تازيون خبرون

Daily Archives: September 15, 2015

ترقياتي ڪمن ۾ شفافيت کي برقرار رکيو وڃي: نواز شريف

گلت بلتستان (مانيٽرنگ ڊيسڪ) وزيراعظم نواز شريف چيو آهي ته ماضي ۾ فنڊ شفاف انداز ۾ استعمال نه ٿيڻ سبب عوام کي نقصان پهتو، امن امان قائم ٿيڻ بعد گلگت بلتستان ۾ هاڻي هزارين نه پر لکين سياح اچن ٿا. وزيراعظم نواز شريف، گلگت ۾ قراقرم هاءِ وي تي عطا آباد ڍنڍ وٽ چين جي مدد سان قائم ٿيل ٽنلز واري منصوبي جو افتتاح ڪيو. افتتاح بعد گلگت جي وزيرن ۽ اسيمبلي ميمبرن سان ڳالهائيندي وزيراعظم چيو ته هـُو گلگت بلتستان جي عوام جي تقدير بدلائڻ جو عزم رکن ٿا. هن چيو ته ترقياتي ڪمن ۾ شفافيت کي برقرار رکيو وڃي، هڪ هڪ رپيو ايمانداري سان خرچ ڪيو وڃي، خيانت سان ملڪ کي نقصان پهچندو. وزيراعظم چيو ته ماضي ۾ فنڊ شفاف انداز ۾ استعمال نه ٿيا ان ڪري عوام کي نقصان پهتو. نواز شريف چيو ته پهريان ڪجهه هزار سياح گلگت ايندا هئا امن امان قائم ٿيڻ بعد هاڻي لکين سياح گلگت اچن ٿا. وزيراعظم چيو ته گلگت بلتستان ۾ سياحت جي ترقي جا تمام گهڻا موقعا آهن، لکين سياح آزاد ڪشمير ۽ خيبر پختون خواهه جي سياحتي مرڪزن جو به رُخ ڪيو.

 

سنڌ حڪومت ڪراچي لاءِ 150 ارب رپين جي پيڪيج جو اعلان ڪري ڇڏيو

ڪراچي (اي پي پي) سنڌ حڪومت ڪراچي لاءِ 150 ارب رپين جي پيڪيج جو اعلان ڪيو آهي، مڪاني ادارن واري صوبائي وزير سيد ناصر حسين شاهه سومر ڏينهن ميڊيا کي ڪراچي پيڪيج جي حوالي سان تفصيل ٻڌائيندي چيو ته ان پيڪيج تحت سڄو ڌيان ڪراچي واسين جي بنيادي مسئلن تي هوندو، جنهن ۾ ايمرجنسي سروس، پبلڪ ٽرانسپورٽ، پاڻي ۽ نيڪال جي سسٽم سميت ٻيون سهولتون شامل آهن، سيد ناصر حسين شاهه چيو ته ڪراچي جي بنيادي ڍانچي خاص طور تي روڊن جي تعمير، سروس لينز، پلن، فلاءِ اوورز ۽ انڊر پاسز تي ڌيان ڏنو ويندو، هڪ سوال جي جواب ۾ هن چيو ته پ پ پ حڪومت ڪراچي ۾ ايمرجنسي سروسز ۾ گهري دلچسپي وٺي رهي آهي ته جيئن ماڻهن کي وڌ ۾ وڌ سهولتون ملي سگهن، مڪاني ادارن واري وزير چيو ته واٽر بورڊ، ايمبولنس سروس ۽ هيلٿ سروسز جي حوالي سان مڪينزم تيار ڪيو ويو آهي، هن چيو ته هي پيڪيج مڪاني چونڊ اچڻ جي حوالي سان ناهي ڏنو ويو. ان پيڪيج تي ڪراچي ۾ ڪم هلندڙ سال جي آخر ۾ شروع ٿيندو ۽ ان پيڪيج تحت هلندڙ منصوبا 2018ع تائين مڪمل ڪيا ويندا.

