تازيون خبرون

Daily Archives: July 28, 2015

ٽوئيٽر تي خراب ۽ غلط ٻولي استعمال ڪندڙ مداحن کي بلاڪ ڪرڻ جو ارادو رکان ٿي: انوشڪا

ممبئي (شوبز نيوز) بالي ووڊ اداڪارا انوشڪا شرما چيو آهي ته هو سماجي رابطن واري ويب سائيٽ ٽوئيٽر تي خراب ۽ غلط ٻولي استعمال ڪندڙ مداحن کي بلاڪ ڪرڻ جو ارادو رکي ٿي، ٽوئيٽر تي جاري ڪيل بيان ۾ انوشڪا چيو ته ماڻهن کي گهرجي ته هو سٺي انداز سان ڳالهائين يا وري بلاڪ ٿيڻ لاءِ تيار رهن، ٽوئيٽر تي خيال ونڊڻ لاءِ مشهور  انوشڪا ڪجهه ڏينهن کان ان ويڌن بابت ٻڌائي رهي آهي، انوشڪا جي بلاڪ واري ٽوئيٽ تي ليجنڊ اداڪار اميتاڀ بچن چيو ته پياري انوشڪا مون کي بلاڪ نه ڪجان، جنهن تي انوشڪا چيو ته هو ايئن ڪرڻ جو سوچي به نه ٿي سگهي ۽ واعدو ٿي ڪري ته پنهنجي زندگيءَ ۾ ايئن نه ڪندي، جڏهن ته ٽوئيٽر بابت ان کان اڳ مهان اداڪار رشي ڪپور ۽ فلمساز ۽ هدايتڪار ڪرن جوهر به ان قسم جو دانهون ڪري چڪا

 

شادي ڪو لڪائڻ وارو عمل ناهي، شادي ڪئي ته وڏي واڪي ٻڌائينديس: صوبيا

لاهور (شوبز نيوز) لالي ووڊ اداڪارا صوبيا خان چيو آهي ته ننڍپڻ کان خواهش هئي ته ڊاڪٽر ٿيان، پر تعليم مڪمل نه ڪرڻ تي هميشه افسوس رهندو، هن چيو ته شادي ڪو لڪائڻ وارو عمل ناهي، شادي ڪئي ته وڏي واڪي ٻڌائينديس، مقامي ويب سائيٽ سان ڳالهائيندي صوبيا خان چيو ته تعليم مڪمل نه ڪرڻ جو ڏک سڄي عمر لاءِ رهندو، هن چيو ته ارادو ته ڊاڪٽر بڻجڻ جو هو پر مان اداڪارا بڻجي ويس، اداڪارا موجب فقط 5 سالن جي شوبز ڪيريئر ۾ جيڪي ڪاميابيون ماڻيون ان لاءِ ساٿي اداڪارائون وڏا جتن ڪنديون آهن. هن چيو ته ميٽرڪ ۽ انٽر ته ڪري ويس پر هاڻي بي اي پرائيويٽ طور ڪرڻ چاهيان ٿي. هن چيو ته ميڊيائي ذريعن ۾ هن جي روزانو ڪنهن سان دوستي يا شادي ڪرائي ويندي آهي، پر مان واضح ڪرڻ چاهيان ٿي ته شادي ڪو لڪائڻ وارو عمل ناهي ۽ شادي ڪنديس ته وڏي واڪي اعلان ڪنديس.

 

سني ليوني فلم ۾ ”سپر هيرو“ وارو ڪردار  ڪرڻ جي خواهش ظاهر ڪري ڇڏي

ممبئي (شوبز نيوز) بالي ووڊ ۾ پرڏيهي ملڪ کان تعلق رکندڙ اداڪارا سني ليوني فلم ۾ ”سپر هيرو“ وارو ڪردار  ڪرڻ جي خواهش ظاهر ڪري ڇڏي آهي، ٽوئيٽر اڪائونٽ تي ٿيل بحث دوران هڪ مداح جي اهو پڇڻ تي ته ڇا اوهان  ”سپرويمن“ وارو ڪردار ڪري ويندا يا ان بابت ڪڏهن دل ۾ خيال آيو؟ جنهن جي جواب ۾ سني ليوني چيو ته ”ها“، کيس جڏهن به آڇ ٿي ته هو سپر هيرو وارو ڪردار ضرور ادا ڪندي. واضح رهي ته 2012ع ۾ بالي ووڊ ۾ انٽري ڏيندڙ اداڪارا هن وقت تائين 5 کان 6 فلمن ۾ پنهنجي اداڪاري جا جوهر ڏيکاري چڪي آهي.

