تازيون خبرون

Daily Archives: September 12, 2015

مڪي شريف ۾ ڪرين حادثو، 68 ماڻهو شهيد ٿي ويا، سوين زخمي

مڪه مڪرمه(م.ڊ) سعودي عرب جي شهر مڪي ۾ صفا ۽ مروه جي وچ ۾ تعميراتي ڪرين ڪري پئي، جنهن جي نتيجي ۾ 68 ماڻهو شهيد ٿي ويا، ۽ 154 زخمي ٿي پيا، مڪي ۾ طوفاني بارشون جاري آهن جنهن جي ڪري هي حادثو پيش آيو، حادث حرم جي صحتن ۾ صفا جي ٻاهر واري علائقي ۾ پيش آيو، طوفاني بارش ۽ طوفان سبب ڪرين پنهنجو توازن برقرار رکي نه سگهي ۽ ڪري پئي، سعودي سول ڊفينس اٿارٽي سماجي ويب سائيٽ ٽوئيٽر ت حادثي جي تصديق ڪئي آهي، ڪرين حرم شريف جي توصيحي ڪمن جي سلسلي ۾ لڳائي وئي هئي، واضح رهي ته جمعو جي ڏينهن هيو ۽ هفتييوار موڪل هئڻ جي ڪري حرم شريف ۽ ان جي آس پاس ۾ لکين ماڻهو موجود آهن، جڏهن ته حج جي لاءِ پاڪستان سميت سڄي دنيا مان وڏي انگ ۾ حجاج مڪي شريف ۾ موجود آهي.

 

پوليس ۽ ميڊيا تي حملا دهشتگردن جو آخري وار آهي: نواز شريف

اسلام آباد (بيورو) وزيراعظم نيپرا کي بجلي اگهن ۾ 2 رپيا 19 پئسا في يونٽ گهٽتائي جي هدايت ڪري ڇڏي، نواز شريف جو چوڻ آهي ته ڪراچي آپريشن سمورين سياسي جماعتن جي اتفاق سان شروع ڪيو جيڪو منطقي انجام تائين جاري رهندو، آپريشن بعد شهر ماضي جي ڀيٽ ۾ گهڻو پرامن بڻجي ويو آهي، پوليس ۽ ميڊيا تي حملا دهشتگردن جو آخري وار آهي. وزيراعظم نواز شريف جي صدارت هيٺ پِي ايم هائوس اسلام آباد ۾ سڄي ملڪ جي چيمبرز ۽ اپٽما جي عهديدارن جو اجلاس ٿيو. اجلاس کي خطاب دوران وزيراعظم نيپرا کي هدايت ڪئي ته بجلي جي اگهن ۾ 2 رپيا 19 پئسا في يونٽ گهٽتائي ڪئي وڃي. نواز شريف اها به هدايت ڪئي ته 2 رپيا 14 پئسا في يونٽ گذريل بجلي بلن جي فيول ايڊجسٽمينٽ ۾ به گهٽتايا وڃن. وزيراعظم چيو ته تيل جي قيمتن ۾ گهٽتائي جو فائدو عوام تائين پهچايو ويندو، هـُو امداد وٺڻ جي حق ۾ نه ناهن پاڪستان خودمختيار ملڪ آهي. نواز شريف چيو ته ڪراچي آپريشن سمورين سياسي جماعتن جي اتفاق سان شروع ڪيو جيڪو منطقي انجام تائين جاري رهندو. وزيراعظم چيو ته آپريشن بعد شهر ماضي جي ڀيٽ ۾ گهڻو پرامن بڻجي ويو آهي، هڪ يا ٻن واقعن سان گهٻرائڻ نه گهـُرجي. نواز شريف چيو ته پوليس ۽ ميڊيا تي حملا دهشتگردن جو آخري وار آهي، ڪراچي آپريشن کانپوءِ ماڻهن جو اعتماد بحال ٿيو، شهر کي جلد امن وارو شهر بڻايو ويندو. سندس چوڻ هو ته نفرت ۽ دهشتگردي پکيڙيندڙ تنظيمون ختم ڪرڻ جي ضرورت آهي، ضرب عضب آپريشن ۾ فوج سميت سمورن سڪيورٽي ادارن ۽ عوام قربانيون ڏنيون آهن. وزيراعظم وڌيڪ چيو ته ملڪي ترقي لاءِ برآمدي واپار ۾ واڌ اڻٽر آهي ۽ وسيلن جي فراهمي لاءِ پنهنجي آمدني ۾ اضافو ڪرڻو پوندو. هن چيو ته گذريل ڪيترن ئي سالن کان برآمدي واپار جي شعبي ۾ سٺي ترقي ناهي ٿي، ڏکيائين جي حل لاءِ وسيلن جي ضرورت آهي. نواز شريف چيو ته هـُو بزنس ڪميونٽي جي مسئلن کي حل ڪرڻ چاهين پر سڀني کي گڏجي جدوجهد ڪرڻي پوندي. وزيراعظم چيو ته برآمدي واپار ۾ واڌ ۽ روينيو جمع ڪرائڻ کانسواءِ ڪو به ملڪ ترقي نه ٿو ڪري سگهي. چيمبرز ۽ اپٽما جي عهديدارن جي اجلاس ۾ پاڻي ۽ بجلي واري وفاقي وزير خواجا آصف، ناڻي واري وزير اسحاق ڊار، واپار واري وزير خرم دستگير، پيٽروليم واري وزير شاهد خاقان عباسي، ايف بي آر چيئرمين طارق باجوه سميت ٻين عملدارن پڻ شرڪت ڪئي. اجلاس ۾ معاشي صورتحال، ايڪسپورٽ پروموشن ۽ واپارين جي مسئلن تي غور ويچار ڪيو ويو. صنعتن لاءِ مراعاتي پيڪيج، ٻارڻ، گئس، بجلي جي بنا رنڊڪ جي فراهمي وارا معاملا پڻ غور هيٺ آيا.

