تازيون خبرون

Daily Archives: August 6, 2015

سپريم ڪورٽ فوجي عدالتون برقرار رکڻ جو فيصلو ٻڌائي ڇڏيو

اسلام آباد (بيورو) 18 هين ترميمن خلاف درخواستون رد ڪري ڇڏيون آهن، عدالت جي فيصلي کانپوءِ فوجي عدالتون بحال ٿي ويون آهن، 18 هين ترميم جي ٽن ۽ 21 هين ترميم جي ٽن ججز مخالفت ڪئي. چيف جسٽس ناصر الملڪ جي سربراهي ۾ سپريم ڪورٽ جي 17 رڪني فل ڪورٽ بينچ آئيني ترميمن خلاف درخواستن تي مختصر فيصلو جاري ڪيو. عدالت اڪثريت راءِ جي بنياد تي 21 هين ترميم خلاف درخواستون رد ڪندي فوجي عدالتون برقرار رکڻ جو حڪم ڏنو. فوجي عدالتن جي قيام جي حق ۾ 11 ججز فيصلو ڏنو، جڏهن ته جسٽس جواد ايس خواجه ۽ جسٽس قاضي فائز عيسيٰ سميت 6 ججز فيصلي جي مخالفت ڪئي. جسٽس جواد ايس خواجه  فيصلي ۾ 25 صفحن تي ٻڌل اختلافي نوٽ پڻ لکيو آهي، جنهن ۾ چيو ويو آهي ته ضروري ناهي ته پارليامينٽ هر قانونسازي عوام جي خواهشن مطابق ڪري، عدالتن جا فيصلا فلسفن ۽ سوچ تي ٻڌل نه هئڻ گهرجن. جسٽس جواد ايس خواجه اختلافي نوٽ ۾ لکيو ته پارليامينٽ مقتدر ادارو ناهي، ڪجهه وقتن تي عدالت پارليامينٽ جي ترميمن کي ڪالعدم قرار ڏئي سگهي ٿي. جسٽس جواد ايس خواجه چيو ته هو جسٽس قاضي فائز عيسيٰ سان متفق آهي ته 21 هين ترميم کي ڪالعدم قرار ڏيڻ گهرجي. عدالت، 21 هين ترميم سان گڏ 18 هين ترميم خلاف به درخواستون اڪثريتي بنياد تي رد ڪري ڇڏيون آهن، ترميم جي حمايت ۽ 3 ججز حمايت ڪئي. 18 هين ترميم خلاف درخواستن ۾ اعليٰ عدليه ۾ ججز جي مقرري بابت پارليامينٽ جي ڪردار، آئين جي بنيادي ڍانچي ۽ ان بابت پارليامينٽ کي آئين سازي بابت ڏنل اختيارن جا سوال اٿاريا ويا هئا، جڏهن ته 21 هين ترميمن خلاف درخواست ۾ انصاف جون گهرجون پوريون ڪرڻ کانسواءِ فوجي عدالتن جي قيام واري نقطن کي اٿاريو ويو هو. ٻئي طرف اسلام آباد (بيورو) سـُپريم ڪورٽ بار ايسوسيئيشن 21 هين ترميم بابت عدالتي فيصلي کي چيلينج ڪرڻ جو اعلان ڪري ڇڏيو آهي، درخواستگذار ڪامران مرتضي چيو آهي ته غلطي سڀني کان ٿي سگهي ٿي، هـُو پنهنجي موقف تي قائم آهن. سپريم ڪورٽ ٻاهران ميڊيا سان ڳالهائيندي سپريم ڪورٽ بار ايسوسيئيشن جي اڳوڻي صدر  ڪامران مرتضيٰ چيو ته 21 هين ترميم ۾ بنيادي آئين جي ڍانچي وارو معاملو اٿاريو ويو. هن چيو ته سپريم ڪورٽ جي تفصيلي فيصلي بعد جائزو وٺي نظرثاني درخواست داخل ڪرائي ويندي. ڪامران مرتضيٰ چيو ته غلطي سڀني کان ٿيندي آهي، ٿي سگهي ٿو سپريم ڪورٽ جي ججز کان به غلطي ٿي هجي.

