تازيون خبرون

Daily Archives: August 28, 2015

بالي ووڊ اداڪار سجي دت کي پيرول تي جيل مان 30 ڏينهن لاءِ آزادي ملي وئي

ممبئي (شوبز نيوز)بالي ووڊ اداڪار سنجي دت کي پيرول تي جيل مان 30 ڏينهن لاءِ آزادي ملي وئي آهي. ڀارتي ميڊيا مطابق سنجي دت هلندڙ سال جون ۾ پنهنجي ننڍي ڌيءَ اقرار جي بيماري کي سبب ڄاڻائيندي پيرول تي آزادي لاءِ عدالت کي درخواست ڏني هئي. پيرول تي آزادي ملڻ کان پوءِ سنجي دت (اڄ) خميس ڏينهن تي گهر پهچندو. ذريعن مطابق اداڪار کي وڌيڪ 60 ڏينهن لاءِ پيرول ۾ توسيع حاصل ڪرڻ جو حق آهي. سنجي دت کي جنوري 2014ع ۾ پڻ 3 مهينن لاءِ پيرول تي آزادي ملي هئي.

 

باصلاحيت اداڪارا صنم سعيد جي فلم ”بجانا“ جي فلمبندي آخري مرحلن ۾ داخل

لاهور (شوبز نيوز) پاڪستان جي باصلاحيت اداڪارا صنم سعيد جي فلم ”بجانا“ جي فلمبندي آخري مرحلن ۾ داخل ٿي وئي آهي، فلم ۾ هيرو جو ڪردار محبت مرزا ادا ڪري رهيو آهي، فلم جي پروڊيوسر ارشد علي آهي، جڏهن ته ناصر خان ان فلم جي هدايتڪاري ڪري رهيو آهي. ميڊيائي نمائندن سان ڳالهائيندي صنم سعيد چيو ته سندس هيءَ فلم ”بجانا“ پاڪستان فلم انڊسٽريءَ کي بحاليءَ جي رستي تي هلائڻ جي لاءِ آڪسيجن جو ڪم ڪندي، اداڪارا صنم سعيد اهو پڻ چيو ته فلم جي ڪهاڻي تمام جاندار آهي، جيڪا شوقينن کي تمام گھڻي پسند ايندي.

 

ڌيءَ جي پالنا ۾ وقت مصروف گذريو ۽ خبر ئي نه پئي ته پنج سال گذري ويا: ايشوريا

ممبئي (شوبز نيوز) اداڪارا ايشوريا راءِ بچن چيو آهي ته ڌيءَ جي پالڻا ۾ وقت گذرڻ جي خبر ئي نه پئي. ڏسندي ئي ڏسندي پنج سال گذري ويا. ڀارتيميڊيا موجب اداڪارا هڪ انٽرويو ۾ ٻڌايو ته اٽڪل پنجن سالن جي وقفي کان پوءِ فلم ”جذبا“ لاءِ جڏهن سيٽ تي پهتس ته ان ڳالهه جو احساس ئي نه ٿيو ته پنج سال غير حاضر رهي آهيان. ايشوريا موجب ڌيءَ جي پالنا ۾ وقت مصروف گذريو ۽ خبر ئي نه پئي ته پنج سال گذري ويا.

 

اداڪارائون پنهنجي ذاتي زندگيءَ ۾ ڪجھه به ڪن پر فلم ۾ آئٽم گيت ڪرڻ سندن ذاتي پسند نٿو ٿي سگھي: حمزه عباسي

ڪراچي (شوبز نيوز) پاڪستاني اداڪار حمزه علي عباسيءَ جو چوڻ آهي ته اداڪارائون پنهنجي ذاتي زندگيءَ ۾ ڪجھه به ڪن پر فلم ۾ آئٽم گيت ڪرڻ سندن ذاتي پسند نٿو ٿي سگھي. برطانوي خابرو اداري کي ڏنل انٽرويوءَ ۾ حمزه علي عباسيءَ جو چوڻ هو ته هو گيتن خلاف ناهي ڇو ته اهي هاڻي اسان جي ثقافت جو حصو بڻجي چڪا آهن، پر مان آئٽم نمبرن جي خلاف آهيان، ڇو ته انهن ۾ عورتن کي مختصر لباس ۾ نچندي ڏيکاريو ويندو آهي. سندس چوڻ هو ته آئٽم نمبر عورتن لاءِ بي عزتي جو سبب بڻجي رهيا آهن. حمزه فلم جي پروڊيوسرن، هدايتڪارن، اداڪارن ۽ سينسر بورڊ تي تنقيد ڪندي چيو ته آئٽم گيت فلم ۾ شامل ڪرڻ انهن سڀني جي غلطي آهي. سندس چوڻ هو ته هو سينسر بورڊ کان سوال ٿو ڪري ته آخر هو آئٽم گيتن کي فلمن ۾ شامل ڪرڻ جي اجازت ڇو ٿا ڏين.

