تازيون خبرون

Daily Archives: September 1, 2015

پ پ پاران حڪومت خلاف جنگ جو اعلان، انتقامي ڪارروائين جا نتيجا ڀيانڪ نڪرندا: زرداري

دبئي (مانيٽرنگ ڊيسڪ) پيپلزپارٽي جي شريڪ چيئرمين ۽ اڳوڻي صدر آصف علي زرداري چيو آهي ته وزيراعظم نوازشريف 90 جي ڏهائي جي سياست ٻيهر شروع ڪري ڇڏي آهي جڏهن ته انتقامي ڪارروائي جا ڀيانڪ نتيجا نڪرندا. اڳوڻي صدر آصف علي زرداري پنهنجي بيان ۾ حڪومت تي سخت تنقيد ڪندي چيو آهي ته سنڌ کي وزيراعظم جي حڪمن تحت مفلوج ڪيو پيو وڃي جڏهن ته نوازشريف دهشتگردن خلاف آپريشن متاثر ڪرڻ لاءِ قوم کي تقسيم ڪري رهيو آهي انهيءَ سلسلي ۾ اڳوڻي وزيراعظم يوسف رضا گيلاني ۽ مخدوم امين فهيم جا گرفتاري وارنٽ جاري ڪيا ويا جڏهن ته مخدوم امين فهيم بيمار آهي، پهريان قاسم ضيا کي گرفتار ڪيو ويو ۽ هاڻي ڊاڪٽر عاصم کي گرفتار ڪيو ويو آهي. هن چيو ته پيپلزپارٽي جمهوريت کي 2013 جي چونڊن کي قبول ڪيو، عام چونڊون آر اوز جون چونڊون هيون جنهن بابت ٽربيونلز فيصلو پڻ ڏنو آهي. پيپلزپارٽي جي شريڪ چيئرمين جو چوڻ هو ته اسان جو دشمن هٿين خالي شهرين تي گولا وسائي کين شهيد ڪري رهيو آهي ۽ پاڪ فوج دهشتگردن خلاف فيصلائتي جنگ وڙهي رهي آهي جڏهن ته سڄي قوم دهشتگردن خلاف جنگ ۾ پاڪ فوج سان ڪُلهو ڪُلهي ۾ ملائي بيٺل آهي. لڳي ٿو ته نوازشريف ماضي مان ڪوبه سبق ناهي سکيو. احتساب ڪرڻو آهي ته سڀ کان پهريان وفاقي وزير جو ڪريو جنهن شريف ڀائرن لاءِ مني لانڊرنگ جو اعتراف ڪيو. نوازشريف ڀارت جي اکين ۾ اکيون وجهڻ بجاءِ سياسي مخالفن کي انتقام جو نشانو بڻائي رهيو آهي. يوسف رضا گيلاني ۽ مخدوم امين فهيم جا گرفتاري وارنٽ جاري ڪيا ۽ قاسم ضيا، سينيٽر بنگش جي پٽ ۽ ڊاڪٽر عاصم کي گرفتار ڪيو ويو جڏهن ته چيف سيڪريٽري سنڌ ۽ ٻيا سيڪريٽري ضمانتن تي آهن اُهو سڀ انتقامي سياست ناهي ته ٻيو ڇا آهي؟ رانا مشهود جي مان صاحبان لاءِ پئسا وٺندي ويڊيو منظر عام تي اچي چڪي آهي پر اُن کي گرفتار نه ڪيو ويو. انتقامي سياست جا ڀيانڪ نتيجا نڪرندا. سنڌ حڪومت کي وزيراعظم هائوس جي حڪمن تي مفلوج ڪيو پيو وڃي. اڳوڻي صدر جو چوڻ هو ته ماڊل ٽائون سانحي ۾ 14 ماڻهن کي شهيد ڪندڙ دهشتگرد ناهن؟ کين ڇو نٿو پڪڙيو وڃي. جسس نجفي ڪميشن جي رپورٽ منظر عام تي آڻي ذميوارن کي گرفتار ڪيو وڃي. قوم کي خبر آهي ته پنهنجي سزا جي معافي لاءِ درخواست ڏيڻ جو اعزاز رڳو نوازشريف کي حاصل آهي اسين معافيو وٺـي جدي وڃڻ وارا ناهيون. هن چيو ته پيپلزپارٽيءَ سبب اڄ نوازشريف وزيراعظم آهي، ٽيون ڀيرو وزيراعظم ۽ وزيراعلي بڻجڻ تي پابندي کليل دل سان ختم ڪئي.

