تازيون خبرون

Monthly Archives: September 2015

پاڪستان امن مشن ۾ وڏو ڀاڱي ڀائيوار آهي: نواز شريف

نيويارڪ (مانيٽرنگ ڊيسڪ) وزيراعظم نواز شريف چيو آهي ته گڏيل قومن جي امن مشن ۾  شامل پاڪستاني دنيا جي ڏکي محاذن تي خدمتون انجام ڏئي رهيا آهن،  پاڪستان  سڄي دنيا جي امن لاءِ گڏيل قومن جي امن مشن سان سهڪار جاري رکندو ايندو. نيويارڪ ۾ امن سربراهه ڪانفرنس کي خطاب ڪندي وزيراعظم نواز شريف چيو ته امن مشن عالمي امن ۽ دنيا جي سلامتيءَ جو ضامن آهي، امن جي بحالي ڪنهن هڪ نه سڀني ملڪن جي گڏيل ذميواري آهي، ان ڪري بنيادي اصولن کي نظر ۾ رکڻو پوندو. وزيراعظم نواز شريف چيو ته پاڪستان امن مشن ۾ وڏو ڀاڱي ڀائيوار آهي ۽ پاڪستان امن مشن جي رستن جو تعين ڪرڻ ۾سڀني سڀني کان اڳيان آهي. وزيراعظم چيو ته جهڙي طرح پاڪستان امن مشن لاءِ بهترين ڪردار ادا ڪري رهيو آهي، اهڙي طرح پاڪستان گڏيل قومن جي امن مشن ۾مددگار بڻجندو رهندو. وزيراعظم نواز شريف چيو ته گڏيل قومن  جي اعليٰ سطحي پينل ۽ سيڪريٽري جنرل جون رپورٽس اهم آهن ۽ اهي رپورٽس امن جي قيام ۾ پيش ايندڙ چئلينجز کي منهن ڏيڻ ۾ مددگار ثابت ٿينديون. وزيراعظم نواز شريف چيو ته گڏيل قومن جي امن مشن ۾ شامل پاڪستان جا امن دستا دنيا جي ڏکين محاذن تي خدمتون انجام ڏئي رهيا آهن، نيڪ ڪم لاءِ جان جي قرباني ڏيندڙن کي ڀيٽا پيش ڪيان ٿو.  وزيراعظم نواز شريف چيو ته پاڪستان امن جٿن جي مختلف ملڪن ۾ تقسيم لاءِ مشاورت جي تجويز ڏني آهي، امن مشن جي اثرائتي ڪردار لاءِ سمورا وسيلا استعمال ڪرڻ جي ضرورت آهي.

 

آپريشن ضرب عضب کي نتيجا ڏيندڙ بڻائڻ لاءِ پاڪ-افغان سرحد کي محفوظ بڻائڻو پوندو: راحيل شريف