 

دبنگ اسٽار سلمان خان ممبئي حملن ۾ ڏوهي قرار ڏنل يعقوب ميمڻ جي ڦاهي روڪڻ جي اپيل ڪري ڇڏي

ممبئي(شوبز نيوز) بالي ووڊ جي دبنگ اسٽار سلمان خان ممبئي حملن ۾ ڏوهي قرار ڏنل يعقوب ميمڻ جي ڦاهي روڪڻ جي اپيل ڪري ڇڏي.ڀارتي ميڊيا رپورٽ مطابق سلمان خان سماجي رابطن واري ويب سائيٽ ٽوئيٽر تي 1993ع ۾ ممبئي ۾ ٿيندڙ لاڳيتن ڌماڪن جي الزام هيٺ گرفتار يعقوب ميمڻ جي ڦاهي روڪڻ جي اپيل ڪئي آهي، جنهن کي 30 جولاءِ تي ڦاهي ڏني ويندي، ڏوهاري جو ڀاءُ ٽائيگر ميمڻ به مفرور آهي.سلمان خان پنهنجي بيان ۾ ڀڄي ويل ڏوهاري يعقوب ميمڻ جي ڀاءُ ٽائيگر ميمڻ کي ڳولڻ لاءِ چيو هو ۽ پاڪستاني وزيراعظم نوازشريف کي به درخواست ڪئي ته جيڪڏهن ٽائيگر سندن ملڪ ۾ آهي ته ٻڌايو وڃي. سلمان خان چيو ته هڪ بي ڏوهي کي ڦاهي ڏيڻ پوري انسانيت جو قتل آهي، پر بعد ۾ سوشل ميڊيا تي سخت تنقيد کانپوءِ  سلمان خان  پنهنجي پيءُ سليم خان جي چوڻ تي پنهنجي ٽوئيٽر نياپي کي هٽائي ڇڏيو ۽ پنهنجي هڪ ٻئي بيان ۾ سلمان خان چيو ته  هو نٿو ڄاڻي ته يعقوب ميمڻ بي ڏوهي آهي يا نه پر هو ججن جي فيصلي کان به مطمئن آهي.

 

سري لنڪا جي ٽيم پاڪستان کي 165 رنسن تي شڪست ڏئي ڇڏي

همبٽوٽا(اسپورٽس نيوز) سري لنڪا جي ڪرڪيٽ ٽيم پنجن ميچن تي ٻڌل ون ڊي سيريز جي آخري ميچ ۾ پاڪستان کي 165 رنسن تي شڪست ڏئي ڇڏي آهي. سري لنڪا جي همبنٽوثا جي گرائونڊ تي کيڏيل ميچ ۾ سري لنڪا جي ٽيم پهريان بيٽنگ ڪندي ڪشال پريرا ۽ ڪپتان انجيلو ميٿيوز جي جارحاڻي بيٽنگ سبب 4 وڪيٽن جي نقصان تي 368 رنسون ٺاهيون. ڪشال پريرا ۽ تلڪراتني دلشان سري لنڪا کي بهترين اوپننگ ڏني ، 164 جي گڏيل اسڪور تي دلشان 63 رنسون ٺاهي آئوٽ ٿي ويو. ڪوشال پريرا شاندار بيٽنگ ڪندي سينچري اسڪور ڪئي ۽ 212 جي اسڪور تي 117 رنسون ٺاهي رن آئوٽ ٿيو. ان کانپوءِ لهيرو ٿراماني 29 ۽ دنيش چنديمل 30 رنسون ٺاهي آئوٽ ٿيا. پنجين وڪيٽ تي ڪپتان انجيلو ميٿيوز ۽ ملندا سري وردانا بهترين بيٽنگ ڪندي 114 رنسون ٺاهيون، ميٿيوز تيز رفتاري سان بيٽنگ ڪندي  70 ۽ سرور دانا 52 رنسن سان ناٽ آئوٽ رهيا. پاڪستان پاران رڳو راحت علي 10 اوورن ۾ 74 رنسن عيوض 2 وڪيٽون حاصل ڪيون، جڏهن ته محمد عرفان 10 اوورن ۾ 73 ۽ عماد وسيم 3 اوورز ۾ 27 رنسون ڏئي ڪا به وڪيٽ نه ماڻي سگهيا. سري لنڪا پاران 368 رنسن جي جواب ۾ پاڪستان جي پوري ٽيم 203 رنسن تي ڍير ٿي وئي. پاڪستان پاران ڪو به بيٽسمين ففٽي نه ڪري سگھيو. حفيظر 37 اظهر علي 35 ۽ سرفراز 27 رنسون ٺاهي سگهيا. محمد رضوان 29، شعيب ملڪ 11 رنسون ٺاهيون. واضح رهي ته پاڪستان پنجن ميچن جي سيريز مان 3 ميچ کٽي پنهنجي نانءُ ڪري چڪو آهي.

