تازيون خبرون

Daily Archives: September 3, 2015

ڀارت اسان جي صبر ۽ برداشت کي ڪمزوري سمجهڻ جي غلطي نه ڪري: نواز شريف

باغ (مانيٽرنگ ڊيسڪ) وزير اعظم ميان نواز شريف چيو آهي ته ڀارت جون اڳرائي تي ٻڌل ڪارروائيون خطي جي امن جي راهه ۾ وڏي رنڊڪ آهن، پاڪستان دهشتگردي خلاف جنگ ۾ رُڌل آهي، جلد دهشتگردي جو خاتمو آڻي عالمي برادري جي امن جو تحفو ڏبو، قومي ايڪشن پلان تحت ملڪ ۾ فتنو ڦهلائيندڙ قوتن خلاف ڪارروائيون جاري آهن، ڪراچي جون حالتون بهتر ٿي رهيون آهن. آزاد ڪشمير جي ضلعي باغ ۾ مختلف ترقياتي منصوبن جي افتتاحي تقريب کي خطاب ڪندي وزير اعظم چيو ته پاڪستان ترقي لاءِ قائم ٿيل ملڪ آهي، جنهن ۾ دهشتگردي جي ناسور کي برداشت نه ڪيو ويندو. هن چيو ته پاڪستان نظرياتي ملڪ آهي ۽ اسان جڏهن به اقتدار ۾ آيا آهيون ته اسان جي ايجنڊا ملڪي ترقي کي زور وٺرائڻ رهي آهي. هن چيو ته ڀارت اسان جي صبر ۽ برداشت کي ڪمزوري سمجهڻ جي غلطي نه ڪري، ڀارت جون اڳرائي واريون ڪارروائيون خطي جي ترقي ۽ امن جي راهه ۾ وڏي رنڊڪ آهن. هن چيو ته دهشتگردي کي هر صورت ۾ ختم ڪيو ويندو ۽ دهشتگردن جو ساٿ ڏيندڙن کي به معاف نه ڪيو ويندو. نواز شريف چيو ته ڀارت جون اڳرائي واريون ڪارروائيون خطي جي امن لاءِ وڏو خطرو آهن، جلد دهشتگردي جو خاتمو آڻي عالمي برادري کي امن جو تحفو ڏنو ويندو. هن چيو ته سڄي ملڪ ۾ امن بحال ٿيڻ جي نتيجي ۾ سياحت کي هٿي ملي آهي. نواز شريف جو اهو به چوڻ هو ته ڪراچي جي ڏوهارين ۾ هٿ وجهڻ کان سندس حڪومت ڊڄڻ واري نه آهي. نواز شريف جو چوڻ هو ته ايندڙ ڪجهه سالن ۾ پاڪستان ۾ خطي جو ترقي يافته ملڪ ٿي ويندو. وزير اعظم ملڪ ۾ معاشي ترقي جي گراف کي ساراهيو ۽ چيو ته سڄي دنيا هاڻي پاڪستان جي معاشي ترقي جي تعريف ڪري رهي آهي. هن چيو ته پاڪستان جون دليون ڪشميري عوام سان گڏ ڌڙڪن ٿيون ۽ کين ڪنهن به صورت ۾ اڪيلو نه ڇڏيو ويندو. وزير اعظم ان موقعي تي آزاد ڪشمير جي ترقي تي ٻڌل ڪيترن ئي منصوبن جو پڻ اعلان ڪيو.

 

