تازيون خبرون

Daily Archives: July 16, 2015

ٽائيگر شيروف فلم ”باغي” ۾ خاص انداز ۾ نظر ايندو

ممبئي(شوبز نيوز) اداڪار ٽائيگر شيروف فلم ”باغي” ۾ خاص انداز ۾ نظر ايندو. ڀارت جي سڌ سماءَ وارن ذريعن مطابق هدايتڪار ڪبير خان جي فلم ”باغي” جي مرڪزي ڪردار ادا ڪندڙ ٽائيگر شيروف جي ڪردار ۾ حقيقت جو رنگ ڀرڻ لاءِ جنوري کان ڪم جاري هو پر مختلف انداز مان هڪ جي چونڊ ڪئي وئي آهي. ڪبير خان چيو ته ٽائيگر شيروف جي ان خاص انداز تي متفق ٿيڻ تي شوٽنگ شروع ڪئي وئي آهي.ا

 

سلمان خان ”بجرنگي ڀائيجان” جي پروموشن لاءِ دهلي پهچي ويو

ممبئي(شوبز نيوز) بالي ووڊ اداڪار سلمان خان پنهنجي نئين فلم ”بجرنگي ڀائيجان” جي پروموشن ۾ مصروف آهي. اها فلم (سڀاڻي) رليز ٿيندي. ڀارت جي سڌ سماءَ وارن ذريعن مطابق سلمان خان فلم ”بجرنگي ڀائيجان” جي هدايتڪار۽ ان جي ڪاسٽ سان فلم جي پروموشن جي سلسلي ۾ دهلي پهچي ويو. هن گلوڪار ميڪا سنگهه سان گڏ” آج ڪي پارٽي ميري طرف سي” گانو ڳايو. ان موقعي تي ڪرينه ڪپور ۽ نواز الدين صديقي به موجود هئا. فلم جي هدايتڪار ڪبير خان چيو ته دهلي ۾ فلم جي پروموشن ڪرڻ سٺو لڳو.

 

”باجي رائو مستاني” جي پهرين جهلڪ جاري

ممبئي(شوبز نيوز) بالي ووڊ جي نئين فلم ”باجي رائو مستاني” جي پهرين جهلڪ جاري ڪئي وئي. ڀارت جي سڌ سماءَ وارن ذريعن مطابق هدايتڪار سنجي ليله ڀنسالي جي ان فلم جي پهرين جهلڪ جاري ڪئي وئي. فلم ۾ رنوير سنگهه، دپيڪا پڙڪون ۽ پرينڪا چوپڙا مرڪزي ڪردار ادا ڪندا. فلم جي ڪهاڻي مراٺا جنگجو تي ٻڌل آهي. اها فلم 18 ڊسمبر تي سينيما گهرن ۾ نمائش لاءِ پيش ٿيندي.

 

ايشز سيريز: انگلينڊ ۽ آسٽريليا وچ ۾ ٻئين ٽيسٽ (اڄ) شروع ٿيندي

لارڊز(اسپورٽس نيوز) انگلينڊ ۽ آسٽريليا جي ڪرڪيٽ ٽيمن وچ ۾ ايشز سيريز جي ٻئين ٽيسٽ ميچ (اڄ) خميس کان لارڊز، لنڊن ۾ شروع ٿيندي، ميزبان ٽيم انگلينڊ کي پنجن ٽيسٽ ميچن جي سيريز ۾ 0-1 جي سرسي حاصل آهي. انگلش ٽيم پهرين ميچ کٽي ايشز سيريز جو ٽائٽل ٻيهي پنهنجي نالي ڪرڻ لاءِ راهه هموار ڪري ورتي آهي پر سيريز کٽڻ لاءِ ان کي اڃا ڪينگروز جو چئلينج درپيش آهي.ا

 

