تازيون خبرون

Daily Archives: August 1, 2015

رينٽل پاور ڪيس: نيب جو راجا پرويز اشرف خلاف ڪيس داخل ڪرڻ جو فيصلو

اسلام آباد (بيورو) نيب رينٽل پاور ڪرپشن ڪيس ۾ اڳوڻي وزيراعظم راجا پرويز اشرف خلاف رينفرنس داخل ڪرڻ جي منظوري ڏئي ڇڏي آهي ۽ ڪراچي ۾ 6 ايڪڙ زمين جي غير قانوني الاٽمينٽ تي چيف سيڪريٽري سنڌ ۽ بورڊ آف روينيو جي عملدارن کي جاچ ۾ شامل ڪيو ويو آهي، جڏهن ته پ پ ايم اين اي مير منور ٽالپر خلاف اختيارن جي ناجائز استعمال ۽ عوام جا پئسا ڦٻائڻ جي جاچ جو حڪم ڏنو ويو آهي. نيب جي ايگزيڪيوٽو بورڊ جو اجلاس چيئرمين قمر زمان چوڌري جي صدارت هيٺ ٿيو، جنهن ۾ اڳوڻي وزيراعظم راجا پرويز اشرف خلاف رينٽل پاور ڪرپشن ۾ ريفرنس داخل ڪرڻ جو فيصلو ڪيو ويو. نيب پاران جاري ڪيل پڌرائيءَ موجب اجلاس ۾ شاهد رفيع، اڳوڻي پاڻي ۽ بجليءَ واري سيڪريٽري فياض الاهي، اڳوڻي ايم ڊي، پي پي آءِ بي فياض احمد، اڳوڻي ايم ڊي پيپڪو طاهر بشارت چيما ۽  ٻين کي به رينٽل پاور ڪيس ۾ شامل ڪرڻ جي منظوري ڏني وئي. اجلاس دوران ڪراچي جي ديهه بٽِي آمري جي اسڪيم 33 ۾ 6 ايڪڙ زمين غير قانوني طريقي سان الاٽمينٽ ڪرڻ تي چيف سيڪريٽري صديق ميمڻ ۽ بورڊ آف روينيو جي ٻين عملدارن خلاف معاملي جي جاچ جو حڪم ڏنو ويو. نيب اختيارين موجب آباد جي اڳوڻي چيئرمين بابر چغتائي خلاف زمينن تي قبضن ۽ اختيارن جي ناجائز استعمال واري معاملي جي جاچ جو حڪم ڏنو. نيب جي ايگزيڪيوٽو بورڊ جي اجلاس ۾ پيپلز پارٽي جي ايم اين اي مير منور ٽالپر خلاف اختيارن جي ناجائز استعمال ۽ عوام جا پئسا ڦٻائڻ جي جاچ جو به حڪم ڏنو ويو.

 

