تازيون خبرون

Daily Archives: September 29, 2015

وڌيڪ شعبن جي نشاندهي ڪري اڳيان وڌڻ جي ضرورت آهي: نواز شريف

نيويارڪ (اين اين آءِ) وزيراعظم محمد نوازشريف پاڪ چين گڏيل ڪاوشن جي ايف 17 ٿنڊر جهازن سميت سنيگال کي دفاعي سامان وڪرو ڪرڻ جي آڇ ڪندي چيو آهي ته وڌيڪ شعبن جي نساندهي ڪري اڳيان وڌڻ جي/ضرورت آهي گذريل ڏينهن وزيراعظم محمد نوازشريف سنيگال جي صدر ميڪيسال سان ملاقات ڪئي جنهن ۾ مختلف شعبن ۾ لاڳاپن کي وڌيڪ مضبوط ڪرڻ تي غور ڪيو ويو وزيراعظم ان موقعي تي ترقي پذير ملڪن وچ ۾ گڏيل مفادن ۽ تعمير ۽ ترقي تي ٻڌل لاڳاپا قائم ڪرڻ جي حوالي سان پنهنجي وزن کان آگاهه ڪيو هن چيو ته ٻنهي ملڪن وچ ۾ تعاون جا وسيع امڪان موجود آهن جنهن لاءِ وڌيڪ شعبن جي نشاندهي ڪري اڳيان وڌڻ جي ضرورت آهي وزيراعظم پاڪ چائنا جي گڏيل ڪاوش جي ايف 17 ٿنڊر جهازن سميت سينگال کي دفاعي سازوسامان وڪرو ڪرڻ جي آڇ ڪئي سينگال جي صدر مختلف شعبن ۾ پاڪستان جي ترقي ۽ مسلمانن ۾ پاڪستان جي اهم ڪردار جي تعريف ڪئي. هن چيو ته سائنس ۽ ٽيڪنالوجي جي شعبن ۾ پاڪستان جي ترقي آفريڪي ملڪن لاءِ روڊ ماڊل جي حيثيت رکي ٿي. ان هر سطح تي ٻنهي ملڪن وچ ۾ لاڳاپن کي مضبوط ڪرڻ ۾ خاص دلچسپي جو اظهار ڪيو ٻنهي اڳواڻن گڏيل لاڳاپن ۽ خطي جي صورتحال سميت ٻنهي ملڪن وچ ۾ اقتصادي ۽ دفاعي لاڳاپا مضبوط ڪرڻ لاءِ مختلف امڪانن تي غور ڪيو. دوري ۾ وزيراعظم گڏيل قومن جي 70هين اجلاس جي موقعي تي گڏيل قومن جي هيڊ ڪوارٽر ۾ ڏکڻ ڪوريا جي صدر پارڪ جيوان هاءِ سان ملاقات ۾ ٻنهي ملڪن وچ ۾ تجارتي لاڳاپن جي مضبوطي لاءِ ڳالهه ٻولهه ڪئي ان سلسلي ۾ وزيراعظم محمد نوازشريف ڏکڻ ڪوريا سان آزاداڻي واپار جي معاهدن جي تجويز پيش ڪئي ۽ چيو ته پاڪستان ڏکڻ ڪوريا پاران وڌيڪ سيڙپڪاري کي ڀليڪار چوندو. هن چيو ته بجلي جي پيداوار حڪومت جي ترجيحي آهي ان ڏس ۾ ڏکڻ ڪوريا جون ڪمپنيون ڀرپور حصو وٺي سگهن ٿيون. هن پاڪستان جي دوري لاءِ وزيراعظم نوازشريف جي دعوت پڻ قبول ڪئي. ٻئي طرف وزيراعظم نواز شريف ملڪ ۾ توانائي جي کوٽ تي ضابطو آڻڻ لاءِ ڊيمن جي اڏاوت لاءِ عالمي بئنڪ کان مالي مدد گهري آهي، هن اها ڳالهه عالمي بئنڪ جي صدر جم يونگ ڪم سان گڏيل قومن جي جنرل اسيمبلي جي 70 هين اجلاس جي موقعي تي ملاقات دوران چئي. وزيراعظم گذريل سالن ۾ خاص طور تي بنيادي ڍانچي جي ترقي، توانائي، پاڻي ۽ سماجي شعبن ۾ پاڪستان لاءِ عالمي بئنڪ جي مالي مدد ۽ فني مدد تي ٿورا مڃيا. عالمي بئنڪ جي صدر موجوده حڪومت جي اثرائتين مالياتي پاليسين جي ڪري پاڪستان جي اقتصادي صورتحال ۾ بهتري جي واکاڻ ڪندي چيو ته پاڪستان جي متاثر ڪندڙ واڌ ويجهه کي هر ڪنهن نوٽ ڪيو آهي، ملاقات ۾ وزيراعظم جي قومي سلامتي بابت صلاحڪار سرتاج عزيز، ناڻي واري وزير اسحاق ڊار، وزيراعظم جي خاص مددگار طارق فاطمي ۽ ٻين اعليٰ عملدارن وزيراعظم جي رهنمائي ڪئي

