تازيون خبرون

Daily Archives: July 29, 2015

“هر ڪسي ڪو نهين ملتا، يهان پيار زندگي ۾”سوناڪشي جو سڀ کان پسنديده گانو

ممبئي(شوبز نيوز): بالي ووڊ اداڪارا سوناڪشي سنها چيو آهي ته ڀارت جي پراڻي فلم جانباز جو گانو“ هر ڪسي ڪو نهين ملتا، يهان پيار زندگي ۾” سندس سڀ کان پسنديده گانو آهي. سوناڪشي اهو گانو ڀارتي ٽي وي جي ريئلٽي شو انڊين آئڊل جونيئر ۾ اسٽيج تي اچي ننڍڙي فنڪارا نيتي موهن سان گڏ پڻ ڳايو، سوناڪشي جي ويجهن ساٿين جپو چوڻ آهي ته “هر ڪسي ڪو” سندس سڀ کان پسنديده ۽ دل جي ويجهو رهندڙ گانو آهي، اهو ئي ڪارڻ آهي جو هن آئيفا ايوارڊن جي تقريب ۾ به پرفارم ڪرڻ لاءِ ان گاني جي چونڊ ڪئي.

 

ڪنگنا ۽ ديپڪا جي وچ ۾ سرد ويڙهه جاري، هڪٻئي تي لفظن  جي تيرن جي ڏي وٺ

ممبئي(شوبز نيوز): ڀارت جون مشهوراداڪارائون ڪنگنا راناوت ۽ ديپيڪا ڪنهن وقت ۾ پنهنجي انٽرويوز ۾ هڪ ٻئي جي ساراهه ڪندي ڪو نه ٿڪبيون هيون پر هاڻي صورتحال اها آهي ته هڪ فلم لاءِ ٻنهي جي وچ ۾ سرد ويڙهه عروج ٿي پهچي چڪي آهي.ڀارتي ميڊيا رپورٽس مطابق ڪنگنا ۽ ديپيڪا لاءِ 2014ع گهڻو ڪامياب سال رهيو آهي، هن سال هنن ڪئي اهڙيون فلمون ڏنيو آهن، جن رڳو سٺو ڪاروبار ڪيو پر نقادن به سندن ڪم جي دل کولي واکاڻ ڪئي، جنهن جي ڪري هو ٻئي هڪٻئي کي پنهنجو دشمن سمجهن ٿيون، ان جي ڪري ٻنهي جي وچ ۾  لفظي ويڙهه ۽ تيراندازي ته هلي رهي آهي پر هاڻي ان ۾ وڌيڪ شدد اچي وئي آهي، ڇو ته ناليواري هدايتڪار ۽ پروڊيوسر انند راءِ جنهن جي 2 ڪامياب فلمن ۾ ڪنگنا ڪم ڪيو هو،اهو هاڻي پنهنجي نئين فلم ۾ ديپيڪا کي شامل ڪري رهيو آهي.

 

سيف علي خان ،ڪترينا ڪيف کي بهترين ۽ سڀ کان وڌيڪ سهڻي اداڪارا قرار ڏئي ڇڏيو

ممبئي(شوبز نيوز): بالي ووڊ جي ننڍي نواب سيف علي خان باربي ڊول ڪترينا ڪيف کي فلم نگري جي بهترين ۽ سڀ کان وڌيڪ سهڻي اداڪارا قرار ڏنو آهي. ڀارتي ميڊيا مطابق سيف علي خان پنهنجي نئين ايندڙ فلم فينٽم جو ٽريلر جاري ڪرڻ جي موقعي تي چيو ته ڪترينا ڪيف بهترين اداڪارا آهي، جنهن سان هو پهرين به فلم ريس ۾ ڪم ڪري چڪو آهي، سندس چوڻ هو ته ڪترينا بالي ووڊ جي رڳو بهترين اداڪارا ئي ناهي پر سڀ کان وڌيڪ سهڻي اداڪارا به آهي، هوءَ جنهن جي به همسفر ٿيندي اهو وڏو خوشنصيب هوندو. سيف علي خان چيو ته ڪترينا پنهنجي فلمن ۾ بهترين اداڪاري لاءِ وڏي محنت ڪندي آهي ۽ ساڻس گڏ ڪم ڪرڻ سٺو لڳندو آهي، پنهنجي فلم فينٽم جي حوالي سان ننڍي نواب جو چوڻ هو ته کيس ان قسم جون ٿرلر فلمون ڪرڻ ڏاڍو وڻندو آهي. واضح رهي ته ڪترينا ۽ سيف علي خان جي فلم فينٽم دهشتگردي جي موضوع تي آهي، جيڪا 28 آگسٽ تي رليز ٿيندي.

