تازيون خبرون

Daily Archives: July 22, 2015

پاڻي جا ذخيرا نه ٺاهي ماڻهن کي ٻوڏ جي رحم ڪرم تي ڇڏيو ويو آهي: عمران خان

اسلام آباد(بيورو) پاڪستان تحريڪ انصاف جي سربراهه عمران خان خيبرپختونخوا ۾ پارٽي حڪومت کي ٻوڏ جي صورتحال کي منهن ڏيڻ جون هدايتون جاري ڪري ڇڏيون آهن. عمران خان هڪ بيان ۾ ڪي پي ڪي حڪومت کي هدايت ڪئي آهي ته ٻوڏ سبب متاثر ٿيندڙ ماڻهن کي محفوظ هنڌن تي منتقل ڪرڻ لاءِ اپاءَ ورتا وڃن. تحريڪ انصاف جي سربراهه جو چوڻ هو ته پاڻي جا ذخيرا نه ٺاهي ماڻهن کي ٻوڏ جي رحم ڪرم تي ڇڏيو ويو آهي.

 

پاڪستاني فلمن ”رانگ نمبر ۽ بن روئي“ ڀارتي فلم ”بجرنگي ڀائي جان“ کي هارائي ڇڏيو

ڪراچي (شوبز نيوز) عيدالفطر جي موقعي تي پاڪستاني فلمن ”رانگ نمبر ۽ بن روئي“ ڀارتي فلم ”بجرنگي ڀائي جان“ کي هارائي ڇڏيو آهي. ذريعن موجب عيد جي موقعي تي پاڪستاني اداڪار ۽ هدايتڪار ياسر نواز جي فلم ”رانگ نمبر“ ۽ همايو سعيد ۽ ماهره خان جي فلم ”بن روئي“ سينيما گھرن ۾ نمائش جي لاءِ پيش ڪيون ويون، جن کي ڏسندڙن پاران ڀرپور موٽ ملي ۽ ٻنهي پاڪستاني فلمن ڀارتي فلم ”بجرنگي ڀائي جان“ جي مقابلي ۾ بهترين ناڻو ڪمايو. ان بابت اداڪار ياسر نواز ۽ ندا ياسر جو چوڻ هو ته فلم ”رانگ نمبر“ جي ڪاميابيءَ سان اسان جا حوصلا وڌيا آهن ۽ اهو ثابت ٿي ويو آهي ته ڏسندڙ پاڪستاني فلم انڊسٽريءَ جي بحاليءَ جا خواهشمند آهن. هن چيو ته جھڙيءَ طرح اسان جي فلم کي ڏسڻ لاءِ ماڻهو سينيمائن ۾ اچي رهيا آهن اهو اسان جي اميدن کان وڌيڪ آهي، فلم جي ڪاميابيءَ سان انڊسٽريءَ تي ڇانيل ڪارا ڪڪر هٽي ويندا.

 

نرگس فخري، عامر، سلمان، شاهه رخ، اميتاڀ بچن ۽ ٻين پنهنجي چاهيندڙن کي عيد واڌايون ڏنيون

