تازيون خبرون

Daily Archives: July 21, 2015

سماجي رابطن واري ويب سائيٽ تي منهنجي نالي سان غلط ۽ ڪوڙا اڪائونٽ ٺاهيا ويا آهن: ماهه نور بلوچ

لاهور (شوبز نيوز) لالي ووڊ اداڪارا ماهه نور بلوچ پنهنجي ڏيهه توڙي پرڏيهه ۾ رهندڙ مداحن سان رابطي لاءِ هڪ ويب سائيٽ قائم ڪرڻ جو اعلان ڪيو آهي، ميڊيائي ذريعن موجب ماهه نور بلوچ ويب سائيٽ ذريعي مداحن سان هر مصروفيت بابت رابطي ۾ رهندي، ان بابت ماهه نور بلوچ چيو ته سماجي رابطن واري ويب سائيٽ تي هن جي نالي سان غلط ۽ ڪوڙا اڪائونٽ ٺاهيا ويا، جنهن کي منهن ٽوڙ جواب ڏيڻ لاءِ ويب سائيٽ ٺاهڻ جو فيصلو ڪيو. هن چيو ته ويب سائيٽ ذريعي ڊرامن توڙي فلمي مصروفيتن بابت مداحن کي آگاهه ڪنديس.

 

بالي ووڊ جي ڪنگ خان شاهه رخ خان جي نئين فلم ”رئيس“ جو ٽريلر جاري

ممبئي (شوبز نيوز) بالي ووڊ جي ڪنگ خان شاهه رخ خان جي نئين فلم ”رئيس“ جو ٽريلر جاري ڪيو ويو، فلم ۾ شاهه رخ سان گڏ پاڪستاني اداڪارا ماهرا خان به آهي، رئيس فلم جي ڪهاڻي 1980ع جي ڏهاڪي جي هڪ انڊر ورلڊ ڊان جي چوڌاري گهمي ٿي، انڊر ورلڊ ڊان کي هڪ ايماندار پوليس آفيسر جي مخالفت کي منهن ڏيڻو پوندو آهي. شاهه رخ خان جي گهر واري غوري خان ۽ فرحان اختر جي گڏيل پراڊڪشن هيٺ ٺهندڙ فلم جي هدايتڪاري راهل ڍولڪيا ڪري رهيو آهي، جڏهن ته ٻي ڪاسٽ ۾ نواز الدين صديقي ۽ عبدالحد آصف شامل آهن. فلم ايندڙ سال 8 جولاءِ تي عيدالفطر تي رليز ڪئي ويندي.

 

مداحن جي دعائن ۽ پيار تي سندن ٿورائتو آهيانۡ: ڪپل شرما

ممبئي (شوبز نيوز) ڀارتي مزاحيه اداڪار ۽ ڀارتي ٽي وي جي وڏي مزاحيه پروگرام ”ڪاميڊي نائيٽس ود ڪپل“ جي ڪپل شرما پنهنجي هڪ پيغام ۾ چيو آهي ته سندس طبيعت بهتر ٿيندي پئي وڃي ۽ ڪافي سڌارو اچي ويو آهي، پنهنجي ٽوئيٽر پيغام ۾ هن وڌيڪ چيو ته کيس دوائن ايترو بهتر ٿيڻ ۾ مدد نه ڏني جيتري اوهان جي دعائن ۽ پيار بهتري ڏياري آهي، هن چيو ته مداحن جي دعائن ۽ پيار تي سندن ٿورائتو آهيان. واضح رهي ته ڪاميڊي جي ريلئٽي شو مان ڪاميابي جي ستين آسمان تي پهچندڙ ڪپل شرما ڪاميڊي نائيٽس جي شروعات 2013ع ۾ ڪئي هئي، جنهن کان پوءِ هن بنا ڪنهن وقفي جي پروگرام ڪيا، ان سلسلي ۾ هو دبئي ۾ به قسطون رڪارڊ ڪرائڻ ويو جتي هن پاڪستاني مزاحيه توڙي فلمي اداڪارن کي گهرايو هو. سندس طبيعت ڪجهه عرصي کان خراب رهڻ ڪري سندس شو جون نيون قسطون رڪارڊ نه پيو ٿي سگهن ۽ هاڻي هن طبيعت جي بهتري جي خبر ڏئي مداحن کي نوان پروگرام رڪارڊ ٿيڻ جي به خاطري ڪرائي آهي