 

وزيراعظم فوجي عدالتون برقرار رکڻ واري فيصلي کي تاريخي قرار ڏئي ڇڏيو

اسلام آباد (بيورو) وزيراعظم فوجي عدالتون برقرار رکڻ واري فيصلي کي تاريخي قرار ڏيندي چيو آهي ته فيصلي سان دهشتگردن کي شڪست ملي آهي، جڏهن ته نواز شريف، هڪ ڀيرو ٻيهر ايم ڪيو ايم ۽ جـَي يو آءِ کي پي ٽي آءِ ميمبرن کي ڊي سيٽ ڪرڻ واريون رٿون واپس وٺڻ جــِي اپيل ڪئي آهي. قومي اسيمبلي کي خطاب ڪندي وزيراعظم چيو ته 18 هين ۽ 21 هين ترميم بابت سپريم ڪورٽ جو فيصلو تاريخي آهي ۽ ان سان سٺا اثر پوندا. نواز شريف چيو ته سپريم ڪورٽ جي فيصلي سان دهشتگردن کي شڪست ملندي ۽ دهشتگردي خلاف جنگ کي فائدو حاصل ٿيندو. سندس چوڻ هو ته غير معمولي حالتن لاءِ غير م عمولي قدم کڻڻ جي ضرورت آهي، الله جو شڪر آهي ته پارليامينٽ جي منظور ڪيل فيصلي جي عدالت به حمايت ڪئي آهي. وزيراعظم چيو ته ملڪ جي سلامتي، ترقي ۽ خوشحالي لاءِ پارليامينٽ اتحاد ۽ اتفاق جو جيڪو رستو اختيار ڪيو آهي ته اهو ئي پنهنجي منزل تي وٺي ويندو. نواز شريف چيو ته آپريشن ضرب عضب، نيشنل ايڪشن پلان، آئيني ترميمن، پاڪ چين اقتصادي راهداري منصوبي ۽ پرڏيهي معاملن تي هنن گڏيل فيصلا ڪيا آهن. هن چيو ته هڪ نئون جمهوري ڪلچر وڌي رهيو آهي، جنهن کي عوام ۽ ملڪي ادارن جي ڀرپور حمايت حاصل آهي. نواز شريف چيو ته ايوان ۾ ويهي هر ميمبر ۽ هر جماعت عوامي مينڊيٽ کڻي آئي آهي، ايوان جي مضبوطي ۾ ئي جمهوريت جي مضبوطي آهي. وزيراعظم چيو ته هن وقت پاڪ فوج ۽ سول ادارا دهشتگردي خلاف فيصلائتي جنگ وڙهي رهيا آهن جڏهن ته هن ويڙهه ۾ ڪاميابي ملي رهي آهي. هن چيو ته هن قوم کي خطاب دوران چيو هو ته جڊيشل ڪميشن جي رپورٽ سندن لاءِ تاريخي آهي ۽ ان کان اڳتي هن نئين سفر جي شروعات ڪرڻ گهرجي. وزيراعظم چيو ته ايم ڪيو ايم ۽ جـَي يو آءِ کان تحريڪ انصاف ميمبرن کي ڊي سيٽ ڪرڻ جون رٿون واپس وٺڻ جي درخواست ڪئي هئي پر مسئلو سندن خواهش موجب حل نه ٿي سگهيو. نواز شريف چيو ته سندن راءِ آهي ته عوامي مينڊيٽ کڻي ايندڙ جماعت پنهنجو ڪردار ادا ڪري ۽ هنن پارٽي ۾ صلاح مشوري کانپوءِ فيصلو ڪوي ته نون ليگ تحريڪ انصاف کي ڊي سيٽ ڪرڻ وارين رٿن جو حصو نه بڻجندي. وزيراعظم چيو ته عمران خان جي گذريل ڏينهن جي ڳالهه ٻولهه سان نه رڳو مولانا فضل الرحمان نه پر هن جا به جذبا مجروح ٿيا، پي ٽي آءِ سربراهه کي اهڙي قسم جي ڳالهه نه ڪرڻ گهـُرجي ها. نواز شريف چيو ته هن ٻنهي جماعتن جي اڳواڻن کي درخواست ڪئي آهي ته تحريڪ انصاف کي ڊي سيٽ ڪرڻ جون رٿون واپس ورتيون وڃن.

