تازيون خبرون

Daily Archives: August 1, 2015

ڪي اين شاهه لڳ ڪار جو موٽر سائيڪل کي ٽڪر، عورت ۽ ٻارڙو فوت، هڪ ڄڻو مرڻينگ

خيرپور ناٿن شاهه(رپورٽر) خيرپور ناٿن شاهه ڀرسان ڪار ڊرائيور ٻه جانيون کسي ورتيون، ڪار جي زوردار ٽڪر لڳڻ ڪري ماء ۽ پٽ فوت جڏهن ته موٽر سائيڪل سوار سخت زخمي، تفصيل موجب؛ خيرپور ناٿن شاهه ڀرسان ڳوٺ ڪولاچي لڳ انڊس هاءِ وي تي ڪار جو موٽرسائيڪل کي زوردار ٽڪر لڳڻ سبب موٽر سائيڪل سوار 35 ساله عورت مسمات پروين اشوڪ ۽ سندس پٽ 5 سالن جو پٽ ساگر ٿڏي تي فوت ٿي ويا جڏهن ته فوتي عورت جو مڙس اشوڪ ڪمار سخت زخمي ٿي پيو جنهن کي ڳوٺاڻن ڳڻتي جوڳي حالت ۾ تعلقي خيرپور ناٿن شاهه جي سرڪاري اسپتال ۾ پهچايو ويو جڏهن ته سول اسپتال ۾ صحت جي حوالي سان ڪي خاص انتظام نه هجڻ ڪري زخمي اشوڪ ڪمار کي لاڙڪاڻي نيو ويو هوڏانهن ڪار سوار ڊرائيور موقعي تي ئي فرار ٿي ويو ٻئي طرف ٻڌايو پيو وڃي ته فوتي ۽ زخمي ڏوڪري تعلقي جا رهواسي آهن جيڪي ڏوڪري کان دادو وڃي رهيا هئا ته ڪولاچي ويجهو حادثو پيش آيو جڏهن آخري اطلاع تائين پوليس ڪيس داخل ڪرڻ ۾ ناڪام رهي

 

پاڪستان پهرين ٽي ٽوئنٽي انٽرنيشنل ميچ ۾ سريلنڪا کي 29 رنسن سان هارائي ٻِن ميچن جي سيريز ۾ 1-0 جي سرسي ماڻي ورتي

ڪولمبو (اسپورٽس نيوز) پاڪستان پهرين ٽي ٽوئنٽي انٽرنيشنل ميچ ۾ سريلنڪا کي 29 رنسن سان هارائي ٻِن ميچن جي سيريز ۾ 1-0 جي سرسي ماڻي ورتي. ڪولمبو جي پريمادا اسٽيڊيم ۾ کيڏيل ميچ ۾ پاڪستان سريلنڪا کي کٽڻ جي لاءِ 176 رنسن جو ٽارگيٽ ڏنو هو، جنهن جي جواب ۾ سريلنڪا طرفان ڪشال پريرا ۽ دلشانن بيٽنگ جي شروعات ڪئي، پريرا پهرين ئي اوور ۾ انور عليءَ جو شڪار بڻيو، هن صرف 4 رنسون ٺاهيون، ٻئي اوور ۾ سهيل تنوير دلشان کي به 6 رنسن تي آئوٽ ڪيو ۽ ڪيٿروان ويٿانگي کي به سهيل تنوير ئي آئوٽ ڪيو. سريلنڪا جون 3 وڪيٽون صرف 19 رنسن تي ڪرڻ کان پوءِ اينجلو ميٿيوز ۽ ڊي ڊي سلوا سان گڏجي 36 رنسن جي ڀائيواري جوڙي پر ميٿيوز 23 ۽ ڊي سلوا 31 رنسون ٺاهي آئوٽ ٿيا. ملينڊاسري وارنداني آخري لمحن ۾ متاثر ڪندڙ راند پيش ڪئي پر هو به صرف 35 رنسون ئي ٺاهي سگھيو. پاڪستان طرفان سهيل تنوير3، انور عليءَ 2 جڏهن ته شعيب ملڪ ۽ عماد وسيم هڪ هڪ وڪيٽ ورتي. ان کان اڳ پاڪستان ٽيم جي ڪپتان شاهد آفريديءَ ٽاس کٽي پهريان بيٽنگ جو فيصلو ڪيو، جڏهن ته پاڪستان مقرر 20 اوورن ۾ 175 رنسون ٺاهيو، احمد شهزاد ۽ مختار احمد اننگ جي شروعات ڪئي پر مختار احمد 2 رنسن تي آئوٽ ٿيو، جنهن کان پوءِ احمد شهزاد ذميواراڻي بيٽنگ ڪندي 46 رنسون ٺاهي آئوٽ ٿيو، جڏهن ته محمد حفيظ صرف 17 رنسون ٺاهي سگھيو. شعيب ملڪ ۽ عمر اڪمل مڊل آرڊر تي سٺي بيٽنگ جو مظاهرو ڪندي 81 رنسن جي ڀائيواري جوڙي ته عمر اڪمل 46 رنسن تي آئوٽ ٿيو، جڏهن ته شعيب ملڪ 46 رنسن تي ناٽ آئوٽ رهيو. جڏهن ته سهيل تنوير کي 3 وڪيٽون وٺڻ تي پليئر آف دي ميچ قرار ڏنو ويو، واضح رهي ته اڄوڪي ميچ ۾ ٽي ٽوئنٽي جي نائب ڪپتان سرفراز احمد کي ميچ مان ڊراپ ڪيو ويو هو.