ڀارت انٽرنيشنل ڪرڪيٽ ۾ 600 ڪاميابيون حاصل ڪندڙ چوٿين ٽيم بڻجي وئي

اسلام آباد (اسپورٽس نيوز)ڀارت 600 انٽر نيشنل ميچن ۾ ڪاميابيون حاصل ڪندڙ چوٿين ٽيم بڻجي وئي. ڀارت زمبابوي خلاف سيريز جي آخري ميچ تي اهو اعزاز حاصل ڪيو. ان کان اڳ انگلينڊ، آسٽريليا ۽ پاڪسان جون ٽيمون اهو ڪارنامو انجام ڏئي چڪيون آهن. آسٽريلوي تيم 933 انٽرنيشنل ڪاميابين سان پهرين، انگلينڊ 698 ڪاميابين سان ٻي، جڏهن ته پاڪستان 623 ڪاميابين سان ٽين نمبر تي موجود آهي. ان سان گڏوگڏ ڀارت ملڪ کان ٻاهر وڌيڪ انٽرنيشنل ميچون کٽيندڙ دنيا جي چوٿين ٽيم بڻجي وئي آهي. ملڪ کان ٻاهر وڌيڪ انٽر نيشنل ميچون کٽڻ جو عالمي اعزازپاڪستان وٽ آهي جنهن 454 ميچون کٽيون آهن. آسٽريليا 424، ويسٽ انڊيز 348، ڀارت 335، انگلينڊ 334، سريلنڪا 273، ڏکڻ آفريقا 262 ۽ نيوزيلينڊ 208 ڪاميابين سان اٺين نمبر تي موجود آهي.

 

تهران لاءِ نئين صبح جو پيغام :وسعت الله خان

ايران جو جوهري پروگرام 58 سال پراڻو آهي. 1957ع ۾ آمريڪا جي آئزن هاور انتظاميه ايٽم براءِ امن جي اسڪيم تحت پاڪستان ۽ ايران سميت ڪيترن ترقي پذير ملڪن کي پنج ميگاواٽ قوت جي ريسرچ ري ايڪٽر فراهم ڪيا, جن جي لاءِ مواد به آمريڪا ڏيندو هو.

1968ع ۾ جوهري ڦهلاءُ جي روڪ واري عالمي معاهدي تي ابتدائي صحيح ڪندڙن ۾ ايران به شامل هو.

سمجهوتي تي ڌرين کي پابند ڪيو ويو ته ايٽمي سرگرميون، جوهري توانائي جي بين الاقوامي اداري (آءِ اي اي اي) جي قانون ۽ نگراني هيٺ هونديون. (اسرائيل، پاڪستان ۽ ڀارت ان سمجهوتي تي اڄ تائين صحيح ناهي ڪئي.)

شاهه ايران محمد رضا شاهه پهلوي 1974ع ۾ اعلان ڪيو هو ته تيل هڪ ڏينهن ختم ٿي ويندو، تنهن ڪري ان جي اڳواٽ حڪمت عملي طور تي ايران 1994ع تائين 23 هزار ميگاواٽ ايٽمي بجلي پيدا ڪندو. 8 آمريڪي ڪمپنين سميت درجنين اولهه جي ادارن کان ٽينڊر طلب ڪيا ويا. هڪ جرمن ڪمپني سيمنز پاران بوشهر ۾ 1200 ميگاواٽ جي پهرين پلانٽ جي تعمير شروع ڪري به ڇڏي.

مئي 1974ع ۾ ڀارت پهريون ايٽمي ڌماڪو ڪيو. هڪ مهيني کانپوءِ رضا شاهه پهلوي فرانسيسي اخبار لي ماند کي انٽرويو ڏيندي چيو ته ايران دنيا جي توقع کان ڪجهه پهرين پاڻ کي ايٽمي هٿيارن سان مسلح ڪري وٺندو.هي اهو زمانو هو، جڏهن ايران آمريڪا جو علائقائي پوليس مين ۽ خطي جي واحد غير اعلانيه جوهري قوت اسرائيل جو سفارتي ساٿاري هو.جون 1974ع ۾ آمريڪي دفاع واري کاتي هڪ اندروني ياداشت ۾ چيو ويو ته جيڪڏهن شاهه پنهنجي جوهري بجلي گهرن جي عظيم الشان منصوبي کي مڪمل ڪري وٺي ٿو ته ايترو استعمال ٿيل پلوٽونيم پيدا ٿيندو، جو ڇهه سئو کان ست سئو هٿيارن جي لاءِ ڪافي آهي.شاهه کي ايٽمي هٿيارن جي خيال کان پري ۽ سويلين ايٽمي رستي تي رکڻ جي لاءِ آمريڪين هڪ تجويز پيش ڪئي ته جيڪڏهن شاهه ايٽمي مواد جي ري پروسيسنگ ملڪ جي اندر ڪرڻ پسند ڪري ته پوءِ آمريڪا سان گڏ هڪ گڏيل ري پروسيسنگ پلانٽ لڳائي يا پوءِ آمريڪا سان پنهنجي جوهري پلانٽس جي لاءِ ٻارڻ ان شرط تي وٺي ته استعمال ٿيل ٻارڻ آمريڪا کي واپس ڪيو ويندو.