ڪراچي (شوبز نيوز) فطرن جي عيد جي موقعي تي جتي ماڻهو هڪ ٻئي جون شڪايتون دور ڪري هڪ ٻئي کي عيد مبارڪو ڏيندي نظر اچن ٿا اتي فلمي تارن به پنهنجي چاهيندڙن کي مبارڪون ڏيڻ ۾ ڪنجوسيءَ کان ڪم ناهي ورتو. پاڪستاني فلمي تارن سماجي رابطن جي ويب سائيٽن ٽوئٽر، فيس بڪ ۽ انسٽا گرام تي پنهنجي چاهيندڙن کي ڪجھه هيئن عيد مبارڪون پيش ڪيون. بلال لاشاري لفظن جي مامري ۾ تمام محتاط آهي هن لکيو ته ”سڀني کي عيد واڌايون“ جڏهن ته هن گذريل سال به پنهنجي چاهيندڙن کي اهڙو ئي پيغام ڏنو هو. ماهره خان جيتوڻيڪ پنهنجي فلم ”بن روئي“ جي پروموشن ۾ مصروف آهي، ان ڪري هِن ڀيري هوءَ عيد گھر کان پري ملهائي رهي آهي. هن پيغام ۾ پنهنجي گھروارن سميت سڀني کي مبارڪون پيش ڪيون. فيصل قريشيءَ عيد جي موقعي تي پشاور سانحي جي شهيدن ۽ آرمي پبلڪ اسڪول جي ٻارن کي به ياد رکيو. ريحام خان به سڀني چاهيندڙن کي دلي عيد مبارڪون پيش ڪيون. ريحان خان نهايت نرم انداز ۾ پاڻ تي تنقيد ڪندڙن تي کي به مبارڪون ڏنيون. صنم سعيد کي عيد جي موقعي تي پاڪستاني کاڌا ۽ ڪلف وارا ڪپڙا ياد هئا. حمزه علي عباسي به پنهنجي چاهيندڙن سان پيار ونڊيو. جڏهن ته پاڪستان جي من موهڻي اداڪارا مهوش حيات پڻ انسٽا گرام تي گلن جي پَتين سان پنهنجي چاهيندڙن لاءِ پيغام شيئر ڪيو. هوڏانهن بالي ووڊ تارن به مسلمانن کي عيد جي سهڻي موقعي تي مبارڪون ڏنيون. نرگس فخري، رشي ڪپور، رنبير ڪپور، عامر، سلمان، شاهه رخ، اميتاڀ بچن، پريانڪا چوپڙا، ڪرينا ڪپور، ڪترينا ڪيف، سوناڪشي سنها، دپيڪا پڊوڪون، بالي ووڊ ڪوئين ڪنگنا رناوت ۽ ٻين پڻ چاهيندڙن کي عيد واڌايون ڏنيون.

 

مشي خان پاران ڪوڙو چيڪ ڏيڻ ۽ داخل فراڊ ڪيس جو مامر حو حل نه ٿي سگھيو

اسلام آباد (شوبز نيوز) پاڪستاني ڊرامن جي مشهور اداڪارا مشي خان پاران ڪوڙو چيڪ ڏيڻ ۽ داخل فراڊ ڪيس جو مامر حو حل نه ٿي سگھيو. عيد الفطر دوران به پوليس اهلڪار جاچ لاءِ ساڻس رابطو ڪندا رهيا پر مشي خان عيد الفطر جي موڪلن جي ڪري جاچ لاءِ پيش ٿيڻ کان انڪار ڪري ڇڏيو. هلندڙ هفتي جاچ جي شروعات ڪئي ويندي. ذريعن جو چوڻ هو ته اداڪارا مشي خان ڪوڙو چيڪ ڏيڻ واري ڪيس ۾ گرفتاريءَ کان اڳ واري ضمانت ۾ واڌ جي لاءِ عدالت سڳوريءَ کي درخواست ڏني آهي، جنهن تي پڻ عيد جي ڪري ڪو فيصلو نه ٿي سگھيو هو.

 

شاهه رخ خان سان ڪڏهن به ڪو اختلاف ناهي رهيو ۽ نه ئي اسان وچ ۾ لاڳاپا ڪڏهن خراب ٿيا آهن: اجي ديوگن

ممبئي (شوبز نيوز) بالي ووڊ اداڪار اجي ديوگن جو چوڻ آهي ته شاهه رخ خان سان سندس ڪڏهن به ڪو اختلاف ناهي رهيو ۽ نه ئي اسان وچ ۾ لاڳاپا ڪڏهن خراب ٿيا آهن. ڀارتي ميڊيا کي ڏنل انٽرويوءَ ۾ اجي ديوگن جو چوڻ هو ته بلغاريا ۾ فلمن جي شوٽنگ دوران شاهه رخ خان سان ملاقاتون ۽ گڏ ماني کائڻ عام ڳالهه هئي، پر سوشل ميڊيا تي ان کي گھڻي اهميت ڏني وئي، جيڪا منهنجي سمجھه کان ٻاهر آهي، ڇو ته اسان ٻنهي جا لاڳاپا سدائين خوشگوار رهيا آهن. اجي ديوگن جو چوڻ هو ته خوشگوار ازدواجي زندگي گذاري رهيو آهيان، مان خوش آهيان ته منهنجي گھر واري ڪاجول وڏي پردي تي ڪنگ خان سان جلوا ڏيکاريندي. ڪاجول پاڻ فلمي دنيا کان پري رهي ۽ ان ئي واپسي جو فيصلو به ڪيو، هوءَ هڪ سٺي فلم سان بالي ووڊ ۾ ٻيون ڀيرو قدم رکي رهي آهي، ڇو ته فلمون ڏسندڙ ڪاجول ۽ شاهه رخ جي جوڙيءَ کي تمام گھڻو پسند ڪندا آهن ۽ اڳتي به کين گڏ ڏسڻ ٿا چاهين