 

قومي اسيمبلي ماتحت عدليه اسلام آباد بل 2015، ديواني ملازمين بل 2015 ۽ ڪريڊٽ بيورو بل 2015 جي منظوري ڏيئي ڇڏي

اسلام آباد (بيورو) قومي اسيمبلي ماتحت عدليه اسلام آباد بل 2015، ديواني ملازمين ترميمي بل 2015 ۽ ڪريڊٽ بيورو بل 2015 جي يڪراءِ سان منظوري ڏيئي ڇڏي اربع ڏينهن قومي اسيمبلي ۾ وفاقي وزير قانون ۽ انصاف سينيٽر پرويز رشيد تحريڪ پيش ڪئي ته معدله ماتحت عدليه اسلام آباد 2015 غور هيٺ آندو وڃي ايوان تحريڪ جي منظوري ڏيئي ڇڏي جنهن کان پوءِ اسپيڪر بل جي ايوان ۾ شڪوار منظوري ورتي قانون واري وزير پرويز رشيد تحريڪ پيش ڪئي ته معدله ماتحت عدليه اسلام آباد بل 2015 منظور ڪيو وڦي قومي اسيمبلي جي يڪراءِ سان ان جي منظوري ڏيئي ڇڏي شيخ آفتاب احمد تحريڪ پيش ڪئي ته ديواني ملازم ترميمي بل 2015 غور هيٺ آندو وڃي ايوان تحريڪ جي منظوري ڏيئي ڇڏي جنهن کان پوءِ اسپيڪر ايوان کان بل جي شڪ وار منظوري ورتي

 

