تازيون خبرون

Daily Archives: July 21, 2015

ورلڊبينڪ سکر بئراج جي بحاليءَ لاءِ آسان شرطن تي قرض ڏيڻ تي راضي ٿي وئي: وڏو وزير

سکر (بيورو)  : سنڌ جي وڏي وزير سيد قائم علي شاهه چيو آهي ته عالمي بينڪ سکر بئراج جي بحالي ۽ مرمت واري منصوبي لاءِ آسان شرطن تي قرض ڏيڻ تي راضي ٿي وئي آهي، بحالي واري منصوبي کانپوءِ سکر بئراج مان 15 لک ڪيوسڪ پاڻي آساني سان گذري سگهندو، هن وقت وڏي ٻوڏ جو ڪو خطرو نه آهي، اُلرا جاگير سميت سمورن حساس بندن تي مرمتي ڪم جاري آهي. اهڙن خيالن جو اظهار وزيراعليٰ سنڌ سيد قائم علي شاهه سکر بئراج تي آبپاشي کاتي پاران ٻوڏ جي صورتحال ۽ اڳواٽ تيارين جي حوالي سان بريفنگ کانپوءِ ميڊيا س ان ڳالهائيندي ڪيو. اِن موقعي تي قومي اسيمبليءَ ۾ مخالف ڌُر جو اڳواڻ سيد خورشيد احمد شاهه ۽ ٻيا به موجود هئا. وڏي وزير وڌيڪ چيو ته سنڌ زرعي صوبو آهي ۽ ان جي 80 سيڪڙو معيشت جو دارومدار زراعت تي آهي، پاڻي اسان جو جياپو آهي، ايريگيشن سسٽم کي بهتر بڻائڻ لاءِ حڪومت سنجيده قدم کڻي رهي آهي، سکر بئراج وٽ پانڊ ليول وڌائڻ ۽ ٻيٽ ختم ڪرڻ جي هدايت ڪئي وئي آهي. وزيراعليٰ وڌيڪ چيو ته ورلڊ بينڪ ۽ ٻين مشهور انٽرنيشنل ڪمپنين جي ماهرن پنهنجي فزيبلٽي ۽ اسٽڊي رپورٽ ۾ چيو آهي ته هن وقت سکر بئراج 12 لک ڪيوسڪ کان وڌيڪ پاڻي برداشت نه ٿي ڪري سگهي، جيڪڏهن سکر بئراج جي بحالي وارو منصوبو مڪمل ٿي ويو ته پوءِ 15 لک ڪيوسڪ پاڻي به گذري سگهي ٿو. هن چيو ته 9 آگسٽ تي عالمي بينڪ، پاڻي ۽ آبپاشي ماهرن ۽ اعليٰ آفيسرن جي اهم گڏجاڻي سکر ۾ ئي ڪوٺائي وئي آهي، جنهن ۾ ماهرن کان رايا ورتا ويندا. وزيراعليٰ چيو ته سکر بئراج جي متبال نئين بئراج ٺاهڻ لاءِ وڏو پئسو گهرجي، پر تنهن هوندي به بئراج جي بحالي واري منصوبي مڪمل ٿيڻ سان اسانکي 10-15 سالن جو وقت ملي ويندو، اسان کي نئين بئراج ضرور ٺاهڻي آهي ان لاءِ هاڻي کان ئي تياري ڪئي وڃي. وڏي وزير سيد قائم علي شاهه چيو ته سنڌ اندر سنڌودرياهه تي ڪُل 46 حساس جڳهون آهن، اُلرا جاگير ۽ قادرپور بند سميت انتهائي حساس بندن تي مرمت وارو ڪم جاري آهي. هن چيو ته اُلرا جاگير تي پهريان عارضي طور مرمتي ڪم ڪيو ويندو هو پر هاڻي اُتي اسپرس تيار ڪيا پيا وڃن، جن تي تيزي سان ڪم جاري آهي. وڏي وزير چيو ته هن وقت گڊو بئراج وٽ پاڻي 3 لک ڪيوسڪ کان وڌيڪ آهي ۽ آبپاشي کاتي وارن اڳڪٿي ڪئي آهي ته هلندڙ مهيني جي 26 تاريخ تائين وڏي ٻوڏ نه ايندي، تنهن هوندي به سمورن لاڳاپيل کاتن کي الرٽ رهڻ جي هدايت ڪئي وئي آهي. اِن کان اڳ سيڪريٽري آبپاشي ظهير حيدر شاهه بريفنگ ڏيندي ٻڌايو ته 20 جولاءِ تائين ساڍا چار لک ڪيوسڪ پاڻي گڊو وٽ پهچڻ جو امڪان آهي، بندن ۽ بئراجن جي صورتحال بهتر پوزيشن ۾ آهي ۽ بندن جي چوڪسي سخت ڪئي وئي آهي. سيڪريٽري آبپاشي ٻڌايو ته آبپاشي کاتي وٽ فنڊن جي کوٽ آهي، وفاق پاران 4 ارب رُپيا ملڻا هئا، پر رُڳو هڪ ارب مليا آهن. هن ٻڌايو ته عالمي ماهرن سکر بئراج، رائيٽ بينڪ هيڊورڪس جي مرمت ٿيڻ سميت بند ٿيل دروازن جي بحالي ۽ اُنهن جي کولڻ کي لازمي قرار ڏنو آهي. بريفنگ دوران  قومي اسيمبلي ۾ مخالف ڌُر جو اڳواڻ سيد خورشيد احمد شاهه، ايم اين اي نعمان اسلام شيخ، ايم پي ايز سيد ناصر شاهه، اويس قادر شاهه، صوبائي صلاحڪار ڊاڪٽر ارشد مغل، وزيراعليٰ سنڌ جو پوليٽيڪل سيڪريٽري لعل بخش منگي، ڪمشنر سکر ڊويزن محمد عباس بلوچ، ڪمشنر لاڙڪاڻو ڊويزن اڪبر لغاري، ڊي آءِ جي سکر ڪامران افضل، سکر، خيرپور ۽ گهوٽڪي جي ڊپٽي ڪمشنرن سميت ٻيا لاڳاپيل عملدار پڻ موجود هئا.

