تازيون خبرون

Daily Archives: September 17, 2015

دهشتگردن جي خاتمي تائين فوج واپس نه ويندي: آرمي چيف جو اعلان

فاٽا (مانيٽرنگ ڊيسڪ) آرمي چيف جنرل راحيل شريف جو چوڻ آهي ته آپريشن ضرب عضب ۾ قبائلين جي قربانين ۽ حمايت تي شڪر گذار آهيان قوم جي حمايت سان دهشتگردن کي سندن علائقن مان ڪڍي ڇڏيو آهي جڏهن ته دهشتگردن کي واپس اچڻ نه ڏينداسين ۽ نه ئي دهشتگردي جي خاتمي تائين فوج واپس ويندي. آئي ايس پي آر موجب آرمي چيف جنرل راحيل شريف ڏکڻ وزيرستان جو دورو ڪيو جتي هنن ڪيترن ئي منصوبن جو افتتاح ڪيو جڏهن اُهي منصوبا آپريشن کانپوءِ فاٽا جي بهالي پروگرام جو حصو آهن. پاڪ فوج جي ترجمان موجب آرمي چيف وانا لا3 132 ڪي وي گرڊ اسٽيشن، 54 ڪلوميٽر ٽرانسميشن لائين ۽ ٽانڪ ڊي آئي خان وچ ۾ 62 ڪلوميٽر روڊ جو افتتاح ڪيو جيڪو مقامي ماڻهن جي مطالبي تي قائم ڪيو ويو آهي. ڊي جي آئي ايس پي موجب پاڪ فوج جي سربراهه وانا ۾ قائم جديد ڪيڊٽ ڪاليج جو افتتاح ڪيو جنهن ۾ 500 ٻارڙا تعليم حاصل ڪندا جڏهن ته انهن منصوبن سان علائقي ۾ خوشحالي ۽ روزگار جا موقعا پيدا ٿيندا، قبائلين سمورا واعدا پورا ٿيڻ تي آرمي چيف جو شڪريو ادا ڪيو. هوڏانهن مقامي قبائلين کي خطاب ڪندي آرمي چيف جنرل راحيل شريف چيو آهي ته فاٽا جي عوام جي بحالي جا منصوبا هر صورت ۾ مڪمل ڪيا ويندا، انهن منصوبن  سان فاٽا جي علائقن ۾ خوشحالي ايندي جيڪو اسانجو وڏو مقصد آهي جڏهن ته انهن منصوبن سان هتي جي عوام جي زندگي جو معيار بلند ٿيندو ۽ روزگار جا نوان موقعا پيدا ٿيندا، فاٽا جي نوجوانن کي پيشيوراڻن ڪاليجن ۾ موڪلڻ لاءِ هر ممڪن مدد ڪئي ويندي. هن چيو ته ٽانڪ ڊي آئي خان روڊ 750 ڪلوميٽر مرڪزي اقتصادي راهداري جو حصو هوندي ۽ اُهو روڊ اقتصادي راهداري جي حصي طور افغانستان سان وڃي جڙندي. آرمي چيف چيو ته آپريشن ضرب عضب ۾ قبائلين جي قربانين ۽ حمايت تي شڪرگذار آهيون، قوم جي حمايت سان دهشتگردن کي سندن علائقن مان ڪڍي ڇڏيو آهي جڏهن ته آپريشن ضرب عضب آخري مرحلي ۽ ڪجهه علائقن ۾ آهي. هن چيو ته ٻيهر آبادڪاري جي منصوبن تي طرپور طريقي سان عمل ٿيندو ۽ آئي ڊي پيز جي واپسي طي ٿيل منصوبي تحت تمام بهتر هوندي جڏهن ته علائقي ۾ خوشحالي لاءِ قبائلي پنهنجو تعاون جاري رکن. آرمي چيف وڌيڪچيو ته دهشتگردن کي واپس اچڻ نه ڏينداسين ۽ نه ئي دهشتگردي جي خاتمي تائين پاڪ فوج واپس ويندي.