عمران خان جي جذباتي سياست تان اسيمبليون قربان نه ٿيون ڪري سگهجن: نثار کهڙو

خيرپور(بيورو)  سنڌ جي اطلاعات ۽ آبپاشي کاتن جي سينئر وزير نثار احمد کهڙو چيو آهي ته عمران خان جذباتي سياست سبب بند گهٽيءَ ۾ ڦاسي پيو آهي، سندس جذباتي سياست تان اسيمبليون قربان نه ٿيون ڪري سگهجن، شهيد راڻي بينظيرڀٽو اسيمبلين جو وجود بچائڻ لاءِ پنهنجي جان قربان ڪري ڇڏي، مناسب هوندو ته جمهوريت جي بقا لاءِ پي ٽي آءِ ميمبرن جي پارليامينٽ مان ميمبرشپ رد نه ڪئي وڃي، سنڌوءَ جو مکيه وهڪرو پنهنجي رفتاري سان سکر مان اڳتي وڌي رهيو آهي اُن کي ڪٿي به رستي ۾ رنڊڪون نه آهن، چئن پنجن ڏينهن ۾ 6 کان ساڍا 6 لک ڪيوسڪ پاڻي ڪوٽڙي بئراج وٽ پهچي ويندو، هن وقت هاءِ فلڊ جي صورتحال مڪمل حڪومت جي ڪنٽرول ۾ آهي ۽ بچاءَ بندن جي 24 ڪلاڪ نگراني ڪئي پئي وڃي. سکر بئراج تي ايڪسيئين سکر بئراج جي آفيس ۾ پريس ڪانفرنس کي خطاب ڪندي سينئر صوبائي وزير اطلاعات ۽ آبپاشي نثار احمد کهڙو چيو ته هن وقت هاءِ فلڊ سيزن آهي پر ٻن ڏينهن کان پاڻي گهٽجڻ شروع ٿيو آهي، 3 ڏينهن اڳ گڊو وٽ 7 لک 54 هزار ڪيوسڪ پاڻي هو هاڻ 7 لکن تي پهتو آهي، سکر بئراج وٽ مٿانهون وهڪرو 7 لک ڪيوسڪ آهي ليفٽ ۽ رائيٽ ڪئنالن ۾ 42 هزار ڪيوسڪ پاڻي ڇڏڻ کانپوءِ هيٺانهون وهڪرو گهٽجي 6 لک ڪيوسڪ جي ويجهو پهتو آهي. هن چيو ته گذريل رات سڳيون ويجهو ۽ اڄ صبح باگڙجي ويجهو بندن تي پاڻي جي دٻاءُ جون خبرون اچڻ بعد آبپاشي عملي مشينري ۽ مٽيريل سان گڏ پهچي صورتحال کي ضابطي ۾ آڻي ڇڏيو ۽ هن وقت سرڪاري مشينري ٻوڏ جي صورتحال کي منهن ڏيڻ ۾ ڀرپور پوزيشن ۾ آهي. هڪ سوال جي جواب ۾ نثار احمد کهڙو چيو ته رور سسٽم لاءِ وفاقي فلڊ ڪميشن ۾ سنڌ جو حصو 26 سيڪڙو آهي، وزيراعظم کي چيو آهي ته اسڪيمون مڪمل ڪرڻ لاءِ فنڊن جي رسد تمام ضروري آهي، تنهن هوندي به سنڌ سرڪار پنهنجي سالياني ترقياتي پروگرام ۾ بندن کي مضبوط ۽ مرمت ڪيون پئي اچي، جڏهن ته اسڪيمون ترجيحن جي حساب سان تيار ڪيون وينديون آهن. هن چيو ته گهوٽڪي جي شينڪ بند کي اسٽون پچنگ ڪري ليول وڌائي وئي آهي، جڏهن ته سمورن بچاءَ بندن کي ڇهن فوٽن تائين وڌايو ويو آهي. هن هڪ سوال جي جواب ۾ چيو ته لاڙڪاڻو-خيرپور پُل جي ڊزائن ۽ ماپ اڳوڻي جنرل مشرف جي دور ۾ منظور ٿي هن پُل جي ويڪر سوا ڪلوميٽر آهي، جڏهن ته دادو-مور ۽ آمري-سڪرنڊ پُل جي ويڪر 2-2 ڪلوميٽر آهي، لاڙڪاڻو-خيرپور پُل جي ماپ به 2 ڪلوميٽر ٿيڻ گهرجي، ان وڏي منصوبي جي اسٽڊي لاءِ بعد ۾ سوچي سگهجي ٿو، في الحال درياهه جو مکيه وهڪرو پنهنجي رفتار سان وڃي رهيو آهي، ان ۾ ڪابه رنڊڪ نه آهي. هڪ ٻئي سوال جي جواب ۾ اطلاعات ۽ آبپاشي کاتي جي سينئر وزير چيو ته پيپلزپارتي اسيمبلين ۽ جمهوريت لاءِ وڏا جتن ۽ قربانيون ڏنيون آهن، شهيد ڀٽو کانپوءِ شهيد راڻي کي اسان کان ڌار ڪيو ويو اسان هميشه