تازيون خبرون

Daily Archives: September 4, 2015

دهشتگردي، فرقيواريت ۽ انتهاپسندي جي خاتمي لاءِ ميڊيا ڪردار ادا ڪري: نواز شريف

اسلام آباد (بيورو) وزيراعظم نواز شريف چيو آهي ته دهشتگردي، فرقيواريت ۽ انتهاپسندي جي خاتمي ۾ ميڊيا کي ڪردار ادا ڪرڻ گهرجي، اليڪٽرانڪ ميڊيا جي ضابطه اخلاق تي اتفاق سٺي اڳڀرائي آهي. پي ايم هائوس اسلامآباد ۾ وزيراعظم نواز شريف سان سندس خاص مددگار عرفان صديقي ملاقات ڪئي. ملاقات دوران عرفان صديقي اليڪٽرانڪ ميڊيا جي نئين ضابطا اخلاق تي وزيراعظم کي بريفنگ ڏني. ملاقات دوران ملڪي سياسي صورتحال تي پڻ خيالن جي ڏي وٺ ڪئي وئي. ان موقعي تي وزيراعظم نواز شريف اليڪٽرانڪ ميڊيا جا نوان ضابطا اخلاق جوڙڻ بابت عرفان صديقي جي سربراهي ۾ قائم ڪميٽي کي ڀيٽا پيش ڪئي. وزيراعظم چيو ته اليڪٽرانڪ ميڊيا جي ضابطا اخلاق تي اتفاق سٺي اڳڀرائي آهي. هن چيو ته ملڪ جي ترقي ۽ قومي مفاد تي ميڊيا جو ڪردار هميشه اهم رهيو آهي، حڪومت ميڊيا جي آزاديءَ تي مڪمل يقين رکي ٿي. نواز شريف چيو ته دهشتگردي، فرقيواريت ۽ انتهاپسندي جي خاتمي ۾ ميڊيا کي ڪردار ادا ڪرڻ گهـُرجي.

 

بلاول ڀٽو پاران مڪاني چونڊن ۾ چونڊيل نمائندن جي مائٽن کي ٽڪيٽ نه ڏيڻ جو فيصلو، نوان چهرا آڻڻ جو اعلان