 

قومي ترانو پڙهڻ مون لاءِ هڪ وڏي اعزاز جي ڳالهه آهي: اميتاڀ بچن

ممبئي (شوبز نيوز) بالي ووڊ ليجنڊ اداڪار اميتاڀ بچن ڀارتي مقامي ڪبڊي ليگ جي افتتاحي تقريب ۾ ڀارتي قومي ترانو پڙهندو، ان کان اڳ 72 سالن جي اداڪار ساڳي ليگ لاءِ پنهنجي آواز ۾ پرموشنل مشهوري پڻ رڪارڊ ڪرائي هئي. ڀارتي ميڊيا موجب پرو ڪبڊي ليگ جي پهرين ميچ ۽ تقريب ممبئي ۾ رٿي وئي آهي. ان موقعي تي اميتاڀ بچن پنهنجي سماجي رابطن واري ويب سائيٽ جي بلاگ تي لکيو ته قومي ترانو پڙهڻ هن لاءِ هڪ وڏي اعزاز جي ڳالهه آهي، هن چيو ته قومي ترانو پڙهڻ سان فخر ٿيندو آهي، هن چيو ته قومي ترانو فقط لفظن جي ادائگي ناهي پر ان ۾پنهنجي عزت ۽ فخر وڌندو آهي، هن چيو ته قومي ترانو وطن طرف ڌيان ڇڪائي ٿو ان ڪري کيس تمام گهڻو پسند به آهي.

 

پاڪستان سپر ليگ گڏيل عرب امارتن جي انتظاميا جي ڪن لاٽار سبب خطري ۾ پئجي وئي

دبئي(اسپورٽس نيوز) پاڪستان سپر ليگ گڏيل عرب امارتن جي انتظاميا جي ڪن لاٽار سبب خطري ۾ پئجي وئي آهي، جڏهن ته امارتي انتظاميا جي سستي جي ڪري پي سي بي کي ڳڻتي ورائي وئي آهي. عالمي ميڊيا تي خبرون آيون آهن ته گڏيل عرب امارتن جي انتظاميا پاڪستان سپر ليگ بدران ماسٽرز ايونٽ کي ترجيح ڏئي رهي آهي، جنهن ڪري پي سي بي انتظاميا مايوس ٿي وئي آهي. پاڪستان ڪرڪيٽ بورڊ ڊگھي انتظار کانپوءِ پنهنجي ٽي ٽوئنٽي سيريز (پاڪستان سپر ليگ) گڏيل عرب امارتن ۾ ڪرائڻ جو فيصلو ڪري ورتو هو، پر ويٽرنز جي ماسٽر ليگ وچ ۾ اچي وئي. پاڪستان جي هڪ ڪاروباري شخصيت ظفر شاهه، اڳوڻو ڪپتان وسيم اڪرم، برائن لارا ۽ جيل ڪيلس سميت ماضي جي ڪيترن ئي سپر اسٽاز تي ٻڌل ايونٽ فيبروري ۾ ڪرائڻ لاءِ گڏيل عرب امارتن جي ڪرڪيٽ بورڊ سان معاهدو ٿي چڪو آهي.  پي سي جو خيال هو ته نيوٽرل گرائونڊ طور پاڪستاني ٽيم جو ٻيو گھر يو اي اي آهي جيڪو پراڻن لاڳاپن جو خيال ڪندو ۽ ويٽرنز ليگ جو شيڊول تبديل ڪرائي پنهنجي ايونٽ لاءِ رستو صاف ڪرائڻ ۾ ڪاميابي ملي ويندي، پر گذريل مهيني پي سي بي جا آفيشلز ڳالهين لاءِ پهتا ته اي سي بي جو چيف ايگزيڪٽو ڊيوڊ ايسٽ نه ملي سگھيو. ڊيوڊ ايسٽ جو چوڻ آهي ته اسان کي به پي سي بي جي ليگ جي خبر ميڊيا ذريعي پئي، پر اسين ماسٽرز ليگ سان معاهدو ڪري چڪا آهيون، ان صورتحال ۾ پي سي بي هاڻي قطر ۾ پاڪستان ليگ ڪرائڻ تي غور شروع ڪري ورتو آهي. ان سلسلي ۾ ٻه عملدار ڳالهين لاءِ گذريل هفتي دوحا جو دورو پڻ ڪري چڪا آهن