اڄ ڪراچي پرامن شهر آهي مستقبل ۾ به رهندو: پرويز رشيد

ڪراچي (اسٽاف رپورٽر) اطلاعات ۽ نشريات جي وفاقي وزير سينيٽر پرويز رشيد چيو آهي ته ڪراچي جون حالتون بهتري طرف گامزن آهن ۽ شهر قائد ۽ پاڪستان جون رونقون هاڻي مستقل طور تي قائم رهنديون، اڄ ڪراچي پرامن شهر آهي، ڪراچي کي دهشتگردي کان پاڪ ڪرڻ جي لاءِ قانون لاڳو ڪندڙ ادارن جيڪي قربانيون ڏنيون آهن ان تي اسان خراج تحسين پيش ڪريون ٿا، پهرين دهشتگردن جي حملن جون خبرون هلنديون هيون هاڻي انهن خلاف ڪارروائي جون خبرون هلن ٿيون، ڪراچي ۾ واپاري سرگرميون بحال ٿي رهيون آهن، پاڪستان کي دهشتگردي کان پاڪ ڪرائڻ نواز شريف حڪومت جي اولين ترجيح آهي، ايندڙ ڏينهن ۾ پاڪستان وڌيڪ محفوظ ۽ پرامن ملڪ هوندو جنهن ۾ ماڻهن کي نه رڳو ترقي ۽ خوشحالي جا بهتر موقعا ملندا پر ڪم ڪرڻ جي لاءِ سازگار ماحول به دستياب هوندو. اهڙن خيالن جو اظهار هن ڪالهه جمعي ڏينهن هتي سپريم ڪورٽ رجسٽري ڪراچي ۾ عدالتي ڪميشن جي اجلاس کانپوءِ صحافين سان ڳالهائيندي ڪيو. اطلاعات ۽ نشريات واري وفاقي وزير چيو ته ڪراچي ۾ قانون لاڳو ڪندڙ ادارن جي جوانن جي قربانين جي ڪري شهر ۾ امن قائم ٿيو آهي ۽ رونقون بحال ٿيون آهن، عيد تي به ماڻهو گهرن مان نڪتا ۽ ڪراچي ۾ معاشي سرگرميون عروج تي رهيون، ڪراچي جون تفريح گاهون ٻيهر رونقگاهون بڻجي ويون آهن، جيڪو ڪراچي ۽ پاڪستان جي لاءِ سٺو سنئوڻ آهي جنهن تي ڪراچي جي ماڻهن کي مبارڪباد ڏيان ٿو. پرويز رشيد چيو ته ڪراچي جهڙي شهر ۾ اڄ آئون توهان سان بنا خوف جي رستي تي بيٺو آهيان. هن چيو ته اسان ماضي جون ڪراچي جون رونقون بحال ڪنداسين، ڪراچي ۾ ڪجهه عرصي لاءِ ماڻهن کان رونقون ڦريون ويون پر هاڻي ٻيهر بحال ٿي ويون آهن ۽ هاڻي اهي رونقون مستقل رهنديون. هن چيو ته پهرين روزانو دهشتگردن جي حملن جي خبر ٻڌندا هئاسين پر هاڻي آپريشن ضرب عضب ۾ اسان جي پاڪ فوج، رينجرز، پوليس، انٽيليجنس ادارن گڏجي ملڪ کي دهشتگردي کان پاڪ ڪرڻ جي لاءِ قربانيون ڏنيون آهن، ان جو ثمر مليو آهي جنهن جي ڪري اڄ پاڪستان پرامن ملڪ آهي. هن چيو ته هاڻي اسان جون عبادتگاهون، اسڪول ۽ پارڪ محفوظ آهن، ايم ڪيو ايم جي خدشن جي حوالي سان هڪ سوال تي پرويز رشيد چيو ته ڪراچي ۾ صوبائي حڪومت موجود آهي، سنڌ جو وڏو وزير سيد قائم علي شاهه موجود آهي، ڪراچي ۾ آپريشن جي حوالي سان هڪ ايپيڪس ڪميٽي آهي جنهن ۾ حڪومت ۽ قانون لاڳو ڪندڙ ادارن جا نمائندا موجود آهن جيڪي ڏوهارين خلاف گڏجي ويهي فيصلا ڪن ٿا. اڳوڻي چيف جسٽس افتخار چوڌري پاران نئين پارٽي ٺاهڻ جي حوالي سان هڪ سوال تي پرويز رشيد چيو ته پاڪستان جي هر شهري کي اهو حق آهي ته هو پارٽي ٺاهي، کيس پنهنجي پارٽي ٺاهڻ جي خواهش آهي ته ان کي بڻائڻ گهرجي، پاڪستان تحريڪ انصاف جي استعيفائن جي حوالي سان ايم ڪيو ايم ۽ مولانا فضل الرحمان جي موقف ۽ حڪومت پاران ڪارروائي نه ڪرڻ جي حوالي سان پڇيل سوال تي پرويز رشيد چيو ته تحريڪ انصاف سان هڪ لکت ۾ معاهدو ٿيو آهي جنهن ۾ چيو ويو هو ته جيڪڏهن فيصلو حڪومت خلاف ايندو ته اها تسليم ڪندي ۽ جيڪڏهن اهو تحريڪ انصاف خلاف آيو ته هو پنهنجا سمورا الزام واپس وٺندي، ان معاهدي تي سموريون پارٽيون متفق هيون جنهن تحت پاڪستان تحريڪ انصاف کي پارليامينٽ ۾ پنهنجو ڪردار ادا ڪرڻ ڏنو ويندو. هن چيو ته حڪومت ان مسئلي کي حل ڪرڻ جي لاءِ هڪ ڪميٽي ٺاهي آهي جيڪا ايم ڪيو ايم ۽ مولانا فضل الرحمان کي قائل ڪرڻ جي ڪوشش ڪري رهي آهي.