 

آمريڪا ۾ هلندڙ اسپيشل اولمپڪس ۾ ملڪي رانديگرن جي ڪاميابين جو سفر جاري

لاس اينجلس (اسپورٽس نيوز) آمريڪا ۾ هلندڙ اسپيشل اولمپڪس ۾ ملڪي رانديگرن جي ڪاميابين جو سفر جاري آهي ۽ هنن هيل تائين ان ايوينٽ ۾ گڏيل طور 15 ٻلا پنهنجي نالي ڪري ورتا هئا. آمريڪي شهر لاس اينجلس ۾ هڪ ڪلوميتر ٽائم ٽرائل سائيڪلنگ ۾ خديجه عرفان ۽ ميمونه حسين، ٽيبل ٽينس سنگلز ۾ محمد ارحم ۽ بيڊمنٽن سنگلز مقابلن ۾ جهان زيب اقبال سون جو ٻلو پنهنجي نالي ڪيو هو. ان کان سواءِ ٽينس ڊبلز ۾ احنس انور ۽ محمد قيوم چاندي جڏهن ته گرلز ٽينس سنگلز ۾ رقيه لطيف ڪنجھي جو ٻلو پنهنجي نالي ڪيو. اهڙيءَ طرح اسپيشل اولمپڪس 2015ع ۾ پاڪستان جا گڏيل طور ٻلن جو انگ 15 ٿي ويو هو، جنهن ۾ 6 سون جا، 4 چاندي ۽ 5 ڪنجھي جا ٻلا شامل آهن. واضح رهي ته لاس اينجلس ۾ هلندڙ اولمپڪس ۾ 27 راندين جي مقابلن ۾ 177 ملڪن جا 7 هزار کان وڌيڪ رانديگر حصو وٺي رهيا آهن

 

پي سي بي پاران محمد حفيظ جي بالنگ تي پابنديءَ خلاف اپيل نه ڪرڻ جو فيصلو

لاهور (اسپورٽس نيوز) پاڪستان ڪرڪيٽ بورڊ پاران پاڪستاني آل رائونڊر محمد حفيظ جي بالنگ تي پابنديءَ خلاف اپيل نه ڪرڻ جو فيصلو ڪيو ويو آهي. ميڊيائي رپورٽن موجب پي سي بي عملدارن ان ڳالهه تي متفق آهن ته غير قانوني ايڪشن جي ڪري پابنديءَ جو شڪار محمد حفيظ تي پابنديءَ خلاف آءِ سي سيءَ کي اپيل نه ڪئي ويندي. رپورٽ ۾ ٻڌايو ويو آهي ته حفيظ پنهنجي جي پنهنجي خواهش هئي ته سندس ٽيسٽ ڪرائي وڃي، هاڻي هو ٽيسٽ ۾ ناڪام ٿيو آهي ته ان خلاف اپيل نه ڪئي ويندي. واضح رهي ته محمد حفيظ جو ايڪشن سريلنڪا خلاف سيريز ۾ بالنگ دوران ٻيون ڀيرو رپورٽ ٿيو هو. چنئي ۾ ٽيسٽ دوران ناڪام ٿيڻ تي آءِ سي سيءَ پاران مٿس هڪ سال جي پابندي هنئي وئي آهي.