نواز ليگ سنڌ ۾ انتقامي ڪارروائيون پئي ڪري: بلاول ڀٽو زرداري

لاڙڪاڻو(بيورو) پي پي چيئرمين بلاول ڀٽو زرداري، وفاقي ادارن جي ڪارروائين تي افسوس جو اظهار ڪندي پارٽي اڳواڻن کي مڪاني چونڊن لاءِ تياريون تيز ڪرڻ جي هدايت ڪري ڇڏي، سندس چوڻ آهي ته مڪاني چونڊن ۾ پ پ ڪلين سوئيپ ڪري ڏيکاريندي. نئين ديري ۾ پي پي چيئرمين بلاول ڀٽو زرداري جي صدارت هيٺ لاڙڪاڻي ۽ قمبر شهدادڪوٽ ايگزيڪيوٽو ۽ ورڪنگ ڪميٽيز جو اجلاس ٿيو. اجلاس ۾ وڏي وزير سيد قائم علي شاهه، فريال ٽالپر، آغا سراج دراني ۽ ٻنهي ضلعن جي چونڊيل نمائندن شرڪت ڪئي، جڏهن ته ايم پي اي سردار خان چانڊئي شرڪت نه ڪئي. ان موقعي تي بلاول ڀٽو زرداري جو چوڻ هو ته نيب ۽ ايفآءِ اي جون سنڌ ۾ ڪارروايون صوبائي خودمختياري تي حملي برابر آهن. هن چيو ته نواز ليگ سنڌ ۾ انتقامي ڪارروايون ڪري رهي آهي، پر پيپلز پارٽي جا حوصلا ڪمزور نه ٿيندا. بلاول ڀٽو زرداري چيو ته سنڌ ۾مڪاني چونڊون پ پ لاءِ وڏو چئلينج آهن، ان ڪري ڪارڪن متحد ٿي تياريون تيز ڪن. هن چيو ته مڪاني چونڊن ۾ سرگرم ڪارڪنن کي ٽڪيٽون ڏنيون وينديون. بلاول ڀٽي زرداري جو وڌيڪ چوڻ هو ته پيپلز پارٽي ايندڙ مڪاني چونڊن ۾ ڪلين سويپ ڪندي. ٻئي طرف سنڌ جي اطلاعات واري سينيئر وزير نثار احمد کهڙو چيو آهي ته پاڪستان پيپلز پارٽيءَ جي چيئرمين بلاول ڀٽو زرداريءَ جي صدارت ۾ نئون ديرو هائوس ۾ ٿيل اجلاس ۾ مڪاني چونڊن ۾ ڀرپور تياريءَ سان حصو وٺڻ ۽ پارٽيءَ کي وڌيڪ مضبوط ڪرڻ لاءِ ڪارڪنن سان رابطو تيز ڪرڻ جو فيصلو ڪيو ويو آهي جڏهن ته سکر ڊويزن جي ورڪرز جو اجلاس اڄ خميس ڏينهن ۽ لاڙڪاڻي ڊويزن جي رهيل ضلعن جي پارٽي ورڪرن جو اجلاس 4 سيپٽيمبر تي نئون ديرو هائوس ۾ گهرائڻ جو فيصلو ڪيو ويو. اهڙن خيالن جو اظهار هن اربع ڏينهن اجلاس کان پوءِ نئون ديرو هائوس تي ميڊيا کي بريفنگ ڏيندي ڪيو. نثار احمد کهڙو چيو ته سنڌ حڪومت يا پيپلز پارٽي احتساب کان نه ٿي گهٻرائي ۽ نه ئي احتساب جي خلاف آهيون پر احتساب بنا فرق جي سڀني جو ٿيڻ گهرجي، جيڪڏهن احتساب ۽ ڪاروايون هڪطرفيون ٿينديون ته پوءِ برداشت ڪرڻ به ڄاڻون ٿا ۽ جدوجهد ڪرڻ به ڄاڻون ٿا. هن چيو ته پيپلز پارٽي هميشه کان سختيون برداشت ڪيون آهن ۽ پيپلز پارٽيءَ لاءِ هر ڏينهن مشڪلاتن جو هوندو آهي ۽ اسان کي مشڪلاتن سان منهن ڏين به ايندو آهي. نثار احمد کهڙو چيو آهي ته  پيپلز پارٽيءَ تي دهشتگرديءَ ۾ ملوث ڪرڻ جو تاثر ڏيڻ مناسب ناهي ۽ ڊاڪٽر عاصم تي دهشتگرديءَ جا الزام حيران ڪندڙ آهن. هن چيو ته صرف سنڌ کي نشانو ٺاهڻ بند ڪيو وڃي. هن چيو ته ڇا پنجاب حڪومت ۾ ان ڪري ڪاروائي نه پئي ٿئي ڇاڪاڻ جو پنجاب حڪومت وزيراعظم ميان نواز شريف جي ڀاءُ جي آهي. هن چيو ته ڇا واپڊا، پي آءِ اي سميت ٻين وفاقي ادارن ۾ ڪرپشن ناهي ۽ انهن ادارن جي خلاف ڇو نه ٿي ڪاروائي ڪئي وڃي. ڪاروائي بنا فرق جي ٿيڻ گهرجي. هن چيو ته ڪراچي ۾ ليند مافيا، ٽارگيٽ ڪلنگ ، ڀتي خوري ۽ دهشتگرديءَ جي خاتمي لاءِ آپريشن سڀني سياسي جماعتن جي اتفاق سان شروع ڪيو ويو جيڪو بنا فرق جي ٿيڻ گهرجي. هن چيو ته سنڌ ۾ صوبائي ادارن جي هوندي وفاقي ادارن جو بنا اجازت جي ڪاروايون صوبائي خودمختياريءَ جي خلاف آهن ۽ سنڌ کي انهن ادارن جي پاڻ مرادو نوٽيس تي ڪاروائي ڪرڻ  تي اعتراض آهي ۽ سنڌ جي خدشن جو انصاف سان جائزو ورتو وڃي. هن چيو ته جيڪڏهن ڪنهن تي ڪرپشن جا الزام آهن ته ان خلاف پهريان ثبوتن سميت آگاهه ڪيو وڃي. هن چيو ته ڊاڪٽر عاصم تي الزام هيا ته پهريان سامهون آندا وڃن ها ۽ کيس سادن ڪپڙن ۾ گرفتار ڪرڻ پڻ مناسب عمل نه هو ڇاڪاڻ ته سنڌ حڪومت پڻ پوليس جي سول ڊريس ۾ ڪاروايون کي پڻ غير قانوني قرار ڏئي چڪي آهي. هن چيو ته عمران خان ڀلي سنڌ جو دورو ڪري ان سان ڪو فرق نه ٿو پوي. هڪ سوال ته پيپلز پارٽي جنگ جي ڳالهه ڪري رهي آهي ؟ جنهن  جواب ۾ هن چيو ته خورشيد شاهه وضاحت ڪري چڪو آهي ته جنگ جو مطلب جدوجهد آهي ڇاڪاڻ ته پيپلز پارٽيءَ هميشه جدوجهد مان گذري آهي ۽ جدوجهد پيپلز پارٽيءَ لاءِ نيون نه آهن. هن چيو ته پارٽيءَ چيئرمين بلاول ڀٽوزرداريءَ جي صدارت ۾ لاڙڪاڻو، قمبر شهدادڪوٽ جي چونڊيل نمائندن ۽ پارٽي عهديدارن جي اجلاس ۾ پارٽيءَ کي وڌيڪ مضبوط ڪرڻ ۽ ڪارڪنن سان رابطي ۾ رهڻ تي پڻ زور ڏنو ويو.

