تازيون خبرون

Daily Archives: August 4, 2015

جڊيشل ڪميشن جي رپورٽ مان ثابت ٿي ويو ته اليڪشن ڪميشن نااهل ۽ ڪرپٽ آهي: عمران خان

روجهاڻ (م.ڊ) تحريڪ انصاف جي سربراهه عمران خان چيو آهي ته جڊيشل ڪميشن جي رپورٽ مان ثابت ٿي ويو ته اليڪشن ڪميشن نااهل ۽ ڪرپٽ آهي. رحيم يار خان جي علائقي روجهاڻ ۾ ٻوڏ متاثرن سان ملاقات دوران خطاب ڪندي۽ ميڊيا سان ڳالهائيندي عمران خان چيو ته اسان ڌرڻي ذريعي ويڙهه وڙهي چونڊ ڌانڌلي جي جاچ لاءِ جڊيشل ڪميشن ٺهرائي، جنهن جي رپورٽ کانپوءِ هاڻ وقت اچي ويو آهي ته اسان عوام جي حقن جي ويڙهه لاءِ ميدان ۾ لهون، سندس چوڻ هو ته هڪ پاسي هو اليڪشن ڪميشن تي پنهنجي احتساب لاءِ دٻاءُ وجهندا ۽ ٻئي پاسي هڪ عام پاڪستاني جي ضرورتن ۽ سندن حقن لاءِ ويڙهه وڙهندا. هن چيو ته هاري سڄو سال محنت ڪري فصل تيار ڪري ٿو پر اهو لڻڻ وقت پاڻي اچي وڃي ٿو، گذريل ٻن سالن ۾ ملڪ جو هاري پيسجي ويو آهي، پي ٽي آئي سربراهه چيو ته شريف ڀائر ڇهون ڀيرو پنجاب ۾ بادشاهي ڪري رهيا آهن پر کين لاهور کان پري وارن علائقن جو ڪو فڪر ناهي. سندس چوڻ هو ته رحيم يار خان ۽ روجهاڻ ۾ جيڪڏهنن برساتي نالن جي صفائي ٿئي ها ۽ حفاظتي بند ٺهرايا وڃن ها ته هارين کي معاشي نقصان کان بچائي سگهجيو پئي. عمران خان چيو ته پنجاب حڪومت 150 رپيا ميٽرو بسن جي ٻن رٿائن تي خرچ ڪيا پر هارين لاءِ بند نه ٺهرايا ڇو ته حفاظتي بند ٺاهڻ ۾ گهڻي ڪميشن نه ٿي ٺهي.

 

بالي ووڊ اداڪارا ايشوريا راءِ بچن هڪ ڀيرو وري فلمي دنيا ۾ راڄ ڪرڻ لاءِ تيار

ممبئي(شوبز نيوز) بالي ووڊ اداڪارا ايشوريا راءِ بچن هڪ ڀيرو وري فلمي دنيا ۾ راڄ ڪرڻ لاءِ تيار آهي. بالي ووڊ جي هڪ مشهور مئگزين تي ايشوريا جو ڪور فوٽو چاهيندڙن کي وڻي ويو آهي، جڏهن ته سندس نئين فلم جذبا جو ٽريلر به هلندڙ مهيني رليز ٿيندو . ڀارتي مئگزين برائيڊ جي ڪور تي سهڻي ويس ۾ ايشوريا راءِ جي خوبصورتي ڏسي ماڻهو دنگ رهجي ويا. واضع رهي ته ايشوريا راءِ ڌيءُ جي ڄمڻ کانپوءِ فلمي دنيا کان مڪمل طور تي پاسيري ٿي وئي هئي. ماءُ بڻجڻ کانپوءِ جذبا سندس پهرين فلم آهي، جنهن جي شوٽنگ به آخري مرحلن ۾ داخل ٿي وئي آهي

 

سلمان خلاف ڳالهائيندڙن کي اهميت ئي ان ڪري ملي جو سلمان هڪ فلمي شخصيت آهي: سليم خان

ممبئي (شوبز نيوز) بالي ووڊ جي دبنگ خان سلمان خان جي والد سليم خان چيو آهي ته سندس پٽ کي هڪ فلمي شخصيت هئڻ ڪري نشانو بڻايو پيو وڃي، سلمان جي ”ممبئي حملن جي جوابدار يعقوب ميمڻ“ جي حمايت وارن بيانن کي ٻاراڻو ۽ بي معني قرار ڏيندي نامياري ليکڪ چيو ته سلمان خلاف ڳالهائيندڙن کي اهميت ئي ان ڪري ملي جو سلمان هڪ فلمي شخصيت آهي، سليم خان چيو ته يعقوب ميمڻ کي ڦاهي نه ڏيڻ واري گُهر فقط سلمان جي نه هئي پر ان تي ٻين به گهڻو ڪجهه ڳالهايو هو. هن چيو ته سلمان خان جي ڪيل ٽوئيٽ جي سڀ کان پهرين مان مخالفت ڪئي  پر نصير الدين شاهه ۽ شتروگن سنها به ساڳيو موقف ورتو پر انهن تي ڪنهن ڪن نه ڪيو.

