تازيون خبرون

Daily Archives: August 27, 2015

پاڪستان قازقستان جي لاڳاپن کي وڏي اهميت ڏئي ٿو: نواز شريف

آستانه (مانيٽرنگ ڊيسڪ) وزيراعظم ميان نواز شريف چيو آهي ته پاڪستان قازقستان جَي لاڳاپن کي وڏي اهميت ڏئي ٿو، ٻنهي ملڪن کي واپاري لاڳاپن کي هٿي وٺرائڻ گهـُرجي، قازقستان جي صدر نور سلطان جو چوڻ آهيته پاڪستان جي دوستي کي هـُو قدر جي نگاهه سان ڏسن ٿا ۽ ان جي پرڏيهي پاليسي واکاڻ جوڳي آهي. قازقستان جَي راڄڌاني واري شهر آستانـه ۾ صدر نور سلطان سان وزيراعظم ميان نواز شريف ملاقات ڪئي. ملاقات دوران ٻـه طرفن لاڳاپن ۽ سڪيورٽي صورتحال بابت ڳالهيون ڪيون ويون. ان موقعي تي ڳالهائيندي وزير اعظم ميان نواز شريف چيو ته پاڪستان قازقستان جَي لاڳاپن کي وڏي اهميت ڏئي ٿو. نواز شريف چيو ته ٻنهي ملڪن کي واپار سميت ٻين شعبن لاڳاپن کي هٿي وٺرائڻ گهرجي. قازقستان جي صدر نور سلطان چيو ته هو پاڪستان جي دوستي وڏو قدر ڪن ٿا. نور سلطان چيو ته پاڪستان ۽ قازقستان تاريخي رشتي ۾ جڙيل آهن، جيڪو ڪڏهن به ختم نٿو ٿي سگهي. قازقستان جي صدر نور سلطان پاڪستان جي پرڏيهي پاليسي جي واکاڻ پڻ ڪئي. ان کان اڳ آجياڻي واري تقريب شرڪت لاءِ صدارتي محل پهچڻ تي وزيراعظم ميان نواز شريف جي شاندار آجيان ڪئي وئي. استقبال کانپوءِ قازقستان جي فوجي جي جٿن وزيراعظم ميان نواز شريف کي سلامي پڻ پيش ڪئي.

 

تحريڪ انصاف ن ليگ جي ٽئين وڪيٽ به ڪيرائي سياسي هيٽرڪ مڪمل ڪري ڇڏي، اين اي 154 تي صديق بلوچ جي ڪاميابي ڪالعدم قرار، ٻيهر چونڊن جو حڪم

ملتان (بيورو) تحريڪ انصاف نون ليگ جي ٽئين وڪيٽ ڪيرائي سياسي هيٽرڪ مڪمل ڪري ورتي، اليڪشن ڪميشن ٽربيونل قومي اسيمبلي جي تڪ اين اي 154 تي ڪامياب ٿيل صديق بلوچ جي ڪاميابي کي ڪالعدم قرار ڏيندي ٻيهر اليڪشن ڪرائڻ جو حڪم ڏئي ڇڏيو. ملتان جي اليڪشن ٽربيونل، اين اَي هڪ سئو 54 لوڌران جي چونڊ ڌانڌلي ڪيس جو فيصلو ٻڌائي ڇڏيو. فيصلي موجب 2013ع جي عام چونڊن ۾ ڪامياب ٿيل نون ليگ ايم اين اي صديق خان بلوچ جي ڪاميابي کي ڪالعدم قرار ڏنو ويو آهي جنهن سبب هن تڪ تي ٻيهر اليڪشن ڪرائي وڃي. نون ليگ جي ٽئين وڪيٽ ڪيرائڻ تي اليڪشن ٽربيونل ٻاهران توڙي سڄي ملڪ ۾ موجود تحريڪ انصاف جا ڪارڪن جشن ملهائي رهيا آهن. فيصلو ٻـُڌائڻ ۾ دير ڪرڻ تي نون ليگ ۽ پي ٽي آءِ ڪارڪن هڪٻئي سان هٿين پئجي ويا. ٻنهي جماعتن جي ڪارڪنن هڪٻئي تي چماٽن جي برسات ڪري ڏني جڏهن ته پارٽي جهنڊن جي ڏنڊن جو به استعمال ڪيو. نون ليگ ۽ پي ٽي آءِ ڪارڪنن وچ ۾ ٽڪراءُ اڌ ڪلاڪ تائين جاري رهيو، جڏهن ته پوليس اهلڪارن وچ ۾ اچي صورتحال تي ڪنٽرول ڪري ورتو. 2013ع جي عام چونڊن ۾ اين اي هڪ سئو 54 ۾ تحريڪ انصاف جي جهانگرين ترين ۽ آزاد اميدوار صديق خان بلوچ ۾ مقابلو ٿيو هو. صديق بلوچ 86 هزار هڪ سئو 77 ووٽ حاصل ڪري تحريڪ انصاف جي جهانگرين ترين کي هارائي ڇڏيو هو جڏهن ته جهانگرين ترين کي 77 هزار 955 ووٽ مليا هئا. صديق بلوچ اليڪشن ۾ ڪامياب ٿيڻ بعد نواز ليگ ۾ شامل ٿيو هو. جهانگرين ترين چونڊن ۾ ڌانڌلي جو الزام لڳائيندي اليڪشن ٽربيونل ۾ پٽيشن داخل ڪرائي هئي.