 

ڪراچي ملڪ ۾ ٿيندڙ آپريشن تي ڪنهن کي اعتراض آهي ته عدالتن سان رابطو ڪري: پرويز رشيد

ڪراچي (اسٽاف رپورٽر) سڌ سماءَ جي وفاقي وزير پرويز رشيد چيو آهي ته ڪراچي سميت سڄي ملڪ ۾ ٿيندڙ آپريشن تي ڪنهن کي اعتراض آهي ته اهو عدالت سان رابطو ڪري، زبردستي دڪان ۽ بازار بند ڪرائيندڙ سان قانون لاڳو ڪندڙ ادارا منهن ڏيندا، حڪومت ڪنهن خلاف انتقامي ڪارروائي نه پئي ڪري، ايم ڪيو ايم اڳواڻ الطاف حسين جي تقرير تي پابندي لاهور هاءِ ڪورٽ مڙهي آهي، جيڪڏهن تقريرون اعتراض جوڳيون نه هيون ته معافي ڇو ورتي، احتساب جي فيصلن ۽ ڪاررواين تي ڪنهن کي اعتراض آهي ته هو اعليٰ عدالت سان رابطو ڪري سگهي ٿو، هڙتال ذريعي ملڪ جي معيشت کي نقصان ٿيندڙ سڀاڻي عوام کان ڪهڙي منهن سان ووٽ کرندا، هڙتال جو سڏ ڏيندڙ کي گذارش آهي ته جيڪڏهن کين ڪنهن مسئلي تي تحفظات آهن ته اهي عدالت جو دروازو کڙڪائين، جيڪڏهن عمران خان اليڪشن ڪميشن جي ميمبرن جي تبديلي چاهي ٿو ته ڌرڻا هڻڻا بدران سپريم جوڊيشل ڪونسل سان رابطو ڪري، اهڙن خيالن جو اظهار هن جمعي تي نيشنل بڪ فائونڊيشن تحت 3 ڏينهن واري مليي جي افتتاحي تقريب کي خطاب ۽ ميڊيا سان ڳالهائيندي ڪيو. ميڊيا سان ڳالهائيندي هن چيو ته ملڪ مان هڙتالن جو خاتمو حڪومت جو عزم آهي، هڙتال جي ڪال ڏيڻ سان مسئلا حل نه ٿيندا، جيڪڏهن ڪنهن کي تحفات آهي ته اهو عدالت سان رابطو ڪري ۽ پارليامينٽ ۾ آواز اٿاري، هن چيو ته قومي ايڪشن پلان جي فيصلن مطابق اهو طئه ڪيو ويو آهي ته ڪنهن کي ملڪ ۾ هڙتال جي اجازت نه ڏني ويندي، هڙتال ڪندڙن خلاف قانون لاڳو ڪندڙ ادارا ايڪشن کڻندا، هن چيو ته قومي ايڪشن پلان سمورين پارٽين جي يڪراءِ سان منظور ٿيو آهي، ايڪشن پلان تي عملدرآمد لاءِ وفاقي ۽ صوبائي حڪومتون قدم کڻي رهيون آهن، هن چيو ته پاڪستان ۾ هڙتالن جي سياست هميشه لاءِ ختم ڪنداسين، جيڪي ماڻهو هڙتال جو سڏ ڏئي رهيا آهن اهي ملڪ جي معيشت کي ڪمزور ڪرڻ جي ڪوشش ڪري رهيا آهن، هڙتال جو سڏ ڏيندڙ ٻڌائين ته اهي ڪهڙو منهن کڻي عوام کان ووٽ وٺندا، پرويز رشيد چيو ته هڙتال جي ڪال ڏيندڙ کي درخواست آهي ته اهي عدالتن جو دروازو کڙڪائين. ايم ڪيو