلاف آمريڪا ۽ ان جا اتحادي ڪردار ادا ڪن پيا، هتي شام جو هڪ ڀيرو ٻيهر ذڪر ڪرڻ جو مقصد آهي ته شام جي مسئلي تي ٻٽا معيار ڇو آهن؟

شام جي عوام کي مدد جي ضرورت ناهي، جڏهن عيد تي قيمتي جانور خريد ڪري قربانيون ڪيون ويون ۽ انهن جانورن سان فوٽو ڪڍرايا ويا. ان وقت جڏهن شام مان بي گهر ٿيندڙ معصوم زندگين کي مدد جي ضرورت هئي.

انهن جي لاءِ فنڊز گڏ ڪري شام جي ريفيوجيز جي مدد ڪئي وڃي ها ته ڇا اها بهترين قرباني نه هجي ها؟

ايترو ئي نه پر ميڊيا به شام جي عوام کي نه ڏيکاريو ها! هتي اسرائيل ۽ فلسطين جي ويڙهه هجي ها، جنهن جا ڪيترائي سبب هوندا آهن، اتي ميڊيا جي اک مسلسل فلسطين جي هڪ خبر کي هلائيندي رهندي آهي ۽ شام تباهه ٿي رهيو آهي، شامي گهر جي ڇانوَ لاءِ دربدر ٿيندا پيا وڃن ته اتي سڀني جي اکين تي پٽيون ٻڌل آهن، ڄڻ شام ۾ ڪجهه ٿئي ئي نه پيو، وري به شام جي ريفيوجيز لاءِ پوپ فرانسس، آمريڪا ۽ يورپ جا ڪجهه ملڪ مدد جي لاءِ هٿ اڳيان ڪن پيا. انسانيت انهن وٽ زنده آهي پر عيد جي ڏهاڙي تي پنهنجن خوشين کي ملهايو ويو ۽ شام جي عوام جي درد ۽ دانهن کي ڪنهن به نه ٻڌو…..!

شام جي عوام هن ڀيري ڪيئن عيد ڪئي هوندي؟ ان جي لاءِ لکڻ جي ڪا به گنجائش ناهي، ڇاڪاڻ جو جتي غم ۽ ماتم هجي، اتي خوشيون رُسي وينديون آهن.

هڪ ڳالهه واضح ٿي وئي ته مسلم ملڪن ۾ جتي حڪمران انسانيت جي لاءِ وڏي دعويٰ ڪندا رهن ٿا، انهن طرفان شام جي عوام لاءِ رتي برابر به مدد نه ڪئي وئي، گهٽ ۾ گهٽ ايترو واضح ٿي ويو ته انسانيت تي به اهي حڪمران سياست کيڏيندا آهن، جڏهن پنهنجا مفاد هجن ۽ عوام کي گمراهه ڪرڻو هجي ته لانگ مارچ ڪڍي ويندي ۽ جڏهن پنهنجا مفاد پورا نه ٿين پر حقيقت ۾ ڪنهن جي مدد ڪرڻي هجي، ان وقت چپ جو روزو رکيو ويندو، ائين محسوس ڪرايو ويندو جو انهن جو ڪو واسطو ئي ناهي.

شام ۾ تباهي ۽ عوام جي درد تي ڪيترائي چهرا وائکا ٿي آيا آهن، تڪليف ۽ ڏک ۾ ڪير توهان کي ياد ڪري پنهنجو هٿ اڳيان ڪندي توهان کي پنهنجي ڀر ۾ ويهاري ته اهو عمل انسانيت جو عظيم يا کڻي اهو لکڻ ڏيو ان کي ئي انسانيت چئبو آهي. ها! پوپ فرانسس، اهو ثابت ڪري ڏيکاريو ته جن ملڪن شام جي عوام کي پناهه ڏني آهي، انهن کي خود شام جو عوام ڪيئن ٿو وساري سگهي! يقينن انهن جون اکيون شاهد آهن ته انهن جي ڏکئي وقت مدد ڪرڻ ۽ آواز ڪنهن اُٿاريو.

مسلم ملڪن جن شام جي بي گهر ٿيندڙ عوام جي مدد نه ڪئي ۽ نه ئي ان کي جهٽ گهڙيءَ لاءِ ياد ڪيو اهو به سڀ دنيا جي اکين ڏسي ورتو ته ڪير ڪيترو انسانيت جو رکوالو آهي!

