تازيون خبرون

Daily Archives: September 10, 2015

ڪنهن به قسم جي اڳرائي ٿي ته منهن ٽوڙ جواب ڏنو ويندو: سياسي ۽ فوجي قيادت

ڪراچي (اين اين آءِ) وفاقي حڪومت پاران شروع ڪيل نيشنل ايڪشن پلان تحت 3662 مدرسن جي جيو ٽيڪنگ مڪمل ٿي چڪي آهي، جن مان 2122 مدرسا ڪراچي ۾ جڏهن ته 1548 حيدرآباد ۾آهن، هي مرحلو جلد مڪمل ٿي ويندو، اها ڳالهه سيد قائم علي شاهه جي صدارت هيٺ نيپ جي فيصلن تي عملدرآمد جي حوالي سان سي ايم هائوس ۾ ڪوٺايل جائزا اجلاس ۾ اڳيان آئي، اجلاس کي بريفنگڏيندي گهرو سيڪريٽري ٻڌايو ته 9590 مدرسن مان 6503 مدرسن جي رجسٽريشن مڪمل ٿي چڪي آهي، 2920 مدرسن جي رجسٽريشن ٿيڻي آهي، هن چيو ته انهن اڻ رجسٽرڊ مدرسن ۾ 517695 کٿابي داخل آهن، هن ٻڌايو ته مدرسن جي جيو ٽيڪنگ جي شروعات ٿي چڪي آهي ۽ هن وقت ڪراچي جا 2122، جڏهن ته حيدرآباد جي 1548 مدرسن جي جيوٽيڪنگ مڪمل ٿي چڪي آهي، جنهن سان ان جي صحيح لوڪيشن معملوم ٿي سگهندي، ان موقعي تي آءِ جي سنڌ غلام حيدر ٻڌايو ته مختلف الزامن سبب 167 مدرسا سيل ڪيا ويا آهن، ڪراچي، حيدرآباد ۽ بدين جي 21 مدرسن کي شڪي هئڻ ڪري ڇنڊ ڇاڻ ڪئي وئي آهي جن مان ڪجهه مدرسن ۾ نفرت ڦهلائيندڙ مواد هٿ ڪرڻ کانپوءِ انهن خلاف ڪيس داخل ڪيا ويا آهن، وڏي وزير سمورن عالمن پاران مدرسن جي رجسٽريشن جي معاملي تي تعاون ڪرڻ تي شڪريو ادا ڪيو، هن آءِ جي سنڌ ۽ گهرو سيڪريٽري کي هدايت ڪئي ته رجسٽريشن ۽ ڇنڊ ڇاڻ جي معاملي تي عالم سڳورن سان رابطي ۾ رهن، هن وڌيڪ ٻڌايو ته 36278 افغانين کي آگسٽ 2015 تائين صوبي مان واپس اماڻيو ويو آهي، غير قانوني افغان رهواسين خلاف 720 ڪيس داخل ڪيا ويا آهن جنهن تحت 2100 کي گرفتار ڪر ي 1309 کي نامزد ۽ 593 کي جوڊيشل ڪسٽڊي ڪيو ويو، جڏهن ته 356 ضمانت تي آزاد ٿيا ۽ 222 غير قانوني افعان رهواسين کي آءِ جي جيل پاران واپس اماڻيو ويو آهي، ان موقعي تي آپريشن دوران آگسٽ 2015 تائين سنگين ڏوهن جي جوابدارن کي رينجرز جي حوالي ڪرڻجي حوالي سان تفصيل ٻڌائيندي آءِ جي چيو ته 495 ڏوهارين کي گرفتار ڪيو ويو، جن مان 489 چالان ٿيا، 6 جي جا ڪئي پئي وڃي، 2 جوابدارن فرد جرم لاڳو ٿيو ۽ 4 بريڪيو ويو، انهن مان 462 هن وقت مختلف جيلن ۾ آهن، 21 ضمانت تي آهن، آءِ جي سنڌ پوليس سنڌ جي وڏي وزير کي ٻڌايو ته جرنل راحيل شريف سنڌ پوليس کي جديد اصلحو فراهم ڪيو هو ۽ وڌيڪ جديد اصلحو ڏيڻ جي خاطري ڪرائي هئي، وڏي وزير چيو ته آرمي چيف جرنل راحيل شريف جي ذاتي دلچسپي سبب آپريشن ۾ مثبت نتيجا سامهون آيا آهن، هو پوليس اسٽيشن کي جديد ڪرڻ لاءِ ضروري قدم کڻي ٿو ته هي تمام سٺو قدم آهي، اجلاس جي صدارت کانپوءِ وڏو وزير اسلام آباد روانو ٿي ويو جتي هو سڀاڻي وزيراعظم محمد نواز شريف جي صدارت ۾ ٿيندڙ نيپ اجلاس ۾ شرڪت ڪندو.