 

پاڪستان ۽ چين آئرن برادر ملڪ آهن، دهشتگردن خلاف جاري آپريشن ضرب عضب کي انجام تائين پهچايو ويندو: صدر

بيجنگ (مانيٽرنگ ڊيسڪ) پاڪستان ۽ چين اقتصادي راهداري منصوبي کي تيزي سان مڪمل ڪرڻ واري عزم کي ورجايو آهي، صدر ممنون حسين چيو آهي ته پاڪستان ۽ چين آئرن برادر ملڪ آهن، دهشتگردن خلاف جاري آپريشن ضرب عضب کي انجام تائين پهچايو ويندو. چئن ڏينهن جي سرڪاري دوري تي چين پهتل صدر ممنون حسين بيجنگ ۾ چيني هم منصب شي جن پنگ سان ملاقات ڪئي. ملاقات دوران پاڪ چين لاڳاپن، ٻه طرفن معاملن ۽ علائقائي توڙي عالمي صورتحال تي خيالن جي ڏي وٺ ڪئي وئي. ان موقعي تي صدر ممنون حسين ٻـِي جنگ عظيم جي تقريبن ۾ شرڪت جي دعوت ڏيڻ تي چيني هم منصب جو ٿورو مڃيو. صدر ممنون حسين چيو ته پاڪستان ۽ چين آئرن برادر ملڪ آهن، ٻنهي ملڪن هميشه ڏکي وقت ۾ هڪٻئي جو ساٿ ڏنو آهي. صدر چيو ته فاشزم خلاف چيني عوام جون قربانيون ساراهه جوڳيون آهن، پاڪستان ۾ رهندڙ چيني شهرين جي حفاظت لاءِ قدم کڻي رهيا آهيون.  صدر ممنون حسين، چيني هم منصب جي پاڪستان دوري کي تاريخي قرار ڏيندي چيو ته اقتصادي راهداري منصوبي تي عمل جاري آهي، جنهن کي جلد مڪمل ڪيو ويندو. صدر وڌيڪ چيو ته آپريشن ضرب عضب ڪاميابي سان جاري آهي، جنهن کي انجام تائين پهچايو ويندو.  ملاقات دوران ان ڳالهه تي اتفاق ڪيو ويو ته پاڪ-چين اقتصادي راهداري منصوبي کي تيزي سان مڪمل ڪيو ويندو.