عيد ۽ مشڪل ڏينهن گذري ويندا، ڪڏهن به سڀ ڪجهه هڪ جهڙو رهندو ناهي پر رويا ۽ عمل پنهنجي ڇاپ ڇڏي ويندا آهن، اهو توهان تي منحصر آهي ته توهان ڪهڙا ڇاپ ڇڏيو ٿا.

شامين جي دل ۽ روح تي هينئر ڪيترن ئي ڇاپ ڇڏيا آهن، انهن کي اهي ڪيئن وساري سگهن ٿا؟

شامين کي روڪڻ لاءِ هنگري حڪومت لوهي سيخن سان سرحد کي بند ڪري ڇڏيو آهي ڇا هنگري حڪومت جي ان عمل کي شام جو عوام ڪڏهن به وساري سگهندو؟ شايد ان جي حڪومت جو ڏنل اهو گهاءُ شام جي هر پيڙهي ياد رکندي.

ڳالهه زخم جي هجي ته ان تي مرهم رکجي پر هتي روح ۽ دل تي لڳل ڇاپ جي آهي، جنهن کي وسارجي به ته ڪيئن؟

شام جي ريفيوجيز کي جتي مسلم ملڪن وساري ڇڏيو، اتي پوپ فرانسس پنهنجي همدرداڻي آواز ذريعي ياد ڪري انسانيت کي زنده رکيو. شام جو عوام جيڪي هر سرحد کان ٻئي سرحد تائين پيڙاهه سان سفر ڪري رهيا آهن، انهن جي لاءِ پوپ فرانسس جو آواز درد تي مرهم جو ڪم ڪندو. آخر ۾ مون کي صرف هڪ سٽ ياد اچي ٿي ته ”اسان جي درد تي ڪنهن مرهم رکيو اهو به ياد رکجو!“

 

قرباني جي کلن جو معاملو ۽ حڪومتي قدم…..

