تازيون خبرون

Daily Archives: September 16, 2015

ڪجهه ماڻهو چاهين ٿا ته مونکي هٽائي اقتدار ۾ هليا اچن، اسين پئسا ڪمائڻ لاءِ ناهيون آيا: نوازشريف

اسلام آباد (بيورو) وزيراعظم،هارين لاءِ 341 ارب رپين کان وڌيڪ رليف پيڪيج ۽ ننڍن هارين کي ڪيش رقم ڏيڻ جو اعلان ڪري ڇڏيو، نواز شريف جو چوڻ آهي ته هارين کي سڌيءَ ريت مالي سهڪار ۽ قرض حاصل ڪرڻ آسان بڻايو ويندو. وزيراعظم نواز شريف، هارين لاءِ رليف پيڪيج جو اعلان اسلام آباد ۾ منعقد تقريب کي خطاب دوران ڪيو. تقريب کي خطاب ڪندي وزيراعظم چيو ته کين هارين ۽ آبادگارن جي تڪليف جو احساس آهي،جڏهن ته هاري 20 ڪروڙ عوام لاءِ فصل اپائيندا آهن تنهن ڪري انهن کي تڪليف نه هئڻ گهرجي. هن چيو ته هـُو هارين لاءِ رليف پيڪيج جو اعلان اڳ ڪرڻ چاهي پيو ته جيئن هارين کي فائدو پهچي سگهي پر جڏهن هنن حڪومت سنڀالي ته ملڪي خزانو بلڪل خالي هو ۽ ملڪي اقتصادي صورتحال ايتري خراب هئي جو چيو ويندو ته پاڪستان 2014ع ۾ ڊيفالٽر ٿي ويندو. نواز شريف چيو ته سندن حڪومت ذميواري ۽ ايمانداري سان ڪم ڪيو جڏهن ته هارين لاءِ امدادي پيڪيج احسان نه پر حڪومت جو فرض آهي. وزيراعظم، هارين لاءِ 341 ارب رپين جي رليف پيڪيج جو اعلان ڪندي چيو ته هـِي پيڪيج چئن حصن تي ٻڌل آهي جنهن جي پهرين حصي ۾ هارين کي سڌي ريت مالي سهڪار فراهم ڪيو ويندو. هن چيو ته ٻئي حصي ۾ پيداواري لاڳت گهٽ ڪئي ويندي، ٽيون حصو هارين کي زرعي قرضن تي ٻڌل آهي ۽ رليف پيڪيج جو چوٿون حصو هارين کي قرض حاصل ڪرڻ آسان بڻائيندو. نواز شريف چيو ته عالمي منڊي ۾ قيمتون گهٽ ٿيڻ سان هارين کي پنهنجي محنت جو معاوضو ناهي ملندو ان ڪري فيصلو ڪيو ويو آهي ته ڪپهه ۽ چانورن جي ساڍا 12 ايڪڙ زمين رکندڙ هارين کي 5 هزار رپيا في ايڪڙ ڪيش سپورٽ ڏني ويندي جڏهن ته ان ڪم لاءِ 20 – 20 ارب رپيا رکيا ويا آهن. وزيراعظم