 

قومي اتفاق راءِ لاءِ پي ٽي آءِ ميمبرن کي ڊي سيٽ ڪرڻ جي رٿ واپس ورتي وڃي: نواز شريف

اسلام آباد (بيورو) وزيراعظم نواز شريف، جي يو آءِ سربراهه مولانا فضل الرحمان تي زور ڀريو آهي ته قومي اتفاق راءِ لاءِ تحريڪ انصاف جي ميمبرن کي ڊي سيٽ ڪرڻ جي رٿ واپس ورتي وڃي، هـُو جمهوري عمل کي بهتر انداز ۾ اڳتي کڻي وڃڻ چاهين ٿا. وزيراعظم نواز شريف سان پي ايم هائوس اسلام آباد ۾ جــَي يــُو آءِ جي سربراهه مولانا فضل الرحمان ملاقات ڪئي. ملاقات دوران ملڪ جي سياسي صورتحال ۽ خاص طور پي ٽي آءِ ميمبرن کي ڊي سيٽ ڪرڻ واري معاملي تي خيالن جي ڏي وٺ ڪئي وئي. ملاقات دوران مولانا فضل الرحمان، وزيراعظم کي تحريڪ انصاف جي ميمبرن ڊي سيٽ ڪرڻ بابت پارٽي ۾ ٿيل صلاح مشورن کان آگاهه ڪيو. جي يو آءِ سربراهه چيو ته آئين تحت پي ٽي آءِ ميمبرن جي رڪنيت ختم ٿي چڪي آهي، معاملي جو آئين تحت ئي حل ڳوليو وڃي. وزيراعظم جو چوڻ هو ته هـُو ملڪي مفاد ۾ سمورين سياسي جماعتن کي گڏ کڻي هلڻ چاهين ٿا تنهن ڪري قومي اتفاق راءِ لاءِ پي ٽي آءِ ميمبرن کي ڊي سيٽ ڪرڻ بابت رٿ واپس ورتي وڃي. ياد رهي ته جــَي يو آءِ ۽ ايم ڪيو ايم طرفان قومي اسيمبلي ۾ تحريڪ انصاف جي ميمبرن کي نااهل قرار ڏرڻ لاءِ رٿون جمع ڪرايون ويون آهن.

 

آرمي چيف جنرل راحيل شريف ٻوڏ متاثرن ۾ هڪ ڏينهن جي کاڌ خوراڪ ورهائڻ جو اعلان

راولپنڊي (بيورو) آرمي چيف جنرل راحيل شريف ٻوڏ متاثرن ۾ هڪ ڏينهن جي کاڌ خوراڪ ورهائڻ جو اعلان ڪندي چيو آهي ته رليف آپريشن ۾ ڪا ڪسر نه ڇڏي وڃي، متاثر علائقن ۾ ريسڪيو آپريشن وڌيڪ تيز ڪيو وڃي. پاڪ فوج جي ترجمان اداري آءِ ايس پي آر طرفان جاري ڪيل پڌرائيءَ ۾ چيو ويو آهي ته آرمي چيف جنرل راحيل شريف جي صدارت هيٺ ٻوڏ صورتحال جي حوالي سان اجلاس ٿيو. آءِ ايس پي آر موجب اجلاس دوران آرمي چيف جنرل راحيل ٻوڏ متاثر علائقن ۾ هڪ ڏينهن جي کاڌ خوراڪ ورهائڻ جو اعلان ڪيو. آءِ ايس پي آر پاران وڌيڪ چيو ويو آهي ته آرمي چيف جنرل راحيل شريف ريسڪيو آپريشن تيز ڪرڻ جي هدايت ڪندي چيو آهي ته رليف آپريشن ۾ ڪابه ڪسر نه ڇڏي وڃي.