راولپنڊي (بيورو) آرمي چيف جنرل راحيل شريف چيو آهي ته افغانستان ۾ بدامني سبب پاڪستان ۾ سماجي ۽ معاشرتي اثر پئجي رهيا آهن، آپريشن ضرب عضب کي نتيجا ڏيندڙ بڻائڻ لاءِ پاڪ-افغان سرحد کي محفوظ بڻائڻو پوندو. پاڪ فوج جي ترجمان اداري آءِ ايس پي آر طرفان جاري ڪيل  بيان  موجب آرمي چيف جنرل راحيل شريف جرمني جي شهر ميونخ ۾ سائوٿ ايشيا سينٽرل سيڪيورٽي ڪانفرنس ۾ شرڪت ڪئي. آءِ ايس پي آر موجب ڪانفرنس ۾ افغانستان ۾ بدامني سان خطي تي پوندڙ اثرن جو جائزو ورتو ويو، جنهن ۾ آرمي چيف افغانستان ۾ عدم استحڪام جي پاڪستان تي پوندڙن اثرن کان آگاهه ڪيو. آءِ ايس پيآر موجب آرمي چيف جنرل راحيل شريف ڪانفرنس ۾ شريڪ ماڻهن کي پاڪستان ۾ امن امان جي قيام لاءِ ڪوششن کان آگاهه ڪيو. آرمي چيف جنرل راحيل شريف چيو ته پرامن افغانستان سان خطي جي سمورن ملڪن وچ ۾ رابطا وڌندا، جنهن لاءِ سمورين رڪاوٽن باوجود افغان مصالحتي عمل شروع ٿيڻ گهرجي. آرمي چف چيو ته مصالحتي عمل افغانستان ۾ ڊگهي مدي وارن مسئلن جو حل آهي، ڇوته افغانستان ۾ عدم استحڪام خطي کي متاثر ڪري رهيو آهي. جنرل راحيل شريف چيو ته افغانستان۾ بدامني سبب پاڪستان ۾ سماجي ۽ معاشرتي اثر پئجي رهيا آهن، آپريشن ضرب عضب کي نتيجا ڏيندڙ بڻائڻ لاءِ پاڪ-افغان سرحد کي محفوظ بڻائڻو پوندو. آرمي چيف جنرل راحيل شريف چيو ته پاڪستان ۾ استحڪام ايندو ته خطي جي ٻين ملڪن سان اقتصادي سهڪار ۾ اضافو ٿيندو.

 

سپريم ڪورٽ جي فيصلي جهانگير ترين جي عزت بچائي: پرويز رشيد

اسلام آباد(بيورو) سڌ سماءِ واري وفاقي وزير پرويز رشيد چيو آهي ته اين اي 154 بابت سپريم ڪورٽ فيصلو ٻڌايو آهي، عدالت جي فيصلي تي تنقيد تي کين افسوس آهي، سپريم ڪورٽ جي فيصلي جهانگير ترين جي عزت بچائي آهي….اسلام آباد ۾ عمران خان پريس ڪانفرنس جي ردعمل ۾ پريس ڪانفرنس ڪندي وفاقي وزير پرويز رشيد چيو ته اين اي 154 بابت سپريم ڪورٽ جي فيصلي تي تحريڪ انصاف جي تنقيد تي کين ڏک پهتو آهي، صديق بلوچ جو ڪيس سچائي تي ٻڌل هو. پرويز رشيد چيو ته عدالت ۾ جهانگير ترين جي وڪيل دليل ڏيڻ کان فرار ٿيڻ جي ڪوشش ڪئي، سپريم ڪورٽ بار بار جهانگير ترين جي وڪيل کي دليل ڏيڻ جي آڇ ڪئي پر ان دليل ڏيڻ کان پاسو ڪيو، بريف ۽ بريف ڪيس رکڻ وارن عدالت کان رڳو ڊگهيون ڊگهيون تاريخون گهرڻ شروع ڪري ڇڏيون.پرويز رشيد چيو ته صديق بلوچ جي ڊگري هائير ايجوڪيشن ڪميشن کان تصديق ٿيل آهي، سپريم ڪورٽ کي ڪيس جي ڪارروائي مڪمل ٿيڻ تي اسٽي آرڊر ڏيڻو پيو، سندن اميدوار سپريم ڪورٽ ۾ رڳو چونڊ وڙهڻ جي اجازت وٺڻ لاءِ ويو هو.هن چيو ته سپريم ڪورٽ پاڪستان جو اعليٰ ترين ادارو آهي، عمران خان ۽ جهانگير ترين عدالت تي تنقيد ڪري رهيا آهن، عمران خان ڪي پي ڪي جي چونڊ جهڙا نتيجا قبول ڪندو آهي، عمران خان ان چونڊ کي تسليم ڪندو آهي جنهن ۾ پي ٽي آءِ جو اميدوار ڪامياب ٿئي.