 

وفاقي حڪومت پاران 65 هزار ماڻهن جا نالا اي سي ايل مان ڪڍڻ جو اعلان

اسلام آباد(اي پي پي) گهرو وزارت عوام کي پاسپورٽ جي فراهميءَ جي حوالي سان (اڄ) خميس کان ايس ايم ايس جي سروس جي شروعات ڪري ڇڏي آهي، هاڻي عوام کي پاسپورٽ وٺڻ جي حوالي سان ڪنهن سفارش جي ضرورت نه پوندي، وڌيڪ 59 هزار ماڻهن جا نالا ايگزٽ ڪنٽرول لسٽ مان ڪڍيا ويندا. هلندڙ سال جي پڄاڻيءَ تائين 91 ملڪن ۾ پاڪستاني سفارتخانن ۾ مشينري ريڊ ايبل پاسپورٽ جي فراهمي شروع ٿي ويندي. ان ڳالهه جو اعلان گهرو وزير چوڌري نثار علي خان اربع ڏينهن هتي پريس ڪانفرنس ڪندي ڪيو. هن چيو ته گهرو وزارت عوام کي پاسپورٽ جي فراهميءَ جي حوالي سان (اڄ) خميسکان ايس ايم ايس سروس جي شروعات ڪري ڇڏي آهي، جنهن جو نوٽيفڪيشن جاري ڪيو ويو آهي. درخواست ڏيڻ سان پاسپورٽ حاصل ڪرڻ تائين هڪ شخص اهو ڄاڻي سگهندو ته سندس پاسپورٽ ڪهڙي مرحلي ۾ آهي ۽ انهن کي هڪ ايس ايم ايس نمبر ڏنو ويندو جتي ميسيج ڪري هو ان بابت معلومات وٺي سگهندا. ايندڙ مهيني کان راولپنڊي ۽ اسلام آباد ۾ تيار پاسپورٽ جي هوم ڊليوري پڻ شروع ڪئي ويندي. هن ٻُڌايو ته عوام جي سهولت لاءِ نادرا سان گڏجي لاهور، ڪراچي، اسلام آباد ۾ ميگا سروس سينٽر ٺاهي رهيا آهيون. هن چيو ته اِي سي ايل مان به ماڻهن جا نالا ڪڍيا پيا وڃن هاڻي ڪنهن جو نالو ان کي ٻُڌائڻ بنا اِي سي ايل ۾ نه ڏنو ويندو. 5 هزار ماڻهن جا نالا اِي سي ايل مان ڪڍيا آهن، جڏهن ته وڌيڪ 59 هزار ماڻهن جا نالا ڪڍيا ويندا، جنهن شخص جو نالو اِي سي ايل ۾ وڌو ويندو ان کي اپيل جو حق هوندو ۽ هر سال ان فهرست تي نظرثاني پڻ ٿيندي. هن چيو ته سيڪيورٽي ۽ دفاعي ادارن جي ملازمن ۽ منشيات جي اسمگلرن جا نالا اِي سي ايل ۾ موجود رهندا ۽ سيڪيورٽي ۽ دفاعي ادارن جا ملازم لاڳاپيل اداري جي اجازت بنا ملڪ کان ٻاهر نه وڃي سگهندا. هن چيو ته نادرا ۽ ايف آءِ اي مان گند صاف ڪنداسين، نادرا ۾ ڪنهن سياست ڪرڻ نه ڏينداسين، ڏيڍ سال ۾ 80 هزار سال جعلي سُڃاڻپ ڪارڊ بلاڪ ڪيا آهن، گذريل ڪجهه مهينن دوران 138 نادرا ملازمن کي نوڪرين مان ڪڍيو ويو آهي جيڪي جعلي سُڃاڻپ ڪارڊ ٺاهڻ ۾ ملوث هئا، جڏهن ته ڪجهه ماڻهن کي گرفتار پڻ ڪيو ويو آهي. انهن ماڻهن ايراني ۽ افغانين کي جعلي سڃاڻپ ڪارڊ ٺاهي پئي ڏنا. هن چيو ته نادرا ۾ سڌارن کانپوءِ هاڻي اهو هڪ نفعي وارو ادارو بڻجي ويو آهي، اهڙيءَ طرح پاسپورٽ سيل پڻ گذريل سال 17.7 ارب رپين جو نفعو ڪمايو. هن سال 18.8 ارب رپين جو منافعو متوقع آهي. ايندڙ سال توقع آهي ته اهو منافعو 21 ارب رپيا ٿي ويندو. هن چيو ته ان منافعي سان عوام کي به متبادل طور سٺي سروس ڏينداسين ۽ بهتر ڪم ڪندڙ ملازمن کي سهولتون پڻ ڏنيون وينديون. گهرو وزير چيو ته ايف آءِ اي ۾ ملازمن جي کوٽ آهي جنهن کي پورو ڪرڻ لاءِ قدم کڻي رهيا آهيون. هڪ سوال تي هن چيو ته مشينري ريڊ ايبل پاسپورٽ جي حوالي سان هلندڙ سال جي آخر تائين 91 ملڪن ۾ پاڪستاني سفارتخانن اندر اهڙي سهولت ڪم شروع ڪري ڇڏيندي.