 

پهري ليگ ۾ پنج ٽيمون حصو وٺنديون، جن وچ ۾ گڏيل طور 24 ميچون کيڏيون وينديون: نجم سيٺي

لاهور (اسپورٽس نيوز) پاڪستان ڪرڪيٽ بورڊ پهرين پاڪستان سپر ليگ ايندڙ سال 4 کان 24 فيبروريءَ تائين قطر جي گاديءَ واري شهر دوحا ۾ ڪرائڻ جو اعلان ڪري ڇڏيو آهي. سپر ليگ جي گورننگ ڪائونسل جي چيئرمين نجم سيٺيءَ جو چوڻ هو ته پهري ليگ ۾ پنج ٽيمون حصو وٺنديون، جن وچ ۾ گڏيل طور 24 ميچون کيڏيون وينديون. سپر ليگ جي انعامي رقم 10 لک ڊالر ٻڌائي پئي وڃي. نجم سيٺيءَ جو چوڻ هو ته ڀارت کان سواءِ ٻين ملڪن جي ذڪر لائق ڪرڪيٽرن سپر ليگ ۾ کيڏڻ ۾ دلچپسي ڏيکاري آهي. ان کان سواءِ ڪيترن ئي پرڏيهي ڪوچن پڻ سپر ليگ ۾ دلچسپي رکن ٿا. سندس چوڻ هو ته فرنچائز جي مالڪن، براڊڪاسٽرن ۽ اسپانسرن جا تفصيل ايندڙ ٽِن مهينن ۾ طئه ڪيا ويندا. واضح رهي ته پاڪستان ڪرڪيٽ بورد آءِ پي ايل جي طرز تي ٽي ٽوئنٽي ليگ ڪرائڻ لاءِ ڪافي وقت کان ڪوشان رهيو پر ڳري رقم خرچ ڪرڻ باوجود به مختلف سببن جي ڪري هيءَ ليگ نه ٿي سگھي هئي. پاڪستان ڪرڪيٽ بورڊ سپرليگ جي رپورٽ تيار ڪرڻ جي لاءِ آءِ سي سيءَ جي اڳوڻي چيف ايگزيڪيوٽو هارون لوگارٽ جون خدمتون به حاصل ڪيون هيون، جنهن فيس جي مد ۾ سوال لک ڊالر پڻ ورتا هئا. ان وقت به سپر ليگ جي سيڪريٽريٽ ۾ ڳرين پگھارن ۽ مراعاتن تي پاڪستان ڪرڪيٽ بورڊ ڪيتريون ئي مقرريون ڪيون هيون. ياد رهي ته دوحا ۾ فقط هڪ ئي اسٽيڊيم موجود آهي، جنهن ۾ سپر ليگ جون سڀ ميچون کيڏيون وينديون.

 

عمر اڪمل کي ناروي ۾ هڪ ميچ دوران هڪ عورت بالر ڪلين بولڊ ڪري ڇڏيو

اوسلو (اسپورٽس نيوز) پاڪستاني ڪرڪيٽ ٽيم جو بهترين بيٽسمين عمر اڪمل هونئن ته دنيا جي وڏن وڏن بالرن کي ڏينهن جا تارا ڏيکاريندو آهي. پر ناروي ۾ هڪ ميچ دوران هڪ عورت بالر کيس ڪلين بولڊ ڪري ڏينهن جا تارا ڏيکاري ڇڏيا. اوسلو ۾پاڪستان ميلي دوران ڇوڪرين جي ٻن ٽيمن جو ميچ ٿيو، جنهن دوران عمر اڪمل کي به هڪ ٽيم جو حصو بڻايو ويو هو. پهرين هن ڪجهه شاٽون کيڏيون پوءِ پاڪستان ڄائي اسما احمد جي بالنگ تي سنگل رنس وٺڻ جي ڪوشش ۾ بال عمر اڪمل جي بيٽ کي ڇهندي وڃي وڪيٽن کي لڳو، عمر اڪمل جي آئوٽ ٿيڻ وقت مخالف ٽيم جي خوشي ڏسڻ وٽان هئي.

