تازيون خبرون

Daily Archives: September 18, 2015

نيب سنڌ ۽ پنجاب جي اهم شخصيتن خلاف ڪارروائي جي منظوري ڏئي ڇڏي

اسلام آباد (بيورو) نيب سنڌ ۽ پنجاب جي اهم شخصيتن خلاف ڪارروائي جي منظوري ڏئي ڇڏي، صوبائي وزير گيانچند ايسراڻي خلاف ڪرپشن جي جاچ ٿيندي، ڪوآپريٽو هائوسنگ سوسائٽي حيدرآباد جي اڳوڻي چيئرمين عبدالستار خلاف جاچ ۽ سنڌ ڪوآپريٽو هائوسنگ سوسائٽي جي اڳوڻي ايم ڊي نويد ضرار خلاف ريفرنس داخل ڪرڻ جي منظور ڏني وئي، اڳوڻي آڊيٽر جنرل بلند اختر راڻا، وفاقي اردو يونيورسٽي جي اڳوڻي وي سي ظفر اقبال ۽ اين آءِ سي ايل جي اڳوڻي چيئرمين عابد جاويد خلاف جاچ جي منظوري ڏني وئي آهي.اسلام آباد ۾ نيب چيئرمين قمرالزمان چوڌري جي صدارت هيٺ ايگزيڪٽو ڪاميٽي بورڊ جو اجلاس ٿيو..اجلاس ۾ اڳوڻي آڊيٽر جنرل بلند اختر راڻا خلاف ڪرپشن ۽ اختيارن جو ناجائز استعمال ڪرڻ واري معاملي تي جاچ جو حڪم ڏنو ويو.اجلاس ۾ صوبائي وزير گيانچند ايسراڻي خلاف جهنگلي جيوت کاتي ۾ ڪرپشن جي جاچ ۽ سيد علي نواز شاهه خلاف شڪايتن جي تصديق ڪرڻ جي منظوري ڏني وئي.ڪوآپريٽو هائوسنگ سوسائٽي حيدرآباد جي اڳوڻي چيئرمين عبدالستار خلاف به جاچ جو حڪم ڏنو ويو، سنڌ ڪوآپريٽيو سوسائٽي جي اڳوڻي ايم ڊي نويد ضرار خلاف ريفرنس داخل ڪرڻ جي منظور ڏني وئي.اجلاس ۾ وفاقي اردو يونيورسٽي جي اڳوڻي وي سي ظفر اقبال ۽ اين آءِ سي ايل جي اڳوڻو چيئرمين عابد جاويد خلاف به جاچ ڪرڻ جي منظوري ڏني وئي.ايم سي بي بئنڪ جي نجڪاري ۾ مبينا ڪرپشن جي جاچ جي منظوري ڏني وئي..نيب جي اجلاس ۾ ليگي ايم اين اي افتخار الحسن، اڳوڻي صوبائي وزير ظهيرالدين، ايم اين اي راڻا اسحاق، پي سي بي جي اڳوڻي چيرمين ذڪا اشرف ۽ اڳوڻي ايم ڊي سوئي ناردرن عارف حسين خلاف جاج بند ڪرڻ جي منظور ڏني ويندي.

 