 

فاسٽ بالر وهاب رياض ون ڊي سيريز مان ٻاهر ٿي ويو

لاهور(اسپورٽس نيوز) سري لنڪا خلاف ٽيسٽ سيريز ۾ زخمي ٿيندڙ فاسٽ بالر وهاب رياض ون ڊي سيريز مان ٻاهر ٿي ويو آهي، جڏهن ته کيس 24 جولاءِ تي پريڪٽس ڪرڻ جي هدايت ڪئي وئي آهي. پي سي بي ذريعن پاران اميد ظاهر ڪئي پئي وڃي ته  فاسٽ بالر آخري ٻن ون ڊي ميچن ۾ شامل ٿي سگھي ٿو پر کيس هڪ ميڊيڪل رپورٽ ۾ اڃا تائين ڪليئر قرار ناهي ڏنو ويو. چيف سليڪٽر هارون رشيد ميڊيا کي ٻڌايو ته ون ڊي ميچن کان پهريان وهاب رياض جي فٽ ٿيڻ جا ڪي به امڪان ناهن، جڏهن ته مونکي اميد آهي ته وهاب رياض ٽي ٽوئنٽي سيريز کان اڳ فٽ ٿي ويندو.

 

گيل خلاف ڊسيپلن جي ڀڃڪڙي وارو معاملو ختم

جارج ٽائون(اسپورٽس نيوز) ويسٽ انڊيز جي ڪرڪيٽ بورڊ اسٽار بيٽسمين ڪرس گيل ڏانهن دوستي جو هٿ وڌائي ورتو آهي. ان سلسلي ۾ پهرئين مرحلي ۾ گيل خلاف ڊسيپلن جي ڀڃڪڙي وارو معاملو ختم ڪيو ويو آهي. ڪرس گيل جنوري ۾ ڪلائيو لائيڊ جي سربراهي ۾ سليڪشن پينل تي ڇتي تنقيد ڪندي سندس پاليسين کي تنقيد جو نشانو بڻايو هو. پنهنجي دوستن ڊيوائن براوو ۽ ڪيرون پولارڊ جي ورلڊ ڪپ ايونٽ مان ٻاره ٿيڻ تي ناراض ڪرس گيل ٻنهي رانديگرن کي ڊراپ ڪرڻ کي وائڙائپ قرار ڏنو هو. ويسٽ انڊين ڪرڪيٽ بورڊ ضابطه اخلاق جي ڀڃڪڙي ڪرڻ تي گيل خلاف چارج 9 ته لڳايو پر مقرر وقت ۾ ڪا به ڪارروائي نه ڪئي. گذريل ڏينهن بورڊ گيل خلاف اهو معاملو ئي ختم ڪري ڇڏيو آهي

 