 

پاڪستاني بالرن بد ترين بالنگ جو رڪارڊ پنهنجي نالي ڪري ورتو

همبنٽوٽا (اسپورٽس نيوز) ون ڊي ڪرڪيٽ ۾ هڪ سال اندر سڀ کان وڌيڪ سينچريون ٺاهڻ جو رڪارڊ ٽُٽي ويو آهي، جڏهن ته پاڪستاني بالرن بد ترين بالنگ جو رڪارڊ پنهنجي نالي ڪري ورتو آهي. گذريل ڏينهن پاڪستان ۽ سري لنڪا جي ٽيمن وچ ۾ سيريز جي پنجين ۽ آخري ون ڊي ميچ ۾ سري لنڪا جي بيٽسمين ڪشال سلوا سينچري ٺاهي انٽرنيشنل ون ڊي ڪرڪيٽ ۾ سال جي 80 هين سينچري مڪمل ڪئي. ان کان اڳ گذريل سان مختلف ٽيمن جي بيٽسمينن 79 سينچريون ٺاهيون هيون. 2015ع جا اڃا گھٽ ۾ گھٽ پنج مهينا باقي آهن، ڪرڪيٽ ماهرن کي اميد آهي ته هلندڙ سان دوران سينچرين جي سينچري مڪمل ٿي سگھي ٿي. ٻئي پاسي گذريل ڏينهن پاڪستاني بالرن ون ڊي ڪرڪيٽ ۾ بد ترين بالنگ ڪرائڻ جو رڪارڊ قائم ڪري ورتو آهي. سري لنڪا خلاف ميچ ۾ پاڪستان جي  چئن بالرن محمد عرفان، انور علي، راحت علي ۽ يار شاهه پنهنجي پنهنجي 10 اوورن جي اسپيلن ۾ 70 کان وڌيڪ رنسون ڏنيون. راحت علي، عرفان ۽ ياسر شاهه 73_73 جڏهن ته انور علي 71 رنسون ڏنيون. ساڳئي ميچ ۾ سري لنڪا پاران پاڪستان کي ڏنل 369 رنسن جو ٽارگيٽ به ون ڊي ڪرڪيٽ ۾ پاڪستان کي ڏنل سري لنڪا جو سڀ کان وڏو ٽارگيٽ آهي. پاڪستان خلاف ون ڊي ڪرڪيٽ ۾ سڀ کان وڏو اسڪور ڏکڻ  آفريڪا جو آهي، جنهن 2007ع ۾ پاڪستان خلاف 392 رنسون ٺاهيون هيون.

 

نيوزيلينڊ ڪرڪيٽ ٽيم ايندڙ مهيني زمبابوي ۽ ڏکڻ آفريقا جو دورو ڪندي

ويلنگٽن (اسپورٽس نيوز)نيوزيلينڊ ڪرڪيٽ ٽيم ايندڙ مهيني زمبابوي ۽ ڏکڻ آفريقا جو دورو ڪندي. ڪيوي ٽيم زمبابوي خلاف ٽي ون ڊي ۽ هڪ ٽي ٽوئنٽي جڏهن ته آفريقا خلاف 3 ون ڊي ۽ 2 ٽي ٽوئنٽي ميچن جي سيريز کيڏي نيوزيلينڊ ۽ زمبابوي وچ ۾ ٽن ون ڊي ميچن جي سيريز جي پهرين ميچ 2 آگسٽ تي کيڏي ويندي جڏهن ته ٻين ون ڊي 4 آگسٽ تي ۽ ٽين ۽ آخري ون ڊي 7 آگسٽ تي کيڏي ويندي. ٻنهي ٽيمن وچ ۾ واحد ٽي ٽوئنٽي انٽرنيشنل ميچ 9 آگسٽ تي کيڏي ويندي. سموريون ميچون هراري اسپورٽس ڪلب ۾ کيڏيون وينديون. ان کان پوءِ نيوزيلينڊ جي ٽيم ڏکڻ آفريقا جو دورو ڪندي. جتي هو 2 ٽي ٽوئنٽي انٽرنيشنل ۽ 3 ون ڊي ميچن جي سيريز کيڏيندي ٻنهي ٽيمن وچ ۾ پهرين ٽي ٽوئنٽي 14 آگسٽ تي جڏهن ته ٻي 16 آگسٽ تي کيڏي ويندي. ان کان پوءِ نيوزيلينڊ جي ٽيم آفريقا ۾ 3 ون ڊي ميچن جي سيريز کيڏندي جنهن جي پهرين ميچ 19 آگسٽ، ٻي ميچ 23 آگسٽ جڏهن ته ٽين ۽ آخري ون ڊي 26 آگسٽ تي کيڏي ويندي