 

ڀارتي ٽينس اسٽار ثانيا مرزا جي لاءِ اعلانيل راند رتنا ايوارڊ جي رستي ۾ قانوني ڏکيائيون

ممبئي(اسپورٽس نيوز) ڀارتي ٽينس اسٽار ثانيا مرزا جي لاءِ اعلانيل راند رتنا ايوارڊ جي رستي ۾ قانوني ڏکيائيون اچي ويون ۽ ڪرناٽڪا هائيڪورٽ حڪم جاري ڪندي آخري حڪم تائين ثانيا کي ايوارڊ ڏيڻ کان روڪي ڇڏيو آهي. ياد رهي ته ثانيا مرزا تازو ئي ومبلڊن اوپن ٽينس جي عورتن ڊبل مقابلن ۾ پنهنجي ساٿي مارٽينا سان گڏ ڊبلز جو ٽائيٽل کٽي چئيمپين بڻجڻ جو اعزاز ماڻيو هو.

 

پاڪستان ٽي ٽوئنٽي ڪرڪيٽ ٽيم جي ڪپتان شاهد آفريديءَ پاران ڪراچيءَ جي جناح اسپتال جو دورو

ڪراچي (اسپورٽس نيوز) پاڪستان ٽي ٽوئنٽي ڪرڪيٽ ٽيم جي ڪپتان شاهد آفريديءَ ڪراچيءَ جي جناح اسپتال جو دورو ڪيو، شاهد آفريديءَ طرفان مختلف وارڊن ۾ مريضن جي عيادت ڪئي وئي. ان موقعي تي شاهد آفريديءَجو چوڻ هو ته اسپتال جي حالت ڏسي کيس تمام گھڻو ڏک ٿيو آهي، هن اسپتال لاءِ 20 لک رپين جيو عطيو به ڏنو. اسپاٽ فڪسرن بابت ڳالهائيندي شاهد آفريديءَ جو چوڻ هو ته پي سي بي انهن بابت سوچي سمجھي فيصلو ڪري، ڇو ته هلندڙ ۽ ايندڙ نسل جي مستقبل جو مامرو آهي، ان جي ڪري اسپاٽ فڪسرن جو ملڪي ٽيم ۾ کيڏڻ سان سڀني جا کٽڪا وڌندا، جڏهن ته ڪافي رانديگرن پڻ انهن سان کيڏڻ کان انڪار ڪيو آهي.

 

ڪراچيءَ ۾ ٿيل وارڌات ۽ قانون لاڳو ڪندڙ ادارا…!

 

ڪراچي جي مختلف علائقن ۾ فائرنگ ۽ پرتشدد واقعن ۾ چار ڄڻا قتل ، شاهه فيصل ڪالوني جي علائقي عظيم پورا روڊ تي اڻڄاتل هٿياربندن فائرنگ ڪري ڏني جنهن جي نتيجي ۾ 60 سالن جو پيرسن محمد حسين مارجي ويو، جوابدار فرار . لاش ڪارروائي لاءِ جناح اسپتال پهچايو ويو. واقعي جي جاچ ڪئي پئي وڃي. ملير جي علائقي ٻڪرا پڙي ۾ نامعلوم جوابدارن جي فائرنگ ۾ 25 سالن جو نوجوان نادر قتل ٿي ويو. هڪ ڄڻو زخمي، جنهن کي ضروري ڪارروائي لاءِ جناح اسپتال منتقل ڪيو ويو، سرجاني ٽائون جي پاور هائوس ڀرسان نامعلوم شخص جو گوليون لڳل لاش مليو، جنهن کي ڪارروائي بعد سڃاڻپ نه ٿيڻ سبب سردخاني حوالي ڪيو ويو، لسبيلا جي علائقي مان 55 سالن جي نامعلوم شخص جو لاش مليو، جنهن کي ڪارروائي بعد سرد خاني حوالي ڪيو ويو. هوڏانهن شرافي ڳوٺ ٿاڻي تان هٿيار رکڻ جي الزام ۾ گرفتار جوابدار رائو نديم ولد حسن علي پراسرار نموني فرار ٿي ويو، جوابدار جي لاڪپ مان فرار ٿيڻ واري اطلاع تي ايڊيشنل آءِ جي ڪراچي مشتاق مهر نوٽيس وٺندي ڊيوٽي تي مقرر 5 پوليس اهلڪارن کي ڊيوٽي ۾ غفلت ۽ لاپرواهي ڪرڻ تي لاڪپ ڪرڻ جو حڪم ڏئي ڇڏيو. ايس ايڇ او شرافي ٿاڻو اياز خان جي فرياد تي ڊيوٽي ۾ غفلت ڪندڙ 5 پوليس اهلڪارن جن ۾ سب انسپيڪٽر نظر علي ابڙو، سب انسپيڪٽر منير انڙ، سپاهي سخاوت حسين، سپاهي اختر نواز، سپاهي فضل رحيم تي ايف آءِ آر نمبر 257/15 جرم 223 ۽ 224 تحت داخل ڪري لاڪپ ڪري ڇڏيو.  هوڏانهن فرار ٿي ويل جوابدار جي گرفتاري لاءِ پوليس مختلف علائقن ۾ ڪارروائي شروع ڪري ڏني آهي. ٻئي پاسي بلديا ٽائون جي علائقي اتحاد ٽائون ۾ پوليس سرچ آپريشن ڪرڻ دوران مقابلي کان پوءِ هڪ جوابدار کي زخمي حالت ۾ گرفتار ڪري ورتو آهي، گرفتار جوابدار جو تعلق پابندي مڙهيل تنظيم تحريڪ طالبان  سواتي گروپ سان آهي سندن قبضي مان هٿيار ۽ دستي بم هٿ ڪيا ويا آهن. چنيسر ڳوٺ ۽ محمود آباد ۾ پوليس سرچ آپريشن ڪندي 18 شڪي ماڻهن کي گرفتار ڪري لاڪپ ڪري ڇڏيو ۽ جاچ شروع ڪري ڏني آهي، شاهه فيصل ڪالوني ۾ پوليس ڪارروائي ڪندي ٻن جوابدارن کي گرفتار ڪري نامعلوم هنڌ منتقل ڪري جاچ شروع ڪري ڏني.