وفاق صوبي ۾ مداخلت پيو ڪري، ڳالهائڻ تي مجبور نه ڪيو وڃي: نثار کهڙو

ڪراچي/حيدرآباد(نمائندن وٽان ) سنڌ جي سينيئر ۽  تعليم واري صوبائي وزير نثار احمد کهڙو احتجاج ڪندڙ عوام کي رليف ڏيڻ بجاءِ خانگي اسڪولن کي 10 سيڪڙو فيس وڌائڻ جي اجازت ڏيندي چيو آهي ته جيڪو به اسڪول ان کان وڌيڪ فيس وڌائيندو ان خلاف قانون موجب ڪارروائي ٿيندي، جنهن به اسڪول بنا اجازت جي فيس ۾ 40 سيڪڙو واڌ ڪئي آهي انهن کي شوڪاز جاري ڪنداسين ۽ هاڻ خانگي اسڪولن ۾ فيس جي حوالي سان جوائنٽ پارلياماني ڪميٽي جوڙي رهيا آهيون جنهن ۾ اسيمبلي ميمبر ، خانگي اسڪولن جا نمائيندا ۽ تعليم کاتي جا آفيسر شامل هوندا جيڪي اسڪول جي فين جي حوالي سان فيصلا ڪندا ۽ جيڪو به اسڪول انهن تي عمل نه ڪندو انهن خلاف قانون  موجب ڪارروائي ڪئي ويندي. اهڙو اظهار هن ڪالهه خانگي اسڪولن جي مالڪن سان ڪيل اجلاس کان پوءِ پريس ڪانفرنس  ۽ صحافين سان ڳالهه ٻولهه ڪندي ڪيو. هن  چيو ته ڪنهن به اسڪول کي 10 سيڪڙو کان وڌيڪ فيس وڌائڻ جي اجازت نٿا ڏئي سگهون، 40 سيڪڙو فيس وڌائڻ غير مناسب ۽ غير قانوني آهي . هن چيو ته اسان هاڻ هر اسڪول جي ڪيٽيگري جي لحاظ سان فيس جو شيڊول جوڙينداسين جنهن تي انهن کي عمل ڪرڻو پوندو ۽ جنهن به خانگي اسڪول ان تي عمل نه ڪيو ته ان خلاف قانو موجب ڪارروائي ڪئي ويندي. صوبائي وزير چيو ته هر خانگي اسڪول ڪوٽا تحت 10 سيڪڙو غريب شاگردن کي مفت داخلا ڏيڻ جو پڻ پابند هوندو. ان حوالي سان ڊائريڪٽر آف اسڪول ايجوڪيشن ۾ شڪايتي سيل پڻ قائم ڪيو ويندو. ٻئي طرف اطلاعات کاتي جي صوبائي وزير نثار احمد کهڙي چيو آهي ته وفاق هنن جي ڪمن ۾ مداخلت ڪري رهيو آهي، ڳالهائڻ تي مجبور نه ڪيو وڃي، جيڪڏهن هنن ڳالهايو ته کين ڪير به خاموش نه ڪرائي سگھندو. پريس ڪلب حيدرآباد ۾ ميٽ دي پريس کي خطاب ڪندي صوبائي وزير نثار کهڙي چيو ته وفاق هنن جي ڪمن ۾ مداخلت ڪري رهيو آهي، وفاقي وزير صرف سنڌ حڪومت کي الزام تراشي ڪري رهيا آهن، اها هنن کي خبر آهي، رستي ۾ ڀٿر نه وڇائن ته بهتر آهي، هنن جي خاموشي کي ڪمزوري نه سمجھيو وڃي، جيڪڏهن هنن ڳالهايو ته کين ڪير به ماٺ نه ڪرائي سگھندو…نثار احمد کهڙي چيو ته عوام ن ليگ جي ڪنهن به ڪوڙن واعدن ۾ نه ايندو، بلدياتي چونڊن ۾ پ پ کي ڪاميابي حاصل ٿيندي، وزير اعظم نواز شريف بلدياتي چونڊن ۾ زرعي پاليسي جو اعلان ڪري ووٽ وٺڻ جي سازش ڪئي آهي پر اها نواز شريف جي ناڪام شازش آهي… نثار احمد کهڙي چيو ته سنڌ جي سرڪاري اسڪولن ۾ تعليمي نظام بهتر بنائڻ لاءِ هو ڏينهن رات هڪ ڪري ڪوشش ڪري رهيا آهن، 18 هزار کان وڌيڪ اسڪولن ۾ بائيو ميٽرڪ سسٽم لڳايو ويو آهي ۽ ٻين اسڪولن ۾ بائيو ميٽرڪ سسٽم لڳايو ويندو، بائيو ميٽرڪ سسٽم لڳائڻ سان اسڪولن ۾ استادن جي حاضري بهتر ٿي رهي آهي.