 

منيٰ سانحو: 40 پاڪستاني حاجين جي شهيد ٿيڻ جي تصديق، 63 اڃان به لاپتا

اسلام آباد (بيورو) پاڪستان حڪومت منيٰ ۾ شهيد ٿيل حاجي سڳورن جي وارثن کي 5، 5 لک روپيا ڏيڻ ۽ سرڪاري خرچ تي عمرو ڪرائڻ جو اعلان ڪيو آهي، منيٰ سانحي جي فوڪل پرسن نوازليگ جي ايم اين اي طارق فضل پريس ڪانفرنس دوران اعلان ڪندي چيو ته منيٰ سانحي ۾ شهيد پاڪستاني حاجي سڳورن جي وارثن کي 5،5 لک روپيا ۽ زخمي حاجين کي 2،2 لک روپيا ڏنا ويندا، جڏهن ته منيٰ سانحي ۾ پاڪستاني حاجين جي شهيد ۽ 35 جي زخمي ٿيڻ جي پڻ تصديق ڪئي وئي آهي. وفاقي حڪومت طرفان شهيد ٿيل پاڪستاني حاجين جي وارثن کي سرڪاري خرچ تي عمرو ڪرائڻ جو پڻ اعلان ڪيو ويو آهي، جڏهن ته 40 پاڪستاني حاجين جي شهيد ۽ 35 جي زخمي ٿيڻ جي پڻ تصديق ڪئي وئي آهي. منيٰ سانحي ۾ 40 پاڪستاني حاجين جي شهيد ٿيڻ جي تصديق ٿي وئي، سانحي بعد گم ٿيل حاجين جي ڳولا ڪئي پئي وڃي، پاڪستاني سفير منظور الحق چيو آهي ته 3 سئو جي لڳ ڀڳ گم ٿيل حاجين مان 221 حاجين سان رابطو ٿي ويو آهي.مذهبي معاملن واري وزارت منيٰ سانحي ۾ شهيد ٿيل پاڪستاني حاجين جا نالا ۽ سندن تفصيل پنهنجي ويب سائيٽ تي جاري ڪري ڇڏيا آهن.سعودي عرب ۾ مقرر پاڪستان جي سفير منظور الحق تصديق ڪندي چيو آهي ته منيٰ سانحي ۾ شهيد پاڪستاني حاجين جو انگ 40 ٿي ويو آهي، سانحي ۾ 35 پاڪستاني حاجي زخمي ٿيا آهن.پاڪستاني سفير چيو ته 3 سئو جي لڳ ڀڳ گم ٿيل حاجين مان 221 حاجين سان رابطو ٿي ويو آهي، باقي گم ٿيل رڳو 63 حاجين جي ڳولا ڪئي پئي وڃي.