 

وزيراعظم جو نام نهاد هاري پيڪيج سياسي چال آهي: آصف زرداري

اسلام آباد (بيورو) اڳوڻي صدر آصف علي زرداري هاري پيڪيج کي رد ڪندي چيو آهي ته مڪاني چونڊن کان پهريان وزيراعظم جو نام نهاد هاري پيڪيج سياسي چال آهي. مخالف ڌر ۽ هاري ڪڏهن کان رڙيون ڪري رهيا آهن پر حڪومت ٻوڙي ۽ گونگي بڻيل آهي. اڳوڻي صدر آصف علي زرداري هڪ بيان ۾ چيو آهي ته مڪاني چونڊن جو شيڊيول آيو ته حڪومت هارين لاءِ پيڪيج جو اعلان ڪيو جيڪا هڪ سياسي چال آهي. وزيراعظم جي هاري پيڪيج تي مايوسي ٿي آهي هارين کي ڏنل رليف پيڪيج نه رڳو ناڪافي آهي پر دير سان ڏنو ويو. هن وڌيڪ چيو ته مخالف ڌر ۽ هاري ڪڏهن کان رڙيون ڪري رهيا آهن پر حڪومت ٻوڙي ۽ گونگي بڻيل آهي. هارين جي پيداوار تي امدادي قيمت گهري ته حڪومت نه ڏني. اڳوڻي صدر سنڌ سرڪاري جي تعريف ڪندي چيو ته سنڌ حڪومت هارين جي مالي مدد به ڪندي آهي ۽ ڀاڻ، ٻچ به مفت فراهم ڪري رهي آهي.

 

مولانا فضل الرحمان حڪومت ۽ ايم ڪيو ايم وچ ۾ استعيفائن واري معاملي تي وڌيڪ ڪردار ادا ڪرڻ کان معذرت ڪري ڇڏي