 

وڏي وزير ثقافت کاتي کي سکر ۾ معصوم شاهه جي مناري جي بحالي واري اسڪيم فوري طور تيار ڪرڻ جي هدايت

ڪراچي (اسٽاف رپورٽر) سنڌ جي وڏي وزير سيد قائم علي ثقافت کاتي کي سکر ۾ معصوم شاهه جي مناري جي بحالي واري اسڪيم فوري طور تيار ڪرڻ جي هدايت ڪئي آهي. وزير اعليٰ هائوس ڪراچي ۾ وڏي وزير جيصدارت هيٺ اجلاس ٿيو، جنهن دوران ثقافت کاتي بابت صلاحڪار شرميلا فاروقي بريفنگ ڏيندي چيو ته 99 اسڪيمن مان 22 اسڪيمون مڪمل ٿي ويون آهن. شرميلا فاروقي اهو به ٻڌايو ته هڪ ڏهائي 6 ارب رپين جي لاڳت وارين اسڪيمن مان 30 اسڪيمن تي ڪم هلندڙ آهي، جڏهن ته هاڪس بي ريسٽ هائوس ، ڪراچي ۾ ڪلچرل ڪامپليڪس ۽ لائبريري سميت ٻين اسڪيمون مڪمل ڪيون ويون آهن. ان موقعي تي وڏي وزير ثقافت کاتي جي عملدارن کي سکر ۾ معصوم شاهه جي مناري جي بحالي واري اسڪيم فوري طور تيار ڪرڻ جي هدايت ڪئي . اجلاس ۾ سينيئر ناڻي واري وزير مراد علي شاهه، ثقافت کاتي جي سيڪريٽري نياز عباسي ۽ ٻين عملدارن شرڪت ڪئي.

 

عالمي ڏهاڙا عوام جي سجاڳي لاءِ ملهايا ويندا آهن، ميڊيا اهم ڪردار ادا ڪري سگهي ٿي: نثار کهڙو