 

روايتي مخالف ڀارت سان ڪرڪيٽ لاڳاپن جي بحالي چاهيان ٿو: اظهر علي

ڪراچي (اسپورٽس نيوز) ملڪي ون ڊي ڪرڪيٽ ٽيم جي ڪپتان اظهر علي چيو آهي ته هو روايتي مخالف ڀارت سان ڪرڪيٽ لاڳاپن جي بحالي چاهي ٿو ۽ اميد ڪري ٿو ته ويجهي مستقبل ۾ ٻئي ٽيمون ٻه طرفي سيريز ۾ ميدان ۾ ڏٺيون وينديون، ان کان اڳ ٽيسٽ ٽيم جو ڪپتان مصباح الحق به اهڙي ئي خواهش جو اظهار ڪري چڪو آهي، هڪ انٽرويو ۾ اظهر علي چيو ته ڀارت خلاف کيڏڻ هر پاڪستاني رانديگر جي خواهش هوندي آهي، ڀارت خلاف کيڏڻ ان ڪري به سٺو آهي ڇو ته هر رانديگر جي اها دلي خواهش هوندي آهي ته هو ڀارت خلاف پرفارم ڪري، پر اهو فيصلو ڪرڻ ڪرڪيٽ اختيارين ۽ حڪومتن جو آهي، هن چيو ته جيڪڏهن اسان پاڪ – ڀارت سيريز ڪرائڻ ۾ ڪامياب وڃون ٿا ته اهو گهڻو سٺو هوندو. هن وڌيڪ چيو ته مان بدلجندڙ ڪرڪيٽ جي تقاضائن کي ذهن ۾ رکي بيٽنگ ڪري رهيو آهيان، هن چيو ته مون کي چڱيءَ طرح اندازو آهي ته هاڻي ڪرڪيٽ بدلجي وئي آهي، شروع کان اوهان کي ٽيمپو برقرار رکڻو پوندو آهي ۽ وڪيٽون ڪرڻ جي صورت ۾ به رن ريٽ ڪيرائڻو ناهي هوندو. اظهر عليءَ ان تاثر کي غلط قرار ڏنو ته سڀ فيصلا ڪوچ وقار يونس ڪندو آهي ۽ هو ڪنهن ٻئي کي اهميت ناهي ڏيندو، هن چيو ته سڀ فيصلا گڏيل صلاح سان ۽ ٽيم جي مفاد ۾ ڪيا ويندا آهن، اوهان ڪنهن مامري تي ڳالهائيندا هجو ته ڪنهن وقت ڪپتان ته ڪنهن وقت ڪوچ قائل ڪندو آهي.

 

بالي ووڊ جي ”مرداني“ فيم اداڪارا راني مکرجي ڀارت جي مشهور شوبز ميگزين ”ووگ“ جي ٽائيٽل پيج جي زينت بڻجي وئي

ممبئي (شوبز نيوز) بالي ووڊ جي ”مرداني“ فيم اداڪارا راني مکرجي ڀارت جي مشهور شوبز ميگزين ”ووگ“ جي ٽائيٽل پيج جي زينت بڻي آهي، جڏهن ته هلندڙ جي شماري يعني جولاءِ 2015ع جي ووگ تي سريلنڪا جي هاٽ اداڪارا جيڪولين فرنينڊز کي فرنٽ پيج جي زينت بڻايو ويو هو، جنهن بابت چيو پي ويو ته ان کان وڌيڪ جاندار تصويرون ڪنهن به اداڪارا جون نه ٿيون ٿي سگھن، پر ادڪارا راني مکرجي پاران ”ووگ“ جي آگسٽ مهيني واري ميگزين جي ٽائيٽل پيج لاءِ فوٽو سيشن سڀني کي پنهنجي جادوءَ جي ور چاڙهي ڇڏيو آهي، ”ووگ“ ٽائيٽل تي راني مکرجي هلڪي ڦلڪي پر بهترين ميڪ اپ ۾ ”پريٽي“ نظر اچي رهي آهي، کيس اڇن ۽ ڳاڙهن گُلن وارو سائو گائون پاتل آهي، جنهن ۾ هو تمام گھڻي سهڻي نظر اچي رهي هئي.