 

بهترين فلم ٺاهڻ تي هدايتڪار نيراج گهيوان کي سلام پيش ڪيان ٿي: تسليمان نسرين

ممبئي (شوبز نيوز) بالي ووڊ فلم مسان دنيا جي ڪيترن ئي ملڪن ۾ مڃتا ماڻڻ بعد بنگلاديشي ليکڪا تسليما نسرين کي به لاجواب ڪري ڇڏيو، ان ڏس ۾ بنگلاديشي ليکڪا ٽوئيٽر  تي جاري ڪيل بيان ۾ چيو ته کيس بالي ووڊ فلمن مان گهڻي اميد ان ڪري به نه هوندي آهي جو اهي فقط ميوزڪ ميلو تائين محدود هونديون آهن، هن چيو ته بهترين فلم ٺاهڻ تي هدايتڪار نيراج گهيوان کي سلام پيش ڪيان ٿي، جنهن جي جواب ۾ نيراج به سندس جا ٿورا مڃيا، ان کان اڳ 68هين ڪانز فلم فيسٽول ۾ به مسان ٻه ايوارڊ ماڻيا هئا ۽ کيس فلم جي عالمي تنظيم انٽرنيشنل فيڊريشن آف فلم پاران به ايوارڊ لاءِ نامزد ڪيو ويو آهي، ياد رهي ته چئن مخصوص زندگين ۽ ننڍي طبقي جي ذات سان ڏاڍائين جو ذڪر ڪيل فلم مسان شاندر ڪاميابي ماڻي  آهي، فلم 24 جولاءِ تي سينما گهرن جي ذينت بڻي هئي

 

پاڻ کي سنوارڻ جو مقصد اهو ناهي ته پاڻ مٿان وزني زيور ٽنگڻ گهرجن: اديتي رائو حيدري

ممبئي (شوبز نيوز) بالي ووڊ اداڪارا اديتي رائو حيدري چيو آهي ته کيس فيشن سان ايتري دلچسپي ته نه آهي، پر کيس سنورڻ سان پيا آهي ۽ گهڻو ميڪ ڪرڻ کي پسند ناهي ڪندي، اديتي چيو ته کيس جيڪو پسند ايندو آهي اهو ڪندي آهي ۽ هو رواجن تي به يقين ناهي ڪندي، ڀارتي ڊزائنير ڊيبرن مکرجي جي 2015ع واري شماري ۾ فرنٽ پيج تي ايندڙ اداڪارا اديتي وڌيڪ چيو ته پاڻ کي سنوارڻ جو مقصد اهو ناهي ته پاڻ مٿان وزني زيور ٽنگڻ گهرجن، سندس چوڻ هو ته دهلي وارن کي حسن بابت سٺي ڄاڻ آهي. گڊو رنگيلا فلم ۾ جلوا ڏيکاريندڙ اديتي رائو موجب کيس دهلي جي عام بازارن ۾ خريداري ڪندي مزو ايندو آهي.

 

زمبابوي جي ڪرڪيٽ ٽيم پهرين ون ڊي ميچ ۾ ڪيويز کي 7 وڪيٽن تان شڪست ڏئي ڇڏي

هراري(اسپورٽس نيوز) زمبابوي جي ڪرڪيٽ ٽيم پهرين ون ڊي ميچ ۾ 7 وڪيٽن تان شڪست ڏئي ڇڏي آهي. زمبابوي جي شهر هراري ۾ کيڏل ٽن ميچن جي سيريز جي پهرئين ميچ ۾ نيوزيلينڊ جي ٽيم پهريان بيٽنگ ڪندي پنجاهه اوورن ۾ 303 رنسن جو ٽارگيٽ ڏنو. نيوزيلينڊ پاران روس ٽيلر 112 ۽ وليمسن 97 رنسون ٺاهيون. جواب ۾ زمبابوي جي ٽيم گھربل ٽارگيٽ 49 هين اوور ۾ حاصل ڪري ڪاميابي ماڻي ورتي. زمبابوي پاران گريگ ايرون 130 رنسون ٺاهيون، جڏهن ته مساڪاڊزا 84، ڇيڀابا 42 رنسن سان نمايان رهيا. ايرون کي مين آف دي ميچ قرار ڏنو ويو، زمبابوي کي ٽن ون ڊي ميچن جي سيريز ۾ ٻڙيءَ جي مقابلي ۾ هڪ ميچ جي سرسي حاصل ٿي وئي آهي. ٻنهي ٽيمن ۾ ٻيون ون ڊي ميچ اڱاري تي کيڏيو ويندو.