 

راولپنڊي: احتساب عدالت ۾ آصف علي زرداري جي ٻن نيب ريفرنس ۾ بريت واري درخواست تي نيب چيئرمين طلب

راولپنڊي (بيورو) راولپنڊي جي احتساب عدالت، اڳوڻي صدر آصف علي زرداري جي ٻن نيب ريفرنس ۾ بريت واري درخواست تي قومي احتساب بيورو جي اڳوڻي چيئرمين ۽ ڪيس جي اهم شاهد حسن وسيم اختر کي طلب ڪري ورتو آهي. راولپنڊي جي احتساب عدالت جي جج چوڌري بشير آصف علي زرداري جي ڪوٽيڪنا ۽ ايس جي ايس ريفرنس ۾ بريت واري درخواست تي ٻڌڻي ڪئي. وڪيل فاروق ايڇ نائيڪ چيو ته آصف علي زرداري خلاف نيب وٽ ڪو به اصل رڪارڊ موجود ناهي، سندس اصيل فوٽو ڪاپي رڪارڊ تي 11 سال جيل ڪاٽي چڪو آهي. احتساب عدالت جي جج ريمارڪس ڏنا ته رڪارڊ تصديق ٿيل موجود آهي، جنهن تي فاروق ايڇ نائيڪ چيو ته جنهن رڪارڊ جي تصديق ڪئي آهي، ان کي عدالت ۾ گهرايو وڃي. فاروق ايڇ نائيڪ چيو ته  اڳوڻي وزيراعظم بينظير ڀٽو کي ريفرنس ۾ نوٽيس جاري ڪيو ويو هو پر اها شهيد ٿي وئي، آصف علي زرداري کي ڪو به نوٽيس ناهي مليو.  احتساب عدالت جي جج ريمارڪس ڏنا ته نيب جو اڳوڻو ڊپٽي چيئرمين حسن وسيم اختر بيان رڪارڊ ڪرائڻ بعد تصديق ڪرڻ چاهي ٿو. فاروق ايڇ نائيڪ چيو ته نيب اڳوڻي ڊپٽي چيئرمين کي ناهي گهرايو، عدالت ڀلي ان کي گهرائي سگهي ٿي. عدالت، قومي احتساب بيورو جي اڳوڻي چيئرمين ۽ ڪيس جي اهم شاهد حسن وسيم اختر کي طلب ڪندي ٻڌڻي 9 سيپٽمبر تائين ملتوي ڪري ڇڏي

 

آرمي چيف جنرل راحيل شريف 5 دهشتگردن کي موت جي سزا جي منظوري ڏئي ڇڏي خيبر ايجنسي ۾ جيٽ جهازن جي بمباري، 15 دهشتگرد مارجي ويا