1978ع ۾ صدر جمي ڪارٽر جي تهران واري دوري جي موقعي تي جوهري تعاون جو هڪ جامع سمجهوتو به اصولن طئي ڪيو ويو پر حالتون ايتري تيزيءَ سان تبديل ٿيون جو شاهه جي حڪومت به نه رهي ۽ هڪ نئون ايران اڀريو ۽ ڪارٽر کي به ٻوڙي ويو.

آيت الله خميني تهران ۾ لهندي ئي آمريڪا کي شيطان قرار ڏنو ۽ ايٽمي هٿيارن جي تياري، ذخيري ۽ استعمال کي حرام قرار ڏيڻ جي فتويٰ به جاري ڪئي (ان کانپوءِ 2005ع ۾ علي خامنه اي ان فتويٰ جي تجديد ڪئي). ”شيطان بزرگ“ تهران يونيورسٽي جي ريسرچ ري ايڪٽر جي لاءِ افزوده يورينيم جي فراهمي روڪي ڇڏي.آمريڪي ڪمپنين جوهري بجلي گهرن جي منصوبي مان فورن هٿ ڪڍي ورتا. فرانس پنهنجي هڪ ري پروسيسنگ ڪمپني ۾ اڳوڻي شاهي حڪومت جي 10 سيڪڙو شيئرز منجمند ڪري ڇڏيا ۽ جرمن ڪمپني سيمنز آمريڪي دٻاءُ تي بوشهر ۾ جوهري بجلي گهر جي تعمير جو ڪم اڌ ۾ ڇڏي ڏنو. ان کانپوءِ عراق- ايران جنگ دوران عراقي جنگي جهازن بوشهر پلانٽ جي ڍانچي تي پڻ بمباري ڪئي.1984ع ۾ ايران اعلان ڪيو هو ته جوهري عدم ڦهلاءُ جي عالمي سمجهوتي (اين پي ٽي) جي حدن ۾ رهندي پرامن جوهري سرگرميون جاري رکندو. ارجنٽينا، چين ۽ سوويت يونين سان غير فوجي جوهري تعاون جا سمجهوتا ٿيا.هڪ روسي ڪمپني کي بوشهر بجلي گهر جي تعمير مڪمل ڪرڻ جو ٺيڪو هو. ايران اهو موقف رکيو ته هن کي اين پي ٽي تحت غير فوجي مقصدن جي لاءِ يورينيم جي افزودگي جو حق حاصل آهي.

1998ع ۾ جڏهن پاڪستان ڀارت جي جواب ۾ ايٽمي ڌماڪا ڪيا ته پنج ڏينهن کانپوءِ ايراني وزير خارجه ڪمال خرازي اسلام آباد پهچي نواز شريف حڪومت کي ان ڪارنامي تي مبارڪباد ڏني.

تنهن وقت هڪ راز آمريڪين جي ڄاڻ ۾ اچي چڪو هو پر نواز شريف حڪومت ان راز کان بي خبر هئي. يعني ڊاڪٽر قدير نيٽ ورڪ جي توسط سان ايران کي يورينيم جي افزودگي جي لاءِ آءِ آر ون ماڊل جي سينٽري فيوجز ۽ جوهري هٿيارن جي چيني ڊرائنگز جي فراهمي جو راز.