 

پي سي بي قطر  ۾ سپر ليگ ڪرائڻ تي غور شروع ڪري ڇڏيو

دوحا(اسپورٽس نيوز) پاڪستان سپر ليگ لاءِ گڏيل عرب عمارات سان ڳالهين ۾ ناڪامي کانپوءِ پي سي بي قطر  ۾ سپر ليگ ڪرائڻ تي غور شروع ڪري ڇڏيو آهي، ان حوالي سان پي سي بي قطر جي انتظاميا سان رابطا شروع ڪري ڏنا آهن، جڏهن ته ان حوالي سان ان کي آڇ به ڪئي آهي. قطر جي واحد ڪرڪيٽ گرائونڊ ۾ پاڪستان سپر ليگ ڪرڻ لاءِ پي سي بي ڪوششون تيز ڪري ڇڏيون آهن ۽ ان حوالي سان قطري اختيارين سان رابطا به شروع ڪري ڏنا آهن، پاڪستان سپر ليگ کي ڪامياب ڪرڻ لاءِ عالمي معيار مطابق سمورن انتظامن تي غور ويچار ڪيو پيو وڃي ۽ خاص طور تي ناليوارن رانديگرن جي وڏي انگ کي ايونٽ ۾ شامل ڪرڻ لاءِ ڪوششون هلي رهيون آهن. پي سي بي جي چئيرمين شهريار خان ۽ ايگزيڪيوٽو ڪميٽي جي سربراهه نجم سيٺي سپر ليگ جي تيارين ۾ آهن، پر هنن ايندڙ سال فيبروري ۾ ٿيندڙ سپر ليگ جي حوالي سان ڪو به چٽو اعلان ناهي ڪيو.

 

سرفراز احمد کي ٽنهي فارميٽس جي ڪرڪيٽ ۾ موقعو ملڻ گھرجي: وسيم اڪرم

ڪراچي(اسپورٽس نيوز) ناليواري اڳوڻي ڪرڪيٽر وسيم اڪرم چيو آهي ته پاڪ_ڀارت ڪرڪيٽ سيريز ٿيڻ گھرجي، بهترين ڪارڪردگي جي ڪري سرفراز احمد کي ٽنهي فارميٽس جي ڪرڪيٽ ۾ موقعو ملڻ گھرجي. پاڪستان سپر ليگ ٿيڻ سان قومي ڪرڪيٽ تي سٺا اثر پوندا. ملڪ جي ڏوراهن علائقن ۾ لڪل ٽيلنٽ کي اڳيان آڻي انهن جي صلاحيتن مان فائدو کڻڻ جي ضرورت آهي. ڪراچي جي نيشنل اسٽيڊيم ۾ تقريب کانپوءِ ميڊيا سان ڳالهائيندي وسيم اڪرم چيو ته پاڪستان ۽ ڀارت جا ميچ ٻين ٽيمن کان وڌيڪ اهم هوندا آهن، ان ڪري ٻنهي ملڪن ۾ سيريز ٿيڻ گھرجي. هن پاڪ_ڀارت سيريز نه ڪرائڻ بابت ساروو گنگولي جي بيان تي افسوس جو اظهار ڪندي چيو ته اها ساروو گنگولي جي پنهنجي ذاتي راٰءِ هوندي ماضي ۾ سخت حالتن ۾ به پاڪستان ۽ ڀارت وچ ۾ سيريز ٿيندي رهي آهي.