ايم سان ڳالهين جي حوالي سان هن چيو ته وزيراعظم ۽ مخالف ڌر اڳواڻ ايم ڪيو ايم جي استعيفائن جي واپسي لاءِ مولانا فضل رحمان کي مينڊينٽ ڏنو هو، حڪومت ڳالهيون ڪيون، ڳالهيون ڪامياب ٿي ويون هيون، جڏهن ته ايم ڪيو ايم ڪجهه ڏينهن اڳ فجر جي وقت پريس ڪانفرنس ڪري ڳالهيون ختم ڪيون، ڳالهه ٻولهه ذريعي مسئلا حل ٿيندا آهن. پرويز رشيد چيو ته ڪراچي سميت سڄي ملڪ ۾ ٿيندڙ آپريشن تي اعتراض آهي ته عدالت سان رجوع ڪري، سنڌ  جي وڏي وزير کي مرڪزي اپيڪس ڪميٽِي جي اجلاس ۾ تحفظات بيان ڪرڻ جي مڪمل آزادي هئي حڪومت مسئلا ڳالهين ذريعي حل ڪرڻ تي يقين رکي ٿي، آصف جي بيان تي هن چيو ته احتساب جي فيصلن تي ڪنهن کي اعتراض آهي ته هو اعليٰ عدالت سان رجوع ڪري سگهي ٿو، جمهوريت کي مضبوط ڪرڻ لاءِ تنقيدي سياست کان پاسو ڪرڻو پوندو، حڪومت ڪنهن  جي خلاف انتقامي ڪارروائي نه پئي ڪري، حڪومت خلاف پي ٽي آءِ 126 ڏينهن ڌرڻو هنيو ان موقعي تي به ڪنهن جي خلاف ڪارروائي نه ڪئي وئي، الطاف حسين جي تقرير تي پابندي جي حوالي سان هن چيو ته الطاف حسين جي تقريرن تي لاهور هاءِ ڪورٽ پابندي لڳائي آهي، جيڪڏهن تقريرون اعتراض جوڳيون نه هيون ته معافي ڇو ورتي وئي، لاهور هاءِ ڪورٽ جي فيصلي تي ايم ڪيو ايم کي اعتراض آهي ته اها سپريم ڪورٽ ۾ نظرثاني لاءِ رجوع ڪري، دهشتگردي ڪندڙ ۽ انهن جا مددگار ٻئي مجرم آهن، ڏوهن ۽ سياست کي الڳ الڳ ڪرڻ جي ضرورت آهي، الزامن جي سياست بند ڪرڻي پوندي، حڪومت ججز جي مقرري جي معاملي تي مداخلت نه ڪري رهيا آهي، ٻئي ادارا پنهنجن اختيارن تحت ڪم ڪري رهيا آهن، سياست ڪندڙ يا پارليامينٽ ميمبرن کي قتل ڪرڻ جو لائسنس نٿو ڏئي سگهجي، ملڪ جي ترقي لاءِ سڀني کي ڪردار ادا ڪرڻو پوندو، ان کان تقريب کي خطاب ڪندي هن چيو ته ڪتابي ميلو علم دوستي جو اظهار آهي، اڳ جڏهن قوم کان ڪتاب کسيا ويا هئا ته خودڪش بمبار ظاهر ٿيا، ڪراچي مان سٺيون خبرون اچڻ جو مطلب ملڪ مان سٺيون خبرون اچڻ آهي، فوج ملڪي تهذيب ۽ تمدن کي بچائڻ لاءِ قرباني ڏئي رهي آهي، ان سبب امن قائم ٿي رهيو آهي، دهشتگردن خلاف ڪارروائي جو فيصلو ڪنهن فرد يا هڪ جماعت جو نه پر گڏيل فيصلو آهي