 

حڪومت انتقامي سياست نه پئي ڪري، نه وري ڪندي: پرويز رشيد

اسلام آباد (بيورو) وفاقي حڪومت اڳوڻي صدر آصف زرداري جي بيان کي غلط فهمي قرار ڏئي ڇڏيو، وفاقي وزير پرويز رشيد چيو آهي ته حڪومت انتقامي سياست نه ڪئي آهي نه ڪرڻ چاهي ٿي نه وري ڪندي.پيپلز پارٽي جي ڪو چيئرمين آصف زرداري جي بيان جي ردعمل ۾ اسلام آباد ۾ پريس ڪانفرنس ڪندي وفاقي وزير پرويز رشيد چيو ته بينظير ڀٽو ۽ نواز شريف چارٽر آف ڊيمو ڪريسي ذريعي 90 واري سياست کي هميشه لاءِ دفن کي ڪري ڇڏيو هو، هاڻي ڪڏهن به 90 واري نواز شريف چارٽر آف ڊيموڪريسي تي اڄ تائين عملدر آمد ڪري رهيو آهي.وفاقي وزير چيو ته نواز ليگ اڳوڻي صدر آصفزرداري جو احترام ڪري ٿي، آصف زرداري کي غلط اطلاع ڏني وئي آهي، آصف زرداري سرگرم سياستدان ناهي جيڪو ان جي خلاف انتقام ڪيو وڃي..پرويز رشيد چيو ته نوازليگ ڪنهن جو ڇو انتقام ڪندي، وقت ثابت ڪندو ته نواز شريف جي ڊڪشنري ۾ انتقام جو لفظ ناهي، حڪومت انتقامي سياست نه ڪئي آهي نه ڪرڻ چاهي ٿي نه وري ڪندي.وفاقي وزير چيو ته هر ڪيس عدالت وٽ وڃي ٿو، ڪنهن کي سزا ڏيڻ يا وري سزا کي ختم ڪرڻ حڪومت جو اختيار ناهي..پرويز رشيد چيو ته فوجي قياد ت جي فيصلي تي ضرب عضب آپريشن شروع ڪيو، هو سڀ فوج سان گڏ آهن، پاڪ فوج کي سڄي قوم جي حمايت حاصل آهي.وفاقي وزير چيو ته پاڪستان ۾ عدليه سميت سمورا ادارا مضبو ٿي چڪا آهن 6 مهينا گار گند جي سياست کي برادشت ڪيو آصف علي زرداري غلط فهمي جلد ختم ٿي ويندي يا کيس غلفط فهمي پيدا ي آهي ملڪ ابنتيامي ڪارواني وپارن زم،انو ختم ٿي ويو آهي ڇو ته ادارا مضبوط ٿي وياآهن وزيراعظم نواز شريف ڊاڪٽر عاصم حسين بابت رپورٽ طلب ڪئي آهي، نواليگ حڪومت کي ڪنهن به خلاف ڪيس داخل ناهن ڪياڪراچي ۾ گرفتار ماڻهن تي ڏوهه ثابت نه ٿيو ته اهي آزاد ٿي ويندا 90 واري سياد ٻيهر ڪڏهن زنده نه ٿيندي ڪراچي ڪنهن ڪجهه ڪيو هوندو اهوعدالت ۾ويندو.