 

نيشنل ايڪشن پلان سنڌ ۾ 6503 مدرسا رجسٽرڊ ڪيا ويا آهن: سنڌ حڪومت ايپيڪس ڪميٽي جي اجلاس جي حوالي سان ڪيس تيار ڪري ورتو

ڪراچي(اسٽاف رپورٽر) سنڌ حڪومت ايپيڪس ڪميٽي جي اجلاس جي حوالي سان ڪيس تيار ڪري ورتو آهي. سي ايم هائوس ۾ ٿيل اعليٰ سطحي اجلاس ۾ وڏي وزير سيد قائم علي شاهه چيو ته فوج جي سربراهه جنرل راحيل شريف ذاتي دلچسپي وٺي سنڌ پوليس کي جديد هٿيار فراهم ڪيا ته جيئن ڪراچي ۾ جاري آپريشن جا گهربل نتيجا حاصل ڪري سگهجن. وڏي وزير چيو ته پاڪ فوج جي سربراهه کي سنڌ پوليس کي جديد هٿيار ۽ اوزار فراهم ڪرڻ لاءِ وڌيڪ قدم کڻڻ گهرجن. وڏي وزير آئي جي ۽ گهرو سيڪريٽري کي هدايت ڪئي ته جن مذهبي عالمن کي شڪايتون آهن، انهن سان رابطو ڪري سندن شڪايتون ختم