سنڌ ۽ پنجاب جي 20 ضلعن ۾ حڪمرانن جي دورن ۽ بلدين تي پابندي…!!!

اليڪشن ڪميشن آف پاڪستان سنڌ ۽ پنجاب ۾ مڪاني چونڊن جي شيڊول جي منظوري ڏئي ڇڏي آهي، پهرين مرحلي ۾ سنڌ جي 8 ۽ پنجاب جي 12 ضلعن ۾ 31 آڪٽوبر تي پولنگ ٿيندي، چيف اليڪشن ڪمشنر جسٽس رٽائرڊ سردار محمد رضا خان سنڌ ۽ پنجاب ۾ مڪاني چونڊن جي پهرين مرحلي لاءِ شيڊول منظور ڪيو آهي،  پهرئين مرحلي ۾ سنڌ جي خيرپور، سکر، گهوٽڪي،شڪارپور، جيڪب آباد، قمبر – شهدادڪوٽ، لاڙڪاڻي ۽ ڪشمور – ڪنڌڪوٽ ضلعن ۾ ووٽ وڌا ويندا، اهڙي ريت پنجاب جي جن ضلعن ۾ پهرئين مرحلي ۾ پولنگ ٿيندي، انهن ۾ فيصل آباد، لاهور، قصور، ننڪانا صاحب، ڀڪر، اوڪاڙا، بهاولنگر، گجرات، چڪوال، پاڪ پتڻ، وهاڙي ۽ لوڌران شامل آهن. شيڊول مطابق ڪاغذن جي ڇنڊڇاڻ 12 کان 17 سيپٽمبر تائين ٿيندي، اليڪشن ڪميشن مطابق اميدوار پهرين آڪٽوبر تائين پنهنجا نامزدگي ڪاغذ واپس وٺي سگهندا ۽ اميدوارن جي آخري فهرست 2 آڪٽوبر تي جاري ڪئي ويندي. اليڪشن ڪميشن پنجاب ۽ سنڌ جي جن ضلعن ۾ 31 آڪٽوبر تي پولنگ جو شيڊول منظور ڪيو آهي، انهن جون چونڊ فهرستون به سيل ڪري ڇڏيون آهن، جڏهن ته انهن ضلعن ۾ هر قسم جي ترقياتي رٿائن جي اعلان تي به پابندي هوندي. اليڪشن ڪميشن ووٽنگ لاءِ چونڊيل ضلعن ۾ سرڪاري ملازمن جي بدلين ۽ مقررين تي پڻ پابندي لڳائي ڇڏي آهي، اليڪشن ڪميشن جو چوڻ آهي ته چونڊ ضابطه اخلاق جي ڀڃڪڙي تي ڪارروائي ڪئي ويندي، انهن ضلعن ۾ وزيراعظم، وڏا وزير، صوبائي ۽ وفاقي وزير به انهن ضلعن جا دورا ڪري نه سگهندا.