ڦاسيون قبوليون آهن، شهيد راڻي جي قربانيءَ کانپوءِ به اسان چيو ته اسيمبليون ۽ جمهوريت کپي، عمران خان جي جذباتي سياست تان اسيمبليون قربان نه ٿيون ڪري سگهجن. هن چيو ته عمران خان پنهنجي جذباتي سياست سبب بند گهٽيءَ ۾ ڦاسي پيو آهي، 18 رانديگرن سان گڏ کيڏندڙ ڪپتان پارٽيءَ جا 18 ماڻهو نه ٿو سنڀالي سگهي، سندس هڪ ليڊر ٻي ته ٻيو ليڊر ٽين ڳالهه ڪري رهيو آهي، 18 ڪروڙ عوام جي سياست کي هڪ ماڻهو جي جذبات تان قربان نه ٿا ڪري سگهون، جمهوريت جي بقا لاءِ مناسب هوندو ته پي ٽي آءِ ميمبرن کي اسيمبلين جي ميمبرشپ تان نه هٽايو وڃي. بلدياتي چونڊن جي حوالي سان ڳالهائيندي نثار کهڙو چيو ته اليڪشن ڪميشن ٻوڏ ۽ برسات جي تازي صورتحال سبب زميني حقيقتن تحت مڪاني چونڊون پٺتي ڪرائڻ لاءِ سپريم ڪورٽ ۾ وئي آهي، پر سنڌ حڪومت توڙي پيپلزپارٽي مڪاني چونڊن لاءِ هر وقت تيار آهن. سينئر صوبائي وزير چيو ته ڪراچيءَ سميت سڄي سنڌ ۾ ڏوهارين ۽ ٽارگيٽ ڪلرز خلاف آپريشن ڪلين اپ هلي رهيو آهي، رينجرز وٽ ضرور ڪي بنياد ۽ شاهديون هونديون جو هُنن ٽارگيٽ ڪلرز جي لسٽ بابت خط فاروق ستار کي لکيو آهي، هن چيو ته رينجرز ۽ پوليس جي آپريشن سبب ڪراچي جون روشنيون وري بحال ٿيون آهن ۽ ماڻهو سک جو ساهه کڻڻ جو اظهار ڪري رهيا آهن، 92 وارو آپريشن اُن وقت جي حڪومت حالتون ڏسي ڪيو هو پر هاڻ ايم ڪيو ايم پاڻ آپريشن جو وفاق کان مطالبو ڪيو هو. صوبائي وزير اطلاعات ۽ آبپاشي وڌيڪ چيو ته سکر بئراج دُنيا جي وڏي بئراجن ۾ شمار ٿئي ٿي پر گڊو بئراج کي به 5 سال ٿيا آهن، جتان 14 کان 15 لک ڪيوسڪ پاڻي گذريو آهي، گڊو بئراج جي مرمت واري اسڪيم هلندڙ سال شروع ٿي ويندو. سکر بئراج تي پيزو ميٽر خراب هئڻ بابت پڇيل سوال جي جواب ۾ نثار احمد کهڙو چيو ته ڊجيٽل نظام کي سڄي ملڪ ۾ ڪنيڪٽ ٿيڻو هو، جيڪو نه ٿي سگهيو، پر مشينري موجود آهي، اسان جي ڪوشش آهي ته سڄي سنڌ ۾ صوبائي سطح تي ان سسٽم کي ڪنيڪٽ ڪري وٺون ته جيئن گڊو کان ڪوٽڙيءَ تائين پاڻي جي صورتحال جو ته پتو پئجي سگهي. ان موقعي تي ايم اين اي نعمان اسلام شيخ، خاص معاون ڊاڪٽر ارشد مغل، آبپاشي سيڪريٽري ظهير حيدر شاهه، چيف انجنيئر سکر بئراج ولي محمد نائچ ۽ ٻيا پڻ سينئر صوبائي وزير سان گڏ موجود هئا. بعد ۾ سينئر صوبائي وزير اطلاعات ۽ آبپاشي نثار احمد کهڙو خيرپور جي اُلرا جاگير بند جو معائنو ڪري بندن جي نگراني ۽ مرمتي ڪم جو جائزو ورتو. الرا بند تي ميڊيا سان ڳالهائيندي نثار احمد کهڙو زمينداري بند قائم ڪندڙن کي خبردار ڪيو ته جيڪي به زمينداري بند آهن اُهي پاڻ ختم ڪن ٻي صورت ۾ حڪومت بند ڊاهي ڇڏيندي، ڇاڪاڻ ته انهن زمينداري بندن سان بچاءُ بندن تي دٻاءُ پوي ٿو ۽ مقامي آبادي کي جاني ۽ مالي نقصان جو خطرو آهي. هن واضح ڪيو ته بندن کي ڪوبه خطرو نه آهي ۽ ٻوڏ جو دٻاءُ 10 ڏينهن اندر گهٽجي ويندو.

