تازيون خبرون

Daily Archives: September 8, 2015

مدرسن جو دهشتگردن سان ڪوبه تعلق ناهي: چوڌري نثار

اسلام آباد (بيورو) وفاقي گهرو وزير چوڌري نثار علي خان چيو آهي ته مدرسن کي استعمال ڪري مقصد حاصل ڪرڻ جو سلسلو ختم ٿيڻ گهرجي جڏهن ته ملڪ ۾ مدرسن جو دهشتگردي سان ڪوبه تعلق ناهي. اسلام آباد ۾ پريسڪانفرنس ڪندي وفاقي گهرو وزير چوڌري نثار علي خان چيو آهي ته دهشتگردي ۾ ملوث ماڻهن خلاف بنا فرق ڪارروائي ڪئي ويندي، حڪومت پهريان ڳالهيون پوءِ ملٽري ايڪشن جو فيصلو ڪيو، اسان دهشتگردي خلاف جنگ ۾ هڪ سيڙهي طي ڪري ورتي آهي ۽ قومي لائحه عمل تي ڪم ڪري رهيا آهيون. هن چيو ته پاڪستان ۾ مدرسن جو دهشتگردي سان ڪوبه تعلق ناهي، بغير ثبوت جي مدرسي تي ڇاپو نه هنيو ويندو، هڪ ٻئي کي ڪافر چوڻ، قتل تي ڀڙڪائڻ، چڙ ڏياريندڙ تقرير تي حڪومت ڪارروائي ڪندي، فرقيواريت، هڪ ٻئي خلاف مذهبي انتهاپسندي خلاف به ڪارروائي ٿيندي. چوڌري نثار چيو ته مدرسا ۽ انهن جي قيادت دهشتگردي خلاف جنگ ۾ حڪومت ۽ فوج جي معاون آهي، مدرسن ۾ اي ۽ او ليولز تائين تعليم کي لاڳو ڪرڻ تي اتفاق ڪيو آهي ۽ عالمن به ديني تعليم جي مضمون کي نصاب ۾ شامل ڪرڻ تي راضپو ڏيکاريو آهي. هن چيو ته مدرسن کي استعمال ڪري مقصد حاصل ڪرڻ جو سلسلو ختم ٿيڻ گهرجي، گذريل حڪومتن مدرسن جي معاملي تي ڪجهه به نه ڪيو، مدرسن جا سمورا مالياتي معاملا بئنڪن ذريعي مڪمل ڪيا ويندا ۽ انهن جي فنڊنگ جو طريقيڪار حڪومت طي ڪندي جڏهن ته مدرسن جي آسان رجسٽريشن لاءِ هڪ ڪميٽي جوڙي وئي آهي.

 

دبئي ۾ پ پ جو اجلاس، آصف زرداري پاران ڪابينا جي ڪارڪردگي تي ڪاوڙ جو اظهار

دبئي (مانيٽرنگ ڊيسڪ) اڳوڻي صدر آصف علي زرداري سنڌ جي صوبائي ڪابينا جي ڪارڪردگي ڪاوڙ جو اظهار ڪندي چيو آهي ته نااهل وزيرن لاءِ ڪابه جڳهه ناهي، جيڪو ڪم ڪندو اُهو ئي وزير رهندو. اڳوڻي صدر آصف علي زرداري جي صدارت ۾ پيپلزپارٽي سنڌ جو اهم اجلاس دبئي ۾ ٿيو، اجلاس ۾ وڏي وزير سيد قائم علي شاهه‏، ناڻي واري صوبائي وزير سيد

مراد علي شاهه ۽ ٻين شرڪت ڪئي. ذريعن موجب آصف زرداري اجلاس دوران پيپلزپارٽي سنڌ جي وزيرن تي سخت ڪاوڙ جو اظهار ڪندي چيو ته اُهو ئي وزير رهندو جيڪو ڪم ڪندو، نااهل وزيرن لاءِ هاڻي سنڌ ڪابينا ۾ ڪابه جڳهه ناهي. آصف زرداري هدايت ڪئي ته سمورن ترقياتير ٿائن ۾ شفافيت کي يقيني بڻايو وڃي. وڏو وزير ماهوار بنيادن تي وزيرن جي ڪارڪردگي رپورٽ ڏيندو. اڳوڻي صدر سمورن وزيرن کي هدايت ڪئي ته اُهي ضلعي سطح تي کليل ڪچهريون لڳائين ۽ ماڻهن جا مسئلا حل ڪن.

