تازيون خبرون

Monthly Archives: August 2015

ڀارتي فوج جي ورڪنگ بائونڊري تي بنا جواز فائرنگ ۽ گولاباري، 9 شهري شهيد، 50 زخمي

اسلام آباد/سيالڪوٽ(بيورو/م.ڊ) ڀارتي فوج جو ايل او سي ۽ ورڪنگ بائونڊري تي شرپسندي انتها کي ڇهي رهي آهي،سيالڪوٽ ويجهو ڀارتي فوج جي بناجواز فائرنگ ۽ گولاباري ۾ عورت ۽ ٻار سميت 9 شهريشهيد ٿي ويا، جڏهن ته 48 ڄڻا زخمي ٿي پيا. ڀارتي فوج جو جنگي جنون انتها تي نظر اچي رهي آهي، هندستاني آرمي طرفان لائن آف ڪنٽرول ۽ ورڪنگ بائونڊريءَ تي جنگبنديءَ جي ڀڃڪڙي جو سلسلو جاري آهي. آءِ ايس پي آر موجب ڀارتي فوج جمعي تي صبح سوير سيالڪوٽ جي باجره ڳڙهي، سجيت ڳڙهه، چار واهه، هرپال ۽ چپراڙ سيڪٽر تي بنا جواز فائرنگ ۽ گولاباري ڪئي. دشمن، سجيت ڳڙهه سيڪٽر جي ڳوٺ ٺــَٺــِي خورد، ٺٺـِي ڪالان ۽ مهندر وال کي نشانو بڻايو،جڏهن ته عمرانوالي ۽ ڪـُندن پور ۾ به ڀارتي فورسز مارٽر گولن سان شيلنگ ڪئي. چار واهه،کنور، بلهي، جمال جند، ڌمالان، هرپال ڳوٺ، ڳوٺ انولا، سيلم، هار نانوالي، ڳوٺ چپراڙ، ڌول ملانـَي،سهيل پور، صالح پور ۽ نندپور کي به نشانو بڻايو ويو. دشمن فوج جي بزدلاڻي گولاباري ۽ فائرنگ جي نتيجي ۾ عورت ۽ معصوم ٻار سميت 9 شهري شهيد ٿي ويا،جڏهن ته 48 ڄڻا زخمي ٿي پيا، جن ۾ پڻ عورتون ۽ ٻارڙا به شامل آهن. ڀارتي فوج جي حملي کانپوءِ پنجاب رينجرز پاران ڀرپور جوابي ڪارروائي ڪئي، جنهن بعد دشمن جون بندوقون خاموش ٿي ويون. ياد رهي ته ڀارتي فوج پاران ڪجهه عرصي کان ايل او سي ۽ ورڪنگ بائونڊريءَ تي اڳرائي جو سلسلو جاري آهي. پاڪستان،سرحد تي اڳرائي خلاف ڀارت آڏو سخت احتجاج رڪارڊ ڪرائي ڇڏيو آهي. پرڏيهي کاتي جي ترجمان پاران جاري ڪيل بيان موجب ڀارتي هاءِ ڪمشنر کي طلب ڪيو ويو. پرڏيهي آفيس ۾ پاڪستان پاران سرحد تي ڀارتي اڳرائي خلاف هندستاني هاءِ ڪمشنر آڏو سخت احتجاج رڪارڊ ڪرايو ويو. ياد رهي ته پاڪستان ان کان اڳ به سرحدي اڳرائي تي ڀارت آڏو ڪيترائي ڀيرا سخت احتجاج رڪارڊ ڪرائي چڪو آهي.

 