لاڙڪاڻو(اي پي پي ) سنڌ جي اطلاعات ۽ تعليم واري سينيئر صوبائي وزير نثار احمد کهڙو چيو آهي ته عالمي ڏهاڙا عوام جي سجاڳيلاءِ ملهايا ويندا آهن ته جيئن ماڻهن کي انهن مان لاڀ ملي سگهي. اهڙن خيالن جو اظهار هن اڱاري ڏينهن لاڙڪاڻو پريس ڪلب ۾ ورلڊ هارٽ ڊي جي موقعي تي شهيد محترمه بينظير ڀٽو ميڊيڪل يونيورسٽي طرفان لڳايل ڪئمپ جي افتتاح کانپوءِڪوٺايل تقريب کي خطاب ڪندي ڪيو. هن چيو ته عوام جي سجاڳي لاءِ ميڊيا تمام اهم ڪردار ادا ڪري سگهي ٿي ۽ ان کي پنهنجي ذميواري نڀائڻي پوندي. هن چيو ته اڳ ۾ وڏي عمر وارن ماڻهن کي بيماريون ٿينديون هيون پر هاڻي ٻارن کي به دل، بلڊ پريشر ۽ شگر جهڙا مرض ٿين ٿا. هن چيو ته شگر ستن بيمارين جي ماءُ آهي. ان کان بچاءَ لاءِ اڳواٽ ئي قدم کڻڻ گهرجن. هن چيو ته اليڪٽرانڪ ميڊيا سياسي اشوز تي روز بحث ڪرائي ٿي پر صحت، زراعت، صنعتن، واپار ۽ ٻين عوامي اشوز تي به بحث ڪرائي. هن چيو ته عوام ۾ سجاڳي پيدا ڪرڻ لاءِ سڀني کي پنهنجو ڪردار ادا ڪرڻ گهرجي. هن چيو ته اسان جي اسپتالن ۾ علاج جون سهولتون موجود آهن پر اهي صحيح نموني استعمال نه ٿيون ٿين. اسپتالن جي حالتن کي ٺيڪ ڪرڻو پوندو. هن چيو ته سول اسپتال جو ڪارڊڪ يونٽ اڃا مڪمل ناهي ٿي سگهيو، اتي عوام کي انجيوگرافي جي سهولت به ملڻ گهرجي. هن چيو ته حڪومت عوام لاءِ تمام گهڻيون سهولتون ڏنيون آهن ۽ اڳتي به جتي ضرورت پوندي اتي وڌيڪ سهولتون ڏينداسين. ان موقعي تي صحافين جي سوالن جا جواب ڏيندي سينيئر صوبائي وزير چيو ته پيرپاڳارو بادشاهه ماڻهو آهي، هن سنڌ جي جن واڳن جو ذڪر ڪيو آهي انهن جا نالا کڻي ها ته بهتر هو. پر ماڻهن کي جانور چوڻ مناسب ڳالهه ناهي. باقي ڪرپشن جا جنهن تي به الزام آهن، انهن لاءِ عدالتون موجود آهن، انهن ۾ ڪيس هلي سگهن ۽ جيڪو ڏوهي هوندو انهن کي آزاد عدليه مان سزا به ملي ويندي. سنڌ ۾ تڪبندين بابت پڇيل سوال جي جواب ۾ نثار احمد کهڙو چيو ته عدالتي حڪم موجب جتي به تڪبندين تي اعتراض هوندا اتي نيون تڪبنديون ٿينديون، اليڪشن ڪميشن ڪرائيندي ۽ سڄي سنڌ ۾ نئين تڪبندين جو حڪم نه ڏنو ويو آهي، ان سان مڪاني چونڊن جو شيڊول متاثر نه ٿيندو. هن وڌيڪ چيو ته وفاقي احتساب ڪميشن وانگر صوبائي احتساب ڪميشن ۾ به رٽائرڊ جج ۽ رٽائرڊ ڪامورا هوندا. جنهن ۾ صوبائي معاملا ايندا. ڪميشن جو بل سنڌ اسيمبليءَ ۾ پيش ٿيندو جنهن کي بل ۾ ترميمون شامل ڪرڻ يا ڪٽڻ جو اختيار آهي. هن چيو ته احتساب ڪميشن ڪي پي ڪي ۾ به قائم آهي ۽ سنڌ احتساب ڪميشن ۾ به ساڳيون شيون شامل هونديون. سنڌ ۾ رينجرس جي اختيارن بابت صوبائي وزير چيو ته رينجرس کي سنڌ ۾ ٽارگيٽ ڪلنگ، ڀنگ عيوض اغوا، ڀتي خوري ۽ دهشتگردي جي خاتمي لاءِ اختيار ڏنا ويا آهن ۽ صوبائي حڪومت جي اجازت سان ٿيندڙ ڪاررواين کانپوءِ سنڌ مان اغوا جون وارداتون تقريبن ختم ٿي چڪيون آهن. هاڻي ڪٿان به ٻوريءَ ۾ بند لاش نه ٿا ملن، اڳ ۾ روز 15 کان 20 ماڻهو ٽارگيٽ ڪلنگ جو شڪار ٿيندا هئا. هاڻي اسانکي لاش کڻڻا نه ٿا پون. دهشتگردي ختم ٿي وئي آهي. عوام کي تحفظ جو احساس ٿيو آهي ۽ صوبائي حڪومت جي فيصلن جو سٺو نتيجو نڪتو آهي. باقي ادارن کي پنهنجون حدون نه اورانگهڻ گهرجن اهو مناسب ناهي. هن چيو ته ڪو وزير جيڪڏهن موڪل تي پرڏيهه ويندو آهي ته سندس کاتو وڏي وزير ڏانهن هليو ويندو آهي. ان لاءِ اهو چوڻ غلط آهي ته ورڪس اينڊ سروسز کاتي جو ڪو وزير ناهي. شرجيل ميمڻ ذاتي مسئلن جي ڪري پرڏيهه ويل آهي. باقي هن تي جيڪي الزام لڳي رهيا آهن انهن جي بنياد تي سندس خلاف ڪو ڪيس سامهون نه آيو آهي.