 

دهشتگردن جي چيلهه ڀڃي ڇڏي، امن لاءِ سمورين ڌرين جو سهڪار گهرجي: نواز شريف

اسلام آباد (بيورو) وزيراعظم نواز شريف جي صدارت هيٺ ٿيل اعليٰ سطحي اجلاس ۾ تعليمي نصاب تي نظرثاني جو فيصلو ڪيو ويو آهي. اسلام آباد ۾ ٿيل اجلاس ۾ مدرسن جي رجسٽريشن لاءِ ڪميٽي ٺاهڻ جو فيصلو ڪيو ويو، جنهن جو نگران وفاقي گهرو وزير چوڌري نثار علي هوندو. اجلاس ۾ فيصلو ڪيو ويو ته مدرسن تي ڇاپن ۽ گرفتارين بابت عالمن جا خدشا ختم ڪيا ويندا. وزيراعظم نوازشريف ڳالهائيندي چيو ته هوائي فوج آپريشن ضرب عضب ۾ اهم ڪردار ادا ڪيو. هن چيو ته قومي لائحه عمل لاءِ ويهه نقاطي ايجنڊا تي عمل ڪري رهيا آهيون. هن چيو ته قومي لائحه عمل جي ايجنڊا تي سموري سياسي قيادت سان ڳالهيون ڪرڻ چاهيون ٿا. نوازشريف چيو ته ايندڙ نسل لاءِ خوشحال پاڪستان بڻائڻ جي ضرورت آهي. هن چيو ته اتروزيرستان ۾ دهشتگردن خلاف ڪامياب جنگ وڙهي رهيا آهيون. وزيراعظم چيو ته دهشتگردن جي چيلهه ڀڃي ڇڏي آهي. هن چيو ته امن قائم ڪرڻ ۽دهشتگردي جي خاتمي لاءِ سمورين ڌرين جي سهڪار جي ضرورت آهي. اميد کان وڌيڪ ڪاميابيون هن چيو ته ملي رهيون آهن. اجلاس ۾ آرمي چيف جنرل راحيل شريف ، گهرو وفاقي وزير چوڌري نثار ۽ ٻين عملدارن شرڪت ڪئي.

 

دهشتگردن کي واپس اچڻ امن ۽ استحڪام ۾ خلل وجهڻ جي اجازت نه ڏينداسين: راحيل شريف

راولپنڊي (بيورو) چيف آف آرمي اسٽاف جنرل راحيل شريف واضح ڪيو آهي ته مالاڪنڊ ڊويزن سميت ڪنهن به علائقي ۾ دهشتگردن کي واپس اچڻ ۽ امن ۾ خلل وجهڻ جي اجازت نه ڏينداسين پاڪ فوج هميشه سوات جي عوام سان گڏ آهي ۽ سويلين ادارن جي استعدادڪار کي هٿي ڏيڻ ۾ مدد ملندي ڪجهه سال اڳ مالاڪنڊ ڊويزن ۾ دهشتگردي جي اونداهي جو وقت قائهو بهادر فوج سويلين فورسز ۽ عوام جون قربانيون ۽ پختي عزم جي نتيجي ۾ دهشتگردي جو خاتمو ٿي چڪو آهي. آءِ ايس پي آر موجب چيف آف آرمي اسٽاف جنرل راحيل شريف سومر تي ڪالاميلي جي اختتامي تقريب ۾ شرڪت ڪئي. هن علائقي ۾ امن جي بحالي ۽ واڌي ۾ ميلن ۽ سياحت جي واپسي لاءِ سيڪيورٽي فورسز جي مدد جي سلسلي ۾ اهم ڪردار ادا ڪرڻ ۾ سوات جي عوام کي خراج تحسين پيش ڪئي ويئي جنرل راحيل شريف  اميد ظاهر ڪئي ته سوات جي خوبصورت سرزمين تي سياحت پنهنجي عروج تي پهچندي هن يقين ڏياريو ته پاڪ فوج هميشه سوات جي عوام سان گڏ آهي هن اهو عزم به ڪيو ته دهشتگردن کي ان علائقي ۾ واپس اچڻ ۽ سوات جي امن ۾ خلل وجهڻ جي اجازت نه ڏني ويندي.

