تازيون خبرون

Daily Archives: September 23, 2015

پشاور سانحي جي ماسٽر مائينڊ جي سڃاڻپ ٿي وئي آهي: چوڌري نثار

اسلام آباد (بيورو)  وفاقي گهرو وزير چوڌري نثار علي چيو آهي ته پشاور سانحي جي ماسٽر مائينڊ جي سڃاڻپ ٿي وئي آهي. اسلام آباد ۾ گهرو کاتي جي عملدارن جي اجلاس کانپوءِ ميڊيا سان ڳالهائيندي چوڌري نثار علي چيو ته پشاور حملي جي ماسٽر مائينڊ جي ساٿين جي به سڃاڻپ ٿي وئي آهي. هن چيو ته حملي دوران مارجي ويل نون دهشتگردن جو رڪارڊ هنن وٽ موجود ناهي. وفاقي وزير خدشو ظاهر ڪيو ته مارجيويل پرڏيهي ٿي سگهن ٿا. هن چيو ته حملي جي ماسٽر مائينڊ جو واسطو افغانستان سان آهي. چوڌري نثار چيو ته حملي ڪندڙن جي گاڏين جي سڃاڻپ به ٿي وئي آهي. عملدارن جي اجلاس ۾ ڳالهائيندي چوڌري نثار علي ٻڌايو ته هاڻ پاسپورٽ ٺاهڻ جو اختيار سفارتخانن کي به ڏنو ويو آهي. هن چيو ته 91 سفارتخانن ۾ پاسپورٽ ٺاهڻ جي اجازت ڏني ويندي. چوڌري نثار چيو ته 66 سفارتخانن ۾ پاسپورٽ ٺاهڻ جي سهولت فراهم ڪئي وئي آهي، جڏهن ته 14 سفارتخانن ۾ پاسپورٽ جو سسٽم فراهم ڪيو پيو وڃي. ٻئي طرف وفاقي گهرو وزير چوڌري نثار علي خان سان برطانوي پرڏيهي وزير ٽوبيار مارٽن ايلوڊ اسلام آباد ۾ ملاقات ڪئي،جنهن دوران خطي جي صورتحال تي خيالن جي ڏي وٺ ڪئي وئي. وفاقي گهرو وزير ملاقات دوران چيو ته پاڪستان، برطانيا سان دوستاڻن لاڳاپن کي وڏي اهميت ڏئي ٿو، هن چيو ته آپريشن ضرب عضب پنهنجا مقصد ماڻيندو تيزي سان اڳتي وڌي رهيو آهي، جڏهن ته پاڪستان خطي ۾ امن لاءِ سچائي سان قدم کڻي رهيو آهي. ان موقعي تي برطانوي پرڏيهي وزير چيو ته امن حاصل ڪرڻ ۽ دهشتگري جي خاتمي لاءِ پاڪستان جون ڪوششون ساراهه جوڳيون آهن. هن چيو ته برطانيا دهشتگردي خلاف پاڪستاني عوام ۽ حڪومت جي ڪوششن کي قدر جي نظر سان ڏسي ٿو، گهرو وزارت جي ترجمان ٻڌايو ته ملاقات ۾ پاڪ – برطانيا لاڳاپن ۽ ٻطرفي سهڪار تي به ڳاله ٻولهه ٿي، ٻنهي اڳواڻن خطي جي صورتحال تي پڻ خيالن جي ڏي وٺ ڪئي، ملاقات دوران پاڪستان ۾ برطانوي هائي ڪمشنر فلپ مارٽن پڻ موجود هو.

 