 

گهرو وزارت پاران ايان علي ۽ علي حسن زرداري سوڌو ٽن ڄڻن جا نالا اي سي ايل ۾ شامل

اسلام آباد(بيورو) مني لانڊرنگ ڪيس ۾ ملوث ماڊل ايان علي ۽ ڪرپشن ۾ ملوث ٻن آفيسرن جا نالا اي سي ايل ۾ وجهي سندن پرڏيهه وڃڻ تي پابندي لڳائي وئي آهي. گهرو وزارت ايان علي جو نالو اي سي ايل ۾ شامل ڪيو جنهن کان پوءِ هوءَ ٻاهر نٿي وڃي سگهي، ساڳئي ريت ڪرپشن ۾ ملوث ٻن آفيسرن عاشق ولي زرداري ۽ علي حسن زرداري جي پرڏيهه وڃڻ تي به پابندي وجهندي سندن نالا اي سي ايل ۾ شامل ڪيا ويا آهن. گهرو وزارت جو چوڻ آهي ته ٻنهي آفيسرن جي خلاف ڪرپشن جي نيب کان جاچ ڪرائي ويندي. ايان علي سوڌو ٽنهي ڄڻن جا نالا اي سي ايل ۾ وجهڻ بابت سڄي ملڪ جيايئر پورٽ اختيارين کي ٻڌايو ويو آهي.

 

ايران جي ايٽمي تڪرار جو معاملو حل ٿيڻ کان پوءِ پاڪ ايران گئس پائيپ لائين رٿا کي تيز رفتاري سان مڪمل ڪيو ويندو: پرويز رشيد

