تازيون خبرون

Monthly Archives: July 2015

سنڌو درياهه ۾ ٻوڏ ڪچي جا وڌيڪ ڪيترائي ڳوٺ ٻوڙي ڇڏيا ، سيوهڻ ۽ سيتا روڊ ۾ وڌيڪ 70 ڳوٺن ۾ پاڻي ڪاهي پيو

ڪراچي (نمائندن وٽان) سنڌو درياهه ۾ ٻوڏ سبب ڪچي جا وڌيڪ ڪيترائي ڳوٺ پاڻي هيٺ اچي ويا، جڏهن ته بندن تي پاڻي جو دٻاءُ برقرار آهي پر ڪچي جي رهواسين کي پڪي ڏانهن منتقل ڪرڻ لاءِ انتظاميه اڃا تائين ڪي به انتظام نه ڪيا آهن. سنڌو درياهه ۾ چاڙهه سبب سيوهڻ جي ڪچي جا ڳوٺ پيرل هاليپوٽي، نئي واهن، بلاولپور، دريديري، راڌن، حيات جلباڻي، ماهي، اوٺي، گرا جتوئي، جهنڊياڻي سميت 50 کان وڌيڪ پاڻي هيٺ اچي ويا. ٻوڏ سبب ڪچي ۾ ڪيترائي ماڻهو ڦاٿل آهن، جڏهن ته انتظاميا پاران متاثرن کي محفوظ هنڌن ڏانهن منتقل ڪرڻ لاءِ اڃا تائين ڪي به جوڳا اپاءُ نه ورتا آهن. نوابشاهه ويجهو مڏ بنگلي ڀرسان حفاظتي بند جي حالت خراب ٿي وئي آهي، جڏهن ته ڳوٺ منگواڻي، محمد بخش چانڊئي، سميت 50 ڳوٺن جي ماڻهن جو ساهه مٺ ۾ اچي ويو آهي. ٻئي طرف ڳوٺ جمن چانڊئي جي رهواسين پنهنجي مدد پاڻ تحت حفاظتي بند ٻڌي ورتو آهي. ڳوٺاڻن جو چوڻ آهي ته انتظاميا اڃا تائين سندن واهر ناهي ڪئي، جنهن سبب هو بي يارو مدد گار ويٺل آهن. سيتاروڊ ويجهو ڪچي واري علائقي ڀنڊ ماڙيءَ جي ڀر پاسي جا 20 کان وڌيڪ ڳوٺ پاڻيءَ هيٺ اچي ويا، جڏهن ته سوين ڳوٺن جو سيتاروڊ، راڌڻ، ميهڙ سميت ٻين شهرن سان زميني رستو ڪٽجي ويو آهي. پاڻيءَ هيٺ آيل ڳوٺ ۾ شهزاد لاکير، غلام حيدر لاکير، رحيم لاکي، شمن قريشي، فاروق چانڊئي، علي خان لاکير، پانڌي، حاجي شير محمد، ليمي چانڊئي۽ اعجاز لاکير سميت ٻيا شامل آهن. موهن جي دڙي ڀرسان ٻلهڙيجي پتڻ وٽان پاڻي زمينداري بند توڙي ڪپرن تي چڙهي آيو آهي، جنهن ڪري ترن جو فصل لڙهي ويو آهي، جڏهن ته آبپاشي عملو بندن جي نگراني کان لاتعلق بڻيل آهي. ڏوڪري تعلقي جي ڪچي واري علائقي پراڻي گـُڏ، حسن واهڻ، درگاهه نور شاهه، هڪڙا پتڻ، ٻلهڙيجي پتڻ ۽ درگاهه محبڻ آريجا ويهڙ وٽان پاڻي ڪپرن کي لڳاتار کاڌ ڪري پائي رهيو آهي. هوڏانهن متاثر ڳوٺاڻا پنهنجي مدد تحت وڌيڪ فصل بچائڻ لاءِ ٻيهر بند ڏئي فصلن کي بچائڻ جي ڪوشش ڪري رهيا آهن. ڳوٺاڻن مطالبو ڪيو ته نوٽيس وٺي بنا دير امڪاني ٻوڏ کي منهن ڏيڻ تڪڙا اپاءُ ورتا وڃن.