 

آس نراس جي ٻه- واٽَي تي پاڪ- ڀارت ڳالهيون!؛ارشاد ڪاغذي

پاڪ- هند جي قومي سلامتي جي مشيرن جي ملاقات آخري وقت تي ڊرامائي انداز ۾ منسوخ ٿي وئي. ٻنهي طرفن کان الزامن جا تير ۽ تفنگ ۽ بم، بارود ۽ گولا برسائي ڏهڪاءُ جهڙو ماحول جوڙيو ويو، ان ڪري غير يقيني جي صورتحال پيدا ٿي وئي آهي جو لڳي ٿو ته ٻئي ملڪ وري ڪنهن وڏي دنگاڻ جي طرف وڃي رهيا آهن؟ ان حقيقت کان ڪوبه انڪار نه ڪري سگھندو ته پاڪستان ۽ هندستان پاڙيسري ملڪ آهن، دوست ته تبديل ٿي سگھن ٿا پر پاڙيسري ملڪ تبديل نٿا سگھجن. امريڪا ۽ ايران پاڻ ۾ ٺهي ويا پر اسان اڃا تائين اتي جو اتي آهيون، ان ۾ ڪنهن جو قصور آهي؟ ڇا تڪرار کي ختم نه ٿو ڪري سگهجي؟ ڇا ٻنهي ملڪن جا اڪابرين سنجيدگيءَ سان سرچاءُ ۽ نبيري لاءِ تيار نه آهن؟ يا وري ڪا ٽين ڌر پَٽِي پڙهائي رهي آهي؟

پاڪ- هند جي حڪومتن جي جهيڙي جو سبب هي هو ته پاڪستان جي هاءِ ڪمشنر سرتاج عزيز پنهنجي دوري جي موقعي تي ڪشميري اڳواڻن کي صلاح مصلحت لاءِ دعوت ڏني. ڀارت سرڪار اهو بهانو بڻائي ڪاوڙ ۾ امن ڳالهين کي اوچتو معطل ڪري ڇڏيو. جڏهن ته هميشه حريت رهنمائن سان باقاعده ڳالهيون ٿينديون آهن, پاڪستان جو سربراهه يا اعليٰ سطحي وفد جڏهن به ڀارت جي دوري تي ويو آهي ته ڪشميري اڳواڻن سان ڳالهين جو دور ٿيندو رهيو آهي، پر هن ڀيري ڀارت سرڪار هوڏ جو مظاهرو ڪري امن جي ڳالهين کي پٺي ڏئي ڇڏي. اپريل 2005ع ۾ جڏهن پرويز مشرف ڀارت جو دورو ڪيو هو، اتي آل پارٽيز حريت ڪانفرنس جي وفد مشرف سان ملاقات ڪئي هئي. گذريل جولاءِ ۾ پاڪستان جي هاءِ ڪمشنر عبدالباسط عيد ملن پارٽيءَ جو اهتمام ڪيو هو، جنهن ۾ حريت اڳواڻن مير واعظ عمر فاروق ۽ ٻين شرڪت ڪئي هئي. گذريل سال جولاءِ جي مهيني ۾ جنهن وقت سيڪريٽري سطح تي ڳالهيون هندستان پاران معطل ڪيون ويون هيون، ان وقت ڪشميري اڳواڻن علي شاهه گيلاني، مير واعظ عمر فاروق ۽ ياسين ملڪ پاڪستان جي هاءِ ڪمشنر سان نئين دهلي ۾ ملاقات ڪئي هئي، پر هن دفعي ڀارت سرڪار ڳالهين کان نٽائي وئي.

اها ڪا نئين ڳالهه نه هئي نه ئي وري پهريون دفعو ڪو ڪشميري رهنما پاڪستان جي وفد سان ملڻ پئي آيا پر اهو عمل ڪيترن سالن کان ٿيندو رهيو آهي، اهو عام معمول آهي ته جڏهن به پاڪ- هند ڳالهيون ٿينديون آهن ته ڪشميري ليڊرشپ سان ملاقات ٿي ويندي آهي ۽ ڪڏهن به اڳوڻي سرڪار يا موجوده بي جي پي جي سرڪار اعتراض نه واريو هو، پر هن دفعي ڀارتي سرڪار سختيءَ سان منع ڪيو ته ڪشميري اڳواڻن سان قومي سلامتي جو صلاحڪار سرتاج عزيز ملاقات نه ڪندو ۽ سرتاج عزيز ان جي جواب ۾ چيو ته ”پاڪستان ڪنهن کان به ڊڪٽيشن نه وٺندو.“ ٻنهي طرفن کان ان قسم جي ضد جي ڪري ڳالهيون نه ٿي سگھيون. گارجين جي رپورٽ مطابق ڀارت جي پرڏيهي سيڪريٽري پاڪستان جي سفير عبدالباسط کي چيو ”توهان هندستان سان ڳالهه ٻولهه ڪندا يا عليحدگي پسندن سان.“ اخبار وڌيڪ لکيو ته باسط وارننگ کي ٿڏي ڇڏيو. ڪشميري اڳواڻ شبير شاهه جي سفارتخاني کان نڪرڻ بعد دهلي مذاڪرات ڪرڻ کان ٺپ جواب ڏنو.