 

قائم علي شاهه سان سعودي عرب سميت مختلف اسلامي ملڪن جي سفاتڪارن ۽ قونصل جنرلز جي ملاقات

ڪراچي (اي پي پي) وزير اعليٰ سنڌ سيد قائم علي شاهه سان ڪالهه سومر ڏينهن مختلف اسلامي ملڪن جي قونصل جنرلن، نائب قونصل جنرلن، سفارتڪارن، سنڌ ڪابينا جي ميمبرن، صوبائي سيڪريٽرين ۽ ٻين ادارن جي سربراهن

چيف منسٽر هائوس ۾ ملاقات ڪئي ۽ وڏي وزير کي عيد مبارڪ ڏني. وڏي وزير سان ملاقات ڪندڙن ۾ ايران جو قونصل جنرل مهدي سبحاني، انڊو نيشيا جو قونصل جنرل هادي سانتوسو، سعودي عرب جو نائب قونصل جنرل سعيد نصير المالڪي، قطر جو نائب قونصل جنرل مبارڪ المارائي۽ بحرين جو سفارتڪار شمعيل هائن شامل هئا، جڏهن ته صوبائي وزير ناصر شاهه، ڄام خان شورو، گيانچند ايسراڻي، محمد علي ملڪاڻي، خاص معاون راشد رباني، چيف سيڪريٽري سنڌ صديق ميمڻ آءِ جي سنڌ پوليس غلام حيدر جمالي، چيئرمين اينٽي ڪرپشن ممتاز شاهه، سيڪريٽري داخلا مختيار سومرو، سيڪريٽري تعليم فضل الله پيچوهو، ڪمشنر ڪراچي ۽ ٻين اعليٰ عملدارنوڏي وزير سان ملاقات ڪئي ۽ عيد جون مبارڪون ڏنيون.

 

نثار کهڙو جو تعليم کاتي جي عملدارن کي 15 ڏينهن اندر اسڪولن جا بنيادي مسئلا حل ڪرڻ ۽ بند پيل اسڪول کولڻ جو الٽيميٽم