چيو ته ساڍا 12 ايڪڙن کان گهٽ زمين رکندڙ هارين کي وياج کانسواءِ قرض ڏنا ويندا ۽ هارين کي سڌيءَ ريت مالي سهڪار ۽ قرض حاصل ڪرڻ آسان بڻايو ويندو جڏهن ته زرعي ڀاڻ جي في ٻوري 500 رپيا گهٽتائي ڪئي ويندي. نواز شريف جو چوڻ هو ته زرعي ڀاڻ جي اگهن کي پراڻي سطح تي آندو ويندو ۽ ٽيوب ويل جي بجلي لاءِ 7 ارب رپين جي رعايت ڏني ويندي جڏهن ته ٽيوب ويل شمسي توانائي تي منتقل ڪرڻ لاءِ بنا وياج قرض ڏنا ويندا جڏهن ته فصلن جي انشورنس جو پريميئر به حڪومت ادا ڪندي. هن چيو ته هارين کي ٽن سالن لاءِ انڪم ٽيڪس تي ڇوٽ هوندي ۽ زرعي ٽرن توڙي ٽيڪس ختم ڪئي پئي وڃي جڏهن ته زرعي قرضن جي مارڪ اپ ريٽ تي 2 سيڪڙو گهٽتائي ڪئي ويندي. نواز شريف چيو ته ڪولڊ چيـَن لاءِ مشينري جي خريداري تي سيلز ٽيڪس 17 مان گهٽائي 7 سيڪڙو ڪئي وئي آهي جڏهن ته حڪومتي قدمن مان ننڍن هارين کي 147 ارب رپين جو فائدو ٿيندو. وزيراعظم چيو ته دهشتگرديءَ خلاف جنگ ۽ ڪراچي آپريشن پهريان شروع ڇو نه ڪيا ويا ؟ ملڪ ۾ ترقياتي منصوبا ٺاهڻ ڇا رڳو سندن ئي ذميواري هئي؟ نواز شريف چيو ته ماضي ۾ پاڪستان جي معاشي حالت تمام گهڻي ڪمزور هئي ۽ دهشتگردي جا واقعا به روزاني جي بنياد تي ٿيندا هئا. هن چيو ته مخالف حڪومت تي تنقيد جا بهانا ڳولي رهيا آهن ۽ سندن ڪوشش آهي ته ڪهڙي ريت نواز شريف کي ٻاهر ڪڍجي. نواز شريف چيو ته هـُو پئسو ٺاهڻ ناهن آيا پر پئسو خرچ ڪري معاملا درست ڪرڻ چاهين ٿا، ڇو ته هنن پاڪستان جي برائين کي ٺيڪ ڪرڻ جو عزم ڪيو آهي. وزيراعظم چيو ته پاڪ چين اقتصادي راهداري منصوبو به ٺاهيو، جنهن سان سمورن صوبن کي فائدو ٿيندو. نواز شريف چيو ته عالمي مارڪيٽ ۾ تيل ۽ گئس جون قيمتون گهٽ ٿيڻ سان کين خوشي ملندي آهي، ڇو ته قيمتون گهٽ ٿيڻ سان گهٽ پئسا خرچ ڪرڻا پوندا آهن جڏهن ته بجلي جي کوٽ ختم ڪرڻ لاءِ قدم کنيا پيا وڃن.