 

ادارن کي ڌمڪيون افسوس جوڳو عمل آهي، هر فيصلو قانون جي دائري ۾ رهي ڪنداسين: نواز شريف

اسلام آباد(بيورو) وزيراعظم نواز شريف سان وفاقي وزير خواجا سعد رفيق ملاقات ڪري ملڪ جي سياسي صورتحال تي ڳالهيون ڪيون آهن، وزيراعظم جو چوڻ آهي ته عوام جي عدالت ۾ پهرين به سرخرو ٿياسين ۽ هاڻ به ٿينداسين. ذريعن مطابق ريلوي واري  وفاقي وزير خواجا سعد  رفيق پي ايم هائوس ۾ وزيراعظم نواز شريف سان ملاقات ڪئي، جنهن دوران اليڪشن ٽربيونلن جي فيصلن ۽ ننڍي چونڊن جي حوالي سان ڳالهه ٻولهه ڪئي وئي،ملاقات ۾ اين اي 125 جي حوالي سان معاملا پڻ غور هيٺ آيا، ذريعن مطابق خواجا سعد رفيق سپريم ڪورٽ ۾ داخل ڪيل اپيل واپس وٺي اين اي125 تان ننڍي چونڊ وڙهڻ جو خواهشمند آهي، ان موقعي تي وزيراعظم نواز شريف جو چوڻ هو ته احتجاجي سياست ڪندڙن چونڊ نتيجا قبولڻ بدران ڌانڌلي ۽ داٻي کان ڪم ورتو، سندس چوڻ هو ته عوام کي خبر آهي ته خوشحالي ۽ ترقي جي رستي ۾ ڪير رنڊڪون وجهي رهيو آهي، نواز شريف چيو ته ادارن کي ڌمڪيون ڏيڻ افسوس جوڳو عمل آهي، اسان هر فيصلو قانون جي دائري ۾ رهي ڪنداسين.

 

ايف آءِ اي اجازت کانسواءِ ڇاپا هڻي آفيسرن کي حراسان ڪري رهيو آهي: قائم علي شاهه

ڪراچي (اسٽاف رپورٽر) وفاقي وزير عبدالقادر بلوچ وڏي وزير سيد قائم علي شاهه سان ملاقات ڪري وزيراعظم نواز شريف جو پيغام پهچايو آهي، قائم علي شاهه سنڌ ۾ نيب ۽ ايف آءِ اي جي ڪاررواين تي شڪايتن جا دفتر کولي ڇڏيا، قائم علي شاهه چيو آهي ته ايف آءِ اي اجازت کانسواءِ ڇاپا هڻي آفيسرن کي حراسان ڪري رهيو آهي. وزير اعليٰ هائوس ڪراچي ۾ وفاقي وزير عبدالقادر بلوچ وزير اعظم نواز شريف جي هدايتن تي وڏي وزير سيد قائم علي شاهه سان ملاقات ڪئي.ملاقات ۾ وڏي وزير طرفان سنڌ ۾ هلندڙ نيب ڪارروائين سياسي اڳواڻن جي گهرن تي رينجرز جي ڇاپن، ڊاڪٽر عاصم جي گرفتاري سميت صوبي ۾ امن امان جي صورتحال بابت وفاقي وزير ڊاڪٽر قادر بلوچ کي آگاهه ڪيو.وڏي وزير سيد قائم علي شاهه چيو آهي ته ايف آءِ ۽ ٻيا وفاقي ادار بنا اجازت جي آفيسن تي ڇاپا هڻي آفيسرن کي حراسان ڪري رهيا آهن، جنهن سبب آفيسر بهتر نموني سان پنهنجون خدمتون سرانجام نه ڏئي رهيا آهن، جيڪو سلسلو بند ٿيڻ گهرجي.ان موقعي تي وفاقي وزير عبدالقادر بلوچ وڏي وزير کي يقين ڏياريو ته هو سمورن خدشن تي سنجيدگي سان غور ڪندا ۽ وزيراعظم کي به هو خدشن بابت آگاهه ڪندو.