لاڙڪاڻو (بيورو):- سينئر صوبائي وزير اطلاعات ۽ تعليم نثار احمد کهڙو لاڙڪاڻي ڊويزن جي تعليم کاتي جي عملدارن کي اسڪولن جا بنيادي مسئلا 15 ڏينهن اندر حل ڪرڻ جو الٽيميٽم ڏيندي بند پيل اسڪول کولرائڻ جو حڪم ڏنو آهي. اڄ ڪمشنر آفيس لاڙڪاڻي  ۾ تعليم کاتي جي عملدارن جي هڪ اعليٰ سطحي گڏجاڻي جي صدارت ڪندي هن چيو ته صرف لاڙڪاڻي ڊويزن اندر 10 سيڪڙو اسڪول بند آهن، جيڪا تمام گھڻي شرح آهي، هن چيو ته تعليم کاتي سنڌ جي 10 هزار اسڪولن کي سهولتون ڏيارڻ لاءِ اسڪول اسپيسفڪ پروگرام شروع ڪيو آهي، جنهن تحت هر سال هڪ هزار اسڪولن کي سهولتون ڏنيون پيون وڃن، ان ڪم جي شفاف نموني سان مانيٽرنگ ڪئي ويندي. هن چيو ته اسان ٻن سالن اندر ميرٽ تي اين ٽي ايس ٽيسٽ پاس ڪندڙ 16000 کان 17000 استاد ڀرتي ڪيا آهن، جنهن ۾ ڪو به سفارشي استاد نه آهن. اهي استاد بند پيل اسڪول کولرائڻ لاءِ ئي ڀرتي ڪيا ويا آهن، انهن استادن کي زباني حڪمن تحت بدلي نه ٿو ڪري سگھجي. اهڙو ڪم ڪندڙ آفيسرن خلاف قانوني قدم کنيا ويندا. هن چيو ته سنڌ حڪومت تعليم جي بهتري لاءِ وڏي رقم خرچ ڪري رهي آهي، ساليانو پوڻن 2 ارب رپين جا ڪتاب سنڌ ٽيڪسٽ بڪ بورڊ طرفان ڇپايا پيا وڃن، جيڪي سنڌ جي اسڪولن ۾ مفت ورهايا ويندا آهن. هن چيو ته آفيسر ۽ استاد ڪارڪردگي ڏيکارن ته کين سهولتون ڏنيون وينديون. هن چيو ته سنڌ ۾ 43 هزار پرائمري اسڪول آهن جڏهن ته مڊل ۽ هاءِ اسڪولن جو انگ تمام گھٽ آهي، ان لاءِ ٻار پرائمري کانپوءِ پڙهڻ کان رهجي وڃن ٿا. ان لاءِ اسان مڊل اسڪولن جو تعداد وڌائينداسين يا پرائمري اسڪولن کي اپگريڊ ڪنداسين. هن چيو ته اين ٽي ايس وسيلي ڀرتي ڪيل استادن کان مون قسم ورتو هو ته هو 3 سالن تائين بدلي نه ڪرائيندا، جيڪڏهن ائين ٿئي ٿو ته اهو غلط عمل آهي. صوبائي وزير وڌيڪ چيو ته گوسڙو استادن کي ڊيوٽي جو پابند نه بڻائڻ آفيسرن جي ناڪامي آهي. هن چيو ته مون استاد تنظيمن جي اڳواڻن کي قرآن پاڪ تي قسم کڻايو هو ته هو گوسڙو استادن جي حمايت نه ڪندا اهي پنهنجي قسم تي عمل ڪري رهيا آهن پر ڪجھ آفيسر ۽ ڪلارڪ گوسڙو استادن کي ڇوٽ ڏئي رهيا آهن. انهن خلاف سخت قانوني ڪاروائي ڪئي ويندي، هن چيو ته آفيسرن ۾رابطي جي به کوٽ آهي،  جنهن جي ڪري ڪيترائي مسئلا حل نه ٿا ٿين هن چيو ته اسڪولن کي ملندڙ ايس ايم سي فنڊن کي بهتر نموني استعمال ڪيو وڃي، ان سلسلي ۾ شڪايت نه ملڻ گھرجي. گڏجاڻي ۾ ڪمشنر لاڙڪاڻو غلام اڪبر لغاري صوبائي وزير کي لاڙڪاڻي ڊويزن ۾ تعليم کاتي جي بهتري لاءِ ورتل ڪوششن بابت بريفنگ ڏيندي ٻڌايو ته لاڙڪاڻي ڊويزن ۾ ڪل 5988 اسڪول آهن، جنهن مان 655 اسڪول بند آهن. اسڪولن جي حالت بهتر بڻائڻ لاءِ هو سڄي ڊويزن جي اسڪولن جا پاڻ دورا ڪري رهيو آهي. هن چيو ته گوسڙو استادن کي پڪڙڻ لاءِ ڪمشنر آفيس ۾ مانيٽرنگ يونٽ قائم ڪيو ويو آهي، جڏهن ته بند پيل اسڪولن کي کولرائڻ لاءِ به هن ذاتي ڪوششون ورتيون آهن، جنهن تي صوبائي وزير نثار احمد کهڙو ڪمشنر غلام اڪبر لغاري جي واکاڻ ڪندي کاتي جي عملدارن هدايت ڪئي ته ڪمشنر لاڙڪاڻو سان مڪمل سهڪار ڪيو وڃي. گڏجاڻي ۾ ڊي سي لاڙڪاڻو جاويد علي جاگيراڻي، ڊائريڪٽر پرائمري اسڪولز، اليمينٽري، ڊي اي اوز، ٽي اي اوز ۽ ٻين لاڳاپيل کاتن جي عملدارن شرڪت ڪئي.