لاڙڪاڻو (بيورو) پيپلزپارٽي جي چيئرمين بلاول ڀٽو زرداري پارٽي جي چونڊيل نمائندن جي مائٽن کي مڪاني چونڊن ۾ ٽڪيٽ نه ڏيڻ جو فيصلو ڪيو آهي. پيپلزپارٽيءَ جي چيئرمين بلاول ڀٽو زرداري مڪاني چونڊن ۾ نوان چهرن کي آڻڻ جو فيصلو ڪندي پارٽي جي چونڊيل نمائندن جي مائٽن کي ٽڪيٽ نه ڏيڻ جو اعلان ڪيو آهي. ذريعن موجب بلاول ڀٽو زرداري پارٽي اڳواڻن کي سختي سان انهيءَ فيصلي تي عملدرآمد جي هدايت ڪندي چيو آهي ته چونڊيل نمائندن جي مائٽن کي مڪاني چونڊن ۾ ٽڪيٽ نه ڏني وئي ۽ انهيءَ حوالي سان پارٽي ڊسيپلين جي خلاف ورزي ڪندڙن خلاف ڪارروائي ڪئي ويندي.  پيپلزپارٽي جي چيئرمين/بلاول ڀٽو جي صدارت هيٺ نئون ديرو هائوس ۾ مختلف ضلعن جي اڳواڻن جو اجلاس ٿيو آهي، جنهن ۾ مڪاني چونڊن جي تيارين جو جائزو ورتو پيو وڃي. بلاول ڀٽو جي صدارت هيٺ نئون ديرو هائوس ۾ اجلاس جاري آهي، جنهن ۾ گهوٽڪي، خيرپور، قمبر ۽ ٻين ضلعن ۾ مڪاني چونڊن جي حوالي سان ڪيل تيارين جو جائزو ورتو ويو. اجلاس ۾ سنڌ جو وڏو وزير سيد قائم علي شاهه، ايم اين اي فريال ٽالپر، تاج حيدر، وڪار مهدي، علي گوهر خان مهر، علي نواز مهر، ڄام مهتاب ڏهر، احمد علي پتافي ۽ ٻيا شريڪ ٿيا. اجلاس ۾ پ پ  ضلعي گهوٽڪي جي اڳواڻن پارٽي پاران نظر انداز ڪرڻ تي بلاول ڀٽو آڏو شڪايتون ڪيون، جنهن تي پارٽي چيئرمين سندس خدشا فوري طور ختم ڪرڻ جي خاطري ڪرائي. اجلاس ۾ مڪاني چونڊن بابت تيارين جو جائزو ورتو پيو ويو، جڏهن ته بلاول ڀٽو پاران عهديدارن ۽ اڳواڻن کان ڪارڪردگي رپورٽ طلب ڪئي وئي آهي. اجلاس دوران بلاول ڀٽو زرداري پارٽي اڳواڻن کي سنڌ اندر مڪاني چونڊن ۾ سئو سيڪڙو ڪاميابيءَ جو ٽاسڪ ڏنو. اجلاس کي خطاب ڪندي پ پ چيئرمين بلاول ڀٽو زرداري، سنڌ جي دوري تي آيل عمران خان کي تنقيد جو نشانو بڻايو. هن چيو ته پي ٽي آءِ جو سربراهه ڀلي ڪيترا به دورا يا جلسا ڪري پر سندس ڪابه حيثيت ناهي، ڇاڪاڻ ته سنڌ جو عوام کيس رد ڪري چڪو آهي پ پ چيئرمين چيو ته سنڌ ۾ مڪاني چونڊون پارٽي ڪارڪنن لاءِ امتحان آهي، عهديدار عوام سان رابطي ۾ رهي هيٺئين سطح تي تنظيم سازي ڪن هن واضح ڪيو ته پارٽي حڪمن جي ڀڃڪڙي ڪندڙ اڳواڻن خلاف ڪارروائي ڪئي ويندي، مفادن پرستن لاءِ وٽن ڪابه جاءِ ناهي. بلاول ڀٽو زرداري جو وڌيڪ چوڻ هو ته پيپلز پارٽي ماضيءَ ۾ بيروزگاريءَ جي خاتمي لاءِ قدم کنيا ۽ هاڻي به اپاءَ ورتا پيا وڃن..

 

ڪابينا ٺاهڻ ۽ ان ۾ ڦيرڦار جو اختيار صرف مون وٽ آهي: قائم علي شاهه

خيرپور(ڊ ر) ڪجهه وزيرن کي هٽائڻ لاءِ ڪنهن به اداري جو دٻاءُ ناهي، ڪابينا ٺاهڻ ۽ ان ۾ ڦيرڦار جو اختيار صرف مون وٽ آهي: وڏي وزير قائم علي شاهه چيو آهي ته سنڌ حڪومت بهتر نموني ڪم ڪري رهي آهي، عوام جي خدمت

ڪرڻ سبب اسان خلاف پروپيگنڊه ڪئي پئي وڃي.سنڌ سرڪار خلاف واويلا جو مقصد سندن ڪارڪردگي تان ڌيان هٽائڻ آهي.ٻٻرلوءِ ۾ وڪيل امير حيدر شاهه جي قتل تي سندس وارثن سان تعزيت بعد ميڊيا سان ڳالهائيندي وڏي وزير سيد قائم علي شاهه چيو ته ڪنهن به کاتي ۾ ڪرپشن برداشت نه ڪئي ويندي، هن جي سمورن کاتن تي نظر آهي، سنڌ حڪومت جو ڪم بهتر نموني سان هلي رهيو آهي.وڏي وزير چيو ته پ پ حڪومت عوام جي خدمت ڪري رهي آهي، ان ڪري سندن خلاف اجائي واويلا ڪئي پئي وڃي.سيد قائم علي شاهه چيو ته سنڌ حڪومت تي واويلا ان ڪري ڪئي پئي وڃي ته جئين هو ڪم نه ڪري سگهن.وڏي وزير سيد قائم علي شاهه وڌيڪ چيو ته سنڌ حڪومت تي وزيرن کي هٽائڻ جي حوالي سان ڪنهن به اداري جو دٻاءُ ناهي، ڪابينا ۾ ڦيرڦار ڪرڻ جا اختيار وٽس آهن.