راولپنڊي/خيبرايجنسي (م.ڊ)  سپريم ڪورٽ پاران فوجي عدالتن جي ٺهڻ کي جائز قرار ڏيڻ جي فيصلي کانپوءِ امن جي دشمنن کي آخري انجام تائين پهچائڻ جي مهم ۾ تيزي اچي وئي آهي.فوجي عدالتن پاران وڌيڪ 5 دهشتگردن کي موت جي سزا ٻڌائڻ کانپوءِ آرمي چيف جنرل راحيل شريف فيصلي جي منظوري ڏئي ڇڏي آهي. دهشتگرد لاهور ۽ ڪراچي ۾ وڪيل، ڊي ايس پي جي قتل، سيڪيورٽي اهلڪارن تي حملن ۽ ڪوئٽه ۾ فرقيواراڻا تڪرار ۾ ملوث هئا.هڪ دهشتگرد کي عمر قيد جي سزا ٻڌائي وئي. پاڪ فوج جي عام لاڳاپن واري شعبي (آئي ايس پي آر) مطابق جن دهشتگردن کي موت جي سزا ٻڌائي وئي آهي ، انهن ۾ صابر شاهه عرف اڪرام الله لاهور ۾ارشد علي ايڊووڪيٽ جي قتل ۾ ملوث هو. اسد علي عرف بهائي جان جو تعلق پابندي مڙهيل تنظيم سان آهي، جيڪو بارود ٺاهڻ جو ماهر هو. دهشتگرد اسد ڪراچي جي  ڊي ايس پي ڪمال منگرو ۽ ٻين اهلڪارن  کي قتل ڪيو هو. موت جي سزا ملندڙ ٽيون دهشتگرد حافظ عثمان ڪوئٽه ۾ فرقيواراڻا قتل جي وارداتن ۾ ملوث آهي. بنون جيل مان ڀڄڻ ۾ ملوث طاهر به موت جي سزا ملندڙن ۾ شامل آهي.دهشتگرد فتح خان خاص ماڻهن ۽ شهرين کي قتل ڪرڻ جي وارداتن ۾ ملوث آهي. آئي ايس پي آر مطابق خيبر ايجنسي ۾ ڇوڪرين جي اسڪول ۽ پوليو ٽيمن تي حملي ۾ ملوث پابندي مڙهيل  تنظيم جو دهشتگرد قاري امين شاهه کي عمر قيد جي سزا ڏني وئي. ٻئي طرف خيبر ايجنسي ۾ سڪيورٽي فوسز جي هوائي ڪارروائي دوران وڌيڪ 15 دهشتگرد مارجي ويا ۽ پنج ڄڻا زخمي ٿي پيا جڏهن ته سندن 5 ٿاڪ به تباهه ڪيا ويا. پاڪ فوج جو اتر وزيرستان ۽ خيبر ايجنسي ۾ ضرب عضب آپريشن ڪاميابي سان جاري آهي. سڪيورٽي ذريعن موجب خيبر ايجنسي جي تيره ماٿري جي مختلف علائقن ۾ سڪيورٽي فورسز جيٽ جهازن سان دهشتگردن جي ٺڪاڻن تي بمباري ڪئي. بمباري جي نتيجي ۾ 15 دهشتگرد مارجي ويا ۽ 5 ڄڻا زخمي ٿي پيا، جڏهن ته سندن پنج ٿاڪ به تباهه ٿي ويا. سڪيورٽي ذريعن موجب مارجي ويل دهشتگردن جو تعلق پابندي مڙهيل تحريڪ طالبان ۽ لشڪر اسلام سان آهي.

 

 

ڀارت روس سان 48 ايم آءِ 17 هيليڪاپٽرن جي خريداري ۽ آڪاش ميزائل جي تياري جي منظوري ڏئي ڇڏي

نئين دهلي (اي پي پي) ڀارت روس سان 48 ايم آءِ 17 وي فائيو هيليڪاپٽرن جي خريداري ۽ زمين تان هوا تائين مار ڪندڙ ميزائل آڪاش جي تاري جي منظوري ڏئي ڇڏي آهي. ڪشمير ميڊيا سروس مطابق ڀارتي دفاعي وزير هيليڪاپٽرن جي خريداري ۽ ميزائل جي تياري جي منطوري ڏئي ڇڏي آهي. ڀارت اٽڪل هڪ ارب ڏهه ڪروڙ ڊالر ماليت جا 48 ايم آءِ 17 وي فائيو هيليڪاپٽر روس کان خريد ڪندو جڏهن ته آڪاش ميزائل جي تياري تي چار ارب 79 ڪروڙ رپين کان به وڌيڪ خرچ ٿيندو. ڀارت فرانس سان رافيل ويڙهاڪ جيٽ جهاز جي خريداري ۾ به دلچسپي رکي ٿو. ڊفينس ايڪوزيشن ڪائونسل دفاعي وزارت جا اهم فيصلا ڪندي آهي. اهو اجلاس نئين دهلي ۾ ٿيو جنهن ۾ رافيل جهازن جي قيمت طئي ڪندڙ ڪميٽي ڪائونسل کي بريفنگ ڏني.

