تازيون خبرون

Daily Archives: August 24, 2015

حڪومت پاران ايگزيٽ ڪنٽرول جي بليڪ لسٽ ختم ڪرڻ جو اعلان

اسلام آباد(بيورو)  وفاقي گهرو وزير چوڌري نثار علي خان جو چوڻ آهي ته ماضي ۾ ڪنٽرول لسٽ کي انتقامي ڪاررواين لاءِ استعمال ڪيو ويو. هاڻي اعليٰ عدالت جي هدايت تي ئي ڪو نالو شامل ڪيو ويندو.گهرو وزير چوڌري نثار علي خان ايگزيٽ ڪنٽرول جي بليڪ لسٽ ختم ڪرڻ جو اعلان اي سي ايل ۾هير ڦير بابت بريفنگ جي دوران ڪيو. چوڌري نثار علي خان جو چوڻ هو ته ماضي ۾ ايگزيٽ ڪنٽرول لسٽ کي انتقامي ڪارروين لاءِ استعمال ڪيو ويو پر هاڻي ائين نه ٿيندو. ڊائيريڪٽوريٽ آف پاسپورٽس اختيار واپس ورتا ويا آهن. اي سي ايل ۾ ڪو به نالو سپريم ڪورٽ ۽ هائيڪورٽس جي هدايت تي ئي شامل ڪيو ويندو.گهرو وزير ٻڌايو ته اي سي ايل ۾ وڌل نالن کي رويو جو حق حاصل هوندو. ٽن سالن ۾ ڪيس کي آخري پڄاڻي تائين پهچايو ويندو، پر ٻٽي پاسپورٽ جو غلط استعمال ڪندڙن کي سزا پوري ڪرڻي پوندي.چوڌري نثار علي خان اهو به ٻڌايو ته سوا سال اڳ اغوا ڪيل چيني سائيڪلسٽ کي آزاد ڪرايو ويو آهي، جنهن کي جلد چيني سفارتخاني جي حوالي ڪيو ويندو.

 

ڊيره غازي خان لڳ بس جو موٽر سائيڪل رڪشا کي ٽڪر، هڪ ئي ڪٽنب جي 5 ڀاتين سميت 6 ڄڻا فوت

ڊيره غازي خان (اي پي پي) ڊيره غازي خان لڳ ڄام پور روڊ تي آچر ڏهاڙي روڊ حادثي ۾ هڪ ئي ڪٽنب جي 5 ڀاتين سميت 6 ڄڻا فوت ٿي ويا آهن. ريسڪيو 1122 مطابق ڪراچي کان ڊيره غازي خان ايندڙ بس ڄام پور روڊ وٽ گرڊ اسٽيشن لڳ موٽر سائيڪل رڪشا کي ٽڪر هنيو جنهن جي نتيجي ۾ منور، سندس زال ۽ 3 ڌيئرون 8 سالا فروه، 5 سالا مهتاب ۽ 2 سالا ثنا ٿڏي تي ئي فوت ٿي ويا ۽ 4 ڄڻا زخمي ٿي پيا. ريسڪيو اهلڪارن زخمين کي ضلعي هيڊ ڪوارٽر اسپتال منتقل ڪيو آهي. هوڏانهن حادثي واري هنڌ گڏ ٿيل ماڻهن بس ڊرائيور کي مارڪٽ ڪرڻ ۽ مسافرن کي بس مان لاهڻ بعد بس کي باهه ڏئي ڇڏي. اطلاع تي پوليس پهچي هنگامو ڪندڙ ٻن ماڻهن کي حراست ۾ وٺي مڇريل ماڻهن کي ڇڙ وڇڙ ڪيو.

 