ڊاڪٽر عاصم حسين جي گرفتاري جهڙيون ڪارروايون سنڌ تي حملو آهي : وڏو وزير

ڪراچي(اسٽاف رپورٽر) سنڌ جي وڏي وزير سيد قائم علي شاهه چيو آهي ته صوبائي معاملن ۾ مداخلت ايف آئي جو ڪم ناهي، جڏهن  ته ڊاڪٽر عاصم حسين جي گرفتاري جهڙيون ڪارروايون سنڌ تي حملو آهي. ڪراچي ۾  ميڊيا سان ڳالهائيندي قائم علي شاهه چيو ته ايف آئي اي ۽ نيب سوڪ سينٽر تي ڇاپا هنيا ۽ روينيو توڙي لينڊ ڊپارٽمينٽ جي ڪاغذن جي ڇنڊڇاڻ ڪئي. هن چيو ته صوبائي معاملن ۾ مداخلت ايف آئي اي جو ڪم ناهي،ان معاملي تي وزيراعظم نواز شريف سان به ڳالهايو ويو آهي، ڇو ته وزيراعظم آپريشن جي ذميواري مونکي سونپي هئي. سندس چوڻ هو ته ڊاڪٽر عاصم جي گرفتاري جهڙيون ڪارروايون سنڌ تي حملو آهن، جيڪي اڳ به ٿيندا رهيا آهن، اسان وزيراعظم کي چيو هو ته توهان سنڌ تي حملا ڇو ٿا ڪيو؟ وڏي وزير چيو ته ڊاڪٽر عاصم جي گرفتاري کان پهرين مونکي ٻڌائڻ گهرجي ها، هو هائير ايجوڪيشن ڪميشن جو چيئرمين آهي ۽ سندس عهدو وزير برابر آهي، ان معاملي تي ڊي جي رينجرز ۽ ڪراچي جي ڪور ڪمانڊر سان به ڳالهايو آهي. هن چيو ته ڊي جي رينجرز ٻڌايو ته ڊاڪٽر عاصم خلاف ثبوت آهن، جنهن تي اسان کيس چيو ته اهي ثبوت اڻپورا آهن. وڏي وزير چيو ته اُهو تاثر ڏنو پيو وڃي ته سموريونخ رابيون سنڌ ۾ ئي آهن، اسانجي قيادت به مٿي پيغام ڏنو آهي، اسانجي احتجاج تي ايف آئي اي هڪ ڏينهن ۾ واپس هلي ويندي، فريال ٽالپر ۽ آصف زرداري بابت سندس چوڻ هو ته فريال ٽالپر اچي وئي آهي ۽ آف زرداري جي طبيعت خراب آهي هو جلد اچي ويندو. ڪورڪمانڊر ڪراچي ۽ ڊي جي رينجرز ڇاپن جو جواز ڏيڻ جو يقين ڏياريو آهي. ڊي جي رينجرز ڊاڪٽر عاصم بابت ثبوتن جي باري ۾ ٻڌايو آهي پر سندس جواب مان مطمئن ناهيون. ڊي جي رينجرز کي ڇاپن کان پهريان ٻڌائڻ گهرجي ها. ان کان پهرين قائم علي شاهه ڪراچي ۾ شاهراهه فيصل تي مهراڻ انڊر پاس جو افتتاح ڪيو.

 

عوامي عدالت ۾ وڃڻ سان حق ۽ سچ جي فتح ٿيندي، احتجاجي سياست ملڪ ۽ عوام کي ڪجهه نه ڏنو آهي: وزيراعظم

اسلام آباد (بيورو) اڳوڻي قومي اسيمبلي جي اسپيڪر سردار اياز صادق چيو آهي ته ضمني چونڊن ۾ پهريان کان وڌيڪ برتري سان کٽي واپس اينداسين ترجمان وزيراعظم هائوس مطابق اڳوڻي قومي اسيمبلي اسپيڪر اياز صادق وزيراعظم نوازشريف سان ملاقات دوران ضمني چونڊون وڙهڻ جي پارٽي فيصلي کي خوش آئيند قرار ڏيندي چيو ته هو خود به عدالت وڃڻ بدران چونڊ ميدان ۾ ئي وڙهڻ چاهي ٿو سردار اياز صادق ان عزم جو اظهار ڪيو ته هو تڪ 122 جي ضمني چونڊن ۾ پهريان کان وڌيڪ برتري سان کٽي واپس ايندو هن چيو ته عوامي عدالت ۾ وڃڻ سان حق ۽ سچ جي فتح ٿيندي وزيراعظم چيو ته احتجاجي سياست ملڪ ۽ عوام کي ڪجهه نه ڏنو آهي 2013 جو مينڊيٽ حقيقي آهي ان جي لاءِ ٻيهر عوام جي عدالت ڏانهن وڃي رهيا آهيون.