 

سنڌ ڪابينا ۾ اختلاف، خورشيد شاهه ميدان ۾ لهي پيو، وڏي وزير سان ملاقات

ڪراچي (اسٽاف رپورٽر) پيپلز پارٽي قيادت پاران سنڌ ڪابينا ۾ ڦيرڦار ڪرڻ کانپوءِ صوبائي ڪابينا بدترين اختلافن جي ور چڙهي وئي آهي، جنهن سبب حڪومتي ڪارونهوار ٺپ ٿي ويو، قومي اسيمبلي ۾ مخالف ڌر جو اڳواڻ سيد خورشيد شاهه ٽياڪڙي ڪرڻ لاءِ ميدان تي لهي پيو آهي. قومي اسيمبلي ۾ مخالف ڌر جي اڳواڻ سيد خورشيد شاهه ڪراچي پهچي سنڌ جي وڏي وزير سيد قائم علي شاهه سان ملاقات ڪئي، ملاقات ۾ ٻوڏ واري صورتحال ۽ سنڌ ڪابينا ۾ ڦيرڦار کانپوءِ ڪابينا ميمبرن ۾ پيدا ٿيل اختلاف نبيرڻ جي حوالي سان خيالن جي ڏي وٺ ڪئي وئي. وڏي وزير قائم علي شاهه سنڌ ڪابينا ۾ اختلاف رکندڙ صوبائي وزيرن مير هزار خان بجاراڻي،شرجيل ميمڻ ۽ ٻين کي پرچائڻ لاءِ خورشيد شاهه کي ٽاسڪ ڏئي ڇڏيو. ان ڏس ۾ معلوم ٿيو آهي ته سيد خورشيد شاهه مير هزار خان بجاراڻي ۽ ٻين سان رابطا ۽ ملاقاتون ڪري خدشا ختم ڪندو. هوڏانهن، صوبائي وزير شرجيل ميمڻ ساڳيا کاتا مڪاني ۽ سڌ سماءَ وارن کاتن جا قلمدان حاصل ڪرڻ لا هڪ هفتي کان لنڊن ۾ ديرو ڄمائي ڇڏيو آهي. ساڳي ريت قومي اسيمبلي ۾ مخالف ڌر جو اڳواڻ سيد خورشيد شاهه مڪاني ادارن واري کاتي جي وزير سيد ناصر شاهه کان کاتو واپس وٺڻ تي انڪاري بيٺل آهي. صوبائي وزير مير هزار خان بجاراڻي تعليم کاتو وٺڻ بدران ساڳيو ورڪس ۽ سروسز کاتو حاصل ڪرڻ تي بضد آهي. اهڙي ريت نثار احمد کهڙو آبپاشي ۽ سڌ سماءُ کاتا واپس ڪرڻ کان انڪار ڪيو آهي. ٻئي پاسي، سنڌ ڪابينا ۾ زڪوات ۽ عشر کاتي جي وزير دوست محمد راهمون کي وڏي وزير جو سينئر صلاحڪار بڻائڻ باوجود ڪابينا ۾ اسٽيٽس نه ملڻ سبب هن وڏي وزير سان ملاقات لاءِ وقت گهريو ۽ ملاقات لاءِ وقت نه ملڻ سبب هو واپس پنهنجي تڪ ۾ پهچي ويو آهي. سنڌ ڪابينا جا وزير اختلافن جي ور چڙهڻ سبب حڪومتي ڪارونهوار هڪ هفتي کان ٺپ ٿي ويو آهي ۽ لاڳاپيل وزيرن جون آفيسون ويران پيل آهن.