 

ايم ڪيو ايم بعد پيپلزپارٽي کي پرچائڻ جو ٽاسڪ به مولانا فضل الرحمان حوالي

اسلام آباد(بيورو) وفاقي حڪومت پيپلزپارٽي کي پرچائڻ جو ٽاسڪ به جي يو آءِ سربراهه مولانا فضل الرحمان کي ڏئي ڇڏيو، وزيراعظم جي صلاحڪاربئريسٽر ظفر الله مولانا فضل الرحمان کي فون ڪري ايم ڪيو ايم سان ٻيهر ڳالهيون ڪرڻ جي درخواست ڪئي آهي.وزيراعظم نواز شريف ۽ وفاقي اسحاق ڊار وچ ۾ ملاقات دوران پيپلزپارٽي کي پرچائڻ جو ٽاسڪ ۽ ايم ڪيو ايم سان ٻيهر ڳالهين لاءِ مولانا فضل الرحمان کي درخواست ڪرڻ جو فيصلو ڪيو ويو.وفاقي حڪومت پاران پيپلزپارٽي کي پرچائڻ جو ٽاسڪ ڏيڻ کانپوءِ مولانا فضل الرحمان مخالف ڌر جي اڳواڻ سيد خورشيد شاهه کي فون ڪري سنڌ ۾ وفاقي ادارن جي ڪارروائين ۽ پ پ جي خدشن بابت ڳالهيون ڪيون.مولانا فضل الرحمان ۽ خورشيد شاهه وچ ۾ سومر تي اسلام آباد ۾ اهم ملاقات جو امڪان آهي.ٻئي طرف، وزيراعظم جي صلاحڪار بئريسٽر ظفر الله مولانا فضل الرحمان کي فون ڪري ايم ڪيو ايم سان ٻيهر ڳالهيون ڪرڻ لاءِ درخواست ڪئي.ذريعن موجب بئرسٽر ظفر الله مولانا فضل الرحمان کي چيو ته حڪومت ايم ڪيو ايم جا جائز خدشا ختم ڪرڻ لاءِ تيار آهي……

 

عمران خان تي اسان جي اک ئي نه ٿي ٻڏي، پيپلز پارٽيءَ کي ڪو به نه ڇڏي رهيو آهي: نثار کهڙو