اسلام آباد (بيورو) جـَي يو آءِ سربراهه مولانا فضل الرحمان، وزيراعظم نواز شريف سان ملاقات ڪري حڪومت ۽ ايم ڪيو ايم وچ ۾ استعيفائن واري معاملي تي وڌيڪ ڪردار ادا ڪرڻ کان معذرت ڪري ڇڏي آهي، فضل الرحمان جو چوڻ آهي ته جيڪا ذميواري ڏني هئي، اها پوري ڪئي آهي، وزيراعظم هاڻي پاڻ ڪردار ادا ڪري. پي ايم هائوس اسلام آباد ۾ وزيراعظم نواز شريف سان جي يو آءِ سربراهه مولانا فضل الرحمان ملاقات ڪئي. ملاقات دوران ملڪ جي موجوده سياسي صورتحال ۽ ايم ڪيو ايم جي استعيفائن سميت مختلف معاملن تي خيالن جي ڏي وٺ ڪئي وئي. ذريعن موجب، مولانا فضل الرحمان حج تي وڃڻ سبب حڪومت ۽ ايم ڪيو ايم وچ ۾ استعيفائن واري معاملي تي وڌيڪ ٽياڪڙي جو ڪردار ادا ڪرڻ کان معذرت ڪئي. مولانا فضل الرحمان چيو ته حڪومت کيس جيڪا ذميواري ڏني هئي، هن پوري ڪئي آهي، وزيراعظم نواز شريف کي هاڻي ايم ڪيو ايم جي استعيفائن واري معاملي تي پاڻ ڪردار ادا ڪرڻ گهرجي. ذريعن موجب، وزيراعظم نواز شريف حڪومت پاران متحده کي پرچائڻ جون ڪوششون ڪرڻ تي فضل الرحمان جو ٿورو مڃيو.

 

وڏي وزير جناح اسپتال ۾ ڊاڪٽرن ۽ پيرا ميڊيڪل اسٽاف جي احتجاج جو نوٽيس ورتو، سيڪريٽري صحت ۽ اسپتال انتظاميه طلب

ڪراچي (اسٽاف رپورٽر) وڏي وزير قائم علي شاهه جناح اسپتال ۾ ڊاڪٽرن ۽ پيرا ميڊيڪل اسٽاف جي احتجاج جو نوٽيس وٺندي صحت واري وزير، سيڪريٽري ۽ جناح اسپتال انتظاميا طلب کي طلب ڪري ورتو آهي، وڏي وزير چيو آهي ته احتجاج سان غريب مريض متاثر ٿي رهيا آهن، جنهن جي اسلام به اجازت نٿو ڏئي. وڏي وزير سيد قائم علي شاهه جناح اسپتال ۾ ڊاڪٽرجي ٽن ڏينهن کان جاري احتجاج جو نوٽيس ورتو آهي. وڏي وزير جناح اسپتال جي ڊائريڪٽر، صحت واري وزير ڄام مهتاب ڏهر، صحت ۽ ناڻي وارين سيڪريٽرين سميت ٻين عملدارن کي طلب ڪري ورتو آهي. وڏي وزير قائم علي شاهه پنهنجي جاري ڪيل پڌرائيءَ ۾ چيو آهي ته هڙتالن سان غريب مريض متاثر ٿي رهي آهن. هن چيو ته هڙتالون انساني خدمتن جي خلاف آهن، جنهن جي اسان جو مذهب به اجازت نٿو ڏئي.

 

ڪنهن کي به زبردستي کَلون وٺڻ جي اجازت نه ڏني ويندي،رينجرز جو ڪم صرف ڏوهارين خلاف ڪارروائيون ڪرڻ آهي:نثار کهڙَو

