تازيون خبرون

Monthly Archives: July 2015

هاڪر کان صدر تائين ”ابوالڪلام“؛مير اعظم علي ٽالپر

دنيا جي ملڪن ۾ حڪمراني ڪرڻ لاءِ صدر يا وزيراعظم ٿيڻ لاءِ سڀ کان پهرين ڪنهن به سياسي پارٽي جي ’منڊلي‘ مان سياست جي سکيا وٺي پوءِ ان عهدي تي پهچبو آهي، پر بنا سياسي رنگ ۽ ڍنگ جي اهڙو عهدو حاصل ڪرڻ وڏي ڳالهه آهي. اهڙن ماڻهن ۾ 15 آگسٽ 1931ع تي ’شيو رام‘ تامل نادر ۾ هڪ ڪکائين جهوپڙي ۽ غريب والدين جي گهر ۾ جنم وٺندڙ اي پي جي ڪلام سرفهرست آهي. هن کي اسڪولي زماني کان علم پرائڻ جو شوق هو، پر گذر سفر ۽ پيٽ گذر ڪرڻ لاءِ روزانو اخبارون کپائڻ خاطر بطور هاڪر هوڪا ڏئي اخبارون وڪڻندو هو ۽ اهو زمانو 1955ع جو هو، ان بعد هن مدراس ايرو ناٽيڪل انجنيئرنگ ۾ داخلا ورتي ۽ 1963ع ۾ هي هندستان جي سائنسي اداري ’ايسرو‘ سان وابسته ٿي ويو، جنهن کانپوءِ 1969ع ۾ ان جو هيڊ مقرر ٿيو، ڪلام کي 1992ع ۾ وزيراعظم جو سائنسي صلاحڪار (مشير) مقرر ڪيو ويو هو. هندستان پهريون ائٽمي ڌماڪو مئي 1974ع ۾ وزيراعظم اندرا گانڌي جي حڪومت ۾ سنڌ سان لڳل صوبي راجسٿان جي ضلعي جيسلمير جي علائقي ’پوکرن‘ (ٿر) ۾ ڪيو هو. جيسلمير ضلعو سنڌ جي سکر، خيرپور ۽ سانگهڙ سان مليل آهي. جيسلمير جي ’جُتي‘ (چمپل) مشهور آهي، جيئن حيدرآباد ۾ مرزا جي چمپل مشهور آهي. هت ياد رهي ته 1974ع ۾ هندستان جي ان ڌماڪي کانپوءِ سنڌ ۾ جون کان سيپٽمبر تائين مون سون جي هڪ به بارش نه پئي هئي، سڄو سال موتمار گرمي هئي، جيئن تازو سنڌ ۽ ڪراچي ۾ گرمي سبب ماڻهن جي موت جو ذميوار راجسٿان ۾ (هندستان جا) ڪوئلي تي هلندڙ بجلي گهر ۽ ان مان خارج ٿيندڙ گرمي قرار ڏني وڃي ٿي. ان کانپوءِ ٻيو ائٽمي ڌماڪو اي پي جي ڪلام جي سربراهي ۾ هندستان طرفان ڪيو ويو، جنهن سان ائٽمي هٿيار ٺاهڻ جو بنياد پيو. ان بعد ڪلام پرٿوي ميزائل ايجاد ڪيو، جنهن ڪري ڪلام کي هندستان ۾ ’ميزائل مين‘ جي نالي سان سڏيو وڃي ٿو ۽ هن کي ڀارت جو سڀ کان وڏو سول اعزاز ڀارت رتن 1997ع ۾ ڏنو ويو. هن وٽ ڊاڪٽري جي ڊگري کانسواءِ پروفيسر جهڙيون کوڙ ساريون ڊگريون هيون ۽ سندس خيال هو ته ذميوار، ايماندار ۽ محنت واري جي الله به مدد ڪري ٿو. هن ڪيترائي ڪتاب لکيا، جن ۾ (انڊيا 2020) مشهور آهي. هي هڪ ٽيڪنڪي شخص 2002ع کان 2007ع تائين متفقه طور تي هندستان جو يارهون صدر رهيو، پر ٻئي دفعي لاءِ ڪانگريس ۽ بي جي پي ۾ اتفاق راءِ نه ٿيڻ سبب هو صدر نه ٿي سگهيو. جڏهن اين ڊي اي جي حڪومت 2002ع ۾ هئي ته هندستان جو وزراعظم اٽل بهاري واجپائي ۽ صدر هندستان اي پي جي ڪلام ٻئي ڪنوارا هئا ۽ ٻئي ’ڇڙا‘ مشهور هئا ۽ هندستان ۾ ڪرپشن ۽ سندن هٿان ڪابه ڦرڦار نه هئي، بقول ٻنهي ڄڻن ته اسان جو پٺيان گهر ۾ ڪير آهي؟ نه زال (پتني) نه ٻار جيڪو ڪجهه آهي، سو ديش (ملڪ) ۽ جنتا (قوم) لاءِ آهي ۽ ان وقت سنڌ ڄائو سنڌي ليڊر ايل ڪي آڏواڻي وزير داخلا هو. بهرحال ڪلام جي صدر ٿيڻ سان صدر جو عهدو ئي عوامي بڻجي ويو هو. سنڌ جو ناليوارو ليکڪ ۽ شخص ڪامريڊ مير محمد ٽالپر ڪلام کان گهڻو متاثر هو ۽ چوندو هو ته بظاهر ڪلام مٿي تي بگڙيل وار ۽ ’واچڙ‘ قسم وارو شخص عظيم شخص آهي، هن جو تعلق هندستان ۾ غير هندي ڀاشي (زبان) ۽ اردو بدران تامل زبان سان آهي. سندس اصل نالو ابوالفاقر زين العابدين هو.