 

زرعي رليف پيڪيج، ضابطا اخلاق جي ڀڃڪڙي بابت اليڪشن ڪميشن پاران فيصلو محفوظ

اسلام آباد (بيورو) اليڪشن ڪميشن، وزيراعظم نواز شريف پاران اعلانيل زرعي رليف پيڪيج تي ضابطا اخلاق جي ڀڃڪڙي بابت فيصلو محفوظ ڪري ورتو، جيڪو جلد ٻـُڌايو ويندو. اسلام آباد ۾ چيف اليڪشن ڪمشنر جسٽس رٽائرڊ سردار رضا محمد خان جي سربراهي ۾ وزيراعظم جي زرعي پيڪيج بابت معاملي جي ٻڌڻي ڪئي. ان موقعي تي اليڪشنڪميشن جي ٻين ميمبرن به شرڪت ڪئي. ٻڌڻي دوران اطلاعات ۽ فوڊ سڪيورٽي جي سيڪريٽريز زرعي پيڪيج جا دستاويز اليڪشن ڪميشن کي پيش ڪيا. ٻڌڻي دوران ٻنهي سيڪريٽريز چيو ته زرعي رليف پيڪيج مڪاني چونڊن تي اثر انداز نه ٿيندو، اهو هڪ صوبي نه پر سڄي ملڪ لاءِ آهي ان جي تياري اليڪشن شيڊول کان اڳ شروع ڪئي وئي ۽ اهو پيڪيج وفاقي بجيٽ جو حصو آهي. دليل ٻڌڻ بعد اليڪشن ڪميشن زرعي رليف پيڪيج جو اعلان ضابطا اخلاق جي ڀڃڪڙي بابت فيصلو محفوظ ڪري ورتو. ٻڌڻي بعد ميڊيا سان ڳالهائيندي اليڪشن ڪميشن جي سيڪريٽري بابر يعقوب چيو ته زرعي پيڪيج تي اطلاعات ۽ فوڊ اينڊ سڪيورٽي جي سيڪريٽريز پنهنجو موقف پيش ڪيو جنهن جي روشني ۾ ڪيمشن فيصلو محفوظ ڪيو آهي جيڪو جلد ٻــُڌايو ويندو.

 

سپريم ڪورٽ پاران اين اي 154 لوڌران ۾ ننڍي چونڊ روڪڻ جو حڪم، صديق بلوچ جي ميمبرشپ بحال