ڪراچي (اسٽاف رپورٽر) اطلاعات واري صوبائي وزير نثار کهڙَي چيو آهي ته عيدالاضحيٰ تي ڪنهن کي به زبردستي کَلون وٺڻ جي اجازت نه ڏني ويندي، رينجرز جو ڪم صرف ڏوهارين خلاف ڪارروائيون ڪرڻ هوندو آهي. پن نجي جاري ڪيل پڌرائيءَ ۾ نثار کهڙَي چيو ته قربانيءَ واري عيد جي موقعي تي ڪنهن کي به زبردستي کَلون وٺڻ جي اجازت نه آهي، ملوث ماڻهن خلاف ڪارروائي ڪئي ويندي. هن چيو ته رينجرز کي دهشتگردي، ٽارگيٽ ڪلنگ، ڀتاخوري ۽ ٻين ڏوهي وارداتن ۾  ملوث ڏوهارين خلاف ڪارروائي جا اختيار آهن، جنهن جي وفاقي گهرو وزير چوڌري نثار به تصديق ڪري چڪو آهي. عمران خان جي حوالي سان پڇيل سوال جي جواب ۾ نثار کهڙَي چيو ته سياسي ماحول کي خراب نه ڪرڻ گهرجي. سنڌ جي تعليم ۽ اطلاعات واري سينيئر وزير نثار احمد کهڙو چيو آهي ته سنڌ ۾ نجي اسڪولن پاران واڌو فيس وصول ڪرڻ جو نوٽيس وٺندي ڪيترن ئي نجي اسڪولن کي نوٽيس جاري ڪيا ويا آهن جڏهن ته ان معاملي تي نجي اسڪولن جي انتظاميا جو اجلاس پڻ اڄ خميس ڏينهن گهرائي ورتو آهي جنهن ۾ واڌو فيس جي اوڳاڙيءَ کي روڪڻ لاءِ لائحه عمل طئي ڪرڻ سميت نجي اسڪولن جي رجسٽريشن واري قانون جو پڻ جائزو ورتو ويندو۽ واڌو فيس اوڳاڙڻ جي عمل کي ڪنهن به صورت ۾ برداشت نه ڪنداسين. اهڙن خيالن جو اظهار هن اربع ڏينهن ڪراچي جي گونگن شاگردن واري اسڪول (جي ايس ) اڪيڊمي ۾ ڪلچرل پروگرام جي موقعي تي ميڊيا سان ڳالهائيندي ڪيو. هن چيو ته نجي اسڪولن جو ٽيڪسن ۾ واڌ جو جواز ڄاڻائي فيس ۾ واڌ ڪرڻ جو جواز قبول نه ڪيو ويندو، اهو ڪوئي جواز ناهي ته ٽيڪس ۾ واڌ جو انتقام عوام کان واڌو فيس اوڳاڙي ورتو وڃي ان عمل کي ڪنهن به طرح برداشت نه ڪنداسين. هن چيو ته نجي اسڪولن کي بي لغام ٿيڻ نه ڏينداسين ۽ اهڙي پاليسي جوڙي ويندي جنهن تحت نجي اسڪولن جي بهترمانيٽرنگ ٿئي. هن چيو ته جيڪي اسڪول واڌو فيس وصول ڪري رهيا آهن انهن خلاف ڪاروائي ڪرڻ لاءِ انهن جي رجسٽريشن رد ڪرڻ جو قانون موجود آهي. هن چيو ته نجي اسڪولن پاران 3 کان 4 مهينا اڳواٽ فيس جي وصولي واري عمل کي پڻ برداشت نه ڪنداسين. هن هڪ سوال جي جواب ۾ چيو ته قربانيءَ جو کلون ڪنهن به سياسي ۽ بندش پيل جماعت کي گڏ ڪرڻ جي اجازت نه هوندي صرف فلاحي ادارا قربانيءَ جون کلون گڏ ڪري سگهندا جن کي پڻ حڪومت کان اجازت وٺڻي پوندي. هن چيو ته قربانيءَ جي کلن گڏ ڪرڻ بابت ضابطه اخلاق جوڙڻ لاءِ ڪمشنر ڪراچي، ايڊمنسٽريٽر ڪراچي سميت ٻين تي ٻڌل هڪ ڪميٽي پڻ جوڙي وئي آهي. هن چيو ته رينجرز کي ٽارگيٽ ڪلنگ، دهشتگردي، ڀتي خوري، اغوا براءِ تاوان جي خاتمي لاءِ آپريشن ڪرڻ جا اختيار ڏنا ويا آهن ان کان علاوه رينجرز کي ٻي ڪا به ذميداري نه آهي جنهن جي پڻ وضاحت وفاقي گهرو وزير چوڌري نثار علي خان ڪري چڪو آهي. هن چيو ته عمران خان سميت ڪجهه ماڻهون جمهوري نظام مان ڪڏهن به خوش ناهن هوندا ۽ کين پيپلز پارٽي ۽ نواز ليگ جي ڪاميابي سٺي نه لڳندي آهي، اهي ڪو نه ڪو اشو اٿاري ادارن کي ڪمزور ڪرڻ جي ڪوششن ۾ رڌل آهن پر ادران جي هوندي ڪنهن ٻي طاقت کي دعوت ڏيڻ ضرورت ناهي. ان کان اڳ تقريب کي خطاب ڪندي هن چيو ته گونگن شاگردن کي تعليم لاءِ موقعا فراهم ڪيا پيا وڃن ته جيئن اهي شاگرد پڻ دنيا سان اڳتي وڌي مقابلو ڪري سگهن.