آءِ اَي اِي اَي 2003ع ۾ پنهنجي رپورٽ ۾ پهريون ڀيرو انڪشاف ڪيو ته نطنز جي جوهري مرڪز ۾ فوجي استعمال جي انتهائي افزوده يورينيم جا آثار مليا آهن.ايران جو موقف هو ته هي آثار استعمال ٿيل پاڪستاني سينٽري فيوجز جا آهن ۽ ايران عدم اعتماد جي فضا واري پيش نظر عارضي طور تي يورينيم جي واڌ جو عمل به روڪي ڇڏيو پر آءِ اي اي بضد رهي ته ڪجهه ته آهي جنهن جي پرديداري ٿي رهي آهي.2006ع ۾ ايران جو ڪيس آءِ اي اي اي جي بورڊ گڏيل قومن جي سلامتي ڪونسل جي سامهون پيش ڪيو ۽ ائين ايران تي مرحليوار ايٽمي، فوجي ۽ معاشي پابنديون لاڳو ٿينديون ويون.ان عرصي دوران ڳالهين جا ڪيترائي دور ٿيا پر صدر احمد نزاد ۽ آمريڪي صدر بش جي بي لچڪ روين ڪو به بريڪ ٿرو ٿيڻ نه ڏنو.دنيا جي پوري توجه ايراني جوهري پروگرام تي مرڪوز رهندي اهو سوال اٿارڻ جي ڪنهن کي به فرصت نه رهي ته اسرائيل جي جوهري اسلحي خاني جو به ڪجهه ڪيو وڃي، جتي فيڊريشن آف آمريڪن سائنٽسٽس جي 1987ع جي اندازي مطابق 80 ايٽمي هٿيار تيار پيا هئا ۽ اڄ 2015ع آهي.قصو مختصر انتهائي ٿڪائيندڙ ڳالهين جي دور بعد سوئيس شهر لوزان ۾ 24 مارچ تي سلامتي ڪونسل جا پنج مستقل ميمبر جرمني ۽ ايران جي وچ ۾ جنهن جامع سمجهوتي جو خاڪو طئي ڪيو ويو، جنهن ۾ ايران جو اهو بنيادي مطالبو تسليم ڪيو ويو ته هن کي سويلين مقصدن جي لاءِ يورينيم جي 3.67 سيڪڙو تائين افزودگي جو حق آهي. (ايٽمي هٿيار سازي جي لاءِ 90 سيڪڙو تائين افزودگي ضروري آهي ۽ ايران 20 سيڪڙو تائين افزودگي جي صلاحيت جو مظاهرو ڪري چڪو آهي).

ان جي عيوض ايران کي پنهنجي يورينيم افزوده ڪرڻ واري سينٽري فيوجز جو تعداد 19 هزار مان گهٽائي 6 هزار تائين ڪرڻو هوندو. ايران پراڻي آءِ آر ون کانسواءِ ٻئي ڪنهن سينٽري فيوجز جو استعمال ڪري نه سگهندو. ايران پنهنجو 10 هزار ڪلوگرام افزوده يورينيم جو ذخيرو گهٽ ڪري 3 سئو ڪلوگرام تائين کڻي ايندو. ايران صرف نطنز جو پلانٽ جوهري افزودگي جي لاءِ استعمال ڪندو ۽ فردو جو جوهري مرڪز صرف تحقيق ۽ ترقي جي مقصدن جي لاءِ استعمال ٿيندو. ارڪ جي پلوٽونيم ساز پلانٽ ۾ تبديليون ٿينديون ته جيئن ان ۾ صرف انرجي گريڊ جو پلوٽونيم تيار ٿي سگهي. ارڪ جو هيوي واٽر ري ايڪٽر استعمال نه ٿي سگهندو ۽ استعمال ٿيل پلوٽونيم ٻاهرين ملڪ اماڻيو ويندو.

ان کانسواءِ آءِ اي اي اي جي معائنو ڪندڙ ٽيمن کي سمورن جوهري هنڌن، يورينيم جي کاڻن، ڪارخانن ۽ سپلاءِ جي کاتن ۽ ٻئي استعمال جي ٽيڪنالوجي جي اچانڪ جاچ جو بنا روڪ ٽوڪ جي حق هوندو. شروع ۾ هي سمجهوتو 15 سال جي عرصي جي لاءِ هوندو. جيئن ئي آءِ اي اي اي تصديق ڪندي ته سمجهوتي تي مڪمل عمل ٿي رهيو آهي، ايران جي خلاف پابندين جي مرحليوار خاتمي جي لاءِ سلامتي ڪونسل درخواست ڪندي.۽ پوءِ 30 جون حتمي سمجهوتي جي ڊيڊ لائين مقرر ڪئي وئي پر علي خامنه اي سميت اعليٰ ايراني روحاني ۽ سياسي قيادت جو مطالبو هو ته حتمي سمجهوتي تي صحيح ٿيڻ شرط ئي ايران جي خلاف اقتصادي پابنديون مرحليوار کڻڻ بجاءِ هڪ ئي ڀيري ختم ڪرڻ گهرجن.ان جي عيوض مغرب جي فائيو پلس ٽو مذاڪراتي ٽيم مطالبو ڪيو ته جوهري توانائي جو معائنو ڪندڙ انسپيڪٽرن کي بنا روڪ ٽوڪ جي سمورن ايٽمي ۽ فوجي نوعيت جي تنصيبات جي معائني جي اجازت هجڻ گهرجي.