 

پاڪستان ٽيم بهترين رانديگرن تي ٻڌل آهي، شروع ۾ گھٻرائڻ باوجدو اعصابن تي ڪنٽرول رکيو: شاهد آفريدي

ڪولمبو(اسپورٽس نيوز) ٽي ٽوئٽي ٽيم جي ڪپتان شاهد آفريدي چيو آهي ته پاڪستان ٽيم بهترين رانديگرن تي ٻڌل آهي، شروع ۾ گھٻرائڻ باوجدو اعصابن تي ڪنٽرول رکيو، زمبابوي ۾ وڌيڪ نون رانديگرن کي موقعو ڏنو ويندو. سري لنڪا خلاف آخري ٽي ٽوئنٽي ميچ ۾ ڪاميابي کانپوءِ ميڊيا سان ڳالهائيندي شاهد آفريدي چيو ته 173 رنسن جو ٽارگيٽ حاصل ڪرڻ جوڳو هو پر شروع ۾ اسين گھٻرائجي ويا هئاسي. عماد وسيم ۽ انور علي سٺي راند کيڏي. مونکي اميد آهي ته اهي مستقبل ۾ به ٽيم لاءِ ان قسم جي ڪارڪردگي ڏيکاريندا رهندا. هن چيو ته آئون جيڪڏهن بالنگ ۾ ڪجھه نه ڪري سگھندو آهيان ته بيٽنگ ۾ ڪپتان جي حيثِيت سان منهنجي ذميواري وڌي ويندي آهي. هن چيو ته اسان جي ايندڙ سيريز نيوزيلينڊ خلاف آهي جنهن ۾ ٻين نون رانديگرن کي موقعو ڏينداسين. ڪاميابي اسان لاءِ تمام وڏي اهميت رکي ٿي.

 

وڏي ٻوڏ جو خطرو ۽ انتظاميه تي فرض..؟

 