 

چارئي صوبا تفصيل ڏين، غلط انگ اکر ڏيندڙ جيل ويندو: سپريم ڪورٽ

اسلام آباد (بيورو) سـُپريم ڪورٽ، تيل ۽ گيس ڪمپنين جي رائلٽي جي مد ۾ ملندڙ رقم ترقياتي منصوبن تي خرچ ڪرڻ بابت سنڌ حڪومت جي رپورٽ رد  ڪندي چئني صوبن کي ترقياتي منصوبن جا تفصيل پيش ڪرڻ جو حڪم ڏئي ڇڏيو آهي، جسٽس امير هاني مسلم ريمارڪس ڏنا آهن ته جنهن به آفيسر غلط انگ اکر پيش ڪيا، ان کي جيل موڪليو ويندو. جسٽس امير هاني مسلم ۽ جسٽس دوست محمد کوسا تي ٻڌل سپريم ڪورٽ جي 2 رڪني بينچ سانگهڙ جي تيل ۽ گيس ڪمپنين جي رائلٽي بابت ڪيس جي ٻڌڻي ڪئي. ٻڌڻيءَ دوران سنڌ جي ايڊيشنل ايڊووڪيٽ جنرل پراڊڪشن بونس، رائلٽي ۽ ميرين ريسرچ جي مد ۾ مليل رقم ترقياتي منصوبن تي خرچ ڪرڻ بابت رپورٽ پيش ڪئي.  رپورٽ ۾ ٻڌايو ويو ته سنڌ حڪومت کي مليل رقم مان اڌ پئسا سنڌ جي 12 ضلعن تي خرچ ڪيا ويا آهن ۽  اتي ترقياتي ڪم ڪرايا ويا آهن. سنڌ جي ايڊيشنل ايدووڪيٽ جنرل چيو ته ڄامشورو، بدين، حيدرآباد، ٽنڊو محمد خان، سانگهڙ ۽ ٺٽي سميت 12 ضلعن لاءِ اسڪيمون مليون هيون، جيڪي پوريون ڪيون آهن، جڏهن ته رهيل اڌ رقم انرجي ڊپارٽمينٽ وٽ پيل آهي. جسٽس امير هاني مسلم سنڌ حڪومت جي رپورٽ رد ڪندي چيو ته رڳو ڪاغذي ڪارروائي ڪئي وئي آهي، رپورٽ ۾ تفصيل ناهن ٻڌايا ويا. جسٽس امير هاني مسلم چيو ته رپورٽ ۾ ڄامشوري ۾ ترقياتي منصوبن جو ذڪر ڪيو ويو، جتي هو پيدا ٿيو آهي، کيس ته ڪو ترقياتي منصوبو نظر ئي نٿو اچي. جسٽس امير هاني مسلم رمارڪس ۾ وڌيڪ چيو ته ٻين ضلعن ۾ ته پري جي ڳالهه آهي پر ڪراچي ۾ به ترقياتي منصوبا نظر نٿا اچن، جيڪو ڪراچي کان ٻاهر نڪرندو، ان کي سنڌ جي صورتحال جي خبر پئجي ويندي، صوبي جي ڪنهن به علائقي يا ضلعي ۾ ترقياتي ڪم نظر ئي نٿو اچي. جسٽس دوست محمد کوسا رمارڪس ڏنا ته رقم جو صحيح استعمال ٿئي ته علائقا جنت بڻجي وڃن. ان موقعي تي عدالت رائلٽي جي مد ۾ ملندڙ رقم ترقياتي منصوبن تي خرچ ڪرڻ بابت تفصيل پيش ڪرڻ جو حڪم ڏيندي چيو ته تيل ۽ گيس ڪمپنين پاران مليل رقم مان تيار ڪيل منصوبن جا تفصيل پيش ڪيا وڃن. جسٽس امير هاني مسلم ريمارڪس ڏنا ته جنهن به آفيسر غلط انگ اکر پيش ڪيا، ان کي جيل موڪليو ويندو ۽ معاملي جي جاچ سيشن جج کان به ڪرائي سگهجي ٿي، جنهن بعد ٻڌڻي ٽن هفتن تائين ملتوي ڪئي وئي.