ڪلام صدر ٿيڻ وقت پاڻ سان هڪڙي ڪپڙن جي بيگ کڻي آيو هو ۽ اها ئي واپس تامل ناڊو (ڳوٺ) کڻي ويو هو. هن کي ڪلاسيڪي موسيقي سان وڏو شوق هو ۽ مشهور شاعر گلزار به هن تي شاعري ڪئي آهي. هن جي سادگي ۾ اهو به هو ته سپنا (خواب) ننڊ بدران جاڳندي ڏسو ته بهتر آهي. ڪلام وصيت ڪئي هئي ته ”منهنجي مرڻ پٺيان بطور سابق صدر هند ڪنهن به طرح سان عام موڪل جو اعلان ڪري گهرن ۾ ويهڻ بدران ڪم ڪيو وڃي، منهنجي موت کي موڪل ۾ تبديل نه ڪيو وڃي.“ بقول ڪلام ته ترقي لاءِ طاقت ضروري آهي ۽ طاقت لاءِ ڪم ڪرڻ لازمي آهي. هن کي علم ۽ تعليم سان ايتري محبت هئي، جو سندس موت به 83 سالن ۾ يونيورسٽي ۾ ليڪچر ڏيڻ دوران پٽ تي ڪرڻ سان ٿيو. جيتوڻيڪ ڪلام کي آءِ آءِ ايم اسپتال پهچايو ويو، پر هن آخري ساهه پوڻي اٺين وڳي 27 آگسٽ سومر ڏينهن کنيو. هن جوهري سائنسدان تي وڏن ۽ ننڍن فنڪارن ڏک جو اظهار ڪيو آهي، جن ۾ لتا، شاهه رخ خان ۽ اي آر رحمان شامل آهن ۽ هندستاني اخبارن ڪلام جي خبر هن طرح شايع ڪئي آهي ته ”دنيا ۾ عوام جو ڪلام نه رهيو، موت تي موڪل نه ڪجو، گريٽ سلوٽ ٽو ڪلام“ سنڌي سياستدان ايل ڪي آڏواڻي سميت سڀني پارٽين ڏک جو اظهار ڪيو آهي ۽ هندستاني ڪابينا اڱاري ڏينهن 10 وڳي دهلي ۾ هڪ هنگامي اجلاس گهرائي مرحوم ڪلام کي بطور سابق صدر، پرٿوي ميزائل جو ابو ۽ جوهري سائنسدان کي خراج عقيدت پيش ڪيو. بهرحال آسام جي شلونگ کان سندس مڙهه گوهاٽي ۽ پوءِ دهلي آندو ويو آهي ۽ هاڻي ست ڏينهن سوڳ ملهايو پيو وڃي.

 

اوسلو ۾ تعليم جي ترقيءَ بابت سربراهي ڪانفرنس؛ارشاد ڪاغذي

6 ۽ 7 جولاءِ 2015ع ۾ اوسلو ۾ ناروي سرڪار پاران تعليم جي ترقي جي سلسلي ۾ سربراهي اجلاس ٿيو، جنهن ۾ دنيا جي ڪيترن ئي ملڪن جي سربراهن، وزيراعظمن ۽ اعليٰ عملدارن تعليم جي ترقي کي هٿي وٺائڻ لاءِ اهم پيش رفت ڪئي ۽ هڪ عالمي ڪميشن جوڙڻ جو فيصلو ڪيو ويو. گڏيل قومن جي سيڪريٽري جنرل، ناروي جي وزيراعظم ارنا سولبرگ ۽ ٻين ان تجويز جي آجيان ڪئي. هن اعليٰ ڪميشن ۾ ناروي، چلي، انڊونيشيا، ملاوي ۽ يونيسڪو شامل هوندا. گورڊن برائون گڏيل قومن جو خاص ايلچي گروپ جو سربراه هوندو. ڪانفرنس ۾ پاڪستان جي وزيراعظم نواز شريف سميت مختلف ملڪن جا سربراهه ۽ اعليٰ عهديدارشريڪ ٿيا.

اوسلو ڪانفرنس ۾ ان ڳالهه تي زور ڏنو ويو ۽ وعدو ڪيوويو ته ”سڀئي گڏجي بهتر ۽ سٺو ڪنداسون“ ان نعري هيٺ دنيا جي ملڪن ۾ تعليم جي فروغ لاءِ هڪ اهڙو ماحول جوڙيو ويندو، جيڪو بنا ڪنهن فرق جي تعليم جي گھرجن ۽ ضرورتن کي پورو ڪندو. جديد تعليم جي حصول لاءِ سڀني کي پنهنجو فرض ۽ ڪردار ادا ڪرڻو پوندو ته جيئن جيڪي اسڪول نٿا وڃن ۽ تعليم نٿا پرائي سگھن، انهن جي مشڪلات کي دور ڪري تعليم ۽ سکيا جو بندوبست قائم ڪيو وڃي. معياري تعليم جي حصول لاءِ انچيان، ڪوريا جي ڪانفرنس ۾ وَضَع ڪيل اصولن ۽ فيصلي تحت پَسماندهَ ڇوڪرين کي اڳتي آڻڻ جو جوڳو انتظام ڪيو ويندو ته جيئن بهتر انداز سان تعليم وڌي سگھي ۽ هر هڪ تعليم جي زيور سان آراسته ٿئي. ان کان علاوه غريب ٻارن ۽ ڇوڪرين جي همت افزائي ۽ پنهنجي پيرن تي بيهارڻ لاءِ بهتر قدم کڻي بااختيار بنايو ويندو. پر ڪجهه ڳالهين تي کليل نموني بحث نه ڪيو ويو. خانگي تعليم جي سيڪٽر بابت رٿابندي ڪونه ڪئي وئي، سٺي سکيا ۽ استادن جي نيٽ ورڪ بابت ڪا به گائيڊ لائين نه ملي سگھي. ٿيڻ ته ايئن گھرجي ها ته پرائيويٽ سيڪٽر وارن کي پابند بنايو وڃي ها ته هو دنيا جي غريب ۽ پٺتي پيل ملڪن جي غريب ٻارن ۽ خاص ڪري ڇوڪرين جي تعليم جي ترقي لاءِ ڀرپور ڪردار ڪن ۽ مفت تعليم ڏني وڃي. پر ان سموري لقاءَ جي پويان طبقاتي سوچ ۽ سرمائيدارن جي هڪ هٽي ۽ دولت گڏ ڪرڻ جي هرس ۽ حوس جي ڪري سرمائيدار دنيا جا ملڪ مفت تعليم لاءِ تيار ناهن! ان ڪري اوسلو جي سربراهي اجلاس ۾ دنيا جي ملڪن جي ترجيحات تي ڳڻتي جو اظهار ڪيو ويو ۽ اتي پڻ تعليم جي ترقي ۽ اهميت لاءِ ”گولين بدران ڪتاب کي اهميت ڏيڻ“ کي ضروري سمجهيو ويو. سربراهي اجلاس کي سڀ کان ننڊي عمر جي نوبل انعام يافتا، پاڪستان ڄائي ملالا يوسفزئي پنهنجي خيالن جو اظهار ڪجهه هن ريت ڪيو:

”آئون چاهيان ٿي ۽ اميد ٿي ڪريان ته عالمي اڳواڻ گولين بدران ڪتابن کي اوليت ۽ اهميت ڏيندا، اسڪول وڃڻ ٻارن جو بنيادي حق آهي، انهن کان تعليم جو حق کسي نٿو سگھجي، مستقبل لاءِ قلم ۽ تعليم موثر سرمائيڪاري آهي. ڪتاب اسان لاءِ بهترين پُونجي ۽ مُوڙي آهي، دنيا جي سڀني ٻارن کي تعليم ڏيڻي پوندي، ٻارن کان تعليم جو حق کسي نٿو سگھجي، ٻارن جي بهتر مستقبل لاءِ قدم کڻڻا پوندا، ٻارن لاءِ سيڪنڊري تعليم کي يقيني بڻايو وڃي ۽ سيڪنڊري تائين تعليم مفت هئڻ گھرجي. بدقسمتي سان دنيا ملٽري تي وڏي رقم پر تعليم تي تمام گھٽ رقم خرچ ڪري رهي آهي. ٻارن کي 12 ورهيه مفت تعليم ڏيڻ لاءِ دنيا جا ملڪ فوجين جا رڳو اٺ ڏينهن جا خرچ گھٽائين ته ٻارن جي تعليم جي پورت ٿي ويندي. ٻارن جي ان تعليم لاءِ 35 ارب ارب يورو يا 40 کرب رپيا خرچ ايندو ۽ اهو خرچ دنيا جي فوج تي اٺن ڏينهن جو خرچ آهي.“