ان معاملي تي جُون ۾ شروع ٿيندڙ ويانا مذاڪرات جي حتمي دور ۾ ڪڙي سوديبازي ٿي. آخرڪار ان مهم کي پورو ڪيو ويو.

پر ڪهاڻي اڃان ختم ناهي ٿي. اسرائيل، سعودي عرب ۽ آمريڪي ڪانگريس ان سمجهوتي مان خوش ناهن. اسرائيل ايران جي سويلين جوهري پروگرام کي جڙ کان ختم ڪرڻ تائين مطمئن نه ٿيندو، ڇاڪاڻ ته اسرائيل خطي ۾ اڪيلو ايٽمي قوت رهڻ چاهي ٿو يعني ”سنجھیاں ہو جاون گلیاں تے وچ مرزا یار پھرے۔“

سعودي عرب نه صرف ايراني جوهري صلاحيت جو مڪمل خاتمو چاهي ٿو بلڪه ان کي اهو پڻ فڪر آهي ته پابندي جي خاتمي کانپوءِ جڏهن روزانو 5 لک بيرل کان وڌيڪ ايراني تيل مارڪيٽ ۾ ايندو ته تيل جي قيمت وڌيڪ غير يقيني هوندي ۽ جڏهن ايران جي اقتصادي پريشانين ۾ گهٽتائي ٿيندي ته شام، لبنان ۽ عراق ۽ يمن سميت ان جي علائقائي، سياسي، فوجي اثر ۾ وڌيڪ اضافو به ناگزير آهي.

سڀ کان وڏي آزمائش هاڻ اها آهي ته ايران جي اندر سخت گير مذهبي عنصر ان سمجهوتي کي ڪيتري قدر قبول ڪن ٿا ۽ اسرائيل ڏانهن لچڪ رکندڙ آمريڪي ڪانگريس اسرائيل کي مطمئن ڪندي ڪڏهن ۽ ڪيئن سمجهوتي ۾ واڌارو ڪندي

 

 

ڪراچي ۽ مافيائن جو ڳٺ جوڙ: عاجز جمالي

ايم ڪيو ايم سرواڻ الطاف حسين جي تازي تقرير کانپوءِ سنڌ جي مختلف ضلعن ۾ الطاف حسين خلاف ٿاڻن تي فريادون داخل ڪرائڻ جو هڪ سلسلو شروع ٿيو، هي سٽون لکجڻ تائين لڳ ڀڳ ويهه کن ايف آءِ آرز داخل ٿي چڪيون آهن.

هنن ايف آءِ آرز جي مطابق الطاف حسين فوج ۽ رينجرز جي خلاف ڳالهايو، ماڻهن کي دهشتگردي لاءِ اڪسايو ۽ عوام کي چڙ ڏيارڻ جي ڪوشش ڪئي، ان لاءِ الطاف حسين خلاف ڪيس ۾ دهشتگردي جو قلم به شامل ڪيو ويو. ڏسندي ڏسندي رات پيٽ ۾ ويهه ڪيس داخل ٿي ويا. هنن ڪيسن کان اڳ وفاقي گهرو وزير پنهنجي پريس ڪانفرنس ۾ چيو ته هاڻي سنجيدگي سان برطانيه سان ڳالهائڻو پوندو ۽ الطاف حسين جي گرفتاري لاءِ انٽرپول سان ڳالهائڻو پوندو. اهڙي ئي ماحول ۾ رينجرز هيڊ ڪوارٽر ۾ هڪ اجلاس به ٿيو، عيد کانپوءِ ڪراچي آپريشن تيز ڪرڻ جو به فيصلو ٿيو.