 

ذوالفقار مرزا پاڻ مڪافات عمل مان گذري رهيو آهي ان تي ڇا چوان؟ نثار کهڙو

ڪراچي(اسٽاف رپورٽر) سنڌ جي اطلاعات واري سينيئر وزير نثار احمد کهڙو چيو آهي ته اليڪشن ڪميشن تي اعتراض پنهنجي جاءِ تي برقرار آهن پر اليڪشن ڪميشن جا ميمبر استعيفائون ڏين يا نه ڏين پر پيپلز پارٽي چونڊ عمل کان ٻاهر نه ٿي رهڻ چاهي ۽ مڪاني چونڊن ۾ ميدان خالي نه ڇڏينداسين. عسڪري قيادت پاران پيپلز پارٽيءَ جي ڪنهن وزير جي ٻانهن ڏيڻ يا گرفتاريءَ لاءِ ڪو بيان سامهون نه آيو آهي ۽ نه ئي سنڌ حڪومت کان ڪو اهڙو مطالبو ڪيو ويو آهي. سنڌ حڪومت موجود آهي جنهن جي سڀني شين تي نظر آهي. اهڙن خيالن جو اظهار هن سومر ڏينهن پنهنجي آفيس ۾ ميڊيا سان ڳالهائيندي ڪيو. نثار احمد کهڙو چيو ته پارليامينٽ مان استعيفائون ڏيڻ جو بيان رحمان ملڪ جو ذاتي ٿي سگهي ٿو اهڙا فيصلا ڪنهن جي بيان ڏيڻ سان نه ٿيندا آهن ۽ اهڙن فيصلن لاءِ پارٽيءَ جو اعلي سطحي فورم موجود آهي جنهن ۾ پارٽي قيادت  اعلي سطحي اجلاس ۾ ڪي به فيصلا ڪندي آهي. هڪ سوال جي جواب ۾ هن چيو ته ذوالفقار مرزا پاڻ مڪافات عمل مان گذري رهيو آهي ان تي ڇا چوان؟ هن چيو ته وڏو وزير دبئي وڃي سگهي ٿو سندس دبئي وڃڻ ۾ ڪو حرج ناهي. هن چيو ته 1965ع جي جنگ جي شهيدن کي خراج تحسين پيش ڪرڻ لاءِ سنڌ حڪومت پاران سي ايم هائوس ۾ تقريب ڪئي وئي هئي ان ۾ دال ۾ ڪارو ڳولهڻ جي ڪوشش نه ڪئي وڃي. پبلڪ اسڪول گهوٽڪي کي آءِ بي اي سکر حوالي ڪرڻ بابت سنڌ جي تعليم کاتي ۽ آءِ بي اي وچ ۾ 10 سالن جو معاهدو ڪيو ويو آهي جنهن تحت گهوٽڪي پبلڪ اسڪول جو انتظام آءِ بي اي سکر هلائيندي. ان ڏس ۾ ايم او يو تي صحيحون ڪرڻ جي تقريب سومر ڏينهن ٿي جنهن ۾ تعليم ۽ اطلاعات واري سينيئر وزير نثار احمد کهڙو، سيڪريٽري تعليم فضل الله پيچوهو، آءِ بي اي جي ڊاريڪٽر نثار صديقي شرڪت ڪئي. جنهن دوران هنن ايم او يو تي صحيحون ڪيون. ان موقعي تي پريس ڪانفرنس ڪندي نثار احمد کهڙو چيو ته آءِ بي اي هڪ معياري ادارو آهي ۽ ٻارن کي بهتر تعليم فراهم ڪرڻ لاءِ گهوٽڪي پبلڪ اسڪول کي آءِ بي اي حوالي ڪيو ويو آهي. هن چيو ته سنڌ ۾ 25 انگريزي ميڊيم اسڪول تعمير ٿي رهيا آهن جن مان 17 اسڪولن تي ڪم شروع ٿي چڪو آهي جن مان شهيد بينظير آباد ضلعي جو جڪ اسڪول مڪمل تعمير ٿي چڪو آهي جيڪو ايندڙ مهيني تعليم کاتي حوالي ٿي ويندو ۽ انهن اسڪولن جون عمارتون ڪولڊ اسٽيل اسٽرڪچر جي طور تي تعمير ڪيون پيون وڃن. هن چيو ته يو ايس ايڊ جي مدد سان سنڌ جي مختلف ضلعن ۾ 110 اسڪول ٺاهيا پيا وڃن ۽ ٻوڏ متاثر 8 ضلعن ۾ پڻ 14 ڪمرن تي ٻڌل اسڪولن جي  تعمير جو ڪم شروع ڪيو ويو آهي جيڪو پڻ جلد مڪمل ڪيو ويند ان کان علاوه 25 ڪمپريهينسو اسڪولن جي تعمير تي پڻ ڪم شروع ٿي چڪو آهي. هن چيو ته سهولتن کان محرم 10 هزار اسڪولن ۾ سهولتون فراهم ڪرڻ جو ٽارگيٽ رکيو ويو آهي جيڪو 3 سالن ۾ مڪمل ڪيو ويندو ۽ هن سال هڪ هزار اسڪولن ۾ سهولتون فراهم ڪيون وينديون. هن چيو ته استادن جي  اسڪولن ۾ حاضريءَ کي يقيني بڻائڻ لاءِ ڏيڌ لک استادن مان 84 هزار استادن جي بايو ميٽرڪ رجسٽريشن ڪئي وئي آهي ۽ سڀني استادن جي بايو ميٽرڪ رجسٽريشن جو عمل جلد مڪمل ڪيو ويندو ۽ استادن کي بايو ميٽرڪ رجسٽريشن آڌار پگهارون جاري ٿينديون. ان عمل سان جعلي ۽ گوسڙو ملازمن جي پڻ خبر پئجي ويندي. هن چيو ته 5 هزار 200 بند پيل اسڪولن مان 3 هزار بند اسڪول کولرايا ويا آهن ۽ باقي بند پيلو اسڪول کولرائڻ جي پٺيان آهيان جيڪي جلد کولرايا ويندا. هڪ سوال جي جواب ۾ هن چيو ته اختيار وزير وٽ آهن ۽ سيڪريٽري وزير جي حڪمن تي عمل ڪرڻ جو پابند آهي.