 

حساس اداري جي ڪارروائي، سنڌ هائر ايجوڪيشن ڪميشن جو چيئرمين ڊاڪٽر عاصم حسين گرفتار

ڪراچي (اسٽاف رپورٽر) سنڌ هائر ايجوڪيشن ڪميشن جي چيئرمين ۽ اڳوڻي صدر آصف علي زرداري جي جو ويجهو ساٿي ڊاڪٽر عاصم کي حساس اداري حراست ۾ وٺي ڇڏيو آهي ذريعن مطابق هائر ايجوڪيشن ڪميشن جو چيئرمين ۽ اڳوڻو پيٽروليم صلاحڪار ڊاڪٽر عاصم ڪراچي جي علائقي ڪلفٽن ۾ موجود هو ته سول ڪپڙا پهريل اهلڪارن کيس تحويل ۾ ورتو ڊاڪٽر عاصم حسين جي گرفتار ڪلفٽن ۾ هائر ايجوڪيشن ڪميشن جي دفتر مان ڪرپشن جي الزام طور ڪئي ويئي آهي حراست وقت ڊاڪٽر عاصم حسين ڊائون ميڊيڪل يونيورسٽي جي وائيس چانسلر جي مقرري لاءِ انٽرويوز ڪري رهيو هو سول ڪپڙا پهريل اهلڪارن کي قانون لاڳو ڪندڙ ادارن جي مدد حاصل هئي ڊاڪٽر عاصم حسين کي نامعلوم هنڌ تي منتقلڪيو ويو آهي هوڏانهن ترجمان نيب جو چوڻ آهي ته ڊاڪٽر عاصم حسين جي خلاف قومي احتساب بيورو ۾ ڪوئي ڪيس نه آهي نيب ان جي خلاف ڪائي ڪارروائي نه ڪئي آهي ڊاڪٽر عاصم آصف زرداري جو ويجهو دوست ۽ ذاتي ڊاڪٽر به آهي هو ڪجهه ڏينهن اڳ ئي لنڊن مان وطن پهتو هو لنڊن ۾ قيام دوران هن آصف زرداري سان ڪيتريون ئي ملاقاتون پڻ ڪيون.