پاڪ- هند مذاڪرات ٻه ڏينهن ٿيڻا هئا، پر ٻئي ڌريون پنهنجي ناڪامي کي لڪائڻ لاءِ هڪ ٻئي تي الزام هڻي رهيون آهن. هندستان فقط دهشتگردي تي ڳتِ ڏني ۽ پاڪستان جي مرضي هئي ته ڪشمير مسئلي تي گفتگو ٿيڻ گھرجي.

سفارتڪاري سيکاري ٿي ته پسند ۽ ناپسند کي وڏي سليقي واري فن ۽ فڪر سان منهن ڏجي ۽ بردباري سان تضادن جو اُڪلاءُ ڪيو وڃي، پر بدقسمتي سان هند- پاڪ جي دشمني جي ڪري شيون ٺهڻ بدران ويتر ڊهي پون ٿيون. جڏهن کان بي جي پي سرڪار آئي آهي ۽ مودي واڳون سنڀاليون آهن ته ڊپلوميسي شدت پسندي جي آوِي ۾ ڀسم ٿي وئي آهي. پاڪستان ۽ هندستان جي قومي سلامتي جي مشيرن جي رٿيل گڏجاڻيءَ کان هڪ ڏينهن اول اوچتو ڳالهين کي خيرآباد چئي کلي عام هڪٻئي تي تهمت واري سفارتڪاري جي واٽ ورتي وئي. ميز تي ويهي سنجيدگي ۽ ڏاهپ سان غور ويچار ڪرڻ بدران امن لاءِ ٿيندڙ ڳالهين کان پاڻ کي الڳ ڪيو ويو. ان ڀڄڻ کي ڇا چئجي؟ اها سفارتڪاري ته نه ٿي. جڏهن ٻن ملڪن ۽ سي به هڪٻئي جا سخت مخالف ملڪ هجن تن جي وچ ۾ اعليٰ سطحي مذاڪرات ٿين ۽ اهي به عين وقت تي ملتوي يا معطل ٿين، اها ڪيڏي نه مايوس ڪندڙ خبر آهي. ڇا ان باري ۾ ڪا ايجنڊا طئي ڪونه ڪئي وئي هئي؟ ڪو پروگرام ۽ رٿابندي ڪري انهن نڪتن تي پهريان غور ۽ ويچار ڪري ايجنڊا تيار ڪرڻ گھربي هئي ته جيئن گھربل ڪم مڪمل ٿئي.

پر بدقسمتي سان ڀارت ۾ شدت پسند جماعت بي جي پي ۽ مودي جي اقتدار ۾ اچڻ کانپوءِ سفارتڪاري کي ”دهشتگردي يا ڳالهيون“ جي ڪسوٽي تي مَرڪُوزُ ڪيو ويو آهي. مودي ۽ ان جي پرڏيهي ۽ سلامتي جي وزيرن ۽ مشيرن جي مرضي ۽ منشا مطابق هي اچانڪ ڊيڊلاڪ ٿيو. مودي سرڪار سرتاج عزيز سان ڪشميري اڳواڻن جي ملاقات تي اعتراض ڪري هڪ موقعو ضايع ڪيو آهي. ڇاڪاڻ ته ڊپلوميسي عقلمندي ۽ قابليت جو نالو آهي، نه ڪي هوڏ ۽ ضد جو. مزي جي ڳالهه ته ان سموري عرصي ۾ ڀارت جو پرڌان منتري خاموش رهيو. هن صاحب ان نازڪ مسئلي ۽ صورتحال تي هڪ اکر به نه ڪڇيو، هو ڪي اهڙا تڪڙا اُپاءَ ڪري ڊيڊلاڪ کي ختم ڪري پئي سگھيو، پر مودي صاحب چپ جو روزو رکيو، ان سان تمام گھڻي مايوسي پيدا ٿي آهي.

