تازيون خبرون

Daily Archives: September 11, 2015

قومي ايڪشن پلان تي عملدرآمد وڌيڪ تيز ڪيو وڃي: وفاق ۽ صوبن ۾ اتفاق

اسلام اباد (بيورو) وفاق ۽ صوبن قومي ايڪشن پلان تي عملدرآمد وڌيڪ تيز ڪرڻ تي اتفاق ڪري ورتو، صوبن ۽ ڳجهن ادارن وچ ۾ رابطا وڌيڪ بهتر بڻائڻ جو فيصلو ڪيو ويو آهي، وزيراعظم چيو آهي ته قومي ايڪشن پلان تي اڳڀرائي ٿي آهي، پر ان جي ڪجهه حصي تي عملدرآمد ناهي ٿيو، قومي ايڪشن پلان تي اثرائتو عملدرآمد ڪرڻ جي ضرورت آهي.وزيراعظم نواز شريف جي صدارت هيٺ وزيراعظمهائوس ۾ نيشنل ايپڪس ڪميٽي جو اجلاس ٿيو، جنهن ۾ آرمي چيف جنرل راحيل شريف، ڊي جي آءِ ايس آءِ ليفٽيننٽ جنرل رضوان اختر، وفاقي گهرو وزير چوڌري نثار، خواجا آصف، اسحاق ڊار ۽ آزاد ڪشمير جي وزيراعظم شرڪت ڪئي.چئني صوبن جا وڏا وزير، گلگت بلتستان جو وزيراعليٰ، چيف سيڪريٽري، گهرو سيڪريٽري، آءِ جيز ۽ ٻيا لاڳاپيل عملدار به اجلاس ۾ شريڪ ٿيا.اجلاس ۾ صوبائي عملدارن قومي ايڪشن پلان تي عملدرآمد بابت رپورٽ پيش ڪئي ۽ سيڪيورٽي صورتحال بابت بريفنگ ڏني ، اجلاس کي ٻڌايو ويو ته هن وقت تائين 11 سئو 55 دهشتگرد مارجي ويا آهن ۽ 60 هزار ڏوهارين کي گرفتار ڪيو ويو آهي.اجلاس دوران آپريشن ضرب عضب، ڪراچي آپريشن، امن امان جي صورتحال، فاٽا ۾ نئين سر تعمير، مدرسن، اين جي اوز، هٿيارن جي لائسنس بابت پاليسين جو جائزو ورتو ويو.اجلاس ۾ فرقيواريت ۽ انتهاپسندي جي روڪٿام لاءِ جامع حڪمت عملي جوڙڻ تي غور ويچار ڪيو ويو.نيشنل اپيڪس ڪميٽي جي اجلاس ۾ مسجدن ۽ مدرسن کي قومي ڌارا ۾ آڻڻ جي به تجويز ڏني وئي.اجلاس ۾ اتفاق ڪيو ويو ته قومي ايڪشن پلان تي عملدرآمد وڌيڪ تيز ڪيو ويندو، صوبن ۽ ڳجهن ادارن ۾ رابطا وڌيڪ بهتر بڻائڻ جو فيصلو ڪيو ويو آهي. اجلاس کي خطاب ڪندي وزيراعظم نواز شريف چيو ته دهشتگردي خلاف حڪمت عملي تي هڪجهڙي اڳڀرائي ٿيڻ گهرجي، سياسي ۽ عسڪري قيادت گڏجي حڪمت عملي جوڙڻ جو فيصلو ڪيو آهي وزيراعظم چيو ته جلد ملڪ مان دهشتگردي جو خاتمو ڪيو ويندو، دهشتگردي جي خاتمي لاءِ سڀني کي الرٽ رهڻو پوندو.نواز شريف چيو ته ڪراچي آپريشن ڪنهن به جماعت خلاف ناهي، ڪراچي ۾ امن واپس اچي رهيو آهي، دهشتگردي ۽ ڀنگ لاءِ اغوا جي واقعن ۾ گهٽتائي آئي آهي.وزيراعظم نواز شريف چيو ته قومي ايڪشن پلان تي اڳڀرائي ٿي آهي، پر ان جي ڪجهه حصي تي عملدرآمد ناهي ٿيو، قومي ايڪشن پلان تي اثرائتو عملدرآمد ڪرڻ جي ضرورت آهي.