 

مصباح الحق ڪرڪيٽ تان رٽائرمينٽ جو اشارو ڏئي ڇڏيو

لاهور(اسپورٽس نيوز) پاڪستان ڪرڪيٽ ٽيم جي ڪپتان مصباح الحق ڪرڪيٽ تان رٽائرمينٽ جو اشارو ڏئي ڇڏيو آهي. ان سلسلي ۾ ڀارتي ميڊيا کي انٽرويو دوران ڪپتان مصباح الحق رٽائرمينٽ جو اشارو ڏنو. مصباح الحق ڀارت خلاف امڪاني سيريز کانپوءِ رٽائرمينٽ جو اعلان ڪري ڇڏيو آهي. سندس چوڻ آهي ته مونکي اندازو آهي ته منهنجي ڪرڪيٽ هاڻي وڌيڪ ناهي پچي. مصباح الحق موجب ٿي سگھي ٿو ته ڀارت خلاف امڪاني سيريز منهنجي آخري سيريز هجي. مصباح الحق وڌيڪ چيو ته آئون رٽائرمينٽ کان اڳ ڪجهه ميچ کيڏڻ چاهيان ٿو. هن چيو ته منهنجي خواهش آهي ته هلندڙ سال ڀارت سان ڪرڪيٽ کيڏان. مصباح الحق موجب ڀارت سان ڪرڪيٽ سيريز ٿي ته ان کانپوءِ رٽائرمينٽ وٺي ڇڏيندس.  واضح رهي ته مصباح الحق پاڪستان ڪرڪيٽ ٽيم جي ٽيسٽ ٽيم جو ڪپتان آهي. هن ڪپتان جي حيثِيت سان کيڏندي ڪيتريون ئي ڪاميابيون ٽيم کي ڏياريون آهن.

 

برسات جون تباهيون ۽ بي گهر ٿيندڙ ماڻهو!

 