پاڪستاني آل رائونڊر محمد حفيظ جو بالنگ ايڪشن غير قانوني قرار، پابندي لڳائي وئي

دبئي(اسپورٽس نيوز) انٽرنيشنل ڪرڪيٽ ڪائونسل، پاڪستاني آل رائونڊر محمد حفيظ جي بالنگ ايڪشن کي غير قانوني قرار ڏيندي مٿس پابندي هڻي ڇڏي آهي. آءِ سي سي پاران محمد حفيظ جي بالنگ ايڪشن تي رپورٽ اچڻ بعد سندس بالنگ تي هڪ سال جي پابندي لڳائي لڳائي وئي آهي. سريلنڪا خلاف سيريز ۾ بالنگ ايڪشن شڪي هئڻ تي محمد حفيظ جي ٽيسٽ ڀارتي شهر چناءِ جي ٽيسٽ ليبارٽري مان ڪرائي وئي هئي جنهن ۾ هـُو پاس ٿيڻ ۾ ناڪام رهيو. رپورٽ اچڻ بعد آءِ سي سي محمد حفيظ جي بالنگ تي هڪ سال لاءِ پابندي لاڳو ڪري ڇڏي. پابندي کانپوءِ محمد حفيظ سريلنڪا خلاف جاري ون ڊي سيريز ۾ بالنگ نه ڪرائي سگهندو پر کيس بيٽسمين طور ٽيم ۾ کيڏڻ جي اجازت هوندي. ياد رهي ته ان کان اڳ نومبر 2014ع ۾ پڻ محمد حفيظ کي بالنگ ڪرائڻ کان روڪيو ويو هو ۽ بالنگ ايڪشن ۾ بهتري اچڻ بعد آءِ سي سي اپريل 2015ع ۾ ڪليئر ڪيو هو.

 

ڪرپشن خلاف هلندڙ ساراهه جوڳيون ڪارروايون

 