 

سنڌ اپيڪس ڪميٽي جو اجلاس، ڪراچي آپريشن منطقي انجام تائين پهچائڻ جو فيصلو

ڪراچي (اسٽاف رپورٽر) ايپيڪس ڪميٽي سنڌ، ڪراچي ۾ ڏوهارين خلاف جاري آپريشن تي اطمينان جو اظهار ڪندي ٽارگيٽڊ ڪارروايون جاري رکڻ جو فيصلو ڪندي پابندي مڙهيل تنظيمن تي قربانيءَ جون کلون گڏ ڪرڻ تي پابندي مڙهي ڇڏي آهي. اپيڪس ڪميٽي سنڌ جو اجلاسوڏي وزير سيد قائم علي شاهه جي صدارت هيٺ سي ايم هائوس ڪراچي ۾ ٿيو، جنهن ۾ گورنر ڊاڪٽر عشرت العباد، ڪور ڪمانڊر ڪراچي ليفٽيننٽ جنرل نويد مختار،ڊي جي رينجرز ميجر جنرل بلال اڪبر ۽ ٻين پڻ شرڪت ڪئي. ايپيڪس ڪميٽيءَ جي اجلاس ۾ نيشنل ايڪشن پلان جي فيصلن تي عملدرآمد جو جائزو ورتو ويو، جڏهن تڪراچي آپريشن جي نتيجن تي اطمينان جو اظهار ڪندي دهشتگردن ۽ ٽارگيٽ ڪلرز خلاف ڪارروائي جاري رکڻ جو فيصلو ڪيو ويو. ايپيڪس ڪميٽي سنڌ جي اجلاس دوران پابندي مڙهيل تنظيمن مٿان قربانيءَ جي جانورن جون کلون گڏ ڪرڻ تي پابندي مڙهڻ جو پڻ فيصلو ڪيو ويو. اجلاس کانپوءِ ميڊيا کي بريفنگ ڏيندي سنڌ جي اطلاعات واري وزير نثار احمد کهڙي ٻڌايو ته ايپيڪس ڪميٽيءَ، سنڌ سرڪار جي ڪارڪردگيءَ جي ساراهه ڪئي. نثار احمد کهڙي چيو ته ڪراچي آپريشن جو مقصد ٽارگيٽ ڪلنگ ۽ دهشتگردي جو خاتمو آهي،جنهن جا گهربل نتيجا سامهون اچي رهيا آهن. سينيئر صوبائي وزير ٻڌايو ته سنڌ ۾ مدرسن جي رجسٽريشن وڏو مسئلو آهي،سنڌ ۾ 9 هزار پنج سو نوي مدرسا آهن،جن مان ڇهه هزار پنج سئو رجسٽرڊ آهن. هڪ سوال جي جواب ۾ نثار احمد کهڙي چيو ته ايم پي اي علي نواز شاهه کي نيب سزا ٻڌائي آهي،جنهن خلاف هاءِ ڪورٽ ۾ درخواست داخل ڪرائي وئي آهي،نيب سدائين ريفرنس تحت ڪارروائي ڪندي آهي،پاڻمرادو نوٽيس تي وفاقي جاچ ادارن کي ڪارروائي جو اختيار ناهي. هن ٻڌايو ته سنڌ ۾ فوجي عدالتن جو انگ وڌائڻ تي پڻ غور ڪيو پيو وڃي. هن چيو ته سنڌ ۾ ڪم ڪندڙ سمورين اين جي اوز جي ٻيهر رجسٽريشن ڪري سندن ڪارڪردگي ۽ مالي وسيلن تي نظر رکي ويندي. سندس چوڻ هو ته سنڌ حڪومت ڪراچيءَ کي وڌيڪ خوبصورت ۽ عوام جي زندگي کي پرسڪون بڻائڻ چاهي ٿي، بندوق کڻڻ سان شهر جو مسئلو حل نه ٿيندو. اطلاعات واري صوبائي وزير چيو ته سنڌ ۾ 257 سيڪيورٽي ڪمپنيون ڪم ڪري رهيون آهن، جن کي سيڪيورٽي ڪليئرنس ملڻ گهرجي، ڪنهن به سيڪيورٽي ايجنسي ۾ پرڏيهي ملازم نه هجڻ گهرجي. نثار احمد کهڙي وڌيڪ چيو ته ڪراچي ۾ اڍائي هزار ڪيمرائون لڳايون ويون آهن، جڏهن ته ڪمانڊ ۽ ڪنٽرول جي نظام کي بهتر بڻايو پيو وڃي. سنڌ جي سينيئر وزير ٻڌايو ته صوبي اندر ويهه لک غيرقانوني افغاني پناهگير موجود آهن. نثار احمد کهڙي وڌيڪ چيو ته سنڌ ۾ پهريون ڀيرو مڪاني چونڊون پارٽي بنيادن تي ٿي رهيون آهن،جڏهن ته پابندي مڙهيل تنظيمن کي چونڊن ۾ حصو وٺڻ جي اجازت نه ڏني ويندي.

 

آخري دهشتگرد جي خاتمي تائين آپريشن ضرب عضب جاري رهندو:آرمي چيف

راولپنڊي (بيورو) آرمي چيف جنرل راحيل شريف چيو آهي ته آپريشن ضرب عضب ڪاميابي سان جاري آهي ۽ اهو آخري دهشتگرد جي خاتمي تائين جاري رهندو. آءِ ايس پي آر موجب آرمي چيف جنرل راحيل شريف بهادر رينج اٽڪ جو دورو ڪري پاڪ چين گڏيل مشق واريئر ٿري جو جائزو ورتو ۽ اسپيشل سروسز گروپ جي دهشتگردي خلاف ڪارڪردگي جي تعريف ڪئي. ڊي جِي آءِ ايس پي آر جو چوڻ آهي ته واريئر ٿري مشقون دهشتگردي جي خاتمي بابت آهن. ان موقعي تي آرمي چيف چيو ته پاڪستان ۽ چين وچ ۾ ملٽري لاڳاپا ترقي جي بلندين تائين ويندا جڏهن ته دهشتگردي کان پاڪ ملڪ حاصل ڪرڻ لاءِ آپريشن ضرب عضب ۾ جاري رهندو. پاڪستان طرف ميري اک سان ڏسندڙ جون اکيون ڪڍي ڇڏينداسين.