 

وڏي وزير پاران ايف آءِ اي ۽ نيب جي ڪردار کي سنڌ ۾ محدود ڪرڻ جو مطالبو

ڪراچي (اسٽاف رپورٽر) سنڌ وڏي وزير سيد قائم علي شاهه اپيڪس ڪميٽي جي اجلاس دوران وزيراعظم آڏو سنڌ اندر وفاقي ادارن جي ڪارروائين تي سخت احتجاج ڪندي ايف آءِ اي ۽ نيب جي ڪردار کي سنڌ ۾ محدود ڪرڻ جو مطالبو ڪري ڇڏيو، وزيراعظم نواز شريف وڏي وزير کي سمورا خدشا ختم ڪرائڻ جي خاطري ڪرائي ڇڏي.وزيراعظم نواز شريف جي صدارت هيٺ ايپڪس ڪميٽي جي اجلاس دوران وڏي وزير سيد قائم علي شاهه سنڌ ۾ وفاقي ادارن جي ڪارروائين واري معاملي کي اُٿاريو.وڏي وزير چيو ته نيب ۽ ايف آءِ اي وفاقي ادارا آهن، صوبي اندر مداخلت نه ڪن، نيب جي ڪردار کي واضح ڪيو وڃي، ايف آءِ اي ۽ نيب جي ڪردار کي سنڌ ۾ محدود ڪيو وڃي، ٻنهي ادارن جي سنڌ اندر ڪارروائي ڪرڻ انهن جي اختيارن ۾ نٿي اچي.سيد قائم علي شاهه چيو ته هو صوبي جو چيف ايگزيڪيٽو آهي پر کيس ڪجهه ٻڌايو نٿو وڃي، ڪنهن به ڪارروائي ڪرڻ کان پهرين کيس ڄاڻ ڏيڻ ضروري آهي، نيب پلي بارگينگ تي به اعتماد ۾ نٿي وٺي، پلي بارگينگ جا پئسا ڪيڏانهن وڃن ٿا کيس خبر هجڻ گهرجي.وڏي وزير چيو ته صفورا سانحي ۽ شڪارپور امام بارگاه تي حملي ۾ ملوث دهشتگردن کي گرفتار ڪيو آهي، ڪراچي ۾ دهشتگردي، ڀتاخوري، ٽارگيٽ ڪلنگ، اغوا ۽ ٻين واقعن ۾ گهٽتائي ٿي آهي….اجلاس دوران وزيراعظم نواز شريف پاران وڏي وزير کي سمورا خدشا ختم ڪرائڻ جي خاطري ڪرائي وئي.

 

جسس انور ظهير جمالي حلف کڻي ورتو، صدر سان ملاقات، ممنون حسين پاران منصب سنڀالڻ تي مبارڪون

اسلام آباد (اين اين آءِ) جسٽس انور ظهير جمالي چيف جسٽس آف پاڪستان جي عهدي جو حلف کڻي ورتو، صدر ممنون حسين سان چيف جسٽس آف پاڪستان مسٽر جسٽس انور ظهير جمالي ملاقات ڪئي صدر کيس سپريم ڪورٽ جو سڀ کان اعليٰ منصب سنڀالڻ تي واڌايون ڏنيون خميس تي حلف کڻڻ واري تقريب کان پوءِ صدر سان چيف جسٽس ملاقات پڻ ڪئي صدر کيس سپريم ڪورٽ جو سڀ کان اعليٰ منصب سنڀالڻ تي واڌايون ڏنيون ۽ توقع ظاهر ڪئي ته هو پنهنجي ذميواري بهتر نموني سان نڀائيندا واضح رهي ته پاڪستان جي تاريخ ۾ ٻيو ڀيرو حلف کڻڻ واري تقريب جي سڄي ڪارروائي اردو ٻولي ۾ ٿي.