پاڪستان ڄائي نوبل انعام يافتا اوسلو ۾ تعليم بابت سربراهي اجلاس ۾ شرڪت ڪئي. ملالا يوسفزئي خطاب ڪندي وزير اعظمن ۽ سرڪاري عملدارن کي ياد ڏياريو ته هو عالمي سطح تي تعليم جي ترقي تي خرچ ڪرڻ بدران تڪرار، جنگ ۽ هٿيارن کي اهميت ۽ ترجيح ڏئي پئسا خرچ ڪري رهيا آهن. ملالا پنهنجي خيراتي فنڊ سان هڪ ڪتاب شايع ڪيو آهي جنهن ۾ هن ڪجهه تجويزون دنيا جي ملڪن جي اڳواڻن لاءِ تجويز ڪيون آهن. جريدي ۾ ان بابت لکيو ويو آهي ته دنيا جا ملڪ پنهنجي فوج تي اٺن ڏيهن ۾ 39 ارب گڏيل طور خرچ ڪري رهيا آهن، اها رقم 12 سالن تائين هرهڪ ٻار جي سٺي تعليم تي خرچ ڪري سگھجي ٿي ۽ ان مان پورائو ٿي ويندو. ملالا جي اها سوچ دنيا جي خوشحال ۽ گبر سيٺين کي پسند ايندي يا نه؟ پر هن جيڪا تقرير ڪئي آهي اها پٺتي پيل غريب ملڪن جي ماڻهن جي ترجماني ڪري ٿي.

تعليم جي ترقي لاءِ اوسلو ۾ سربراهي اجلاس ناروي جي حڪومت جي ميزباني ۽ گڏيل قومن جي گلوبل ايجيوڪيشن جي خاص ايلچي گورڊن برائون جي سهڪار سان منعقد ٿيو. ان کان علاوه مختلف ڊونرز ايجنسيون، عالمي تنظيمون، سول سوسائٽي، فائونڊيشن ۽ تعليمي ادارا وغيره وارا هڪ جاءِ تي گڏ ٿي دنيا جي تعليم جي ترقي ۽ ترويج لاءِ سوچ ويچار ڪيو. مئي ۾ ڏکڻ ڪوريا ۾ ٿيل ورلڊ ايجيوڪيشن فورم جي ڪاروائي ۽ نتيجا ۽ حدف جي روشني ۾ فيصلا ڪيا ويا. هن اجلاس جو مول متو ۽ مقصد عالمي سطح تي تعليم جي ترقي گڏيل قومن جي تعليم بابت هدايتن ۽ جديد تعليم جي اصولن تي عمل ڪرڻ لاءِ ٺوس بنيادن تي جامع حڪمت عملي جوڙي تعليم کي عام ڪرڻ هو. نوبل انعام يافتا ملالا يوسفزئي جي تقرير۾ اها ڳالهه چٽي هئي ته تعليم جي بدران هٿيارن، تڪرار ۽ جنگ ۾ گھڻو پئسو ضايع ڪيو وڃي ٿو. ان مان ظاهر آهي ته عالمي برادري تعليم تي گھڻي توجهه ڪونه ٿي ڏئي. ان موقعي تي اقوام متحده جي خصوصي ايلچي گورڊن برائون اسڪول نه ويندڙ ٻارن جي حمايت ۽ مناسب بندوبست ڪرڻ تي ڌيان ڏيڻ جو تاڪيد ڪندي چيو ته ”58 ملين ٻار اسڪول نٿا وڃن ۽ لکن جي تعداد ۾ ٻار تعليم نٿا پرائين. تعليم جي واڌ وِيجهه رڪجي وئي آهي ۽ امداد ۾ گھٽتائي ڪئي وئي آهي. ناروي جي سرڪار پاران هي سربراهي اجلاس منعقد ڪري 2015ع جي پڄاڻي کان پهريان چئلينج کي منهن ڏيڻ لاءِ اهم قدم کنيو ويو آهي. خطري، فرق ۽ تفاوت جي بغير هر هڪ ٻار کي اسڪول وڃڻ جو حق آهي.“ سلويا مونٽويا ڊائريڪٽر يونيسڪو انسٽيٽيوٽ فار اسٽيٽڪس جي مطابق ”ٿلهي ليکي لبنان جا سڀئي ٻار پرائمري اسڪولن ۾ داخل ٿيل هئا پر 2013ع کان گھرو ويڙهه جي ڪري اٽڪل 2 ملين ٻار اسڪول کان فارغ آهن.“ تعليم جي اهميت ۽ افاديت وڌ کان وڌ آهي ۽ خاص ڪري انهن لاءِ جيڪي تڪرار ۽ قدرتي آفتن سان منهن ڏئي رهيا آهن ۽ مقابلو ڪري رهيا آهن مثال طور: عراق، شام، افغانستان، پاڪستان وغيره جتي لڙائي، مارا ماري ۽ دهشتگردي جي ڪري ٻار اسڪول نٿا وڃي سگھن، اهي انهن خوفناڪ حالتن ۾ اڻ سڌريل ۽ اڻ پڙهيل هئڻ ڪري درست نموني سان حالتن سان مقابلو نٿا ڪري سگھن ۽ بدقسمتي سان هو پاڻ کي مايوسي جي اوڙاهه ۾ اڇلايو ڇڏين ۽ پنهنجون زندگيون تباهه ڪريو ڇڏين. ڪيترائي ٻار دهشتگردن جي پٽي پڙهائڻ جي ڪري خودڪش بمبار بڻجي مري کپي وڃن ٿا ۽ ايئن معاشري جي چڱ ڀلائي ۽ بهتري ۾ حصو وٺڻ کان ڪوهين ڏور رهجي وڃن ٿا ۽ نصيب جي چڪر ۾ ڦاٿل بدنصيب پنهنجي مائٽن کي جيئري ئي ماري ڇڏين

محسن ڀوپالي تعليم بابت عالمي اڳواڻن ۽ حڪومتن کي جيڪا ڳڻتي آهي ۽ دنيا جا ملڪ ان سلسلي ۾ پنهنجي پنهنجي ايجنڊا مطابق جيڪو به جيترو به ڪم ڪري رهيا آهن، اهو ساراهه جوڳو آهي پر اسان جي ملڪ پاڪستان ۾ تعليم جو جيڪو حشر نشر ڪيو ويو، اهو درد انگيز داستان آهي. يونيسيف جي رپورٽ مطابق پاڪستان ۾ اٽڪل 54 لک ٻار اسڪول نٿا وڃن. سنڌ ۾ اسڪولن ۾ استاد پنهنجي ڊيوٽي ڪرڻ نٿو وڃي.