الطاف حسين خلاف غداريءَ جي هي پهرين ايف آءِ آر ڪانهي، الطاف حسين تي ته پاڪستان جو جهنڊو ساڙڻ ۽ جناح پور ٺاهڻ جا الزام به هئا ۽ اهڙن ڪيسن کانپوءِ به اڄ تائين پاڪستان جي سرڪار، اسٽيبلشمينٽ جي الطاف حسين سان دوستي رهي، هرڪو ئي لنڊن وڃي ساڻس ملاقاتون ڪندو رهيو، سندس پارٽي کي سرڪار ۾ شامل ڪندا رهيا، سندس پارٽي جو گورنر موجود آهي.

چيو وڃي پيو ته گذريل ڏينهن الطاف حسين ڊي جي رينجرز کي گهٽ وڌ ڳالهايو، کيس چئلينج ڪيو، ان حد تائين جو اخلاق کان ڪريل ڳالهيون ڪيون، جيئن ته اڄڪلهه الطاف حسين جي سڌي تقرير تي پابندي آهي، ان ڪري اسان سڀ ٽي وي تي اهڙي تقرير ٻڌڻ کان محروم رهياسين، پر ظاهر آهي ته ايجنسين وٽ اها تقرير به موجود هوندي، جنهن کي ايف آءِ آر جو حصو بڻايو ويندو. ايجنسين وٽ اهڙا شاهد به هوندا، ڀلي اهي سنڌي ڳالهائيندڙ ئي ڇو نه هجن. ايم ڪيو ايم وٽ به ته ڪجهه سنڌي ڳالهائيندڙ موجود هوندا نه جو انهن اها تقرير اسپيڪر تي ڄاڻايل شهرن ۾ ٻڌي هوندي.

ٻڌايو وڃي پيو ته الطاف حسين جي اهڙي تقرير خلاف ايف آءِ آرز داخل ٿيڻ کانپوءِ الطاف حسين جي ٽيليفونڪ خطاب تي پابندي جو مضبوط جواز ملي ويو آهي ۽ اڳتي هلي انهن ايف آءِ آرز جي بنياد تي انٽرپول پوليس ۽ برطانوي سرڪار کان الطاف حسين جي ٻانهن گهرڻ ۾ به سولائي ٿيندي. مطلب ته وفاقي حڪومت پورا بندوبست ڪري پئي.

الطاف حسين خلاف ڪيس داخل ٿيڻ کان ٻه ڏهاڙا اڳ ڪراچي ۾ نه رڳو ايپيڪس ڪميٽي جو اجلاس ٿيو بلڪه پيپلز پارٽي جي چيئرمين بلاول ڀٽو زرداري جي ڪور ڪمانڊر ڪراچي سان ملاقات به ٿي. تجزيه نگار جو خيال آهي ته پيپلز پارٽي ۽ فوج وچ ۾ جيڪا گرمي هئي، اها گرم موسم گهٽ ٿيندي ئي گهٽ ٿي ويندي ۽ پيپلز پارٽي جي سرڪار فوج کي ڪراچي آپريشن ۾ مڪمل ساٿ ڏيڻ ۽ رينجرز خلاف ڪوبه سخت قدم نه کڻڻ جو يقين ڏياريو آهي.

الطاف حسين خلاف ايف آءِ آر داخل ٿيڻ مان اهڙي يقين جي پڪ به ٿئي پئي، ڇو ته اهي سموريون ايف آءِ آرز سنڌ جي شهرن ۾ سنڌ پوليس داخل ڪيون آهن. ڪنهن وڏي سياسي شخصيت خلاف ايف آءِ آرز داخل ٿيڻ کان اڳ ضرور صلاح مشورا به ٿيا هوندا نه ته ڀلا ڪنري، ڪنڌرا، گهوٽڪي، دادو جي ايس ايڇ اوز جي ڇا مجال هوندي؟