لاڙڪاڻو(بيورو) سنڌ جي اطلاعات واري سينيئر وزير نثار احمد کهڙو چيو آهي ته عمران خان تي اسان جي اک ئي نه ٿي ٻڏي، پيپلز پارٽيءَ کي ڪو به نه ڇڏي رهيو آهي، پيپلز پارٽيءَ کي ڇڏي پي ٽي آءِ ۾ ويندڙن جا نالا جڏهن ظاهر ٿيا ته پوءِ ان تي تبصرو ڪيو ويندو پر پيپلز پارٽيءَ کي جنهن به ڇڏيو آهي اهي ڪٿان جا نه رهيا آهن ۽ ماضيءَ ۾ پارٽي ڇڏيندڙ وڏا وڏا نالا ۽ انهن جي حيثيت پڻ سڀني جي سامهون آهي. بلاول ڀٽو زرداريءَ پارٽيءَ جي ڪمان سنڀالي ورتي آهي ۽ پارٽي قيادت ۽ ڪارڪنن وچ ۾ رابطن کي وڌيڪ تيز ڪيو ويندو. اهڙن خيالن جو اظهار هن خميس ڏينهن نئون ديرو هائوس ۾ پارٽيءَ چيئرمين بلاول ڀٽو زرداريءَ جي صدارت ۾ سکر ڊويزن جي پارٽي عهديدارن ، چونڊيل نمائندن جي اجلاس جي صدارت ڪرڻ کان پوءِ ميڊيا کي بريفنگ ڏيندي ڪيو. نثار احمد کهڙو چيو ته پيپلز پارٽيءَ تي مڪاني چونڊون نه ڪرائڻ جو صرف الزام آهي، پيپلز پارٽي هر اليڪشن ۾ حصو ورتو آهي ۽ مڪاني چونڊن ۾ پڻ ڀرپور حصو ورتو ويندو جيڪي جماعتي بنيادن تي ڪرايون وينديون ۽ مڪاني چونڊن لاءِ اميدوار پارٽيءَ کي ٽڪيٽن لاءِ درخواستون جمع ڪرائي رهيا آهن ۽ گڏيل مشاورت کان پوءِ سڄي سنڌ ۾ پارٽيءَ پاران مڪاني چونڊن جي اميدوارن کي ٽڪيٽون ڏيڻ جو حتمي فيصلو ڪيو ويندو ۽ سڀئي پارٽي فيصلن تي عمل ڪرڻ جا پابند هوندا ۽ پارٽي ڊسيپلين جي ڀڃڪڙي ڪندڙن خلاف پارٽي پاران ڪاروائي ڪئي ويندي. هن چيو ته ايم ڪيو ايم جي قائد پاران پيپلز پارٽي بابت مڪافات عمل وارو بيان زيادتي آهي ۽ هو جذبات ۾ اچي ڳالهائي ويندو آهي. هن چيو ته شهيد بينظير ڀٽو ٻين سياسي اڳواڻن وانگر معاهدا ڪري ملڪ کان ٻاهر نه ڀڄي وئي ان ڪري شهيدن جي ان جماعت لاءِ مڪافات عمل چوڻ زيادتي آهي. هن چيو ته هڪ طرفيون ڪاروايون سياسي انتقام آهن ان ڪري احتساب سڀني جو ٿيڻ گهرجي. هن چيو ته جيڪڏهن ڊاڪٽر عاصم جا ايم ڪيو ايم سان لاڳاپا آهن ته ان جو مطلب اهو نه آهي سندس تعلق دهشتگردن سان جوڙيو وڃي؟ اهو عمل افسوسناڪ هوندو. هن چيو ته ماڊل ٽائون سانحي جي عدالتي جاچ رپورٽ تي واقعي ۾ ملوث ماڻهن خلاف ڪاروائي ڪئي وڃي ۽ بندش پيل تنظيمن سان ڳٺ جوڙ ۾ راڻا ثناءُ الله جي خلاف پڻ ڪاروائي ڪئي وڃي. هن چيو ته نواز شريف جي 90ع واري سياست سان ڌڙا بندي پيدا ٿيندي جنهن سان جمهوري ادارن کي نقصان ٿيندو ان ڪري انتقامي ڪاروايون نه ٿيڻ گهرجن. هن چيو ته بلاول ڀٽو زرداريءَ جي صدارت ۾ ٿيندڙ سکر ڊويزن جي اجلاس ۾ پارٽي معاملن، مڪاني چونڊن تي خيالن جي ڏي وٺ ڪئي وئي ۽ بلاول ڀٽو زرداري پارٽي عهديدارن کي ڪارڪنن سان رابطو وڌائڻ تي پڻ زور ڏنو آهي. هن چيو ته بلاول ڀٽو زرداريءَ پارٽي جي تنظيمي اڳواڻن ۽ ڪارڪنن سان تفصيلي ملاقاتن جو سلسلو شروع ڪيو آهي جيڪو جاري رهندو.