 

ناهيد خان جي چوڻ تي بينظير ڀٽو گاڏي مان ٻاهر نڪتي: ڊرائيور جو بيان

راولپنڊي (بيورو) شهيد بينظير ڀٽو قتل ڪيس جي ٻڌڻي دوران بينظير ڀٽو جي ڊرائيور جاويد الرحمان بيان رڪارڊ ڪرائي ڇڏيو، ڊرائيور پنهنجي بيان ۾ چيو آهي ته ناهيد خان جي چوڻ تي بينظير ڀٽو گاڏي مان ٻاهر نڪتي، ڌماڪي کانپوءِ بيڪ اپ گاڏي ۽ پرسنل سيڪيورٽي غائب ٿي وئي. اڊيالا جيل راولپنڊي ۾ شهيد بينظير ڀٽو قتل ڪيس جي ٻڌڻي ٿي، جنهن دوران شهيد بينظير ڀٽو جي ڊرائيور جاويد الرحمان پيش ٿي پنهنجو بيان رڪارڊ ڪرايو.ڊرائيور جاويد الرحمان پنهنجي بيان ۾ چيو آهيته ناهيد خان جي چوڻ تي گاڏي جو سن روف کوليو ۽ ناهيد خان ئي بينظير ڀٽو کي گاڏي مان ٻاهر نڪرڻ جو چيو هو.هن چيو ته بينظير ڀٽو ڪارڪنن کي نعرن جو جواب ڏئي رهي هئي ته ڌماڪو ٿيو، ڌماڪي کانپوءِ بيڪ اپ گاڏي ۽ پرسنل سيڪيورٽي به غائب ٿي وئي. ڊرائيور پنهنجي بيان ۾ وڌيڪ چيو ته شهيد بينظير ڀٽو کي حڪومت طرفان جيڪا سيڪيورٽي ملڻ گهرجي ها، اها نه ڏني وئي.ڊرائيور موجب، شهيد بينظير بينظير کي مسلسل فون اچي رهيا هئا، کيس ڪامياب جلسي تي مبارڪون ملي رهيون هيون..ٻڌڻي دوران عدالت آمريڪي صحافي مارڪ سيگل جي وڊيو بيان رڪارڊ نه ڪرائڻ تي سخت ڪاوڙ جو اظهار ڪيو.عدالت آمريڪي صحافي مارڪ سيگل جي وڊيو بيان بابت پرڏيهي کاتي کان ايندڙ ٻڌڻي تي رپورٽ طلب ڪري ورتي آهي.عدالت شهيد بينظير ڀٽو قتل ڪيس ۾ پروفيسر اعظم يوسف نالي وڌيڪ هڪ شاهد کي پيش ٿيڻ لاءِ نوٽيس جاري ڪندي ٻڌڻي 14 سيپٽمبر تائين ملتوي ڪري ڇڏي.

 

روزانو 10 هزار ماڻهو غير قانوني طريقي سان ملڪ ۾ داخل ٿيندا ته ايڪشن پلان تي عمل ڪيئن ٿيندو؟: سپريم ڪورٽ

اسلام آباد (بيورو) سـُپريم ڪورٽ جي چيف جسٽس جواد ايس خواجه اين جي اوز جي رجسٽريشن ۽ فنڊنگ واري ڪيس ۾ ريمارڪس ڏيندي چيو آهي ته دهشتگردي ۽ ڪرپشن خلاف وڙهي رهيا آهيون پر 9 مهين کان قومي ايڪشن پلان تي عمل نه پيو ٿئي، روزانو 10 هزار ماڻهو غير قانوني طريقي سان ملڪ ۾ داخل ٿيندا ته ايڪشن پلان تي  عمل ڪيئن ٿيندو؟. چيف جسٽس جواد ايس خواجه جي سربراهي ۾ سپريم ڪورٽ جي ٽي رڪني بينچ اين جي اوز جي رجسٽريشن ۽ فنڊنگ بابت ڪيس جي ٻڌڻي ڪئي. ٻڌڻيءَ دوران ريمارڪس ڏيندي چيف جسٽس جواد ايس خواجه چيو ته سپريم ڪورٽ ۾ قومي ايڪشن پلان هر ڏهاڙي ڪو نئون ڪيس اچي ٿو. عدالت سوال ڪيو ته ڇا قومي ايڪشن پلان تي عملدرآمد ٿي رهيو آهي، جنهن تي ايڊيشنل اٽارني جنرل چيو ته حڪومت ايڪشن پلان تي عملدرآمد ڪري رهي آهي. چيف جسٽس ريمارڪس ڏنا ته قول ۽ فعل ۾ فرق آهي، 9 مهينا ٿيا آهن پر ايڪشن پلان تي عمل ٿيندي نظر نه چيو اچي، طور خم بارڊر تي ماڻهو پئسا ڏئي مقرريون ڪرائي رهيا آهن. چيف جسٽس ريمارڪس ڏنا ته جيڪڏهن بارڊرز ذريعي روزانو 15 کان 20 هزار ماڻهو غير قانوني طور سان داخل ٿيندا ته پوءِ ايڪشن پلان تي عملدرآمد ڪيئن ٿيندو. عدالت ريمارڪس ڏنا ته بارڊر ذريعي ايندڙ دهشتگرد آهن يا اسمگلر، ان حوالي سان ڪو به نظام موجود نه آهي.