 

سـُپريم ڪورٽ، پاران وفاقي حڪومت کي پرڏيهي فون ڪالز بابت پاليسي ۽ افغان سمز جو رڪارڊ پيش ڪرڻ جو حڪم

اسلام آباد (بيورو) سـُپريم ڪورٽ، غير قانوني پرڏيهي فون ڪالز واري ڪيس ۾  وفاقي حڪومت کان پرڏيهي فون ڪالز بابت پاليسي ۽ افغان سمز جو رڪارڊ  پيش ڪرڻ جو حڪم ڏئي ڇڏيو آهي، چيف جسٽس ريمارڪس ڏنا آهن ته گري ٽريفڪنگ سبب سڀ کان وڌيڪ سمنڊ پار پاڪستاني متاثر ٿين ٿا. چيف جسٽس جواد ايس خواجه جـِي سربراهي ۾ سپريم جي ٽـَي رڪني بينچ گري ٽريفڪنگ بابت ڪيس جي ٻڌڻي ڪئي. ٻڌڻيءَ دوران ريمارڪس ڏيندي جسٽس دوست محمد کوسا چيو ته آمريڪا ۽ ڪينيڊا لاءِ ڪالز سستيون ۽ وچ اوڀر لاءِ مهانگيون آهن.  جسٽس دوست محمد کوسا ريمارڪس ۾ چيو ته ٻين ملڪن لاءِ 5 رپيا ۽ عرب ملڪن لاءِ 250 رپيا ڪال  هوندي آهي، وچ اوڀر ۾ پاڪستاني پورهيت گهڻا ڪم ڪن پيا، ڇا ان ڪري ڪال مهانگي آهي؟. چيف جسٽس جواد ايس خواجه ريمارڪس ڏنا ته 80 لک پاڪستاني اربين ڊالر موڪليندا آهن، غير قانوني پرڏيهي ڪالز جو سڌيءَ ريت نقصان سمنڊ پار پاڪستانين کي ئي ٿيندو آهي. عدالت،  پي ٽي اي کي حڪم ڏنو آهي ته پرڏيهي فون ڪالز بابت حڪومتي پاليسي پيش ڪئي وڃي. چيف جسٽس پي ٽي اي چيئرمين کي اهو به حڪم ڏنو آهي ته افغان سمن جي انگ اکرن بابت به عدالت کي ٻڌايو وڃي، جڏهن ته ان حوالي سان پي ٽي اي چيئرمين کي معاونت جي به هدايت ڪئي وئي آهي.

 

جيڪڏهن احتساب ۽ ڪاروايون هڪ طرفيون ٿينديون ته پوءِ برداشت ڪرڻ به ڄاڻون ٿا ۽ جدوجهد ڪرڻ به ڄاڻون ٿا: نثار کهڙو