 

جمهوريت جي تقاضا آهي ته سمورا ادارا آئين جي حدن اندر رهي ڪم ڪن: آصف زرداري

اسلام آباد(اي پي پي) پاڪستان پيپلز پارٽيءَ جي شريڪ چيئرمين ۽ اڳوڻي صدر آصف علي زرداري چيو آهي ته جمهوريت جي تقاضا آهي ته سمورا ادارا آئين ۾ ڏنل حدن اندر رهي ڪم ڪن. جمهوريت جي عالمي ڏينهن جي موقعي تي پنهنجي پيغام اڳوڻي صدر چيو ته جمهوريت چونڊون منعقد ڪرائي اقتدار سياسي پارٽين ۽ ماڻهن کي منتقل ڪرڻ جو نالو ئي نه پر قانون جي حڪمراني آئين جي حدن جو احترام، برداشت ۽ سياسي مخالفن جي راءِ جو احترام ڪرڻ جو نالو آهي، ماضيءَ ۾ نظريه ضرورت کي استعمال ڪري جمهوريت تي راتاهو هنيو ويو ۽ نام نهاد ليگل فريم ورڪ آرڊر ۽ پي سي او جاري ڪيا ويا. اڳوڻي صدر چيو ته دهشتگرد ۽ انتهاپسند ذهنيت کان به جمهوريت کي خبردار رهڻ گهرجي، جيڪي پنهنجي ايجنڊا طاقت جي زور تي مڙهڻ چاهين ٿا. اڳوڻي صدر سڄي دنيا جي جمهوري قوتن خاص ڪري پاڪستان جي جمهوري طاقتن کي اڄوڪي ڏينهن تي مبارڪون ڏيندي چيو ته پاڪستان جي عوام کي جمهوريت کي درپيش خطرن کان آگاهه ڪرڻ گهرجي. آصف علي زرداري، شهيد ذوالفقار علي ۽ شهيد محترمه بينظير ڀٽو ۽ انهن سمورن سياسي اڳواڻن ڪارڪنن کي زبردست خراجِ عقيدت پيش ڪيو جن جمهوريت لاءِ قربانيون پيش ڪيون. هن چيو ته انهن سمورن ماڻهن جي قربانين جي ڪري آمريت پاڪستان ۾ پنهنجا پير ڄمائي نه سگهي آهي

 

ورلڊ فوڊ پروگرام جو پاڪستان ۾ دائرو وڌائڻ جي ضرورت آهي: سرتاج عزيز

اسلام آباد  (بيورو) وزيراعظم جي پرڏيهي صلاحڪار سرتاج عزيز ورلڊ فوڊ پروگرام تي زور ڀريو آهي ته هو بي گهر ماڻهن جون غذائي ضرورتون پوريون ڪرڻ سان گڏوگڏ پاڪستان ۾ ترقياتي سرگرمين ۽ ادارن جي صلاحيت کي وڌائڻ لاءِ پنهنجو ڪردار ادا ڪري اڱاري تي پرڏيهي دفتر مان جاري بيان مطابق ورلڊ فوڊ پروگرام جي ايگزيڪيوٽو بورڊ جي وفد صدر سيموئل بيورو جي قيادت ۾ وزيراعظم جي قومي سلامتي صلاحڪار ۽ پرڏيهي معاملن جي سرتاج عزيز سان پرڏيهي دفتر ۾ ملاقات ڪئي ڊبليو ايف بي جو 6 رڪني وفد پاڪستاني ۾ ورلڊ فوڊ پروگرام جي رٿائن تي عملدرامد جو جائزو وٺڻ لاءِ پاڪستان جي دوري تي آهي پرڏيهي صلاحڪار وفد جي آجيان ڪندي پاڪستان حڪومت جي خوراڪ ۽ ٻيون غذائي ضرورتن جي سلسلي ۾ معاونت تي شڪريو ادا ڪيو. ڊبليو ايف پي جي وفد ملڪ ۾ پنهنجي سرگرمين جي سلسلي ۾ تعاون تي پاڪستان حڪومت سان تشڪر جو اظهار ڪيو.