 

وفاقي ادارا ايترو پري تائين نه وڃن، جتان واپسي ممڪن ئي نه ٿئي: آصف زرداري

ڪراچي (اسٽاف رپورٽر) پيپلزپارٽي جي شريڪ چيئرمين آصف علي زرداري، اڳوڻي صوبائي وزير علي نواز  شاهه کي مليل سزا کي انتقامي ڪارروائي قرار ڏيندي چيو آهي ته عدالتي نظام جو اهڙي طرح غلط استعمال ڪرڻ سان حالتون خراب ٿينديون، ادارا ايترو پري تائين نه نڪري وڃن، جتان واپسي ئي ممڪن نه ٿي سگهي.  هڪ جاري ڪيل بيان ۾ پ پ جي شريڪ چ/يئرمين ۽ اڳوڻي صدر آصف علي زرداري، اڳوڻي صوبائي وزير ۽ پ پ اڳواڻ سيد علي نواز شاهه کي مليل سزا تي سخت  ڳڻتي ظاهر ڪري ڇڏي آهي. آصف علي زرداري جو چوڻ آهي ته علي نواز شاهه کي ان ڪيس ۾ سزا ٻڌائي وئي آهي، جنهن ۾ کيس پهريان آزاد ڪيو ويو هو، جڏهن ته 2011 ۾ سرڪار ساڳي ڪيس ۾ کيس معاوضو پڻ ڏنو هو. هن چيو ته پيپلزپارٽي خلاف ٻيهر انتقامي ڪارروايون شروع ڪيون ويون آهن، جنهن مان ظاهر ٿي رهيو آهي ته وفاقي ادارا صوبن ۾ اختيارن جو غلط استعمال ڪن پيا. آصف علي زرداري چيو ته علي نواز شاهه سٺي ساک رکندڙ سياستدان آهي، ساڻس اهڙو سلوڪ ڪنهن به ريت برداشت نه ڪيو ويندو. پ پ جي شريڪ چيئرمين چيو ته عدالتي نظام کي غلط استعمال ڪرڻ جي روايت نه وڌي وڃي، جيڪڏهن عدالتي نظام جو اهڙي طرح سياسي مخالفن خلاف استعمال ڪيو ويو ته حالتون وڌيڪ خراب ٿينديون. آصف علي زرداري وفاقي ادارن کي خبردار ڪيو ته ايترو پري تائين نه وڃو، جتان واپسي ممڪن ئي نه ٿئي.

 

قائم علي شاهه ۽ خورشيد شاهه جي علي نواز شاهه سان سينٽرل جيل ڪراچي ۾ ملاقات،ا پيل داخل ڪرڻ تي مشاورت

ڪراچي (اسٽاف رپورٽر) وڏي وزير سيد قائم علي شاهه ۽ اپوزيشن ليڊر خورشيد شاهه سينٽرل جيل  ڪراچي ۾ اڳوڻي صوبائي  وزير علي نواز شاهه سان  ملاقات ڪري اپيل داخل ڪرڻ لاءِ مشاورت ڪئي، وڏي وزير قانوني واري کاتيکي اپيل داخل جي هدايت ڪئي آهي. سيد قائم علي شاهه ۽ خورشيد شاهه سينٽرل جيل وڃي علي نواز شاهه سان ملاقات ڪئي، جنهن دوران اپيل داخل ڪرائڻ واري معاملي تي مشاورت ڪئي وئي. وڏي وزير سيد قائم علي شاهه قانوني واري کاتي کي اپيل داخل ڪرائڻ جي   هدايت ڪندي چيو آهي ته علي نواز شاهه کي مليل سزا خلاف اپيل داخل ڪرائيندڙ وڪيلن سان مڪمل سهڪار ڪيو وڃي.  ڪراچي جي احتساب عدالت گذريل ڏينهن علي نواز شاهه، سندس سئوٽ خادم علي شاهه ۽ سندس ڀاڻيجي امتياز علي شاهه کي قيد ۽ ڏنڊ جي سزا ٻڌائي هئي، جنهن کانپوءِ ٽنهي کي گرفتار ڪري سينٽرل جيل موڪليو ويو هو.

