تازيون خبرون

Daily Archives: September 9, 2015

وزيراعظم پاران قومي ناڻو لٽيندڙ جو بنا فرق احتساب ڪرڻ جو اعلان

اسلام آباد (بيورو) وزيراعظم نواز شريف، سنڌ جي دورن ۽ 11 نومبر تي ڏياري جو ڏڻ سنڌ جي اقليتي برادري سان ملهائڻ جو اعلان ڪندي چيو آهي ته آصف علي زرداريءَ جي گذريل ڏينهن واري بيان تي ڏک پهتو آهي، ڪير ڪاوڙ ڪري يا بيان ڏئي، سنڌ ۾ دهشتگردي ۽ ڪرپشن خلاف جاري ڪاررواين تي ڪا به سوديبازي نه ڪئي ويندي، سنڌ ۾ ن ليگ کي فعال بڻائڻ لاءِ مڪاني چونڊن ۾ مقامي سطح جي ڪارڪنن کي ٽڪيٽون ڏنيون وڃن. اسلام آباد ۾ وزيراعظم نواز شريف جي صدارت هيٺ مسلم ليگ نون سنڌ جي قيادت جو اجلاس ٿيو، جنهن ۾ مملڪتي وزير عبدالحڪيم بلوچ، ماروي ميمڻ، اسماعيل راهو،  شيرازي ڀائرن، مرتضيٰ جتوئي، نهال هاشمي، کيئل داس ڪوهستاني ۽ ٻين اڳواڻن شرڪت ڪئي. اجلاس ۾ مسلم ليگ ن جا سينيئر اڳواڻ راجا ظفر الحق، خواجه سعد رفيق، پرويز رشيد ۽ ڊاڪٽر آصف ڪرماني سميت ٻيا اڳواڻ به موجود  هئا. اجلاس ۾ 31 آڪٽوبر کان شروع ٿيندڙ سنڌ ۾ مڪاني چونڊن جي تيارين ۽ اميدوارن کي ٽڪيٽ ڏيڻ وارن معاملن تي غور ڪيو ويو. ذريعن موجب، وزيراعظم نواز شريف اعلان ڪيو ته هو مڪاني چونڊن کان اڳ سنڌ جي مختلف ضلعن جو دورو ڪندو، جڏهن ته هو 11 نومبر تي ڏياري جو ڏڻ پڻ سنڌ جي اقليتي برادري سان ملهائيندو. وزيراعظم نواز شريف چيو ته سنڌ ۾ هن وقت ن ليگ غير فعال نظر اچي رهي آهي، ان ڪري پارٽي کي فعال بڻائي سنڌ ۾ ن ليگ جو جيڪو خال نظر اچي رهيو آهي، اهو ختم ڪيو وڃي. هـُن چيو ته سنڌ ۽ پنجاب جي مڪاني چونڊن ۾ ن ليگ اڪثريت سان ڪاميابي ماڻيندي، سنڌ اندر مڪاني چونڊن ۾ مقامي سطح جي ڪارڪنن کي ٽڪيٽون ڏنيون وڃن. ذريعن موجب، وزيراعظم نواز شريف سنڌ ۾ ڪرپشن ۽ دهشتگردي خلاف ڪارروايون جاري رکڻ جو اعلان ڪندي چيو ته ڪير ڪاوڙي يا بيان جاري ڪري پر ڪرپشن ۽ دهشتگردي خلاف ڪاررواين تي سوديبازي نه ڪئي ويندي. وزيراعظم چيو ته هـُو سنڌ جي ترقي چاهين ٿا، پاڪستان جي قيام کان هن وقت تائين ملڪ جي ترقي ۾ سنڌ جو ڪردار انتهائي اهم رهيو آهي. وزيراعظم نواز شريف چيو ته ڪراچي آپريشن کانپوءِ شهر ۾ امن قائم ٿيو آهي، اتان جا شهري مطئمن آهن، امن جي بحالي تائين ڪراچي آپريشن جاري رهندو.