ڪيون وڃن ۽ سندن مدرسن جي رجسٽريشن کي مڪمل ڪيو وڃي. ان موقعي تي وڏي وزير کي ٻڌايو ويو ته نيشنل ايڪشن پلان تحت سنڌ ۾ نو هزار پنج سو نوي مدرسن مان ڇهه هزار پنج سو ٽي مدرسا رجسٽرڊ ڪيا ويا آهن، جڏهن ته ٻه هزار نو سو ويهه مدرسن جي رجسٽريشن ڪئي پئي وڃي. اجلاس کي سنڌ جي گهرو سيڪريٽري پاران ڏنل بريفنگ ۾ وڌيڪ ڄاڻايو ويو ته غير رجسٽرڊ مدرسن ۾ پنج لک سترهن هزار ڇهه سو پنجانوي کٿابي پڙهي رهيا آهن. گهرو سيڪريٽري اجلاس کي ٻڌايو ته غير رجسٽرڊ مدرسا ڪراچي ۽ حيدرآباد ۾ موجود آهن ان موقعي تي آئي جي سنڌ غلام حيدر جمالي وڏي وزير کي ٻڌايو ته مختلف الزامن هيٺ هڪ سو ستهٺ مدرسن کي سيل ڪيو ويو آهي.جڏهن ته ڪراچي، حيدرآباد ۽ بدين ۾ ايڪيهن مدرسن تي ڇاپا هنيا ويا. هن چيو ته ڪجهه مدرسن مان نفرت ڦهلائيندڙ مواد هٿ ڪيو ويو ۽ انهن خلاف ڪيس داخل ڪيا ويا آهن. سنڌ ۾ رهندڙ افغانين جي حوالي سان ڳالهائيندي گهرو سيڪريٽري چيو ته هينئر تائين ٽيانوي هزار افغاني شهرين کي رجسٽرڊ ڪيو ويو آهي. هن چيو ته ست سو ويهه غير قانون افغانين جي خلاف ڪيس داخل ڪيا ويا آهن.جڏهن ته ايڪيهه سو افغانين کي گرفتار ڪيو ويو آهي. اجلاس کي ٻڌايو ويو ته جيلن ۾ ڦاسي جي سزا ٻڌايل ارڙهن قيدين کي ڦاسي ڏني وئي. گهرو سيڪريٽري اجلاس کي ٻڌايو ته سنڌ ۾ ايڪهٺ هٿياربند مذهبي تنظيمن جي کوج لڳائي وئي آهي، جڏهن ته يارهن سو پنجونجاهه دهشتگردن ۽ ڏوهارين کي ماريو ويو.جن مان هڪ سو چوهٺ القاعدا جا اڳواڻ، جڏهن ته ٽي ٽي پي ۽ لياري گينگ وار جي هڪ سو ٽيهه ڏوهاري شامل هئا.جڏهن ته ٽيهٺ هزار دهشتگردن ۽ ڏوهارين کي گرفتار ڪيو ويو آهي. آئي جي سنڌ ٻڌايو ته فوج جي سربراهه جنرل راحيل شريف سنڌ پوليس کي جديد هٿيار ۽ گاڏيون فراهم ڪيون ويون آهن.

 

اسلام آباد ٽريفڪ پوليس فرض ادا ڪرڻ سان گڏ عوام جي زندگين کي محفوظ بڻائي رهي آهي: پرويز رشيد

اسلام آباد (اين اين آءِ) سڌ سماءَ جي وفاقي وزير پرويز رشيد چيو آهي ته اسلام آباد ٽريفڪ پوليس فرض ادا ڪرڻ سان گڏ عوام جي زندگي کي محفوظ بڻائي رهي آهي، پوليس دهشتگردن جو جرئت سان مقابلو ڪري قوم جو ڳاٽ اوچو

ڪري ڇڏيو آهي، سڄي ملڪ جي پوليس جي قربانين کي خراج تحسين پيش ڪريان ٿو ۽ هي قربانيون ايندڙ نسل به ياد رکندو، عوام کي پوليس سان تعاون ڪرڻ گهرجي. اهڙن خيالن جو اظهار هن پاڪستان نيشنل ڪونسل آف دي آرٽ اسلام آباد ٽريفڪ پوليس جي ايف ايم 92.4 چينل جي انعام ڏيڻ واري تقريب کي خطاب ڪندي ڪيو. ان موقعي تي آءِ جي اسلام آباد طاهر عالم خان، ايس ايس پي ٽريفڪ ملڪ مطلوب احمد، ايس پي خالد رشيد ۽ ٻيا پڻ موجود هئا، وفاقي وزير چيو ته ٽريفڪ پوليس اسان جون زندگين کي محفوظ بڻائڻ ۾ اهم ڪردار ادا ڪري رهي آهي ۽ هي عمل عبادت آهي ۽ انسانن جون زندگيون بچائڻ تمام وڏي عبادت آهي. هن چيو ته اسلام آباد ٽريفڪ پوليس جو ريڊيو ايف ايم 92.4 شهرين کي قانون تي عمل ڪرڻ ۽ انهن کي رستو ڏيکارڻ ۾ اهم مدد ڪري رهيو آهي.