 

پنجاب جي قومي توڙي صوبائي تڪن تي ننڍي چونڊ دوران فوج ۽ رينجرز مقرر ڪرڻ جو فيصلو

اسلام آباد (بيورو) اليڪشن ڪميشن پنجاب جي قومي توڙي صوبائي تڪن تي ننڍي چونڊ دوران فوج ۽ رينجرز مقرر ڪرڻ جو فيصلو ڪري ورتو آهي، ٽن قومي تڪن تي ننڍي چونڊ 11 آڪٽوبر تي ٿيندي، جڏهن ته هڪ صوبائي تڪ لاءِ پولنگ 6 آڪٽوبر تي ٿيندي. اليڪشن ڪميشن موجب، پنجاب جي قومي تڪ اين اي هڪ سئو 22 لاهور، اين اي 154 لوڌران، اين اي هڪ سئو 44 اوڪاڙه، پي پي هڪ سئو 47 لاهور، پي پي 16 اٽڪ تي ننڍي چونڊ دوران فوج ۽ رينجرز مقرر ڪرڻ جو فيصلو ڪيو ويو آهي. اليڪشن ڪميشن جو چوڻ آهي ته ان سلسلي ۾ سيڪريٽري دفاع ۽ گهرو کاتي جي سيڪريٽريز کي خط لکيا ويا آهن. اليڪشن ڪميشن جو چوڻ آهي ته سمورن تڪن تي فوج ۽ رينجرز مقرر ڪرڻ جو فيصلو صوبائي اليڪشن ڪمشنر، ريٽرننگ آفيسر ۽ ڊسٽرڪٽ ريٽرننگ آفيسر جي درخواستن کانپوءِ ڪيو ويو آهي. اين اي هڪ سئو 22 لاهور تي 11 آڪٽوبر تي ٿيندڙ ننڍي چونڊ دوارن مسلم ليگ نون جي سردار اياز صادق ۽ تحريڪ انصاف جي عليم خان ۾ سخت مقابلي جا امڪان آهن، جڏهن ته اين اي هڪ سئو 54 تي به پي ٽي آءِ جو جهانگير ترين ۽ ن ليگ جو ميدان تي لٿل آهن. اليڪشن ڪميشن موجب، فوج ۽ رينجرز مقرر ڪرڻ جو فيصلو امن امان جي صورتحال کي نظر ۾ رکندي ڪيو ويو آهي. پي پي 16 اٽڪ تي ننڍي چونڊ 6 آڪٽوبر ۽ ٻين تڪن تي پولنگ 11 آڪٽوبر تي ٿيندي.

 

پي آءِ اي پاران سانحي ۾ شهيدن جا لاش بنا معاوضي پاڪستان آڻڻ جو اعلان

ڪراچي (اين اين آءِ) پاڪستان انٽرنيشنل ايئر لائين جي چيئرمين ناصر جعفر اعلان ڪيو آهي ته منيٰ سانهي ۾ شهيد پاڪستانين جا لاش بنا معاوضيپاڪستان آندا ويندا ناصر جعفر مطابق منيٰ سانحي ۾ شهيد ماڻهن جا اهي وارث جيڪي لاش سعودي عرب مان پاڪستان آڻڻ گهرن ٿا انهن لاءِ پي آءِ اي بنا معاوضي هي ڪم ڪندي پي آءِ اي منيٰ سانحي جي سمورن متاثرن کي جوڳي مدد فراهم ڪندي قومي ايئر لائين جي چيئرمين ان سلسلي ۾ جدا ۾ موجود پي آءِ اي جي ڊائريڪٽر ڪسٽم سروسز خرم مشتاق کي هدايتون جار يڪري ڇڏيون آهن هوڏانهن وزيراعظم نوازشريف جي هدايت تي مذهبي معاملن جي وزارت سانحي ۾ غائب پاڪستانين جي گهرڀاتين کي ضروري معلومات ۽ مدد فراهم ڪرڻ لاءِ هيلپ لائين قائم ڪري ڇڏي آهي پاڪستان ۾ ٽول فري نمبر 012111725425 تي فون ڪري معلومات وٺي سگهجي ٿي جڏهن ته سعودي عرب سميت بيروني ملڪ مان 8001166622 تي ٽيليفون ڪري منيٰ سانحي بابت معلومات وٺي سگهجي ٿي.