 

هالي ووڊ ۾ ڪم جو تجربو تمام بهترين رهيو: پريانيڪا چوپڙا

ممبئي (شوبز نيوز) بالي ووڊ اداڪارا پريانڪا چوپڙا چيو آهي ته آمريڪي ٽي وي اي بي سي جي شو ڪوانٽيڪو جي رڪارڊنگ دوران ايترو ٿڪجي پئي هيس جو سيٽ تي مون کي اها خبر نه پي پئي ته مان جيئري آهيان يا مري وئي آهيان، پنهنجي هڪ بيان ۾ هن چيو ته هڪ ئي وقت 5 کان17 ڪلاڪن تائين مون شوٽنگ ڪئي ۽ ان دوران منهنجي عضون منهنجو ساٿ ڏيڻ به ڇڏي ڏنو هو. ”ميري ڪوم“ اسٽار اها پهرين ڀارتي اداڪارا آهي جيڪا آمريڪا جي سلسليوار ڊرامي جي مرڪزي ڪردار جي لاءِ چونڊي وئي هئي ۽ ان ڊرامي جي شوٽنگ جي شروعات سندس لاءِ تمام دلچسپيءَ واري هئي. پريانڪا چيو ته هالي ووڊ ۾ ڪم جو تجربو تمام بهترين رهيو، اتي رهي انجواءِ سان گڏ نوان نوان دوست پڻ ٺاهيا. ياد رهي ته ڪجھه وقت اڳ ”بجرائو مستاني“ جي سيٽ تي اداڪارا گھڻي ڪم جي دٻاءَ ڪري بيهوش پڻ ٿي وئي هئي.

 

مستقبل ۾ سٺي آڇ ٿي ته بالي ووڊ ۾ ضرور ڪم ڪندس: سڪندر رضوي

ڪراچي (شوبز نيوز) ملڪه ترنم نور جهان جو پوٽو سڪندڙ رضويءَ جو چوڻ آهي ته کيس مستقبل ۾ سٺي آڇ ٿي ته هو به بالي ووڊ ۾ ضرور ڪم ڪندو. برطانوي خابرو اداري کي ڏنل انٽرويءَ ۾ هن چيو ته هُو سمجھي ٿو ته اداڪاري سندس ڊي اين اي ۾ آهي ڇو ته سندس ڏاڏي ميڊم نورجهان ۽ ڏاڏو شوڪت حسن رضوي کان وٺي سموري خاندان ۾ فنڪاراڻيون خوبيون آهن. سندس ڀيڻ سونيا جهان بالي ووڊ جي 3 فلمن ۾ ڪم ڪري چڪي آهي، هڪ فنڪار گھراڻي سان لاڳاپو هجڻ کي هو خوش نصيبي ٿو سمجھي، هو ڪنهن به قسم جي دٻاءَ جو شڪار ناهي، سڪندر رضويءَ جو چوڻ هو ته سندس فلم ”ديک مگر پيار سي“ هڪ هلڪي ڦلڪي فلم آهي، جيڪا اوهان ٻارڙن سان ويهي ڏسي سگھو ٿا. سندس مقابلي ۾ حمائمه ملڪ مرڪزي ڪردار ادا ڪري رهي آهي، پاڻ حمائمه به بالي ووڊ ۾ ڪم ڪري چڪي آهي، ان ڪري جيڪڏهن مون کي مستقبل ۾ آڇ ٿي ته ڪم ضرور ڪندس.