 

سرحدي جارحيت سميت ملڪ ۾ دهشتگرديءَ ۾ ڀارت ملوث آهي: آرمي چيف

راولپنڊي(بيورو) آرمي چيف جنرل راهيل شريف وڪنگ بائونڊري تي رينجرز هيڊ ڪوارٽر جو دورو  ۽ سي ايم ايڇ سيالڪوٽ ۾ ڀارتي فائرنگ سبب  زخمي ٿيل شهرين جي عيادت ڪئي.پاڪ فوج جي عام لاڳاپن واري شعبي آئي ايس پي آر مطابق آرمي چيف جنرل راحيل شريف سيالڪوٽ ورڪنگ بائونڊري ۽ رينجرز هيڊ ڪوارٽر جو دورو ڪيو ، جتي کيس ورڪنگ بائونڊري تي تازي صورتحال بابت ڄاڻ ڏني وئي.ان موقعي تي آرمي چيف چيو ته ڀارت پاران سرحدي ڀڃڪڙين  ۽ پاڪستاني شهرن ۾ دهشتگردي بابت اسانکي سموري ڄاڻ آهي ته ڪير ملوث آهي.دهشتگردن جي سهڪار ۽ ورڪنگ بائونڊري تي فائرنگ سان ڀارت جو وڏو تعلق آهي.سندس چوڻ هو ته ڀارت لائن آف ڪنٽرول ۽ ورڪنگ بائونڊري جي کلي عام ڀڃڪڙي ڪندي عالمي قانون ۽ روايتن کي پوئتي ڇڏي ڏنو آهي.آرمي چيف جنرل راحيل شريف سي ايم ايڇ سيالڪوٽ جو دورو ڪيو ۽ سيالڪوٽ ورڪنگ بائونڊري تي ڀارتي فوجين پاران چڙ ڏياريندڙ  گولا باري جي نتيجي ۾ زخمي ٿيندڙ شهرين جي عيادت ڪئي. آرمي چيف جنرل راحيل شريف زخمين کي بهتر  طبعي سهولتون ڏيڻ جي هدايت ڪئي.

 

ريلوي کاتي زمينن جي ليز واري معاملي ۾ مجرماڻي غفلت جو مظاهرو ڪيو: سپريم ڪورٽ

اسلام آباد(بيورو) سپريم ڪورٽ جي چيف جسٽس،جواد ايس خواجا چيو آهي ته ريلوي کاتي زمينن جي ليز واري معاملي ۾ مجرماڻي غفلت جو مظاهرو ڪيو آهي، عدالت پاران پاڻمرادي نوٽيس تي حڪم جاري ڪيو ويندو. چيف جسٽس جواد ايس خواجا جي سربراهي ۾ سپريم ڪورٽ جي ٽه رڪني بينچ ريلوي زمينن جي غير قانوني ليز بابت ڪيس جي ٻڌڻي ڪئي. ٻڌڻي دوران ايڊيشنل اٽارني جنرل چيو ته پشاور جي ليز معاهدي ۾ ريلوي بورڊ جي منظوري جو رڪارڊ ناهي مليو. چيف جسٽس چيو ته ريلوي کاتي مجرماڻي غفلت جو مظاهرو ڪيو آهي، ريلوي جي زمينن بابت پاڻمرادي نوٽيس تي حڪم جاري ڪيو ويندو. ٻڌڻي دوران جسٽس دوست محمد کوسا رمارڪس ڏيندي چيو ته بنون ۽ لڪي مروت ۾ ريلوي جي زمينن تي پلازه بڻجي چڪا آهن.

 