جمهوريت دشمن اصل ۾ ملڪ دشمن آهن، هر حال ۾ جمهوريت جي حفاظت ڪنداسين: نثار کهڙو

ڪراچي(اسٽاف رپورٽر):سنڌ جي اطلاعات ۽ تعليم واري سينيئر وزيرنثار احمد کهڙو چيو آهي ته آزاد ميڊيا جي موجودگي ۾جمهوريت ڪڏهن به ناڪام نٿي ٿي سگھي ۽ جمهوريت جي ناڪامي جي باري ۾ سوچيندڙ اصل ۾ خيالي دنيا ۾ رهن ٿا. اهڙن خيالن جو اظهار هن پاڪستان ميڊيا ڊولپمينٽ فائونڊيشن(پي ايم ڊي ايف) پاران آزاد ميڊيا ۽ جمهوريت تي ان جي اثرن جي موضوع تي  ڪوٺايل سيمينار کي خطاب ڪندي ڪيو. هن چيو ته ميڊيا عوام جي راءِ سامهون آڻيندي آهي جيڪو جمهوريت جي بقا ۽ ان جي تسلسل لاءِ نهايت ضروري آهي. جمهوريت ان ئي وقت ترقي ڪندي آهي جڏهن عوام جي راءِ کي اهميت ڏني وڃ

جيڪا آزاد ميڊيا جي ذريعي سامهون ايندي آهي. هن چيو ته ميڊيا هر دور ۾ خاص ڪري آمرن خلاف جهدوجهد ۽ جمهوريت جي بقا لاءِ هراول دستي جو ڪردار ادا ڪيو آهي. هن وڌيڪ چيو ته جمهوريت عوام آڏو جواب  ڏيندڙ آهي ڇو ته اها انهن لاءِ ئي هوندي آهي. جمهوريت خلاف سازشون ڪندڙ اصل ۾ ملڪ جي خلاف سازشون ڪندا آهن. جنهن  خلاف جهموري قوتن کي ملي ڪري آواز اٿارڻ گھرجي. هن وڌيڪ چيو ته جمهوريت لاءِ صحافين جون قربانيون ڪنهن کان لڪل ناهن. هن چيو ته اسان جي اڳواڻن جمهوريت لاءِ پنهنجي جانين جا نظرانا ڏنا آهن ۽ اسان ان جي هر حال ۾ حفاظت ڪنداسين. هن چيو ته ميڊيا کي اظهار راءِ جي آزادي فقط جمهوري دور ۾ ئي هوندي آهي ۽ اسان ان ڳالھ کي يقيني بڻائينداسين ته اها آزادي برقرار رهي. هن چيو ته ميڊيا تي به اها ذميواري لاڳو ٿئي ٿي ته ان آزاد ميڊيا جو استعمال ڪندي حدن جو خيال رکي جنهن جو کين پاڻ تعين ڪرڻو پوندو. پاڪستان ميڊيا ڊولپمينٽ فائونڊيشن جي چيئرپرسن دردانه شهاب چيو ته فائونڊيشن جي قيام جو مقصد صحافين جي مسئلن کي اجاگر ڪرڻ ۽ کين لاڳاپيل فورم تي آڻڻ آهي. هن وڌيڪ چيو ته فائونڊيشن معاشري جي مختلف اسٽيڪ هولڊرز ۽ صحافين جي وچ ۾ صحتمند مباحثن کي فروغ ڏيڻ لاءِ به ڪم ڪري رهي آهي. ۽ اڄ جي تقريب جي منعقد ڪرڻ جو مقصد به اهو ئي آهي. ان موقعي تي سنڌ مدرسته الاسلام جي وائيس چانسلر محمد علي شيخ، متحده قومي مومينٽ جي خواجا اظهارالحسن، جماعت اسلامي جي محمد حسين محنتي، تحريڪ انصاف جي عمران اسماعيل، مسلم ليگ (ق) جي حليم عادل شيخ، جميعت علماءَ اسلام جي حافظ حسين احمد، معروف صحافين مختار عاقل ۽ مظهر عباس به خطاب ڪندي جمهوريت تي آزاد ميڊيا جي اثرن تي تفصيل سان روشني وڌي جڏهن ته معروف صحافين امين يوسف، جي ايم جمالي، عابد علي سيد، صلاح الدين حيدر، امتياز خان فاران، نسيم عاصمي، مهناز الرحمان، مقصود يوسفي ۽ منور مرزا به پنهنجي خيالن جو اظهار ڪيو.