 

بلاول ڀٽو زرداري پيپلزپارٽي جي 25 سينيئر اڳواڻن کي دبئي طلب ڪري ورتو

ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري پيپلزپارٽي جي 25 سينيئر اڳواڻن کي دبئي طلب ڪري ورتو، 19 سيپٽمبر تي اهم اجلاس ٿيندو، اجلاس جو ايجنڊا “پيپلز پارٽي کي نئين سري سان بحال ڪيئن ڪجي“ هوندو، آصف زرداري چيو آهي دير جي ننڍي چونڊ ۾ پ پ جي ڪاميابي سڀني لاءِ سبق آهي، مخالفن جا وات بند ٿي ويا آهن..پ پ جي چيئرمين بلاول ڀٽو زرداري پارٽي جي 25 سينيئر اڳواڻن کي دبئي طلب ڪري ورتو آهي، جن ۾ وڏو وزير سيد قائم علي شاهه، سيد خورشيد شاهه، سينيٽر اعتزاز احسن، سعيد غني، قمر زمان ڪائرا، منظور وٽو، مخدوم احمد محمود ۽ ٻيا شامل آهن.پيپلز پارٽي جو اهم اجلاس 19 سيپٽمبر تي دبئي ۾ ٿيندو، اجلاس جو ايجنڊا “پيپلز پارٽي کي نئين سري سان بحال ڪيئن ڪجي“ هوندو.اجلاس ۾ پ پ جي نئين سر تنظيم سازي بابت صلاح مشورا ڪري اهم فيصلا ڪيا ويندا.ٻئي پاسي، آصف زرداري چيو آهي ته اپردير جي ننڍي چونڊ پيپلز پارٽي جي ڪاميابي مخالفن جا وات بند ڪري ڇڏيا آهن، عورتن جي وڏي انگ ووٽ جو حق استعمال ڪيو. آصف زرداري چيو ته دير جي ننڍي چونڊ ۾ پ پ جي ڪاميابي سڀني لاءِ سبق آهي، پيپلز پارٽي جي ختم ٿيڻ واريون ڳالهيون ڪندڙن جا وات هاڻي بند ٿي ويا آهن

 