 

پاڪستان ۽ ڀارت بابت شڪ آهي ته ايٽمي  جنگ تائين پهچي سگهن ٿا،آمريڪي فوج جو ڪردار اهم هوندو: آمريڪي ميگزين

نيويارڪ (م.ڊ)  هڪ آمريڪي ميگزين  پنهنجي رپورٽ ۾ دعويٰ ڪئي آهي ته پاڪستان ۽ ڀارت بابت شڪ آهي ته ڏکڻ ايشيا جا ٻئي ملڪ ايٽمي  جنگ تائين پهچي سگهن ٿا، هلندڙ منظرنامي کانپوءِ آمريڪا جي زميني

فوج جو صور حال کان ڌار رهڻ  تقريبن ناممڪن هوندو، آمريڪي ميگزين “نيوز ويڪ” مطابق پاڪستاني فوج عددي  حساب سان هن وقت د نيا جي چوٿين نمبر تي آهي، هن فهرست ۾ 16 لک فوجين سان گڏ چين پهرين فهرست، 11 لک 50 هزار سان ڀارت ٻئي ۽ 10 لک 20 هزار سان اتر ڪوريا جي فوج ٽئين نمبر تي آهي، جڏهن ته آمريڪا جي فوج 5 لک 39 هزار 450 جوانن سان گڏ پنجين نمبر تي آهي، پر حيران ڪند ڙ حقيقت هي آهي ته گذ ريل سال دفاعي خرچن جي لحاظ سان پاڪستان دنيا جي پهرين 20 ملڪن جي فهرست ۾ شامل نا هي، جڏهن ته آمريڪا دفاعي خرچن جي لحاظ سان پهرين ۽ ڀارت نائين نمبر تي آهي، ميگزين مطابق ٻنهي ملڪن وچ ۾ پهرين به ٽن کان چار جنگيون ٿي چڪيون آهن، جن ۾ ڪارگل جنگ جو به شمار ڪري سگهجي ٿو، مستقبل ۾ جوهري تڪرار شد ت اختيار ڪئي ته جنگبندي لاءِ پرڏيهي فوج جو ڪردار ممڪن ٿي سگهي ٿو، ميگزين ٻنهي ملڪن وچ امڪاني جنگ تي لکيو آهي ته ڪو به انتهاپسند گروپ ٻنهي ملڪن کي ان نازڪ موڙ تي آڻي سگهي ٿو، هوشيار فوجي سوچ کان متاثر محدود ڀارتي روايتي ڪارروائي به اسلام آباد، لاهور يا ڪنهن ٻئي پاڪستاني شهر کي خطري ۾ وجهي سگهي ٿي، ان صورتحال ۾ آمريڪي فوج جو ڪردار اهم هوندو ،ڪنهن ٻئي وٽ اها صلاحيت يا مشن کي سنڀالڻ جو سياسي اعتماد نه ٿو ٿي سگهي .

 

ڪچي آبادي ڪيس، آئين جي نظر ۾ وزيراعظم، صدر ۽ ريڙهي وارا سڀ برابر آهن; چيف جسٽس

اسلام آباد (بيورو) سـُپريم ڪورٽ، اسلام آباد جي ڪچي آباد ڊاهڻ بابت ڪيس ۾ چئني صوبن کان نيشنل هائوسنگ سوسائٽي 2001 بابت رپورٽ طلب ڪري ورتي آهي، چيف جسٽس ريمارڪس ۾ چيو آهي آئين جي نظر ۾

وزيراعظم، صدر ۽ ريڙهي وارا سڀ برابر آهن، ٽيڪس چوري ختم ٿئي ته سڀ معاملا حل ٿي ويندا. چيف جسٽس جواد ايس خواجه جي سربراهي ۾ سپريم ڪورٽ جي ٽي رڪني بينچ اسلام آباد جي ڪچي آبادي ڊاهڻ خلاف ڪيس جي ٻڌڻي ڪئي. عدالت، ايندڙ ٻڌڻي تائين ڪچي آبادي کي ڊاهڻ خلاف اسٽي آرڊر برقرار رکي ڇڏيو آهي.  جسٽس دوست محمد کوسا ريمارڪس ڏنا ته جڏهن ڪچي آبادي ٺهي رهي هئي، ان وقت سي ڊي اي ڪٿي هئي، ڪچي آبادي وارن کي آباد ڪرڻ وارو ڪير هو؟. چيف جسس ريمارڪس ڏنا ته حڪومت وٽ پئسن جي کوٽ ناهي پر ڪم نه پيو ٿئي، ٻڌايو وڃي ته ڪچي آبادي لاءِ ڪيتري رقم رکي وئي آهي. چيف جسٽس جواد ايس خواجه چيو ته آئين جي نظر ۾ وزيراعظم، صدر ۽ ريڙهي وارا برابر آهن، ٽيڪس چوري روڪي وڃي ته معاملا حل ٿي سگهن ٿا. چيف جسٽس وڌيڪ چيو ته اسلام آباد جي بنگلن ۾ ويٺل ماڻهن کان پڇيو ته اهو سڀ ڪيئن ٺاهيو آهي، رڳو غريبن کي گهر کان بدر نه ڪيو. عدالت، چئني صوبن کان نيشنل هائوسنگ پاليسي 2001 بابت رپورٽ طلب ڪندي ٻڌڻي 20 سيپٽمبر تائين ملتوي ڪري ڇڏي.