 

من موهڻي اداڪارا مهوش حيات ثابت ڪري ڇڏيو آهي ته هوءَ به ڪرڙين کان ڊڄندي آهي

ڪراچي (شوبز نيوز) پاڪستان جي من موهڻي اداڪارا مهوش حيات ثابت ڪري ڇڏيو آهي ته هوءَ به عام ڇوڪرين جيان ڪرڙين کان ڊڄندي آهي. هن پنهنجي فيس بڪ تي هڪ تصوير شيئر ڪئي، جنهن ۾ ڏسي سگھجي ٿو ته مهوش حيات مبينا طور هڪ مئل ڪرڙيءَ کي پُڇ کان وٺي کنيو بيٺل آهي. تصوير ۾ واضح ڏسي سگھجي ٿو ته مهوش حيات پنهنجون اکيون سختيءَ سان بند ڪيون آهن ۽ سندس چهري تي ”ڪرڀ“ جا آثار ظاهر آهن. مهوش حيات سوشل ميڊيا تي ڪافي متحرڪ آهي ۽ اڪثر پنهنجي مداحن جي دلچسپيءَ جي لاءِ نيون نيون تصويرون ۽ وڊيو شيئر ڪندي رهندي آهي، مهوش پاران اپلوڊ ڪيل هڪ ٻئي وڊيو ۾ هوءَ پنهنجو پسنديده گيت ڳائي رهي آهي.

 

زال مڙس جو رشتو مضبوط هجڻ سان گڏوگڏ ڪمزور به هوندو آهي: پاڪستاني اداڪار سعود

لاهور (شوبز نيوز) اداڪار سعود چيو آهي ته زال مڙس جو رشتو مضبوط هجڻ سان گڏوگڏ ڪمزور به هوندو آهي، گڏيل سوچ ويچار سان ان رشتي کي مضبوط ڪري سگھجي ٿو، خاص ڳالهه ٻولهه دوران هن چيو ته ننڍيون ننڍيون غلط فهميون زال مڙس جي رشتي ۾ ڦوٽ وجھنديون آهن، پر جي گھر جا وڏا ۽ سرپرست موجود هجن ته هو پنهنجي عقلمندي ۽ دانشمنديءَ سان زال مڙس وچ ۾ ٿيندڙ ناچاقين کي ختم ڪرائي ڇڏيندا آهن، سعود چيو ته اڄ طلاق جي شرح ۾ واڌ ٿي رهي آهي ان جو سبب ويڙهه سان گڏ انا پرستي به آهي.

 

پاڪستان جي ڪرڪيٽ ٽيم سيپٽمبر ۾ ون ڊي ۽ ٽي ٽوئنٽي سيريز جي لاءِ زمبابوي ويندي

لاهور (اسپورٽس نيوز) پاڪستان جي ڪرڪيٽ ٽيم سيپٽمبر ۾ ون ڊي ۽ ٽي ٽوئنٽي سيريز جي لاءِ زمبابوي ويندي، ان سلسلي ۾ ٻنهي ملڪن جي ڪرڪيٽ بورڊن وچ ۾ مامرا طئه ٿي ويا آهن. خابرو اداري جي رپورٽ موجب پاڪستان ڪرڪيٽ ٽيم سيپٽمبر جي آخر ۾ زمبابوي پهچندي جتي هوءَ 3 ون ڊي انٽرنيشنل ۽ 2 ٽي ٽوئنٽي ميچن تي ٻڌل سيريز کيڏيندي. زمبابوي جي دوري کان پوءِ پاڪستان ڪرڪيٽ ٽيم ۽ انگلينڊ وچ ۾ گڏيل عرب امارتن ۾ ٽيسٽ، ون ڊي ۽ ٽي ٽوئنٽي فارميٽ جي سيريز کيڏي ويندي. واضح رهي ته پاڪستان آگسٽ ۾ زمبابوي ۽ ويسٽ انڊيزسان ٽِه ملڪي سيريز کيڏڻ کان انڪار ڪيو هو. پي سي بيءَ پاران پاڪستان زمبابوي سيريز جي شيڊيول جو جلد اعلان ڪيو ويندو. هوڏانهن زمبابوي ڪرڪيٽ بورڊ پاران پاڪستان جي دوري جو به باضابطه اعلان ڪيو ويو آهي، زمبابوي ڪرڪيٽ بورڊ طرفان جاري بيان ۾ چيو ويو آهي ته پاڪستان ۽ زمبابوي ٽيمن وچ ۾ 25 سيپٽمبر کان 30 سيپتمبر تائين 2 ٽي ٽوئنٽي جڏهن ته پهرين آڪٽوبر کان 5 تائين 3 ون ڊي ميچون کيڏيون وينديون. زمبابوي ڪرڪيٽ بورڊ ويسٽ انڊيز کي الڳ دوري جي دعوت ڏيڻ جي به تصديق ڪئي آهي.