 

ڀارتي فلم انڊسٽري ۾ پاڪستان خلاف ٺهندڙ فلمون صفا ناهن وڻنديون: سلمان خان

ممبئي(شوبز نيوز)بالي ووڊ جي دبنگ سلمان خان چيو آهي ته ڀارتي فلم انڊسٽري ۾ پاڪستان خلاف ٺهندڙ فلمون کيس بلڪل به پسند ناهن، ڀارتي ميڊيا مطابق سلمان خان هڪ انٽرويو ۾  چيو ته پاڪستان کي گهٽ وڌ چوندڙ فلمون کيس ناهن وڻنديون، ڇو ته جيئن اسان ڀارت جي گلا برداشت ناهيون ڪندا، ائين ئي پاڪستاني به پنهنجي ملڪ جي برائي برداشت ناهن ڪندا. هن چيو ته پهرين ڀارت مان ماڻهو پاڪستان ويندا هئا ته سندن ڀرپور مهمان نوازي ٿيندي هئي، جيڪا سالن تائين ياد رکي ويندي هئي ۽ جڏهن اتان ماڻهو ڀارت ايندا هئا ته پاڻ ۾ رشتا منضبوط ٿيندا هئا، سلمان خان چيو ته جيڪڏهن حڪمرانن کي وڙهڻ جو شوق آهي ته اهي جوانن کي اڳتي نه اماڻين پر پاڻ وڙهندي گولي کائين. واضح رهي ته سلمان خان جي عيد تي رليز ٿيل فلم “ بجرنگي ڀائيجان” جي ڪهاڻي هڪ پاڪستاني ٻارڙيءَ جي چوڌاري گهمي ٿي، جيڪا سرحد پار ڪري ڀارت پهچي ٿي ۽ سلمان خان کيس والدين سان ملائڻ لاءِ پاڪستان اچي ٿو.

 

ڪولمبو ۾ پاڪستان ڪرڪيٽ ٽيم جي سريلنڪا خلاف ٽي ٽوئنٽي ميچ کان پهرين ڀرپور پريڪٽس

ڪولمبو(اسپورٽس نيوز): ڪولمبو ۾ پاڪستان ڪرڪيٽ ٽيم سريلنڪا خلاف ٽي ٽوئنٽي ميچ کان پهرين پريڪٽس ڪئي، ڪپتان شاهد آفريدي جي اڳواڻي ۾ ٽيم جي سڀني رانديگرن بالنگ، بيٽنگ ۽ فيلڊنگ جي ڀرپور پريڪٽس ڪئي. سريلنڪا خلاف مصباح الحق جي اڳواڻي ۾ ٽيسٽ ۽ اظهر علي جي قيادت ۾ ون ڊي سيريز کٽيندڙ پاڪستاني ڪرڪيٽ ٽيم جو ايندڙ امتحان سريلنڪا خلاف ٽي ٽوئنٽي سيريز آهي،ٻن ميچن واري سيريز جي پهرين ميچ خميس تي ڪولمبو ۾ کيڏي ويندي، ٽي ٽوئنٽي ٽيم ۾ کاٻڙيل فاسٽ بالر ضياءُ الحق کي پهريون ڀيرو شامل ڪيو ويو آهي، جڏهن ته بيٽسمين نعمان انور، سهيل تنوير ۽ عمر اڪمل به ٽيم ۾ جاءِ ٺاهڻ ۾ ڪامياب ٿيا آهن. شعيب ملڪ، انور علي، محمد حفيظ، مختار احمد ۽ احمد شهزاد سوڌو ٻيا رانديگر به ون ڊي ٽيم سان گڏ سريلنڪا ۾ موجود آهن.