 

دائود ابراهيم بابت ڀارتي ڌمڪين کي نظر انداز نٿو ڪري سگهجي، هندستان ڪنهن به خوشفهمي ۾ نه رهي: پاڪستان

اسلام آباد (بيورو) وزيراعظم جي پرڏيهي ۽ قومي سلامتي معاملن بابت صلاحڪار سرتاج عزيز چيو آهي ته جيڪڏهن ڀارت پاڪستان تي حملو ڪيو ته بچي نه سگهندو، ڪشمير معاملي کانسواءِ هندستان سان ڳالهين جو ڪو به فائدو نه آهي، افغانستان سان گڏيل اعتماد کي بحال ڪرڻ لاءِ معاهدي ڪيو ويندو. اسلام آباد ۾ ميڊيا سان ڳالهائيندي پرڏيهي معاملن واري صلاحڪار سرتاج عزيز چيو ته دائود ابراهيم جي پاڪستان ۾ موجودگي بابت ڀارت جا الزام بي بنياد آهن. هن چيو ته دائود ابراهيم بابت ڀارت جي ڌمڪين کي نظر انداز نٿو ڪري سگهجي،  هندستان ڪنهن به خوشفهمي ۾ نه رهي، جيڪڏهن ڪا به اڳرائي ڪئي وئي ته منهن ٽوڙ جواب ڏنو ويندو. هڪ سوال جي جواب ۾ پرڏيهي معاملن بابت صلاحڪار چيو ته مودي سرڪار جو قيام پاڪستان مخالف نعري ذريعي ئي عمل ۾ آيو آهي ۽ ڀارتي وزيراعظم جي پهرين ڏينهن کان ئي پاليسي پاڪستان مخالف آهي. سرتاج عزيز چيو ته ڀارت رڳو پنهنجي شرطن تحت ڳالهيون ڪرڻ چاهي پيو پر مودي سرڪار تي واضح ڪري ڇڏيو آهي ته ڪشمير سميت سمورن معاملن تڪراري معاملن تي ڳالهين کانسواءِ ملاقات جو ڪو به فائدو ناهي. هڪ وڌيڪ چيو ته سڀاڻي ڊي جي رينجرز پنجاب جي ڀارتي سڪيورٽي فورسز سان ملاقات رٿيل آهي، جيڪا انتهائي اهميت رکي ٿي، جنهن جو مقصد ورڪنگ بائونڊري ۽ ايل او سي تي ڇڪتاڻ ختم ڪرڻ آهي. افغانستان بابت سوال جي جواب ۾ سرتاج عزيز ٻڌايو ته ڪابل دوري جو مقصد ٻنهي ملڪن جي لاڳاپن ۾ اعتماد کي بحال ڪرڻ هو، جنهن لاءِ معاهدو ڪيو ويندو. سرتاج عزيز چيو ته افغان قيادت کي ڪابل ۾ پاڪستان سفارتخاني جي سڪيورٽي ۽ اسلام آباد مخالف بيانن کان آگاهه ڪيو آهي، جنهن بعد سفارتخاني جي سڪيورٽي وڌائي وئي آهي.

 

ٿر جي ڪوئلي مان 100 سالن جون ضرورتون پوريون ڪري سگهجن ٿيو: صدر ممنون حسين

اسلام آباد (بيورو) صدر ممنون حسين چيو آهي ته آپريشن ضرب عضب آخري مرحلي ۾ داخل ٿي چڪو آهي، جنهن ۾ اهم ڪاميابيون ماڻيون آهن، پاڪستان وسيلن سان مالامال آهي، ٿر جي ڪوئلي مان 100 سالن جون ضرورتو