اسلام آباد (بيورو) سپريم ڪورٽ، اين اي هڪ سئو 54 لوڌران ۾ ننڍي چونڊ روڪڻ جو حڪم ڏيندي نون ليگ اڳواڻ صديق بلوچ جي قومي اسيمبلي جي ميمبرشپ بحال ڪري ڇڏي، عدالت ملتان ۾ قائم اليڪشن ٽربيونل جي مبينا ڌانڌلي ڪيس جو فيصلو معطل ڪري ڇڏيو. مسلم ليگ نون جي اڳواڻ صديق بلوچ اليڪشن ٽريبونل جي فيصلي خلاف سپريم ڪورٽ ۾ درخواست داخل ڪرائي هئي جنهن ۾ هن پنهنجي تاحيات پابندي واري فيصلي کي ڪالعدم قرار ڏيڻ جي اپيل ڪئي هئي. صديق بلوچ 11 آڪٽوبر تي رٿيل اين اين 154 جي ننڍي چونڊ روڪڻ جي به درخواست ڪئي هئي. جسٽس ثاقب نثار جي سربراهي ۾ سپريم ڪورٽ جي ٽه رڪني بينچ، ڪيس جي ٻڌڻي ڪئي. ٻڌڻي بعد عدالت اين اي 154 تي صديق بلوچ جي نااهلي واري فيصلي خلاف درخواست تي حڪم جاري ڪيو. عدالت اين اي هڪ سئو 54 لوڌران ۾ ننڍي چونڊ روڪڻ جو حڪم ڏنو، جڏهن ته اليڪشن ٽربيونل جي مبينا ڌانڌلي ڪيس جي فيصلي کي معطل ڪندي نون ليگ اڳواڻ صديق بلوچ جي قومي اسيمبلي جي ميمبرشپ بحال ڪئي وئي. ياد رهي ته اين اي 154 لوڌران تي مئي 2013ع ۾ عام چونڊن دوران آزاد اميدوار صديق خان بلوچ تحريڪ انصاف جي مرڪزي اڳواڻ جهانگرين ترين کي شڪست ڏئي هئي جڏهن ته صديق بلوچ چونڊون کٽڻ بعد نون ليگ ۾ شامل ٿيو هو. جهانگرين ترين اليڪشن ٽربيونل ۾ صديق بلوچ جي ڪاميابي خلاف اليڪشن ٽربيونل ۾ درخواست داخل ڪئي هئي جنهن ۾ صديق بلوچ تي جعلي ڊگري ۽ پولنگ دوران ڌانڌلي جو الزام لڳايو ويو هو.

 

ن ليگ جي حڪومت عوام سان لاڳيتو ڪوڙ ڳالهائي رهي آهي: عمران خان

اسلام آباد (بيورو) پي ٽي آءِ سربراهه عمران خان چيو آهي ته نون ليگ جي حڪومت عوام سان لاڳيتو ڪوڙ ڳالهائي رهي آهي جڏهن ته ان جي حڪومت سازي جو تجربو رڳو شريف ايمپائر جي ترقي تي استعمال ٿي رهيو آهي. هڪ بيان ۾ عمران خان نيپرا جي رپورٽ تي ردعمل ظاهر ڪندي چيو ته نيپرا جا انڪشاف حيران ڪندڙ نه پر ڇرڪائيندڙ آهن. هن چيو ته حڪومت فراڊ ميٽرز ۽ واڌو بلن ذريعي عوام کي ڦري رهي آهي، جڏهن ته رپورٽ مان پتو آهي ته نون ليگ جي حڪومت عوام سان لاڳيتو ڪوڙ ڳالهائي رهي آهي. سندس چوڻ هو ته مسلم ليگ نون جي حڪومت سازي جو تجربو رڳو شريف ايمپائر جي ترقي تي استعمال ٿي رهيو آهي جڏهن ته نون ليگ مرڪز ۾ 3 ۽ پنجاب ۾ 6 ڀيرا حڪومت ڪري چڪي آهي. عمران خان چيو ته نون ليگ حڪومت توانائي جي شعب ۾ بهتري آڻڻ ۾ مڪمل طور ناڪام ٿي چڪي آهي. سندس چوڻ هو ته بدعنواني ۽ بدانتظامي جي ذميوارن جو احتساب ڪيو وڃي، جڏهن ته شفاف، اڻ ڌريي ۽ احتساب جو عمل مٿان کان شروع ڪري هيٺين سطح تائين پهچايو وڃي. عمران خان چيو ته عمران رپورٽ موجب حڪومت پاور اسٽرڪچر جي بهتري جي اهل ناهي. ياد رهي ته نيپرا سالياني رپورٽ ۾ پاڻي ۽ بجلي واري وزارت جي ڪارڪردگي کي ناقص قرار ڏيندي چيو آهي ته ملڪ ۾ بجلي جو شارٽ فال ۽ لوڊشيڊنگ ڄاڻي واڻي ڪئي پئي وڃي.