 

وزيراعظم سان عهدو ڇڏيندڙ آمريڪي سفير جي الوداعي ملاقات، ٻه طرفن لاڳاپين تي ڳالهيون

اسلام آباد (بيورو) وزيراعظم نواز شريف، ايندڙ مهيني پاڪستان ۾ مقرري جو مدو پورو ڪندڙ آمريڪي سفير جِي خدمتن جي ساراهه ڪندَي چيو آهي ته رچرڊ اولسن پاڪ-آمريڪا لاڳاپن جِي مضبوطي لاءِ اهم ڪردار ادا ڪيو. آمريڪيسفير رچرڊ اولسن پي ايم هائوس اسلام آباد ۾ وزيراعظم ميان نواز شريف سان الوداعي ملاقات ڪئي. ملاقات دوران پاڪ-آمريڪا لاڳاپن بابت خيالن جي ڏي وٺ ڪئي وئي. ان موقعي تي وزيراعظم چيو ته رچرڊ اولسن پاڪ آمريڪا لاڳاپا مضبوط ڪرڻ ۾ ڪردار ادا ڪيو. ميان نواز شريف اميد ڏيکاري ته پاڪستان ۾ نئون مقرر ٿيندڙ سفير به ٻنهي ملڪن وچ ۾ لاڳاپا مضبوط ڪرڻ پنهنجو ڪردار ڀرپور نموني ادا ڪندو.

 

سنڌ حڪومت احتساب ڪميشن جوڙڻ جو فيصلو ڪري ورتو

ڪراچي (اسٽاف رپورٽر) سنڌ سرڪار،صوبي اندر احتساب جي عمل کي وڌيڪ بهتر بڻائڻ لاءِ احتساب ڪميشن جوڙڻ جو فيصلو ڪري ورتو، وڏي وزير سيد قائم علي شاهه قانون واري وزارت کي بل تيار ڪرڻ جي هدايت ڪئي آهي. سي ايم هائوس ڪراچي ۾ وڏي وزير سيد قائم علي شاهه جي صدارت هيٺ اعليٰ سطحي اجلاس ٿيو. سي ايم هائوس ترجمان موجب اجلاس دوران صوبي ۾ احتساب جو عمل وڌيڪ بهتر ڪرڻ لاءِ سنڌ احتساب ڪميشن جوڙڻ جو فيصلو ڪيو ويو. ترجمان موجب وڏي وزير، قانون واري وزارت کي هدايت ڪئي ته احتساب ڪميشن لاءِ جلد قانوني مسودو تيار ڪيو وڃي. سنڌ احتساب ڪميشن جو بل جلد صوبائي اسيمبلي مان منظور ڪرايو ويندو.

 

حڪومت کي نه جمهوريت کي پيا بچايون، پ پ کي خطرو ملڪي سلامتي کي خطرو هوندو: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته ڪجهه ماڻهن شيرانيون سبرائي ڇڏيون آهن پر اهي اڪيلا آهن، پ پ کي خطرو ٿيو ته ملڪ جي سلامتي کي خطرو هوندو،  آرمي چيف جي پوسٽرز ۽ بينرز لڳائڻ تي ڪنهن کي به پريشان نه ٿيڻ گهرجي. اسلام آباد ۾ ميڊيا سان ڳالهائيندي قومي اسيمبلي ۾ اپوزيشن ليڊر خورشيد شاهه چيو ته ملڪ ۾ ڪرپشن جو بنياد ضياءُ الحق وڌو، آمرن جي انهن ئي سياستدانن مدد ڪئي آهي، جيڪي ڊڪٽيٽرن جي پيدوار آهن.  هـُن چيو ته پيپلزپارٽي نواز شريف کي نه بچائي رهي آهي پر جمهوريت ۽ پارليامينٽ جي حمايت ڪري رهي آهي، نواز شريف جي حڪومت ناڪام ٿي ته ايندڙ دور ۾ آئوٽ ٿي ويندا ۽ نئين قياد/ت آئي ته جمهوريت جي ڪاميابي هوندي. خورشيد شاهه چيو ته ڪرپشن ۽ دهشتگردي ملڪ جا سڀ کان وڏا  مسئلا آهن، انهن جو خاتمو ضروري آهي، تنهن ڪري سڀ فيصلا آئين ۽ قانون جي دائري ۾ رهي ڪيا وڃن. اپوزيشن ليڊر چيو ته ملڪ کي ايٽمي طاقت بڻائڻ ۽ آئين سميت سڀ ڪجهه سياستدانن ڏنو آهي، جيڪڏهن سياستدانن جو احتساب ڪرڻو آهي ته اليڪشن جي ذريعي ڪيو وڃي. هڪ سوال جي جواب ۾ خورشيد شاهه چيو ته رڳو ڪراچي جو گوڙ مچايو پيو وڃي ۽ ايم ڪيو ايم خلاف ڪاررواين جا مطالبا ٿي رهيا آهن، اعجاز الحق تسليم ڪيو هو ته متحده  سندس پيءُ ضياءُ الحق ٺاهي هئي. خورشيد شاهه وڌيڪ چيو ته جنرل راحيل شريف پاڪ فوج جو سپهه سالار آهي، ان جي بينرز ۽ پوسٽر لڳائڻ تي ڪنهن کي به اعتراض نه ٿيڻ گهرجي. هن چيو ته سنڌ ۾ ڊي سي اوز جا به پوسٽر لڳايا ويندا آهن، پاڪ فوج ته ته سرحدن جي حفاظت ڪندي آهي، عوام آرمي چيف جي محبت ۾ پوسٽر لڳائي رهيو آهي. هڪ ٻي سوال جي جواب ۾ خورشيد شاهه چيو ته ڪجهه ماڻهن شيروانيون سبرائي ڇڏيون آهن پر اهي اڪيلا آهن، پيپلزپارٽي کي ڪو به خطرو ٿيو ته اهي ملڪي سلامتي لاءِ خطرو هوندو. اپوزيشن ليڊر چيو ته آصف علي زرداري دبئي ۾ ڪو به اجلاس ناهي سڏايو، هو پاڻ پ پ شريڪ چيئرمين سان ملڻ لاءِ وڃي رهيا آهن. جا به پوسٽر لڳايا ويندا آهن، پاڪ فوج ته ته سرحدن جي حفاظت ڪندي آهي، عوام آرمي چيف جي محبت ۾ پوسٽر لڳائي رهيو آهي. هڪ ٻي سوال جي جواب ۾ خورشيد شاهه چيو ته ڪجهه ماڻهن شيروانيون سبرائي ڇڏيون آهن پر اهي اڪيلا آهن، پيپلزپارٽي کي ڪو به خطرو ٿيو ته اهي ملڪي سلامتي لاءِ خطرو هوندو. اپوزيشن ليڊر چيو ته آصف علي زرداري دبئي ۾ ڪو به اجلاس ناهي سڏايو، هو پاڻ پ پ شريڪ چيئرمين سان ملڻ لاءِ وڃي رهيا آهن.