گڊو بيراج وٽ انتهائي وڏي ٻوڏ جو وهڪرو ساڍا 7 لک ڪيوسڪس تي پهچي ويو، پاڻي چاڙهه ۾ تيزي، گڊو بيراج وٽ انتهائي وڏي ٻوڏ جو وهڪرو هلندڙ آهي جتي گذريل 24 ڪلاڪن دوران 19 هزار ڪيوسڪس پاڻي وڌيو آهي جنهن ۾ تيزي اچي رهي آهي. گذريل 72 ڪلاڪن کان سليمان جبل، مظفر ڳڙهه ۽ راجن پور ۾ جاري تيز برساتن سبب چاڙهه ۾ تيزي اچي رهي آهي. چاچڙان شريف وٽ گيج 11.5 فٽ ٿي ويو آهي جيڪو 2010ع واري مها ٻوڏ جي گيج کان رڳو 6 انچ گھٽ آهي. جڏهن ته پنجنند وٽان سنڌوءَ ۾ ڇوڙ گھٽجي 127948 ڪيوسڪس رڪارڊ ڪيو ويو. آبپاشي ماهرن جو چوڻ آهي ته اها معمولي لاٿ به عارضي آهي ۽ پنجنند وٽان ڇوڙ وڌندو. سکر بيراج تي 24 ڪلاڪن ۾ 61 هزار ۽ ڪوٽڙي وٽ 54 هزار ڪيوسڪس پاڻي وڌيو آهي. هوڏانهن تربيلا، ڪالا باغ ۽ چشما وٽ وهڪري ۾ واڌ جاري آهي. ڪابل نديءَ جو وهڪرو انتهائي تيزيءَ سان وڌڻ سبب ڪالا باغ وٽ ٻيهر وڏي ٻوڏ ۽ چشما وٽ وهڪرو 6 لک ڪيوسڪس کان وڌي ويو آهي جڏهن ته تونسا وٽ وهڪري ۾ ڪالهه سڄو ڏينهن گھٽ وڌائيءَ وارو سلسلو جاري رهيو. ڪالهه منجھند 3 وڳي تائين وهڪرو 5 لک ڪيوسڪس کان وڌي ويو هو جيڪو شام 6 وڳي کان پوءِ ٻيهر 5 لک ڪيوسڪس کان گھٽجي ويو. ٻئي طرف ڪابل نديءَ ۾ پاڻي تيزيءَ سان وڌي رهيو آهي ۽ اتي پاڻي سپر فلڊ جي ويجھو پهچي ويو هو ۽ اڄ اتي سپر فلڊ جي صورتحال پيدا ٿي ويندي. گڊو ۽ سکر بيراجن وچ ۾ سئو سيڪڙو ڪچو ٻڏي وڃڻ بعد ڪچي مان لڏپلاڻ ۾ وڌيڪ تيزي اچي وئي آهي ۽ ڪچي واسي پنهنجي مدد پاڻ تحت پنهنجي چوپائي مال سميت  تيزيءَ سان پڪي تي اچي رهيا آهن. بندن تي قائم ڪيل ڪئمپن ۾ متاثرن لاءِ ڪنهن به قسم جون سهولتون موجود ناهن. پاڻي جي وڏي وهڪري سبب شينڪ بند، جي اسپر، اولڊ ٽوڙي، نيو ٽوڙي، ڪي ڪي، يارهون ميل ۽ ٻين بندن تي دٻاءُ بدستور تيزيءَ سان وڌي رهيو آهي. آبپاشي ۽ روينيو عملدار متاثرن جر بحالي وارو ڪم ڪرڻ بدران وي آءِ پيز جي خدمتن ۾ پورا لڳا پيا آهن. سکر بيراج جي ساڄي پاسي جي دروازن مان پاڻيءَ جي نيڪال ۾ آهستي آهستي بهتري اچي رهي آهي ڇاڪاڻ ته پاڻيءَ جي تيز وهڪري سان دروازن هيٺان لٽ اڳتي نڪري رهي آهي. ڪالهه مليل انگن اکرن موجب تربيلا وٽ ان فلو 3 لک 78 هزار ڪيوسڪس ۽ آئوٽ فلو 3 لک 39 هزار ڪيوسڪس رڪارڊ ڪيو ويو جتي پاڻي ذخيرو ڪرڻ جي گنجائش باقي 3 فٽ رهي آهي. ڪالا باغ جو مٿاهون وهڪرو 532000 ڪيوسڪس هيٺاهون وهڪرو 528000 ڪيوسڪس، چشما وٽ ان فلو 610000 ڪيوسڪس هيٺاهون وهڪرو 608000 ڪيوسڪس، تونسا وٽ مٿاهون توڙي هيٺاهون وهڪرو 493000 ڪيوسڪس، گڊو وٽ مٿاهون وهڪرو 745167 ڪيوسڪس هيٺاهون وهڪرو 729338 ڪيوسڪس، سکر وٽ مٿاهون وهڪرو 661662 ڪيوسڪس هيٺاهون وهڪرو 639462 ڪيوسڪس ۽ ڪوٽڙي وٽ مٿاهون وهڪرو 277000 ڪيوسڪس ۽ هيٺاهون وهڪرو 269700 ڪيوسڪس رڪارڊ ڪيو ويو. جهلم زون ۾ منگلا جو ان فلو 61 هزار ڪيوسڪس ۽ آئوٽ فلو 52 هزار ڪيوسڪس رڪارڊ ڪيو ويو. مرالا وٽ چناب جو ڇوڙ 98 هزار ڪيوسڪس، بلوڪي وٽ راوي جو ڇوڙ 32 هزار 7 سئو ڪيوسڪس، سليمانڪي وٽ ستلج جو ڇوڙ 39 هزار 6 سئو ڪيوسڪس ۽ نوشهره وٽ ڪابل جو ڇوڙ هڪ لک 57 هزار 5 سئو ڪيوسڪس رڪارڊ ڪيو ويو. سنڌ جي وڏي وزير سيد قائم علي شاھ سان نيشنل ڊزاسٽر منيجمينٽ اٿارٽي ”اين ڊي ايم اي“ جي چيئرمين جنرل اصغر نواز جي  سي ايم هائوس ۾ وڏي وزير سان ملاقات ، ٻنهي ڄڻن ۾ ٻپڏ ، برسات جي تباهين ، رليف ۽ بحالي جي ڪمن تي خيالن جي ڏي وٺ ڪئي وئي ، ان موقعي تي سنڌ جو چيف سيڪريٽري  ، ترقي ۽ رٿا بند ي کاتي جو ايڊيشنل چيف سيڪريٽري . پي ڊي ايم اي جو ڊائريڪٽر به موجود هيا.  ان موقعي تي سنڌ جي وڏي وزير سيد قائم علي شاھ چيو ته موسمي تبديلي سبب قدرتي آفتون معمول بڻجي چڪيون آهن،جنهن سان منهن ڏيڻ لاءِ وفاقي سطح تي حڪمت عملي جوڙي وڃي،سڀ صوبا به ان ۾ پنهنجو ڪردار ادا ڪن. هن چيو ته 2010 کان 2012 تائين برساتي تباهين کان پوءِ  ٽي چار سال وڏي وزير چيو ته حيرت آهي ته ڪجھه ماڻهو چون ٿا ته سمنڊ ۾ پاڻي ضايع ٿي رهيو .درياڳ جو پاڻي سمنڊ ۾ نه وڃڻ سبب ٺٽي ۽ بدين جي لکين ايڪڙ زمين سمنڊ ڳهي ويو آهي ۽ ٻنهي ضلعن جي زمين ڪلر ۽ سم جي ورچڙهي رهي آهي