 

وزيراعظم سان پاڪ فضائيه جي سربراهه جي ملاقات، پيشاواراڻي معاملن تي ڳالهيون

اسلام آباد (اين اين آءِ) وزيراعظم محمد نوازشريف چيو آهي ته ملڪ ۾ دهشتگردي جي پاڙ پٽي سک سان ويهنداسين اڱاري تي وزيراعظممحمد نوازشريف سان هوائي فوج جي سربراهه سهيل امان اسلام آباد ۾ ملاقات ڪئي ملاقات ۾ هوائي فوج جي پيشاوراڻي معاملن تي ڳالهيون ڪيون ويون پاڪ فضائيه جي سربراهه وزيراعظم کي پاڪ فضائيه جي پيشاوراڻي معاملن، آپريشنل تيارين بابت آگاهه ڪيو ملاقات ۾ پشاور ۾ بڊبير جي پاڪ فضائيه بيس تي ٿيل حملي بابت مختلف پهلوئن تي غور ڪيو ويو وزيراعظم حملو ناڪام بنائڻ تي پاڪ فضائيه جي جوانن جي جذبي ۽ بهادري جي واکاڻ ڪئي انموقعي تي وزيراعظم چيو ته ملڪ ۾ دهشتگردفي جي پاڙ پٽي سک سان ويهنداسين.

 

پاڪ فوج ملڪ جي حفاظت لاءِ بيمثال قربانيون ڏنيون آهن: آرمي چيف

راولپنڊي (بيورو) فوج جي سربراهه جنرل راحيل شريف چيو آهي ته ملڪ جي بچاءَ لاءِ پاڪ فوج جون بيمثال قربانيون آهن.جڏهن ته تاريخ شاهد آهي ته جوانن هميشه ملڪ جي حفاظت لاءِ پر عزم رهيا آهن. لاهور گيريزن جي دوري ۽ يارهين انفنٽري ڊويزن جي گولڊن جوبلي تقريب کي خطاب ڪندي فوج جي سربراهه جنرل راحيل شريف چيو ته کيم ڪرن ۽ حسيني والا سيڪٽرز۾ ڪاميابيون ان جو ثبوت آهن. هن چيو ته پاڪ –ڀارت جنگين، دهشتگردي خلاف جنگ ۾ انفنٽري بي مثال ڪارڪردگي جو مظاهرو ڪيو. جوانن جي جوش ۽ جذبي تي فوج جي سربراهه کين سلام پيش ڪيو.هن جو چوڻ هو ته جوانن وطن جي بچاءَ ۾ وڌي چڙهي حصو ورتو آهي.

 

عاصم سليم باجوه سميت 4 ميجر جنرلن کي ليفٽيننٽ جنرل جي عهدي تي ترقي

راولپنڊي (بيورو) پاڪ فوج جي چئن ميجر جنرلز کي ليفٽيننٽ جنرل طور ترقيون ڏئي،اعليٰ سطحي بدليون ۽ مقرريون پڻ ڪيون ويون آهن، جڏهن ته ڊي جي آءِ ايس پي آر جو عهدو پهريون ڀيرو ليفٽيننٽ جنرل کي ڏنو ويو آهي. آءِ ايس پي آر پاران جاري ڪيل پڌرائي ۾ چيو ويو آهي ته پاڪ فوج جي چئن ميجر جنرلز کي ليفٽيننٽ جنرلز جي عهدن تي ترقيون ڏئي اعليٰ آفيسرن جون مقرريون ۽ بدليون پڻ ڪيون ويون آهن. آءِ ايس پي آر موجب، پاڪ فوج جي ترجمان ميجر جنرل عاصم سليم باجوه،ڊي جي ملٽري آپريشنز ميجر جنرل عامر رياض،ميجر جنرل صادق علي ۽ ميجر جنرل عمر فاروق دراني کي ليفٽيننٽ جنرل طور ترقي ڏني وئي آهي. ترقين بعد پاڪ فوج ۾ اعليٰ سطحي بدليون ۽ مقرريون پڻ ڪيون ويون آهن. آءِ ايس پي آر موجب، عاصم سليم باجوه کي ليفٽيننٽ جنرل بڻجڻ باوجود ڊي جي آءِ ايس پي آر جَي عهدي تي برقرار رکيو ويو،ملڪي تاريخ ۾ پهريون ڀيرو اهو عهدو ڪنهن ليفٽيننٽ جنرل کي ڏنو ويو آهي. ليفٽيننٽ جنرل عمر فاروق دراني کي ڪور ڪمانڊر منگلا ۽ ليفٽيننٽ جنرل عامر رياض کي ڪمانڊر سدرن ڪمانڊ ڪوئيٽا مقرر ڪيو ويو آهي. آءِ ايس پي آر موجب، ليفٽيننٽ جنرل ملڪ ظفر اقبال کي ڪور ڪمانڊر راولپنڊي ۽ ليفٽيننٽ جنرل صادق علي کي ڪور ڪمانڊر لاهور بڻايو ويو آهي. ليفٽيننٽ جنرل اڪرام الحق کي ڪور ڪمانڊر گجرانوالا ۽ ليفٽيننٽ جنرل هلال حسين کي ڪمانڊر آرمي اسٽريٽجڪ فورس ڪمانڊ مقرر ڪيو ويو آهي. ٻئي طرف ذريعن موجب پاڪ آرميءَ جا 4 ليفٽيننٽ جنرلز پنهنجي ملازمت جو مدو پورو ٿيڻ بعد ڪجهه ڏينهن اندر رٽائر ٿي ويندا. رٽائر ٿيندڙن ۾ ڪمانڊر سدرن ڪمانڊ ڪوئيٽا ليفٽيننٽ جنرل ناصر خان جنجوعا، ڪور ڪمانڊر لاهور ليفٽيننٽ جنرل نويد زمان، ليفٽيننٽ جنرل طارق نديم گيلاني ۽ ليفٽيننٽ جنرل اعجاز چوڌري شامل آهن.