هن ڀيري وفاقي توڙي صوبائي سطح تي قرباني جي کلن کي گڏ ڪرڻ واري سنگين مسئلي جو نوٽيس ورتو ويو ۽ انهن تنظيمن تي ڪڙي نظر رکي وئي، جن زبردستي قربانيءَ جون کلون گڏ ڪيون يا ماضيءَ ۾ هُو ان سلسلي ۾ ڌمڪين ۽ دهمانن وسيلي قرباني ڪندڙ ماڻهن کي يرغمال بڻائينديون رهيون. هن ڀيري عيدالاضحيٰ جي موقعي تي انهن تنظيمن تي پابندي لڳائي وئي، جيڪي قرباني جي کلن جي عطيي کي دهشتگردي ۽ فرقيواريت لاءِ استعمال ڪنديون رهيون آهن، سڄي ملڪ ۾ قومي ايڪشن پلان تحت اهو فيصلو ڪيو ويو ته ڪنهن به تنظيم کي زبردستي قربانيءَ جون کلون گڏ ڪرڻ نه ڏنيون وينديون ۽ انهيءَ سلسلي ۾ سمورن ضلعن جي ڊي سيز ۽ ٻين عملدارن کي خاص هدايتون به جاري ڪيون ويون، جنهن بعد قلم 144 لاڳو ڪيو ويو ۽ زبردستي کلون گڏ ڪندڙ تنظيمي ماڻهن کي گرفتار به ڪيو ويو. نتيجي ۾ ايم ڪيو ايم ڪراچي ۾ رينجرز جي ڪارروائين سبب قرباني جون کلون گڏ ڪرڻ جو عمل معطل ڪرڻ جو اعلان ڪري ڇڏيو، متحده جي مرڪزي اڳواڻ ڊاڪٽر فاروق ستار جو پريس ڪانفرنس دوران چوڻ هو ته رينجرز سندس جماعت پاران گڏ ڪيل کلن جي ٽرڪن کي پنهنجي تحويل ۾ وٺي ڇڏيو، ان ڪري هو مجبور ٿي خدمت خلق فائونڊيشن لاءِ کلون گڏ ڪرڻ جو آپريشن بند ڪري رهيا آهن. هن ان ڳالهه کي به رد ڪيو ته متحده جا ڪارڪن جبري طور تي کلون گڏ ڪري رهيا هئا. هئڻ ته ائين کپي ته قرباني جون کلون مستحق ۽ غريب طبقي سان تعلق رکندڙ ماڻهن کي ڏنيون وڃن، جيڪي ان جا حقيقي حقدار آهن، ڇوته قرباني صرف گوشت جي ناهي هوندي، جانور جي وار کان وٺي هر عضوو قرباني جي عمل ۾ شمار ٿئي ٿو، ان ڪري قربان ٿيندڙ جانور جي کل به انهيءَ مستحق ماڻهوءَ کي ملڻ گهرجي، جيڪو ان جو اصل حقدار هجي. معاشري ۾ ان ڳالهه کي به اجاگر ڪرڻ گهرجي ته قرباني جون کلون غريب ۽ بي پهچ ماڻهن کي ملڻ سان ان مان ملندڙ آمدني کي دهشتگرد پنهنجو معاشي ذريعو بڻائي نه سگهندا. حج دوران حاجي سڳورا ۽ انهن سان گڏ دنيا جي مختلف ملڪن ۾ ڪروڙين مسلمان جانور قربان ڪندا آهن، اهو مسلمانن جو اهڙو مذهبي فرض آهي، جيڪو نه رڳو اسان کي روحاني طور سرشار ڪري ٿو، پر اسان جي معاشري ۾ پيار، محبت ۽ ڀائيچاري کي به جنم ڏئي ٿو، حضرت ابراهيم عليه السلام جي قرباني جو مقصد الله پاڪ جي خوشنودي حاصل ڪرڻ هو، اسان جو به اهو ئي مقصد هجڻ گهرجي. اها حقيقت آهي ته موجوده حڪومت ملڪ ۾ امن امان جي قيام لاءِ جيڪي قدم کنيا آهن، انهن جو مثبت نتيجو ملي رهيو آهي، ان سان گڏوگڏ سرڪاري ادارن ۾ بدعنوانين کي ٻُنجو ڏيڻ لاءِ به بهتر قدم کنيا پيا وڃن، پر رڳو حڪومتي سطح تي ٿيندڙ فيصلا ڪافي ناهن، پر حڪومت سان گڏوگڏ ميڊيا، سماجي تنظيمن، عالمن، مقامي سطح تي چونڊجندڙ نمائندن توڙي هر مڪتب فڪر جي ماڻهن کي سماجي سڌارن لاءِ اجتماعي ڪردار ادا ڪرڻو پوندو. قربانيءَ جون کلون اصل حقدارن تائين پهچائڻ لاءِ حڪومتي قدمن کي ڪامياب بڻائڻ جي ذميوارين ۾ شهرين جو فرض به شامل آهي ته هو ان حوالي سان اڳڀرا ٿين، ڇوته انسانيت جي فلاح لاءِ هر شخص کي پنهنجي سوچ کي مثبت بڻائڻو پوندو ۽ پنهنجي من ۾ نيڪ ارادن لاءِ اهڙي قوت پيدا ڪرڻي پوندي، جيڪا درست فيصلو ڪرڻ جي ضامن بڻجي سگهي، هر انسان کي پنهنجا ذاتي مفاد اجتماعي مفادن کي هٿي ڏيڻ لاءِ قربان ڪرڻا پوندا، انصاف جي سائميءَ کي متوازن رکڻ لاءِ پنهنجي نفس جي انهن خواهشن کي مارڻو پوندو، جيڪي انساني حقن جون قاتل بڻجن ٿيون.

 