 

آرمي چيف سان جان ڪيمبل جي ملاقات، افغانستان ۽ سيڪيورٽي صورتحال تي ڳالهيون

راولپنڊي (بيورو) آرمي چيف سان جان ڪيمبل جي ملاقات، افغانستان ۽ سيڪيورٽي صورتحال تي ڳالهه ٻولهه آرمي چيف جنرل راحيل شريف سان ايساف ڪمانڊر جان ڪيمبل ملاقات افغانستان ۽ سيڪيورٽي جي صورتحالتي خيالن جي ڏي وٺ ڪئي. راولپنڊي جي ايڇ ڪيو ۾ آمريڪي فوجي ڪمانڊر، فوج جي سربراهه سان ملاقات ڪئي. آئي ايس پي آر مطابق ملاقات ۾ پاڪ، امريڪا لاڳاپن، علائقائي سيڪيورٽي صورتحال ۽ سهڪار وڌائڻ تي ڳالهيون ڪيون ويون

 

عمران خان کي ننڊ ۾ به آصف زرداري ٿو نظر اچي، آمرن جو ساٿاري ڪڏهن به تبديلي نه ٿو آڻي سگهي: نثار کهڙو

ڪراچي(اسٽاف رپورٽر) سنڌ جي اطلاعات واري سينيئر وزير نثار احمد کهڙو چيو آهي ته عمران خان فڪر نه ڪري ،پيپلز پارٽيءَ جا دبئيءَ ۾ اجلاس پنهنجن خرچن تي ٿيندا آهن نه ئي جهانگير ترين جي خرچن تي ڪيا ويندا آهن. پيپلز پارٽيءَ تي ٻين جماعتن سان مڪ مڪا جو الزام هڻندڙ عمران خان پهريان ريفرينڊم ۾ آمر پرويز مشرف سان مڪ مڪا جو جواب ڏي ۽ ان مڪ مڪا بابت قوم کان معافي وٺي. اهڙن خيالن جو اظهار هن سومر ڏينهن عمران خان جي پريس ڪانفرنس تي رد عمل ظاهر ڪندي ڪيو. نثار احمد کهڙو چيو آهي ته عمران خان ٻين تي الزام هڻڻ بدران پرويز خٽڪ جي غيرقانوني سرڪاري هيليڪاپٽر ۽ جهاز جي استعمال جو خرچ پهريان سرڪاري خزاني ۾ جمع ڪرائي. هن چيو ته آمرن جو ساٿاري ڪڏهن به تبديلي نه ٿو آڻي سگهي ڇاڪاڻ ته عوام آمرن ۽ ان جي حامين کي سڃاڻي ٿو. عمران خان کي ننڊ ۾ به آصف زرداري ٿو نظر اچي ، عمران خان پيپلز پارٽيءَ تي تنقيد ڪرڻ بدران ماضيءَ ۾ ميگا ڪرپشن ۾ ملوث مشرف جي ساٿاري جنوبي پنجاب جي جن ماڻهن کي پارٽيءَ ۾ شامل ڪيو آهي پهريان انهن خلاف ڪاروائي ڪري ۽ عمران خان پنهنجي پارٽيءَ اندر جيڪا ڌانڌلي ڪرائي آهي ان جو پڻ جواب ڏي. هن مطالبو ڪيو ته شوڪت خانم اسپتال جي پڻ آڊٽ ڪرائي وڃي ته خبر پئجي ويندي. هن چيو ته ڪي پي ڪي ۾ امن امان جي قيام ۾ پي ٽي آءِ جو ڪو به ڪمال نه آهي، ڪي پي ڪي ۾ امن امان جو سهرو پيپلز پارٽيءَ ڏانهن ئي وڃي ٿو جنهن سب کان پهريان دهشتگردن جي خلاف سوات ۾ آپريشن شروع ڪرايو.