 

چڪوال ويجهو ڪوچ ۽ ٽرڪ ۾ ٽڪر، 6 ڄڻا فوت، 22 زخمي

چڪوال(م.د) چڪوال ويجهو ڪوچ ۽ ٽرڪ ۾ ٽڪر جي نتيجي ۾ هڪ ٻارڙيَ سميت 6 ڄڻا فوت ۽ 22 ڄڻا زخمي ٿي پيا. مسافر ڪوچ راولپنڊي کان جهنگ وڃي رهي هئي ته موٽر وي تي سالٽ رينج ويجهو ٽرڪ سان ٽڪرائجي وئي. حادثي ۾ هڪ ٻارڙي سميت 6 ڄڻا فوت ٿي ويا، فوتين ۾ 2 عورتون، ٻه ٻارڙا ۽ 3 مرد شامل آهن. حادثي ۾ فوت ٿيل پنجن ڄڻن جي سڃاڻپ ابوبڪر، ياسر علي، احمد سعيد، نديم ۽ ارشد جي نالن سان ٿي. حادثي ۾ 22 ڄڻا زخمي ٿي پيا، جن کي ڊسٽرڪٽ هيڊڪوارٽر اسپتالچڪوال منتقل ڪيو ويو. ريسڪيو اختيارين جو چوڻ آهي ته حادثو ٽرڪ جو بريڪ فيل ٿيڻ سبب پيش آيو.

 

ڀارتي گهرو وزير ڊي جي رينجرز پنجاب کي سرحد تي فائرنگ ۾ اڳرائي نه ڪرڻ جي خاطري ڪرائي ڇڏي: ڀارتي ميڊيا جي دعويٰ

نئين دهلي (مانيٽرنگ ڊيسڪ) پاڪستان ۽ ڀارت مواصلاتي رابطا بهتر بڻائڻ تي اتفاق ڪري ورتو، ڀارتي دعويٰ ڪئي آهي ته ڀارتي گهرو وزير راج ناٿ ڊي جـِي رينجرز پنجاب کي سرحد تي فائرنگ ۾ اڳرائي نه ڪرڻ جي خاطرر ڪرائيآهي. نئين دهلي ۾ پاڪستاني وفد ڊي جي رينجرز پنجاب ميجر جنرل عمر فاروق برڪي جي قيادت ۾ ڀارتي گهرو وزير راج ناٿ سنگهه سان ملاقات ڪئي. ملاقات دوران ڪنٽرول لائين۽ ورڪنگ بائونڊري تي جاري ڇڪتاڻ گهٽائڻ ۽ ٻين معاملن تي خيالن جي ڏي وٺ ڪئي وئي. ملاقات دوران ٻنهي ملڪن مواصلاتي رابطا بهتر بڻائڻ تي اتفاق پڻ ڪيو ويو. ڀارتي ميڊيا موجب ڀارتي گهرو وزير چيو ته ڀارت سمورن پاڙيسري ملڪ سان دوستيءَ وارا لاڳاپا چاهي ٿو، ڀارتي فوج سرحد تي فائرنگ ۾ اڳرائي نه ڪندي. هن چيو ته ڀارت وانگر پاڪستان به دهشتگرديءَ جو شڪار آهي، دهشتگردي کي روڪڻ لاءِ ٻنهي ملڪن کي متحد ٿيڻو پوندو. راج ناٿ سنگهه چيو ته پاڪستان کي يقيني ڏيارڻو پوندو ته دهشتگرد ان جي سرزمين تان ڀارت ۾ داخل نه ٿيندا. ڀارتي گهرو وزير جو چوڻ هو ته ڀارت پاڪستان سان ڳالهيون چاهي پيو پر بدقسمتي سان گذريل مهيني ٻنهي ملڪن جي قومي سلامتي بابت صلاحڪارن جي ملاقات نه ٿي سگهي

 

ڪراچي ۾ نئون آپريشن شروع ڪيو ويو آهي، والدين پنهنجن ٻارن کي ٽارگيٽ ڪلرز بڻجڻ کان بڇائين: ڊي جي رينجرز