ملڪ جي ڪيترن ئي شهرن ۾ طوفاني برسات، مختلف واقعن ۾ 15 ڄڻا فوت، ندي نالن ۾ چاڙهه، پشاور اڌ ٻڏي ويو، روڊ رستا ٻڏي ويا، ڪيترن شهرن جو زميني رابطو ڪٽجي ويو، علائقن ۾ تيز برساتون، ملڪ ۾ هڪ طرف ٻوڏ تباهڪاريون جاري آهن، ٻي طرف وري پنجاب، سنڌ، ڪي پي ڪي  ۽ بلوچستان جي مختلف شهرن ۾ جاري برسات ٻوڏ جو خطرو وڌيڪ وڌائي ڇڏيو آهي، ٻوڏ ريلن ۾ علي پور ۽ جتوئي ۾ 7 ڄڻا ٻوڏ جي ريلي ۾ لڙهي فوت ٿي ويا. ڪرڪ ۾ 2 نوجوان برساتي نالي ۾ ٻڏي ويا،  گوجرانوالا ۾ گهر جي ڇت ڪرڻ سبب 4 ورهين جو خرم ۽ 7 ورهين جو نعمان فوت جڏهن ته هڪ ٻار زخمي ٿي پيو، ڪامونڪي جي بلال پارڪ ۾ برسات سبب موٽر مان ڪرنٽ لڳڻ سبب پيءُ ۽ پٽ موقعي تي ئي فوت ٿي ويا، ڇاڇرو ۾ کنوڻ ڪرڻ سبب هڪ عورت فوت ٿي وئي جڏهن ته ڪنڌڪوٽ ۾ ڀت ڪرڻ سبب ٻار فوت ٿي ويو، لاهور جي علائقي سگيان روڊ ۾ گهر جي ڇت ڪرڻ سبب 2 ڄڻا ۽ ننڪا صاحب ۾ عورت زخمي ٿي پئي، پشاور ۾ مسلسل تيز برسات بڍني نالي ۾ چاڙهه ۽ ٻوڏ جي صورتحال پيدا ٿي وئي تقريبن اڌ شهر پاڻي ۾ ٻڏي ويو. بڍني نالي جو پاڻي ويجهن علائقن جي گهرن ۾ 3 کان 6 فٽ تائين پاڻي داخل ٿي ويو. جڏهن ته چارسده روڊ تي بڍني پل کي هر قسم جي ٽريفڪ لاءِ بند ڪيو ويو جڏهن ته سردار ڪالوني، خوشحال باغ ۽ ٻين علائقن ۾ پاڻي گهرن ۾ داخل ٿي ويو جڏهن ته رهائشي ماڻهو پنهنجي گهرن ۾ بي يارو مددگار بڻجي وئي جنهن کان پوءِ ريسڪيو سرگرميون تيز ڪيون ويون. انتظاميا موجب 100 کان وڌيڪ خاندانن تي محفوظ هنڌن ڏانهن منتقل ڪيو ويو آهي پاڪ فوج ۽ ريسڪيو اداري  جون گڏيل طور تي امدادي ڪارروايون جاري آهن. انتظاميا موجب نالي ۾ چارسده وٽ پاڻي جو دٻاءُ 1300 ڪيوسڪ تائين پهچي ويو.  راجنپور جو روجهان شهر سان زميني رابطو ڪٽجي ويو، حافظ آباد جي هيٺين وارن علائقن ۾ پاڻي بيهي رهيو جڏهن ته ساگر ۾ 100 ورهين جي قديم پل ٽٽڻ سبب 20 ڳوٺن جو ٻين علائقن کان زميني رابطو ڪٽجي ويو، هرنائي ۾ 3 ڪلاڪ تيز برسات پوڻ سبب ندي نالن ۾ چاڙهه اچي وئي ڪوئيٽا ۽ پنجاب کان زميني رابطو ڪٽجي ويو، زيارت ۽ آس پاس ۾ برسات جو نئون سلسلو جاري، قلعه سيف الله جي ڳوٺ ٿينا لشڪا ۾ 15 گهر ڊهي پٽ ٿي ويا، ليويز ذريعن موجب علائقي واسين کي محفوظ هنڌ ڏانهن منتقل ڪيو پيو وڃي. ايبٽ آباد شهر ۽ آس پاس ۾ برسات ۽ لينڊ سلائينڊنگ سبب نٿيا گلي کان بڪوٽ ويندڙ شاهراهه بند ٿي وئي ڪوهاٽ ۾ تيز برسات نالن ۾ چاڙهه، پاڻي گهرن ۾ داخل ٿي ويو، روڊ رستا به بند ٿي ويا. فيصل آباد ۽ آس پاس ۾ تيز برسات وقفي وقفي سان جاري رهي، راجنپور ۾ ڪوهه سليمان ۾ برسات سبب ندي نالن ۾ واڌ اچي رهي آهي. گوجرانوالا شهر ۾ برسات سبب هيٺانهين وارن علائقن ۾پاڻي اچي ويو، ميانوالي، سرگودا ۽ آس پاس جي علائقن ۾ برسات سبب ڪيترن ئي علائقن ۾ پاڻي بيهجي ويو.

 