لاهور (اين اين آءِ) سڌسماءَ جي وفاقي وزير سينيٽر پرويز رشيد چيو آهي ته ايران جي ايٽمي تڪرار جو معاملو حل ٿيڻ کان پو پاڪ ايران گئس پائيپ لائين رٿا کي تيز رفتاري سان مڪمل ڪيو ويندو سرڪاري نشرياتي اداري سان ڳالهائيندي پرويز رشيد چيو ته ملڪ آڏو توانائي جي بحران جي خاتمي لاءِ پاڪ ايران گئس پائيپ لائين رٿا اهميت واري اهي پاڪستان عالمي دٻاءُ جي باوجود هن منصوبي تان هٿ ناهي کنيو ايران ۽ عالمي طاقتن وچ ۾ ايٽمي معاهدي پاڪستان کي ان منصوبي کي مڪمل ڪرڻ لاءِ بهترين موقعو فراهم ڪيو آهي جنهن مان فائدو ورتو ويندو ۽ گئس پائيپ لائين منصوبي کي تيز رفتاري سان مڪمل ڪيو ويندو.

 

الطاف حسين ڪراچي ۾ آپريشن لاءِ فوج کي پاڻ دعوت ڏني،سنڌ ۾ نيب ۽ ايف آئي اي جو ڪردار نه هجڻ گهرجي: خورشيد شاهه

ڪراچي(اسٽاف رپورٽر) قومي اسيمبلي ۾ مخالف ڌر جي اڳواڻ سيد خورشيد احمد شاهه چيو آهي ته الطاف حسين ڪراچي ۾ آپريشن لاءِ فوج کي پاڻ دعوت ڏني هئي، جڏهن ته سنڌ ۾ نيب ۽ ايف آئي اي جو ڪردار نه هجڻ گهرجي، ميڊيا سان ڳالهائيندي خورشيد شاهه چيو ته دعا آهي ته اڳوڻو چيف جسٽس افتخار محمد چوڌري سياست ۾ اچي وڃي. هن چيو ته ڪرپشنملڪ جي ڪنهن به صوبي ۾ هجي اها ڪينسر آهي، ملڪ ۾ 55 سالن جي آمريت سبب ڪرپشن پکيڙي آهي. خورشيد احمد شاهه چيو ته پارٽي ۾ اقتداري دور ۾ شامل ٿيندڙ هاڻ نوان آکيرا ڳولي رهيا آهن،

 

بلدياتي چونڊون: پنجاب ۽ سنڌ ۾ 21 جولاءِ کان عبوري چونڊ فهرستون لڳايون وينديون: اليڪشن ڪميشن

اسلام آباد(اي پي پي)اليڪشن ڪميشن آف پاڪستان پنجاب ۽ سنڌ جي مختلف شهرن ۾ اڱارو 21 جولاءِ کان عبوري چونڊ فهرستون لڳائيندي. اليڪشن ڪميشن طرفان جاري نوٽيفڪيشن مطابق چونڊ فهرستون رجٽريشن آفيسرز ۽ اسسٽنٽ رجسٽريشن آفيسرز جي آفيسن ۾ 7 ڏينهن تائين رکيون وينديون. چونڊ فهرستون لڳائڻ جو مقصد غلطين جي درستگي ڪرڻ ۽ اعتراض ختم ڪرڻ آهي. پنجاب ۽ سنڌ ۾ 20 سيپٽمبر تي بلدياتي چونڊون ٿيڻيون آهن، جن شهرين جا نالا چونڊ فهرستن ۾ نه آهن اهي نشاندهي ڪري سگهن ٿا. اهڙي ريت جن جا نالا غلط طور شامل ڪيا ويا آهن انهن تي به اعتراض داخل ڪري سگهجن ٿا.

 

مٽياري لڳ ٽرين جو ڪار کي ٽڪر، هڪ ئي ڪٽنب جي پنجن ڀاتين سميت 6 ماڻهو فوت

حيدرآباد (اي پي پي) مٽياري ويجهو ٽرين ڪار کي چيڀاٽي ڇڏيو، ڊرائيور سميت 6 ماڻهو اجل جو شڪار ٿي ويا. خبر موجب بدنصيب ڪٽنب ڳوٺ صاحب خان جروار کان ڀٽ شاهه تي حاضري لاءِ وڃي رهيو هو ته جسڪاڻي ڦاٽڪ ڪراس ڪندي ڪار ٽرين جي زد ۾ اچي ويئ جنهن جي نتيجي ۾ ڪار ٽڪرا ٽڪرا ٿي ويئي ۽ ڪار ۾ سوار ڊرائيور 20 ساله فرقان کان علاوه هڪ ئي ڪٽنب جا پنج ڀاتي فوت ٿي ويا. فوتين ۾ 45 ساله مظفر حسين جروار، 40 ساله شميم جروار، 7 ساله ربيعه، 15 ساله امتياز ۽ 12 ساله عامر موقعي تي فوت ٿي ويا. جن جا لاش ٽنڊوالهيار ل ڳوٺ صاحب خان جروار پهچايا ويا ته قهرام مچي ويو ۽ ڳوٺ وارن جون عيد جون خوشيون ڏک ۾ تبديل ٿي ويون.