 

پاڻمرادو نوٽيس تي تنقيد اجايو آهي، نظام عدل جي تباهي جا ذميوار سڀ آهيون: چيف جسٽس

اسلام آباد (بيورو) چيف جسٽس جواد ايس خواجه چيو آهي ته سپريم ڪورٽ جي پاڻمرادو نوٽيس تي تنقيد اجايو آهي، هن عدليه جي ايوانن ۾ هڪ نه پر ڪيترائي ڀيرا خوف ڏٺو آهي، جنهن جو ڪارڻ دٻاءُ ۽ بااثر ماڻهن جي ناراضگي آهي، نظام عدل جي تباهي جا ذميوار سڀ آهيون. سپريم ڪورٽ ۾ اڄ رٽائرڊ ٿيندڙ چيف جسٽس جواد ايس خواجه جي مان ۾الوداعي فل ڪورٽ ريفرنس ٿيو، جنهن ۾ سپريم ڪورٽ جي سورنهن ئي ججز، اٽارني جنرل ۽ وڪيلن شرڪت ڪئي. فل ڪورٽ ريفرنس کي خطاب ڪندي چيف جسٽس جواد ايس خواجه چيو ته عدليه پنهنجي عمر جا 4 ڏهاڪا گذاري چڪي آهي پر بدقستي جا هميشه ناڪاري جواب مليو آهي. چيف جسٽس چيو ته عدالتن ۾ هلندڙ هڪ-هڪ ڪيس جي فيصلن ۾ 25 سال لڳي وڃن ٿا ان ڪري کين عوام کي فوري ۽ تڪڙي انصاف جي فراهمي ۾ ناڪامي جو اعتراف ڪرڻ گهرجي. جسٽس جواد ايس خواجه چيو ته اهو تاثر بي بنياد آهي ته سپريم ڪورٽ پاڻمرادو نوٽيس گهڻا وٺي ٿي، سو موٽو نوٽيس تي تنقيد کيس سمجهه ۾ نٿي اچي، عدليه جي هڪ فيصلي سان لکين ليڊي هيلٿ ورڪرز کي پنهنجا حق مليا هئا. هـُن چيو ته بي حسي کين شفاف فيصلا ڏيڻ کان نٿي روڪي سگهي، نظام عدل جي ناڪامي جي تباهي ۾ جتي ججز ۽ وڪيلن جو هٿ آهي، اوتر ئي حڪومت به ذميوار آهي. ان موقعي تي خطاب ڪندي نامزد چيف جسٽس انور ظهير جمالي چيو ته جسٽس جواد ايس خواجه کي عدليه جي محافظ طور ياد رکيو ويندو.

 

پ پ پاران عيدالاضحيٰ کانپوءِ عوامي جلسن جو اعلان، پارٽي جو جهنڊو کنيو آهي، هر شهر ويندس: بلاول ڀٽو