سنڌ ۾ ايپڪس ڪميٽي جي فيصلن ۽ اعليٰ فوجي عملدارن جي سفارشن بعد رينجرز جي سنڌ ۾ مقرري جي مدي ۾ سال واڌ، ڪرپشن ۾ ملوث ڄاڻايل ڪامورن کي هٽايو ويو آهي، سنڌ جي وڏي وزير سيد قائم شاھ آئين جي آرٽيڪل 147 تحت رينجرز جي سنڌ ۾ ترسڻ واري مدي ۾ هڪ سال واڌ  ڪرڻ جي منظوري ڏئي ڇڏي آهي  رينجرز  پوليس ،سول انتظاميا سان امن امان جي حوالي سان سهڪار ڪندي، اهڙي منظوري  ، سنڌ جي گھرو سيڪريٽري  مختيار سومري ، چيف سيڪريٽري جي ذريعي رينجرز کي سنڌ ۾ وڌيڪ هڪ سال ترسڻ جي  منظوري ڏيڻ لاءِ وڏي وزير کي  موڪليل سمري تي ڏني وئي آهي ،  رينجرز جو مدو 19 جولاءِ تي ختم ٿي رهيو هو،  سنڌ جي  وڏي وزير سمري جي منظوري ڏيندي رينجرز جي مدي ۾ 20 جولاءِ کان هڪ سال لاءِ واڌ ڪري ڇڏيو آهي، رينجرز کي وڌيڪ عرصو مقرر رهڻ لاءِ سنڌ اسيمبلي مان منظوري حاصل ڪئي ويندي، وڏي وزير اميد ظاهر ڪئي آهي ته رينجرز ساڳئي جذبي سان  سنڌ ۾ امن امان قائم ڪرڻ لاءِ ڪم ڪندي رهندي. سنڌ حڪومت ڪرپشن ۾ ملوث آفيسرن خلاف سرجيڪل آپريشن ڪندي،سيڪريٽرين ۽ 10 ڊپٽي ڪمشنرن کي پنهنجن عهدن تان هٽائي ڇڏيو آهي ، جنهن کان پوءِ صوبي جي سول انتطاميا ۾ ٿرٿلو مچي ويو آهي جڏهن ته ٻئي مرحلي ۾ سنڌ ڪابينا جي  وزيرن کي به هٽايو ويندو جن تي ڪرپشن جا الزام آهن ،ڪالھه سي  ايم هائوس ۾ هڪ اهم اجلاس ٿيو جنهن ۾ ناڻي واري وزير سيد مراد علي شاھ ، مڪاني ادارن واري وزير  شرجيل انعام ميمڻ شرڪت ڪئي ۽ وڏي وزير کي دبئي ۾ پ پ پ چيئرمين بلاول ڀٽو زرداري ۽ شريڪ چيئرمين آصف علي زرداري سان ٿيل ملاقات ۽ ان ۾ ٿيل اهم فيصلن کان وڏي وزير کي آگاهي ڏني وئي ، کيس ٻڌايو ويو ته شريڪ چيئرمين جو حڪم آهي ته رينجرز جي مدي ۾ واڌ ڪئي وڃي ، ۽ ڪرپشن ۾ ملوث سمورن آفيسرن کي عهدن تان بنا دير هٽايو وڃي ۽ ايپڪس ڪميٽي ۾ ٿيل فيصلن تي عمل ڪيو وڃي ۽ صوبي اندر انتظامي بهتري آندي وڃي ، جنهن کانپوءِ سنڌ جي وڏي وزير  سيد قائم علي شاھ ، فوري طور تي ڪراچي پوليس جي ايڊيشنل آءِ جي غلام قادر ٿيٻو کي عهدي تان هٽائي کيس اينٽي ڪرپشن  جو چيئرمين مقرر ڪري ڇڏيو ۽ اينٽي ڪرپشن جي چيئرمين سيد ذاڪر حسين کي اتان هٽائي ايڊيشنل آءِ جي ڪرائيم برانچ مقرر ڪيو ويو آهي مشتاق مهر کي ايڊيشنل آءِ جي ڪراچي مقرر ڪيو آهي ، جڏهن ته ڊائريڪٽر اينٽي ڪرپشن آصف اعجاز شيخ کي  به پنهنجي عهدي تان هٽايو ويو آهي هن مٿان الزام آهي ته هن جيڪب آباد مان هڪ انجنيئر کي گرفتار ڪري ان کان لکين رپيا رشوت ورتي ، جڏهن ته وڏي وزير سنڌ بلڊنگ ڪنٽرول اٿارٽي جي  ڊي جي منظور قادر ڪاڪا ، ڪراچي جي ايڊمنسٽريٽر ثاقب سومرو ، ايم ڊي سيپرا  عبدالرحيم سومري، ڪوآپريٽو سوسائٽيز کاتي جي ايڊيشنل چيف سيڪريٽري شاذر شمعون کي پنهنجن عهدن تان هٽائي ڇڏيو آهي ، جڏهن ته سيد ممتاز شاھ کي سينيئر