ن پوريون ڪري سگهجن ٿيون. اسلام آباد ۾ سيڙپڪاري بابت تقريب کي خطاب ڪندي صدر ممنون حسين چيو ته ملڪ ۾ سيڙپڪاري جا وسيع موقعا موجود آهن، سيڙپڪار اقتصادي زون مان فائدو حاصل ڪري سگهن ٿا. هـُن چيو ته دهشتگردي ۽ انتهاپسندي سبب ملڪي جي معيشت بري طرح متاثر ٿي هئي پر آپريشن ضرب عضب کانپوءِ نه رڳو ملڪي معيشت بهتر ٿي آهي پر امن امان جي صورتحال ۾ به بهتري آئي آهي. صدر چيو ته توانائي ۽ معيشت جي بهتري ۽ دهشتگردي جو خاتمو حڪومت جي اولين ترجيح آهي. صدر ممنون حسين چيو ته پاڪستان قدرتي وسيلن سان مالامال آهي، ٿر جي ڪوئلي مان 100 سالن جون ضرورتون پوريون ڪري سگهجن  ٿيون. صدر وڌيڪ چيو ته اقتصادي راهداري منصوبي کي انتهائي اهميت حاصل آهي، جنهن سان نه رڳو پاڪستان پر خطي ۾ ترقي ايندي.

 

ملڪ اڳيان ڪنهن به چيلينج کي منهن ڏيڻ لاءِ ملڪ جون فوجون تيار آهن: آرمي چيف

راولپنڊي (بيورو) ڪور ڪمانڊرز پاڪ فوج جا پيشور معاملا، اندروني ۽ بيروني سيڪيورٽي صورتحال ۽ دهشتگردي خلاف آپريسن جو جائزو ورتو آهي، آءِ ايس پي آر مطابق چيف آف اسٽاف جرنل راحيل شريف جي صدارت ۾ اڱاري تي جي ايڇ ڪيو ۾ ڪور ڪمانڊرز ڪانفرنس منعقد ٿي ڪانفرنس ۾ پيشور معاملا، اندروني ۽ بيروني سيڪيورٽي صورتحال ۽ دهشتگردي خلاف جاري آپريشنز بابت تفصيلي خيالن جي ڏي وٺ ڪئي وئي، ذريعن مطابق عسڪري قيادت پاڪ فوج جي پيشور تيارين تي ڀرپور اطمينان جو اظهار ڪيو، عسڪري قيادت دهشتگردن همدردن خلاف سخت ايڪشن وٺڻ جو عزم ورجايو، ان موقعيتي آپريشن ضرب عضب سميت ملڪ کي دهشتگردي کان پاڪ ڪرڻ ۽ رياست جي عملداري قائم ڪرڻ لاءِ هٿياربند فوج جي ڪاررواين تي اطمينان جو اظهار ڪيو ويو، ذريعن مطابق عسڪري قيادت يوم دفاع جي 50 سالا تقريبن جي موقعي تي فوج ۽ قوم جي ڀرپور جذبي تي اطمينان جو اظهار ڪندي اهو عزم ورجايو ته ملڪ اڳيان ڪنهن به چيلينج کي منهن ڏيڻ لاءِ ملڪ جون فوجون تيار آهن، ڪور ڪمانڊرز سيڪيورٽي فورسز جي آپريشن جي نتيجي ۾ جان قربان ڪندڙ فوج جي آفيسرن ۽ جوانن کي خراج عقيدت پيش ڪندي واضح ڪيو ته ڪليئر ڪرايل علائقن ۾ دهشتگردن ۾ ڪنهن به صورت ۾ واپس اچڻ نه ڏنو ويندو.