لاهور (بيورو) بلاول ڀٽو زرداري عيدالاضحيٰ کانپوءِ عوامي جلسن جو اعلان ڪري ڇڏيو آهي. پهريون جلسو رحيم يارخان ۾ ٿيندو. بلاول ڀٽو جو چوڻ آهي ته پارٽي جو جهنڊو کنيو آهي، هاڻي شهر شهر ويندس. بلاول هائوس ۾ ڏکڻ پنجاب جي عهديدارن جي اجلاس ۾ بلاول ڀٽو جو جهنڊو کڻي شهر شهر وڃي ڪارڪنن ۽ عوام سان ملڻ جو اعلان ڪيو. بلاول ڀٽو پارٽي کيفعال بڻائڻ لاءِ ڏکڻ پنجاب مان عوامي رابطا مهم شروع ڪرڻ جو اشارو ڏنو آهي. اجلاس جي باري ۾ ميڊيا سان ڳالهائي راجا پرويز اشرف چيو ته بلاول ڀٽو ڪرپشن خلاف پاڻ احتسابي جو اعلان ڪيو آهي. راجا پرويز اشرف انڪشاف ڪيو آهي ته موجوده حڪومت رينٽل پروگرام، شارٽ ٽرم آئي پي پيز جي نالي سان ٻيهر شروع ڪيو آهي. جم چيو ته پيپلزپارٽي هميشه جمهوريت خاطر مفاهمت جي سياسي کي هٿي ڏني. راجا پرويز اشرف چيو ته بلاول ڀٽو عوام ۾ وڃڻ جو فيصلو ڪيو آهي عيد کانپوءِ رحيم يارخان ۾ وڏو جلسو ڪندو. بلاول ڀٽو ڏکڻ پنجاب جي ڪارڪنن کي گڏ ڪرڻ چاهي ٿو، هن وڌيڪ چيو ته هر ڪيس جو فيصلو 6 کان 8 هفتن ۾ ٿيڻ گهرجي. ڀارت جيڪڏهن ميري اک سان ڏٺو منهن ٽوڙ جواب ڏنو ويندو. اجلاس ۾ جذباتي منظر انهيءَ وقت ڏسڻ ۾ آيا جڏهن بينظير ڀتو جو ذڪر ٿيو. ميجر ريٽائرڊ امتياز رڙيون ڪري روئي ڏنو ۽ بلاول ڀٽو صدارتي ڪرسي ڇڏي وٽس ويو ۽ کيس گلي سان لڳايو ۽ حوصلو ڏنو.

 

ايم ڪيو ايم رڳو حڪومت ۾ گڏ هوندي آهي ۽ هاڻي دٻاءُ هيٺ آهي: خورشيد شاهه

سکر (بيورو) قومي اسيمبليءَ ۾ مخالف ڌر جي اڳواڻ سيد خورشيد احمد شاھ چيو آهي ته آرمي چيف سان گڌ هو صرف هڪ تقريب ۾ ويو هو، سندن ڪابه گڏ جاڻي نه ٿي هئي، متحده دٻاءُ هيٺ آهي هونئن به اها ڪڏهن چونڊ اتحادي نه رهي آهي..سکر پريس ڪلب ۾ پريس ڪانفرنس ڪندي قومي اسيمبلي ۾ مخالف ڌر جي اڳواڻ خورشيد احمد شاهه چيو ته 6 سيپٽمبرتي رٿيل تقريب ۾ هو آرمي چيف سان 1965ع واري گڏيل قومي جذبي جي اظهار لاءِ گڏجي ويو هو اتي نه سندن ڪا گڏجاڻي ٿي هئي ۽ نه ئي ڪي ڳالهيون ٿيون هيون.هن چيو ته متحده سان ڪڏهن به سندن چونڊ اتحاد ناهي رهيو، ايم ڪيو ايم رڳو حڪومت ۾ گڏ هوندي آهي ۽ هاڻي دٻاءُ هيٺ آهي، مڪاني چونڊن لاءِ متحده سان ڪو اتحاد غور هيٺ ناهي. خورشيد احمد شاهه چيو ته تحريڪ انصاف اليڪشن ڪميشن جي ميمبرن جي استعفا لاءِ ڌرڻو هڻي رهي آهي، پ پ جو به اهوئي مطالبو آهي ته شڪي چونڊن بعد اليڪشن ڪميشن جا ميمبر عزت سان استعفا ڏئي هليا وڃن..هن چيو اليڪشن ڪميشن جا ميمبر معزز رٽائرڊ جج آهن، پر پارٽين جي اعتراضن کانپوءِ سندن رهڻ جو ڪو به جواز ناهي، پي ٽي آءِ طرفان هنن جي استعيفائن جو مطالبو درست آهي..خورشيد شاهه چيو ته اليڪشن ڪميشن سندس ئي نامزد ڪيل ميمبرن تي ٻڌل هئي، اهڙي نامزدگي تي هن قوم کان معافي ورتي آهي، جيڪڏهن اليڪشن ڪميشن جي ميمبرن استعيفائون نه ڏنيون ته مڪاني چونڊون ملتوي ٿي وينديون..هن چيو ته، ليوي ٽئڪس جگا ٽئڪس آهي، حڪومت وري جگا ٽئڪس جي مٿان سيلزٽئڪس هنئي آهي، جنهن ڪري تيل جون قيمتون گھٽجڻ باوجود عوام کي ڪو رليف ناهي مليو..خورشيد شاهه چيو ته پيٽرول جون قيمتن ۾ گھٽتائي عالمي مارڪيٽ ڪي حساب ناهي ٿي، جڏهن ته پاڪستان ۾ پيٽرول جي قيمت 40 کان 45 روپيا في ليٽر هجڻ گهرجي..هن چيو ته وفاقي حڪومت زراعت کي هٿي ڏيارڻ لاءِ هارين کي سهولتون ڏئي، پر فصل لهڻ کان پوءِ سارين، ڦٽين، ڪمند سميت ڪڻڪ ۽ ٻين زرعي جنسن جو اگهه صحيح نه ملڻ ڪري آبادگار ۽ هاري بدحالي واري زندگي گذارڻ تي مجبور ٿي وڃن ٿا، حڪومت کي گهرجي ته کين سبسڊي ڏئي ته جيئن پئداوار وڌي ۽ ملڪ ترقي ڪري.