 

ڏکڻ آفريڪي ٽيم ڀارت خلاف سندس ڌرتي تي پهرين ٽي ٽوئنٽي ۽ 4 ٽيسٽ ميچن جي سيريز کيڏندي

جوهانسبرگ(اسپورٽس نيوز): ڏکڻ آفريڪا ڪرڪيٽ بورڊ ڀارت جي 72 ڏينهن تي ٻڌل ڊگهي دوري جو اعلان ڪري ڇڏيو آهي، دوري دوران ڏکڻ آفريڪي ڪرڪيٽ ٽيم ڀارت خلاف ٽي ٽي ٽوئنٽي، 5 ون ڊي ۽ 4 ٽيست ميچون کيڏندي. ڏکڻ آفريڪي ڪرڪيٽ بورڊ جي پڌرائي مطابق اهو دورو سيپٽمببر کان ڊسمبر تائين هوندو، جنهن دوران ڏکڻ آفريڪي ٽيم ڀارت خلاف سندس ڌرتي تي پهرين ٽي ٽوئنٽي ۽ 4 ٽيسٽ ميچن جي سيريز کيڏندي. آفريڪي ٽيم جي دوري جي شروعات دهلي ۾ ٽي ٽوئٽي پريڪٽس ميچ سان ٿيندي، جنهن کانپوءِ 2 کان 8 آڪٽوبر جي وچ ۾ ڌرمشالا، ڪتڪ ۽ ڪولڪتا ۾ ٽي ٽوئنٽي ميچون کيڏيون وينديون، اهڙي ريت ٻنهي ٽيمن وچ ۾ ون ڊي ميچن جي سيريز 11 آڪٽوبر کان 25 آڪٽوبر تائين ڪانپور، اندور، راجڪوٽ، چنائي ۽ ممبئي ۾ ٿيندي، ان کانپوءِ ٽيسٽ ميچن جي شروعات ٿيندي.

 

پاڪستان ڪرڪيٽ بورڊ هڪ نئين راند شروع ڪري ڇڏي

لاهور(اسپورٽس نيوز)چيمپنز ٽرافي کان ٻاهر ٿيڻ جي ڊپ سبب پاڪستان ڪرڪيٽ بورڊ زمبابوي جو دورو ملتوي ڪري ڇڏيو. سري لنڪا کان سيريز کٽڻ تي چئمپئينز ٽرافي جو ٽڪيٽ ملڻ جي اميد سان پاڪستان ڪرڪيٽ بورڊ هڪ نئين راند شروع ڪري ڇڏي آهي. زمبابوي جي خلاف شيڊيول جوابي سيريز کي ملتوي ڪري ڇڏيو. گرين شرٽس کي ايندڙ مهيني زمبابوي جي خلاف 3 هڪ ڏينهن ۽ 2 ٽي ٽوئنٽي ميچن جي سيريز لاءِ وڃڻو هو. چئمپئينز ٽرافي جو رستو صاف ٿيڻ سان ئي پاڪستان ڪرڪيٽ بورڊ ٽه ڪنڊي سيريز ۽ هاڻي رڳو زمبابوي جي خلاف سيريز ۽ کيڏڻ کان انڪار ڪري ڇڏيو آهي، جنهن سان ٽئين ٽيم ويسٽ انڊيز کي وڏو جهٽڪو لڳو آهي. ذريعن مطابق زمبابوين بورڊ اسپانسرز جي نه هجڻ جو چئي سيريز ملتوي ڪري ڇڏي آهي.

 

آئي سي سي جي ميمبر ملڪن کي ٽيمون پاڪستان موڪلڻ لاءِ راضي ڪرڻ جي ڪوشش ڪندس: ظهير عباس