 

پاڪستان ڪرڪيٽ ٽيم جي رانديگرن به عيد الفطر روايتي جوش ۽ جذبي سان سريلنڪا ۾ ملهائي

ڪولمبو (اسپورٽس نيوز) پاڪستان ڪرڪيٽ ٽيم جي رانديگرن به عيد الفطر روايتي جوش ۽ جذبي سان سريلنڪا ۾ ملهائي ۽ رانديگرن عيد نماز ڪولمبو ۾ پڙهڻ کان پوءِ هڪ ٻئي کي ڀاڪر پائي مبارڪون ڏنيون. پاڪستاني ٽيم جي رانديگر پنهنجن گھرن کان ڏُور سريلنڪا جي گاديءَ واري هنڌ ڪولمبو ۾ عيد ملهائڻ سان گڏوگڏ پاڪستان ٽيم جي ڪوچ وقار يونس ۽ اتي موجود پاڪستاني ڪميونٽي ۽ مقامي ماڻهن سان گڏ ڪولمبو جي جامع مسجد ۾ عيد نماز ادا ڪئي ۽ ملڪ جي سلامتيءَ جي لاءِ دعائون پڻ گھريون. رنگ برنگي ڪپڙا پائي ملڪي ڪرڪيٽرن عيد نماز پڙهڻ کان پوءِ هڪ ٻئي کي ٻکين پئي عيد واڌايون ڏنيون، جڏهن ته سندن چهرن تي عيد جي خوشي پڻ واضح نظر اچي رهي هئي. ياد رهي ته پاڪستان ڪرڪيٽ ٽيم سريلنڪا سان 3 ٽِيسٽ، 5 ون ڊي ۽ 2 ٽي ٽوئنٽي ميچن جي سيريز جي سلسلي ۾ سريلنڪا ۾ لٿل آهي.

 

شعيب ملڪ جي گھر واري ثانيا مرزا به پاڪستاني ڪرڪيٽرن سان جشن ملهايو

ڪولمبو (اسپورٽس نيوز) سريلنڪا خلاف ٽين ون ڊي ۾ ڪاميابيءَ عيد جو مزو ٻيڻو ڪري ڇڏيو ۽ ڪولمبو ۾ موجود ڀارتي ٽينس اسٽار ۽ پاڪستاني آل رائونڊر شعيب ملڪ جي گھر واري ثانيا مرزا به پاڪستاني ڪرڪيٽرن سان گڏجي ٽين ون ڊي کٽڻ جو جشن ملهايو. ثانيه مرزا جو مڙس ۽ پاڪستاني ڪرڪيٽر شعيب ملڪ سماجي رابطن جي ويب سائيٽ ٽوئٽر تي هڪ ”ڊب سميش“ وڊيو شيئر ڪئي، جنهن ۾ هو پاڻ ۽ سندس گھر واري ٻين پاڪستاني ڪرڪيٽرن سان گڏجي سريلنڪا خلاف ٽين ون ڊي انٽرنيشنل ميچ کٽن جو جشن ملهائيندي نچندي نظر اچي رهيا آهن. بالي ووڊ فلم ”خوبصورت“ جي گيت” اڀي تو پارٽي شروع هوئي هي“ تي نچندي رانديگرن ۽ ثانيا مرزا تمام گھڻو مستي ڪندي نظر اچي رهيا آهن. وڊيو ۾ شعيب ملڪ ۽ ثانيه مرزا جي پويان ڪرڪيٽر احمد شهزاد، محمد عرفان، احسان عادل، مختيار احمد، بلاول ڀٽي ۽ بابر اعظم کي ڏسي سگھجي ٿو. واضح رهي ته آچر تي پاڪستاني ڪرڪيٽ ٽيم ميزبان سريلنڪا کي ٽين ون ڊي ميچ ۾ 135 رنسن سان هارائي 5 ميچن جي سيريز ۾ 2-1 تان سرسي ماڻي ورتي هئي.