 

سريلنڪا جي اڳوڻو اوپنر پنهنجي پاڪستاني دوري دوران نٿيا گلي پهتو

مري (اسپورٽس نيوز) سريلنڪا جي اڳوڻو اوپنر پنهنجي پاڪستاني دوري دوران نٿيا گلي پهتو ۽ خوشگوار موسم جو مزو ورتائين. سريلنڪن ڪرڪيٽ جي ليجنڊ ڪرڪيٽر سناٿ جي سوريا پاڪستان جي تفريحي هنڌن تي گهمڻ لاءِ آيل آهي، سريلنڪا جي اڳوڻي اوپنر جي سوريا اڄ ڪلهه اسپورٽس سفير جي حيثيت ۾ پاڪستان آيل آهي. جي سوريا سياحتي هنڌ نٿيا گلي پهتو، جتان جي بهترين موسم مان مزو ورتائين. اڳوڻي ڪرڪيٽر سريلنڪا ٽيم سان به ڪيترائي ڀيرا پاڪستان جو دورو ڪري چڪو آهي، بالرن جي لاءِ دهشت جي علامت جي سوريا سريلنڪا ۾ صوبائي ڪائونسل ۽ ڳوٺاڻي ترقي جو ڊپٽي منسٽر پڻ آهي. سناٿ جي سوريا کاٻي هٿ سان اوپنر بيٽسمين هو جنهن سريلنڪا جي نمائندگي ڪندي ٽيسٽ ڪرڪيٽ ۾ 6 هزار ۽ ون ڊي ۾ 3 هزار رنسون اسڪور ڪيون آهن.

 

پاڪستان ڄائو برطانوي باڪسر عامر خان پنهنجي گھر واري سان گڏ اڄ لاهور پهچندو

لاهور (اسپورٽس نيوز) پاڪستان ڄائو برطانوي باڪسر عامر خان پنهنجي گھر واري سان گڏ ٿوري دوري تي جمعي ڏينهن لاهور پهچي رهيو آهي. باڪسنگ دنيا جي اسٽار پاڪستان ۾ جلوا ڏيکاريندو، عامر خان پنهنجي گھر واري فريال مخدوم سان گڏ شاديءَ کان پوءِ پهريون ڀيرو پاڪستان اچي رهيو آهي، باڪسنگ اسٽار عامر خان پنهنجي فيمليءَ سان گڏ داتا درٻار تي حاضري پڻ ڀريندو. ان سان گڏوگڏ عامر خان ڇنڇر جي ڏينهن اسپورٽس بورڊ جو دورو به ڪندو ۽ اتي ٺهندڙ باڪسنگ اڪيڊميءَ جو جائزو پڻ وٺندو.