 

سپريم ڪورٽ وزيراعظم خلاف توهين عدالت واري ڪيس ۾ اٽارني جنرل کان جواب طلب ڪري ورتو

اسلام آباد (بيورو) سپريم ڪورٽ، وزيراعظم نواز شريف خلاف توهين عدالت واري ڪيس ۾ اٽارني جنرل کان جواب طلب ڪري ورتو. جسٽس ميان ثاقب نثار جي سربراهي ۾ سپريم ڪورٽ جي ٽه رڪني بينچ، وزيراعظم نواز شريف خلاف توهين عدالت واري درخواست جـِي ٻڌڻي ڪئي. ٻڌڻي دوران درخواست گذار موقف اختيار ڪيو ته وزيراعظم نواز شريف شجاعت عظيم کي هوائي بازي بابت صلاحڪار مقرر ڪيو پر شجاعت عظيم ڪينيڊين شهري آهي ۽ ان جو ڪورٽ مارشل به ٿي چڪو آهي. درخواست گذار چيو ته عدالت ۾ معاملو اچڻ تي شجاعت عظيم استعيفيٰ جو اعلان ڪيو پر اڄ تائين استعيفيٰ ناهي ڏني، ان ڪري وزيراعظم خلاف توهين عدالت جو ڪيس هلايو وڃي. جسٽس ثاقب نثار درخواست گذار جو موقف ٻـُڌڻ بعد رمارڪس ڏنا ته عدالت قانون کي نظر ۾ رکي فيصلو ڏيندي. عدالت، اٽارني جنرل کان وزيراعظم جي صلاحڪار شجاعت عظيم جي استعيفيٰ بابت وضاحت طلب ڪيس جي ٻڌڻي آڪٽوبر جي ٻئي هفتي تائين ملتوي ڪري ڇڏي.

 