 

اظهر عليءَ تيز ترين هڪ هزار رنسون ٺاهيندڙ پهريون پاڪستاني ۽ پنجون انٽرنيشنل ڪرڪيٽر بڻجي ويو

ڪولمبو (اسپورٽس نيوز) پاڪستان ون ڊي ٽيم جي ڪپتان اظهر عليءَ تيز ترين هڪ هزار رنسون ٺاهيندڙ پهريون پاڪستاني ۽ پنجون انٽرنيشنل ڪرڪيٽر بڻجي ويو آهي. پاڪستان ون ڊي ٽيم جي ڪپتان اظهر عليءَ سريلنڪا خلاف ٽين ون ڊي انٽرنيشنل ميچ ۾ هڪ رنس جي کوٽ سان اٺين ففٽيءَ کان محروم رهجي ويو، پر هن پنهنجي ڪيريئر جي 23 هين ميچ ۾ هڪ 1037 رنسون ٺاهي تيز ترين هڪ هزار رنسون مڪمل ڪندڙ پهريون پاڪستان ۽ پنجون انٽرنيشنل ڪرڪيٽر بڻجي ويو آهي. پاڪستان طرفان ياسر حميد پنهنجي ڪيريئر جي 24 هين ميچ ۾ هڪ هزار رنسون مڪمل ڪيو هيون، جڏهن ته انٽرنيشنل رانديگرن ۾ ويسٽ انڊيز جي سرووين رچرڊز، انگلينڊ جي ڪيون پيٽرنس ۽ جوناٿن ٽروٽ، جڏهن ته ڏکڻ آفريڪا جو ڊي ڪوڪ پڻ انهن رانديگرن ۾ شامل آهن جن پنهنجي 21 هين ميچ ۾ هڪ زار رنسون مڪمل ڪيون آهن.

 

آءِ سي سي ٽيسٽ رينڪنگ جاري ڪري ڇڏي، ياسر شاهه هڪ درجو ترقي ڪري ٽين پوزيشن تي اچي ويو

دبئي (اسپورٽس نيوز) انٽرنيشنل ڪرڪيٽ ڪائونسل (آءِ سي سي) ڪالهه نئين ٽيسٽ رينڪنگ جاري ڪري ڇڏي، ٽيسٽ سيريز ۾ سريلنڪن بيٽسمينن کي لوها چڻا چٻرائيندڙ ياسر شاهه هڪ درجو ترقي ڪري ٽين پوزيشن تي اچي ويو آهي. آءِ سي سيءَ جي نئين ٽيسٽ رينڪنگ لارڊز ٽيسٽ جي پڄاڻيءَ کان پوءِ جاري ڪئي وئي هئي. آءِ سي سي ٽيسٽ ريڪنگ جي بيٽسمينن ۾ آسٽريليا جو بيٽسمين اسٽيو سمٿ ڏکڻ آفريڪا جي رانديگر اي بي ڊي وليئرز کان ٽاپ پوزيشن کسي ورتي آهي. بيٽنگ ۾ يونس خان ستين ۽ مصباح الحق چوڏهين پوزيشنن تي آهن. پاڪستان ون ڊي ڪرڪيٽ ٽيم جو ڪپتان اظهر علي ۽ وڪيٽ ڪيپر سرفراز احمد ٽاپ ٽوئنٽي بيٽسمينن ۾ شامل آهن. سريلنڪا خلاف ٽيسٽ سيريز ۾ مين آف دي سيريز رهندڙ ياسر شاهه جي ٽيسٽ رينڪنگ ۾ هڪ درجو ترقي ٿي  آهي. ليگ اسپن گوگلي بالر رينڪنگ ۾ ٽين پوزيشن تي ماڻي ورتي آهي. ڏکڻ آفريڪا جو ڊيل اسٽين بالرن ۾ پهرين ۽ نيوزيلينڊ جو ٽرينٽ بولٽ ٻئي نمبر تي آهي.

 

سنڌو درياهه ۾ وچولي ٻوڏ ۽ انتظاميه!