 

چونڊ دوران وزيراعظم، چونڊيل نمائندا توڙي وزير تڪن جو دورو نه ڪري سگهندا: سپريم ڪورٽ

اسلام آباد (بيورو) سپريم ڪورٽ، ننڍي چونڊن لاءِ اليڪشن ڪميشن جو ضابطه اخلاق بحال ڪري لاهور هاءِ ڪورٽ جو فيصلو معطل ڪري ڇڏيو آهي، عدالتي فيصلي ۾ چيو ويو آهي ته ننڍي چونڊ دوران وزيراعظم، چونڊيل نمائندا توڙي وزير تڪن جو دورو نه ڪري سگهندا. جسٽس ثاقب نثار جي سربراهي ۾ سپريم ڪورٽ جي ٽي رڪني بينچ اليڪشن ڪميشن جي ضابطه اخلاق بابت لاهور هاءِ ڪورٽ جي فيصلي خلاف درخواست تي ٻڌڻي ڪئي. اليڪشن ڪميشن جي وڪيل ابراهيم سـَتِيموقف اختيار ڪيو ته ننڍي چونڊن لاءِ ضابطه اخلاق تيار ڪيو ويو هو، جنهن جو مقصد چونڊن کي شفاف بڻائڻ هو. وڪيل دليل ڏيندي چيو ته ضابطه اخلاق ۾ ننڍي چونڊ دوران صدر، وزيراعظم، چونڊيل نمائندن ۽ وزيرن جي تڪن جي دوري تي پابندي لڳائي وئي هئي پر لاهور هاءِ ڪورٽ ضابطه اخلاق معطل ڪري دورن جي اجازت ڏني هئي. درخواست ۾ عدالت کي استدعا ڪئي وئي ته لاهور هاءِ ڪورٽ جو فيصلو معطل ڪري ضابطه اخلاق بحال ڪيو وڃي ته جيئن ننڍي چونڊ وارو عمل شفاف نموني سان ٿي سگهي. عدالت، اليڪشن ڪميشن جو موقف درست قرار ڏيندي لاهور هاءِ ڪورٽ جو فيصلو معطل ڪري ڇڏيو آهي. سپريم ڪورٽ، اليڪشن ڪميشن جو ضابطه اخلاق بحال ڪندي چيو ته ننڍي چونڊ دوران، وزيراعظم، وزير ۽ چونڊيل نمائندا تڪ جو دورو نٿا ڪري سگهن. عدالت، اليڪشن ڪميشن جي درخواست ٻڌڻيءَ لاءِ منظور ڪندي ٻڌڻي اڻڄاڻايل مدي تائين ملتوي ڪري ڇڏي.

 

دهشتگردي خلاف جنگ ڪاميابي سان جاري آهي، ڏوهن ۾ 80 سيڪڙو گھٽتائي آئي آهي: وڏو وزير

ڪراچي (اسٽاف رپورٽر) وڏي وزير سيد قائم علي شاهه سان آمريڪي سفير رچرڊ اولسن ملاقات ڪئي، وڏي وزير چيو آهي ته دهشتگردي خلاف جنگ ڪاميابي سان جاري آهي، ڏوهن ۾ 80 سيڪڙو گھٽتائي آئي آهي..وزير اعليٰ هائوس ڪراچي ۾ وڏي وزير سيد قائم علي شاهه سان آمريڪي سفير رچرڊ اولسن ملاقات ڪري صوبي ۾ تعليم، صحت ۽ ٻينشعبن ۾ آمريڪي سهڪار بابت خيالن جي ڏي وٺ ڪئي..وڏي وزير آمريڪي سهڪار جي ساراهه ڪندي چيو ته امريڪا جي مدد سان جيڪب آباد ۾ تعمير ٿيندڙ اسپتال مان 3 لک ماڻهن کي خاص فائدو ٿيندو..هن چيو ته صوبي ۾ امن امان جي صورتحال ۾ گھڻي بهتري آئي آهي، پاڪ فوج سان گڏ رينجرس ۽ سنڌ پوليس شاندار ڪارناما سرانجام ڏنا آهن.