رياست کي چئيلنچ ڪندڙن کي رياستي سگهه سان چيڀاٽيو ويندو: چوڌري نثار

اسلام آباد(بيورو)  وفاقي گهرو وزير چوڌري نثار علي خان پريس ڪانفرنس ڪندي چيو آهي ته دهشتگردن جو پوري طورح خاتمو اڃان ناهي ٿيو، ويڙهه اڃان هلي رهي آهي. مدرسن ۾ پاڪستان جو نصاب شامل ڪيو ويندو.وفاقي گهرو وزير پريس ڪانفرنس ڪندي چيو ته وزيراعظم نوازشريف جي صدارت هيٺ قومي ايڪشن پلان بابت اهم اجلاس ۾ گهڻا اهم فيصلا ڪيا ويا آهن انهن ۾ خاص اهي  ته رياست کي چئيلنج ڪندڙن کي رياستي سگهه سان چيڀاٽِو ويندو. گذريل 8 مهينن ۾ ڪاميابيون مليون آهن ۽ سيڪيورٽي جي صورتحال وڌيڪ بهتر ڪئي ويندي.اسلام جي نالي تي تضاد پکيڙيندڙن کي پڄاڻي تائين پهچايو ويندو. فوج ملٽري آپريشن ڪري سوات کي صاف ڪري ڇڏيو آهي. سيڪيورٽي فورسز دهشتگردن جي اتروزيرستان ۾ نيٽ ورڪز کي ختم ڪري ڇڏيو آهي.پاڪستاني فوج جي جانن جي قربانين تي ڪو به شڪ ناهي پر سيڪيورٽي فورسز کانسواءِ ٻين ادارن به ڪم ڪيو آهي.سندس چوڻ هو ته اڻ ڳڻين دهشتگردي جي واقعن کي ٿيڻ کان روڪيو ويوآهي. دهشتگردي جي خلاف  ويڙهه هلي رهي آهي ۽ هلندي رهندي، پوري فتح لاءِ ڪجهه وقت گهرجي ٿو. بازار، گهٽيون، بند نٿا ڪرڻ چاهيون ۽ اهو ڏينه پري ناهي جڏهن پاڪستان مان هر طرح جي دهشتگردي ختم ٿي ويندي. چوڌري نثار جو وڌيڪ چوڻ هو ته اين جي اوز بنا اجزت ڪم ڪري رهيون آهن ، پرڏيهي اين جي اوز ۽ مقامي اين جي اوز صوبائي حڪومتن جي ذميواري آهن. اڍائي مهينن جي اندر اين جي اوز بابت پاليسي تيار ڪري ڇڏي آهي، ايندڙ ڪجهه ڏينهن ۾ پاليسي جو اعلان ڪنداسين . پرڏيهي اين جي اوز سان مقامي اين جي اوز جي مڪمل مانٽرنگ ٿيندي، گهڻيون ئي اين جي اوز سٺو ڪم ڪري رهيون آهن پر اين جي اوز کي قانون جي دائري ۾ آڻڻ ٿا چاهيون. وفاقي گهرو وزير چيو ته گذريل 8 سالن ۾ بنا سڃاڻپ ڪارڊ جي هٿيارن جا لائسنسز جاري ڪيا ويا.هٿيارن جي لائسنسن جو پاڻ مرادوجائزو ورتو ويندو ۽ ڪمپيوٽررائيز ڪيا ويندا.سندس چوڻ هو ته افغان پناهگيرن کي قانون مطابق ڪيمپن ۾ رهڻو آهي. افغان پناهگير ڪاروبار نٿا ڪري سگهن پر ڪري رهيا آهن. هاڻي جيڪڏهن پناهگيرن کي روڪيون ٿا ته ردِ عمل ٿو اچي. مدرسن جي رجسٽريشن جو طريقيڪار طئي ڪيو ويندو ۽ مدرسن جي رجسٽريشن جا فارم کي سولو بڻايو ويندو، جڏهن ته مدرسن ۾ پاڪستان جو نصاب شامل ڪيو ويندو.

 

ڪراچي جي احتساب عدالت زراعت واري اڳوڻي صوبائي وزير علي نواز شاهه کي قيد جي سزا ٻڌائي ڇڏي، عدالت مان گرفتار

ڪراچي (اسٽاف رپورٽر) ڪراچي جي احتساب عدالت زراعت واري اڳوڻي صوبائي وزير ۽ پ پ ايم پي اي علي نواز شاهه ،سندس سئوٽ خادم علي شاهه ۽ ڀاڻيجي امتياز شاهه کي زمينن جي غيرقانوني الاٽمينٽ واري ڪيس ۾ قيد جي سزا ٻڌائي، جنهن کانپوءِ ٽنهي کي  عدالتي احاطي مان گرفتار ڪيو ويو آهي. ڪراچي جي احتساب عدالت ۾ زمينن جي غيرقانوني الاٽمينٽواري ڪيس جي ٻڌڻي ٿي، جنهن دوران اڳوڻو صوبائي وزير علي نواز شاهه، سندس سئوٽ خادم علي شاهه ۽ ڀاڻيجو امتياز علي شاهه پيش ٿيو. عدالت زمينن جي غير قانوني الاٽمينٽ واري ڪيس ۾ ڏوهه ثابت ٿيڻ تي علي نواز شاهه کي 5 سال قيد جي سزا ٻڌائي، جڏهن ته عدالت خادم علي شاهه کي 4 سال ۽ امتياز علي شاهه کي 3سال قيد جي سزا ٻڌائي. عدالت پاران سزا ٻڌائڻ بعد علي نواز شاهه، خادم علي شاهه ۽ امتياز علي شاهه کي عدالتي احاطي مان گرفتار ڪيو ويو. علي نواز شاهه پ پ جي اڳوڻي حڪومت ۾ زراعت وارو وزير ۽ اڄڪلهه ايم پي اي آهي. علي نواز شاهه شهيد بينظير ڀٽو جي دور ۾ ميرپورخاص مان ايم اين اي چونڊجڻ بعد صنعتن واري کاتي جو وزير  ٿيو . خادم علي شاهه پي آءِ اي جي بورڊ آف ڊائريڪٽر جو اڳوڻو ميمبر ۽ پاڪستان فوٽ بال فيڊريشن جو سربراهه  رهيو آهي،جڏهن ته  امتياز علي شاهه اڳوڻي صوبائي وزير علي شاهه جو ڀاڻيجو  آهي.  علي نواز شاهه  جي ترجمان  چوڌري اشرف جو چوڻ آهي ته علي نواز شاهه ۽ سندس مائٽن جي گرفتاري کي سڀاڻي سنڌ هاءِ ڪورٽ ۾ چئلنج ڪيو ويندو.