 

ڪراچي ۾ قلم ڌڻي دهشتگردن جي نشاني تي، 24 ڪلاڪن اندر 2 صحافي قتل

ڪراچي (اسٽاف رپورٽر) سنڌ جـي تختگاهه ڪراچي ۾ دهشتگردن ٽريفڪ پوليس کانپوءِ قلم ڌڻين کي نشانو بڻائڻ شروع ڪري ڇڏيو، اڻڄاتل هٿياربندن جي فائرنگ ۾ 24 ڪلاڪن اندر هڪ ٻيو سينيئر صحافي آفتاب عالم مارجي ويو. سينيئر صحافي آفتاب عالم نارٿ ڪراچي واري علائقي ۾ پنهنجن ٻارن کي وٺڻ لاءِ اسڪول وڃي رهيو ته يو پي موڙ وٽ موٽرسائيڪل سوار ٻن هٿياربندن مٿس انڌاڌنڌ فائرنگ ڪري ڏني. امدادي ٽيمن واقعي واري هنڌ پهچي آفتاب عالم کي فوري طور عباسي شهيد اسپتال منتقل ڪيو، جتان جي ڊاڪٽرن سندس فوت ٿيڻ جي تصديق ڪئي. ڊاڪٽرن جو چوڻ آهي ته منهن ۾ لڳل گولي آفتاب عالم جي موت جو سبب بڻي. ڊي ايس پي الطاف حسين ميڊيا کي ٻڌايو ته آفتاب عالم کي گهر ٻاهران فائرنگ ڪري قتل ڪيو ويو. ڊي ايس پي موجب، واقعي واري هنڌ تان نائين ايم ايم پسٽل جا 3 خول مليا آهن. هوڏانهن سنڌ جي وڏي وزير سيد قائم علي شاهه صحافي آفتاب عالم جي قتل جي مذمت ڪندي آءِ جي سنڌ کان رپورٽ طلب ڪري ورتي آهي. سينيئر صوبائي وزير نثار احمد کهڙي پڻ آءِ جي سنڌ سان رابطو ڪري واقعي بابت تفصيل معلوم ڪيا. نثار کهڙَي، آءِ جي سنڌ کي هدايت ڪئي ته ولي بابر جيان آفتاب عالم جي قاتلن کي به گرفتار ڪري قانون جي ڪٽهڙي ۾ آندو وڃي. ٻئي طرف 24 ڪلاڪن اندر ٻئي صحافي جِي قتل تي صحافتي حلقن ۾ ڏک ۽ ڪاوڙ جي لهر پکڙجي وئي. صحافين حڪومت کان مطالبو ڪيو آهي ته صحافين کي قتل ۾ ملوث جوابدارن کي بنا دير گرفتار ڪري سخت کان سخت سزا ڏني وڃي. ياد رهي ته گذريل رات به خانگي ٽي وي چيئنل جي هڪ صحافي کي قتل ڪيو ويو هو.