ڪولمبو(اسپورٽس نيوز) عالمي ڪرڪيٽ ڪائونسل جي صدر ظهير عباس چيو آهي ته هو آئي سي سي جي ٻين ميمبر ملڪن کي به پنهنجي ٽيمن کي پاڪستان جي دوري تي موڪلڻ لاءِ راضي ڪرڻ جي ڪوشش ڪندو، اميد آهي ته سريلنڪا به پاڪستان جو دورو ڪندي. ظهير عباس سريلنڪن ڪرڪيٽ جي عبوري ڪميٽي جي دعوت تي ڪولمبو جو دورو ڪيو، جتي ڳالهائيندي هن چيو ته اهو وقت ضرور ايندو، جڏهن اسان جا پاڙيسري به پاڪستان ايندا ۽ ڪرڪيٽ کيڏندا، مونکي اميد آهي ته سريلنڪا ته پاڪستان جو دورو ضرور ڪندي، واضح رهي ته 2009ع ۾ لاهور ۾ سريلنڪن ڪرڪيٽ ٽيم تي دهشتگرد حملي کانپوءِ پاڪستان ۾ عالمي ڪرڪيٽ جا در بند ٿي ويا هئا، پر هلندڙ سال زمبابوي جي ٽيم پاڪستان جو دورو ڪري اهو جمود ٽوڙڻ جي اميد پيدا ڪئي آهي. ظهير عباس جو چوڻ هو ته اسان ۽ سريلنڪا هر شعبي ۾ هڪ ٻئي جي ڪافي ويجهو آهيون، جيڪڏهن سريلنڪا دوري بابت راضپو ڏيکاريو ته خوشي ٿيندي.

 

سنڌو جا 45 بند حساس قرار، سخت اقدام ڪرڻ جي ضرورت.!

 

آبپاشي کاتي سنڌ درياءَ جي 45 بندن کي حساس قرار ڏئي ڇڏيو، سنڌ جي ناڻي واري وزارت بندن جي مرمت ۽ مضبوطي  لاءِ آبپاشي کاتي کي ايڊوانس ۾ 16ڪروڙ رپيا جاري ڪري ڇڏيا آهن.تفصيل موجب سنڌ جي آپباشي کاتي پنجاب مان ايندڙ پاڻي ۽ سنڌ ۾ جاري چوماسي جي وسڪاري کي نظر ۾ رکندي هڪ فزيبلٽي رپورٽ جاري ڪندي سنڌو درياءَ جي 45بندن کي حساس قرار ڏنو آهي. آپباشي کاتي پاران جن بندن کي حساس قرار ڏنو ويو آهي انهن ۾ گڊو بئراج جو هيبت، ڪي ڪي، ٽوڙي-مڪواڻي لنڪ، خيرواهه، بيگاري بند شامل آهن، جڏهن ته گهوٽڪي فيڊر ڪئنال جي قادرپور شينڪ بند، آر اين منگلي بند، قادرپور لوپ بند، ايل ايم بند، سکر ايئرپورٽ ڀرسان ايل ايس بند، رڪ اسپر، نصرت لوپ بند جَي اسپر، ايل ايس بند( سيري بند)، ايف پي بند کي آرڊي 169کان 183 ۽ 346کان 353 پوائنٽ تائين حساس قرار ڏنو ويو آهي. آپباشي کاتي پاران منڇر ڪپ جي آرڊي 7، آرڊي 80، آر ڊي 93کان 100 تائين ۽ دادو ضلعي جي فلڊ پروٽيڪشن بند(ايف پي بند) جي آرڊي 223، 246، 258، 282 ۽ آر ڊي 325، 50.0، 113.09، ا47.0، 213وارين آرڊين کي به حساس قرار ڏنو آهي. ٻي طرف سکر بئرج جي کاٻي ڪپ تي ايندڙ الرا جاگير بند، فريد آباد ، ايس