ميمبر بورڊ آف روينيو مقرر ڪيو ويو آهي ،احمد بخش ناريجو کي سيڪريٽري ورڪس اينڊ سروسز، انعام الله ڌاريجو کي سيڪريٽري ڪوآپريشن مقرر ڪيو ويو آهي ، جڏهن ته منظور قادر ڪاڪا ڊي جي سنڌ بلڊنگ ڪنٽرول اٿارٽي ،ايڊمنسٽريٽر ڪراچي ثاقب سومرو، ايڊيشنل چيف سيڪريٽري ڪو آپريشن شاذر شمعون کي عهدن تان هٽائي ايس اينڊ جي اي ڊي ۾ رپورٽ ڪرڻ لاءِ چيو ويو آهي، ذوالفقار لاڙڪ کي ڊي آءِ جي اسپيشل برانچ، نذر بوذدار ڊائريڪٽر اينٽي ڪرپشن مقرر  ڪيو ويو آهي  اتان آصف اعجاز شيخ کي ايس اينڊ جي اي ڊي ۾ رپورٽ ڪرڻ جي هدايت ڪئي وئي آهي . جڏهن ته 10 ضلعن جي ڊپٽي ڪمشنرن کي به ڪرپشن ، غير قانوني طريقي سان ڏيھه ۽ پرڏيھه ۾ ملڪيتون ٺاهڻ الزام ۾ هٽايو ويو آهي ،جن  ڊپٽي ڪمشنرن کي هٽايو ويو آهي انهن ۾ سجاول جو ڊپٽي ڪمشنر آيو خان مري ،ڊي سي اولھه ڪراچي ، محمد علي شاھ، دادو جو ناصر عباس ،ميرپورخاص جو رشيد احمد زرداري، سانگھڙ جو سڪندر علي خشڪ،، شڪار پور جي هادي بخش زرداري ڄام شوري جي سهيل اديب بچاڻي،نوشهرو فيروز جي مرزا ناصر،ٿر پارڪر جي آصف شيخ، ۽ ٽنڊو الهيار جو ڊپٽي ڪمشنرمهدي شاھ شامل آهن ، واضع رهي ته ايپيڪس ڪميٽي جي گذريل اجلاس کان اڳ پ پ پ چيئرمين بلاول ڀٽو زرداري سان ڪراچي جي ڪورڪمانڊر نويد مختار ملاقات ڪئي هئي جنهن ۾ هن کيس عسڪري قيادت جو نياپو ڏنو ته سنڌ ۾ جيڪي ڪامورا ۽ وزير ڪرپشن ، مالي بي قاعدگين ۽ غير قانوني ڪمن ۾ ملوث آهن انهن کي پنهنجن عهدن تان هٽايو وڃي، خاص ڪري اهي ڪامورا جيڪي زمين جي قبضن ، غير قانوني الاٽمينٽ ، ڀتاخوري . سياسي ۽ مذهبي تنظيمن کي مالي مدد فراهم ڪرڻ ۾ ملوث آهن انهن کي هٽايو وڃي ، پ پ پ ۽ سنڌ سرڪار جي  ذريعن  جنهن کان پوءِ پ پ پچيئرمين بلاول ڀٽو زرداري دبئي پهچي پ پ پ جي شريڪ چيئرمين آصف علي زرداري سان تفصيلي ملاقات ڪئي ۽ عسڪري قيادت جي مطالبي کان آگاھ ڪيو ، ان کانپوءِ  گذريل ڏينهن دبئي ۾ پ پ پ جي اعليٰ  قيادت  جي منطوري کان پوءِ پهرين مرحلي ۾ ڪرپشن جي الزام هيٺ آيل ڪامورن کي هٽايو ويو آهي .  ٻئي مرحلي ۾ سنڌ ڪابينا ۾ شامل انهن وزيرن کي به هٽايو ويندو جن  جو ڪرپشن واري لسٽ ۾ نالو آهي يا جن خلاف نيب ، ايف آءِ اي وٽ جاچ هلي رهي آهي ،سنڌ جي  وڏي وزير سيد قائم علي شاھ طرفان ڪرپشن جي الزام ۾ هٽايل  10 ضلعن جي ڊپٽي ڪمشنرن جي جاءِ تي نون ڊپٽي ڪمشنرن کي مقرر ڪيو ويو آهي ،انهن ۾عمر فاروق بلو ڊي سي سانگھڙ،سجاد حيدر ڊپٽي ڪمشنر ٽنڊو الهيار،زبير چنو، دادو، زمان ناريجو ميرپور خاص،احمد شاھ، سجاول ، عابدسليم  قريشِي شڪارپور، خدا ڏنو ، ٿرپارڪر مٺي،ما جد محسن پنهور ڄام شورو، وسيم شمشاد،نوشهرو فيروز،حافظ عمراني ايڊ منسٽريٽر حيدر آباد ،اتان خالد شميم شيخ کي بدلي ڪري ايس اينڊ جي اي ڊي ۾ رپورٽ ڪرڻ لاءِ چيو ويو آهي