ڪراچي (اسٽاف رپورٽر) ڊي جي رينجرز سنڌ بلال اڪبر شهرين کي پيغام ڏيندي چيو آهي ته والدين پنهنجن ٻارن کي ٽارگيٽ ڪلرز بڻجڻ کان بڇائين، ڊي جي رينجرز ميڊيا سان ڳالهائيندي چيو ته نام نهاد اڳواڻن جو ڪوبه ٻار ٽارگيٽ ڪلرز ناهي، اُهي ماڻهو ٻارڙن کي ايئن ٽارگيٽ ڪلرز بڻائي رهيا آهن جيئن آپگهاتي بمبار، ڊي جي رينجرز جو چوڻ هو ته ڪنهن دهشتگرد جو ٻار آپگهاتي بمبار ناهي بڻايو، ٽارگيٽ ڪلنگ ۾ به اُهو ئي ٿي رهيو آهي. سندن ٻار ڪاروبار ڪري رهيا آهن پرڏيهه ۾ پڙهي رهيا آهن، ٻارن کي آپگهاتي بمبار وانگر ٽارگيٽ ڪلرز بڻائي رهيا آهن. ميجر جنرل بلال اڪبر جو چوڻ هو ته ڪراچي ۾ نئون آپريشن شروع ڪيو ويو آهي. دهشتگرد ۽ ٽارگيٽ ڪلرز خلاف سخت ڪارروائي شروع ٿي وئي آهي. ٽارگيٽ ڪلرز جي ڪنهن به صورت ۾ مدد ڪندڙن خلاف سخت ڪارروائي ڪئي ويندي. هن چيو ته آخري ٽارگيٽ ڪلرز جي خاتمي تائين آپريشن جاري رکنداسين جيڪي ڪراچي جو امن خراب ڪري رهيا آهن انهن کي سختي سان منهن ڏنو ويندو. امن امان جي قيام لاءِ هر ممڪن قدم کنيو ويندو.

 

ايم ڪيو ايم پاران اڄ سوڳ جو اعلان، نادرن باءِ پاس تي ڪارڪنن کي عدالت کان مٿانهون قتل ڪيو ويو: فاروق ستار

ڪراچي (اسٽاف رپورٽر) ڪراچي ۾ رينجرز سان مقابلي ۾ مارجي ويل 4 جوابدارن مان 3 جي ايم ڪيو ايم پنهنجا ڪارڪن ڄاڻايا آهن. فاروق ستار جو چوڻ هو ته کين عدالت کان مٿانهون قتل ڪيو ويو آهي. ڪارڪنن جي مارجڻ تي ايم ڪيو ايم اڄ سوڳ جو اعلان ڪري ڇڏيو آهي. پريس ڪانفرنس ڪندي ايم ڪيو ايم جي اڳواڻ فاروق ستار الزام لڳايو ته نادرن باءِ پاس جي ڀرسان ايم ڪيو ايم جي 3 ڪارڪنن کي عدالت کان مٿانهون قتل ڪيو ويو. ٽنهي کي چار مهينا اڳ ۾ رينجرز گرفتار ڪيو هو ۽ اڻ جا تفصيل پارٽي وٽ موجود آهن. فاروق ستار جو چوڻ هو ته سندن ڪارڪنن جي گرفتاري کانپوءِ ڪوبه رمانڊ نه ورتو ويو. متحده جا 150 ڪارڪن گم آهن اُهو معاملو عدالت ۾ آهي، گم ٿيل ماڻهن جي فهرست وزيراعظم ۽ گهرو وزير کي به ڏني وئي آهي. فاروق ستار جو چوڻ هو ته 24 ڪلاڪن دوران ايم ڪيو ايم جي 4 ڪارڪنن کي قتل ڪيو ويو آهي. هاڻي سرڪاري ادارن 3 ڪارڪنن جي باري ۾ هٿ ٺوڪيو بيان جاري ڪيو آهي. فاروق ستار اعلان ڪيو ته ڪارڪنن جي مارجڻ تي ايم ڪيو ايم سڀاڻي سوڳ طور ملهائيندي ۽ ڪراچي ۾ احتجاجي ريلي ڪڍندي.

 

ايم ڪيو ايم جو زخمي اڳواڻ رشيد گوڊيل اسپتال مان ڊسچارج

ڪراچي (اسٽاف رپورٽر) ڪراچي ۾ فائرنگ ۾ زخمي ٿيل رشيد گوڊيل صحتياب ٿي ويو آهي. کيس اسپتال کان گهر منتقل ڪيو ويو آهي. رشيد گوڊيل کي 18 آگسٽ تي بهادر آباد جي علائقي ۾ نامعلوم ماڻهن فائرنگ ڪري زخمي ڪري ڇڏيو هو. زخمي ٿيڻ کانپوءِ رشيد گوڊيل لياقت نيشنل اسپتال ۾ علاج هيٺ هو. صحتيا/ب ٿيڻ کانپوءِ ڊاڪٽر پاران رشيد گوڊيل کي گهر وڃڻ جي اجازت ڏني وئي جنهن کانپوءِ کيس سخت سيڪيورٽي ۾ گهر منتقل ڪيو ويو آهي.