ايم، ايس ايم ( بکري) ايس ايم بند33/0ميل، ايس ايم بند49/2ميل، منجٺ لوپ بند 0/0کان 1/5ميل، ايس ايم بند( بورٽي سائيٽ 37/4 ميل تائين بندن جي حصن کي حساس ڪوٺيو ويو آهي. ٻي طرف دادو، مورو پل جي  0/0کان 0/5ميل بند، ايس ايم بند 92/0ميل کان 93/0 ميل، 98/0کان 99/0ميل، 103/1ميل ۽ 104/6کان 107/6ميل تائين بندن جي  پوائنٽن کي حساس قرار ڏنو ويو آهي. رپورٽ ۾ چيو ويو آهي ته ڄامشورو جي سامهون وارو بند آر ڊي 2/2کان 4/2 تائين ۽ گِدو جي سامهون وارو دريائي بند آر ڊي 7/3کان 4/0تائين حساس آهي. آپباشي کاتي جو چوڻ آهي ته ڪوٽڙي بيراج جو حاجي پور، ايم ايس سورجاڻي، علي بهار لوڪ بند ۽ بي پي بند حساس آهن، ٻئي طرف آبپاشي کاتي جي اختيارين دعويٰ ڪئي آهي ته سنڌو جي حساس قرار ڏنل  بندن جي سخت نگراني ڪئي پئي وڃي ۽ گهٽ پاڻي هجڻ سبب وڏي نقصان  جو ڪو به امڪان ناهي. هوڏانهن سنڌ سيڪريٽريٽ جي اعتبار جوڳن ذريعن جو چوڻ آهي ته موجوده صورتحال کي نظر ۾ رکندي سنڌ جي ناڻي واري وزارت بندن جي مرمت واري بجيٽ جي 32 ڪروڙ رپين مان 16 ڪروڙ رپيا آبپاشي کاتي کي جاري ڪري ڇڏيا آهن. ذريعن جو اهو به چوڻ آهي ته بندن جي مرمت واري سالياني بجيٽ چئن قسطن ۾ آبپاشي کاتي کي جاري ڪئي ويندي آهي پر سنڌو ۾  پاڻي جي مسلسل چاڙهه سبب بجيٽ جي رقم جون ٻه قسطون اڳ آبپاشي کاتي کي جاري ڪيون ويون آهن. آبپاشي کاتي جي ذريعن جو چوڻ آهي ناڻي واري وزارت جيڪا بندن جي مرمت جي حوالي سان ايڊوانس رقم جاري ڪئي آهي انهن ۾ بيلدارن سميت ٻين ملازمن جون پگهارون ۽ سامان خريد ڪرڻ واري رقم به شامل آهي.  سنڌوءُ اندر 50 کان 60 زمينداري بند اڃا تائين اڏيل هجڻ جو انڪشاف ٿيو آهي. آبپاشي کاتي جي اعتبار جوڳن ذريعن انڪشاف ڪيو آهي ته گڊو کان ڪوٽڙي ڊائون اسٽريم تائين 50کان 60هنڌ اهڙا آهن جتي زمينداري بند اڃا تائين جيئن جو تيئن قائم آهن. ذريعن جو اهو به چوڻ آهي ته زمينداري بندن کي مڪمل طور ختم ڪرڻ بدران انهن جا ڪپر ٽوڙيا ويا آهن ته جيئن وچين درجي واري ٻوڏ جو پاڻي درياءَ مان آساني سان گذري سگهي. آبپاشي کاتي جي ذريعن جو اهو به چوڻ آهي ته جيڪڏهن مٿين درجي واري ٻوڏ آئي ته اها پاڻ ئي پاڻي جي پريشر سان زمينداري بند لوڙهي ڇڏيندي.