 

متحده سربراهه الطاف حسين پاران مرڻ گهڙي تائين بک هڙتال جو اعلان

لنڊن(مانيٽرنگ ڊيسڪ) ايم ڪيو ايم جي سربراهه الطاف حسين مرڻ گهڙي تائين بک هڙتال ڪرڻ جو فيصلو ڪيو آهي، جڏهن ته سندسچوڻ آهي ته مون قوم سان واعدو ڪيو هو ته ظالمن اڳيان ڪنڌ نه جهڪائيندس ۽ پنهنجي زندگي قربان ڪري ڇڏيندس پر مظلوم، محروم عوام جي حقن ۽ مفادن جو سودو ڪڏهن به نه ڪندس. لنڊن مان جاري هڪ بيان مطابق الطاف حسين مرڻ گهڙي تائين بک هڙتال جو فيصلو ڪيو آهي جڏهن ته الطاف حسين جو چوڻ آهي ته مان قوم سان ڪيل پنهنجو واعدو ضرور پاڙيندس، پنهنجي زندگي قربان ڪندس پر اردو ڳالهائيندڙن سان گڏو گڏ پاڪستان جي سمورن مظلوم ۽ محروم عوام جي حقن ۽ مفادن جو سودو ڪڏهن نه ڪندس،مرڻ گهڙي تائين بک هڙتال سان پنهنجي زندگي پوري ڪري مان پنهنجو واعدو پورو ڪرڻ پيو وڃان.سندس چوڻ هو ته مان اهو قدم ان ڪري کڻي رهيو آهيان ڇو ته وفاقي ۽ صوبائي حڪومتون، فوج، رينجرز ۽ پوليس ڪاري قانون جو سهارو وٺي اردو ڳالهائيندڙن جي معاشي ۽ جسماني نسل ڪشي ۾ رڌل آهن.الطاف حسين چيو ته اڄ پاڪستان کي ٺهي 67 سال گزرڻ کانپوءِ به اردو ڳالهائيندڙن کي برابر جو پاڪستاني شهري نه پيو سمجهيو وڃي، سالن کان هلندڙ اردو ڳالهائيندڙن جي قتل ۾ هزارين اردو ڳالهائيندڙ سهيد ڪيا ويا آهن پر ڪنهن به قاتل کي ڪڏهن به گرفتار ناهي ڪيو ويو. هن چيو ته 70 جي ڏهاڪي ۾ ان وقت جي سنڌ جي صوبائي حڪومت ڪوٽا سسٽم لاڳو ڪري ۽ لساني بل پيش ڪري، سنڌ جي مستقل رهاڪن ۾ فرق پيدا ڪرڻ جي ڪوشش ڪئي ۽ انهن جي خلاف پر امن احتجاج ڪندڙ مهاجرن کي دهشتگردي جو نشانو بڻايو ،جنهن کانپوءِ سنڌ جي اندر هڪ گڏيل سازش هيٺ لکين اردو ڳالهائيندڙن کي لڏپلاڻ ڪرڻ تي مجبور ڪيو ويو، هزارين بي ڏوهين کي قتل ڪيو ويو، ڪيترا ئي زخمي ۽ بي گهر ڪيا ويا، ان قتل عام ۽ ظلم جا ذميوار ڪٿي آهن ۽ اڄ تائين انهن جي خلاف ڪهڙو ايڪشن کنيو ويو آهي.الطاف حسين چيو ته 37 سالن جي جدوجهد کانپوءِ هاڻي آخري نتيجي تي پهتو آهيان ته پاڪستان جي طاقتور اسٽيبليشمينٽ، ذميدار، وڏيرا ۽اقتدار مافيا نه رڳو اردو ڳالهائيندڙن سان سخت نفرت  ۽ حقارت تي يقين رکن ٿا پر پاڪستان جي زمين تان اردو ڳالهائيندڙن کي پوري طرح ختم ڪرڻ چاهين ٿا، اسٽيبليشمينٽ جي 67 