جڊيشل ڪميشن جي رپورٽ کانپوءِ…ا؛واحد پارس هيسباڻي

اسان جي ڳوٺ ۾ هڪڙو همراهه هوندو هو ماسٽر پريل، سندس ضد پوري تر ۾ مشهور هو، ڳالهه ڀلي ڪهڙي به هجي پر هن جي متفق ٿيڻ جو سوال ئي پيدا نه ٿيندو هو. جيڪڏهن هن کي چئبو هو ته کير جو رنگ اڇو آهي ته هو چوندو هو نه صفا اڇو ناهي، ٿورو ميرانجهڙو آهي، هن کي چئبو هو ته سج اوڀر کان اڀري ٿو ته هو چوندو هو نه صفا اوڀر کان نه ٿو اڀري ٿوري ٻئي طرف جي ڪنڊ به لڳيس ٿي. هن کي چئبو هو ته کنڊ جو ذائقو مٺو آهي ته چوندو هو ته صفا مٺو ناهي ٿورو ڪڙو به آهي. هن کي چئبو هو کاڌو وات سان کائبو آهي ته چوندو هو ته نڪ سان نلڪين وسيلي به کائبو آهي… سندس ننڍڙو دڪان به هوندو هو، جيڪڏهن ڪير کانئس اڌ ڪلو گيهه جي گهُر ڪندو هو ته چوندو هو اڌ ڪلو ناهي اڍائي پاءُ يا ٽي پاءُ وٺين ته ڏيان نه ته هلي پئو پوءِ جنهن کي اڌ ڪلو وٺڻو هوندو هو اهو کيس يا ته اڍائي پاءُ يا ٽي پاءُ چوندو هو ۽ هي پاءُ يا اڌ ڪلو وٺڻ جو چئي اڌ ڪلو ڏئي ڇڏيندو هو. ڏاڍو دلچسپ ماڻهو هوندو هو، سندس ڳالهيون ياد ڪري اڄ به ٽهڪ نڪري ويندا آهن. جڊيشل ڪميشن جي رپورٽ کانپوءِ عمران خان عرف عام سونامي جون ڳالهيون ٻڌي الائي ڇو ماسٽر پريل ڏاڍو ياد اچي رهيو آهي. ”اوئي نواز شريف….“ جي ڊائلاگ سان اسلام آباد ۾ ڊگهي عرصي تائين شوٽنگ ڪرڻ کانپوءِ جڏهن سندس ئي خواهش تي، سندس ئي شرطن مطابق جڊيشل ڪميشن جڙي ته پاڻ چيو هئائين ته ان جي جيڪا به رپورٽ سامهون آئي، هي ڪا به ٻڙڪ ٻاهر ڪڍڻ کانسواءِ ئي ان کي اکين تي رکندو. ڀرپور انتظار ۽ ڀرپور جاچ کانپوءِ جڏهن اها رپورٽ سامهون آئي آهي ته ماسٽر پريل وانگر هي پنهنجي ضد تي قائم نظر اچي رهيو آهي. رپورٽ کي قبول ته ڪريان ٿو پر جڊيشل ڪميشن مايوس ڪيو آهي… اليڪشن ڪميشن جي سڀني ميمبرن کي استعيفيٰ ڏيڻ گهرجي… معافي مون کي نه نواز شريف کي وٺڻ گهرجي… جڊيشل ڪميشن قرار ڏنو آهي ته منهنجو مطالبو جائز آهي… چونڊون ڪيئن شفاف ٿيون.. بهرحال فيصلو قبول آهي… اهڙي قسم جون ڪيتريون ئي ڳالهيون آهن جيڪي عمران خان جي ٽيون ڏينهن واري پريس ڪانفرنس ۾ ٻڌڻ لاءِ مليون….

جهڙي نموني اسلام آباد جي رستن تي هي ڀير جي ڏونڪي سان ڌانڌلين جو راڳ آلاپي رهيو هو، ڪميشن جي رپورٽ سامهون اچڻ کانپوءِ اصولي طور تي ٿيڻ ته ائين گهرجي ها ته هي ان ساڳي گرم جوشي سان پنهنجي غلط فهمي جو اعتراف ڪري ها ۽ هڪ ڊگهي عرصي تائين گادي واري شهر کي يرغمال بڻائڻ ۽ پوري ملڪ جي عوام جي احساسن سان کيڏڻ تي معذرت ڪري ها پر هي همراهه ڪمال ڪاريگري سان هن معاملي کي گول مول ڪري وري به ڏوهه انهن ئي ڌرين تي ڏئي رهيو آهي، جن تي شروع کان ڏيندو رهيو آهي. سوال اهو آهي ته جڊيشل ڪميشن جي رپورٽ ۾ ڌانڌليون ثابت ئي نه ٿيون آهن ته اليڪشن ڪميشن جا سڀ ميمبر استعيفيٰ ڇو ڏين؟ ۽ نواز شريف معافي ڇو وٺي؟ جڏهن هي همراهه پاڻ اها ڪمٽمينٽ ڪري چڪو هو ته ڪميشن جي جيڪا به رپورٽ آئي کيس قبول هوندي ته پوءِ اهو چوڻ ته جڊيشل ڪميشن مايوس ڪيو آهي؟ ڇا معنيٰ رکي ٿو؟ اها ڪهڙي آس هئي جيڪا هي ان ڪميشن مان لڳائي ويٺو هو؟ ڌانڌليون ٿيون هجن يا نه پر ڪميشن ڌانڌليون ٿيڻ واري رپورٽ ڏئي ته جيئن هن سيٽ اپ جي تڏا ويڙهه ڪري ميدان صاف ڪري سگهجي؟ يقينن عمران خان جي اها ئي آس هوندي، جيڪا پوري نه ٿيڻ کانپوءِ کيس مايوسي ٿي آهي پر اهو ڪيئن ممڪن آهي ته هن جي هر آس معاملي ۾ ڪجهه نه هجڻ جي باوجود پوري ٿئي!