رام ڄيٺ ملاڻي اڳوڻو بي جي پي جو اڳواڻ ۽ مشهور وڪيل حريت قائدين جي پاڪستان جي هاءِ ڪميشن جي دعوت ۾ بندش تي سخت تنقيد ڪئي آهي ۽ ٻنهي ملڪن جي قومي سلامتي جي مشيرن جي گڏجاڻي منسوخ ٿيڻ تي سخت ناراضگي جو اظهار ڪيو آهي. هن چيو ته ”ڪشميري اڳواڻن کي روڪي خراب مثال قائم ڪيو ويو آهي. اسان جا سياسي اڳواڻ بين الاقوامي قانون کان واقف نه آهن. مودي جي خاموشي حيرتناڪ آهي.“ ڀارت جي مخالف ڌر بي جي پي سرڪار کي سخت تنقيد جو نشانو بڻايو آهي. راجيا سڀا ۾ اپوزيشن جي ليڊر غلام نبي آزاد حڪومت تي ڇوهه ڇنڊيندي چيو ته ”پاڪستان سان قومي سلامتي جي مشيرن جي گفتگو جي مسئلي کي سرڪار درست نموني جو پوراءُ ڪرڻ ۾ ناڪام ٿي آهي ۽ پاڪستان کي فرارُ ٿيڻ جو موقعو فراهم ڪندي، دنيا ۾ هن جو پردو فاش ڪرڻ جو موقعو وڃائي ڇڏيو. ڀارت سرڪار اين ايس اي سطح تي ڳالهين جي قطعي ايجنڊا تيار ڪري نه سگھي. هي ڪم ملاقات جي تاريخ کان گھڻو اڳ ٿيڻ گھربو هو.“ اپوزيشن اڳواڻ غلام نبي آزاد ڀارت جي پرڏيهي ۽ سرڪار جي نااهلي ۽ ناقص ڊپلوميسي جا پَول پڌرا ڪيا آهن. هن جو چوڻ هو ته اسان (هندستان) هڪ مَڪتُوبُ موڪليو، هنن (پاڪستان) هڪ خط لکيو. اسان هڪ تاريخ تجويز ڪئي. هنن جواب ڏيڻ ۾ دير ڪئي. سفارتڪاري ايئن نه ڪئي ويندي آهي. غلام نبي آزاد وڌيڪ چيو ته ايجنڊا موڪلڻ ۽ ان تي متفق ٿيڻ ۾ گھڻو فرق آهي. ايجنڊا موڪلي ڏيڻ ۽ اهو سمجهڻ ته اڳلي ڌر اهو قبول ڪيو آهي، اهو بيوقوفي وارو عمل آهي. ڀارت کي گھربو هو ته هو ڳجهي سفارتڪاري جي چئنل کي استعمال ڪري يا وري پنهنجي نمائندي کي اوڏانهن اُماڻي ڪري ايجنڊا جي مڪمل تياري ڪري سگھجي پئي. هندستان ڳالهين کان ڀڄڻ جو موقعو ڏئي فاش غلطي ڪئي آهي. ڪانگريس اڳواڻ جي ڳالهه ۾ تمام گهڻو وزن آهي، ڇاڪاڻ ته سفارتڪاري وڏي دانش ۽ عقل سان ڪبي آهي.. ٻنهي ملڪن جهڙي نموني ڳالهين کي مٿاڇري ۽ سطحي انداز سان ورتو هو ان مان اهو واضح اشارو ٿو ملي ته هو ايترا گھڻا سنجيده نه هئا جيترو هئڻ گھرجي پيو.

ٻيو ته ٺهيو اوهان اهو ٻڌو ۽ پڙهيو هوندو ته هن سال جولاءِ مهيني ۾ روس جي شهر اُوفا ۾ پاڪستان ۽ هندستان جي وزيراعظمن ۾ هڪ ملاقات ٿي هئي. ان جو گڏيل پڌرنامو به جاري ڪيو ويو هو. پاڪستان جي پرڏيهي سيڪريٽري اعزاز احمد چوڌري ۽ هندستان جي پرڏيهي سيڪريٽري ايس جي شنڪر ٻنهي وزيراعظم جي ملاقات کانپوءِ هڪ گڏيل پڌرنامو جاري ڪيو هو، جنهن ۾ قومي سلامتي مشيرن جي ملاقات جو بندوبست ڪيو ويو هو. ان گڏيل پڌرنامي ۾ ڪشمير جي تڪرار جي نبيري لاءِ ڪا پيش رفت نه ٿي سگھي هئي يا وري ان کي گڏيل پڌرنامي ۾ اهميت نه ڏني وئي؟ بهرحال نواز شريف تي هتان جي اپوزيشن پارٽين ۽ ڪشمير جي حريت اڳواڻن ڪشمير مسئلي کي نريندر مودي اڳيان نه رکڻ تي سخت تنقيد ڪئي هئي. پ پ پ، تحريڪ انصاف ۽ چوڌري شجاعت، سرڪار ۽ نواز شريف تي ڇوهه ڇنڊيا هئا. ڪشميري اڳواڻن ڪشمير  مسئلي کي ڪرنگھي جي هڏي ڪوٺيندي چيو هو ته ڪشمير مسئلي کي ٻنهي ايٽمي ملڪن نظرانداز ڪيو. مودي ۽ نواز شريف برابر جا ڏوهاري آهن. حريت ڪانفرنس جي بزرگ اڳواڻ سيد علي گيلاني گڏيل پڌرنامي تي تنقيد ڪندي چيو ته ”هي تازو اعلان اسان جي ڪم جو ناهي، ڪشمير جي مسئلي جي نبيري لاءِ ڪا خاص اڳڀرائپ نه ڪئي وئي آهي. هيءَ ملاقات فوٽوسيشن کان وڌيڪ ڪا اهميت نه ٿي رکي.“ ڄمون ۽ ڪشمير لبريشن فرنٽ جي چيئرمين ياسين ملڪ سخت ردعمل ظاهر ڪندي چيو هو ته، ”اسان پاڪ- هند ڊائيلاگ جي خلاف نه آهيون پر ڪشمير عوام جي 4 پيڙهين، يرغمال ۽ ظلم ۾ زندگيون وڃائي ڇڏيون آهن.“ ياسين ملڪ جو وڌيڪ چوڻ هو ته ”پاڪستان ۽ هندستان جي گڏيل اعلان تي حيرت ٿي آهي، ڇاڪاڻ ته ان بيان ۾ ڪشمير جهڙي حساس ۽ اهم مسئلي جو ذڪر به ڪونه ڪيو ويو آهي.“