 

سونم ڪپور جسماني راحت لاءِ اڄ ڪلهه لداخ جو رخ ڪيو آهي

ممبئي (شوبز نيوز) بالي ووڊ جي اسٽائل آئيڪان سونم ڪپور جيڪا اڄ ڪلهه سورج برجاتيا جي نئين ايندڙ فلم ”پريم رتن ڌن پايو“ جي شوٽنگ ۾ مصروف آهي، ڄاڻو ذريعن ٻڌايو هو ته سونم فلمي شوٽنگ جي مصروفيتن مان وقت ڪڍي ذهني ۽ جسماني راحت لاءِ اڄ ڪلهه لداخ ويل آهي، سمجھيو پي ويو ته اداڪارا ڪنهن گوڙ گھمسان ۽ ڪئمرائن کان پري رهڻ لاءِ اوڏانهن ويل آهي، پر ذريعن جو چوڻ هو ته اداڪارا اصل ۾ هڪ بزنس ڊيل لاءِ اتي ويل آهي، جي ها، سونم ڪپور جو ننڍو ڀاءُ هرش ورڌن ڪپور راڪيش اومپرڪاش مهرا جي فلم ”مرزيا“ ۾ پهريون ڀيرو بالي ووڊ ڊيبيو ڏئي رهيو آهي، ”مرزيا“ جي شوٽنگ لداخ ۾هلي رهي آهي، ان ڪري سونم فلمبنديءَ جي لاءِ لداخ پهتل آهي، سونم ڪپور پنهنجي ڀاءُ جي بالي ووڊ ڊيبيو فلم ۾ اسپيشل مهمان طور انٽري ڏيندي، ٻڌايو پيو وڃي ته ڀاءُ جي فلم ”مرزيا“ ۾ سونم ڪپور جو اهم رول هوندو.

 

ڪرينا ڪپور خان جي نئين ايندڙ فلم ”ڪا اينڊ ڪي“ جو نئون پوسٽر جاري

ممبئي (شوبز نيوز) بالي ووڊ ادڪارا ڪرينا ڪپور خان جي نئين ايندڙ فلم ”ڪا اينڊ ڪي“ جو نئون پوسٽر جاري ڪيو ويو آهي، فلم جو ڊائريڪٽر آر بالڪيز آهي. فلم جي بليڪ اينڊ وائيٽ پوسٽر ۾ ڪرينا ڪپور خان تمام بهترين، معصوم ۽ گليمر کان پري نظر اچي رهي آهي، فلم ”ڪا اينڊ ڪي“ جو ڊائريڪٽر جيڪو ان کان اڳ فلم ”پا ۽ چيني ڪم“  کي پڻ ڊائريڪٽر ڪري چڪو آهي، فلم ۾ ڪرينا ڪپور خان جي سامهون ارجن ڪپور کي ڪاسٽ ڪيو اٿس. فلم ۾ ڀارتي سماج ۾ جنس متڀيد وچ ۾ دقيانوسي بنيادن کي ظاهر ڪيو ويو آهي. فلم ۾ مرد ۽ عورت جي ڀيٽ ختم ڪرڻ بابت ڪهاڻي ڏيکاري وئي آهي. فلم ۾ رومانس ۽ ٻن الڳ نظرين جي جوڙي کي ظاهر ڪيو ويو آهي، فلم ۾ ارجن ڪپور هڪ ترقي پسند مُڙس جڏهن ته ڪرينا ڪپور خان هڪ جاکوڙي گھر واريءَ جو ڪردار ادا ڪري رهي آهي. فلم 2016ع جي بهار مُند ۾ رليز ڪرڻ جا امڪان ڏيکاريا ويا آهن.