 

سمورا الزام رد، نئين دهلي جي اڳرائي ۽ ڌمڪين جو منهن ٽوڙ جواب ڏئي سگهجي ٿو: پرڏيهي صلاحڪار

اسلام آباد (بيورو) پرڏيهي صلاحڪار سرتاج عزيز، ڀارت جي سمورن الزامن کي سختيءَ سان ترديد ڪندي نئين دهلي تي واضح ڪيو آهي ته ان جي اڳرائي ۽ ڌمڪين جو منهن ٽوڙ جواب ڏئي سگهجي ٿو، ”را“ جي پاڪستان ۾ مداخلت وارو معاملو گڏيل قومن آڏو اٿارڻ لاءِ غور ويچار جاري آهي. قومي اسيمبلي ۾ سوالن جوابن جي وقفي دوران ڳالهائيندي سرتاج عزيز چيو ته پاڪستان ۾ ڀارت جي مداخلت جون اثرائتيون شاهديون آهن. هن چيو ته پاڪستان جي اندروني معاملن ۾ مداخلت تي ڀارت سان پنهنجي خدشن جو اظهار ڪيو آهي. سندس چوڻ هو ته ڀارت طرفان پاڪستان تي لڳايل سمورن الزامن جي هـُو ترديد ڪن ٿا ۽ ڀارت تي واضح ڪيو آهي ته ان جي اڳرائي ۽ ڌمڪين جو منهن ٽوڙ جواب ڏئي سگهجي ٿو. سرتاج عزيز چيو ته پاڪستان ۾ ڀارتي ڳجهي اداري ”را“ جي مداخلت جو معاملو ڀارت ۽ ٻين معاملن آڏو اٿاريو آهي ۽ وزيراعظم نواز شريف گڏيل قومن جي جنرل اسيمبلي ۾ به اٿاريندو. پرڏيهي صلاحڪار چيو ته ڀارتي ڳجهي اداري”را“ جي مداخلت جو معاملو سلامتي ڪائونسل جي اجلاس دوران پڻ اٿاريو ويندو. پرڏيهي صلاحڪار سرتاج عزيز چيو ته پاڪستان ڀارت سان نتيجا ڏيندڙ ڳالهيون ڪرڻ چاهي ٿو. پرڏيهي صلاحڪار چيو ته ڪشمير جو عوام مسئلي جو حل چاهي ٿو ۽ مسئلي جي حل لاءِ ڳالهين ۾ ڪشميرين کي به شامل ڪيو وڃي.

 

اي پي اين ايس جي جنريل سيڪريٽري سرمد علي جي نثار کهڙو سان ملاقات، هفتي اندر اي پي اين ايس جو اجلاس گهرائڻ تي اتفاق

ڪراچي(اسٽاف رپورٽر) سنڌ جي اطلاعات واري سينيئر وزير نثار احمد کهڙي سان اي پي اين ايس جي جنرل سيڪريٽري سرمد علي جي ملاقات، ايندڙ هفتي اي پي اين ايس جو اجلاس گهرائڻ تي اتفاق. تفصيل موجب اي پي اين ايس جي جنرل سيڪريٽري سرمد علي جمعي ڏينهن سنڌ جي اطلاعات واري سينيئر وزير نثار احمد کهڙي سان سندس آفيس ۾ ملاقات ڪئي، ملاقات دوران  اي پي اين ايس جي ميمبر اخبارن جي مسئلن سميت گڏيل دلچسپيءَ جي معاملن تي خيالن جي ڏي وٺ ڪئي وئي. ان موقعي تي اتفاق ڪيو ويو ته ايندڙ هفتي اي پي اين ايس جو اجلاس گهرايو ويندو. ان موقعي تي ڳالهائيندي اطلاعات واري سينيئر وزير نثار احمد کهڙي ڳالهائيندي چيو ته سنڌ حڪومت ادارن جي مضبوطيءَ چاهي ٿي ۽ صحافت جي سڀني ادارن کي گڏ کڻي هلنداسين ۽ ميڊيا هائوسز مان پڻ اها اميد آهي ته هو سنڌ حڪومت جو موقف بهتر نموني سان عوام آڏو آڻيندا. هن چيو ته ميڊيا جي مثبت تنقيد کي ويلڪم ڪيو ويندو . هن چيو ته اشتهارن ۾ ميرٽ سان گڏوگڏ ننڍين اخبارن جو پڻ خيال رکيو ويندو جيڪي اخبارون حقيقي طور تي شايع ٿي رهيون آهن. هن چيو ته پي بي اي، اي پي اين ايس ۽ سي پي اين اي سان پڻ ملاقاتون ڪري انهن جي مسئلا معلوم ڪيا ويندا ۽ سندس مسئلن کي حل ڪرڻ لاءِ ڪردار ادا ڪندس. نثار احمد کهڙو چيو ته سڀني ٽي وي چينلن ۽ اخبارن جي ادارن جو پڻ دورو ڪندس ۽ صحافين سميت ادارن جي انتظاميا سان پڻ ملاقاتون ڪندس.