 

ملڪ کي سڪيورٽي رياست نه پر فلاحي رياست بڻائڻ گهرجي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊرخورشيد شاهه چيو آهي ته ملڪ کي سڪيورٽي رياست نه پر فلاحي رياست بڻائڻ گهرجي، حڪومت پاران تيل اگهن۾ معمولي گهٽتائي کي رد ڪيون ٿا، عوام کي رليف ملڻ گهرجي. اسلام آباد ۾ ميڊيا سان ڳالهائيندي اپوزيشن ليڊر خورشيد شاهه چيو ته پيٽرول جي في ليٽر جي اصل قيمت چاليهه رپيا هڪ پئسو هئڻ گهرجي. هن چيو ته چوڌري نثار اپوزيشن ۾ هئڻ وقت ليوي ٽيڪس تي تنقيد ڪندي ڪندو هو، پر هاڻي حڪومت ليوي تي به 45 رپيا سيلز ٽيڪس لڳائي ڇڏيو آهي. خورشيد شاهه چيو ته حڪومت  ٽيڪسن جي وصولي ذريعي هاءِ اسپيڊل ڊيزل مان هڪ ارب 15 ڪروڙ رپيا روزانو وصول ڪندي آهي، جڏهن ته سرڪار کي پيٽرول جي ذريعي 58 ڪروڙ رپيا آمدني ٿي رهي آهي. اپوزيشن ليڊر وڌيڪ چيو ته حڪومت تيل اگهن جي ذريعي ساليانو 9 سئو ارب رپيا وٺي رهي آهي ، پيٽروليم شين تي ٽيڪس جي ذريعي به حڪومت اڍائي ارب رپيا ملي رهيا آهن، ٽيڪس ضرور وٺڻ گهرجي پر غريب کي پيڙهڻ نه گهرجي. خورشيد شاهه وڌيڪ چيو ته ملڪ کي سڪيورٽي رياست نه پر فلاحي رياست بڻائڻ گهرجي.

 

آپريشن ضرب عضب جو فيصلائتو مرحلو شوال ۾ جاري آهي: سيڪريٽري دفاع/ عسڪري عملدار

اسلام آباد(بيورو) قومي اسيمبلي جي بچاءَ بابت اسٽينڊنگ ڪميٽي سرحد تي ڀارتي اڳرائي خلاف مذمتي ٺهراءُ منظور ڪري ورتو، ڪميٽي کي اجلاس ۾ بريفنگ ڏني وئي آهي ته آپريشن ضرب عضب جو فيصلائتو مرحلو شوال ۾ جاري آهي، ڪميٽي چيئرمين روحيل اصغر جو چوڻ آهي ته آپريشن ختم ٿيڻ باوجود پاڪ فوج 2019ع تائين قبائلي علائقن ۾ مقرر رهندي. قومي اسيمبلي جي بچاءَ بابت اسٽينڊنگ ڪميٽي جو اِن ڪيمرا اجلاس چيئرمين روحيل اصغر جي صدارت هيٺ ٿيو. ڪميٽيءَ ايل او سي ۽ ورڪنگ بائونڊري تي ڀارتي فوج جي اڳرائي خلاف مذمتي ٺهراءُ منظور ڪيو ۽ پاڪ فوج کي ڀيٽا پيش ڪئي. بچاءَ واري سيڪريٽري ليفٽيننٽ جنرل عالم خٽڪ۽ پاڪ فوج جي اعليٰ اختيارين ضرب عضب آپريشن بابت ڪميٽي کي بريفنگ ڏني. بريفنگ ۾ ٻڌايو ويو ته 15 جون 2014ع تي شروع ٿيل آپريشن ضرب عضب جو فيصلائتي مرحلو جاري آهي، آپريشن ۾ هن وقت تائين 3 هزار 500 کان وڌيڪ دهشتگرد مارجي چڪا آهن ۽ انهن جا ڪيترائي ٿاڪ ۽ هٿيارن جون فيڪٽريون پڻ تباهه ٿي چڪيون آهن. ڪميٽيءَ کي ٻڌايو ويو ته آپريشن ضرب عضب ۾ اتر وزيرستان جا اڪثر علائقا دهشتگردن کان خالي ڪرايا ويا آهن جڏهن ته آپريشن جو فيصلائتو مرحلو شوال ۾ جاري آهي. بريفنگ موجب آپريشن ضرب عضب آپريشن جي ردعمل ۾ هن وقت تائين 300 کان وڌيڪ فوجي جوان ۽ آفيسر به شهيد ٿي چـُڪا آهن. اجلاس ۾ ڳالهائيندي بچاءَ واري ڪميٽي جي چيئرمين روحيل اصغر شيخ چيو ته ضرب عضب آپريشن ختم ٿيڻ باوجود سرحد کي ايئن نه ٿو ڇڏي سگهجي پاڪ فوج کي 2019ع تائين اتر وزيرستان ۾ موجود رهڻو پوندو. روحيل اصغر چيو ته دهشتگردن جو صفايو ڪرڻ ئي ڪافي ناهي، دهشتگردن جي سهولتڪارن جو به خاتمو آندو پيو وڃي. سندس چوڻ هو ته آپريشن ۾ ڪجهه سياستدانن کي گرفتار ڪرڻ ڪافي ناهي، دهشتگردن جي سهولتڪارن جي چوڌاري گهيرو تنگ ٿي رهيو آهي.