 

25 سالن کان ڀارتي فلم نگريءَ سان واڳيل آهيان، جنهن تي حيرت آهي ته اتي ايترو ڪئين ٽِڪي آهيان:جوهي چاولا

ممبئي (شوبز نيوز) بالي ووڊ ادڪارا جوهي چاولا جو چوڻ آهي ته 25 سالن کان ڀارتي فلم نگريءَ سان واڳيل آهيان، جنهن تي حيرت آهي ته اتي ايترو ڪئين ٽِڪي آهيان، جوهي چاولا جو چوڻ هو ته سندس پهرين فلم سلطنت هئي جنهن ۾ سني ديول، ڌرمينڌر، شري ديوي ۽ امريش پوريءَ جھڙا اداڪارا هئا پر هيءَ فلم نه هلي، فلمي جي شوٽنگ دوران ”قيامت سي قيامت تڪ“ جي آڇ ٿي، آڇ قبول ڪرڻ تي دوستن چيو ته اهو ڇا ڪيئي؟ فيصلي تي نظرثاني ڪر، ڇو ته فلم جو پروڊيوسر ناصر حسين هو، جنهن جون فلمون ان وقت فلاپ پي ويون، ان فلم جو هيرو به هڪ نئون اداڪار هو، ”سلطنت“ فلاپ ٿي وئي ۽ ”قيامت سي قيامت تڪ“ اڄ تائين سڀني کي ياد آهي ۽ ان هيرو کي هاڻي بالي ووڊ ۾ ”مسٽر پرفيڪشنسٽ“ (عامر خان) سڏيو ويندو آهي.

 

ڀارت اجاين الزامن کان پاسو ڪري.!

 

ڀارتي پنجاب جي ضلعي گورداس پور   ۾ دهشتگردن جي حملي کانپوءِ پاڪستان ۽ ڀارت وچ ۾صلاحڪارن جي سطح واريون ڳالهيون ملتوي ٿي ويون آهن، جڏهن ته پاڪستان ڀارتي بچاءُ واري وزير پاران گورداس پور  حملي جا جوابدار پاڪستان مان اچڻ واري  الزام کي رد ڪري ڇڏيو آهي. ان سلسلي ۾ نجي ٽي وي چينل پنهنجي هڪ رپورٽ ۾ ذريعن جي حوالي سان ڄاڻايو آهي ته گورداس پور   سانحي کان پوءِ ٻنهي ملڪن جي قومي سلامتي وارن صلاحڪارن جي رٿيل ملاقات ملتوي ٿي وئي آهي. ميڊيا موجب پاڪستان ۽ ڀارت جي صلاحڪارن جي ملاقات آگسٽ مهيني ۾ رٿيل هئي. هوڏانهن پاڪستان ڀارتي بچاءُ واري وزير پاران گورداس پور   حملي جا جوابدار پاڪستان مان اچڻ واري  الزام کي رد ڪندي چيو آهي ته ڀارتي صوبي  پنجاب جي شهر گورداس پور  پوليس اسٽيشن تي حملي جي ڀرپور مذمت ڪيون ٿا، پاڪستان پاڻ به دهشتگردي جو شڪار آهي، ڀارت اجاين الزامن کان پاسو ڪري. گورداس پور  واقعي کانپوءِ پاڪستاني هاءِ ڪمشنر ڀارتي پنجاب واري دوري کي روڪي ڇڏيو آهي. سندس چوڻ هو ته ڀارت پاران ورڪنگ بائونڊري تي ٺاهن جي خلاف ڀڃڪڙي تي ڳڻتي آهي ۽ پاڪستان پنهنجي قومي مفاد ۾ سمورا قدم کڻدو. پرڏيهي ترجمان موجب حملي آورن جي پاڪستان مان اچڻ بابت ڀارتي پرڏيهي وزير جو بيان مذمت جوڳو آهي. قاضي خليل الله موجب پاڪستان هر قسم جي دهشتگردي جي مذمت ڪري ٿو، گردسپور حملي جا جوابدار پاڪستان مان اچڻ وارو ڀارتي وزير جو بيان  افسوس جوڳو آهي. ڀارت پاران هر معاملي ۾ پاڪستان کي ملوث ڄاڻائڻ ڳڻتي جوڳو عمل آهي. پاڪستان گورداس پور   واقعي تي شديد مذمت وارو بيان جاري ڪري چڪو آهي. ڀارت غلط الزامن کان پاسو ڪري. پرڏيهي ترجمان جو چوڻ هو ته ڪراچي ٽارگيٽ ڪلنگ ۽ ڀتاخوري جا پيرا ڏکڻ آفريڪا ڏانهن وڃن ٿا، هن چيو ته ڪراچي اندر دهشتگردي ۾ ملوث ڏوهاري ڏکڻ آفريڪا ۾ رهيل آهن، انهن جي اچ وڃ روڪي وڃي.