 

شاهه رخ ۽ ڪاجل سان گڏ ”دل والي“ ۾ جيڪڏهن مان سٺي اداڪاري ڪئي آهي ته ان ۾ ساٿي اداڪار ورن ڌون جي مدد شامل آهي: ڪرتي سنن

ممبئي (شوبز نيوز) بالي ووڊ اداڪارا ڪرتي سينن چيو آهي ته شاهه رخ ۽ ڪاجل سان گڏ ”دل والي“ ۾ جيڪڏهن مان سٺي اداڪاري ڪئي آهي ته ان ۾ ساٿي اداڪار ورن ڌون جي مدد شامل آهي، ڪرتي سنن پنهنجي سٺي ڪم جو سڄو ڪريڊٽ ورن کي ڏيندي چيو ته ورن ڌون ۾ اداڪاري جي ڀرپور توانائي موجود آهي، جيڪڏهن اهڙو ساٿي اداڪار گڏ هجي ته نئين اداڪار لاءِ سٺو سنئوڻ ثابت ٿيندو، ڪرتي موجب ورن ڌون هڪ سنجيده اداڪار آهي، جيڪو پنهنجي جونيئرن کي سيکارڻ فرض سمجهي ٿو، ورن نه رڳو اداڪاري پر فلم ٺهڻ واري سموري عمل کي اک ۾ رکي ان مان پرائڻ جي ڪوشش ڪندو آهي، سندس بهترين ذهنيت سبب هن سان گڏ ڪم ڪندي تمام گھڻو مزو پڻ ماڻيو، جنهن کي ڪنهن به صورت ۾ وساري نه ٿو سگهجي، ڪرتي سينن موجب کيس شاهه رخ ۽ ڪاجول سان گڏ فلم جا سين فلم بند ڪرائڻ جو بي صبري سان انتظار پڻ آهي.

 

اميد آهي ته مان پهرين مسلمان ناري هوندس جيڪا مس اٽلي بڻبي:اهالم برنس

ميڊرڊ (شوبز نيوز) يورپ جي ملڪ اٽلي جي مسلمان ناري اهالم برنس جو چوڻ آهي ته کيس اميد آهي ته هو پهرين مسلمان ناري هوندي جيڪا مس اٽلي بڻبي، 20 سالن جي نوجوان ماڊل ۽ فيشن ڊزائينر ناري جو چوڻ هو ته مٿس تنقيد ڪئي پئي وڃي، ته هو اسلام جي بي حرمتي ڪري رهي آهي، ناري جو چوڻ هو ته کيس ڪجهه ماڻهو چئي رهيا آهن ته مسلمان هجڻ جي ناتي ڪنهن خوبصورتي واري مقابلي ۾ حصو وٺڻ شريعت جي خلاف آهي ۽ ان عمل سان مان اسلام کي بدنام پئي ڪريان، مراڪش سان تعلق رکندڙ مسلمان ناري وڌيڪ چيو ته سندس والدين کي ڌمڪيون ڏنيون پيون وڃن، هن چيو ته سوڙها ڪپڙا پائڻ تي سماجي رابطن واري ويب سائيٽ تي کيس گهٽ وڌ ڳالهايو پيو وڃي، هن چيو ته کيس اهڙي ننڍڙي سوچ وارن ماڻهن جي ڪا به پرواهه ناهي ۽ مراڪش ۾ ويٺل پنهنجي ڏاڏي جي دعائن سان هن ڀيري اٽلي جي مقامي خوبصورتي واري مقابلي ۾ پهرين مسلمان مس اٽلي بڻجڻ جو رڪارڊ جوڙينديس.

 

بالي ووڊ اداڪار عامر خان فلم جو ڪلائيميڪس ڏسي هڪ ڀيرو ٻيهر روئي ويٺو

ممبئي (شوبز نيوز) بالي ووڊ اداڪار عامر خان کي فلم جو ڪلائيميڪس ڏسڻ لاءِ دعوت ڏني وئي ته هو هڪ ڀيرو ٻيهر روئي ويٺو. ڀارتي ميڊيائي رپورٽن موجب نکيل ايڊواڻيءَ جي فلم ”ڪٽي بٽي“ جيڪا جلد ئي رليز ٿيڻ واري آهي جنهن ۾ عامر خان جو ڀاڻج اداڪار عمران خان ۽ بالي ووڊ ڪوئين ڪنگنا رناوت مرڪزي ڪردار نڀائي رهيا آهن، بالي ووڊ اداڪار عامر خان جڏهن فلم جو ڪلائيميڪس ڏٺو ته هو پنهنجي جذبات تي قابو رکي نه سگھيو ۽ روئي ويٺو. فلم جي هدايتڪار نکيل ايڊواڻيءَ ان ڳالهه جي تصديق ڪندي چيو ته عامر خان فلم جي آخري 22 منٽن تائين لاڳيتو ڳوڙها ڳاڙيندو رهيو. واضح رهي ته عامر خان عيد تي رليز ٿيندڙ سلمان خان جي نئين فلم ”بجرنگي ڀائي جان“ کان تمام گھڻو متاثر ٿي پڻ روئي ويٺو هو ۽ هن فلم کي سلمان خان جي ڪيريئر جي بهترين فلم قرار ڏنو هو.