ناقص حڪمراني، سسٽم جي تباهي، عوام جي بدحالي وارين حقيقتن کان ڪير به انڪار نٿو ڪري سگهجي. اسان جي ماضي جي حڪمرانن کان وٺي هاڻوڪن حڪمرانن تائين جيڪي کير جون نديون وهايون آهن، اهي سڀ اسان جي سامهون آهن هنن عوام کي جيڪو سونن چمچن ۾ کارايو آهي، اهو به اسان سڀني جي سامهون آهي. بدترين حڪمراني جا پاڻ وٽ هڪ کان هڪ مثال موجود آهي پر ڇا طرز حڪمراني ۽ سسٽم کي بهتر بڻائڻ بدران ان کي پاڙان پٽي اڇلي ڇڏڻ صحيح آهي؟ ۽ تبديلي آڻڻ جو اهو انداز صحيح آهي جيڪو عمران خان ۽ مولانا قادري اسلام آباد جي رستن تي ڏيکاريو؟ اهو مولانا قادري ڪٿي آهي، جيڪو عوام مٿان گهور ٿي رهيو هو، ٻوڏ سبب عوام جنهن مصيبت کي منهن ڏئي رهيو آهي. مولانا قادري انهن وٽ وڃڻ جي تڪليف ڪرڻ ته پوءِ جي ڳالهه آهي خالي همدردي جو بيان ڏيڻ جي ضرورت به محسوس ڪئي آهي؟ انقلاب ايئرڪنڊيشنڊ ڪنٽينرز ۾ ويهي ’مبارڪ هو، مبارڪ هو‘ جا خطاب ڪرڻ سان نه ايندو آهي پر اهو عوام سان گڏ بيهڻ ۽ ان کي دلي طور تي پاڻ طرف ڪرڻ سان ايندو آهي ۽ تبديلي ڪنهن واڙيءَ ۾ پوکيل گجر موري يا ڪنهن باغ ۾ ٽڙيل گل جيان ناهي جنهن کي جلدي ٽوڙي وٺجي. تبديلي مسلسل جدوجهد گهرندي آهي رت ۽ ست گهرندي آهي، مسلسل رابطو ۽ ڏک سک ۾ ساٿ گهرندي آهي، ان ڪري انهن حقيقتن کي سمجهي حقيقت پسند ٿيڻ جي ضرورت آهي.

عمران خان اليڪشن وڙهيو، هي جمهوري پراسس جو حصو بڻيو، مقابلي جي ميدان ۾ ضرور شڪ شبها ۽ خدشا به پيدا ٿيندا آهن، ڪڏهن ڪڏهن ائين به لڳندو آهي ته جلسن ۾ ته ماڻهو گهڻا هئا پوءِ ووٽ گهٽ ڇو مليا. عمران خان کي جيڪڏهن اهڙي قسم جا شڪ شبها ٿيا ۽ هن ان سلسلي ۾ پنهنجا اعتراض سامهون آندا ته اهو هن جو حق هو ۽ جمهوري سسٽم جو حصو هو پر هن انهن خدشن جي بيناد تي واءُ مينهن هڪ ڪري اسلام آباد ۾ جيڪر ڊگهي عرصي تائين تماشو ڪيو اهو طريقو مناسبت نه هو. ان سلسلي ۾ جيڪڏهن حڪومت جون ڪي ڪوتاهيون آهن ته انهن تي به ٽيڪا ٽپڻي  ٿيڻ گهرجي پر انهن سڀني شين جي باوجود اسلام آباد وارو تماشو ٿيڻ نه گهرجي ها. مولانا قادري ۽ عمران خان سان گڏ ان تماشي ۾ شيدي ٽلي سميت جيڪي ڇٽل ڪارتوس بيٺل نظر آيا انهن معاملن کي وڌيڪ خراب ڪيو، جنهن جو سمورو نقصان ڦري سري عمران خان جي تحريڪ انصاف کي ئي پهتو ڇو ته سياسي حوالي سان هي ئي وزن رکندڙ پارٽي هئي. بهرحال جيڪو ڪجهه به ٿيو وقت گذري ويو. عمران خان اهو چوندو رهيو آهي ته سندس ان پريشر جي نتيجي ۾ ئي حڪومت جڊيشل ڪميشن ٺاهڻ تي مجبور ٿي نه ته هو قطعي به اليڪشن ۾ ٿيل ڌانڌلين جي جاچ ڪرائڻ تي راضي نه ٿئي ها! ٺيڪ آهي مڃيوسين اهو به صحيح ٿيو پر هاڻ جڏهن جڊيشل ڪميشن جي رپورٽ اچي وئي آهي ته هاڻي ته تماشن کي ختم ٿيڻ گهرجي ۽ ان رپورٽ کي قبول ڪرڻ گهرجي. ”جڊيشل ڪميشن مايوس ڪيو آهي..“ جي معنيٰ ڇا آهي؟ هن مان ته ائين محسوس ٿي رهيو آهي ته رپورٽ کي دل سان قبول نه ڪيو ويو آهي.