 

علي نواز شاهه جي شخصيت سڀني جي سامهون آهي هو ڪنهن ڏوهه ۾ ملوث ناهي رهيو، فيصلو چئلينج ڪنداسين: نثار کهڙو

ڪراچي(اسٽاف رپورٽر) سنڌ جي اطلاعات واري سينيئر نثار احمد کهڙو چيو آهي ته احتساب عدالت پاران  پيپلز پارٽيءَ جي ايم پي اي ۽ اڳوڻي صوبائي وزير سيد علي نواز شاهه بابت ڏنل فيصلي جي خلاف اپيل لاءِ اعلي عدالت سان رجوع ڪيو ويندو. سيد علي نواز شاهه جي شخصيت سڀني جي سامهون آهي هو ڪڏهن به ڪنهن ڏوهه ۾ ملوث ناهي رهيو. اهڙن خيالن جو اظهار هن خميس ڏينهن جاري ڪيل بيان ۾ ڪيو آهي. نثار احمد کهڙو چيو آهي ته عدالت جي فيصلي جو احترام ڪيون ٿا پر علي نواز شاهه جي خلاف ڏنل نيب عدالت جي فيصلي جي خلاف اعلي عدالت ۾ اپيل ڪئي ويندي ۽ اميد آهي ته اعلي عدالت پيپلز پارٽيءَ سان انصاف ڪندي. هن چيو ته پيپلز پارٽيءَ جا اڳوڻ پهريان به عدالتن ۾ ڪيسن کي منهن ڏئي رهيا آهن ۽ هاڻي به عدالتن ۾ ڪيسن کي منهن ڏيندا.

 

ٽڊاپ اسڪينڊل ۾ مخدوم امين فهيم جا ضمانت نه ٿيڻ جوڳا گرفتاري وارنٽ جاري، يوسف رضا گيلاني حاضري کان آجو