 

ڪوتاهيون آفتن جو ڪارڻ بڻجن ٿيون؛مشتاق ٽانوري 

موسميات کاتي سنڌ لاءِ هڪ ڀوائتي اڳڪٿي ڪندي ٻڌايو آهي ته جولاءِ جا بچيل ڏينهن ۽ آگسٽ جي اڌ تائين سانوڻي جي برساتن جو سلسلو هلندو رهندو، سانوڻي جي برساتن جو پاڻي، ڪوھ سليمان جو ايندڙ پاڻي ۽ تربيلاکان ڇوڙيل پاڻي جا ٽمون ۽ پنجنند وسيلي پهتل وهڪرا 2010 جھڙي صورتحال پيدا ڪري سگھن ٿا. بظاهر ته سنڌ سرڪار ۽ آبپاشي کاتو ان ڳالھ تي ڳٽ ڏئي بيٺل آهن ته انهن سڀ انتظام ڪري ورتا آهن پر ان صورتحال ۾ جڏهن گڊو بئراج تي وڏي ٻوڏ ۽ سکر بئراج وچين ٻوڏ جا وهڪرا وهي رهيا آهن تڏهن به ڪجھ بي احتياطيون سامهون آيون آهن جيڪي الله نه ڪري ڪو ڏکائتو باب بڻجي سگھن ٿيون. ان ڳالھ ۾ ڪوبه شڪ ناهي ته سنڌ سرڪار جي ڀيٽ ۾ پنجاب سرڪار پنهنجن بئراجن، ڪئنالن ۽ بندن جي سار سنڀال ۾ اڳتي رهي آهي. گڊو کان 5 هزار ڪيو سڪ جو مقدار رکندڙ وڏي ٻوڏ جو وهڪرو سکر پاسي پنڌ پيل آهي ۽ سکر جي سفر ۾ ان پاڻي ڪچي جي 80 سيڪڙو حصو کي ٻوڙي ڇڏيو آهي. اسان کي ان چوڻي تي به يقين آهي ته ٻڏي جاٻيڙا ٿيندا آهن پر اها چوڻي گھٽ مان گھٽ انسان حياتين سان لاڳاپو نه ٿي رکي. ان ڪري اهو لازمي آهي ته سرڪار وقتائتا قدم کڻي ڪچي واسين جي حياتين جي تحفظ لاءِ جوڳا قدم کڻي. سنڌ جي ٽنهي بئراجن وٽ هڪ اهم مسئلو پاڻي گذارڻ جو به آهي. انگريز انجنيئر لائيڊ جي نگراني م ٺهندڙ سکر بئراج کي ٺاهڻ وقت اڳتي جي حالتن کي نظر ۾ رکندي ان جي ڪئپسٽي 15 لک ڪيوسڪ رکي وئي هئي جيڪا جوڳي سنڀال نه ٿيڻ ڪري گھٽجي سرڪاري رڪارڊ ۾ 12 لک ڪيوسڪ ۽ هونئن 10 لک ڪيوسڪ وڃي رهي آهي. سکر بئراج جي گنجائش وڌائڻ لاءِ سنڌ سرڪار ڪروڙين رپيه خرچ ڪري دنيا جي ٽن وڏين ڪمپنين الائيڊ ڪنسلٽنٽ انجنيئرنگ، نيشنل ڊولپمينٽ ڪنسٽرڪشن ڪمپني ۽ اي ٽي ڪي اين کان ري ماڊلنگ ۽ ريهيبيليشن اسٽيڊيز ڪرايون آهن. ٽنهي ڪمپنين سکر بئراج جي مڪمل اسٽڊي ڪري رپورٽون سرڪار وٽ جمع ڪرائي ڇڏيون آهن، پر ٿيو اهو ته اهي رپورٽون فائيلن ۾ دٻجي سهڪي رهيون آهن. سکر بئراج جي 66 دروازن مان هرسال رڳو 10 دروازن جي مناسب مرمت ۽ سنڀال ٿيندي اچي ها ته سڄي جو سڄو بئراج نئون ٿي وڃي ها ۽ خورشيد احمد شاھ کي نئون بئراج ٺاهڻ جو مطالبو نه ڪرڻو پوي ها. سکر بئراج مان نڪرندڙ 7 ڪئنالن مان به پاڻي کڻڻ جي گنجائش 50 سيڪڙو گھٽجي وئي آهي. پنجاب ۾ ائين ٿيندو آهي جو جڏهن ٻوڏ جاڏينهن هوندا اهن آبپاشي کاتي وارا سڀني ڪئنالن جا جا دروازا بند ڪري ڇڏيندا آهن ته جئين ٻوڏ جي پاڻي سان گڏ ايندڙ سلٽ ڪئنالن جي ھيڊ ريگيوليٽرن ۽ ڪئنالن ۾ نه وڃي. ڇو ته ان سان هيڊ ريگيوليٽرن کي نقصان پهچندو آهي ۽ سلٽ ڪري ڪئنالن ۾ پاڻي جي گنجائش به گھٽجي ويندي آهي.

سنڌ ۾ ٻوڏ جي ڏينهن ۾ ڪئنالن، واهن ۽ شاخن جا در کوليا ويندا آهن جنهن ڪري ڪئنالن ۾ سلٽ وڃڻ ڪري تمام گھڻو نقصان ٿيو اهي ۽ ڪئنالن ۾ پاڻي جي گنجائش به گھٽجي وئي آهي. سکر بئراج جي مٿانهين پاسي کان سلٽ ڪڍي ئي ناهي وئي. هر سال سلٽ ڪڍڻ جي فلشنگ آپريشن جي بجيٽ ته ايندي آهي پر ڪم مڙئي خير ٿيندو آهي. فلشنگ آپريشن ۾ سلٽ پاڻي سان نيڪال ڪيو ويندوآهي ۽ اهو ڪم سيپٽمبر جي آخر ۾ لازمي ٿيڻ گھرجي.