حڪمران پارٽي جو انداز ڪهڙو به آهي بهرحال اها عوام جي ووٽن سان اقتدار ۾ آئي آهي هن کي عوام مينڊيٽ ڏنو آهي ان ڪري ان مينڊيٽ جو احترام ڪرڻ گهرجي. عمران خان وٽ تبديلي جي حوالي سان جيڪو به پروگرام آهي اهو عوامي مينڊيٽ ذريعي عمل ۾ اچڻ گهرجي. روڊن رستن تي نڪري ماڻهن کي پريشان ڪرڻ کي تبديلي نه ٿو چئي سگهجي. عمران خان کي پنهنجي محنت ڪري پنهنجي مخالفن کي ووٽن ذريعي شڪست ڏيڻ گهرجي ۽ حقيقت پسند ٿيڻ گهرجي. سياست ۾ حقيقت پسندي لازمي آهي، جيڪو عنصر بدقسمتي سان پاڻ وٽ ناياب ٿي چڪو آهي. صرف عمران خان تي هن معاملي ۾ ڏوهه نه ٿو ڏئي سگهجي مجموعي طور تي هر پاسي ڀينگ لڳي پئي آهي. ڪير به حقيقت پسند ٿيڻ لاءِ تيار ناهي. دعوائن جي حد تائين ته هر ڪو اڳرو نظر اچي رهيو آهي پر عملي طور تي ڪاريءَ وارا ڪک آهن. عمران خان سميت اسان جي سڀني سياسي ڌرين کي پوءِ اهي اقتدار ۾ آهن يا اقتدار کان ٻاهر انهن کي پنهنجي روين تي نظرثاني ڪرڻ گهرجي. معاملو ڪهڙو به هجي انهن کي حقيقت پسندي جو مظاهرو ڪرڻ کپي.

ڊگهي جدوجهد کانپوءِ هاڻي جڏهن جمهوريت جي وڻ ٻور جهلڻ شروع ڪيو آهي ته ان کي تباهه ڪرڻ کان پرهيز ڪئي وڃي جتي پنهنجي ڪاميابي تي جشن ملهايو وڃي ٿو اتي پنهنجي شڪست کي به وڏي دل سان قبول ڪرڻ گهرجي. ”مين نا مانون“ واري پراڻي روش مان ٻاهر نڪرڻ جي ضرورت آهي اهڙي رويي جو ڪنهن کي ذاتي طور تي ڪيترو نقصان پوي ٿو ان کان وڌيڪ ان جو نقصان سسٽم کي ڀوڳڻو پوي ٿو. سياسي ڌرين جي ڇڪتاڻ جو فائدو هميشه غير جمهوري قوتون ئي حاصل ڪن ٿيون. هاڻي ماضي وارين روايتن کي ورجائڻ کان پرهيز ڪرڻ جي گهرج آهي. عوام جنهن کي به چونڊي ٿو ان کي پنهنجو مدو پورو ڪرڻ ڏنو وڃي. جيڪڏهن ڪٿي غلط به ٿئي ٿو ته ان جي نشاندهي جو بهترين فورم پارليامينٽ آهي اتي ئي وٺ پڪڙ ٿيڻ کپي. روڊن رستن تي مهينن تائين تماشو ڪرڻ جو ڪو به فائدو ناهي.

حڪمران ڌر ۽ تحريڪ انصاف وچ ۾ اهو ئي ٿيو هو ته جڊيشل ڪميشن جي رپورٽ جيڪا به ايندي ان کي قبول ڪيو ويندو نواز ليگ طرفان اهو به لکت ۾ ڏنو ويو هو ته جيڪڏهن ڌانڌلي ثابت ٿيندي ته اسيمبليون ٽوڙي نئين سر چونڊون ڪرايون وينديون. هاڻي جڏهن ڪميشن جي رپورٽ سامهون آئي آهي ته عمران خان کي ان کي وڏي دل سان قبول ڪرڻ گهرجي ۽ سسٽم جي بهتري لاءِ وڌي پنهنجو ڪردار ادا ڪرڻ گهرجي.