 

 

اقتصادي رابطه ڪميٽي اسٽيل مل جي ملازمن کي عيد جون 2 پگهارون جاري ڪري ڇڏيون

اسلام آباد (بيورو) اقتصادي رابطه ڪميٽي اسٽيل مل جي ملازمن کي عيد جون 2 پگهارون جاري ڪرڻ ۽ 50 هزار ميٽرڪ ٽن چڻن جي دال ٻاهران گهرائڻ جي منظوري ڏئي ڇڏي آهي. اسلام آباد ۾ ناڻي واري وفاقي وزير اسحاق ڊار جي صدارت هيٺ اقتصادي رابطه ڪميٽي جو اجلاس ٿيو. اجلاس ۾ خوراڪ واري وزارت پاران هڪ لک ٽن دال ڄڻا ٻاهران گهرائڻ جيسفارش ڪئي وئي، جنهن بعد ڪميٽي 50 هزار ميٽرڪ ٽن چڻن جي دال ٻاهران گهرائڻ جي منظوري ڏني. ڪميٽي جي منظوري بعد ٽريڊنگ ڪارپوريشن پاڪستان جي ذريعي 50 هزار ميٽرڪ ٽن چڻن جي دال ٻاهران گهرائي ويندي. اقتصادي رابطا ڪميٽي اسيٽل مل جي ملازمن کي عيد کان اڳ 2 پگهارون جاري ڪرڻ لاءِ 96 ڪروڙ رپيا جاري ڪرڻ جي به منظوري ڏني، ملازمن کي جون ۽ جولاءِ جون پگهارون ڏنيون وينديون. اي سي سي پاران پاڪستان مشين ٽول فيڪٽري جي ملازمن کي پڻ عيد کان اڳ پگهارون جاري ڪرڻ جي منظوري ڏني آهي.