 

رينجرز نائين زيرو تان گرفتار ڪيل ايم ڪيو ايم اڳواڻ قمر منصور کي آزاد ڪري ڇڏيو

ڪراچي (اسٽاف رپورٽر) رينجرز نائين زيرو تان گرفتار ڪيل ايم ڪيو ايم اڳواڻ قمر منصور کي آزاد ڪري ڇڏيو، رينجرز جي لا آفيسر دهشتگري ٽوڙ عدالت ۾ رپورٽ جمع ڪرائيندي چيو آهي ته قمر منصور کان شروعاتي جاچ مڪمل ڪئي وئي آهي ۽ اڄ انساني بنيادن تي کيس آزاد ڪيو ويو آهي. رينجرز ايم ڪيو ايم جي مرڪز نائن زيرو تان گرفتار ڪيلمتحده اڳواڻ قمر منصور کي آزاد ڪري ڇڏيو آهي. رينجرز جي لا آفيسر ڪراچي جي دهشتگردي ٽوڙ عدالت ۾ پنهنجي رپورٽ جمع ڪرائيندي موقف اختيار ڪيو آهي ته قمر منصور کان جاچ مڪمل ٿي چڪي آهي. رينجرز جي لا آفيسر موجب قمر منصور پاران ڪيل انڪشافن جي حوالي سان جاچ هلندڙ آهي، سندس طبيعت ٺيڪ نه آهي، تنهنڪري اڄ کيس آزاد ڪيو ويو آهي. عدالت رينجرز جي لا آفيسر پاران پيش ڪيل رپورٽ منظور ڪري ورتي آهي. رينجرز 22 جولاءِ تي ايم ڪيو ايم اڳواڻ قمر منصور کي نائن زيرو تان گرفتار ڪيو هو، مٿس دهشتگردن کي پناهه ڏيڻ جو الزام آهي.

 

ڪراچي ۾ قرآن پاڪ جي قاري دوست سان گڏجي گهرواري ۽ ٻن ٻارڙن کي قتل ڪري گهر کي باهه ڏئي آپگهات ڪري ڇڏيو، هڪ ٻار زخمي حالت ۾ هٿ

ڪراچي(اسٽاف رپورٽر) ڪراچي ۾ قرآن پاڪ جي قاري پنهنجي دوست سان گڏجي گهرواري ۽ ٻن ٻارڙن کي قتل ڪري گهر کي باهه ڏئي آپگهات ڪري ڇڏيو، جڏهن ته سندس هڪ پٽ زخمي حالت ۾ مليو، ذريعن مطابق منظور ڪالوني جي جدون چوڪ ويجهو هڪ شخص محمدطارق پنهنجي دوست سان گڏجي تيز اوزار سان پنهنجي گهرواري 40 ورهين جي ثمينا، 15 ورهين جي نياڻي روميسا ۽ 13 ورهين جي سعد کي قتل ڪري ڇڏيو، جڏهن ته 10 ورهين جو حماد زخمي ٿي پيو، جنهن کانپوءِ طارق پاڻ کي به ماري گهر جي ڪمري کي باهه ڏئي ڇڏي، جنهن ڪري لاش ۽ سمورو سامان سڙِي خاڪ ٿي ويو، اطلاع ملڻ تي پاڙيوارن پهچي پوليس جي مدد سان امدادي ڪارروايون ڪري باهه وسائي، جنهن دوران 4 لاش ۽ زخمي ٻارڙو هٿ آيو،جنهن کانپوءِ لاش ۽ زخمي ٻارڙي کي اسپتال منتقل ڪيو ويو، ڊاڪٽرن مطابق زخمي ٻارڙي جو جسم به ڪافي سڙي چڪو آهي، جڏهن ته سندس نڙگهٽ تي تيز اوزار سان ڪهڻ جو نشان آهي، ٻارڙو ڏاڍو ڊنل آهي ۽ بار بار چئي رهيو آهي ته مونکي بابا کان بچايو. پوليس مطابق ٻارڙي شروعاتي بيان ۾ ٻڌايو آهي ته بابا (طارق) پنهنجي دوست سان گڏجي سڀني کي قتل ڪيو، جنهن کانپوءِ مان بيهوش ٿي ويس، ان کانپوءِ ڇا ٿيو، ڪا خبر ناهي، اختيارين کي شڪ آهي ته طارق پنهنجي دوست سان گڏجي واردات ڪئي. جنهن کانپوءِ طارق جي دوست کيس به قتل ڪري گهر کي باهه ڏيڻ جي ڪوشش ڪئي. مقتولن جي وارثن ٻڌايو ته طارق جو تعلق ڊيرا اسماعيل خان سان آهي ۽ هو گهر ۾ ٻارڙن کي قرآن شريف پڙهائيندو هو،