 

اولمپڪ گيمز 2015ع ۾ تيراڪ عاصم راز پاڪستان جي لاءِ پهريون سونو ٻلو کٽي ورتو

لاس اينجلس (اسپورٽ نيوز) آمريڪي شهر لاس اينجلس ۾ هلندڙ اسپيشل اولمپڪ گيمز 2015ع ۾ تيراڪ عاصم راز پاڪستان جي لاءِ پهريون سونو ٻلو کٽي ورتو. لاس اينجلس ۾ اسپيشل اولمپڪ ايٿيليٽس گيمز جي رنگين افتتاحي تقريب ۾ آمريڪي صدر باراڪ اوباما جي گھر واري مشعل اوباما پڻ خاص شرڪت ڪري ايويٽ کي چار چنڊ لڳايا. عاصم 100 ميٽر فري اسٽائل ڊويزن جي ايم 14 اڪويٽڪس مقابلي ۾ پهرين پوزيشن ماڻي. هي پهريون موقعو نه آهي جو عاصم عالمي سطح تي پاڪستان جو نالو روشن ڪيو هجي، پر ان کان اڳ به 27 سالا اسٽار ايٿيليٽ 2007ع ۾ چين ۾ رٿيل اسپيشل اولمپڪ ۾ 400 ميٽر ريس ۾ لانگ جمپ ۾ ٻه سلور ميڊل کٽي چڪو آهي. ٽن سالن جي عمر ۾ آٽزم جھڙي بيماريءَ جو شڪار عاصم 20 سال اڳ اسپيشل اولمپڪ پاڪستان جو حصو بڻيو. سندس والده تهمينه عظيم ان کان اڳ ڊان نيوز سان ڳالهائيندي چيو ته عاصم پنهنجو پير پاڻيءَ ۾ وجھڻ کان ڊڄندو هو پر پوءِ ٿوري گھڻي ٽريننگ کان پوءِ هو عام ايٿيليٽن سان مقابلو ڪرڻ لڳو. تهمينه موجب عاصم جي اولمپڪ مقابلن ۾ شرڪت کان پوءِ سندس شخصيت ۾ ڊرامائي بدلاءُ آيو آهي.

 

لشڪر جهنگوي سربراهه ملڪ اسحاق 2 پٽن سميت پوليس مقابلي ۾ مارجي ويو

 