 

پارليامينٽ جا ڪيترائي ميمبر اثاثن جا تفصيل جمع ڪرائڻ ۾ غيرسنجيدگيءَ جو مظاهرو ڪري رهيا آهن:اليڪشن ڪميشن

اسلام آباد (بيورو) اليڪشن ڪميشن، شڪايت ڪئي آهي ته پارليامينٽ جا ڪيترائي ميمبر اثاثن جا تفصيل جمع ڪرائڻ ۾ غيرسنجيدگيءَ جو مظاهرو ڪري رهيا آهن،اپوزيشن ليڊر خورشيد شاهه،چوڌري نثار علي ۽ خواجا آصف سميت ڪيترن ئي پارلياماني ميمبرن ملڪيتن جا تفصيل جمع ناهن ڪرايا. اليڪشن ڪميشن پاران جاري ڪيلپڌرائي ۾ چيو ويو آهي ته پارلياماني ميمبر اثاثن جا تفصيل جمع ڪرائڻ ۾ غيرسنجيدگي جو مظاهرو ڪري رهيا آهن. پڌرائي موجب، هڪ هزار 38 پارلياماني ميمبرن مان هن وقت تائين رڳو 127 ميمبرن اثاثن جا تفصيل جمع ڪرايا آهن. اليڪشن ڪميشن جو چوڻ آهي ته وزيراعظم ميان نواز شريف، اسحاق ڊار ۽ سينيٽ چيئرمين رضا رباني اثاثن جا تفصيل جمع ڪرائي ڇڏيا آهن. پڌرائي موجب، اپوزيشن ليڊر خورشيد شاهه، چوڌري نثار، خواجا آصف، خواجا سعد رفيق اعتراز احسن، راجا ظفرالحق ۽ احسن اقبال سميت ڪيترن ئي سياستدانن اڃا تائين اثاثن جا تفصيل جمع ناهن ڪرايا. اليڪشن ڪميشن چيو ته اثاثن جا تفصيل جمع ڪرائڻ جي آخري تاريخ 30 سيپٽمبر آهي،تنهنڪري ميمبر ڄاڻايل تاريخ کان اڳ پنهنجن اثاثن جا تفصيل جمع ڪرائي ڇڏين

 

پاڪستان، افغانستان سان پر امن سرحد چاهي ٿو، طالبان تشدد ختم ڪري ٻيهر ڳالهين جي رستي تي ايندا:پرڏيهي ترجمان

اسلام آباد (بيورو) پرڏيهي ترجمان قاضي خليل الله چيو آهي ته پاڪستان، افغانستان سان پر امن سرحد چاهي ٿو، اميد آهي ته افغان طالبان تشدد ختم ڪري ٻيهر ڳالهين جي رستي تي ايندا. اسلام آباد ۾ ميڊيا کي هفتيوار بريفنگ ڏيندي پرڏيهي ترجمان قاضي خليل الله چيو ته سرتاج عزيز جون ڪابل جي دوري دوران افغان قيادت سان ملاقاتون سٺي ماحول ۾ ٿيون، افغان سرڪار کي اعتماد بحال ڪرڻ جو پيغام ڏنو آهي. هـُن چيو ته پاڪستان جي سرحد تي داعش جي حملي بابت ميڊيا رپورٽس جو جائزو ورتو پيو وڃي، داعش جي افغانستان ۾ موجودگي تي هو تبصرو نه ڪندو. پرڏيهي ترجمان چيو ته پاڪستان ۾ داعش جو ڪو به وجود ناهي، افغانستان سان پر امن سرحد چاهيون ٿا،  ڪابل ۾ امن جي بحالي لاءِ مفاهمتي عمل جي حمايت جاري رکي ويندي. قاضي خليل الله چيو ته کين اميد آهي ته افغان طالبان تشدد وارو رستو ختم ڪري ٻيهر ڳالهين جي رستي طرف ايندا. پرڏيهي ترجمان وڌيڪ چيو ته ڀارتي حڪومت ۽ اتان جي فوج وچ ۾ رابطا معطل آهي، ڀارتي حڪومت سيز فائر تي عمل جو چوي پئي پر ڀارتي فوج جنگبندي جي ڀڃڪڙي ڪري رهي آهي. پرڏيهي ترجمان جو چوڻ هو ته وزيراعظم 30 سيپٽمبر تي گڏيل قومن جي جنرل اسيمبلي جي اجلاس کي خطاب ڪندو، وزيراعظم جي تقرير کي حتمي شڪل ڏني پئي وڃي.