 

سنڌ ۾ مڪاني چونڊون فوج جي نگراني ۾ ڪرايون وڃن، ڌانڌليون ڪندڙ هاڻي سڌا جيل ويندا: پير پاڳارو

پيرجوڳوٺ (نمائندو) فنڪشنل ليگ جي سربراهه پيرپاڳاري، خيرپور سميت سڄي سنڌ ۾ مڪاني چونڊون فوج جي نگراني ۾ ڪرائڻ جو مطالبو ڪندَي چيو آهي ته هي پرويز ڪياني نه پر راحيل شريف جو دور آهي، ڌانڌليون ڪندڙ هاڻي سڌا جيل ويندا، آصف زرداري کي واپس اچڻو هجي ها ته دبئي ۾ اجلاس نه گهـُرائي ها. پير جي ڳوٺ ۾ پيرپاڳاريجي صدارت هيٺ فنڪشنل ليگ ضلعي خيرپور جو اهم اجلاس ٿيو، جنهن ۾ اعليٰ قيادت ۽ عهديدارن شرڪت ڪئي. اجلاس دوران ڳالهائيندي پيرپاڳاري چيو ته ڊي سيز ۽ مختيارڪارن جي نگراني ۾ مڪاني چونڊون شفاف نٿيون ٿي سگهن. فنڪشنل ليگ جي سربراهه چيو ته هي دور جنرل ڪياني نه پر جنرل راحيل شريف جو آهي، هاڻ ڌانڌلين وارا سڌا جيل ويندا. پيرپاڳاري مطالبو ڪيو ته خيرپور ضلعي سميت سڄي سنڌ ۾ مڪاني چونڊون فوج جي نگراني ۾ ڪرايون وڃن. آصف زرداري بابت ڳالهائيندي هـُن چيو ته پ پ جو شريڪ چيئرمين هاڻ واپس نه ايندو، ڇاڪاڻ ته جيڪڏهن کيس واپس اچڻو هجي ها ته اهو دبئي ۾ اجلاس نه گهرائي ها. پيرپاڳاري اڳڪٿي ڪندَي چيو ته رينجرز جي ڪاررواين کانپوءِ سنڌ ۾ امن امان جي صورتحال بهتر ٿي آهي پر ايندڙ 5 کان 7 ڏينهن ۾ صوبي جون حالتون بلڪل بدلجي وينديون.

 

حاجي سڳورن جي سعودي عرب کان ڏيهه واپسي جو سلسلو جاري، ڪراچي، اسلام آباد ۽ لاهور هوائي اڏن تي آجيان

اسلام آباد (بيورو) حاجي سڳورن جي سعودي عرب کان ڏيهه واپسي جو سلسلو جاري آهي، پنجن مختلف اڏامن ذريعي پهتل حاجين جو ڪراچي، اسلام آباد ۽ لاهور ايئرپورٽس تي شاندار استقبال ڪيو ويو. پي آءِ اي جي پهرين اڏام پي ڪي 6304، 374 حاجي سڳورن کي کڻي لاهور جي علامه اقبال ايئرپورٽ پهتي، جتي حاجي سڳورن جو وارثن شاندار استقبال ڪيو. خانگي ايئرلائين ذريعي به 35 حاجين کي لاهور پهچايو ويو. پي آءِ اي جي اڏام پي ڪي 712 ذريعي 3 سئو کان وڌيڪ حاجي سڳورا ڪراچي ايئر پورٽ پهتا. سعودي ايئرلائين ۽ هڪ خانگي ايئر لائين ذريعي پڻ 5 سئو کان وڌيڪ حاجي سڳورن کي ڪراچي ايئر پورٽ پهچايو ويو. پي آءِ اي جي اڏام پي ڪي 6310 ذريعي 2 سئو کان وڌيڪ حاجي سڳورا اسلام آباد ايئر پورٽ تي پهتا، جتي سندن شاندار استقبال ڪيو ويو.