 

اليڪشن ڪميشن ايندڙ چونڊن ۾ ڪوتاهي نه ڪرڻ جو يقين ڏياريو آهي: عمران خان

اسلام آباد (بيورو) تحريڪ انصاف جي چيئرمين عمران خان، چيف اليڪشن ڪمشنر سان ملاقات دوران اليڪشن ڪميشن جي ميمبرز جي استعيفائن وارو معاملو ورجائيندي چيو آهي ته انڪوائري ڪميشن جي رپورٽ تحت سڌرا آندا وڃن ۽ 2013 جي عام چونڊن جي جي بي ضابطين ۾ ملوث عملدارن خلاف به ڪارروائي ڪئي وڃي،  جسٽس رٽائرڊ سردار رضا جو چوڻ آهي ته انڪوائري ڪميشن جي رپورٽ تحت ذميوارن خلاف ڪارروائي ڪئي ويندي. اسلام آباد ۾ چيف اليڪشن ڪمشنر جسٽس رٽائرڊ سردار رضا خان سان تحريڪ انصاف جي چيئرمين عمران خان ملاقات ڪئي، جنهن دوران پي ٽي آءِ اڳواڻ جهانگير ۽  اسد عمر به شريڪ هئا. ملاقات دوران اليڪشن ڪميشن جي ميمبرز جي استعيفائن، پي ٽي آءِ کي مليل جوابي خط ۽ ننڍي چونڊ تي ڳالهيون ڪيون ويون. ذريعن موجب، ملاقات دوران تحريڪ انصاف جي چيئرمين عمران خان، اليڪشن ڪميشن جي ميمبرز جي استعيفائن وارو مطالبو ورجايو. عمران خان جو چوڻ هو ته 2013 وارين چونڊن جي ذميوارن خلاف ڪارروائي ڪئي وڃي ۽ انڪوائري ڪميشن جي رپورٽ تحت اليڪشن ڪميشن ۾ سڌارا آندا وڃن. ذريعن موجب، پي ٽي آءِ چيئرمين اين اي 122 ۽ 154 تي ننڍي چونڊ فوج يا رينجرز جي نگراني ۾ ڪرائڻ جو مطالبو ڪيو، جنهن تي چيف اليڪشن ڪمشنر کيس خاطري ڪرائي ته چونڊون شفاف نموني سان ڪرايون وينديون. ذريعن موجب، عمران خان اليڪشن ٽربيونل جو مدو نه وڌائڻ واري معاملي تي به خدشا ظاهر ڪيا، جنهن تي چيف اليڪشن ڪمشنر، اليڪشن عمران خان کي آگاهه ڪيو ته جون ۾ ئي اليڪشن ٽربيونل جي مدي ۾واڌ نه ڪرڻ جو فيصلو ڪيو هو، معاملي جو اين 122 ۽ 154 جي فيصلن سان تعلق ناهي. ذريعن موجب، چيف اليڪشن ڪمشنر عمران خان کي اها به خاطري ڪرائي ته انڪوائري ڪميشن جي رپورٽ تحت ذميوارن خلاف ڪارروائي ڪئي ويندي.