 

عمران خان پارليامينٽ مان ڀڄڻ چاهي ٿو پر کيس فرار ٿيڻ نه ڏنو ويندو: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته سپريم ڪورٽ پنهنجي فيصلي سان پارليامينٽ جي فيصلن تي ٺپو لڳائي ڇڏيو آهي، عمران خان پارليامينٽ مان ڀڄڻ چاهي ٿو پر کيس فرار ٿيڻ نه ڏنو ويندو. قومي اسيمبلي جي اجلاس کي خطاب ڪندي اپوزيشن ليڊر خورشيد شاهه چيو ته آئيني ترميمن بابت پارليامينٽ جو فيصلو سٺو سنوڻ آهي. هـُن چيو ته سپريم ڪورٽ پارليامينٽ جي بالادستي کي ڏسندي 18 هين ۽ 21 هين ترميمن بابت فيصلو ٻڌايو آهي، رياست ۽ ملڪي نظام جو مضبوط ٿيڻ ملڪ لاءِ بهتر آهي. خورشيد شاهه چيو ته سڀني پارٽين کي 21 هين ترميم تي خدشا هئا پر آصف علي زرداري /سڀني ۾ اتفاق راءِ پيدا ڪيو. اپوزيشن ليڊر چيو ته عمران خان هاڻي پارليامينٽ مان ڀڄڻ چاهي ٿو، کيس فرار ٿيڻ نه ڏنو ويندو.

 

گهرو وزير چوڌري نثار سان برطانيه جي بچاءَ واري وزير مائيڪل فيلن جي ملاقات

اسلام آباد(اي پي پي) گهرو وزير چوڌري نثار علي خان سان برطانيه جي بچاءَ واري وزير مائيڪل فيلن اربعا ڏينهن پنجاب هائوس ۾ ملاقات ڪئي ۽ پاڪ برطانيه لاڳاپن، توسيع ڪيل اسٽيرٽجڪ ڊائلاگ سميت ٻه طرفي سهڪار، دهشتگرديءَ خلاف جنگ، سيڪيورٽي واري شعبي ۾ سهڪار کي هٿي وٺرائڻ جهڙن اهم معاملن تي ڳالهه ٻولهه ڪئي وئي. هنن افغانستان ۾ مفاهمتي عمل ۽ خطي جي مجموعي صورتحال تي به ڳالهه ٻولهه ڪئي. گهرو وزير برطانيه ۾ ڪنزرويٽو پارٽي جي ڪاميابي ۽ مائيڪل فيلن جي ٻيهر چونڊ تي کيس مبارڪون ڏيندي چيو ته اليڪشن ۾ واضح برتري برطانوي عوام جو پنهنجي پارٽيءَ تي اعتماد جو اظهار آهي. گهرو وزير اُميد ڏيکاري ته نئين حڪومت جي دؤر ۾ پاڪ- برطانيه لاڳاپن ۾ وڌيڪ مضبوطي ايندي. هن توسيع ٿيل اسٽريٽجڪ ڊائلاگ تحت جاري گڏيل سهڪار تي اطمينان جو اظهار ڪندي چيو ته ڪيترن ئي اهم معاملن خاص طور تي خطي ۾ امن جي باري ۾ اسان هڪجهڙي سوچ رکون ٿا. هن چيو ته خطي ۾ امن جي حوالي سان توسيع ٿيل اسٽريٽجڪ ڊائلاگ مڪينزم ٻنهي حڪومتن ۽ انهن جي ادارن کي هڪٻئي جي وڌيڪ ويجهو آڻڻ لاءِ انتهائي مددگار ثابت ٿي رهيو آهي، ٻنهي ملڪن وچ ۾ طئي ٿيل سيڪيورٽي روڊ ميپ کي جلد مڪمل ڪرڻ لاءِ ٻه طرفي سهڪار کي هٿي ڏيڻ جي ضرورت آهي. هن چيو ته دهشتگرديءَجي خاتمي لاءِ ٻنهي ملڪن ۾ سيڪيورٽي ۽ قانون لاڳو ڪندڙ ادارن وچ ۾ وڌيڪ رابطا، دهشتگرديءَ جي خاتمي لاءِ پاڪستان جي صلاحيت ۾ نمايان اضافو ٿيندو. برطانوي بچاءَ واري وزير ٻنهي ملڪن وچ ۾ بهترين لاڳاپن کي اجاگر ڪندي چيو ته سندس حڪومت پاڪستان سان گهڻ رُخي سهڪار کي وڌيڪ مستحڪم بڻائڻ چاهي ٿي. هن پاڪستان جي سماجي، اقتصادي ترقي ۽ خطي ۾ جٽادار امن لاءِ پنهنجي حڪومت جي تعاون جو يقين به ڏياريو.