 

سنڌو درياهه ۾ وچولي ٻوڏ، چترال ۾ تباهي، پلون ۽ سوين ڳوٺ ٻڏي ويا، هزارين ماڻهو ڦاٿل پاڪ فوج امدادي ڪمن ۾ مصروف،چترال ضلعي جو 2 تعلقن ڪيلاش ۽ گرم چشما سان زميني رابطو ڪٽجي ويو، 6 ڄڻا فوت ٿي ويا، ڏيڍ سئو کان وڌيڪ گهر متاثر، ايشون پاور هائوس به ٻڏي ويو، بجلي جو نظام درهم برهم ٿي ويو. ڊپٽي ڪمشنر چترال امين الحق چيو آهي ته ٻوڏ سبب درياهه چترال جون درجنين پلون لڙهي ويون آهن، ايمرجنسي لاڳو ڪئي وئي آهي، صوبائي، وفاقي حڪومتون ۽ مختلف سماجي تنظيمن کي بحالي جي ڪمن ۾ تعاون جي اپيل ڪئي وئي آهي. چترال شهر ۽ آس پاس ۾ مسلسل برسات سبب مولکو درياهه ۾ ٻوڏ جي صورتحال سبب سب ڊويزن مستوج کي چترال سان ملائيندڙ پل پاڻي ۾ لڙهي وئي، جنهن سبب 10 يونين ڪائونسلن جو شهر سان زميني رابطو ڪٽجي ويو هوڏانهن پاڪ فوج به ٻوڏ متاثرن جي مدد لاءِ  مصروف آهي. آءِ ايس پي آر موجب  پاڪ فوج طرفان امدادي سرگرميون جاري آهن، 8 ٽن کاڌي پيتي جون شيون چترال موڪليون ويون آهن، جيڪي گرم چشما ڪيلاش ويلي ۽ چترال ۾ ٻوڏ متاثرن ۾ تقسيم ڪيون وينديون  هوڏانهن ليا ويجهو سنڌو درياهه ۾ ٻوڏ سبب 100 کان وڌيڪ ڳوٺ پاڻي هيٺ اچي ويا، گڊو بئراج وٽ  وچين ۽ سکر بئراج وٽ هيٺين درجي جي ٻوڏ جو وهڪرو جاري، ڏکڻ پنجاب جا ڪيترائي علائقا ٻوڏ جي ريلن جي ور چڙهي ويا. بلوچستان جي علائقي ڪوهلو ۾ ڇت ڪرڻ سبب 3 ٻار فوت ۽ 4 زخمي، زوب ۾ ڊي سي جي گاڏي لڙهي وئي، ڊرائيور سوڌو 3 ليويز اهلڪار زخمي ٿي پيا، ٻوڏ جو پاڻي شهر ۾ داخل ٿي ويو، چترال جي بروزگول ندي ۾ هڪ ڀيرو ٻيهر ٻوڏ اچي وئي. چترال، پشاور روڊ اچ وڃ لاءِ بند ٿيڻ سبب سوين گاڏيون ڦاسي ويون. هوڏانهن استور جا ڪيترائي ننڍا ننڍا ڳوٺ ٻوڏ سبب متاثر ٿيا. چترال ۾ بروزگول جي ندي ۾ هڪ ڀيرو ٻيهر ٻوڏ واري صورتحال پيدا ٿي وئي آهي، جنهن جي ڪري چترال پشاور روڊ جي اچ وڃ لاءِ ٻيهر کان رستا بند ۽ سوين گاڏيو ڦاسي ويون.نيشنل هاءِ وي اٿارٽي جي اعليٰ عهديدارن ڳري مشينري سان روڊ بحال ڪرڻ جي ڪوششن ۾ رڌل آهن. استور ۾ گذريل ٽن چئين ڏينهن کان پوندڙ برسات ٻوڏ جي صورت اختيار ڪري ڇڏي، جنهن کانپوءِ استور جا ننڍا ننڍا ڳوٺ ٻوڏ جي ڪري تباهي جو ڏيک ڏئي رهيا آهن.