پاڪ چين اقتصادي راهداري منصوبي سان پوري خطي جي قسمت جاڳي پوندي: نواز شريف

نيويارڪ (اين اين آءِ) وزيراعظم نواز شريف چين جي صدر شي جن پنگ ۽ گڏيل قومن جي جنرل سيڪريٽري بان ڪي مون جي صدارت ۾ ترقي پذير ملڪن جو پاڻ ۾ تعاون تي هڪ سربراهي اجلاس ۾ شرڪت ڪئي. سڄي دنيا جي ترقي پذير ملڪن وچ ۾ تجارت جو حجم چار کرب ڊالرز کان وڌيڪ آهي. نواز شريف چيو ته پاڪستان به ان عمل ۾ اڳ اڳ آهي. پاڪ چين اقتصادي راهداري جو ذڪر ڪندي نواز شريف چيو ته اها رٿا خطي جي اقتصادي ترقي ۾ خاص ڪردار ادا ڪندي. هن چيو ته ڏکڻ تعاون وقت جي اهم ضرورت آهي ۽ عالمي برادري کي گهرجي ته اها هن تعاون کي هٿي ڏيڻ ۾ ڪردار ادا ڪري. دنيا جي ترقي پذير ملڪن ۾ سيڙپڪاري ۾ 50 سيڪڙو کان وڌيڪ اضافو ٿي چڪو آهي ۽ هن ۾ وڌيڪ اضافي جو امڪان آهي. هن چيو ته پاڪ چين اقتصادي راهداري منصوبي سان پوري خطي جي قسمت جاڳي پوندي. هن چيو ته چين پاڪستان اقتصادي راهداري رٿا سڄي خطي ۽ ٻين ملڪن لاءِ وڏي اقتصادي فائدن واري آهي. وزيراعظم چيو ته پاڪستان ڏکڻ جي ملڪن وچ ۾ واپار ، سيڙپڪاري انساني وسيلن جي ترقي ٽيڪنالوجي ۽ مالياتي وسيلن جي شعبن ۾ تعاون کي پنهنجي مفاد ۾ سمجهي ٿو. هن چيو ته هي اجلاس هڪ اهم موقعي تي ٿيو جنهن مان 2015 کانپوءِ جي ترقياتي ايجنڊا کي موجوده مسئلن ۽ حدفن کان هم آهنگ ڪرڻ ۾ مدد ملندي. هي گول ميز ڪانفرنس جٽادار ترقي بابت گڏيل قومن جي سربراهه اجلاس ۽ 2030 جي ترقياتي ايجنڊا جي منظوري جي موقعي تي منعقد ڪئي وئي.

 