سکر بئراج جي گنجائش وڌائڻ لاءِ ٿيل اسٽيڊيز ۾ مڪمل حوالن سان ان ڳالھ تي زور ڏنو ويو آهي ته سکر بئراج جي مٿانهين پاسي مان جديد مشينن سان سلٽ ڪڍي بئراج مان پاڻي گذارڻ جي اصل گنجائش 15 لک ڪيوسڪ بحال ڪئي وڃي. 1942ع ۾ آيل ٻوڏ کانپوءِ بئراج کي نقصان پهچڻ جو سبب ڄاڻائي 10 دروازا بند ڪيا ويا هئا. انهن دروازن کي ٻيهر کولڻ جي ڳالھ به ماڊل اسٽيڊيز ۾ ڪئي وئي آهي. سکر بئراج وٽ توڙي جو هن وقت وچين ٻوڏ جا وهڪرا وهي رهيا آهن پر سرڪاري نظراندازين جي ڪري ان وهڪري به مهاٻوڏ کان وڌيڪ خوف پيدا ڪري ڇڏيو آهي. ان ٻوڏ کي ڀوائتو بنائڻ ۾ سکر بئراج ۾ لڳل نيڪال وارا پائيپ ۽ پيئڻ جي پاڻي لاءِ لڳايل پائيپ به آهن جن کي لڳائڻ وقت پاڻي جي وهڪري کي شايد ڌيان ۾ ناهي رکيو ويو.  سکر بئراج وٽ هيٺين پاڻي جو دٻاءَ ڄاڻڻ لاءِ لڳايل پيزو ميٽر به خراب هجڻ جو انڪشاف ٿيو آهي. 2004 ۾ سکر بئراج جي مٿانهين پاسي ۾ کڏو ٿيڻ بعد آبپاشي کاتي بئراج جي اسٽريڪچر تي دٻاءُ ڄاڻڻ لاءِ پيزو ميٽر نصب ڪيو هو. 2010 جي مها ٻوڏ ۾  گيج ٻڏڻ بعد پيزو ميٽر جي مدد سان پاڻي جي سطح جو اندازو لڳايو ويو هو. ذريعن موجب پيزو ميٽر گذريل سال جنوري کان ڪم ڇڏي ويو آهي. پيزو ميٽر جي مدد سان سياري جي مند ۽ ٻوڏ جي ڏينهن ۾ بئراج جي پلرس تي پوندڙ هيٺين پاڻي جو دٻاءُ معلوم ڪيو ويندو آهي. پيزو ميٽر جي خراب ٿيڻ ته ڇڏيو هجڻ يا نه هجڻ بابت به ڪامورن کي ڄاڻ ڪونهي.هن وقت صورتحال اها آهي ته گڊو ۽ سکر بئراجن وٽ وڏي ۽ وچين ٻوڏ جا وهڪرا موجو دآهن. بندن تي پاڻي جو دٻاءُ آهي ۽ هڪ ٻن جاين تي بندن ۾ سيپيج ۽ روڻين جون ڳالهيون پڻ سامهون آيون آهن. ٻوڏ دريائن جو حسن تصور ڪئي ويندي آهي پر دريائن جو اهو حسن ڪوتاهين جي ڪري ڀوائتو محسوس ٿي رهيو آهي. سرڪار سڀ ٺيڪ آهي جو راڳ ڳائڻ ۾ مصروف آهي ۽ سنڌ واسي ڪچي جاهجن يا پڪي جا ڀوءَ ۾ ورتل آهن. گڊو کان ڪوٽڙي تائين پاڻي وهڪرن سان گڏ خوف به لامارا ڏئي رهيو آهي. ان سڄي صورتحال کي رڳو پيٽرولنگ ۽ جوڳي سار سنڀال سان ئي هٿ وس ۾ رکي سگھجي ٿي. بي احتياطيون المين کي جنم ڏينديو ن آهن تنهنڪري لازمي آهي  ته اک کليل رهي ۽ هٿ ڪم ڪرڻ لاءِ آتا هجن ان صورت ۾ ئي خوف جي فضا کي گھٽائي سگھجي ٿو.