ڪوبه جج يا عدالت دهشتگردي خلاف ڪيس هلائڻ لاءِ تيار نه هئا،21 هين ترميم ذريعي فوجي عدالت مجبوري هئي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته ڪوبه جج يا عدالت دهشتگردي خلاف ڪيس هلائڻ لاءِ تيار نه هئا، ان ڪري مجبوري ۾ 21 هين ترميم ذريعي فوجي عدالتن جي منظوري ڏني وئي، ڪرپشن ۽ دهشتگردي جي لعنت جو خاتمو ضروري آهي پر ڪارروائي بنا فرق جي ٿيڻ گهرجي. لاهور ۾ آپريشن ضرب عضب بابت ڪانفرنس کي خطاب کانپوءِ ميڊيا سان ڳالهائيندي قومي اسيمبلي ۾ اپوزيشن ليڊر خورشيد شاهه چيو ته سوچڻ گهرجي ته دهشتگردي ۽ ڪرپشن خلاف ڪارروائي جي هاڻي ضرورت ڇو پئي آهي. هن چيو ته ملڪ کي پر امن بڻائڻ لاءِ دهشتگردن جي پاڙ پٽي وڃي،  آپريشن ضرب عضب هجي يا ٻيو ڪو طريقو دهشتگردي جو خاتمو ضروري آهي. خورشيد شاهه چيو ته سياستدانن تي ڪرپشن ۽ دهشتگردي جا الزام لڳائڻ ظلم آهي، ڪرپشن ۽ دهشتگردي جو خاتمو چاهيون ٿا پر ڪارروايون بنا فرق جي ٿيڻ گهرجن. هن چيو ته شهيد بينظير ڀٽو ڌمڪين باوجود پاڪستان واپس آئي، ان جمهوريت ۽ عوام جي پنهنجي جان جي قرباني ڏني، بي بي کي چوان ٿو ته ذوالفقار علي ڀٽو ۽ تنهنجو قاتل هڪ ئي آهي. خورشيد شاهه چيو ته فوجي عدالتون جمهوري روايتن جي خلاف آهن پر ڪو به جج يا عدالت دهشتگردي خلاف ڪيس هلائڻ لاءِ تيار نه هو، ان ڪري 21 هين ترميم ذريعي مجبوري ۾ فوجي عدالتون قائم ڪيون ويون.

 

نئين دهلي حڪومت ٻنهي وزيراعظمن ۾ ملاقات چاهي ٿي ته دعوت به پاڻ ڏئي:سرتاج عزيز

نئين دهلي(م.ڊ) وزيراعظم نواز شريف جي پرڏيهي معاملن بابت صلاحڪار سرتاج عزيز جو چوڻ آهي ته، جيڪڏهن ڀارت چاهي ٿو ته نيوو يارڪ م گڏيل اسيمبلي جي اجلاس ۾  ٻنهي ملڪن جي وزيراعظمن وچ ۾ ملاقاتون ٿين، ان لاءِ دعوت به سندن کي ڏئڻي پوندي.ڀارتي ميڊيا سان ڳالهائيندي  سرتاج عزيز چيو ته پاڪستان جو موقف بلڪل چٽو آهي ته حريت پسند ڪشميري اڳواڻن سان ملاقات جاري رهندي.سندس چوڻ هو ته خود ڀارت ۾ حريت پسند اڳواڻن سان ڳالهيون نه ڪرڻ جي حوالي سان سخت رويو اختيار ڪرڻ تي ڪافي سارا سوال اٿي رهيا آهن.سرتاج عزيز جو چوڻ هو ته ڀارت پاڻ ئي گذريل مهيني قومي سلامتي جي صلاحڪارن جي سطح جون ڳالهيون ختم ڪيون هيون ،هاڻي ڳالهين جو ٻيو دور به ڀارت کي ڪرڻو پوندو ،جيڪڏهن ڀارت چاهي ٿو ته نيويارڪ ۾ گڏيل قومن جي اجلاس دوران ٻنهي ملڪن جي وزيراعظمن ۾ ملاقات ٿئي ته دعوت به ڀارت کي ئي ڏئڻي پوندي.پرڏيهي معاملن جي صلاح ڪار سرتاج عزيز وڌيڪ چيو ته ،ڀارت چاهي ٿو ته رڳو دهشتگردي تي ڳالهيون ٿين. پر اسان ڪشمير سوڌو سڀني مسئلن تي ڳالهائڻ چاهيون ٿا،ياد رهي ته هلندڙ مهيني نيويارڪ ۾ گڏيل اسيمبلي جو ٿي رهيو آهي جنهن ۾ ٻنهي ملڪن جا وزيراعظم هڪ ئي هوٽل ۾ رهندا ،پر سياسي گرماگرمي سبب ٻنهي ملڪن جي اڳواڻن ۾ ملاقات جو ڪو به امڪان ناهي.