 

اليڪشن ڪميشن وزير اعظم واري هاري پيڪيج جو نوٽيس وٺي ڇڏيو

اسلام آباد (بيورو)  اليڪشن ڪميشن ، وزير اعظم جي ڪسان پيڪيج جو نوٽيس وٺندي سيڪريٽري نيشنل فوڊ سيڪيورٽي کي طلب ڪري ورتو آهي. اليڪشن ڪميشن ،وزيراعظم نواز شريف پاران تازوئي اعلان ڪيل ڪسان پيڪيج جو نوٽيس وٺندي سيڪريٽري نيشنل فوڊ سيڪيورٽي کي گهرائي ورتو آهي، جڏهن ته سيڪريٽري فوڊ کي وزير اعظم پاران اعلان ڪيل ڪسان پيڪيج بابت سمورن دستاويزن سان گڏ اليڪشن ڪميشن اچڻ جي هدايت ڪئي آهي. سيڪريٽري اليڪشن ڪميشن بابر فتح محمد جو چوڻ آهي ته اليڪشن ڪميشن تحريڪ انصاف جي اڳواڻ جهانگير ترين پاران وفاقي ۽ صوبائي ادارن پاران مداخلت جي شڪايت تي ٻڌل درخواست جو جائزو وٺي رهي آهي، جڏهن ته شق 21 ۽ 27 مڪاني چونڊن کان اڳ ڪنهن به قسم جي مشهوري جي اجازت نٿي ڏئي ۽ قاعدن جي شق 21 جي مطابق اليڪشن کان اڳ سرڪاري ذريعي سان اشتهار تي پابندي هوندي آهي واضح رهي ته وزير اعظم نوازشريف 15 سيپٽمر تي ننڍن آبادگارن جي لاءِ 100 ارب رپين جي اضافي قرض جو اعلان ڪيو هو، جنهن تحت سولر ٽيوب ويل لڳائڻ لاءِ ننڍن آبادگارن کي بنا وياج جي قرض ڏنو ويندو.