 

ڪراچي جي عدالت پاران الطاف جي گرفتاري لاءِ وارنٽ جاري، گرفتار ڪري 20 آگسٽ تائين پيش ڪرڻ جو حڪم

ڪراچي (اسٽاف رپورٽر) ڪراچي جي دهشتگردي ٽوڙ عدالت رينجرز کي ڌمڪيون ڏيڻ واري ڪيس ۾ ايم ڪيو ايم سربراهه الطاف حسين جو ضمانت نه ٿيڻ جوڳا وارنٽ جاري ڪندي کيس 20 آگسٽ تي گرفتار ڪري پيش ڪرڻ جو حڪم ڏئي ڇڏيو آهي. سول لائن پوليس پاران ايم ڪيو ايم سربراهه الطاف حسين کي رينجرز کي ڌمڪيون ڏيڻ واري ڪيس ۾ روپوش قرار ڏيڻ ۽ عدالت ۾ رپورٽ پيش ڪرڻ بعد دهشتگردي ٽوڙ عدالت الطاف حسين جا ضمانت نه ٿيڻ جوڳا وارنٽ جاري ڪندي کيس 20 آگسٽ تي پيش ڪرڻ جو حڪم ڏئي ڇڏيو آهي. ڊي جي رينجرز  ميجر جنرل بلال اڪبر رينجرز کي ڌمڪيون ڏيڻ تان الطاف حسين خلاف ڪراچي جي سول لائن ٿاڻي تي ڪيس داخل ڪرايو هو.

 