ڪراچي (اسٽاف رپورٽر) سنڌ جي اطلاعات واري سينيئر وزير نثار احمد کهڙو چيو آهي ته  سنڌ حڪومت احتساب کان نه ٿي گهٻرائي ۽ نه ئي احتساب جي خلاف آهيون پر احتساب بنا فرق جي سڀني جي خلاف ٿيڻ گهرجي، جيڪڏهناحتساب ۽ ڪاروايون هڪطرفيون ٿينديون ته پوءِ برداشت ڪرڻ به ڄاڻون ٿا ۽ جدوجهد ڪرڻ به ڄاڻون ٿا. اهڙن خيالن جو اظهار هن سومر ڏينهن ڪائونسل آف نيوزپيپرز ايڊيٽرز سان ميٽ دي ايڊيٽرس جي موقعي تي خطاب ۽ سوالن جا جواب ڏيندي ڪيو. ان موقعي تي سي پي اين جي قائم مقام صدر الياس شاڪر، سڪريٽري جنرل ڊاڪٽر جبار خٽڪ، قاضي اسد عابد، عامر محمود , سميت ٻيا پڻ موجود هيا. نثار احمد کهڙو چيو ته سنڌ ۾ ٻوڏ اچي ٿي ته ڪجهه ڌرين کي ڪالاباغ ڊيم اڏڻ ياد اچي ٿو ۽ ڪرپشن جي ڳالهه اچي ٿي ته پوءِ صرف اهو تاثر ڏنو پيو وڃي ته ڪرپشن صرف سنڌ ۾ آهي جيڪو تاثر غلط آهي. هن چيو ته ڇا اهڙو تاثر ڏيندڙن کي پنجاب، بلوچستان ۽ ڪي پي ڪي ۾ ڪرپشن ڇو نه ٿي نظر اچي جو صرف سنڌ کي نشانو ٺاهيو پيو وڃي ڇا سنڌ کي پاڪستان ٺاهڻ جي ڏوهه جي سزا ڏني پئي وڃي. هن چيو ته ڇا پنجاب حڪومت ۾ ان ڪري ڪاروائي نه پئي ٿئي ڇاڪاڻ جو پنجاب حڪومت وزيراعظم ميان نواز شريف جي ڀاءُ جي آهي. هن چيو ته ڇا واپڊا، پي آءِ اي سميت ٻين وفاقي ادارن ۾ ڪرپشن ناهي ۽ انهن ادارن جي خلاف ڇو نه ٿي ڪاروائي ڪئي وڃي. نثار احمد کهڙو چيو ته ايف آءِ اي ۽ نيب وفاقي ادارن جي خلاف ڪاروائي ڪرڻ لاءِ آهن پر شيڊول فورٿ ۾ ترميم ڪرن کان پوءِ کين هر هنڌ ڪاروايون ڪري رهيا آهن پر کين عدالت وانگر بنا اجازت پاڻمرادو نوٽيس تي ڪاروايون جا اختيار نه آهن جو هو صوبي جي مرضي بنا اهڙيون ڪاروايون ڪري رهيا آهن ۽ انهن ادارن جي پاڻمرادو ڪاروايون تي سنڌ کي اعتراض آهي. هن چيو ته سنڌ ۾ رينجرز سالن کان آهي ۽ سالن کان هن شهر جو حالتون خراب رهيون جن حالتن کي بهتر ڪرڻ ۽ امن امان جي قيام لاءِ جمهوري ادارن جي هوندي فوجي عدالتن کي پڻ تسليم ڪيو آهي ۽ اسين ادارن جي آئين ۽ قانون جي توازن جي حق ۾ آهيون. هن چيو ته سڀني مسئلن جو مستقل حل جمهوريت ۾ آهي ۽ ملڪ ۾ جمهوريت اڳتي هلندي ته عوام جو جمهوريت ۽ رياست ۾ اعتماد وڌندو. هن چيو ته سنڌ حڪومت پاران رائيٽ آف انفارميشن جو قانون آڻڻ لاءِ ڊرافٽ تيار ڪيو پيو وڃي جنهن تي سي پي اين اي کان پڻ تجويزون ورتيون وينديون جنهن کان پوءِ منظوريءَ لاءِ سنڌ ڪابينا ۽ پوءِ سنڌ اسيمبليءَ ۾ پيش ڪيو ويندو. هن چيو ته اشتهارن ۾ ميرٽ جو خيال رکڻ سان گڏوگڏ ننڍين اخبارن جي ادارن کي پڻ گڏ کڻي هلنداسين جن جا حقيقي طور تي ادارا موجود آهن ته جيئن ڪو به ادارو بند نه ٿي سگهي.

 