سنڌ سرڪار يا پيپلز پارٽي هن موڙ تي ايم ڪيو ايم جي مدد ڪرڻ بدران پنهنجي جان ڇڏائڻ کي اوليت ڏيندي. ان ڪري الطاف حسين خاطر هاڻي شايد پيپلز پارٽي اسٽيبلشمينٽ سان ڪو نئون جهڳڙو نه چاهيندي، پر هي پيپلز پارٽي ۽ ايم ڪيو ايم جو ڪو به جهڳڙو ناهي نه ڪي ايم ڪيو ايم ۽ سنڌين جو ڪو جهڳڙو آهي. هي اسٽيبلشمينٽ ۽ الطاف حسين وچ ۾ هلندڙ پراڻي اک ڇنڀ جي راند جو حصو آهي. اسٽيبلشمينٽ ئي الطاف حسين خلاف انهن سڀني شهرن ۾ ايف آءِ آرز داخل ڪرايون، جتي همراهه جو ٽيليفونڪ خطاب ٻڌو ويو.

سنڌي، بلوچ ۽ پختون هن ملڪ ۾ هميشه غداري جا الزام سهندا پيا اچن، عام سنڌين جي ڪڏهن به پاڪستان جي اسٽيبلشمينٽ سان دوستي نه رهي آهي. سنڌ جي وڏيري، جاگيردار، مير، پير جي هميشه اسٽيبلشمينٽ سان دوستي رهي آهي، جنهن سبب هو اقتدار ۾ پهچي ٿو.

”مير وڏيرا پير هڙئي هن فوجي جنرل سان“ هي گيت جنرل ضياءَ دور ۾ سنڌ جي ٻهراڙين ۾ گونجندو هو، يا او قاتل بدلو وٺنداسين، هر خون جي قطري قطري جو.

پر سنڌ جي اقتداري ٽولي سان گڏ مهاجر ليڊرشپ هميشه پاڪستان جي اسٽيبلشمينٽ سان گڏ رهي، پنجابي مهاجر اسٽيبلشمينٽ هميشه اتحادي رهيا آهن. ڪنهن حد تائين پختون به سندن ساٿاري رهيا آهن. ايم ڪيو ايم پنهنجي قيام کان وٺي اڄ تائين اسٽيبلشمينٽ جي جماعت رهي آهي، اڃا ڪجهه مهينا اڳ ته ڪراچي جي شاهراهه قائدين تي هزارين اردو ڳالهائيندڙن ايم ڪيو ايم جي ڪال تي گڏ ٿي پاڪ فوج زنده باد جا نعرا هنيا هئا.

سڀني مردن ۽ عورتن جي ڳچي ۾ جنرل راحيل شريف جون تصويرون لٽڪيل هيون، سنڌين ته ڪڏهن به اهڙيون ريليون نه ڪڍيون هونديون. سو اصل ۾ هن جهيڙي کي سنڌي مهاجر جهيڙو چوڻ وارا هروڀرو سنڌين جي ڳچي ۾ فلم وجهڻ جي چڪر ۾ آهن.

هي پاڪستان جي اسٽيبلشمينٽ ۽ ايم ڪيو ايم جو جهڳڙو آهي. مائنس الطاف حسين جي سوچ هجي يا ايم ڪيو ايم اندر نئين ليڊرشپ آڻڻ جي ڳالهه هجي يا ايم ڪيو ايم جي هٿياربند ونگ جي خاتمي جي ڳالهه هجي، اهي سڀ ڳالهيون اسٽيبلشمينٽ جون آهن. ڪراچي مان بدامني سمورا ماڻهو چاهين ٿا ۽ سنڌي به چاهين ٿا، پر ڪراچي ۾ عوام جي حقيقي نمائندگي لاءِ مڪاني يا عام چونڊن جو شفاف هجڻ سڀ کان وڌيڪ لازمي آهي. ان لاءِ شهر کي هٿيارن کان صاف ڪرڻ ضروري هوندو. جيڪڏهن اسٽيبلشمينٽ ان ۾ سنجيده آهي، صاف شفاف چونڊون ڪرائي، ان کان اڳ ڪراچي ۾ آدمشماري ڪرائي وڃي، لکين جعلي ووٽ ختم ڪيا وڃن ۽ لکين حقيقي ووٽ داخل ڪرايا وڃن. ڪراچي تان هر قسم جي مافيائن جو قبضو ختم ڪرايو وڃي.