 

پاڪ_ڀارت لاڳاپا؛ڊاڪٽر عائشه صديقه

روس جي شهر اوفا ۾ وز يراعظم نواز شريف ۽ نريندر موديءَ جي ملاقات جو نتيجو ڏکڻ ايشيا جي روايتي پيمانن  مطابق آهي. هر ڌر جي دعويٰ آهي ته ان ڪجهه ڪاميابي حاصل ڪئي، جڏهن ته حقيقت هيءَ آهي ته ان موقعي تي سواءِ فوٽو سيشن جي ٻيو ڪجهه به نه ٿيو. اوفا واري ملاقات پاڪ-ڀارت لاڳاپن جي برف ڳارڻ لاءِ به نه هئي. اها طاقتن جي گڏجي ويهي عالمي سياست جي لاهن چاڙهن، جن جو تعلق ساڻن هو، تن کي نئين سر ترتيب ڏيڻ هو.ان دوران ڏکڻ ايشيا جي هنن ٻنهي ملڪن کي به چيو ويو ته اهي به هنن معاملن ۾ شريڪ ٿي وڃن ته جيئن ڳالهه اڳتي وڌي سگهي.

دنيا خاص ڪري چين  ۽ روس کي دهشت گردي ۽ پاڪستان جو سياسي پاسو ڪنٽرول ڪرڻ جو  فڪر آهي. چين پاڻ  کي ان خطري جي منهن ۾ آيل سمجھي ٿو، جهڙي قسم جي صورتحال کي سوويت يونين کي منهن ڏيڻو پئجي رهيو هو. پر هو ان جي حل لاءِ اهو طريقو اختيار ڪرڻ نٿو چاهي، جيڪو سوويت يونين افغانستان ۾ آزمايو هو، چين جنهن مسئلي کي منهن ڏئي رهيو آهي، تنهن کي سوويت يونين کي جيڪو مسئلو درپيش هو، تنهن سان ڀيٽڻ کان وڌيڪ ڀيٽ نه ٿي ڪري سگهجي. چين، سوويت يونين جي ڀيٽ ۾ فائدي ۾ آهي، ڇو جو سوويت يونين جي ڀيٽ ۾هن جا پاڪستان سان بهتر لاڳاپاآهن. حقيقت ۾ پاڪستان چين تي پنهنجو دارومدار وڌائي رهيوآهي ۽ چين جا ڀارت سان به دهشت گرديءَ خلاف وڙهڻ جو هڪ گڏيل مقصد به هو، تنهن ڪري اوفا ۾ شنگهائي تعاون تنظيم ۾ واڌ ڪندي پاڪستان ۽ ڀارت کي ان ۾ شامل ڪرڻ جو مقصد خطي ۾ سياسي طور امن ۽ سڪيورٽي کي يقيني بڻائڻ آهي.  مون کي ياد آهي ڪيئي سال اڳ جڏهن مان انگلينڊ ۾ پي ايڇ ڊي ڪري رهي هئس، مون کي ڏکڻ ڪوريا سان تعلق رکندڙ هڪ سينيئر ساٿيءَ سان ڳالهه ٻولهه ڪرڻ جو موقعو مليو. هن هڪ ڳالهه جي وضاحت ڪندي چيو ته هن وقت جيڪو  هڪ سياسي ڍانچو جڙي پيو سو مستقبل ۾ اسٽريٽجڪ گروپنگ تي زور ڏيندو ۽ ان کي نه مڃيندڙ رياستون پنهنجي اهميت وڃائي ويهنديون.