 

اليڪشن ڪميشن سال 2015 جي مڪاني چونڊن لاءِ سنڌ ۾ ٻئي مرحلي جي شيڊول جو اعلان ڪري ڇڏيو

حيدرآباد (اي پي پي) اليڪشن ڪميشن آف پاڪستان سال 2015 جي مڪاني چونڊن لاءِ سنڌ ۾ ٻئي مرحلي جي شيڊول جو اعلان ڪري ڇڏيو آهي جنهن موجب ضلعي مٽياري ، ٽنڊو الهيار ، ٽنڊو محمد خان ، ٺٽو ، سجاول ، بدين ، حيدرآباد ، دادو ، ڄامشورو ، شهيد بينظير آباد ، نوشهروفيروز ، سانگهڙ، ميرپورخاص ، عمرڪوٽ ۽ ٿرپارڪر ضلعن ۾ 19 نومبر 2015ع تي يونين ڪائونسل ۽ يونين ڪميٽيز جي چيئرمين ۽ وائيس چيئرمين ۽ هر يونين ڪائونسل ، يونين ڪميٽي ۽ وارڊ جي لاءِ جنرل ميمبرن جي چونڊ لاءِ پولنگ ٿيندي .تفصيل موجب 9 سيپٽمبر تي رٽرننگ آفيسرن طرفان پبلڪ نوٽيس جاري ڪيا ويندا ، 13 کان 17 سيپٽمبر تائين اميدوار رٽرننگ آفيسرن وٽ پنهنجا نامزدگي وارا ڪاغذ جمع ڪرائيندا ، 26 سيپٽمبر کان پهرين آڪٽوبر تائين رٽرننگ آفيسرز نامزدگي وارا ڪاغذن جي جاچ پڙتال ڪندا ، 6 آڪٽوبر تائين اميدوار رٽرننگ آفيسر پاران سندن نامزدگي وارن ڪاغذن جي قبول ڪرڻ يا رد ٿيڻ خلاف اپيل ڪري سگهندا ، 12 آڪٽوبر تائين اپيلن تي ٽربيونل فيصلا ڏيندا، 13 آڪٽوبر تائين اميدوار پنهنجي ڪاغذاتي نامزدگي واپس وٺي سگهندا ، 14 آڪٽوبر تي اميدوارن جي نظرثاني ٿيل فهرست شايع ڪئي ويندي جڏهن ته 19 نومبر تي پولنگ جو انعقاد ٿيندو.