اليڪشن ٽربيونل جي فيصلي جو احترام ڪيون ٿا پر اتفاق نه: پرويز رشيد

اسلام آباد(بيورو) اسلام آباد ۾ ملسم ليگ ن جي ڪارڪنن جي اعزاز ۾ ٿيل تقريب کانپوءِ ميڊيا سان ڳالهائيندي، وفاقي سڌ سماءَ واري وزير پرويز رشيد اليڪشن ٽربيونل لاهور جي فيصلي تي سخت تنقيد ڪندي، سپريم ڪورٽ ۾ چئيلينج ڪرڻ جو اعلان ڪري ڇڏيو. سندس چوڻ هو ته ٽربيونل جو فيصلو تڪراري آهي. فيصلي ۾ اليڪشن ڪميشن کي ذميوار بڻايو ويو پر ن ليگ کي سزا ۽ پي ٽي آئي کي ڪلين چٽ ڏني وئي.پرويز رشِيد جو چوڻ هو ته  عمران خان کي گهٽ ووٽن سان مات تي سڪون ناهي مليو.اياز صادق ۽ خواجا سعد رفيق جي تڪن  ۾ چونڊون ٿيون ته هري پور وارا تاريخ ورجائيندا. سندس چوڻ هو ته ملتان ۾ پي ٽي آئي جي جلسي دوران ماڻهو مرندا رهيا پر قيادت ڪنٽينر کان هيٺ نه لٿي، عمران خان ڪنٽينر تي منرل واٽر پئندو رهيو ۽ ماڻهن کي ايمبلولينس به نه ملي. پرويز رشيد جو چوڻ هو ته عمران خان جي پارٽي ۾ ڊڪٽيٽرشپ آهي، ان ڪري کيس ڪٿي به ڪاميابي نه ٿي ملي.

 

امن ڳالهين کان ڀارت جو انڪار خطي ۾ ڇڪتاڻ جو سبب بڻجندو: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته پاڪستان پيپلز پارٽي ايم ڪيو ايم کي ايوانن ۾ ڏسڻ جي خواهشمند آهي، وڏي وزير سيد قائم علي شاهه کي ايم ڪيو ايم جي بنيادي مطلب ڪراچي آپريشن لاءِ نگران ڪميٽي جوڙڻ تي ڪو اعتراض نه آهي. امن ڳالهين کان ڀارت جو انڪار خطي ۾ ڇڪتاڻ جو سبب بڻجندو. خانگي ٽي وي سان ڳالهائيندي سيد خورشيد شاهه چيو ته فاروق ستار کي ڳالهيون ختم نه ڪرڻ جو مشورو ڏنو آهي، پاڪستان پيپلز پارٽي ايم ڪيو ايم کي ايوانن ۾ ڏسڻ جي خواهشمند آهي، سنڌ جي وڏي وزير سيد قائم علي شاهه کي ايم ڪيو ايم جي بنيادي مطلب ڪراچي آپريشن لاءِ نگران ڪميٽي جوڙڻ تي ڪو اعتراض نه هئڻ گهرجي. سيد خورشيد شاهه چيو ته ڪراچي ۾ فري اينڊ فيئر آپريشن ڏسڻ چاهيون ٿا، هڪ سوال جي جواب ۾ هن چيو ته امن ڳالهين کان ڀارت جو انڪار خطي ۾ ڇڪتاڻ جو سبب بڻجندو، مودي سرڪار جارحياڻي سياست ڇڏي اهڙي سياست ڪر ي جيڪا سڀني لاءِ بهتر هجي، ضد سڄي خطي کي خطري وجهي ڇڏيندو، هن چيو ته وزيراعظم کي هن صلاح ڏني هئي ته مولانا فضل رحمان ئي ايم ڪيو ايم کي پرچائي سگهي ٿو.

 

اسحاق ڊار ايم ڪيو ايم اڳواڻن کي اڄ وزيراعظم سان ملاقات ڪرائڻ جي خاطري ڪرائي ڇڏي

اسلام آباد(بيورو) ناڻي واري وفاقي وزير اسحاق ڊار جي يو آئي سربراهه مولانا فضل الرحمان کي پڪ ڏياري آهي ته حڪومت ڪراچي آپريشن بابت ايم ڪيو ايم جون جائز شڪايتون ختم ڪرڻ لاءِ تيار آهي.اسحاق ڊار ٽيلي فون تي مولانا فضل الرحمان سان رابطو ڪيو جنهن دوران ايم ڪيو ايم جي استعيفائن کانپوءِ پيدا ٿيل صورتحال تي ڳالهه ٻولهه ڪئي وئي، ان موقعي تي مولانا فضل الرحمان وفاقي وزير کي ايم ڪيو ايم سان ٿيل ڳالهه ٻولهه بابت ٻڌايو ۽ وزيراعظم نوازشريف سان متحده اڳواڻن جي ملاقات لاءِ سڀاڻي لاءِ ئي وقت گهري ورتو.ذريعن مطابق  ٽيليفونڪ ڳالهه ٻولهه دوران اسحاق ڊار وزيراعظم سان ايم ڪيو ايم وفد کي ملرائڻ تي راضپو ظاهر ڪندي چيو ته حڪومت استعيفائن وارو معاملو ڳالهين ذريعي حل ڪرڻ چاهي ٿي.