۽ ماسترن کي نوڪريون رشوت عيوض ملي رهيون آهن. سنڌ ۾ پئسا وٺي ماستر ڀرتي ڪيا، جيڪو ڪيس هلي رهيو آهي. يونيسيف پنهنجي رپورٽ ۾ ان ڪرپشن جو حوالو ڏنو آهي. يونيسيف جي رپورٽ ۾ پڌرو ڪيو ويو آهي ته پاڪستان ۾ 79 سيڪڙو ماڻهو اڻ پڙهيل آهن ۽ پاڪستان خواندگي جي لسٽ ۾ دنيا جي ملڪن جي ڀيٽ ۾ 180 نمبر تي اچي ٿو. رپورٽ مطابق سال 2012ع تي 70 لک شاگرد اسڪولن ۽ ڪاليجن ۾ ويندا هئا: پرائمري اسڪولن ۾ 29 لک. سيڪنڊري اسڪولن ۾ 6 لک. ڪاليجن ۾ 15 لک. پاڪستان ۾ 3 سيڪڙو شاگرد پرائمري ۽ سيڪنڊري تعليم حاصل ڪري ڪاليجن تائين پهچن ٿا. 75 سيڪڙو شاگردن ڇوڪرن توڙي ڇوڪرين تعليم کي ڇڏي ڏنو آهي. رپورٽ موجب سنڌ ۽ بلوچستان ۾ ٽن کان پنجن سالن جا ٻار اسڪول نٿا پڙهن، جن جو تعداد ترتيبوار 72 ۽ 78 سيڪڙو آهي. بي بي سي هڪ سروي رپورٽ جي حوالي سان هڪ خبر شايع ڪئي آهي: ”پاڪستان ۾ تعليم ڏينهون ڏينهن تباهه ٿي رهي آهي، جنهن سبب خواندگي جي شرح وڌڻ بدران گھٽجي 58 سيڪڙو رهجي وئي آهي. جڏهن ته ٻين صوبن جي ڀيٽ ۾ سنڌ جي حالت تمام گھڻي خراب آهي. جتي خواندگي جي شرح ۾ سڀ کان وڌيڪ 4 سيڪڙو گھٽتائي ڏسڻ ۾ آئي. شماريات کاتي پاران ڪيل سروي موجب پاڪستان ۾ خواندگي جي شرح گذريل ٻن سالن دوران 2 سيڪڙو گھٽي آهي. سروي موجب 2012ع ۽ 2013ع ۾ پاڪستان جي خواندگي شرح 60 سيڪڙو هئي، جيڪا 2013ع ۽ 2014ع ۾ گھٽجي 58 سيڪڙو ٿي وئي آهي. سروي موجب چئني صوبائي حڪومتن ۽ وفاقي سرڪار ٻن سالن دوران تعليم تي 537 ارب 60 ڪروڙ رپيا خرچ ڪيا، جيڪو پيداوار جو 2.1 سيڪڙو آهي، ان جي پهرين ترجيح ٻارن کي اسڪول ڏانهن آڻڻ هو. سروي موجب پنجاب ۽ خيبرپختونخواهه ۾ خواندگي جي شرح ۾ ڪجهه بهتري آئي آهي پر سنڌ ۽ بلوچستان ۾ صورتحال خراب آهي، جتي اها شرح 61 سيڪڙو رهي. سنڌ ۾ خواندگي جي شرح 4 سيڪڙو گھٽتائي سان 53 سيڪڙو رهي. پنجاب ۾ تعليم تي 218 ارب رپيا، سنڌ ۾ 106 ارب رپيا خرچ ڪيا ويا. سنڌ کانسواءِ خيبرپختونخواه صوبي تعليم تي 89 ارب رپيا خرچ ڪيا، جتي خواندگي جي شرح ۾ هڪ سيڪڙو واڌارو ڏسڻ ۾ آيو. بلوچستان ۾ خواندگي جي شرح ۾ 3 سيڪڙو گھٽتائي ٿي، جتي اها شرح 43 سيڪڙو رهي. سروي موجب بلوچستان ۾ نينگرين جي خواندگي واري شرح ۾ به واضح گھٽتائي ڏسڻ ۾ آئي. بلوچستان حڪومت تعليم تي 36 ارب رپيا خرچ ڪيا. سروي موجب هر 10 ٻارن مان 4 ٻار اسڪول نٿا وڃن، جڏهن ته هر 10 ٻارن مان 2 ٻار ان ڪري اسڪول نٿا وڃن جو اهي سمجهن ٿا ته تعليم گھڻي مهانگي آهي. پرائمري سطح تي اسڪولن ۾ ٻارن جي داخلا ۾ به گھٽتائي ٿي آهي، جنهن جو وڏو سبب مائٽن پاران ٻارن کي اسڪول موڪلڻ کان انڪار آهي. سروي موجب ڇوڪرن جي ڀيٽ ۾ ڇوڪرين جي خواندگي شرح گھٽ آهي، پاڪستان ۾ ڇوڪرن جي خواندگي شرح 70 سيڪڙو جڏهن ته ڇوڪرين جي 46 سيڪڙو آهي.“ اسان جي ملڪ ۾ اهي ڪلور عام جام آهن. سنڌ سرڪار تعليم جي مد ۾ 132 ارب رپيا، عالمي بينڪ پاران 4 سو ارب رپيا ، يونيسيف ۽ ٻين نجي ادارن طرفان ڪروڙين رپيا ملڻ جي باوجود اسڪول واڙن ۾ تبديل ٿي ويا آهن. ماستر اسڪول ۾ نٿو وڃي ۽ وڏيرا مال ميڙڻ ۾ پورا آهن .حڪمرانن جي ڪرپشن چوٽ چڙهيل آهي، سڄو ملڪ لُٽي ڀينگ ڪري ڇڏيو اٿن ۽ تعليم جي ته ٻيڙي ٻوڙي ڇڏي اٿن، سو قصو ڪوتاهه عالمي تعليمي ڪانفرنسون ٿين يا تعليم جي ترقي جا اجلاس ٿين پر اسان جي ملڪن جا سربراه، حڪمران ۽ اعليٰ عملدار پنهنجا ڀڀ ڀري پنهنجي ٻارن کي دنيا جي سٺن اسڪولن، ڪاليجن ۽ يونيورسٽين ۾ داخلا وٺي ڏيارن ٿا ۽ اسان غريب اسڪول کي اڌ ۾ ڇڏي رڪشا، گڏهه گاڏو ۽ ٻني ٻاري ۾ گذارو ڪيون ٿا!