 

احتساب رينجرز جي دائري ۾ نٿو اچي، سنڌ ۾ به کيس احتساب جو مينڊيٽ نه آهي: چوڌري نثار

اسلام آباد (بيورو) وفاقي گهرو وزير چوڌري نثار علي پنجاب ۾ رينجرز کي احتساب جي دعوت ڏيڻ تي حيرت جو اظهار ڪيو آهي. هن چيو ته رينجرز کي سنڌ ۾ به احتساب جو مينڊيٽ مليل ناهي. اسلام آباد ۾ عمران خان جي بيان تي رد عمل ظاهر ڪندي چوڌري نثار علي چيو ته احتساب رينجرز جي دائري ۾ نٿو اچي. هن چيو ته رينجرز کي سنڌ ۾ به احتساب جو م ينڊيٽ نه آهي. هن چيو ته رينجرز کي احتساب جي دعوت ڏيڻ قانون جي دائري ۾ نٿو اچي. وفاقي وزير چيو ته کيس حيرت آهي ته هڪ سياسي اڳواڻ اهڙو مطالبو ڪيئن ڪيو. هن چيو ته هر سياسي اڳواڻ ۽ ڪارڪن کي اظهار جي آزادي جو پورو پورو حق آهي.پر هي آزادي قانون ۽ آئين جي حدن ۾ هجڻ گهرجي. هن چيو ته فوج جي سربراهه کي انڪري تحسين پيش ڪيون ٿا ته هو پنهنجا فرض خوش اصلوبي سان پورا ڪري رهيو آهي. هن چيو ته اڄ جو پاڪستان 2013 کان گهڻو بهتر آهي. چوڌري نثار چيو ته اڻ لاڳاپيل معاملن ۾ سيڪيورٽي فورسز کي ملوث ڪرڻ عقلمندي جي ڳالهه ناهي. هن چيو ته پاڪ فوج ۽ رينجرز جي ڪردار ۽ ڪارڪردگي کي بيانن جو حصو بنائڻ غير مناسب آهي. هن چيو ته ملڪ ۾ امن امان جي صورتحال ۾ واضح بهتري آئي آهي.جڏهن ته ڪراچي ۾ امن موٽي آيو آهي. هن چيو ته پوائنٽ اسڪورنگ لاءِ فوج يا رينجرز کان اهڙا مطالبا ادارن کي تڪراري بنائڻ جي برابر آهي. چوڌري نثار چيو ته سياسي مقصدن لاءِ رياستي ادارن جي مداخلت جمهوري نظام جي بقا جي خلاف آهي. هن چيو ته اهڙن بيانن سان ڪراچي آپريشن به متاثر ٿي سگهي ٿو.

 

ننديپور اسڪينڊل جي سموري ذميواري قبول ڪيان ٿو ڪنهن تي الزام نه هڻندس: خواجه آصف

اسلام آباد (مانيٽرنگ ڊيسڪ) پاڻي ۽ بجلي جي وفاقي وزير خواجه محمد آصف چيو آهي ته ننديپور اسڪينڊل جي سموري ذميواري قبول ڪيان ٿو ڪنهن تي الزام تراشي نه ڪندس نيب موجوده حڪومت جي ڪنهن معاملي جي تفتيش نه پيو ڪري ايم ڪيو ايم سياسي حقيقت آهي شهري سنڌ ۾ ڀرپور عوامي حمايت حاصل آهي هڪ انٽرويو ۾ هن چيو ته ڪئپٽن رٽائرڊ محمود کي ايم پي ننديپور پراجيڪٽ اسان جي حڪومت لڳايو ڪنهن پاران به شهبازشريف جو نالو نه وٺڻ جي سوال تي هن چيو ته سموري ذميواري قبول ڪيان ٿو ڪنهن تي الزام بازي نه ڪندس هن چيو ته نيب موجوده حڪومت جي ڪنهن معاملي جي جاچ نه پيو ڪري.

 

جهموريت خلاف ٿيندڙ سازشن تي ڀرپور مزاحمت ڪئي ويندي: بلاول ڀٽو

لاهور (بيورو) پ پ چيئرمين بلاول ڀٽو زرداري چيو آهي ته جهموريت خلاف ٿيندڙ سازشن تي ڀرپور مزاحمت ڪئي ويندي، آمراڻي دور ۾ انتهاپسندي کي هٿي ملي هئي. جهموريت جي عالمي ڏهاڙي تي پ پ چيئرمين بلاول ڀٽو زرداري پنهنجي جاري ڪيل بيان ۾ چيو آهي ته جهموريت جو تسلسل قومن کي مضبوط ڪندو آهي، جهموريت جو تسلسل برقرار رهڻ گهرجي.هن چيو ته عوام سدائين جهموري قوتن سان گڏ بيٺل رهيو آهي، جهموريت خلاف ٿيندڙ سازشن جي ڀرپور مزاحمت ڪئي ويندي.هن چيو ته آمريت جي دور ۾ انتهاپسندي کي هٿي ملي هئي جنهن سبب ملڪ کي بدترين دهشتگردي کي منهن ڏيڻو پيو. بلاول ڀٽو چيو ته جهموريت جي مضبوطي لاءِ هر فورم تي آواز اٿاريو ويندو، جهموريت خلاف سازشون ڪندڙن کي منهن ٽوڙ جواب ڏنو ويندو.