ڪراچي (اسٽاف رپورٽر) وفاقي اينٽي ڪرپشن عدالت ٽريڊ ڊيولپمينٽ اٿارٽي آف پاڪستان ميگا اسڪينڊل ڪيس ۾ مخدوم امين فهيم جا ضمانت نه ٿيڻ جوڳا گرفتاري وارنٽ جار يڪري ڇڏيا آهن جڏهن ته عدالت اڳوڻي وزيراعظم يوسف رضا گيلاني جي حاضري کان استثنيٰ جي درخواست منظور ڪري ورتي اهي تفصيل مطابق خميس تي وفاقي اينٽي ڪرپشنجي جج محمد عظيم ٽڊاپ اڪسنيڊل جي وڌيڪ 7 ڪيسن جي ٻڌڻي ڪئي عدالت اڳوڻي واپار جي وفاقي وزير مخدوم امين فهيم جا هڪ دفعو ٻيهر ضمانت نه ٿيڻ جوڳا گرفتاري وارنٽ جار يڪندي جوابدار کي 12 آڪٽوبر تائين گرفتار ڪري عدالت ۾ پيش ڪرڻ جو حڪم ڏيئي ڇڏيو جڏهن ته شريڪ ملزم ۽ اڳوڻي وزيراعظم يوسف رضا گيلاني پاران حاضري بابت استثنيٰ جي درخواست کي منظور ڪيو ويو يوسف رضا گيلاني ان کان اڳ 11 ڪيسن ۾ ضمانت حاصل ڪري چڪو آهي ڪيس جي ٻڌڻي تي پيپلزپارٽي جي ٻنهي اڳواڻن سميت ٻيا 9 نامزد جوابدار عدالت ۾ پيش نه ٿيا ايف آءِ اي پاران قومي خزاني کي اربين رپين جو نقصان پهچائيندڙ ٽڊاپ اسڪينڊل جي 72 ڪيسن ۾ 23 جو چالان پيش ٿي چڪو آهي عدالت ۾ پيش ڪيل چالان ۾ يوسف رضا گيلاني ۽ مخدوم امين فهيم کي مک جوابدار نامزد ڪيو ويو آهي.

 

اعتراض واريندڙ سپريم جوڊيشل ڪائونسل وڃن، ميمبر مدو پورو ڪندا: سردار رضا

اسلام آباد (بيورو) اليڪشن ڪميشن، ميمبرن جي استعيفائن وارو پيپلزپارٽي ۽ پي ٽي آءِ جو مطالبو رد ڪري ڇڏيو، چيف اليڪشن ڪمشنر سردار محمد رضا جو چوڻ آهي ته ميمبر پنهنجو مدو پورو ڪندا، اعتراض واريندڙ سپريم جوڊيشل ڪائونسل وڃن. اسلام آباد ۾ چيف اليڪشن ڪمشنر سردار محمد رضا خان جي صدارت هيٺ اليڪشن ڪميشن جو مشاورتي اجلاس ٿيو. اجلاس ۾ پيپلز پارٽي، تحريڪ انصاف، عوامي نيشنل پارٽي ۽ جماعت اسلامي سميت 13 سياسي جماعتن جي اڳواڻن ۽ نمائندن شرڪت ڪئي. پيپلز پارٽي جي مرڪزي اڳواڻ شيري رحمان، تاج حيدر، پي ٽي آءِ جي سيف الله نيازي، اي اين پي جي بشريٰ گوهر، افراسياب خٽڪ ۽ سينيٽر زاهد خان اليڪشن ڪميشن جي اجلاس ۾ شرڪت ڪئي. اجلاس ۾ ڪي پي ڪي ۽ بلوچستان جي ميمبرن شرڪت ڪئي، جڏهن ته سنڌ ۽ پنجاب جا ميمبر شريڪ نه ٿيا. اجلاس دوران ڳالهائيندي پ پ اڳواڻن شيري رحمان ۽ تاج حيدر هڪ ڀيرو ٻيهر اليڪشن ڪميشن جي ميمبرن تي خدشن جو اظهار ڪيو. شيري رحمان ۽ تاج حيدر چيو ته اليڪشن ڪميشن جي هاڻوڪن ميمبرن جي موجودگي ۾ شفاف چونڊون ٿيڻ جو سوال ئي پيدا نٿو ٿئي. اجلاس دوران چيف اليڪشن ڪمشنر سردار محمد رضا ميمبرن جـِي استعيفائن وارو مطالبو رد ڪندي واضح ڪيو ته ميمبر پنهنجو مدو پورو ڪندا کانئن استعيفائون نه ورتيون وينديون. سردار محمد رضا چيو ته اليڪشن ڪميشن جي هاڻوڪن ميمبرن تي اعتراض واريندڙ سپريم جوڊيشل ڪائونسل وڃن. مڪاني چونڊن بابت ڳالهائيندي چيف اليڪشن ڪمشنر چيو ته سنڌ، پنجاب ۽ اسلام آباد ۾ مڪاني چونڊون ڪرائڻ لاءِ تياريون مڪمل ڪيون ويون آهن. سردار محمد رضا چيو ته اسلام آباد ۽ رهيل ٻن صوبن ۾ به ڪي پي ڪي ۽ بلوچستان جيان شفاف چونڊون ڪرايون وينديون. چيف اليڪشن ڪمشنر چيو ته اي سي پي سنڌ، پنجاب توڙي اسلام آباد ۾ مڪاني چونڊن کي شفاف بڻائڻ لاءِ 4 هدف رکيا آهن. سردار محمد رضا چيو ته اليڪشن ڪميشن چونڊن کي شفاف بڻائڻ لاءِ پنهنجي حساب سان ڪوششون ڪري رهي آهي پر سياسي جماعتن کي به پنهنجو ڪردار ادا ڪرڻ گهرجي