 

سنڌ ۾ بلدياتي چونڊون ٽن مرحلن ۾ ڪرائڻ جو فيصلو

ڪراچي (اي پي پي) سنڌ ۾ بلدياتي چونڊن لاءِ ٽي مرحلا مقرر، پهرين مرحلي ۾ سکر ۽ لاڙڪاڻو ڊويزن، ٻئي مرحلي ۾ شهيد بينظير آباد ڊويزن، ميرپورخاص ڊويزن ۽ حيدرآباد ڊويزن ۽ ٽئين مرحلي ۾ ڪراچي ڊويزن ۾ چونڊن لاءِ ترتيبوار 31 آڪٽوبر، 19 نومبر ۽ 3 ڊسمبر 2015 تي بلدياتي چونڊون ٿينديون. خبر موجب چيف سيڪريٽري سنڌ جي صدارت هيٺ سنڌ ۾ بلدياتي چونڊن جي سلسلي ۾ ڪالهه اعليٰ سطحي اجلاس ٿيو. اجلاس ۾ صوبائي اليڪشن ڪمشنر تنوير ذڪي سنڌ ۾ صوبائي اليڪشن ڪميشن تحت بلدياتي چونڊن بابت اهم نڪتا بيان ڪيا ته سنڌ ۾ بلدياتي چونڊن لاءِ ٽي مرحلا مقرر ڪيا ويا آهن. پهرين مرحلي ۾ سکر ۽ لاڙڪاڻو ڊويزن، ٻئي مرحلي ۾ شهيد بينظير آباد ڊويزن، ميرپورخاص ڊويزن ۽ حيدرآباد ڊويزن ۽ ٽئين مرحلي ۾ ڪراچي ڊويزن ۾ چونڊن لاءِ ترتيبوار 31 آڪٽوبر، 19 نومبر ۽ 3 ڊسمبر 2015 تي بلدياتي چونڊون ٿينديون. چيف سيڪريٽري محمد صديق ميمڻ ڪمشنرن ۽ ڊي آءِ جيز کي هدايت ڪئي ته هو مقرر ٿيل شيڊول تحت بلدياتي چونڊن جي سلسلي ۾ صوبائي اليڪشن ڪميشن سان ڀرپور تعاون ڪن. هن سيڪريٽري تعليم، سيڪريٽري بلديات ۽ ناڻي واري سيڪريٽري تي زور ڏنو ته هو لاڳاپيل معاملن جي سلسلي ۾ خدمتون سٺي نموني انجام ڏيڻ کي يقيني بڻائين. محمد صديق ميمڻ سيڪريٽري تعليم سان هڪ فوڪل پرسن جي نامزدگي تي به ڳالهه ٻولهه ڪئي، جيڪو اليڪشن ڪميشن سان رابطا يقيني بڻائيندو. چيف سيڪريٽري زور ڏنو ته پوليس، رينجرز ۽ قانون لاڳو ڪندڙ ادارن کي پنهنجون ذميواريون نڀائڻ لاءِ سمورا لاڳاپيل ادارا تعاون ڪن، جڏهن ته بلديات کاتو ان سلسلي ۾ اليڪشن ڪميشن سان ڀرپور رابطي لاءِ ڪنٽرول روم قائم ڪري. ان کان علاوه سنڌ پوليس/ آءِ جي آفيس آپريشن روم به فعال رهي، واضح رهي ته سنڌ جي 29 ضلعن تي ٻڌل بلدياتي ادارن جن ۾ هڪ ميٽرو پوليٽن ڪارپوريشن، 6 ڊسٽرڪٽ ميونسپل ڪارپوريشنز، 3 ميونسپل ڪارپوريشنز، 37 ميونسپل ڪميٽيز، 151 ٽائون ڪميٽيز، 24 ڊسٽرڪٽ ڪونسلرز، 1137 يونين ڪائونسلز ۽ 553 يونين ڪميٽيز (جيڪي ميونسپل ڪارپوريشنز ۽ ڊسٽرڪٽ ميونسپل ڪارپوريشنز شامل ۾ آهن. بلدياتي چونڊن لاءِ 29 ڊسٽرڪٽ ريٽرننگ آفيسرز، 316 ريٽرننگ آفيسرز، 551 اسسٽنٽ ريٽرننگ آفيسرز، 16601 پرزائيڊنگ آفيسرز، 108216 اسسٽنٽ پرزائيڊنگ آفيسرز، 54108 پولنگ آفيسرز ۽ فيميل پرزائيڊنگ آفيسرز لاءِ 2892 نائب قاصد مقرر ڪيا ويندا.