 

بلاول ڀٽو پاران پنجاب ۾ مڪاني چونڊ مهم پاڻ هلائڻ جو فيصلو

لاهور(بيورو) پيپلزپارٽي جي چئيرمين بلاول ڀٽو  زرداري پنجاب ۾ مڪاني چونڊن لاءِ پارٽي مهم جي واڳ پاڻ سنڀالڻ جو فيصلو ڪيو آهي، ان سلسلي ۾ هن پنجاب جي اڳواڻن جو اهم اجلاس 25 آگسٽ تي اسلام آباد ۾ گهرائي ورتو آهي. بلاول ڀٽو سڀاڻي اسلام آباد پهچندو، جتي پهرين مرحلي  هو مڪاني چونڊن لاءِ رٿيل ضلعن جي پارٽي عهديدارن سان ملاقات ڪندو. 25 آگسٽ تي فيصل آباد ضلعي ۽ شهر جا اجلاس زرداري هائوس اسلام آباد ۾ ٿيندا، اهڙي ريت 26 آگسٽ تي ننڪانا صاحب، قصور 27 آگسٽ تي اوڪاڙا، پاڪ پتن، 28 آگسٽ تي گجرات، لاهور ۽ 29 آگسٽ تي ڀڪر ۽ چڪوال جا اجلاس گهرايا ويا آهن. پارٽي قيادت جي درخواست تي ڏکڻ پنجاب جي ٽن ضلعن جو اجلاس بلاول هائوس لاهور ۾  سڏائڻ جو امڪان آهي پر ان ڏس ۾ اڃان آخري فيصلو ناهي ڪيو ويو.

 

ڪشمير جو معاملو ايجنڊا تي ڪڏهن هيو ئي نه ان کي پهريان طئه ڇو نه ڪيو ويو؟: ڀارتي گهرو وزير

نئين دهلي(اين اين آءِ) ڀارتي گهرو وزير راج ناٿ سنگهه چيو آهي ته پاڪستان پاران قومي سلامتي مشيرن جون ڳالهيون ملتوي ڪرڻ بدقسمتي آهي، ڪشمير جو معاملو ايجنڊا تي ڪڏهن هيو ئي ڪون، ان کي اڳواٽ ڇو نه طئه ڪيو ويو، آچر تي صحافين سان ڳالهائيندي هن چيو ته ڀارت ڳالهيون ڪرڻ جو خواهشمند هيو، هن چيو ته هي ايجنڊا پهريان ڇو نه طئه ڪيو ويو، هن چيو ته ڀارت سمورن ڀاڙيسري ملڪن سان بهتر لاڳاپن جو خواهشمند آهي.

 

سياسي صورتحال ۽ اين اي 122 جي فيصلي تي غور لاءِ پي ٽي آءِ جي ايڊوائزري ڪائونسل جو اجلاس طلب

اسلام آباد(بيورو) تحريڪ انصاف جي چيئرمين عمران خان موجوده سياسي صورتحال، اين اي 122 جي فيصلي سميت مختلف معاملن تي غور لاءِ پارٽي جي ايڊوائيزري ڪائونسل جو اجلاس اسلام آباد ۾ طلب ڪري ورتو.عمران خان جي صدارت هيٺ بني گالا ۾ ٿيندڙ پارٽي جي ايڊوائيزري ڪائونسل جي اجلاس ۾ شاهه محمود قريشي، جهانگير ترين، چوڌري سرور، ڊاڪٽر عارف علوي، شيرين مزاري سميت پارٽي جا مرڪزي ۽ صوبائي اڳواڻ شرڪت ڪندا.اجلاس ۾ ملڪ جي موجوده سياسي صورتحال ۽ پارٽي جي اليڪشن بابت مشاورت ڪئي ويندي.اجلاس ۾ اين اي 122 جي ٽربيونل جي فيصلي تي به غور ويچار ڪيو ويندو..