سنڌ ۾ 80 سيڪڙو کان وڌيڪ امن بحال ٿي ويو آهي: قائم علي شاهه

لاڙڪاڻو(اي پي پي) وزير اعليٰ سنڌ سيد قائم علي شاهه اڄ ڳڙهي خدابخش ڀٽو پهچي عيدالاضحيٰ جي نماز ادا ڪئي. ان بعد شهيد ذوالفقار علي ڀٽو، شهيد محترمه بينظير ڀٽو، شهيد مير مرتضيِٰ ڀٽو، شهيد شاهنواز ڀٽو، مرحومه بيگم نصرت ڀٽو ۽ مرحومه امير بيگم جي مزارن تي حاضري ڀري فاتحه پڙهي ۽ گلن جون چادرون چاڙهيون. ان بعد وزير اعليٰ سنڌ عام ماڻهن سان عيد  ملي ۽ انهن سان گڏجي ماني پڻ کاڌي، ماڻهن ۾ رلي ملي ويو ۽ انهن کان حال احوال وٺندو رهيو. ان موقعي تي ميڊيا سان ڳالهائيندي وزير اعليٰ چيو ته اڄ اسين عيدالعضحيٰ ملهائي رهيا آهيون ۽ هتي آءُ پنهنجي شهيد اڳواڻن کي سلام پيش ڪرڻ آيو آهيان ۽اها عام ڳالهه آهي ته سنڌ ۾ جيڪي حالات آهن اسان جي ۽ اسان جي اڳواڻن جي انهن تي گهري نظر آهي ۽ ڪوشش ڪري رهيا آهيون ته حالات کي وڌيڪ بهتري طرف وٺي وڃون ۽ جيڪي مشڪلات آهن انهن کي ختم ڪجي،نارٿ وزيرستان، ٽرائيبل ايرياز ۽ سنڌ ۾ امن امان جي صورتحال تي ملڪ کي تشويش هئي جنهن جي ڪري چيف آف آرمي اسٽاف وڏي همت ۽ حذبي سان اهو فيصلو ڪيو ته پوري ملڪ ۾ آپريشن ٿيندو، خاص ڪري ٽرائيبل ايريا ۽ نارٿ وزيرستان ۾ جيڪو دهشتگردن جو ڳڙهه آهي. سنڌ ۾ پوليس ۽ رينجرس سٺو ڪم ڪيو آهي ۽ ڪافي حد تائين بهتري آئي آهي. هن چيو ته سنڌ ۾ رينجرز ڪافي وقت کان آهي آپريشن جي سلسلي ۾ جڏهن وزيراعظم آيو ته فيصلو ڪيو ويو ته رينجرز چئن ٽاسڪ تي ڪم ڪندي جنهن سان پوليس پڻ هوندي. هن چيو ته سنڌ حڪومت جي ڪوششن سان امن امان بهتر ٿيو آهي ۽ ان ۾ چيف آف آرمي اسٽاف جنرل راحيل شريف جو پڻ اهم ڪردار آهي ۽ هن وقت سنڌ ۾ اٽڪل 80 سيڪڙو کان وڌيڪ امن امان ۾ بهتري آئي آهي. هن چيو ته الله تعاليٰ جي مهرباني سان اسان امن امان قائم ڪرڻ ۾ ڪامياب وياسين ۽ اڄ توهان ڏسي رهيا آهيون ته ڪراچي، حيدرآباد توڙي سموري سنڌ ۾ عيدون،يوم دفاع توڙي ٻيا ايونٽ ملهايا ۽ ماڻهن مختلف تفريحي گاهن ۾ وڃي تفريح ڪئي ۽ لطف اندوز ٿيا. هن چيو ته هاڻي اغوا اٽڪل زيرو ٿي وئي آهي جيڪا حڪومت جي ڪارڪردگي آهي. ان کان وڌيڪ حڪومت ڇا ڪري. هن چيو ته سنڌ ۾ ترقياتي ڪم ٿيا آهن ۽ اڃا به ٿيندا انهن ۾ صحت، تعليم، ورڪس، ڪلچر وغيره وغيره ۾ بهتري آئي آهي ۽ اڃا به ايندي ۽ سڪون وڌندو، ان لاءِ حڪومت ڏينهن رات محنت ڪري رهي آهي. هن چيو ته لوڪل باڊيز اليڪشن سنڌ ۽ پنجاب ۾ خير خوبي سان ٿي ويندي جنهن ۾ انشاءَ الله پاڪستان پيپلز پارٽي سوڀاري ٿيندي. هن چيو ته اسان جيڪو رينجرس کي مينڊيٽ ڏنو آهي ان ۾ جيڪڏهن ان کي ريگيوليٽ ڪرڻ جي ضرورت پئي ته پارٽي جي ميمبرن سان صلاح مشوري کانپوءِ ڪئي ويندي، هونءَ به اسان کي هڪ ٻه قانون آڻڻو آهي. هن چيو ته خير پختونخواهه ۾ ڪرپشن جي سلسلي ۾ قانون ٺاهيو آهي اينٽي ڪرپشن صوبائي سبجيڪٽ آهي ته ان تي قانون سازي ڪري عمل به ڪرائي سگهجي ٿو پر اهو جيڪو چيو وڃي ٿو ته صرف سنڌ ۾ ڪرپشن آهي مان سمجهان ٿو ته اهو صحيح نه آهي. هن چيو ته مان ڪنهن به صوبي جو نالو نه وٺندس پر ڪرپشن ٻئي هنڌ به آهي جيڪڏهن ائين نه هجي ها ته خيرپختونخواه حڪومت ڪرپشن لاءِ نئون قانون ڇو ٺاهيو آهي. هڪ سوال جي جواب ۾ هن چيو ته ڊاڪٽر عاصم جي ڪيس جي انويسٽيگيشن ٿي رهي آهي ۽ ڪيس ڪورٽ ۾ هلي رهيو آهي ڊاڪٽر عاصم ايڇ اي سي جو چيئرمين هو ۽ ڊاڪٽرس ايسوسئيشن جو چيئرمين رهيو آهي،هن جي پنهنجي ذاتي حيثيت آهي پر ان متان ڪو ڪرائيم آهي ته ڪورٽ ۾ چالان ٿي سگهي ٿو ان جا 2 حصا آهن جيڪڏهن ڪرپشن جي ڳالهه آهي ته پوءِ ان تي انڪوائري سنڌ حڪومت کي ڪرڻي پوندي جيڪڏهن ڪو سيريس ڪرائيم آهي ته رينجرس ۽ پوليس انويسٽيگيشن ڪندي.

 

صدر ممنون حسين جا سعودي شاهه، ترڪ صدر ۽ وزيراعظم سميت مختلف سربراهن سان ٽيليفون رابطا عيد جون واڌايون ڏنيون