عمران خان جسٽس رٽائرڊ وجيهه الدين جي پارٽي ميمبرشپ معطل ڪري ڇڏي

اسلام آباد (بيورو) تحريڪ انصاف جَي چيئرمين عمران خان، ناراض اڳواڻ جسٽس رٽائرڊ وجيهه الدين جِي پارٽي ميمبرشپ معطل ڪري ڇڏي. پي ٽي آءِ ترجمان شيرين مزاري جاري ڪيل بيان ۾ چيو آهي ته رٽائرڊ جسٽس وجيهه الدين جِي ميمبرشپ پارٽي پاليسي بابت بيان ڏيڻ تي معطل ڪئي وئي آهي. شيرين مزاري چيو ته پارٽي پاليسي بابت بيان ڏيڻ کان منع ڪرڻ باوجود وجيهه الدين هڪ خانگي ٽي وي چئنل کي انٽرويو ڏنو. پي ٽي آءِ ترجمان چيو ته وجيهه الدين جي ميمبرشپ معطل ڪرڻ جو هڪ سبب پارٽي اڳواڻن تي بي بنياد الزام لڳائڻ به آهي. شيرين مزاري چيو ته وجيهه الدين پارٽي کي مخالفن کان به وڌيڪ نقصان پهچايو، جيڪا ڳالهه برداشت جوڳي نه هئي. ياد رهي ته پي ٽي آءِ جِي انٽرا پارٽي اليڪشن جِي جاچ ڪميشن جَي سربراهه وجيهه الدين جهانگير ترين، عليم خان ۽ پرويز خٽڪ سميت 4 پارٽي اڳواڻن کي انٽرا پارٽي اليڪشن تي اثرانداز ٿيڻ تي پارٽي مان فارغ ڪرڻ جو حڪم ڏنو هو پر عمران خان اهڙي فيصلي تي عمل ڪرائڻ بدران ابتو وجيهه الدين کي معطل ڪري ڇڏيو

 

راولپنڊي ۾ هٿياربندن جي فائرنگ ۾ ايڊيشنل ڊسٽرڪٽ اينڊ سيشن جج طاهر خان نيازي مارجي ويو

راولپنڊي (بيورو) راولپنڊي ۾ هٿياربندن جي فائرنگ ۾ ايڊيشنل ڊسٽرڪٽ اينڊ سيشن جج طاهر خان نيازي مارجي ويو. راولپنڊي جي سيٽلائيٽ ٽائون واري علائقي ۾ موٽرسائيڪل تي سوار هٿياربندن ايڊيشنل ڊسٽرڪٽ اينڊ سيشن جج طاهر خان نيازي جي گاڏي تي فائرنگ ڪري ڏني، جنهن جي نتيجي ۾ هو سخت زخمي ٿي پيو. جج طاهر خان نيازي کي ڳڻتي جوڳي حالت ۾ راولپنڊي جي بينظير اسپتال منتقل ڪيو ويو، جتي هـُن زخمن جا سور نه سهندي دم ڏنو. واقعي بعد پوليس علائقي کي ڪڙو چاڙهي سرچ آپريشن شروع ڪري ڇڏيو آهي.

 

ڀارت ۾ ٻن مسافر ٽرينن جون بوگيون پٽريءَ تان لهي ويون، 28 ڄڻا اجل جو شڪار، 100 کان وڌيڪ زخمي

نئين دهلي(اي پي پي) ڀارت جي مرڪزي رياست مڌيا پرديش ۾ ٻوڏ جي پاڻي ۾ ٻُڏل ٽريڪس تي سفر دوران ٻن مسافر ٽرينن جون ڪيتريون ئي بوگيون پٽريءَ تان لهي ويون جنهن جي نتيجي ۾ گهٽ ۾ گهٽ 28 ڄڻا اجل جو شڪار ۽ 100 کان وڌيڪ زخمي ٿي پيا. ريلوي وزارت جي ترجمان موجب ممبئي کان وارانسي ويندڙ ڪمياني ايڪسپري هردا ويجهو حادثي جو شڪار ٿي جتي ان جون 12 بوگيون پٽريءَ تان لهي ويون، ساڳي ئي وقت جنتا ايڪسپريس جون 6 بوگيون پڻ پٽريءَ تان لهي ويون، ترجمان موجب مسافرن کي ٻوڏ جي پاڻيءَ مان ڪڍڻ لاءِ امدادي ڪارروايون جنگي بنيادن تي جاري آهن. ڀارتي وزيراعظم نريندر مودي، اپوزيشن پارٽي ڪانگريس جي اڳواڻ سونيا گانڌي، مڌيا پرديش جي وزيراعليٰ ۽ ٻين اڳواڻن هادثي تي ڏک جو اظهار ۽ اجل جو شڪار ماڻهن جي وارثن سان تعزيت ڪئي آهي.