جيڪا ڳالهه ان وقت مبهم ۽ اڻ ٿيڻي نظر اچي رهي هُئي. هاڻي گذرندڙ مهينن ۽ سالن سان ان جا مقصد واضح ٿيڻ شروع ٿي ويا آهن. علائقائي تنظيمي ڍانچا سفارتي سطح تي ڳالهيون ٻولهيون ڪرڻ ۽ پنهنجو موقف پيش ڪرڻ جي اجازت ڏين ٿا. ڀارت ۽ چين ۾ تلخيون رهنديون پر اهي علائقائي اتحاد ۾ هڪٻئي جا ڀائيوار هوندا. ان پليٽ فارم تي هو پنهنجي مفادن ۽ تعاون جي رُخَ کي بحث هيٺ آڻي سگهن ٿا. علائقائي تنظيم وڏين رياستن کي به موقعو ڏيندي آهي ته اهي پنهنجي اثر ۽ دائري کي ٻه طرفي تعاون جي آڙ ۾ اڳتي وڌائي سگهن.

هتي مسئلو هي آهي ته ڏکڻ ايشيا ڪيترو تيزيءَ سان انهيءَ تبديل ٿيندڙ صورتحال کي اپنائي سگهي ٿي؟ چين مان سکڻ لاءِ گهڻو ڪجهه آهي، خاص ڪري هن جو اهو رويو ته اهو دشمنيءَ کي اهڙي راند نه ٿو سمجھي، جنهن ۾ هڪ رياست جو فائدو، ٻيءَ جو نقصان هجي، توهان ڪنهن به مسئلي تي پنهنجو هڪ موقف اختيار ڪري سگهو ٿا، پران جي ڪري هڪ بهترين ڪاروبار متاثر ڇو ٿئي؟ دولت، فوجي طاقت کان به وڌيڪ اثر رکندڙ  ٿئي ٿي. چين ڏکڻ ايشيا جي ڪيترين ئي رياستن ۾ وڏي سيڙپ ڪندي مالي فائدا حاصل ڪري رهيو آهي. ٿي سگهي ٿو ته ان جي ڪيترن ئي منصوبن کي انساني حقن ۽ سماجي تنظيمن جا ڪارڪن چئلينج ڪن، ڇو جو اهي صرف نظر ۾ رکندي جوڙيا ويا آهن، پر ائين به آهي ته برما کان ويندي سري لنڪا ۽ پاڪستان تائين سياسي ۽ سماجي ايڪٽوزم کي ناپسنديده تصور پئي ڪيو ويندو رهيو آهي.

جيتري قدر پاڪستان جو تعلق آهي ته اوفا کي هڪ ناڪامي طور پيش ڪرڻ غلط آهي.ڪجهه تجزيا نگار سرتاج عزيز جي ان بيان کي جنهن ۾ هن چيو آهي ته ڪشمير پاڪستان لاءِ مرڪزي حيثيت رکي ٿو، کي عجيب طريقي سان پيش ڪري رهيا آهن. ماڻهن کي ياد ڏيارجي ته ڪشمير، اوفا پڌرنامي جو حصو ناهي ۽ اهو به باور ڪرائڻ جي ڪوشش ڪئي پئي وڃي ته ملاقات ۾ صرف نقصان ٿيو آهي.

ڪجهه ماڻهو سُرٻاٽن ۾ چئي رهيا آهن ته نواز شريف جي سفارتي اڻڄاڻائيءَ سبب سندس حڪومت کي سياسي طور نقصان ٿيو آهي. ياد رهي ته گذريل ڪجهه مهين کان وٺي پاڪستان ۾ ٿيندڙ هر ناڪاري ڪم پٺيان ڀارتي ڳجھي اداري ”را“ جو هٿ ڏيکاريو پيو وڃي، جنهن جو اولڙو اوفا واري ملاقات ۾ نظر آيو، پاڪستاني طاقت جي مرڪزن کي سمجهڻ جي ضرورت آهي. وسيع علائقائي تعاون هاڻي ڪارگل جهڙي ڪنهن ٻي مهم کي برداشت نه ڪري سگهندو. پاڪستان کي سماجي، معاشي، سياسي ۽ سفارتي قوت وڌائڻ جي ضرورت آهي.ان کي دنيا کي فوجي آئين کان هٽي ڏسڻ جو هنر سکڻو پوندو