 

الطاف حسين ۽ مولانا فضل الرحمان جو تحريڪ انصاف کي ڊي سيٽ ڪرڻ لاءِ گڏيل موقف تي اتفاق

لنڊن(مانيٽرنگ ڊيسڪ) جمعيت علماءِ اسلام جي سربراهه مولانا فضل الرحمان ۽ ايم ڪيو ايم جي سربراهه الطاف حسين تحريڪ انصاف کي قومي اسيمبلي ۾ ڊي سيٽ ڪرڻ واري معاملي تي گڏيل موقف تي اتفاق ڪيو آهي.ايم ڪيو ايم پاران جاري پڌرنامي مطابق جمعيت علماءِ اسلام(ف) جي سربراهه ايم ڪيو ايم جي سربراهه کي ٽيليفون ڪيو ،جنهن ۾ ٻنهي اڳواڻن تحريڪ انصاف جي اسيمبلي  ميمبرن کي ڊي سيٽ ڪرڻ واري معاملي ۽ ملڪ جي گڏيل سياسي صورتحال تي خيالن جي ڏي وٺ ڪئي.الطاف حسين سان ڳالهائيندي مولانا فضل الرحمان چيو ته اسان جي ڪنهن سان به ڪا دشمني يا اختلاف ناهي، اسان جو موقف حق تي آهي ۽ اسانجي ڪمٽمنٽ آئين سان آهي جيڪا آئين جي گهرجن مطابق آهي. سندس چوڻ هو ته آئين جي حوالي سان جيڪڏهن ڪو ميمبر بنا ٻڌائڻ جي ايوان مان لاڳيتو 40 ڏينهن غير حاضر رهي ته ايوان کي اهو حق آهي ته هو ان جي رڪنيت ختم ڪري ڇڏي.جڏهن ته تحريڪ انصاف جي ميمبرن پاڻ مرادو اسيمبلي جي رڪنيت تان استعيفيٰ ڏني هئي ۽ اهڙي صورت ۾ آئين جي ڪا به ڪنڊ انهن کي اسيمبلي ۾ ويهڻ جو موقعو نٿي ڏئي.مولانا فضل الرحمان چيو ته ڌرڻي کان اڳ ته اسيمبلي نقلي نه هئي، پر جڏهن اسيمبلي ۾ استعيفيٰ ڏيندڙ ماڻهو ويٺا آهن ته اسان کي اسيمبلي نقلي ٿي نظر اچي، ان موقعي تي ايم ڪيوايم جي سربراهه الطاف حسين مولانا فضل الرحمان جي خيالن سان اتفاق ڪندي چيو ته اسان سمجهون ٿا ته ان معاملي ۾ آئين جي هيٺ قدم کنيا وڃن ۽ اسان ان سلسلي ۾ پنهنجي موقف تي قائم آهيون.الطاف حسين مولانا فضل الرحمان کي چيو ته ان معاملي ۾ توهان جو ۽ اسان جو موقف ساڳيو آهي، جڏهن ته ان موقعي تي ٻنهي اڳواڻڻ ان ڳالهه تي اتفاق ڪيو ته ان معاملي تي ٻئي پارٽيون گڏيل حڪمت عملي جوڙين.