اليڪشن ٽربيونل جو فيصلو مڪمل تياري سان سپريم ڪورٽ ۾ چيلينج ڪيو ويندو: اياز صادق

لاهور (اين اين آءِ) مسلم ليگ ن جي اڳواڻ سردار اياز صادق چيو آهي ته اليڪشن ٽربيونل جو فيصلو پوري تياري سان سپريم ڪورٽ ۾ چيلينج ڪيو ويندو، سياسي ورڪر ڪڏهن به چونڊ کان ناهي ڀڃندو پر هو پنهنجو آئيني حق ناهي ڇڏيندو، جيڪڏهن اسان پنهنجي آئين جو ذڪر نه ڪريون ته اها گهٽ دانشمندي چئبي، نادرا جو چيئرمين ۽ اليڪشن ڪميشن سميتهر ڪنهن جي ڪردار جو سپريم ڪورٽ کي فيصلو ڪرڻو آهي، اسپيڪر جي غير موجودگي ۾ ڊپٽي اسپيڪر معاملا هلائي سگهي ٿو، پهريون معاملو اليڪشن ٽربيونل جي فيصلي کي چيلينج ڪرڻو آهي، اسان کي اسٽي آرڊر ڪڏهن ملي ٿو ۽ ان کانپوءِ اسان جو اڳيون قدم ڇا هوندو ان بابت قيادت سان مشاورت ڪندس، هڪ انٽرويو ۾ هن چيو ته عمران خان ڪا ذاتي ويڙهه نه آهي، ان سميت سڀني سان عزت ۽ احترام جو رشتو آهي ۽ اهو رهندو، ان سان ڪافي سالن کان تعلق آهي، هي تعلق ويندي ويندي به گهٽ ۾ گهٽ 50 کان 60 سال وٺندو ۽ خبر ناهي ته ڪنهن جي ڪيتري حياتي آهي، هن چيو ته اليڪشن ٽربيونل جي فيصلي ۾ جج صاحب پنهنجي تعريف ڪئي آهي، فيصلي ۾ واضح طور تي اليڪشن مشينري جي ناڪامي جي ڳالهه ڪئي وئي آهي ۽ مشينري نه منهنجي ڪنٽرول ۾ هئي، هن چيو ته عدالت ۾ چيلينج ڪندس فائنڊنگ ۾ اليڪشن ڪميشن تي جيترو بار وڌو ويو آهي اهو ايترو نه آهي، هن چيو ته اسٽي آرڊر ملڻ جي صورت ۾ قومي اسيمبلي وڃڻ ۽ اسيمبلي سيٽ سنڀالڻ جي سوال جي جواب ۾ هن چيو ته هن فيصلي کانپوءِ اخلاقي طور تي قومي اسيمبلي جو ميمبر ۽ ان کانپوءِ اسپيڪر ناهيان رهيو، اليڪشن ٽربيونل جي فيصلي کي پوري تياري سان چيلينج ڪنداسين ۽ جج صاحب پاران فيصلي جي تصدقي ڪاپي اڄ ڏيڻ وج چيو ويو آهي جنهن کانپوءِ پٽيشن داخل ڪئي ويندي.

 

افغانستان پاران راڪيٽ حملو، 4 پاڪستاني فوجي شهيد، 4 زخمي

راولپنڊي (اين اين آءِ) پاڪ افغان سرحد تي خيبر ايجنسي جي علائقي ۾ افغانستان پاران فائر ڪيل راڪيٽ حملي ۾ 4 پاڪستاني فوج شهيد ۽ 4 زخمي ٿيا، پاڪستاني فوجين جي جوابي ڪارروائي تي دهشتگردن فائرنگ بند ڪر ي ڇڏي، آءِ ايس پي آر مطابق افغان سرحد ويجهو افغانستان پاران فائر ڪيل راڪيٽ پاڪستاني چوڪي تي ڪرڻ سان 4 فوجي شهيد ۽ 4 زخمي ٿي پيا، بيان ۾ ٻڌايو ويو ته آچر تي خيبر ايجنسي جي لڳ افغان سرحد هن پار کان دهشتگردن دره اخوند والا ۾ 8 هزار فواچائي تي قائم پاڪستاني فوجي چوڪي کي هڪ راڪيٽ ذريعي نشانو بڻايو، حملي ۾ 4 فوجي شهيد ٿي پيا.