ماضي جي روش ٻيهر ورجائي وئي ته نتيجا خراب نڪراندا: نثار کهڙو

ڪراچي(اي پي پي) سنڌ جي اطلاعات واري سينيئر وزير نثار احمد کهڙو چيو آهي ته ڪجهه قوتون نه ٿيون چاهين ته سنڌ ۾ پيپلز پارٽيءَ جي حڪومت وڌيڪ قائم رهي، جيڪڏهن ماضيءَ جي روش کي ٻيهر ورجائڻ جي ڪوشش ڪئي وئي ته ان جا خراب نتيجا نڪرندا جيڪو عمل سڀني سياسي جماعتن لاءِ سٺو سنوڻ نه هوندو. اهڙن خيالن جو ا ظهار هن جمعي ڏينهن پنهنجي جاري ڪيل بيان ۾ ڪيو. نثار احمد کهڙو چيو ته پيپلز پارٽي ڪرپشن جي حامي نه آهي ۽ صرف سنڌ ۾ ڪرپشن جو تاثر ڏيڻ غلط آهي، اهو تاثر ڏيندڙ نظر ڦيرائين ته فرشتا ٻيا به نه آهن، ان ڪري اهڙيون ڪاروائيون ٻين صوبن ۾ پڻ ٿيڻ  گهرجن ۽ صرف سنڌ کي نشانو ٺاهڻ بند ڪيو وڃي. هن چيو ته سنڌ ۾ ڪرپشن تي ڪارروائي ڪرڻ ۽ ڪرپشن جي خاتمي لاءِ صوبي جو اينٽي ڪرپشن ادارو موجود آهي، جيڪو ڪاروائيون ڪري رهيو آهي ۽ صوبي جي اداري هوندي ٻين وفاقي ادارن جون صوبي ۾ ڪاروائيون صوبائي خودمختياريءَ جي خلاف آهن. نثار احمد کهڙو چيو ته جيڪڏهن پيپلز پارٽي ۽ سنڌ کي هر ميدان ۾ جدوجهد ڪرڻ جي اڳواڻي ڪرڻ جي ڏوهه جي سزا ڏني پئي وڃي ته پوءِ پيپلز پارٽي گهٻرائڻ واري ناهي ۽ اهڙيون جدوجهدون پيپلز پارٽيءَ لاءِ نيون نه آهن. هن چيو ته احتساب سڀني جو ٿيڻ گهرجي ۽ اهڙيون ڪاروائيون چئني صوبن ۾ ڪيون وڃن.

 

پهرين سيپٽمبر کان پيٽروليم شيون سستيون ڪرڻ جي سفارش، پيٽرول 6 رپيا 16 پئسا سستو ٿيڻ جو امڪان

اسلام آباد(بيورو) اوگرا، پهرين سيپٽمبر کان پيٽروليم شيون سستيون ڪرڻ جي سفارش ڪري ڇڏي، پيٽرول 6 رپيا 16 پئسا ۽ ڊيزل 7 رپيا 40 پئسا في ليٽر سستو ٿيڻ جو امڪان آهي. ذريعن موجب اوگرا پهرين سيپٽمبر کان پيٽروليم شين جا اگهه گهٽائڻ جي سمري ناڻي واري وزارت ڏانهن اماڻي ڇڏي آهي. سمري موجب پيٽرول 6 رپيا 16 پئسا، ڊيزل 7 رپيا 40 پئسافي ليٽر سستو ڪرڻ جي سفارش ڪئي وئي آهي. سمري ۾ چيو ويو آهي ته هاءِ آڪٽين 7 رپيا، لائيٽ ڊيزل 6 رپيا 48 پئسا ۽ گاسليٽ 7 رپيا 7 پئسا في ليٽر سستو ڪرڻ جي سفارش ڪئي وئي آهي.

 

مسلم ليگي ڌڙن کي گڏ ڪرڻ لاءِ سرگرم چوڌري شجاعت جي پير پاڳاري ۽ سيد غوث علي شاهه سان ملاقاتون

ڪراچي(اسٽاف رپورٽر) مسلم ليگي ڌڙن کي گڏ ڪرڻ لاءِ سرگرم چوڌري شجاعت حسين پير پاڳاري کانپوءِ سيد غوث علي شاهه سان ملاقات مسلم ليگي ڌڙن کي گڏ ڪرڻ لاءِ سرگرم چوڌري شجاعت حسين پير پاڳاري سان ملاقات ڪرڻ کانپوءِ سيد غوث علي شاهه سان مليو آهي، چوڌري شجاعت حسين چيو آهي ته پير پاڳاري سان تفصيلي ڳالهيون ٿيون آهن، مضبوط اپوزيشن ٺاهينداسين، ڪراچي ۾ شروع ٿيل امن جون هوائي پنجاب تائين پهچي چڪيون آهن. قاف ليگ سربراهه چوڌري شجاعت حسين مسلم ليگي ڌڙن کي گڏ ڪرڻ لاءِ ڪراچيءَ جي ياترا تي آهي، جتي هـُن پير پاڳاري صبغت الله شاهه راشديءَ سان ملاقات ڪئي. پير پاڳاري سان ملاقات کانپوءِ ميڊيا سان ڳالهائيندي چوڌري شجاعت چيو ته پير پاڳاري سان تفصيلي ڳالهيون ٿيون آهن، ساڻس سمورن معاملن تي کــُلِي ڳالهايو آهي، مضبوط اپوزيشن ٺاهي سڀني کي گڏ کڻي هلنداسين. هن چيو ته ڪراچي ۾ امن جون هوائون گـُهلڻ شروع ٿي ويون آهن، جيڪي پنجاب سميت سڄي ملڪ تائين پهچي ويون آهن. چوڌري شجاعت حسين چيو ته ڪراچي ۾ ٽارگيٽڊ آپريشن يا گرفتارين تي پيپلز پارٽي يا ايم ڪيو ايم جا خدشا ختم ٿيڻ گهرجن. هڪ سوال جي جواب ۾ چوڌري شجاعت حسين چيو ته ملڪ ۾ ڪوبه پرڏيهي وزير ناهي ته پوءِ ملڪي پرڏيهي پاليسي ڪهڙي هوندي. پرويز مشرف بابت پڇيل سوال جي جواب ۾ سندس چوڻ هو ته ان اهڙو ڪوبه ڪم نه ڪيو آهي، جنهن تي کيس غدار قرار ڏئي سگهجي.