 

مفاهمتي پاليسي سان پيپلز پارٽي کي وڏو نقصان پهتو آهي: قمر الزمان ڪائره

دبئي (مانيٽرنگ ڊيسڪ) پ پ جي مرڪزي اڳواڻ قمر الزمان ڪائرهه چيو آهي ته مفاهمتي پاليسي سان پيپلز پارٽي کي وڏو نقصان پهتو آهي پر نظام کي غير مستحڪم ڪندڙ ڪوبه قدم نه کنيو ويندو ۽ نه ئي  مڪاني چونڊن لاءِ  قومي سطح تي اتحاد ڪيو ويندو. گذريل رات ٿيل پ پ جي اجلاس بابت دبئي ۾ پريس ڪانفرنس ڪندي قمرالزمان ڪائرهه چيو ته  پاڻ تي ٿيندڙ ڏاڍ خلاف پارلياميٽ ۾ آواز اٿارڻ سان گڏ عدالتن ۾ دفاع ڪنداسين. هن چيو ته آصف زرداري سنڌ حڪومت جي ڪارڪردگي مان مطمئن آهي ۽ جيڪڏهن رينجرز دائري کان ٻاهر نڪري ڪم ڪندي ته ان کي سمجهائڻ جو حق رکون ٿا. هن چيو ته  مڪاني چونڊن ۾ ڪنهن به پارٽي سان قومي سطح تي اتحاد نه ڪيو ويندو باقي ضلعي سطح تي هڪٻئي جي حمايت ڪئي ويندي. قمرالزمان ڪائره چيو ته مٿن دهشتگردي جو الزام درست ناهي، پ پ هميشه دهشتگردي خلاف رهي آهي. هن چيو ته پ پ ۽ سندن قيادت  نشاني تي رهي آهي، جڏهن ته  دهشتگردي سبب عام چونڊن ۾ بهتر نموني حصو به نه وٺي سگهيا سين. قمرالزمان ڪائره چيو ته جيڪو به جوابدار ڏوهارين جي مدد ڪري ٿو ان کي سزا ملڻ گهرجي ، اسان کي غلطين مان سبق سکي پاليسين ۾ بهتري آڻڻ جي ضرورت آهي. قمر الزمان ڪائرهه چيو ته پاڪستان ۾ هن وقت هڪ نه پر 5 حڪومتون آهن ۽ ملڪ کي جيڪڏهن وفاق ذريعي هلايو وڃي ته مسئلا حل ٿيندا. دبئي ۾ آصف زرداري جي صدارت هيٺ ٿيل اجلاس ۾ مختلف فيصلا ڪيا ويا هئا.

 

ڪراچي: سماجي اڳواڻ سبين محمود قتل ڪيس جي اکين ڏٺي شاهد سميت 2 ڄڻا مارجي ويا

ڪراچي (اسٽاف رپورٽر) ڪراچي جي مختلف علائقن ۾ هٿياربندن هٿان سماجي اڳواڻ سبين محمود قتل ڪيس جي اکين ڏٺي شاهد سميت 2 ڄڻا مارجي ويا ۽ 2 زخمي ٿي پيا، جڏهن ته پوليس ڪارروائين دوران پنجن دهشتگردن سميت 8 جوابدارن کي گرفتار ڪري ورتو. پوليس موجب ابراهيم حيدري ويجهو هٿياربندن گهر اندر هڪ شخص کي گوليون هڻي قتل ڪري ڇڏيو. مقتول جي سڃاڻپ غلام عباس طور ٿي جيڪو اينٽي ڪرپشن پوليس ۾ ڊائيور طور ڪم ڪري رهيو هو ۽ هـُو سماجي اڳواڻ سبين محمود جو به ڊرائيور رهي چڪو هو. ذريعن موجب غلام عباس سبين محمود جي قتل جو اکين ڏٺو شاهد هو ۽ هن سڃاڻپ پريڊ دوران جوابدارن جي سڃاڻپ پڻ ڪئي هئي. ٻئي طرف نصرت ڀٽو ڪالوني ۾ ڦر دوران مزاحمت تي هٿياربندن جي فائرنگ ۾ رئوف نالي شخص مارجي ويو جڏهن ته شاهد ۽ جعفر زخمي ٿي پيا. هوڏانهن رضويا سوسائٽي ۾ پوليس ڪارروائي ڪري پنجن ڏوهارين کي گرفتار ڪري ورتو. پوليس موجب گرفتار جوابدارن جو تعلق پابندي مڙهيل تنظيم آهي جن جي قبضي مان 3 آوان بم ۽ هٿيار به برآمد ڪيا ويا آهن. آرام باغ واري علائقي مان پوليس ٻن ڦورن کي گرفتار ڪري ورتو جن وٽان ڦر ڪيل رقم ۽ ٻيو سامان برآمد ڪيو. ڊفينس فيز 6 ۾ به پوليس مقابلي بعد هڪ جوابدار کي گرفتار ڪري ورتو جڏهن ته سندس ساٿي فرار ٿيڻ ۾ ڪامياب ٿي ويو.