جن ۾ گوريٽوٽ ڳوٺ کي گهڻو نقصان پهتو آهي. پاپا نوٽ ڳوٺ ۾ ٻنيون ۽ گهر متاثر ٿيا آهن،گوريٽوٽ ۾ ٻوڏ سبب رابطي واري پل ٻڏي وئي آهي، سکر ۾ سنڌو دريا ۾ گڊو بئراج تي هيٺئين سطح جي ٻوڏ آهي، جتي پاڻي جو نيڪال 3 لک 10 هزا 720 ڪيوسڪ ۽ نيڪال2 لک 52 هزار 335ڪيوسڪ رڪارڊ ڪيو ويو. راجن پور ۾ سنڌو دريا سنڌ ڪوٽ مٺن جي هنڌ تي پاڻي جي سطح ۾ لاڳيتو وڌاٿي رهي آهي.  ملڪ جي اڪثر علائقن ۾ برساتن کانپوءِ درياهن ۾ ٻوڏ واري صورتحال سبب ڪيترائي ڳوٺ ٻڏي ويا آهن ۽ ڪيترن ئي علائقن جو زميني رابطو ڪٽجي ويو آهي. پنجاب، آزاد ڪشمير، خيبر پختونخوا ۽ اتر اوڀر بلوچستان ۾ گذريل ٻن ڏينهن کان برساتن سبب درياهن ۽ نالن ۾ ٻوڏ واري صورتحال پيدا ٿي وئي اهي، هيٺانهين وارن علائقن ۾ برساتن کانپوءِ چترال ۾ ٻوڏ جي صورتحال آهي. چترال جي ڊي سي امين الحق جو چوڻ آهي ته گذريل ڏينهن تيز برساتن سبب ڪيتريون ئي پلون لڙهي ويون آهن، جنهن ڪري ڪيترن ئي ڳوٺن جو زميني رابطو ڪٽجي ويو آهي، ٻوڏ متاثرن لاءِ امدادي ڪارروايون جاري آهن، جڏهن ته ڪنهن به اڻوڻندڙ صورتحال کي منهن ڏيڻ لاءِ پاڪ فوج ۽ اسڪائوٽس جا جوان چوڪس آهن. پي ڊي ايم اي جي ترجمان مطابق جهلم درياهه ۾ منگلا، ڪابل درياهه ۾ نوشهره، چناب درياهه ۾ ٽي منهين ۽ سنڌو درياهه ۾ ڪالاباغ واري هنڌ هيٺانهين درجي جي ٻوڏ آهي. سنڌو درياهه ۾ ڪوٽ مٺڻ واري هنڌ پاڻي ۾ لاڳيتو چاڙهه اچي رهيو آهي، جتان هن وقت 4 لک 17 هزار 200 ڪيوسڪ پاڻي جو وهڪرو گذري رهيو آهي، راجن پور ۾ ڪوهه سلمان تي برساتن سبب ندين نالن ۾ ٻوڏ آيل آهي. تونسا بئراج وٽ مٿانهين درجي جي ٻوڏ آهي، هن وقت هيڊ تونسا وٽ پاڻي جي پهچ 3 لک 74 هزار 210 ۽ نيڪال 3 لک 52 هزار 710 ڪيوسڪ آهي، جنهن ۾ آهستي آهستي چاڙهه اچي رهيو آهي. ڊي سي مظفر ڳڙهه جو چوڻ آهي ته هيڊ تونسا وٽان اڄ رات 5 لک ڪيوسڪ پاڻي جو وهڪرو گذرڻ جو امڪان آهي، ماڻهن کي رليف ڏيڻ لاءِ سنڌو درياهه ويجهو 18 ڪيمپون قائم ڪيون ويون آهن، روجهاڻ جي ڪچي واري علائقي ۾ ٻوڏ جي وارننگ جاري ڪئي وئي، جنهن کانپوءِ ماڻهن محفوظ هنڌن ڏانهن لڏپلاڻ شروع ڪري ڇڏي آهي، اهڙي ريت گڊو وٽ به درياهه ۾ چاڙهه سبب رونتي واري علائقي ۾ 4 ڳوٺ ٻڏي ويا، جنهن کانپوءِ ٻوڏ سبب متاثر ٿيل ڳوٺن جو انگ 17 ٿي ويو آهي، جڏهن ته 50 ڳوٺن جو ٻين علائقن سان زميني رابطو ڪٽجي ويو آهي.