 

ڪميٽي جو نوٽيفڪيشن جاري ٿيندي ئي استعيفائون واپس وٺڻ جي درخواست ڏينداسين: فاروق ستار جو فضل الرحمان کي فون

ڪراچي(اسٽاف رپورٽر) ايم ڪيو ايم جي پارلياماني اڳواڻ ڊاڪٽر فاروق ستار جي يو آئي جي سربراهه مولانا فضل الرحمان سان رابطو ڪيو. فاروق ستار چيو ته ڪميٽي جو نوٽيفڪيشن جاري ٿيندو، ان کان پوءِ استعيفائون واپس وٺڻ جي درخواست ڏينداسين.ذريعن مطابق ايم ڪيو ايم جي پارلياماني اڳواڻ فاروق ستار جي يو آئي(ف) جي سربراهه مولانا فضل الرحمان سان ٽيلي فون تي ڳالهايو. فاروق ستار ڳالهين بابت الطاف حسين ۽ رابطا ڪميٽي سان صلاح مشوري تي مولانا فضل الرحمان کي اعتماد ۾ ورتو.فاروق ستار جو چوڻ آهي ته حڪومت  شڪايتن جي ازالي واري ڪميٽي جو نوٽيفڪيشن جاري ڪري ته استعيفائون واپس وٺڻ لاءِ باقائده درخواست ڏينداسين.مولانا فضل الرحمان چيو ته هو ان معاملي تي وزيراعظم سان ڳالهائيندو ۽ جلد ڪميٽي ٺهڻ کي يقيني بڻائينداسين. حڪومت چاهي ٿي ته معملا سٺي ماحول ۾ تڪڙا حل ٿين.

 

براهمداغ بگٽي پاران حڪومت کي ڳالهين جي آڇ فيڊريشن لاءِ سٺي خبر آهي: عمران خان

اسلام آباد(بيورو) تحريڪ انصاف جَي چيئرمين عمران خان، براهمداغ بگٽي جـَي فيصلي جِي آجيان ڪندَي چيو آهي ته بلوچ قومپرست اڳواڻَ پاران حڪومت کي ڳالهين جِي آڇ ملڪ لاءِ تمام سٺي خبر آهي. اسلام آباد ۾ ميڊيا سان ڳالهائيندي عمران خان چيو ته براهمداغ بگٽي جَي حڪومت سان ڳالهيون ڪرڻ واري فيصلي جي هو آجيان ڪري ٿو. ڪپتان چيو ته بلوچ قومپرست اڳواڻَ پاران ڳالهين جي آڇ فيڊريشن لاءِ تمام سٺي خبر آهي. اليڪشن ڪميشن بابت ڳالهائيندي پي ٽي آءِ سربراهه چيو ته اي سي پي پاران ڌر بڻجڻ مذمت جوڳو عمل آهي،جنهن جي جيتري مذمت ڪجي گهٽ آهي. عمران خان چيو ته حڪمران ليگ خلاف فيصلا ٻڌائيندڙ ججز ڪاظم ملڪ ۽ راڻا زاهد جو ڪانٽريٽ نه وڌائڻ سان واضح ٿي ويو ته اليڪشن ڪميشن ڌر بڻيل آهي. ڪپتان چيو ته ڪاظم ملڪ جي نون ليگ جي حق ۾ ڏنل 30 فيصلن کي اليڪشن ڪميشن قبول ڪيو، پر پي ٽي آءِ جي حق ۾ ڏنل اڪيلي فيصلي کي قبول نه پيو ڪيو وڃي.