اسلام آباد (اين اين آءِ) صدر ممنون حسين منيٰ سانحي ۾ حاجي سڳورن جي شهادت تي سعودي شاهه سلمان بن عبدالعزيز سان افسوس جو اظهار ڪيو آهي. صدر ممنون حسين سمورن مسلم ملڪن تي زور ڀريو آهي ته اها ملمانن جا مسئلا حل ڪرڻ لاءِ گڏ ٿي وڃن. هو ٽيليفون تي مختلف ملڪن جي اڳواڻن سان ڳالهه ٻولهه ڪري رهيو هو صدر کين عيد جون واڌايون به ڏنيون. سعودي شاهه سان ڳالهائيندي هن چيو ته ٻنهي ملڪن وچ ۾ تاريخي ڀائرانه لاڳاپا آهن جيڪي وقت گذرڻ سان وڌيڪ مضبوط ٿي رهيا آهن. هن منيٰ واقعي تي سعودي شاهه سان تعزيت ڪئي. ترڪ صدر رجب طيب اردگان ۽ وزيراعظم احمد اوگلو سان ڳالهائيندي ممنون حسين وڌندڙ بطرفن لاڳاپن تي جيڪي اسٽريٽجڪ پارٽنرشپ ۾ تبديل ٿي رهيا آهن انهن تي اطمينان جو اظهار ڪيو. امير قطر شيخ طيمم بن حماد سان ڳالهائيندي صدر اميد ظاهر ڪئي ته قطر عالمي امن استحڪام ۽ بين المذاهب کي هٿي وٺرائڻ لاءِ پنهنجو ڪردار ادا ڪندو. ممنون حسين افغان صدر سان پڻ ڳالهه ٻولهه ڪئي. هن آذر بائيجان جي صدر ۽ بحرين جي شاهه کي به ٽيليفون ڪيو ۽ کين عيد جون واڌايون ڏنيون.

 

هر پاڪستاني حاجي خيريت سان گهر نه پهچڻ تائين حڪومت سک سان نه ويهندي: پرويز رشيد

اسلام آباد (اين اين آءِ) سڌ سماءَ جي وفاقي وزير سنيٽر پرويز رشيد چيو آهي ته هر پاڪستاني حاجي جي خيريت سان گهر نه پهچڻ تائين حڪومت سک سان نه ويهندي، وزيراعظم مذهبي معاملن واري وزارت، پاڪستاني سفارتخاني کي سمورن حاجي سڳورن بابت معلوم ٿي وڃڻ تائين سعودي عرب ۾ رهڻ جي هدايت ڪئي آهي. هڪ بيان ۾ هن چيو ته جيستائين هر هڪ پاڪستاني حاجي خيريت سان پنهنجي گهر نه پهچندو حڪومت ان وقت تائين سک سان نه ويهندي. هن چيو ته 135 حاجي سڳورن جي خبر پئجي وئي آهي جڏهن ته ٻين بابت جلد خبر پئجي ويندي. هن چيو ته حادثن ۾ ڪيترن ئي حاجين جو موبائل فون وڃائجي وڃڻ ۽ ڪيترن ئي جي پنهنجن مٽن مائٽن وٽ منتقل ٿيڻ سبب ڳولائي ۾ ڏکيائي پيش آئي. وزيراعظم مذهبي معاملن واري وزارت ۽سعودي عرب ۾ پاڪستاني سفارتخاني کي هدايت ڪئي آهي ته سمورن حاجي سڳورن بابت معلومات ٿي وڃڻ تائين سعودي عرب ۾ ئي ترسن.

 

دهشتگردي خلاف فوج کي پوري قوم جي حمايت حاصل آهي: جنرل راحيل شريف

اسلام آباد (اين اين آءِ) پاڪ فوج جي سربراهه جنرل راحيل شريف هڪ دفعو ٻيهر چيو آهي ته دهشتگردي خلاف فوج کي پوري قوم جي حمايت حاصل آهي ۽ سڀني کي گڏجي رياست جي دشمنن کي ناڪام بڻائڻو آهي. آءِ ايس پي آر مطابق اها ڳالهه هن عيد ڏينهن خيبر ايجنسي ۾ مقرر فوجين کي خطاب دوران چئي. راحيل شريف عيد ڏهاڙو اولهندي سرحد تي مقرر آفيسرن ۽ جوانن سان گڏجي ملهائي ۽ فرض نڀائڻ ۾ سندن حوصلا وڌايا ۽ انهن جي ساراهه ڪئي. ان موقعي تي سندس چوڻ هو ته پوري قوم کي دهشتگردن خلاف متحد ٿيڻ گهرجي. پاڪستان سپهه سالار ان ڳالهه تي زور ڀريو ته دهشتگردن کي سرحد پار پنهنجون پنگاهون ٺاهڻ کان روڪڻ لاءِ جي ضرورت آهي. پاڪستاني فوج گذريل سال جون ۾ شدت پسند جي مضبوط ڳڙهه اتروزيرستان ۾ ضرب عضب جي عنوان سان ڀرپور ڪاميابي شروع ڪئي هئي جنهن ۾ هن وقت تائين 3 هزار کان وڌيڪ دهشتگردن کي ماريو ويو آهي ضرب عضب کان علاوه قبائلي خيبر ايجنسي ۾ به خيبر ون ۽ خيبر ٽو جي نالي سان ڪارراوئيون شروع ڪيون ويون فوجي آپريشن شروع ٿيڻ کانپوءِ ملڪ ۾ امن امان جي صورتحال بهتر ڏٺي وئي آهي پر هاڻي به تشدد جا ڪجهه واقعا ٿيندا رهن ٿا. جن کي عملدار شدت پسندن خلاف جاري ڪارروائين جو رد عمل قرار ڏين ٿا.