 

نيب ڪراچي پاران ڊاڪٽر عاصم تي لڳايل الزامن جي جاچ لاءِ جي آءِ ٽي جوڙڻ جي سفارش

ڪراچي (اسٽاف رپورٽر) نيب ڪراچي ڊاڪٽر عاصم تي لڳايل الزامن جي جاچ لاءِ نيب هيڊ ڪوارٽر کي خط لکي جي آءِ ٽي جوڙڻ جي سفارش ڪئي آهي، ڊي جي نيب چيو آهي ته ڊاڪٽر عاصم تي گيس جي غير قانوني وڪري، چوري ۽ ٻين بدعنوانين جا الزام آهن، جن جي جاچ نيب آرڊيننس 1999 جي دائري ۾ نٿي اچي. ڊي جي نيب هيڊ ڪوارٽر کي لکيل خط ۾ لکيو آهي ته ڊاڪٽر عاصم تي لڳايلالزامن بابت رينجرز کان تفصيل ملي ويا آهن، ان کان 5 مختلف معاملن جي جاچ ٿيڻ گهرجي . خط ۾ اهو به لکيو ويو آهي ته ڊاڪٽر عاصم تي جيڪي الزام لڳايا ويا آهن، انهن جي جاچ نيب آرڊيننس 1999 جي دائري ۾ نٿي اچي ۽ اهڙن الزامن جي جاچ لاءِ جي آءِ ٽي جوڙي وڃي، جنهن ۾ نيب ۽ رينجرز عملدارن کي به شامل ڪيو وڃي. خط ۾ لکيو ويو آهي ته ڊاڪٽر عاصم تي گيس جي غيرقانوني وڪري ۽  چوري  سميت سي اين جي لائيسنس جاري ڪرڻ ۾ گهوٻين جا الزام آهن. خط ۾ اهو به لکيو ويو آهي ته ڊاڪٽر عاصم پي ايم ڊي سي  ۾به    اختيارن جو غلط استعمال ڪري ميڊيڪل ڪاليجز جي غير قانوني رجسٽريشن ڪئي، جنهن جي به جاچ ٿيڻ گهرجي.

 

منيٰ سانحي ۾ شهيد پاڪستاني حاجين جو انگ 44 ٿي ويو

مڪه مڪرمه(م.ڊ) مذهبي معاملن واري وزارت منيٰ سانحي ۾ 44 پاڪستاني حاجين جي شهيد ٿيڻ جي تصديق ڪري ڇڏي،جڏهن ته 60 کان وڌيڪ اڃا به گــُم آهن،جن جو ڪوبه پتو نه پئجي سگهيو آهي. مذهبي معاملن واري وزارت، منيٰ سانحي جي شهيدن جي نئين لسٽ جاري ڪئي آهي. لسٽ موجب شهيدن ۾ ٻن ڄڻن جي واڌ ٿي آهي،جن ۾ شانگلا واسي حيدر علي ۽ حسنا بيبي شامل آهن. ٻئي طرف گم ٿي ويل 60 کان وڌيڪ پاڪستاني حاجين جا وارث سخت اذيت واري صورتحال کي منهن ڏيڻ تي مجبور آهن. گم ٿي ويل پاڪستاني حاجين جي وارثن ميڊيا سان ڳالهائيندي دانهيو ته هو هر وقت پنهنجي پيارن جي خيريت جي خبر ٻڌڻ جي انتظار ۾ آهن،پر مذهبي معاملن جي وزارت پاران کين ڪابه ڄاڻ فراهم نه پئي ڪئي وڃي. مذهبي معاملن واري وزارت موجب سعودي اختياريون گم ٿيل پاڪستانين بابت ڪابه معلومات فراهم نه ڪري رهيون آهن،جنهنڪري ڏکيائيون پيش اچن پيون. ٻئي طرف منيٰ ۾ شهيد ٿي ويل ڪجهه پاڪستانين جي تدفين جو سلسلو به جاري آهي،ملتان جي شهيد عزيزه بي بي جي تدفين سندس ڀاءُ سعودي عرب ۾ ڪرائي آهي.