ان سڄي پَٽَاڙَ ڪرڻ جو مطلب هي آهي ته اُوفا ۾ مودي ۽ نواز شريف جي گڏجاڻي بعد جيڪو مشترڪه اعلان پڌرو ڪيو ويو هو ان ۾ ڪشمير جو ذڪر ئي نه هو. اهو لکيو ويو هو ته ”نئين دهلي ۾ قومي سلامتي جي صلاحڪارن جي گڏجاڻي ٿيندي، جنهن ۾ دهشتگردي سان لاڳاپيل سمورن معاملن تي ڳالهه ٻولهه ڪئي ويندي.“ بي بي سي جي رپورٽ مطابق ته مودي، نواز شريف سان ملڻ لاءِ تيار نه هو، پر ڪن پرڏيهي طاقتن جي زور بار تي هيءَ ملاقات ٿي. ملاقات کانپوءِ جيڪو گڏيل پڌرنامو جاري ٿيو، ان ۾ ڀارت جي مؤقف کي اهميت ڏني وئي. ان ۾ ڪٿي به ڪشمير مسئلي جو ذڪر نٿو ملي. پاڪستان جي ميڊيا ۽ تجزيه نگار ان اعلان تي گھڻو ڪجهه لکيو ۽ ڳالهايو هو. هنن چٽيءَ ريت اهو چيو هو ته دهلي ۾ ته قومي سلامتي جي صلاحڪارن جون ڳالهيون فقط دهشتگردي تائين محدود رهنديون؟ ڪشمير جي مسئلي تي ڳالهه ٻولهه نه ٿيندي؟

انهن سڀني ڳالهين جي هوندي، هندستان ۽ پاڪستان جي تڪرار کي نظر ۾ رکندي جهڙي نموني سفارتڪاري جو تماشو ۽ سانگ رچايو ويو، ان جي ڪري عالمي سطح تي ٻنهي ملڪن جي سفارتي عملي جي پت وائکي ٿي وئي آهي. ڀلي پاڪستان ۽ هندستان جا پرڏيهي عملدار پنهنجي پنهنجي مؤقف تي ڄمي بيهي رهن ۽ پنهنجي فتح سمجهن پر جڳ جهان جا سڄاڻ حلقا، ماهر، پارکو ۽ صحافي اهو پرکي ويا آهن ته امن جي آشا لاءِ ٻئي ملڪ ايترا سنجيده، بردبار ۽ ذميوار ڪونه آهن. افسوس ان ڳالهه جو آهي ته ڳالهين جي ايجنڊا کي آخري شڪل ڏيڻ لاءِ ڪنهن به ڌيان نه ڌريو، جيڪا گھربل سفارتڪاري ڪرڻ گھربي هئي، اها ڪونه ڪئي وئي ۽ نه وري ڪو هوم ورڪ ڪيو ويو ته جيئن اڳواٽ رٿابندي ڪئي وڃي ته جيئن ڪا پريشاني نه ٿئي. ڳالهين جي منسوخي کانپوءِ پاڪستان ۽ ڀارت پوائنٽ اسڪور ڪرڻ جي ڪوشش ۾ اهو وساري ويٺا آهن ته نقصان ڪنهن جو ٿي رهيو آهي؟ توهان ڀل نه ڳالهايو پر ايترو رستو ته ڇڏيو جو سڀاڻي توهان کي ڪم اچي!