 

احتساب ڪميشن خيبرپختونخواهه ۾ ٺهي سگهي ٿي ته پوءِ سنڌ ۾ ڇو نه ؟: نثار کهڙو

لاڙڪاڻو(اي پي پي) سنڌ جي اطلاعات ۽ تعليم واري سينيئر وزير نثار احمد کهڙو چيو آهي ته جيڪڏهن احتساب ڪميشن خيبرپختونخواهه ۾ ٺهي سگهي ٿي ته پوءِ سنڌ ۾ ڇو نه ٿي ٺهي سگهي، سنڌ ته خيبرپختونخواهه کان به وڏو صوبو آهي. اهڙن خيالن جو اظهار هن ڳڙهي خدابخش ۾ شهيد ذوالفقار علي ڀٽو، شهيد محترمه بينظير ڀٽو، شهيد مير مرتضيٰ ڀٽو، شهيد شاهنواز ڀٽو، مرحومه بيگم نصرت ڀٽو ۽ مرحومه امير بيگم جي مزارن تي حاضري ڀري فاتحه پڙهي ۽ گلن جون چادرون چاڙهڻ بعد ميڊيا سان ڳالهائيندي ڪيو. هن چيو ته ان ڏس ۾ احتساب ڪميشن جو خاڪو تيار ڪيو ويو آهي جيڪو منظوري لاءِ سنڌ اسيمبليءَ ۾ پيش ڪيو ويندو  ۽ اسيمبيءَ مان منظور ٿيڻ کانپوءِ ان کي قانوني شڪل ڏني ويندي ۽ عمل درآمد ڪيو ويندو. هن هڪ سوال جي جواب ۾ چيو ته پ پ پ ڪارڪردگي جي بنياد تي بلدياتي اليڪشن ۾ ڪاميابي حاصل ڪندي. هن چيو ته پ پ پ تي ڌانڌلي جا الزام غلط ۽ بي بنياد آهن جيڪي جماعتون کٽي نه ٿيون سگهن ۽ انهن کي پنهنجي هار نظر اچي ٿي ته اهي هروڀرو واويلا پيون ڪن. هن وڌيڪ چيو ته مڪاني چونڊون اليڪشن ڪميشن جي نگراني ۾ ٿي رهيون آهن ۽ آفيسر به اليڪشن ڪميشن پوسٽ ڪري پئي. هن چيو ته اليڪشن ڪميشن جي طرفان ترقياتي ڪمن، نوڪرين توڙي ٽرانسفر ۽ پوسٽنگ تي پابندي لڳل آهي. هن چيو ته 27 سالن کانپوءِ سنڌ کي خودمختياري ملي آهي هن وڌيڪ چيو ته مڪاني چونڊن جي اميدوارن کي 30 سيپٽمبر تائين ٽڪيٽون ڏنيون وينديون جنهن بعد نشان الاٽ ڪيا ويندا. پ پ پ تير جي نشان تي اليڪشن وڙهي سوڀاري ٿي غريب عوام جي اڳ جيان خدمت ڪندي  ان کان اڳ سينيئر صوبائي وزير جناب نثار احمد کهڙو عيدالعضحيٰ جي نماز پنهنجي اباڻي ڳوٺ عاقل ۾ ادا ڪئي ۽ اتي موجود ماڻهن سان عيد مليو ۽ انهن سان گڏجي ماڻي کاڌي جنهن بعد هن سان مختلف وفدن پڻ ملاقات ڪئي.