ڊاڪٽر عاصم حسين کي دل جو دورو،آئي سي يو ۾ داخل

ڪراچي (بيورو) پيپلز پارٽي جي اڳواڻ ۽ اڳوڻي وفاقي صلاحڪار ڊاڪٽر عاصم حسين کي دل جو دورو پوڻ سبب اسپتال منتقل ڪيو ويو، جتي کيس آئي سي يو ۾ داخل ڪيو ويو آهي، نجي ٽي وي چينل جي رپورٽ مطابق ڊاڪٽر عاصمکي رات دير سان دل جو دورو پيو، جنهن کانپوءِ کيس ڪارڊِو نيو ويو، جتي ڊاڪٽرن جي خاص ٽيم سندس معائنو ڪيو ۽ کيس طبي امداد ڏني پئي وڃي. ذريعن مطابق ڊاڪٽرعاصم جو نويد قمر سوڌو ٻين سينيئر ڊاڪٽرن معائنو ڪيو ۽ سندس وڌيڪ علاج رپورٽون اچڻ کانپوءِ ڪيو ويندو، سنڌ جو وڏو وزير سيد قائم علي شاهه، ڊاڪٽر عاصم جي طبيعت پڇڻ لاءِ دل جي مرضن واري قومي اداري پهتو، جنهن کي ڊاڪٽر عاصم سان ملاقات جي اجازت ڏني وئي. ڊاڪٽر عاصم جي مائٽن جو چوڻ هو ته کيس بلڊ پريشر ۽ شگر جو مرض آهي پر دل جو دورو پهريون ڀيرو پيو آهي، جنهن  جو ڊاڪٽرن جي ٽيم معائنو ڪري رهي آهي.

 

ڪراچي آپريشن جاري آهي پوءِ به روزانو ماڻهو شهيد پيا ٿين: سپريم ڪورٽ

ڪراچي (اسٽاف رپورٽر) سپريم ڪورٽ پوليس جي جانچ فنڊ بابت ڪيس جي ٻڌڻي دوران آئي جي سنڌ جي رپورٽ تي مايوسي جو اظهار ڪندي چيو آهي ته حالتون ڏينهون ڏينهن خراب ٿي رهيون آهن، ڪراچي آپريشن جاري آهي، روزانو ماڻهو شهيد ٿي رهيا آهن ۽ اوهان کي ڪشمور ۽ مٽياري جي فڪر آهي، انهن ضلعن کي ڪروڙين روپين جا فنڊ ڇو جاري ڪيا ويا؟ سپريم ڪورٽ آئي جي سنڌ جي فنڊن جي جانچ بابت رپورٽ تي مايوسي جو اظهار ڪندي ضلعن کي فرهام ڪيل پئسن بابت رڪارڊ طلب ڪري ورتو آهي. پوليس جي جانچ آفيسرن کي فنڊز جي فراهمي بابت ڪيس جي سپريم ڪورٽ ڪراچي رجسٽري ۾ ٻڌڻي ٿي. چيف سيڪريٽري، آئي جي، سيڪريٽري فنانس ۽ گهرو سيڪريٽري عدالت ۾ پيش ٿيا. عدالت کي ٻڌايو ويو آهي ته جانچ جي مد ۾ ڪشمور کي هڪ ڪروڙ،م مٽياري کي 2 ڪروڙ، دادو کي ساڍا 3 ڪروڙ فراهم ڪيا ويا. عدالت ڪاوڙ جو اظهار ڪندي چيو آهي ته ڪراچي ۾ آپريشن جاري آهي، روزانو ماڻهو شهيد ٿي رهيا آهن، اوهان کي ڪشمور ۽ مٽياري جو فڪر آهي، حالتن ڪابه بهتري نه آئي آهي، حالتون ڏينهون ڏينهن خراب ٿي رهيون آهن، رڳو ٽي وي ۽ اخبارن ۾ بيان ڏيڻ سان ڪجهه نه ٿيندو. عدالت ڊي آئي جي ٽريفڪ کي شعبي لاءِ 22 ڪروڙ 50 لک روپيا فوري جاري ڪرڻ جي هدايت ڪئي.

 

ڀارت چين ۽ پاڪستان جي وڏي ڊرون طاقت کان ڊڄي ويو، اسرائيل کان ڊرون جهاز خريد ڪرڻ جو فيصلو نئين دهلي (م.ڊ) ڀارت چين ۽ پاڪستان جي وڏي ڊرون پاور کان ڊڄي اسرائيل کان ڊرون خريد ڪرڻ جو فيصلو ڪيو آهي، ڀارت پاران اهڙو فيصلو ان وقت ڪيو ويو آهي، جڏهن پاڪستان پاران آرمڊ ڊرون کي ضرب عضب ۾ استعمال ڪيو ويو ،جنهن سان 3 هاءِ پروفائل دهشتگردن کي نشانو بڻايو ويو، ڀارتي ميڊيا مطابق ڀارتي فوج پاران حڪومت کي خط لکيو ويو آهي، جنهن ۾ اسرائيل کان ڊرون جهازن جي خريداري واري عمل کي تيز ڪرڻ جي هدايت ڪئي وئي آهي، ڀارت پهريان ئي اسرائيل کان يو اي وي جون خدمتون حاصل ڪيون آهن، جنهن کي ڪشمير ۽ چين جي تڪراري سرحد تي نگراني لاءِ لڳايو ويو آهي، هلندڙ مهيني ڀارتي حڪومت اسرائيل کان 10 هيرون ٽي پي ڊرون خريد ڪرڻ جي منظوري ڏني آهي، جنهن ۾ جديد هٿيار لڳائي ويڙهه لاءِ استعمال ڪري سگهجي ٿو،  ان ٺاهه تي 4 ڪروڙ ڊالر خرچ ايندو.