انڌن آڏو روئڻ جاني! آهي اکين جو زيانُ

چَپَ اسان جا سِبي چون ٿا، ڪوئي گيت ٻڌاءِ! اياز گل

 

دهشتگردن کي ٻيهر منظم ٿيڻ نه ڏبو، دهشتگردي خلاف ويڙهه ملڪي بقا جي جنگ آهي:آرمي چيف

روم (مانيٽرنگ ڊيسڪ) آرمي چيف جنرل راحيل شريف دهشتگردن کي ٻيهر منظم ٿيڻ جو موقعو نه ڏيڻ جو عزم ورجائيندي چيو آهي ته دهشتگرديءَ خلاف ويڙهه ملڪي بقا جي جنگ آهي، پاڪستان ۽ افغانستان هڪٻئي کان ڌار نه ٿا ٿي سگهن. آءِ ايس پي آر موجب جنرل راحيل شريف اٽلي جي شهر روم ۾ سينٽر آف انٽرنيشنل اسٽڊي جو دورو ڪيو. ان موقعي تي خطاب ڪندي آرمي چيف چيو ته دهشتگردن جي خاتمي لاءِ آپريشن ضرب عضب شروع ڪيو ويو جنهن جا سٺا نتيجا مليا آهن. جنرل راحيل شريف عزم ورجائيندي چيو ته دهشتگردن کي ڪڏهن به ٻيهر منظم ٿيڻ نه ڏنو ويندو، پاڪستان سڄي دنيا ۾ به امن کي يقيني بڻائيندو. هن چيو ته پاڪستان ۽ افغانستان هڪٻئي کان ڌار نه ٿا ٿي سگهن، ٻنهي ملڪن جو امن ۽ استحڪام هڪٻئي سان ڳنڍيل آهي. جنرل راحيل شريف چيو ته پاڪستان ۽ افغانستان جي منزل هڪ آهي، پاڪستان پنهنجي پاڙيسري ملڪ ۾ امن قائم ڪرڻ لاءِ ڪردار ادا ڪندو رهندو. آرمي چيف چيو ته عالمي برادري به افغان امن عمل ۾ پاڪستاني ڪردار جي ساراهه ڪئي آهي جڏهن ته جٽادار امن لاءِ گڏيل ڪوششن جي ضرورت آهي.

 

مظفر ڳڙهه ۾ مقابلو، پابندي مڙهيل تنظيم جو سربراهه 16 دهشتگرد سميت مارجي ويو

مظفر ڳڙهه (مانيٽرنگ ڊيسڪ) مظفر ڳڙهه ۾ مبينا پوليس مقابلي ۾ پابندي مڙهيل تنظيم جي سربراهه ملڪ اسحاق ۽ سندس ٻن پٽن سميت 14 ويڙهاڪ مارجي ويا، جڏهن ته 6 اهلڪار زخمي ٿي پيا. مظفر ڳڙهه جي علائقي شاهه والا ۾ ڪائونٽر ٽيرر اِزم پوليس سان مبينا مقابلي ۾ 14 ويڙهاڪ مارجي ويا. مارجي ويلن ۾ پابندي مڙهيل تنظيم جو سربراهه ملڪ اسحاق، سندس 2 پٽ عثمان ۽ حق نواز به شامل آهن. پوليس اختيارين جو چوڻ آهي ته مارجي ويلن ۾ غلام رسول ۽ سندس پٽ به شامل آهن، جڏهن ته سمورن جوابدارن جو تعلق پابندي مڙهيل تنظيمن آهي. جوابدار دهشتگردي جي ڪيترين ئي وارداتن ۾ گهـُربل هئا. پول

يس اختيارين جو چوڻ آهي ته ملڪ اسحاق کي ڪجهه ڏينهن اڳ گرفتار ڪيو ويو هو ۽ کيس هٿيارن جي نشاندهي ۽ ٻين جوابدارن جي گرفتاري لاءِ ملتان کان مظفر ڳڙهه آندو پيو وڃي ته شاهه والا ويجهو جوابدارن جي ساٿين کين ڇڏائڻ جي ڪوشش ڪئي جنهن تي مقابلو ٿيو. سي ٽي ڊي پوليس جو چوڻ آهي ته دهشتگردن جا ساٿي موٽر سائيڪلن تي آيا، جڏهن ته جوابدارن وٽان بارود سان ڀريل 3 واٽر ڪولر، ڪلاشنڪوف، 12 پسٽل، 400 گوليون ۽ 4 دستي بم برآمد ٿيا. جوابدارن جا 6 ساٿي فرار ٿيڻ ۾ ڪامياب ٿي ويا پر سندن گرفتاريءَ لاءِ سرچ آپريشن شروع ڪيو ويو آهي. مبينا پوليس مقابلي ۾ مارجي ويلن جا لاش ڊي ڪيو اسپتال منتقل ڪيو ويو جڏهن ته ڇڪتاڻ جي خدشي کي نظر ۾ رکندي اسپتال جا سمورا دروازا بند ڪيا ويا.

 

وزيراعظم جي صدارت هيٺ پارلياماني اڳواڻن جو هنگامي اجلاس، اسحاق ڊار جي بريفنگ

اسلام آباد (بيورو) پارلياماني جماعتن جي اجلاس ۾ جي يــُو آءِ ۽ ايم ڪيو ايم تحريڪ انصاف جَي ميمبرن کي نااهل قرار ڏيڻ لاءِ جمع ڪرايل رٿون واپس وٺڻ لاءِ وڌيڪ وقت گهـُري ورتو. پارليامينٽ هائوس جِي وزيراعظم چيمبر ۾ ميان نواز شريف جي صدارت هيٺ پارلياماني پارٽين جو هنگامي اجلاس ٿيو. اجلاس ۾ مخالف ڌر جي اڳواڻ سيد خورشيد شاهه، مولانا فضل الرحمان، سراج الحق، محمود خان اچڪزئي، رشيد گوڊيل، غلام احمد بلور، خالد مقبول صديقي، اعجاز الحق، پرويز رشيد، اسحاق ڊار ۽ خواجا سعد رفيق شرڪت ڪئي، جڏهن ته پي ٽي آءِ جو ڪو به اڳواڻ شريڪ نه ٿيو. پارلياماني جماعتن جي اجلاس ۾ انڪوائري ڪميشن جِي رپورٽ، پي ٽي آءِ ميمبرن کي ڊي سيٽ ڪرڻ لاءِ متحده ۽ جي يو آءِ جِي رٿن جِي واپسي توڙي چونڊ سڌارن بابت تفصيلي ڳالهه ٻولهه ڪئي وئي. ان موقعي تي ناڻي واري وفاقي وزير اسحاق ڊار پارلياماني ڪميٽي پاران چونڊ سڌارن ۾ ڪيل اڳڀرائي بابت بريفنگ پڻ ڏني. اجلاس دوران جي يو آءِ (ف) ۽ ايم ڪيو ايم تحريڪ انصاف جي ميمبرن کي نااهل قرار ڏيڻ لاءِ اسيمبلي ۾ جمع ڪرايل رٿون واپس وٺڻ بابت پارليامينٽ کان ٻاهر ويٺل سياسي جماعتن سان صلاح مشوري لاءِ مهلت گهـُري. اجلاس ۾ ايم ڪيو ايم اڳواڻ رشيد گوڊيل موقف اختيار ڪيو ته پي ٽي آءِ جي ڌرڻي ۾ پارليامينٽ ۽ سياسي اڳواڻن خلاف غير اخلاقي زبان استعمال ڪئي وئي. رشيد گوڊيل چيو ته حڪومت پنهنجي آسانيءَ لاءِ تحريڪ انصاف جي ميمبرن جو استعيفائون قبول نٿي ڪرڻ چاهي. جي يو آءِ سربراهه مولانا فضل الرحمان چيو ته آئين ۽ قومي اسيمبلي جي قاعدن موجب پي ٽي آءِ جا ميمبر استعيفيٰ ڏئي چـُڪا آهن، سندن استعيفائون منظور نه ڪرڻ واري ڳالهه سمجهه کان ٻاهر آهي.