حڪومت پاران تيل اگهن ۾ 3 روپيا گهٽتائيءَ جو اعلان

اسلام آباد(بيورو) حڪومت تيل جي عالمي مارڪيٽ ۾ پيٽروليم جي شين ۾ گهٽتائي کانپوءِ حڪومت پاڪستان به تيل واري شين ۾ لاٿ آڻي ڇڏي آهي جڏهن ته اهو به ٻڌايو پيو وڃي ته وفاقي حڪومت ڏهه عرب ڊالرن جو اضافي ٽيڪس مڙهي ڇڏيو آهي جنهن کنپوءِ پيٽرول۽ هاءِ اسپيڊ ڊيزل صرف 3رپين تائين سستي ڪرڻجو اعلان ڪيو آهي،اوڳرا پاران موڪليل سمري جي مطابق هاءِ اسپيڊ ڊيزل جي قيمت ۾ 7رپيا 60 پئسا پيٽرول جي قيمت ۾ 6رپيا 14پئسا في ليٽر سستو ٿيڻ جو امڪان هيو پر صرف 3رپيا سستو ڪيو ويو،3رپيا گهٽتائي کانپوءِ هاءِ اسپيڊ ڊيزل جي نئين قيمت 82 رپيا 05پسئسا في ليٽڙ، جڏهن ته پيٽرول جي نئين قيمت 73رپيا 76 پئسا ٿي وئي آهي،گذريل مهيني به پئترل جي قيمت ۾ هڪ رپيو 3 پئسا مٽي جي تيل قيمت ۾ 4رپيه 83پئسا  لائيٽ ڊِيزل جي قيمت ۾ 4رپيا 92 پئسا ۽ هاءِ اسپيڊ ڊيزل جي قيمت ۾ 2 رپيه 6پئسا في ليٽر سستائي جو اعلان ڪيو هو   ياد رهي ته ملڪ جي اندر هاءِ اسپيڊ ڊيزل ۽ پيٽرول سان تيل سب کان وڌيڪ استعمال  ڪيو ويندو آهي.

 

سياسي پارٽين جو مطالبو رد، اليڪشن ڪميشن جي ميمبرن پاران استعيفائون نه ڏيڻ جو فيصلو

اسلام آباد (بيورو) اليڪشن ڪميشن جي ميمبرز، هڪ ڀيرو ٻيهر سياسي پارٽين جي مطالبن کي رد ڪندي استعيفائون نه ڏيڻ جو فيصلو ڪري ورتو آهي، ان حوالي سان ڪجهه دير ۾ ميڊيا کي بريفنگ ڏيڻ جو به امڪان آهي. ذريعن موجب، اليڪشن ڪميشن جي چئني ميمبرز پاران پيپلزپارٽي ۽ تحريڪ انصاف جي مطالبن کانپوءِ استيعفائن واري معاملي تي مشاورت ڪئي وئي. ذريعن موجب، مشاورت ۾ سنڌ جي ميمبر جسٽس رٽائرڊ روشن عيساڻي، پنجاب جي رياض ڪياني، خيبرپختونخواهه جي شهزاد اڪبر ۽ بلوچستان پاران جسٽس رٽائرڊ فضل الرحمان شرڪت ڪئي. ذريعن موجب، مشاورت بعد اليڪشن ڪميشن جي ميمبرز پاران اصولي تي عهدن تان استعيفائون نه ڏيڻ جو فيصلو ڪيو ويو. اليڪشن ڪميشن جي ميمبرز جو چوڻ آهي ته ڪنهن جي دٻاءَ تحت هـُو استعيفائون نه ٿيندا. ذريعن جو چوڻ آهي ته ميمبرز ان حوالي سان ڪجهه دير ۾ ميڊيا کي بريفنگ پڻ ڏئي رهيا آهن.

 