 

8 مهينا گذرڻ باوجود ايڪشن پلان تي عمل ناهي ٿيو: سپريم ڪورٽ

اسلام آباد (بيورو) سـُپريم ڪورٽ،  اين جي اوز جي فنڊنگ بابت لا اينڊ جسٽس ڪميشن کي ٻن هفتن اندر رپورٽ پيش ڪرڻ جو حڪم ڏئي ڇڏيو،  عدالت ريمارڪس ۾ چيو آهي ته 8 مهينا گذرڻ باوجود ايڪشن پلان تي عمل ناهي ٿيو، وزيراعظم جي بي اعتمادي ايڪشن پلان جي ڪارڪردگي ظاهر ڪري ڇڏي آهي. جسٽس امير هاني مسلم جي سربراهي ۾ سپريم ڪورٽ جي 2 رڪني بينچ اين جي اوز جي رجسٽريشن ۽ فنڊنگ بابت رپورٽ پيش ڪئي. ايڊووڪيٽ جنرل پنجاب عدالت کي ٻڌايو ته اين جي اوز جي رجسٽريشن ۽ فنڊنگ بابت سب ڪميٽي قائم ڪري ڇڏي آهي. جسٽس امير هاني مسلم ريمارڪس ڏنا ته حڪومت کي جيڪو ڪم ناهي ڪرڻو هوندو، ان لاءِ ڪميٽي قائم ڪري ڇڏيندي آهي. جسٽس انور ظهير جمالي ريمارڪس ۾ چيو ته دهشتگردن جي فنڊنگ قومي ايڪشن پلان جو اهم حصو آهي، پر  8 مهينا گذرڻ باوجود ان تي عمل ناهي ٿي سگهيو. عدالت ريمارڪس ڏنا ته وزيراعظم نواز شريف به قومي ايڪشن پلان تي عملدرآمد بابت بي اعتمادي ظاهر ڪئي هئي، جنهن مان ايڪشن پلان جي ڪارڪردگي ظاهر ٿي وئي آهي. جسٽس امير هاني مسلم ريمارڪس ڏنا ته اين جي اوز جي فنڊنگ گڏ ڪرڻ حڪومت نه پر ايف آءِ اي جو ڪم آهي ۽  سائبر ڪرائيم جي  ساڳي ڊيوٽي به شامل آهي. عدالت، لا اينڊ جسٽس ڪميشن کي اين جي اوز جي فنڊنگ بابت رپورٽ پيش ڪرڻ جو حڪم ڏيندي ٻڌڻي ملتوي ڪري ڇڏي.

 

ايان علي تي اڄ به فرد جرم لاڳو نه ٿي سگهيو

راولپنڊي(م.ڊ) سُپر ماڊل ايان علي تي اڄ به فرد جرم لاڳو نه ٿي سگهيو، جڏهن ته راولپنڊي جي ڪسٽم عدالت سندس وڪيل کي مني لانڊرنگ تي بحث لاءِ آخري مهلت ڏئي ڇڏي. راولپنڊي جي ڪسٽم عدالت ۾ مني لانڊرنگ جي الزامهيٺ آيل ماڊل ايان علي پيش ٿي. عدالت اڄ به سُپر ماڊل ايان علي تي فرد جرم لاڳو نه ڪري سگهي. سُپر ماڊل ايان علي جي وڪيل سردار لطيف کوسا عدالت کي درخواست ڪئي ته مني لانڊرنگ تي بحث لاءِ کيس اجازت ڏني وڃي. عدالت وڪيل سردار لطيف کوسا کي آخري مهلت ڏيندي بحث جي اجازت ڏيندي ٻڌڻي 28 سيپٽمبر تائين ملتوي ڪئي.