 

سڀني سياسي پارٽين جڊيشل ڪميشن جي رپورٽ تي ڀرپور اعتماد جو اظهار ڪيو آهي: پرويز رشيد

اسلام آباد(بيورو)  سڌسماءَ واري وفاقي وزير سينيٽر پرويز رشيد چيو آهي ته پارلياماني اڳواڻن جڊيشل ڪميشن جي رپورٽ تي ڀرپور اعتماد جو اظهار ڪيو آهي. اسلام آباد ۾ وزيراعظم نواز شريف جي صدارت هيٺ پارلياماني اڳواڻن جي اجلاس کانپوءِ ميڊيا کي بريفنگ ڏيندي پرويز رشيد چيو ته اجلاس ۾ تحريڪ انصاف جي استعيفائن ۽ جڊيشل ڪميشن جي رپورٽ تي تفصيلي خيالن جي ڏي وٺ ڪئي وئي. هن ٻڌايو ته اجلاس دوران سڀني سياسي پارٽين جڊيشل ڪميشن جي رپورٽ تي ڀرپور اعتماد جو اظهار ڪيو، جڏهن ته تحريڪ انصاف جي ميمبرن کي ڊي سيٽ ڪرڻ بابت جي يو آءِ ۽ ايم ڪيو ايم جي جمع ڪرايل رٿن جي حوالي سان به تفصيلي ڳالهه ٻولهه ٿي، ان ڏس ۾ سڀني سياسي پارٽين پنهنجي موقف جي حوالي سان آئيني ۽ سياسي نقطا پيش ڪيا. وفاقي وزير جو چوڻ هو ته وزيراعظم نواز شريف سڀني پارلياماني اڳواڻن جو موقف ٻڌڻ کانپوءِ ايم ڪيو ايم ۽ جي يو آءِ جي اڳواڻن کي تحريڪ انصاف خلاف رٿون واپس وٺڻ جو چيو، جنهن تي ٻنهي پارٽين پنهنجي پنهنجي پارٽين سان مشورو ڪرڻ لاءِ وقت گهري ورتو. سندس چوڻ هو ته وزيراعظم نواز شريف مسلم ليگ (ن) جي وزيرن کي ذميواري سونپي ته اهي ٻنهي پارٽين سان رابطي ۾  رهن ۽ کين پنهنجون رٿون واپس وٺڻ تي راضي ڪرڻ جي ڪوشش ڪن.

 

ڀارت کان ٻوڏ جو پاڻي نه پيو اچي، سنڌ مان هن سال ساڍا 7 لک ڪيوسڪ کان وڌيڪ پاڻي نه گذرندو: وڏو وزير