 

موجوده حڪومت يوسف رضا گيلاني خلاف ڪيس داخل ناهن ڪيا:چوڌري نثار

اسلام آباد(بيورو) وفاقي گهرو وزير چوڌري نثار علي چيو آهي ته موجوده حڪومت اڳوڻي وزيراعظم يوسف رضا گيلاني خلاف ڪيس داخل نه ڪيا آهن. اسلام آباد ۾ اجلاس کي خطاب ڪندي گهرو وزير چوڌري نثار علي چيو ته اڳوڻي وزيراعظم پاران اها ڳالهه ڪرڻ ته موجوده حڪومت ان خلاف ڪيس داخل ڪيا آهن،واري ڳالهه درست ناهي. هن چيو ته صوبن کي نادرا

کا ڇا گهرجي؟ان جي وضاحت ڪئي وڃي،جيستائين ڪوڙا سڃاڻپ ڪارڊ ٺاهڻ جو معاملو آهي ته ملوث نادرا عملدارن خلاف ڪارروائي ڪئي وڃي. ايم ڪيو ايم جي اڳوڻي سيڪريٽري جنرل عمران فاروق جي قتل ڪيس بابت ڳالهائيندي هن چيو ته اهو معاملو عدالت ۾ هلندڙ آهي، انڪري ان تي راءِ ڏيڻ کان پاسو ڪيو وڃي. وفاقي گهرو وزير چوڌري نثار علي چيو ته عمران فاروق قتل ڪيس ڪنهن ٻئي ملڪ ۾ هلي رهيو آهي،انڪري جيترو ٿي سگهي بيان بازي کان پاسو ڪيو وڃي.

 

پاڪستان ۽ چين ڀارتي اهم هنڌن تي حملي جي سازش ڪري رهيا آهن: راج ناٿ سنگهه

حيدر آباد (اين اين آءِ) ڀارتي گهرو وزير راج ناٿ سنگهه هڪ ڀيرو ٻيهر چيو آهي ته پاڪستان ۽ چين کي ڀارت جي تيز ترقي حضم نه پئي ٿئي، ٻئي ملڪ ڀارتي معيشت کي ڪمزور ڪرڻ ان جي اسٽريٽجڪ ۽ اهم هنڌن کي نقصان رسائڻ جي سازش ڪري رهيا آهن، ڀارتي اخبار مطابق گذريل ڏينهن راج ناٿ سنگهه قومي صنعتي سيڪيورٽي اڪيڊمي ۾ مرڪزي صنعت سيڪيورٽي

فورس جي اسٽنٽ ڪمانڊو ۽ سب انسپيڪرز جي پريڊ کانپوءِ چيو ته مان يقيني سان چئي سگهان ٿو ته بين الاقوامي برادري ۾ ڀارتي معاشي ساک ۾ اضافو ٿيو آهي، هن چيو ته ڀارت جو شمار دنيا جي سڀ کان وڏي اڀرند معاشي طاقتن ۾ ٿي رهيو آهي ۽ ايندڙ 5 کان 8 سالن ۾ 7 هزار ارب جي معيشت بڻجڻ لاءِ تيار آهي جيڪا موجوده وقت ۾ 2 هزار ارب آهي.