 

سنڌ پوليس جي سينئير آفيسرن جي شڪايتن تي نيب آءِ جي خلاف 3 ريفرنس مڪمل ڪري ورتا

ڪرا چي(اسٽاف رپورٽر) :سنڌ پوليس  جي ڪجهه سينئير آفيسرن  ايپڪس ڪاميٽي  جي ذميوارن سان رابطو ۽ ملاقاتون ڪري آءِ جي سنڌ پوليس  خلاف شڪايتن جا انبار لڳائي  ڇڏيا ، جنهن جو نتيجو اهو نڪتو آهي ته نيب آءِ جي سنڌ پوليس  خلاف  3 ريفرنس  مڪمل ڪري ورتا آهن، ذريعن ٻڌايو ته  ايڊيشنل  آءِ جي  غلام قادر ٿيٻو، ايڊيشنل  آءِ جي ثناءِ الله عباسي ،ڊي آءِ جي منير شيخ، ڊي آءِ جي سلطان  خواجه،ايس ايس پي طارق ڌاريجي جي بدلي ڪئي وئي، جيڪا رد ڪرڻ بابت آءِ جي  غلام حيدر جمالي کي سفارش ڪئي وئي پر آءِ جي  انهن پوليس آفيسرن  سان ورڪنگ  رليشن  شپ به نالي ماتر رکيو آهي،انهي صورتحال ۾ ڪيترائي سينئير پوليس آفيسر  ايپڪس  ڪاميٽي  جي ذميوارن وٽ پهتا ۽ انهن سان آءِ جي بابت شڪايتون ڪيون،جنهن جو نتيجو  اهو نڪتو  آهي ته آءِ جي خلاف  مالي بيقائدگين جا 3 ريفرنس  تيار ٿي ويا آهن.

 

شارٽ فعال جعلي ۽ لوڊشيڊنگ ڄاڻي واڻي قرار،نيپرا سالياني رپورٽ جاري ڪري ڇڏي

اسلام آباد (بيورو) نيشنل اليڪٽرڪ پاور ريگوليٽري اٿارٽيءَ بجلي جي گهرج ۽ پيداوار وچ ۾ شارٽ فال کي جعلي ۽ ان سلسلي ۾ لوڊشيڊنگ کي به اختيارين جي ڄاڻي واڻي ڪارروائي قرار ڏئي ڇڏيو. نيپرا جي 2014 ۽ 2015 ع جي سالياني رپورٽ موجب ڪارڪردگي جي بنياد تي آئيسڪو پهرين ۽ ڪي اليڪٽرڪ ٻئي نمبر تي آهي. گيسپڪو ٽئين، ڪيسڪو چوٿين، فيسڪو پنجين، ميسپڪو ڇهين، حيسڪو ستين، ليسڪو اٺين، پيسڪو نائين جڏهن ته سيپڪو 10 نمبر تيآهي. بجلي جي بلن بابت سالياني رپورٽ ۾ چيو ويو آهي ته بجلي جو نئون ميٽر سسٽم به ناڪاره آهي ۽ 70 سيڪڙو واهپيدارن کي درست بل نه ملندا آهن. رپورٽ ۾ پاڻي ۽ بجلي واري وزارت جي ڪارڪردگي کي ناقص قرار ڏيندي چيو ويو آهي ته ملڪ ۾ بجلي جو شارٽ فال ۽ لوڊشيڊنگ ڄاڻي واڻي ڪئي ويندي آهي. رپورٽ موجب سرڪاري ٿرمل پاور پلانٽس جي انتظاميه مشينن ۽ پاور يونٽس کي ڄاڻي واڻي بند رکيو، جڏهن ته ڪجهه پاور پلانٽن جون مشينون ٽن سالن کان بند آهن. نيپرا سنڌو درياهه تي بجلي جي پيداواري يونٽ جناح هائيڊرو پراجيڪٽ جي ڪارڪردگي تي سوال اٿاريندي چيو ته 17 ارب خرچ ڏيڻ باوجود منصوبي ۾ فني خرابيون پيدا ٿيون. رپورٽ موجب منصوبي کي 3 سال مڪمل ٿي ويا پر اهو گهــُربل مقدار ۾ بجلي پيدا نه ڪري سگهيو ۽ منصوبي مان ٽن سالن ۾ رڳو 72 ڪروڙ يونٽ بجلي پيدا ٿي.