 

وزيراعظم جون عالمي اڳواڻن سان ملاقاتون ڪامياب رهيون: پرڏيهي سيڪريٽري اعزاز احمد چوڌري

نيويارڪ (اي پي پي) پرڏيهي سيڪريٽري اعزاز احمد چوڌري چيو آهي ته وزيراعظم محمد نواز شريف جي جون عالمي اڳواڻن سان ملاقاتون ڪامياب رهيون. ڇنڇر ڏينهن نيويارڪ ۾ پريس بريفنگ ڏيندي هن چيو ته وزيراعظم محمد نواز شريف سان جرمن چانسلر انجيلا مرڪل، سريلنڪن صدر ميٿري پالا سريسينا، سوئيڊش وزيراعظم اسٽيفن لوفو ين ۽ مائيڪروسافٽ جي باني بل گيٽس ملاقاتون ڪيون. وزيراعظم جرمن چانسلر سان ملاقات ۾ دهشتگردي جي خاتمي جي حوالي سان پاڪستان جي ڪوششن کان کيس آگاهه ڪيو. سريلنڪا جي صدر سان ملاقات ۾ وزيراعظم محمد نواز شريف سريلنڪا جي صدر سان علائقائي صورتحال ۽ خاص ڪري ڀارت ۽ افغانستان جي تناظر ۾ ڳالهه ٻولهه ڪئي. سوئيڊش وزيراعظم سان ملاقات ۾ ٻنهي اڳواڻن تجديد جوڳي توانائي، واپار، صحت، تعليم ۽ سوئيڊن ۾ پاڪستانين جي ڪردار سميت ٻين معاملن تي ڳالهه ٻولهه ڪئي. هن ٻڌايو ته وزيراعظم بل گيٽس سان ملاقات ۾ پاڪستان مان پوليو جي خاتمي لاءِ حڪومتي قدمن بابت کيس آگاهه ڪيو. بل اينڊ ويلنڊا گيٽس فائونڊيشن جي معاونت سان صحت واري شعبي ۾ شروع ڪيل منصوبن بابت پڻ خيالن جي ڏي وٺ ڪئي وئي. بل گيٽس پاڪستان حڪومت جي پوليو جي خاتمي لاءِ ڪردار کي واکاڻيو. پرڏيهي سيڪريٽري ٻڌايو ته وزيراعظم محمد نواز شريف ڏکڻ تعاون گول ميز ڪانفرنس کي پڻ خطاب ڪيو. ڪانفرنس گڏيل قومن جي سيڪريٽري جنرل بان ڪي مون ۽ چيني صدر شي جن پنگ جي صدارت هيٺ ٿي. ڪانفرنس ۾ خطاب ڪندي هن پاڪ چين اقتصادي لنگهه کي خطي لاءِ اهم قرار ڏنو.

 

ناڻي واري وزير اسحاق ڊار جي ناڻي واري آمريڪي نائب وزير سارا بلوم راسڪن سان ملاقات

اسلام آباد (اي پي پي) ناڻي واري وفاقي وزير سينيٽر محمد اسحاق ڊار آمريڪا جي ناڻي واري نائب وزير سارا بلوم راسڪن سان واشنگٽن ۾ ملاقات ڪئي ۽ کيس ٻن سالن جي مختصر عرصي ۾ پاڪستاني معيشت ۾ نمايان بهتري بابت آگاهه ڪيو، سنيٽر اسحاق ڊار چيو ته پاڪستاني معيشت جي بحالي ۽ بهتري کي عالمي مالياتي ادارن ۽ ريٽنگ جي ادارن پڻ واکاڻيو آهي، هن ناڻي واڌ ۽ مالي خساري ۾ نمايان گهٽتائي جي ڊي پي جي شرح ۾ اضافي ۽ پرڏيهي مٽا سٽا واري ناڻي جي ذخيرن ۽ ڏيساور مان ايندڙ ناڻي ۾ رڪارڊ اضافي بابت پڻ کيس آگاهه ڪيو، گذريل ڏينهن جاري ٿيل بيان موجب ناڻي واري وزير چيو ته 500 ملين ڊالر جي يورو بانڊز جي ڪاميابي سان جاري ٿيڻ سان پاڪستاني معيشت تي عالمي سيڙپڪارن جي اعتماد جي عڪاسي ٿئي ٿي، ناڻي واري وزير آمريڪي عهديدار کي يقين ڏياريو ته پاڪستان توانائي ۽ ترقي وارن شعبن ۾ سڌارن جو عزم ڪيو آهي، آمريڪي ڊپٽي سيڪريٽري راسڪن ناڻي واري وزير کي يورو بانڊز جاري ڪرڻ تي مبارڪون ڏيندي چيو ته ان سان پاڪستان جي معيشت تي سيڙپڪارن جي گهري اعتماد جو اظهار ۽ پاڪستاني معيشت جي رخ جو اندازو ٿئي ٿو، هن چيو ته پاڪستاني معيشت ۾ ترقي جي صلاحيت موجود آهي.