سال گذرڻ کانپوءِ به اردو ڳالهائيندڙن کي پاڪستاني ناهي مڃيو. الطاف حسين چيو ته ڪراچي امن جي سڀ کان وڏي حامي ايم ڪيو ايم آهي، ڪراچي  ۾ سڀ کان اڳ آپريشن جو مطالبو ايم ڪيو ايم ڪيو هو ۽ ڏوهارين، قاتلن ۽دهشتگردن جي خلاف بنا فرق ، ان ڌريو ۽ شفاف آپريشن جو مطالبو ڪيو هو پر جڏهن آپريشن شروع ڪيو ويو ته رڳو ايم ڪيو ايم کي نشانو بڻايو ويو، هڪ ڀيرو ٻيهر ڪراچي جي عوام سان دوکو ڪيو ويو، هن آپريشن ۾ ايم ڪيو ايم جا4 هزار کان وڌيڪ ڪارڪنن کي گرفتار ڪيو ويو.الطاف حسين جو چوڻ هو ته پاڪستان ۾ اسٽيبليشمينٽ، آئين ۽ قانون کان مٿانهين آهي، اها به گهڻي ڏک واري حقيقت آهي ته پاڪستان ۾ ڪا به سياسي پارٽي، صحيح معنيٰ ۾ جمهوريت پسند ناهي، سڀ جا سڀ سڌي يا اڻ سڌي طرح اسٽيبليشمينٽ جا ايجنٽ آهن ۽ پاڪستان ۾ انڌو ذميداراڻو نظام ۽ اسٽيٽس کي برقرار رکڻ چاهي ٿو.هن چيو ته مون اردو ڳالهائيندڙن جي خلاف هلندڙ ظلم ۽ ناانصافي کي روڪڻ ۽ انهن کي پاڪستان ۾ هڪ عزت وارو مقام ڏيارڻ لاءِ پنهنجي زندگي قربان ڪري ڇڏي، پر منهنجي سمورين ڪوششن کانپوءِ به، نه ئي اردو ڳالهائيندڙن جي نسل ڪشي رڪجي سگهي نه انهن کي انصاف ملي سگهيو، هاڻي انهن حالتن ۾ مون وٽ انکانسواءِ ٻيو ڪو به رستوناهي ته مان مرڻ گهڙي تائين بک هڙتال ڪيان.ايم ڪيو ايم جي سربراهه چيو ته بک هڙتال جا انتظام شروع ٿي چڪا آهن ۽ مقامي انتظاميا کان اجازت ملندي ئي مان بک هڙتال شروع ڪري ڇڏيندس، منهنجي مرڻ کانپوءِ پارٽي جا معاملا مڪمل طور تي رابطا ڪميٽي جي هٿ ۾ هوندا ۽ پوءِ رابطا ڪميٽي جي مرضي آهي ته هو تحريڪ کي جاري رکي يا ان جي ختم ڪرڻ جو اعلان ڪري ڇڏي، جڏهن  ته رابطا ڪميٽي کي اها وصيحت آهي ته تحريڪ جي شهيدن کي هميشا ياد رکيو وڃي.

 

 

ڀارتي فوج عيد جي موقعي تي ايل او سي واري علائقي ۾ فائرنگ ڪئي: آءِ ايس پي آر

راولپنڊي (اي پي پي) ڀارتي فوج عيد الفطر جي موقعي تي به لائين آف ڪنٽرول واري علائقي نيزه پير تي ٻيهر فائرنگ ڪئي. آءِ ايس پي آر جي ڊائريڪٽر جنرل ميجر جنرل عاصم سليم باجوه مطابق فائرنگ سان واضح ٿئي ٿو ته ڀارت هر تهوار جي موقعي تي اهڙي قسم جون ڀڃڪڙيون ڪندو آهي. هن چيو ته اها زيادتي آهي ته هو ڀڃڪڙي پاڻ ڪندا آهن ۽ وري پوءِ الزام بازي پڻ ڪندا آهن.