 

گرجا گهرن تي حملن ۾ ملوث 3 دهشتگردن سميت 11 ڏوهاري مارجي ويا

لاهور (بيورو) لاهور جي علائقي يوحنا آباد ۾ ٻن گرجا گهرن تي آپگهاتي حملن ۾ ملوث هجڻ جي الزام هيٺ گرفتار ٽن مبينه دهشتگردن سميت 11 ڏوهاري پنجاب جي مختلف علائقن ۾ پوليس جي مبينه مقابلن دوران مارجي ويا آهن. لاهور پوليس واهگه ويجهو باٽاپور ۾ ٽن دهشتگردن کي مبينه پوليس مقابلي ۾ مارڻ جي دعويٰ ڪئي آهي، جيڪي دهشتگرد لاهور پوليس سان مبينه مقابلي ۾ مارجي ويا آهن، انهن جي گرفتاري جو باضابطه اعلان به 4 آگسٽ تي ڪيو ويو هو. پوليس جو چوڻ آهي ته ٽنهي مبينه دهشتگردن کي سندن نشاندهي تي هٿيار هٿ ڪرڻ لاءِ بي آر بي ڪينال واري علائقي ۾ نيو ويو، جتان پوليس وڏي مقدار ۾ هٿيار ۽ آپگهاتي جيڪٽ هٿ ڪئي. پوليس اختيارين موجب ٽنهي دهشتگردن کي جڏهن ڇاپي کانپوءِ واپس آندو پئي ويو ته دهشتگردن جي ساٿين کين ڇڏائڻ لاءِ پوليس تي حملو ڪيو. پوليس موجب فائرنگ جي نتيجي ۾ ٽئي مبينه دهشتگرد حسن پنجابي، عمران ۽ شيخ قانون مارجي ويا، جڏهن ته هٿياربندن جي فائرنگ ۾ هڪ سب انسپيڪٽر به زخمي ٿي پيو. ياد رهي ته ٽنهي دهشتگردن کي يوحنا آباد جي گرجا گهرن تي آپگهاتي حملن ۾ ملوث هجڻ جي الزام هيٺ گرفتار ڪيو ويو هو، انهي حملي ۾ 15 ڄڻا مارجي ويا هئا.  سرگوڌا ۾ موٽر وي تي ڀيرا وٽ مبينا پوليس مقابلي ۾ 2 ڏوهاري مارجي ويا. پوليس موجب، ٻه ڦورو موٽر وي تي ڦر جي ارادي سان بيٺل هئا ته مقابلو ٿيو، فائرنگ جي ڏي وٺ ۾ ٻئي ڏوهاري ٿڏي تي مارجي ويا. پوليس موجب، مارجي ويل ڏوهاري پنجاب اسيمبلي ميمبر راڻا جميل جي اغوا سيمت مختلف وارداتن ۾ ملوث هئا. فيصل آباد جي گڙڪي ٿاڻي جي حد ۾ هٿياربندن ۽ پوليس وچ ۾ مقابلو ٿيو، جنهن ۾ فائرنگ جي نتيجي ۾ 3 ڏوهاري مارجي ويا. پوليس موجب،گرفتار جوابدارن جي نشاندهي تي ڪارروائي لاءِ وڃي رهيا هئاسين ته جوابدارن جي 4 کان وڌيڪ ساٿين حملو ڪيو، جنهن ۾ سندن ئي 3 ساٿي مارجي ويا. پوليس موجب، مارجي ويلن جا لاش اسپتال منتقل ڪيا ويا آهن، ضروري ڪارروائي بعد وارثن حوالي ڪيا ويندا. شيخوپوره جي فاروق آباد واري علائقي ۾ مبينا مقابلي ۾ پوليس ٻن ڏوهارين کي مارڻ جي دعويٰ ڪئي آهي. پوليس موجب، ڳجهي اطلاع تي جوابدارن جو گهيرو ڪيو ته مقابلو ٿيو، فائرنگ جي ڏي وٺ ۾ 2ڦورو ٿڏي تي مارجي ويا. بهاولپور ڀرسان به پوليس مقابلو ڪري هڪ مبينا ڏوهاري کي مارڻ جي دعويٰ ڪئي آهي. پوليس جو چوڻ آهي ته مارجي ويل ڏوهاري تي مختلف ٿاڻن تي ڪيس داخل هئا.