 

ود هولڊنگ ٽيڪس لاڳو ڪرڻ خلاف سڄي ملڪ ۾ واپاري سراپا احتجاج، ڪاروبار مڪمل طور بند

ڪراچي (نمائندن وٽان) وفاقي حڪومت پاران وِد هولڊنگ ٽيڪس لاڳو ڪرڻ خلاف سنڌ سميت سڄي ملڪ ۾ واپارين جي سڏ تي شٽربند هڙتال ۽ احتجاجي مظاهرا ڪري ڌرڻا هنيا ويا. سنڌ جي راڄڌاني واري شهر ڪراچيءَ ۾ صدر،بولٽن مارڪيٽ، بوهري بازار، قائد آباد مارڪيٽ، ڪيمسٽ مارڪيٽ، لياقت آباد،سپر مارڪيٽ، ناظم آباد، ڪورنگي، لانڍي ۽ حيدري مارڪيٽ سميت مک بازارون نه کــُلي سگهيون. حيدرآباد، سکر، ميرپورخاص، ٽنڊي الهيار،لاڙڪاڻي، جيڪب آباد، سانگهڙ،بدين، ٺٽي، دادو، شڪارپور، قمبر شهدادڪوٽ، ڪشمور،ڪنڌڪوٽ ۽ ٻين شهرن ۾ پڻ ڪاروباري مرڪز بند رهيا. اسلام آباد، راولپنڊي، لاهور، ملتان، گجرانوالا ۽ ٻين شهرن جون مک بازارون هڙتال سبب بند رهيون. ڪوئيٽا،حب، خضدار، اوستا محمد ۽ ٻين شهرن ۾ واپارين پنهنجا ڪاروبار بند رکيا. مختلف شهرن ۾ واپارين هڙتال ڪرڻ بعد احتجاجي مظاهرا ۽ ڌرڻا پڻ هنيا. هوڏانهن پ پ، ايم ڪيو ايم، جماعت اسلامي، جـَي يـُو آءِ سميت مختلف سياسي پارٽين واپارين جي هڙتال جي حمايت ڪئي آهي. واپاري اڳواڻن جو چوڻ آهي ته هـُو اڳ ئي ٽيڪس ادا ڪري رهيا آهن جڏهن ته مٿان وري وڌ هولڊنگ ٽيڪس لاڳو ڪرڻ ظالماڻو عمل آهي. هنن چتاءُ ڏيندي چيو ته وڌ هولڊنگ ٽيڪس وارو فيصلو واپس ورتو وڃي، ٻِي صورت ۾ احتجاج جو دائرو وڌايو ويندو..