 

دهشتگردي جي پاڙ پٽڻ لاءِ دهشتگردن جي مالي معاونت روڪڻ ضروري آهي: چوڌري نثار

اسلام آباد (بيورو) وفاقي گهرو وزير چوڌري نثار، دهشتگردن جي مالي معاونت ڪندڙن ۽ انساني اسمگلنگ ۾ ملوثن خلاف ڪارروائي جو حڪم ڏيندي چيو آهي ته دهشتگردي جي پاڙ پٽڻ لاءِ دهشتگردن جي مالي معاونت روڪڻ ضروري آهي، انساني اسمگلنگ ۾ ملوثن سان ڪنهن به قسم جي رعايت نه ڪئي وڃي. اسلام آباد ۾ وفاقي گهرو وزير چوڌري نثار جي صدارت هيٺ اعليٰ سطحي اجلاس ٿيو، جنهن ۾ دهشتگردن جي مالي معاونت ۽ انساني اسمگلنگ روڪڻ سميت مختلف معاملن تي غور ڪيو ويو. اجلاس ۾ ڊي جي ايف آءِ اي، نيڪٽا ڪوآرڊينيٽر سميت ٻين اعليٰ عملدارن شرڪت ڏني. اجلاس ۾ ڊي جي ايف آءِ اي پاران شڪي اڪائونٽس جا تفصيل پيش ڪيا ويا دهشتگردن جي مالي معاونت روڪڻ بابت بريفنگ ڏني  وئي. گهرو وزير چوڌري نثار، ايف آءِ اي کي هدايت ڪئي ته دهشتگردن جي مالي معاونت روڪڻ لاءِ اسٽيٽ بينڪ جي فنانشنل مانيٽرنگ يونٽ ۽ ٻين لاڳاپيل ادارن سان ڪوآرڊينيشن بهتر بڻائي وڃي. چوڌري نثار چيو ته دهشتگردي جي پاڙ پٽڻ لاءِ دهشتگردن جي مالي فنڊنگ جو ذريعو ڄاڻڻ ضروري آهي، جيڪو به ملڪ دشمنن جي فنڊنگ ۾ ملوث آهي، ان خلاف سخت ڪارروائي ڪئي وڃي.  وفاقي گهرو وزير چيو ته دهشتگردي خلاف جنگ ڏکي ضرور آهي پـَر ناممڪن ناهي. چوڌري نثار اها به هدايت ڪئي ته انساني اسمگلنگ ۾ ملوثن خلاف به سخت ڪارروائي ڪئي وڃي. وفاقي گهرو وزير چيو ته انساني اسمگلنگ ۾ ملوث عنصرن نه صرف ملڪ جي بدنامي جو سبب بڻجي رهيا آهن پر اهي معصوم ۽ ضرورت مند ماڻهن جو استحصال ڪري رهيا آهن، انهن سان ڪنهن به قسم جي رعايت نه ڪئي وڃي.

 

اسلام آباد پوليس ججز نظربندي ڪيس ۾ پرويز مشرف جي گرفتاري لاءِ خاص ٽيم جوڙي ڇڏي

اسلا آباد(بيورو) اسلام آباد جي دهشتگردي ٽوڙ عدالت پاران ججز نظربندي ڪيس ۾ اڳوڻي صدر پرويز مشرف جا جاري ڪيل وارنٽ سيڪريٽريٽ ٿاڻي کي ملي ويا ، جنهن کانپوءِ سندس گرفتاري لاءِ خاص ٽيم جوڙي وئي آهي. عدالتي حڪم تي جاري ڪيل گرفتاري وارنٽن ۾ هدايت ڪئي وئي آهي ته اڳوڻي صدر کي گرفتار ڪري پهرين آڪٽوبر تي عدالت ۾ پيش ڪيو وڃي. واضح رهي ته گذريل ٻڌڻي تي پرويز مشرف جي وڪيل عدالت ۾ سندس غيرحاضري بابت درخواست ڏيندي ٻڌايو هو ته هو بيمار آهي،ان ڪري پيش نه ٿو ٿي سگهي، پر عدالت ان درخواست سان گڏ ميڊيڪل سرٽيفڪيٽ نه هجڻ ڪري پرويز مشرف جا ضمانت نه ٿيڻ جوڳا گرفتاري وارنٽ جاري ڪيا هئا. عدالتي حڪمن تي عمل لاءِ پوليس ايس ايڇ او فياض شنواري جي سربراهي ۾ خاص ٽيم جوڙي ڇڏي آهي.