 

شاهه رخ ۽ ڪيپريو ”ايڪسٽريم سٽي“ نالي هالي ووڊ فلم ۾ گڏ ڪم ڪندا

ممبئي/ برلن (شوبز نيوز) بالي ووڊ جي بادشاهه شاهه رخ خان بابت دعويٰ ڪئي وئِي آهي ته هو هالي ووڊ جي چاڪليٽي هيرو ۽ ٽائٽينڪ فيم ليونارڊي ڪيپريو سان گڏ هڪ ئي فلم ۾ نظر اچي رهيو آهي، بالي ووڊ ۽ هالي ووڊ جي گڏيل ذريعن دعويٰ ڪئي آهي ته شاهه رخ ۽ ڪيپريو ”ايڪسٽريم سٽي“ نالي هالي ووڊ فلم ۾ گڏ ڪم ڪندا، جيڪا مختلف ٻولين ۽ ثقافتن تي ٺهندڙ هڪ نرالي فلم هوندي، ذريعن شاهه رخ بابت دعويٰ ڪئي ته هو فلم جي اسٽوري بابت ڳالهه ٻولهه ڪرڻ لاءِ هدايتڪار ماٽن اسڪورس سان ڳجهه ڳوهه ۾ هڪ ميٽنگ پڻ ڪري آيو آهي، جڏهن ته اهڙين دعوائن بعد شاهه رخ ۽ ڪيپريو جي گڏيل فلم جو هڪ خيالي پوسٽر پڻ جاري ڪيو ويو، هوڏانهن  شاهه رخ خان جي ويجهن ذريعن ان دعويٰ کي رد ڪندي چيو ته پوسٽر شاهه رخ جي ڪنهن چاهيندڙ پاران ٺاهيو ويو آهي، جنهن تي ڪا ڪاوڙ يا وري خراب ڳالهه ناهي، پر شاهه رخ اڄ ڪلهه بالي ووڊ جي ڪيترن ئي پراجيڪٽن ۾ مصروف آهي، تنهنڪري هو ڪنهن ٻئي پراجيڪٽ بابت ڪجهه سوچي به نه ٿو سگهي ته هالي ووڊ فلم ۾ ڪم ڪيئن ڪندو؟ شاهه رخ جي ذريعن ان خبر کي بلڪل رد ڪيو ۽ چيو ته هو هالي ووڊ  فلم ۾ جڏهن به ڪم ڪيو ته اڳواٽ مداحن کي ٻڌائيندو.

 

انگلش ڪرڪيٽ بورڊ ايندڙ سال پاڪستاني ڪرڪيٽ ٽيم پاران انگلينڊ جي دوري جو اعلان ڪري ڇڏيو