 

آپريشن ضرب عضب ۾ هوائي فوج جو ڪردار اهم آهي: ايئر وائيس مارشل سهيل امان

ڪراچي (مانيٽرنگ ڊيسڪ) هوائي فوج جي قومي ڏهاڙي تي مختلف شهرن ۾ تقريبون منعقد ڪيون ويون آهن،  هوائي فوج جي سربراهه ايئر وائيس مارشل سهيل امان چيو آهي ته آپريشن ضرب عضب ۾ هوائي فوج جو ڪردار اهم آهي ۽ ملڪ جي حفاظت لاءِ هوائي فوج ٻين فورسز سان گڏ بيٺل آهي. هوائي فوج جي قومي ڏينهن تي هوائي فوج جي سربراهه ايئر چيف مارشل سهيل امان پي اي ايف بيس فيصل ۾ شهيدن جي يادگار جو افتتاح ڪري گلن جي چادر چاڙهي. ان موقعي تي تقريب کي خطاب

ڪندي هوائي فوج جي سربراهه سهيل امان چيو ته 65 واري جنگ ۾ هوائي فوج دشمن جي ارادن کي مٽي ۾ ملائي ڇڏيو. هن چيو ته ضرب عضب ڪاميابي سان جاري آهي ، جنهن ۾ هوائي فوج کي وڏيون ڪاميابيون مليون آهن. هوائي فوج جي سربراهه چيو ته 65 واري جنگ ۾ هوائي فوج جو ڪردار نوجوانن لاءِ روشن مثال آهي ۽ ملڪ جي حفاظت لاءِ هوائي فوج ٻين فورسز سان گڏ بيٺل آهي.هوائي فوج جي قومي ڏينهن تي اسلام آباد ۾ ايئر هيڊ ڪوارٽر ۾ تقريب ٿي ، جنهن دوران وقتي وائيس چيف  آف  ايئر اسٽاف ايئر مارشل راشد ڪمال شهيدن جي يادگار تي حاضري ڀري . ڪراچي ۾ ايئر وائيس مارشل سلمان احمد بخاري ايئر فورس جي جٿي سان گڏ ڪالا پل ويجهو  فوجي قبرستان ۾ڪئپٽن شهيد راشد منهاس جي مزار تي حاضري  ڀري. ايئر وائيس مارشل، شهيد ڪئپٽن  راشد منهاس تي مزار تي حاضري ڀرڻ دوران گلن جي چادر چاڙهي فاتحه پڙهي  آهي. نشان حيدر جو اعزاز حاصل ڪندڙ ڪئپٽن راشد منهاس 20 آگسٽ 1971 ۾ شهادت ماڻي هئي.

 

پاڪستان خلاف سرگرم هٿ ٺوڪين جهادي تنظيمن جي ڪا به حيثيت ناهي: سراج الحق

چارسده (مانيٽرنگ ڊيسڪ) جماعت اسلامي جي امير سراج الحق چيو آهي ته پاڪستان خلاف سرگرم هٿ ٺوڪين جهادي تنظيمن جي ڪا به حيثيت ناهي. چارسده ۾ هڪ تقريب کي خطاب ڪندي سراج الحق چيو ته ڀارتي وزيراعظم نريندر مودي جو اسرائيل سان اتحاد پاڪستان جي خلاف آهي، اوڀر ۽ اولهه سرحد تي ڀارت 70 کان وڌيڪ حملا ڪيا، ڀارتي اڳرائي سبب خطي کي خطرا پيدا ٿي ويا آهن. هن چيو ته جماعت اسلامي رنگ، نسل، تهذيب ۽ زبان جي بنياد تي ملڪ ۾ ورهاڱي خلاف آهي، جڏهن ته ڪراچي آپريشن جا هاڪاري نتيجا سامهون آيا آهن. هن چيو ته پاڪستان ۽ افغانستان پاڻ ۾ پراڪسي ويڙهه ختم ڪن ۽ لاڳاپا بهتر بڻائين. سراج الحق چيو ته کين اميد آهي ته سرتاج عزيز جي افغانستان واري دوري سان ٻنهي ملڪن جي لاڳاپن ۾ بهتري ايندي.