سکر (اي پي پي) سنڌ جي وڏي وزير سيد قائم علي شاهه خيرپور ضلعي جي حساس قرار ڏنل اُلرا جاگير بند سميت مختلف ڪچي جي علائقن ۽ بندن جو تفصيلي دورو ڪندي چيو آهي ته ڀارت کان ٻوڏ جو پاڻي ڪونه پيو اچي، سنڌ مان ساڍا 7 لک ڪيوسڪ کان وڌيڪ پاڻي نه گذرندو، شينڪ بند تي صورتحال خراب هئي، جنهن کي پاڪ فوج جي مدد سان ڪنٽرول ۾ ڪيو ويو، هاڻوڪي ٻوڏ کي به رواجي نه ٿا سمجهون، بندن جي مضبوطي ۽ نگراني لاءِ 24 ڪلاڪ حڪومتي مشينري ڪم ڪري رهي آهي، عوام کي هن مشڪل گهڙيءَ ۾ اڪيلو نه ڇڏيو ويندو. هن اهڙو اظهار اُلرا جاگير بند تي آبپاشي کاتي ۽ ضلعي انتظاميه پاران بريفنگ ملڻ ۽ ٻوڏ متاثرن ۾ امدادي سامان ورهائڻ کانپوءِ ميڊيا سان ڳالهائيندي ڪيو. وڏي وزير چيو ته حڪومت آبپاشي، زراعت، پي ڊي ايم اي ۽ ٻين لاڳاپيل ادارن سان گڏجي ٻوڏ ۽ برساتن کي منهن ڏيڻ لاءِ اڳواٽ ئي رٿابندي ڪئي هئي، جنهن جي نتيجي ۾ ٻوڏ سبب ڪٿي به ڪو موت جو واقعو پيش نه آيو آهي ۽ سڄي حڪومتي مشينري ڏينهن رات بندن جي حفاظت ۽ عوام کي ٻوڏ جي پاڻي کان بچائڻ ۾ مصروف آهي. سيد قائم علي شاهه چيو ته هن وقت سنڌودرياهه ۾ ننڍي ٻوڏ آهي، ڀارت کان ٻوڏ جو پاڻي نه پيو اچي، تربيلا، ڪابل ندي ۽ ٻين پاڪستان جي درياهن ۽ مٿانهن علائقن مان پاڻي سنڌودرياهه ۾ داخل ٿي رهيو آهي ۽ اندازو آهي ته سنڌ مان ساڍا 7لک ڪيوسڪ کان وڌيڪ پاڻي نه گذرندو، ساڍا 7 لک ڪيوسڪ به هاءِ فلڊ هوندي، جيڪڏهن ان کان پاڻي وڌي ويو ته پوءِ سُپر فلڊ تصور ڪئي ويندي، تنهن هوندي به هاڻوڪي ٻوڏ کي رواجي نٿا سمجهون، بندن جي صورتحال بهتر آهي گهوٽڪي جي شينڪ بند تي صورتحال خراب هئي، جنهن کي پاڪ فوج جي مدد سان ڪنٽرول ۾ ڪيو ويو آهي ۽ بند جي مضبوطيءَ جو ڪم جاري آهي. وڏي وزير چيو ته 2010ع ۾ اُلرا جاگير بند کي خطرو هو ۽اُن وقت بند 12 فوٽ هو، پر اسين اُلرا جاگير بند کي جديد نموني سان 18 فوٽ بيهاريو آهي ۽ هاڻي بند ويڪرو ۽ مضبوط آهي تنهنڪري ڪو به خطرو نه آهي. هڪ سوال جي جواب ۾ وڏي وزير چيو ته اُلرا جاگير بند تي ٺهندڙ ٽن اسپرس جو ڪم 40 سيڪڙو مڪمل ٿي چڪو آهي باقي ڪم 6 مهينن ۾ مڪمل ٿيندو، ڪم مان مطمئن هئڻ يا نه هئڻ بابت ڪم مڪمل ٿيڻ کانپوءِ ئي ٻڌائي سگهجي ٿو، اسڪيم لاءِ پئسا ڏئي ڇڏيا آهن, سنڌ سرڪار وٽ فنڊن جي ڪابه کوٽ نه آهي جيڪڏهن ڪٿان به ڪرپشن جي شڪايت ملي ته جاچ ڪنداسين. وزيراعليٰ سنڌ چيو ته ڪچي جي اُنهن جهونن ماڻهن ملاقات ڪري اسپرس جي ڪم تي اعتماد جو اظهار ڪيو آهي جيڪي اهو به ٻڌائي سگهن ٿا ته ٻوڏ ڪڏهن ۽ ڪيتري ايندي ۽ هاڻي پاڻي ڪيترو آهي، پوءِ ڪنهن کي اعتراض نه ڪرڻ گهرجي. ان کان اڳ ڊپٽي ڪمشنر خيرپور منور علي مٺاڻي بريفنگ ۾ ٻڌايو ته ڪچي جي ٻُڏل علائقن مان 26 سئو ماڻهن کي پاڪ نيوي جي موٽر بوٽس جي مدد سان ڪڍي محفوظ ماڳن تي پهچايو ويو آهي، جڏهن ته بچاءَ بندن تي رليف ڪيمپن ۾ ٻوڏ متاثرن کي کاڌي پيتي کان وٺي طبي سهولتون فراهم ڪيون ويون آهن، ضلعي ۾ 72 هزار ڍورن کي ويڪسين ڪئي وئي آهي. چيف انجنيئر سکر بئراج ولي محمد نائچ بريفنگ ڏني ته اُلرا جاگير تي ٽن اسپرس جو 40 سيڪڙو ڪم مڪمل ڪيو ويو آهي، باقي ڪم 6 مهينن ۾ مڪمل ٿي ويندو، اُلرا بند وٽ پاڻي جي گيج 5 ڏهائي هڪ آهي، بچاءَ بندن تي پٿر جو اسٽاڪ موجود آهي آفيسر ۽ عملو ڏينهن رات نگراني ۽ بندن جي مرمت ۾ مصروف آهي. ان موقعي تي وڏي وزير ڪچي جي رهواسين سان ملاقات دوران سندن مسئلا ٻڌا ۽ انتظاميه کي هدايت ڪئي ته ٻوڏ جي علائقن ۾ ڦاٿل ماڻهن کي ڪڍڻ لاءِ وڌيڪ بوٽس فراهم ڪيون وڃن جڏهن ته متاثرن کي خيما ۽ ٻيو سامان پڻ فراهم ڪيو وڃي. ان موقعي تي وڏي وزير ڪچي کان لڏپلاڻ ڪري بندن تي پهتل ماڻهن ۾ راشن جا ٿيلها ۽ ٻيو سامان ورهايو ۽ پاڪ نيوي جي اهلڪارن پاران ڪچي جي علائقن مان ريسڪيو ڪيل ڪچي واسين سان ڳالهائيندي چيو ته حڪومت کين اڪيلو نه ڇڏيندي کين هر سهولت ڪيمپن ۾ ڏني ويندي. بعد ۾ وڏي وزير سيد قائم علي شاهه اوڍا ڳوٺ وڃي پنهنجي ويجهي ساٿي حاجي ميرل اوڍو جي وفات تي سندس پُٽ محمد خان اوڍو سان عذرخواهي ڪئي ۽ فاتحه پڙهي، جڏهن ته وڏي وزير ان موقعي تي ڳوٺاڻن جا مسئلا ٻڌا ۽ مختلف درخواستن تي موقعي تي ئي حڪم جاري ڪيا. ان موقعي تي پ پ اڳواڻ سيد جاويد شاهه جيلاني، امجد شاهه جيلاني، ڪمشنر سکر ڊويزن محمد عباس بلوچ، پولٽيڪل سيڪريٽري لعل بخش منگي، مظهر خان ۽ ٻيا موجود هئا

 

سياسي پارٽين پاران چونڊ سڌارن لاءِ 13 هين ترميم آڻڻ تي اتفاق

اسلام آباد(بيورو) ناڻي واري وفاقي وزير ۽ ملڪ ۾ چونڊن جي قانون ۾ صلاح مشوري لاءِ جوڙيل پارلياماني ڪميٽي جي سربراهه سينيٽر اسحاق ڊار چيو آهي ته چونڊن واري عمل کي اثرائتو، شفاف ۽ اڻ ڌريو بڻائڻ لاءِ ملڪ جي سمورين سياسي  پارٽين آئين ۾ 13 هين ترميم آڻڻ تي اتفاق ڪيو آهي.اها ڳالهه اسحاق ڊار ڪميٽي جي اجلاس جي فيصلن جا

تفصيل ڏيندي هڪ پريس ڪانفرنس ۾ ڪئي.اسحاق ڊار چيو ته هن پارلياماني ڪميٽي ۾ موجود سمورين سياسي پارٽين جي نمائندن چونڊن جي قانون کي اثرائتو بڻائڻ لاءِ آئين ۾ 13 هين ترميم ڪرڻ تي اتفاق ڪيو آهي.هن ڪميٽي چونڊن سان لاڳاپيل 6 مختلف قانونن جو جائزو پورو ڪري ورتو آهي ۽ ڪميٽي جي راءِ سا طئي ڪيوويو آهي  ته اثرائتن ۽ شفاف چونڊن لاءِ آئين ۾ ترميم ڪرڻي پوندي. اڃان تائين 13 هين ترميم تي اتفاق ٿيو آهي پر جيڪڏهن ڪميٽي بهتر سمجهيو ته وڌيڪ ترميمون به ڪري سگهجن ٿيون. چونڊن واري عمل ۾ بهتري آڻڻ لاءِ اها ڪميٽي گذريل سال ان وقت جوڙي وئي هئي، جڏهن عمران خان چونڊن ۾ ڌانڌلي جا الزام لڳائي، احتجاجي تحريڪ شروع ڪئي هئي. 34 رڪني ڪميٽي ۾ پارليامينٽ ۾ موجود سمورين پارٽين جي نمائندگي موجود آهي.اسحاق ڊار ٻڌايو ته هن ڪميٽي پهرين کان موجود سمورن چونڊن وارن قا نونن جو مڪمل طرح سان جائزو ورتو آهي ۽ انهن کي نون قانونن سان مٽائڻ جو فيصلو ڪيو آهي.سندس چوڻ هو ته ڪميٽي اڄ به اهو طئي ڪيو آهي ته چونڊن ۾ ڌانڌلي  جي الزامن جي جاچ ڪندڙ عدالتي ڪميشن جي رپورٽ ۾ اليڪشن ڪميشن ۽ چونڊن واري عمل ۾ جن خامين جو ذڪر ڪيو ويو آهي انهن کي به هن ئي ڪميٽي جي صلاحن جو حصو بڻايو ويندو ته جئين انهن ڪوتاهين کي به جڊيشل ڪميشن جي صلاحن جي روشني ۾ بهتر ڪري سگهجي.اسحاق ڊار چيو ته هن صلاحڪاري ڪميٽي پنهنجو 80 سيڪڙو ڪم پورو ڪري ڇڏيو آهي