لنڊن (اسپورٽس نيوز) انگلش ڪرڪيٽ بورڊ ايندڙ سال پاڪستاني ڪرڪيٽ ٽيم پاران انگلينڊ جي دوري جو اعلان ڪري ڇڏيو آهي. اسپاٽ فڪسنگ ڪيس کان پوءِ پهريون ڀيرو ملڪي ٽيم انگلينڊ جو دورو ڪندي. پاڪستاني ٽيم انگلينڊ جي دوري لاءِ ايندڙ سال 29 جون 2016ع تي برطانيا پهچندي، پاڪستان ڪرڪيٽ ٽيم پنهنجي ڊگھي دوري ۾ ٽيم انگلينڊ خلاف 4 ٽيسٽ ميچون، 5 ون ڊي ۽ هڪ ٽي ٽوئنٽي ميچ کيڏندي، جڏهن ته ان ٽوئر دوران ملڪي ٽيم 2 ون ڊي ميچن ۾ آئرلينڊ سان مهاڏو پڻ اٽڪائيندي. پاڪستاني ٽيم پنهنجي پهرين ٽيسٽ ميچ 14 جولاءِ 2016ع تي لارڊز ۾ کيڏندي. پاڪستان ڪرڪيٽ ٽيم آخري ڀيرو 2010ع ۾ انگلينڊ جو دورو ڪيو هو، جڏهن پاڪستان جا ٽي رانديگر محمد عامر. آصف ۽ سلمان بٽ اسپاٽ فڪسنگ ڪيس ۾ پابنديءَ جو شڪار ٿيا هئا.

 

مان بدعنوان ناهيان ۽ فٽبال ۾ ڪا گھوٻي ناهي ڪئي:سيپ بلاٽر

زيورخ (اسپورٽس نيوز) فٽبال جي عالمي تنظيم فيفا جي لٿل صدر سيپ بلاٽر چيو آهي ته هو بدعنوان ناهي ۽ فٽبال ۾ ڪا گھوٻي ناهي ڪئي. سيپ بلاٽر سنه 1998ع کان فٽبال جي عالمي تنظيم جي صدر رهيو آهي ۽ هو فيفا ۾ ڪرپشن جي الزامن تحت ٿيندڙ جاچ دوران ايندڙ سال فيبروريءَ ۾ عهدي تان استعيفيٰ ڏئي ڇڏيندو. فيفا هلندڙ سال مئي ۾ 79 سالا سيپ بلاٽر کي 5 ڀيرو صدر چونڊيو هو. سيپ بلاٽر موجب مون ايئن ان جي لاءِ ڪيو ڇو ته مون فيفا جي حفاظت ڪرڻ پي چاهي. مان ايترو مضبوط آهيان جو پنهجنجي حفاظت پاڻ ڪري سگھان ٿو. سندس وڌيڪ چوڻ هو ته مون جيڪي ڪيو ۽ نه ڪيو ان جي مون کي ڄاڻ آهي. مان ڄاڻان ٿو ته مان هڪ ايماندار ماڻهو آهيان، مان بدعنوان ۽ پريشان ناهيان

 

عالمي ڪرڪيٽ ڪائونسل نئين ٽيسٽ رينڪنگ جاري ڪري ڇڏي

دبئي (اسپورٽس نيوز) عالمي ڪرڪيٽ ڪائونسل نئين ٽيسٽ رينڪنگ جاري ڪري ڇڏي آهي، جنهن موجب پاڪستاني ٽيم جو رانديگر يونس خان هڪ درجو ترقي کان پوءِ بهترين رانديگرن جي لسٽ ۾ 7 کان 6 نمبر تي اچي ويو آهي، آءِ سي سي پاران جاري ڪيل نئين ٽيسٽ رينڪنگ موجب بهترين رانديگرن جي لسٽ ۾ پهرين نمبر تي آسٽريليا جو اسٽيون سمٿ آهي، جڏهن ته قومي ٽيم جو رانديگر يونس خان هڪ درجو ترقي کان پوءِ 7 کان 6 نمبر تي اچي ويو، نئين رينڪنگ موجب ٽاپ ٽين بالرن ۾ پاڪستان جو اسپنر ياسر شاهه هڪ درجو ترقي کان پوءِ 5 کان 4 نمبر تي اچي ويو آهي، جڏهن ته پهرين نمبر تي ڏکڻ آفريڪا جو ڊيل اسٽين موجود آهي، ٽيمن جي ٽيسٽ رينڪنگ ۾ پاڪستان 2419  پوائنٽن سان چوٿين پوزيشن تي آهي، جڏهن ته پهرين پوزيشن تي ڏکڻ آفريڪا 3008 پوائنٽن سان موجود آهي