 

سـُپريم ڪورٽ جي چيف جسٽس اِي او بـِي آءِ ڪرپشن ڪيس ٻڌڻ کان معذرت ڪري ڇڏي

اسلام آباد (بيورو) سـُپريم ڪورٽ جي چيف جسٽس انور ظهير جمالي اِي او بـِي آءِ ڪرپشن ڪيس ٻڌڻ کان معذرت ڪري ڇڏي آهي، ٻڌڻي لاءِ نئين بينچ قائم ڪئي ويندي. چيف جسٽس انور ظهير جمالي جي سربراهي ۾ سپريم ڪورٽ جي ٽـَي رڪني بينچ اي او بي آءِ ڪرپشن ڪيس ۾ اداري جي اڳوڻي اڳوڻي چيئرمين ظفر گوندل جي ضمانت واري درخواست تي ٻڌڻي ڪئي. ٻڌڻيءَ دوران چيف جسٽس انور ظهير جمالي ڪيس ٻڌڻ کان معذرت ڪندي چيو ته هـُو ساڳي ڪيس ۾ جوابدارن بابت آبزرويشن ڏئي چڪو آهي، ان ڪري ٻڌڻي نٿو ڪري سگهي. عدالت، ڪيس جي ٻڌڻي اڄ تائين ملتوي ڪري ڇڏي، اڄ کان نئين بينچ ڪيس جي ٻڌڻي ڪندي.

 

ناهيد خان کي شهيد بينظير ڀٽو قتل ڪيس جو رڪارڊ ڏيڻ جو حڪم

راولپنڊي (بيورو) راولپنڊي جي دهشتگردي ٽوڙ عدالت،پ پ ورڪرز پارٽي جي اڳواڻ ناهيد خان کي شهيد بينظير ڀٽو قتل ڪيس جو رڪارڊ ڏيڻ جو حڪم ڏئي ڇڏيو،گهرو وزارت جو چوڻ آهي ته آمريڪي صحافي مارڪ سيگل پهرين آڪٽوبر تي پنهنجو بيان رڪارڊ ڪرائڻ لاءِ تيار آهي. راولپنڊي جي دهشتگردي ٽوڙ عدالت، شهيد بينظير ڀٽو قتل ڪيس جي ٻڌڻي ڪئي. ٻڌڻي دوران پ پ ورڪرز پارٽي جي اڳواڻ ناهيد خان عدالت ۾ پيش ٿي. عدالت ڪيس جو رڪارڊ ناهيد خان کي ڏيڻ جي درخواست منظور ڪري ورتي. عدالت ايندڙ ٻڌڻي تي پراسيڪيوٽر جي شاهد ايس پي ۽ ڪيس جي پهرين جاچ آفيسر کي طلب ڪرڻ جو سمن جاري ڪندي 21 سيپٽمبر تائين بيان رڪارڊ ڪرائڻ جي هدايت ڪئي. ان موقعي تي گهرو وزارت عدالت کي ٻڌايو ته آمريڪي صحافي مارڪ سيگل پهرين آڪٽوبر تي پنهنجو بيان رڪارڊ ڪرائڻ لاءِ تيار آهي. ڪيس جي وڌيڪ ٻڌڻي 21 سيپٽمبر تي ٿيندي. ٻڌڻي بعد ميڊيا سان ڳالهائيندي ناهيد خان چيو ته هن سميت صفدر عباسي، امين فهيم، خالد شهنشاهه ۽ ڊرائيور بينظير ڀٽو سان گاڏي ۾ موجود هئا. هن چيو ته عدالت سندس بيان رڪاڊ ناهي ڪيو،هوءَ الزامن جو جواب عدالت ۾ ئي ڏيندي

 