 

وقت اچي ويو آهي ته قبائلي علائقن کي ڪي پي ڪي جو حصو بڻايو وڃي: عمران خان

نوشهره(م.ڊ) پي ٽي آءِ سربراهه عمران خان چيو آهي ته نواز شريف مڪاني چونڊن کان اڳ ڌانڌلي شروع ڪري ڇڏي آهي، وزيراعظم کي آصف زرداري ۽ ايم ڪيو ايم جَي دٻاءَ ۾ اچڻ بدران ڪرپٽ ماڻهن جو احتساب ڪرڻ گهرجي. نوشهره ۾ ميڊيا سان ڳالهائيندي عمران خان چيو ته حڪمران ليگ مڪاني چونڊن کان ڪجهه ڏينهن اڳ سنڌ جي هارين لاءِ پيڪيج جو اعلان ڪري اڳواٽ ئي ڌانڌلين جي شروعات ڪري ڇڏي آهي. ڪپتان چيو ته پنجاب اندر مڪاني چونڊن ۾ هو پيپلز پارٽيءَ سميت ڪنهن جماعت سان اتحاد نه ڪندا. پي ٽي آءِ سربراهه چيو ته ڪرپشن جَي ڪيسن سبب دبئي ويٺل آصف علي زرداري ۽ ايم ڪيو ايم وارا نواز شريف تي دٻاءُ وجهي رهيا آهن. عمران خان چيو ته نواز شريف کي ڪنهن جي به دٻاءَ ۾ اچڻ بدران ڪرپٽ ماڻهن جو احتساب ڪرڻ گهرجي. ڪپتان چيو ته حڪومت صحيح احتساب چاهي ٿي ته ڪي پي حڪومت کان سکي، جتي احتساب ڪميشن با اختيار آهي، پي ٽي آءِ سربراهه دعويٰ ڪئي ته ڪي پي ڪي اندر پوليس ۾ ڪنهن به قسم جي سياسي مداخلت ناهي. عمران خان فاٽا کي صوبو بڻائڻ جي مخالفت ڪندي چيو ته فاٽا کي ڪي پي ڪي جو حصو رهڻ ڏنو وڃي. تحريڪ انصاف جي چيئرمين چيو ته فاٽا کي صوبو ٺاهڻ جي حوالي سان اتان جي عوام کان ڀلي راءِ ورتي وڃي.

 

تيل ۽ گئس ڳوليندڙ ڪمپنيون مقامي ماڻهن کي روزگار ڏين: سپريم ڪورٽ

اسلام آباد (بيورو) سپريم ڪورٽ منڇر ڍنڍ جي گدلاڻ واري ڪيس جي ٻڌڻي دوران ڍنڍ مان تيل ۽ گئس جي ڳولا ڪندڙ ڪمپنين کي مقامي ماڻهن کي روزگار ڏيڻ جو حڪم ڏئي ڇڏيو، سرڪار کي نئين گاج جي تعمير ٽن بدران ٻن سالن اندر مڪمل ڪرڻ ۽ مقامي ماڻهن لاءِ 12 نوان آر او پلانٽس لڳائڻ جي به هدايت ڪري ڇڏي آهي. سپريم ڪورٽ ڪراچي رجسٽري ۾ منڇر ڍنڍ گدلاڻ ڪيس جي ٻڌڻي دوران عدالت مختلف ڌرين جا دليل ٻڌڻ بعد ڍنڍ اندر ۽ ڀرپاسي تيل ۽ گئس جي ڳولا ڪندڙڪمپنين کي حڪم ڏنو ته مقامي ماڻهن کي روزگار ڏنو وڃي. عدالت مقامي ماڻهن لاءِ صاف پاڻي جي فراهمي خاطر لڳندڙ آر او پلانٽس جو ڪم مهيني اندر مڪمل ڪرڻ ۽ 12 نوان آر او پلانٽس لڳائڻ جو حڪم ڏنو. عدالت ڍنڍ کي گدلاڻ کان بچائڻ لاءِ 200 فوٽ ڊگهي لوهي ڄاري لڳائڻ ۽ نيئن گاج جي نئين سر تعمير وارو ڪم ٽن بدران ٻن سالن اندر مڪمل ڪرڻ جو به حڪم ڏنو. سپريم ڪورٽ  وفاقي سرڪار کي منڇر جي بحالي واري رٿا لاءِ فنڊز بنا دير جاري ڪرڻ جو حڪم ڏيندي ڪيس جي ٻڌڻي اڻڄاتل مدي تائين ملتوي ڪري ڇڏي آهي.