لاهور هاءِ ڪورٽ پاران ايم ڪيو ايم سربراهه الطاف حسين جي تقريرن تي پابندي جو حڪم

لاهور (بيورو) لاهور هاءِ ڪورٽ، ايم ڪيو ايم سربراهه الطاف حسين جي لائيو تقريرن تي پابندي جو حڪم ڏيندي وزيراعظم جي پرنسپل سيڪريٽري، گهرو کاتي ۽ پيمرا کي نوٽيس جاري ڪري ڇڏيا آهن، جڏهن ته عدالت الطاف حسين کي وڪيل ذريعي جواب داخل ڪرڻ جو حڪم ڏنو آهي. جسٽس مظاهر علي اڪبر جي سربراهي ۾ جسٽس مظهر اقبال سنڌو ۽ جسٽس اِرم سجاد گل تي ٻڌل لاهور هاءِ ڪورٽ جي فل ڪورٽ بينچ ايم ڪيو ايم سربراهه الطاف حسين ۽ رابطه ڪميٽي جي سڪيورٽي ادارن خلاف  درخواستن تي ٻڌڻي ڪئي. درخواستگذار ايڊووڪيٽ آفتاب بيرڪ، مقصود اعواڻ ۽ ٻين جي وڪيلن موقف اختيار ڪيو ته ايم ڪيو ايم سربراهه الطاف حسين سڪيورٽي ادارن ڳالهائي ادارن کي اسڪينڊلائيز ڪرڻ جي ڪوشش ڪئي. وڪيلن چيو ته الطاف حسين پنهنجي تقريرن ۾ پرڏيهي ملڪن کي سڌيءَ ريت مداخلت جو چيو، تنهنڪري ان خلاف آرٽيڪل 6 تحت غداري جو ڪيس هلايو وڃي. درخواستگذار جي وڪيل چيو ته سڪيورٽي ادارن خلاف ڳالهائڻ تي پيمرا الطاف حسين جي لائيو تقريرن تي پابندي لڳائي آهي پر ان حوالي سان واضح نوٽيفڪيشن جاري ناهي ڪيو ويو. عدالت، الطاف حسين جي لائيو تقريرن تي پابندي لڳائڻ جو حڪم ڏيندي چيو ته ايندڙ حڪم تائين الطاف حسين جي لائيو تقريرن تي پابندي  برقرار رکي وڃي. لاهور هاءِ ڪورٽ، وزيراعظم جي پرنسپل سيڪريٽري، گهرو کاتي ۽ پيمرا کي به نوٽيس جاري ڪري ڇڏيا آهن. عدالت، گهرو کاتي کي هدايت ڪئي آهي ته الطاف حسين جي پاڪستاني ۽ برطانوي شهريت بابت به ايندڙ ٻڌڻي تي تفصيل پيش ڪيا وڃن، جڏهن ته لاهور هاءِ ڪورٽ الطاف حسين کي به وڪيل ذريعي ايندڙ ٻڌڻي تي جواب داخل ڪرڻ جو حڪم ڏنو آهي. لاهور هاءِ ڪورٽ ۾ ڪيس جي ايندڙ ٻڌڻي 7 سيپٽمبر تي ٿيندي.

 

اڳوڻي وفاقي وزير ڊاڪٽر عاصم حسين کان جاچ ۾ اهم اڳڀرائي، پنهنجي ڪرپشن جا راز کولي ڇڏيا

ڪراچي (اسٽاف رپورٽر) سنڌ هاير ايجوڪيشن جي چيئرمين ۽ اڳوڻي وفاقي وزير ڊاڪٽر عاصم حسين کان جاچ ۾ اهم اڳڀرائي ٿي آهي، ڊاڪٽر عاصم پنهنجي ڪرپشن جا راز کولي ڇڏيا آهن، ذريعن موجب ڊاڪٽر عاصم جي انڪشافکانپوءِ ان جي خلاف 7 ريفرنس نيب کي موڪلڻ جو  فيصلو ڪيو ويو آهي، ذريعن مطابق ضياءُ الدين اسپتال ڪلنفٽن تي ڇاپي دوران گرفتار ٿيل مينٽيننس انچارج محفوظ ڪرپشن سميت اهم ٻين دستاويزن جي منتقلي ڪندي پڪڙيو ويو، قانون لاڳو ڪندڙ ادارن ڳجهي اطلاع تي محفوظ کي گرفتار ڪر ي ڊاڪٽر عاصم جي ڪرپشن بابت اهم دستاويز قبضي ۾ وٺي ڇڏيا، ذريعن جو چوڻ آهي ته محفوظ جي نشاندهي تي وڌيڪ گرفتاريون به ٿي سگهن ٿيون. شعيب وارثي جي بابت خبر پئي آهي ته ان سرڪاري رڪارڊ ۾ ڊاڪٽر عاصم جي ملي ڀڳت سان پنهنجي عمر 4 سال گهٽ ڪرائي، عمر گهٽ ٿيڻ کانپوءِ شعيب وارثي ايس ايس جي سي ۾ ترقي حاصل ڪري صرف پگهارن جي مد ۾ 15 ڪروڙ رپيا ڪرپشن ڪيا.