 

ڪراچي آپريش،11 سئو کان وڌيڪ دهشتگرد مارجي ويا، 64هزار 493 جوابدارن گرفتار

ڪراچي (اسٽاف رپورٽر) آءِ جي سنڌ جي صدارت هيٺ ٿيل اعليٰ سطحي اجلاس دوران پوليس ڪراچي آپريشن جي رپورٽ پيش ڪندي چيو آهي ته ٻن سالن دوران مجموعي طور 64هزار 493 جوابدارن کي گرفتار ڪيو ويو،1171جوابدار مارجي ويا،  جوابدارن وٽان 575 ڪلو ڌماڪيدار مادو ۽ 15هزار 475 هٿيار هٿ ڪيا آهن. سپريم ڪورٽ جي حڪم تي جاچ پوليس کي فنڊز جي فراهمي بابت ڪراچي ۾ آءِ جي سنڌ جي صدارت هيٺ اعليٰ سطحي اجلاس ٿيو. اجلاس دوران پوليس ڪراچي آپريشن بابت رپورٽ پيش ڪندي چيو ته ڪراچي ۾ آپريشن دوران مختلف ڪيسن ۾ گهربل 25 هزار 475 جوابدارن کي گرفتار ڪيو ويو. پوليس رپورٽ موجب آپريشن دوران 250 پوليس آفيسر ۽ اهلڪار شهيد ٿيا ۽ جوابدارن وٽان 575 ڪلوگرام ڌماڪيدار مادو هٿ ڪيو ويو. رپورٽ موجب پوليس جي ڪاررواين دوران 1171 جوابدار مارجي ويا، جن ۾ 841 ڌاڙيل، 282دهشتگرد، 38 اغوا ڪندڙ ۽ 10 ڀتا خور شامل هئا. ڪراچي آپريشن جي رپورٽ ۾ پوليس ڄاڻايو آهي ته گرفتار جوابدارن وٽان 17 آپگهاتي جيڪٽس به هٿ ڪيون ويون آهن. اجلاس دوران ڊي آءِ جي هيڊ ڪوارٽر پاران ٻڌايو ويو ته جاچ پوليس لاءِ ايس ايس پي جي اڪائونٽ ۾ فنڊز منتقل ڪيا ويا آهن، جنهن سان  جاچ ۾ سڌارا ايندا. آءِ جي سنڌ پوليس عملدارن کي رشيد گوڊيل تي حملي ۽ وڪيل امير حيدر شاهه جي قتل ۾ ملوٽ جوابدارن کي فوري طور گرفتار ڪرڻ ۽ ڪارڪردگي بهتر بڻائڻ جي هدايت ڪئي.

 

جماعما ريحام خلاف ميڊيا ۾ مهم پئي هلائي: سئوٽ جو الزام

لنڊن (اين اين آءِ) پاڪستان تحريڪ انصاف جي چيئرمين عمران خان جي گهرواري ريحام خان جي مائٽن الزام مڙهيو آهي ته عمران خان جي اڳوڻي زال جماعما ريحام خان خلاف ميڊيا مهم هلائي رهي آهي، جڏهن ته عمران خان انهن الزامن کي رد ڪيو آهي، خميس تي پي ٽي آءِ جي چيئرمين عمران خان برطانوي اخبار پاران ان حوالي ساايندڙ خبرن کانپوءِ ٽوئيٽ تي چيو آهي ته جماعما هميشه حمايت ڪئي آهي ۽ ان جي باري ۾ اها سوچ ته هو ريحام جي خلاف ڪا مهم هلائي رهي آهي ڪوڙ آهي، برطانوي اخبار ميل آن لائين پنهنجي رپورٽ چيو ته ريحام جي سوٽ جيڪو پنهنجو نالو ظاهر نه ڪرڻ تي ٻڌايو آهي ته جماعما ان جي سوٽ ريحام خلاف مهم هلائي رهي آهي ۽ هن دعويٰ ڪئي آهي ته جماعما ان شادي مان خوش نه آهي ۽ هوءَ ساڙ ڪري رهي آهي، اسان ڄاڻو ٿا ته جماعما ڇا ڪري رهي آهي، هن چيو ته عمران ۽ ريحام پنهنجي شادي شده زندگي ۾ خوش آهن ۽ ويجهڙائي ۾ ريحام هڪ انٽرويو ۾ پنهنجي مٿان مڙهيل الزامن جو جواب ڏيندي.