 

پ پ پاران استعيفا خود پارٽي ۽ جمهوري نظام لاءِ آپگهاتي حملو ثابت ٿيندو، ايم ڪيو ايم به پارليمينٽ ۾ واپس اچي: سراج الحق

اسلام آباد (اين اين آءِ) جماعت اسلامي پاڪستان جي امير سراج الحق پيپلزپارٽي پاران اسيمبلين مان استعيفائن جي آپشن کي رد ڪندي واضح ڪيو ته پيپلزپارٽي پاران استعيفا خود پارٽي ۽ جمهوري نظام لاءِ آپگهاتي حملو هوندو سمورين حڪومتن کي پنهنجو آئيني مدو پورو ڪرڻ گهرجي ايم ڪيو ايم به استعفائن جي معاملن تي نظرثاني ڪري بلوچن کي ذميواريون ڏنيون وڃن ته ملڪ ٽوڙڻ وارو عنوان ئي مٽجي ويندو هر ماڻهو کي دشمن جي نگاهه سان ڏسڻ بدران ٻڌڻ جي ضرورت آهي جبلن تي ويٺل بلوچ به هيٺ لهي اچن اليڪشن ڪميشن جي چئن ميمبرن جون استعيفائون پراڻي ڪپڙي ۾ چتي لڳائڻ برابر هونديون پورو سسٽم تبديل ڪيو وڃي اورسيز پاڪستانين کي ووٽ جو حق ڏنو وڃي پاڪ چين رهداري رٿا کي تڪراري نٿا بنائڻ چاهيون گوادر ۽ مقامي آبادي جي حقن ۽ زمينن جي مالڪن کي تحفظ ڏيڻ لاءِ قانونسازي ڪئي وڇي ڪرپشن جي هر شڪل جو مخالف آهيان ڪرپٽ ماڻهن جي سخت احتساب جي ضرورت آهي وٺو ۽ ڏيو جي پاليسي نه هلندي نيب ڪرپشن جي خلاف بنا فرق ڪارروائي ڪري حڪمرانن واپڊا اسٽيل ملز، پي آءِ اي جي نجڪاري جو خيال ذهن مان ڪڍي ڇڏين ملڪ ۾ غريب ۽ امير لاءِ تعليمي نصاب هڪ هئڻ گهرجي 6 سيپٽمبر تي پاڪستان واضح پيغام ڏنو آهي ڀارت جي جارحيت جي خلاف سڄي دنيا ۾ آواز اٿارڻ گهرجي خميس تي هتي نائب امير جماعت اسلامي ميان محمد اسلم جي رهائشگاهه تي صوبائي امير محمد زبير ۽ ميڊيا چيف شاهد شمسي سان گڏ پريس ڪانفرنس کي امير جماعت اسلامي سراج الحق خطاب ڪري رهيو هو.