 

گهرو وزير جي مان ۾ آجياڻو، سنڌ ۾ امن امان جي صورتحال بهتر آهي: سهيل انور سيال

اسلام آباد (بيورو) اليڪشن ڪميشنر عمران خان جي خط تي سنڌ ۽ پنجاب جي ڪميشن ميمبرز سان غير رسمي مشاورت ڪئي آهي، اليڪشن ڪميشن جي ترجمان موجب خيبر پختونخواهه ۽ بلوچستان جي ميمبرز جي موجودگيءَ ۾ عمران خان جي خط تي فيصلو ڪيو ويندو. اليڪشن ڪميشن جي ترجمان پاران جاري ڪيل پڌرائي ۾ چيو ويو آهي ته عمران خان جي چيف اليڪشن ڪميشنر کي لکيل خط تي غير رسمي مشاورت ڪئي وئي آهي. ترجمان موجب اليڪشن ڪمشنر سنڌ ۽ پنجاب جي ميمبرز سان غير رسمي ڳالهه ٻولهه ڪئي آهي، جڏهن ته خيبر پختونخواه جو اليڪشن ڪمشنر مڪاني چونڊن ۾ مصروف آهي ۽ بلوچستان جو ميمبر فضل الرحمان پٽ جي وفات سبب موجود نه آهي. ترجمان موجب اليڪشن ڪميشن جي سمورن ميمبرن جي موجودگيءَ ۾ عمران خان جي خط تي باضابطه غور ويچار ڪري فيصلا ڪيا ويندا.

 

سنڌوءَ جي وهڪرن ۾ چاڙهه، پنوعاقل جي ڪچي جا 90 سيڪڙو ڳوٺ پاڻي جي لپيٽ ۾ اچي ويا

ڪراچي (نمائندن وٽان) سنڌو درياهه جي وهڪرن ۾ چاڙهه سبب پنوعاقل جي ڪچي جا 90 سيڪڙو ڳوٺ پاڻي جي لپيٽ ۾ اچي ويا، اڃان تائين هزارين ماڻهو بي يارو مددگار پاڻي ۾ ڦاٿل آهن.. پاڻي ۾ ڦاٿل سوين خاندان خوراڪ ختم ٿيڻ ڪري ڦاقا ڪشي ۾ مبتلا ٿي ويا آهن، انتظاميا ٻوڏ متاثرن کي ٻاهر ڪڍڻ لاءِ ڪي به انتظام نه ڪيا ويا، خانگي ٻيڙين وارن به ڪرايا ٻيڻا ڪري ڇڏيا آهن. سنڌ سرڪار پاران ٻوڏ متاثرن لاءِ هڪ هزار خيما فراهم ڪيا ويا آهن، ايڊمنسٽريٽر صرف 30 خيما لڳائي970 خيما غائب ڪري ڇڏيا آهن. ٻي طرف، ٻوڏ متاثرن لاءِ طبي سهولتون نه هجڻ ڪري متاثرين اسسٽنٽ ڪمشنر (ايڊمنسٽريٽر) پنوعاقل علي رضا انصاري سامهون بچاءُ بند تي احتجاج ڪندي چيو ته نه کاڌ خوراڪ آهي نه خيما آهن، نه ئي دوائن جو انتظام آهي. محمد اسماعيل جتوئي، عبدالجبار چاچڙ، قائم الدين سومرو ۽ ٻين ميڊيا اڳيان احتجاج ڪندي چيو ته حڪومتي سطح يا مقامي انتظاميه پاران ٻوڏ متاثرين لاءِ ڪي به جوڳا انتظاميه نه ڪيا آهن، ايڊمنسٽريٽر نااهلي جو مظاهرو ڪيو، کيس هٽايو وڃي. ان موقعي تي مختيار ڪار پنوعاقل حاجي شاهنواز چارڻ متاثرين کي هر سطح جي سهولتون فراهم ڪرڻ جا واعدا ڪري احتجاج ختم ڪرائي ڇڏيو.