 

ڊاڪٽر طاهرالقادري مڪاني اليڪشن لاءِ ڪميٽي جوڙي ڇڏي

لاهور (اين اين آءِ) پاڪستان عوامي تحريڪ جي اڳواڻ ڊاڪٽر طاهرالقادري چيو آهي ته آئين مطابق بااختيار ۽ بلدياتي ادارا جوڙڻ لاءِ تحريڪ هلائڻ جي ضرورت پئي ته پوئتي نه هٽنداسين بلدياتي ادارا حڪومت جي ترميمي دهشتگردي جي ٽارگيٽ تي آهن بااختيار بلدياتي ادارا عوام جي ڪائي خدمت نه ڪري سگهندا عوامي تحريڪ جي سربراهه بلدياتي اليڪشن لاءِ ڪميٽي جوڙي ڇڏي ڪميٽي اليڪشن جي جملي معاملن جي نگراني سان گڏوگڏ بلدياتي منشور تيار ڪندي هو گذريل ڏينهن عوامي تحريڪ جي سينيئر اڳواڻن سان ملاقات ۾ ڳالهه ٻولهه ڪري رهيو هو ڊاڪٽر طاهرالقادري چيو ته اڳوڻن ناظمن، نائب ناظمن، ڪائونسلرز ۽ جمهوريت پسند پڙهيل لکيل نوجوانن کي حڪمرانن جي چنڀي مان بلدياتي ادارن جا اختيار ۽ وسيلا ڇڏائڻ لاءِ پنهنجو قومي جمهوري ڪردار ادا ڪرڻو پوندو حڪمران ممي ۽ ڊمي قسم جا بلدياتي ادارا جوڙڻ جي رٿابندي ڪري رهيا آهن اهڙا ادارا جيڪي وزيرن جي ضلعي دورن جي موقعي تي آجياڻي واري ڪئمپ لڳائڻ ۽ آجياڻي جا بينر لڳائڻ جي اختيارن تائين محدود هجن. ڊاڪٽر طاهرالقادري چيو ته موجوده حڪمرانن جمهوريت جي نالي تي خانداني راڄ قائم ڪيو آهي اسيمبليون غير موثر بنائڻ کان پوءِ هاڻي هي عوام جي بلدياتي ادارن کي به پنهنجي راڄڌاني ۾ شامل ڪرڻ جي رٿابندي ڪري چڪا آهن.

 

لنڊن ۾ خان آف قلات سان جرڳي جي ملاقات هاڪاري رهي : مالڪ بلوچ

ڪوئيٽه (اي پي پي) بلوچستان جي وڏي وزير ڊاڪٽر مالڪ بلوچ چيو آهي ته لنڊن ۾ خان آف قلات سان جرڳي جي ملاقات هاڪاري رهي پر موثراڳڀرائي لاءِ وڌيڪ ڳالهين جي ضرورت آهي. اها ڳالهه هن ڇنڇر ڏينهن لنڊن کان ڪوئيٽه واپسي تي وزير اعليٰ هائوس ۾ عيد جي ملاقات لاءِ آيل ماڻهن ۽ ميڊيا عيوضين سان ڳالهائيندي ڪي. وڏي وزير ڊاڪٽر مالڪ بلوچ چيو ته ناراض ماڻهن سان ڳالهين لاءِ وفاقي ۽ صوبائي حڪومت جون جيڪي ڪوششون آهن، جرڳي جي خان آف قلات سان ملاقات به ان جو حصو آهي. حڪومت ان سلسلي ۾ وڌيڪ ڳالهيون ڪندي ۽ ٻين ناراض ماڻهن سان به ملاقاتون ڪيون وينديون. هن چيو ته ڪوئيٽه سميت صوبي ۾ امن امان جي صورتحال بهتر ٿي آهي، هن ڀيري رمضان ۽ عيد تي واپارين رڪارڊ بزنيس ڪيو آهي.