پابندي پيل تنظيم لشڪر جهنگوي جو سربراهه ملڪ اسحاق 2 پٽن ۽ 13 ساٿين سوڌو پوليس مقابلي ۾ مارجي ويو، 6 اهلڪار زخمي، پوليس عملدارن موجب مظفر ڳڙهه جي علائقي شاهه والا ويجهو پوليس ۽ پابندي پيل تنظيم جي هٿياربند دهشتگردن وچ ۾ ان وقت فائرنگ جي ڏي وٺ ٿي، جڏهن پوليس ملڪ اسحاق کي 6 ڏينهن اڳ 16 ايم پي او تحت گرفتار ڪيو هو. سندس 2 پٽن ۽ ٻين 3 ساٿين سان گڏ هٿيارن جي نشاندهي ڪرائڻ لاءِ کين مظفر ڳڙهه آندو پئي ويو ته پوليس وين شاهه والا ويجهو پهتي ته اتي موٽر سائيڪل سوارن پوليس قافلي کي روڪڻ جي ڪوشش ڪئي نه روڪڻ تي انڌاڌنڌ فائرنگ شروع ڪري ڏني. هٿياربند دهشتگردن جي فائرنگ سبب پوليس حراست ۾ موجود 6 ڏوهاري جن ۾لشڪر جهنگوي جو سربراهه ملڪ اسحاق سندس 2 پٽ عثمان ۽ حق نواز، سندس ساٿي غلام حسين شاهه، ادريس شاهه ۽ غلام رسول مارجي ويا، پوليس جي جوابي ڪارروائي ۾ 10 حملي آور به مارجي ويا، مارجي ويندڙن ۾ 2 جو تعلق مظفر ڳڙهه جي علائقي علي پور سان هو. دهشتگردي ٽوڙ کاتي جو چوڻ آهي ته پوليس جي حراست ۾ 6 دهشتگردن جي سڃاڻپ ٿي چڪي آهي. جڏهن ته ٻين 10 ماڻهن جي سڃاڻپ لاءِ نادرا ۽ ٻين ادارن کان مدد ورتي پئي وڃي. عملدارن جو چوڻ هو ته مارجي ويندڙ انهن 10 ماڻهن جو تعلق پابندي پيل تحريڪ طالبان ۽ القائده سان هو پوليس مقابلي کان پوءِ قانون لاڳو ڪندڙ ادارن حملي آور جي قبضي مان 2 ڪلاشنڪوفون، 12 پستول، 4 هينڊ گرنيڊ، آپگهاتي جيڪٽون ، بارود سان ڀريل 3 واٽر ڪولر ۽ 400 گوليون به هٿ ڪري ورتيون آهن. سي ٽي ڊي جي ترجمان ٻڌايو ته سمورن ماڻهن جو تعلق پابندي پيل تنظيم لشڪر جهنگوي سان هو انهن کي هٿيار برآمد ڪرائڻ لاءِ مظفر ڳڙهه نيو پئي ويو انهن جو چوڻ هو ته پوليس مظفرڳڙهه کان نشاندهي کان پوءِ اسلحو هٿ ڪري واپس اچي رهي هئي ته 12 کان 15 هٿياربند موٽر سائيڪلن تي آيا ۽ ملڪ اسحاق ۽ انهن جي پٽن کي موٽر سائيڪل تي پاڻ سان گڏ کڻي وڃڻ جي ڪوشش ۾ ڪامياب به ٿي ويا مقابلي جي حوالي سان هن ٻڌايو ته انهن جي ڀڄي وڃڻ کان پوءِ ڪائونٽر ٽريرزم پوليس کي مقامي ايس ايڇ او کي ڄاڻ ڪئي وئي جيڪو ان وقت انهي علائقي ۾ گشت ڪري رهيو هو سي ٽي ترجمان موجب ايس ايڇ او ڀڄي ويندڙ ڏوهارين جو پيڇو ڪيو ان دوران مقابلو ٿيو جنهن سبب 6 پوليس اهلڪار به زخمي ٿيا جن کي اسپتال منتقل ڪيو ويو. واضح رهي ته لشڪر جهنگوي جي سربراهه ملڪ اسحاق کي 6 ڏينهن اڳ 16 ايم پي اي تحت گرفتار ڪيو ويو ملڪ اسحاق تي پنجاب ۾ 70 کان وڌيڪ ڪيس داخل هئا. انهن سمورن الزامن ۾ هو عدالتن مان آزاد ٿي چڪو هو. ملڪ اسحاق گذريل 23 سالن کان پوليس جي حراست ۾ مختلف جيلن ۾ قيد رهيو انهن 23 سالن دوران 6 مهينا کيس آزادي به ملي، لشڪر جهنگوي کي پاڪستان جي فرقيواراڻا طور سڀ کان وڌيڪ تشدد ڪندڙ تنظيمن ۾ ڳڻپ ڪئي ويندي هئي. 1990ع ۾ ٻين فرقي جي ماڻهن کي قتل ڪرڻ جا الزام هئا.  لشڪر جهنگوي جو تعلق عالمي شدت تنظيم القائده سان هو، هو ملڪ اسحاق کي مبينا طور تي سريلنڪا جي ٽيم تي ٿيندڙ حملي جو ماسٽر مائينڊ مڃيو ويندو هو 2009ع ۾ سريلنڪا ٽيم تي ٿيندڙ حملي ۾ 9 رانديگر زخمي ٿيا هئا جڏهن ته ان ۾ 8 پاڪستاني شهري به مارجي ويا. ان حملي کان پوءِ پاڪستان 2011ع ڪرڪيٽ ورلڊ ڪپ کان به محروم ٿي ويو. لشڪر جهنگوي جي سربراهه کي 1997ع ۾  فيصل آباد مان گرفتار ڪيو ويو. ملڪ اسحاق 14 سال جيل ۾ رهيو سندس تعلق ساهيوال سان هو اسامه بن لادن ۽ ايمن الظواهري جو ويجهو ساٿي هو. هزارا برادري تي حملي جو الزام به ملڪ اسحاق تي هو.