 

 

پ پ جمهوري پارٽي آهي، ملڪ ۾ جمهوري نظام کي مضبوط ڪرڻ جي جدوجهد ۾ ڪوشان آهي: نثار کهڙو

ڪراچي(اسٽاف رپورٽر): سنڌ جي اطلاعات ۽ آبپاشي واري وزير نثار احمد کهڙو چيو آهي ته پيپلز پارٽي هڪ جمهوري پارٽي آهي، جيڪا ملڪ ۾ جمهوري نظام کي مضبوط ڪرڻ جي جدوجهد ۾ ڪوشان آهي. پي پي پي جي ان جدوجهد سبب جمهوري حڪومت پنج سال نه صرف مڪمل ڪيا بلڪ جمهوري انداز سان اقتدار ۾ ايندڙ حڪومت کي اقتدار پرامن طور تي منتقل ڪيو ويو. صوبائي وزير اطلاعات اها ڳالهه اربع ڏينهن هڪ استقباليه کي مقامي ڪلب ۾ خطاب ڪندي چئي. استقباليه هڪ ماهوار ميگزين جي ايڊيٽر دردانه شهاب پاران ڏنو ويو هو، جنهن ۾ ميڊيا جي صنعت سان واڳيل سينيئر صحافين، ايڊيٽرن، فنڪارن ۽ صنعتڪارن شرڪت ڪئي ۽ نثار احمدکهڙو کي نئين وزارت ملڻ تي مبارڪون ڏنيون. نثار احمد کهڙو چيو ته پيپلز پارٽي کي ماضي ۾ ختم ڪرڻ جون گهڻيون ئي ڪوششون ڪيون ويون، پر پارٽي عوام جي مدد سان هر هر اهڙين ڪوششن کي ناڪام بڻايو. هن چيو ته ماضي ۾ ڪنهن به جماعت جي حڪومت کي پنهنجي مدت پوري ڪرڻ نه ڏني ويندي هئي ۽ ڊڪٽيٽر جمهوريت دشمن عناصر سان گڏجي جمهوريت کي پروان نه چڙهڻ ڏنو ويو. نثار  احمد کهڙو چيو ته پيپلز پارٽي جي قيادت جي مصالحت تي ٻڌل پاليسين نه صرف جمهوريت جو تسلسل برقرار رکيو بلڪ پرامن طريقي سان اقتدار منتقل ٿيو. هن چيو ته شهيد محترمه بينظير ڀٽو سياسي قوتن کي گڏ رکيو ۽ جمهوريت لاءِ جدوجهد جي جنهن جي مثال ايم آر ڊي ۽ اي آر ڊي جهڙن اتحادن جو قيام هو. بينظير ڀٽو اڄ اسان ۾ نه آهي پر ان جي ياد ۽ ان جي جدوجهد اسان لاءِ مشعل راهه آهي ۽ پيپلز پارٽي ان جي ٻڌايل رستي تي هلي عوام جي خدمت ڪري رهي آهي. نثار کهڙو چيو ته پيپلز پارٽي هميشه آزاد صحافت تي نه صرف يقين رکي ٿي بلڪ آزاد صحافت جي جدوجهد ۾ ڀرپور حصو ورتو ۽ اڄ به صحافين جي جدوجهد ۾ انهن سان گڏ آهي. صوبائي وزير اطلاعات چيو ته اطلاعات کاتي جو قلمدان هڪ چئلينج آهي ۽ اهو چئلينج ان قبول ڪيو آهي ته جيئن آزاد صحافت کي وڌيڪ پروان چڙهايو وڃي. هن چيو ته صحافين ۽ ميڊيا جا مسئلا حل ڪيا ويندا ۽ سڌوسنئون ميڊيا جي ماڻهن سان رابطن تي يقين رکان ٿو. تقريب ۾ اي پي اين ايس جي اڳوڻي سيڪريٽري قاضي اسد عابد، الياس شاڪر، فنڪارن، ڪراچي پريس ڪلب جي اڳوڻي صدر طاهر حسن خان، ايڊيٽر ايڪسپريس طاهر نجمي، ايڊيٽر امت سجاد عباسي ۽ جي ايم جمالي به خطاب ڪيو. تقريب ۾ صوبائي سيڪريٽري اطلاعات ذوالفقار علي شالواڻي، ڊائريڪٽر پريس انفارميشن محمد يوسف ڪابورو، ٽي وي اينڪر ناجيه اشعر، مشهور اداڪار ساجد حسين ۽ ٻين به شرڪت ڪئي.

 

بلاول ڀٽو طرفان بدين، ٿرپارڪر، ميرپورخاص ۽ سنڌ جي ٻين علائقن ۾ برساتن سبب ٿيل نقصان تي افسوس جو اظهار

ڪراچي (اي پي پي) پاڪستان پيپلز پارٽي جي چيئرمين بلاول ڀٽو زرداري بدين، ٿرپارڪر، ميرپور خاص، شڪارپور، جيڪب آباد ۽ سنڌ جي ٻين ضلعن ۾ تازين برساتن جي ڪري ٿيندڙ نقصانن تي افسوس جو اظهار ڪيو آهي ۽ برسات سبب متاثر ٿيندڙ شهرن مان پاڻي جو نيڪال نه ٿيڻ جو سختي سان نوٽيس ورتو آهي. بلاول هائوس ميڊيا سيل پاران جاري ڪيل پڌرائي موجب پي پي پي چيئرمين بلاول ڀٽو زررداري سنڌ جي سڀني ايم پي ايز ۽ ايم اين ايز کي هدايت ڪئي آهي ته هو برساتن سبب متاثر ٿيندڙ علائقن ۾ امدادي ڪمن جا پاڻ نگراني ڪن. هن چيو ته جيڪڏهن ڪٿي به ڪا غفلت ڏٺي وئي يا ان حوالي سان ڪا شڪايت ملي ته ان جو سختي سان نوٽيس ورتو ويندو.