حيدرآباد ۾ برساتي پاڻي نيڪال نه ٿي سگهيو،ڪاروهنوار سخت متاثر.!

حيدرآباد ۾3 ڏينهن گذرڻ باوجود برسات جو پاڻي نيڪال نه ٿي سگهيو آهي، حيدرآباد سٽي، قاسم آباد ۽ لطيف آباد جي علائقن ۾ ٽن ڏينهن کان بيٺل برسات جو پاڻي نيڪال نه ٿي سگهيو، شهر جي اڪثر علائقن  جي گهرن، اسڪولن، سرڪاري ادارن، تفريح گاهه توڙي مسجدن ۾ پاڻي بيٺل آهي، شهرين جو ڪارووهنوار سخت متاثر ٿيڻ سان گڏ شهري پيئڻ جي پاڻي ۽ بجلي کان محروم بڻيل. شهرين پنهنجن علائقن ۾ انتظاميا خلاف احتجاجي مظاهرا ڪري ضلعي انتظاميا، واپڊا، واسا ۽ بلديا خلاف سخت نعري بازي ڪئي، حيدرآباد جي ريلوي ڪالوني، حالي روڊ، اسٽيشن روڊ، اوڊين سيئينما، جوڻيجا ڪالوني، شاهه لطيف ڪالوني، قاسم آباد فيز 1، سحرش نگر، شيدي ڳوٺ، ڀٽائي نگر، سٽيزن ڪالوني، انور ولاز، ٽيڪينيڪل ڪاليج روڊ، چانڊيه ڳوٺ، ڏومرا ڳوٺ، سومرا ڳوٺ، جي او آر ڪالوني، شهباز بلڊنگ، راڻي باغ، عيد گاهه، ٽيون نمبر تلاءَ، ٽنڊو ٺوڙهو، ٽنڊوآغا، پريٽ آباد، لياقت ڪالوني، سميت لطيف آباد نمبر 11، 2، 10، سميت ٻين ڪيترن ئي علائقن ۾ برسات جو پاڻي بيهجي ويو آهي. سنڌ جي ٻئين نمبر وڏي شهر حيدرآباد ۾ قائم سرڪاري ادارن شهباز بلڊنگ جي آفيسن آڏو برساتي پاڻي نيڪال نه ٿيو، جڏهن ته شهر جي اڪثر علائقن جي گھرن ۾ به پاڻي داخل ٿيڻ سبب شهري عذاب ۾ مبتلا ٿي پيا آهن، ان حوالي سان احتجاج ڪندڙ رهواسين جو چوڻ آهي ته حيدرآباد انتظاميا برسات کي 3 ڏينهن گذري وڃڻ باوجود هن وقت تائين پاڻي جو نيڪال نه ڪري سگهي آهي. هنن چيو ته حيدرآباد انتظاميا، ڊپٽي ڪمشنر توڙي بلديا اعليٰ جا عملدار صرف پاڻي جي نيڪالي لاءِ بيان ڏيڻ جي حد تائين آهن، جڏهن ته واسا توڙي ايڇ ڊي اي عملدار ظاهر ئي نه آهن. هوڏانهن ڊپٽي ڪمشنر فياض احمد جتوئي چيو آهي ته حيدرآباد خاص طور قاسم آباد ۾ پاڻي جي نيڪالي وارو نظام درست نه هجڻ ڪري پاڻي جي نيڪالي ۾ گهڻي مشڪلات آئي آهي. هن چيو ته هڪ طرف بجلي جي اک ٻوٽ ڪري پمپنگ مشينون بند ٿي وڃن ٿيون ته ٻئي طرف شهرين جو دٻاءُ هجڻ ڪري عملو مونجهاري جو شڪار آهي.