ڪراچي (اسٽاف رپورٽر) سنڌ جي گهرو کاتي قرباني جي کلن بابت ضابطه اخلاق جاري ڪري ڇڏيون آهي جنهن تحت عيدالاضحيٰ جي ٽنهي ڏينهن دوران هٿيار کڻي هلڻ تي پابندي لاڳو ڪئي وئکي آهي. گهرو کاتي پارانجاري ڪيل ضابطه اخلاق موجب کلون گڏ ڪرڻ لاءِ ڪمشنر يا لاڳاپيل ڊي سي کان لکت ۾ اجازت حاصل ڪرڻي پوندي، رجسٽرڊ تنظيمن ۽ ديني مدرسن کي کلون گڏ ڪرڻ جي اجازت هوندي، پوسٽرز يا بينرز ذريعي کلون گهرڻ ۽ ڪيمپ لڳائڻ جي اجازت نه هوندي. ضابطه اخلاق ۾ وڌيڪ چيو ويو آهي گهر گهر وڃي ڪنهن کان زبردستي کلون جمجع ڪرڻ جي اجازت نه هوندي، ماڻهو پاڻ جتي به کلون ڏيڻ چاهي اُتي پنهنجي مرضيءَ سان ڏئي سگهي ٿو. سنڌ جي گهرو کاتي موجب کلن جي منتقلي جو ڪم ڪندڙ رضاڪارن لاءِ شناختي ڪارڊ، اداري جو رڪارڊ، اجازت نامي سان گڏ رکڻ ضروري آهي، ضابطه اخلاق جي خلاف ورزي ڪندڙن کان کلون ضبط ڪيون وينديون.

 

عوام سنڌ ۽ پنجاب سميت سڄي ملڪ ۾ احتساب چاهي ٿو: عمران خان

پشاور (بيورو) تحريڪ انصاف جي سربراهه عمران خان چيو آهي ته سنڌ جي عوام جو پوليس تان ويساهه ختم ٿي ويو آهي ۽ ماڻهو رينجرز طرف واجهائي رهيا آهن. پشاور ۾ پريس ڪانفرنس کي خطاب ڪندي عمران خان چيو ته سنڌ ۽ پنجاب ۾ ڪرپشن خلاف رينجرز کان مدد گهري پئي وڃي. هن چيو ته پاڪستاني قوم جا حوصلا بلند آهن ۽ دهشتگردي جي خاتمي لاءِ قوم متحد آهي. عمران خان چيو ته ڊي پياو حافظ آباد جي ووٽ گهرڻ واري وڊيو موجود آهي. هن چيو ته سنڌ ۽ پنجاب سميت سڄي ملڪ ۾ ماڻهو احتساب چاهين ٿا. هن چيو ته سنڌ پوليس تان ماڻهن جو ويساهه کڄي ويو آهي.جڏهن ته سنڌ ۾ رينجرز بهتر ڪم ڪري رهي آهي. تحريڪ انصاف جي سربراهه چيو ته خيبر پختون خواهه ۾ احتساب جو نظام موجود آهي. هن چيو ته مڪاني چونڊن ۾ ميرٽ جي لتاڙ تي مايوسي ٿي آهي. عمران خان دعوا ڪئي ته ڪي پي ڪي ۾ بهترين مڪاني نظام آندو ويندو. هن چيو ته قوم دهشتگردي خلاف پرعزم آهي۽ بڊبير جي متاثرن جي مدد ڪئي ويندي.