نيب ۽ ايف آءِ اي کي پنجاب ۾ به ڪرپشن خلاف ڪارروائي ڪرڻ گهرجي: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته نيب ۽ ايف آئي اي کي هاڻ پنجاب ۾ ڪرپشن جي خلاف وڌيڪ ڪارروائي ڪرڻ جي ضرورت آهي.ڪراچي ۾ ايم ڪيو ايم کي هڙتال جي موٽ نه ملڻ تي سنڌ جو عوام خوش آهي،قومي ايڪشن پلان جي اجلاس ۾ سياسي پارٽين جي هٿياربند ونگز جي خلاف ڪارروائي جو فيصلو ڪيو ويوهو.نندي پور پروجيڪٽ ۽ ميٽرو بس جي اڻ ڌري آڊٽ ٿيڻ گهرجي، اسلام آباد ۾ پريس ڪانفرنس کي خطاب ڪندي عمران چيو ته قوم چورن ۽ ڪرپٽ ماڻهن مان تنگ اچي وئي آهي،جڏهن ته سندس پارٽي قومي ايڪشن پلان جي حمايت ڪري ٿي. عمران خان چيو ته جمهوريت جي آڙ ۾ ملڪ کي لٽيو پيو وڃي. هن چيو ته قومي ايڪشن پلان ۾ سياسي پارٽين جي هٿياربند ونگز جي خاتمي جو فيصلو ڪيو ويو هو. هن چيو ته ايف آئي اي ۽ نيب پنجاب ۾ به ڪرپشن ۾ ملوث ڌرين جي خلاف ڪارروائي ڪن. هن چيو ته متحدا جي هڙتال کي موٽ نه ملڻ تي سنڌ جو عوام خوش آهي.ڪراچي جا ماڻهو خوش آهن ته ڪرپٽ ماڻهن جي خلاف ڪارروائي ڪئي پئي وڃي. هن چيو ته مان دعوت ڏيان ٿو ته خيبرپختون خوا جي ڪرپٽ اڳواڻن جي خلاف ڪارروائي ڪئي وڃي. عمران خان چيو ته ڪرپشن جي خلاف ڪارروائي جي وڌيڪ ضرورت پنجاب ۾ آهي. هن چيو ته ڏکيائن جي باجود ملڪ نئين پاڪستان طرف وڌي رهيو آهي. تحريڪ انصاف جي سربراهه چيو ته ٽيهه سيڪڙو گيس خيبرپختونخوا مان نڪري رهي آهي، حڪومتي ٺاهن تي خيبرپختون خوا جي عوام کي به اعتراض آهن. هن چيو ته قطر کان ايل اين جي گيس امپورٽ ڪئي وئي آهي، ان جي آڊٽ ٿيندي ته ڪرپشن جا سمورا ريڪارڊ ٽٽي ويندا. هن چيو ته مسلم ليگ ن ۽ پيپلز پارٽي جي وچ ۾ ڪرپشن جي حوالي سان ڳٺ جوڙ آهي. هن چيو ته ميٽرو بس وارو پروجيڪٽ انتهائي مهانگو آهي، ان جي آڊٽ ٿيڻ گهرجي. عمران خان چيو ته نندي پور پروجيڪٽ جي اڻ ڌري آڊٽ ڪرائي وڃي.

 

سنڌ هائيڪورٽ پ پ اي ايم پي اي علي نواز شاهه جي سزا رد ڪري ڇڏي،آزاد ڪرڻ جو حڪم

ڪراچي (اسٽاف رپورٽر) سنڌ هائيڪورٽ پ پ اي ايم پي اي ۽ اڳوڻي صوبائي وزير علي نواز شاهه جي سزا رد ڪندي کيس آزاد ڪرڻ جو حڪم ڏئي ڇڏيو. علي نواز شاهه جي گهرواري پاران پنهنجي مڙس جي سزا ۽ گرفتاري کي سنڌ هائيڪورٽ ۾ چيلينج ڪيو ويو هو، سنڌ هائيڪورٽ جي بينچ اهڙي درخواست تي اڳوڻي صوبائي وزير کي ايل بي او ڊي ڪرپشن ڪيس ۾ احتساب عدالت پاران 5 سالن جي ڏنل سزا رد ڪري ڇڏي، درخواست ۾ موقف اختيار ڪيو ويو هو ته علي نواز شاهه کي نيب قانوني گهرجون پوريون ڪرڻ کانسواءِ سزا ٻڌائي آهي ۽ اها سزا وڏي تڪڙ ۾ ڏني وئي. عدالت پنهنجي فيصلي ۾ پ پ ايم پي اي جي سزا رد ڪندي نيب اختيارين کي 21 سيپٽمبر تي گهرائي ورتو آهي.