ڪراچي کي سياسي، غير سياسي مافيا جي غلامي مان نجات ملڻ جي صورت ۾ ئي ڪراچي هن ملڪ جو معاشي شهر بڻجي سگهندو، ٻي صورت ۾ هي سڄي راند به ماضي وانگر عارضي راند ثابت ٿيندي.

 

 

ادارن جو سهڪار ئي ڪرپشن کي ختم ڪري سگهندو

نيب سپريم ڪورٽ ۾ 150 ميگا اسڪينڊلز جي ترميم ٿيل رپورٽ جمع ڪرائي ڇڏي آهي، جنهن  ۾ ملڪ جي موجوده وزيراعظم نوازشريف، وزيراعليٰ پنجاب شهباز شريف ۽ اڳوڻي صدر آصف علي زرداري سميت ٻين شخصيتن خلاف ڪرپشن جي ڪيسن جي جاچ هلندڙ سال ئي مڪمل ڪرڻ جو ٽائيم فريم پيش ڪيو ويو آهي، رپورٽ ۾ عدالت عظميٰ کي آگاهه ڪيو ويو آهي ته وزيراعظم نواز شريف ۽ پنجاب جي وڏي وزير شهباز شريف خلاف جاتي امرا ڏانهن سرڪاري خرچ تي ذاتي مقصدن لاءِ ٺهرايل رستي جي جاچ 17 اپريل 2000ع کان شروع ٿي، وزيراعظم نوازشريف خلاف ايف آءِ اي ۾ ضابطن جي خلاف مقررين جي ڪيس جي جاچ 30 سيپٽمبر تائين مڪمل ڪئي ويندي، جڏهن ته اڳوڻي صدر آصف زرداري جي اثاثن، اڳوڻي وزيراعظم يوسف رضا گيلاني خلاف اوگرا چيئرمين جي غير قانوني مقرري، اڳوڻي وزيراعظم راجا پرويز اشرف، جنرل (ر) سعيد الظفر، اڳوڻي اٽارني جنرل جسٽس (ر) ملڪ قيوم ۽ انجم عقيل جو معاملو عدالت ۾ آهي، ايف بي آر جي اڳوڻن چيئرمينن عبدالله يوسف، سلمان صديقي ۽ ارشد حڪيم خلاف 15 جون کان شروع ٿيل انڪوائري 14 آڪٽوبر تائين مڪمل ڪرڻ جي خاطري ڪرائي وئي آهي، نيب پنهنجي رپورٽ ۾ سپريم ڪورٽ کي گذارش ڪئي آهي ته وزيراعظم نواز شريف خلاف ڪرپشن جي سڌي سنئين جاچ جي اجازت به ڏني وڃي.

نيب جڏهن کان سپريم ڪورٽ ۾ 150 ميگا ڪرپشن جي رپورٽ پيش ڪئي آهي، ان وقت کان حڪومتي وزير خاص ڪري مسلم ليگ (ن) جا اڳواڻ چيئرمين نيب کي تنقيدي نگاهه سان ڏسڻ لڳا آهن ۽ کيس عهدي تان هٽائڻ جون ڳالهيون به سامهون اچي رهيون آهن، قومي اسيمبلي جي اسپيڪر اياز صادق ته بلڪل صاف چئي ڇڏيو ته چيئرمين نيب خلا ف مواخذي جي تحريڪ به ايوان ۾ آڻي سگهجي ٿي، پر کانئس ڪير اهو ته پڇي ته آخر هو چيئرمين نيب خلاف اهڙي قسم جي رٿ ڇو آڻڻ چاهي ٿو، جڏهن بدعنوانين خلاف ڪارروايون شروع ڪيون ويون آهن ته ان قت حڪومتي وزيرن ۽ اقتدار ڌڻين کي خيال آيو آهي ته نيب جي عملدارن جو به احتساب ٿيڻ گهرجي. نيب ملڪ جو اهو آئيني ادارو قرار ڏنل آهي، جنهن جو ڪم ڪرپشن جو خاتمو ۽ انهن ننڍين توڙي وڏين مڇين جي نشاندهي ڪري کين جاچ جي دائري ۾ آڻڻ آهي، جيڪي قومي ناڻي کي وڏي عرصي کان ڦرينديون ۽ لُٽينديون رهيون آهن. سوال اهو آهي ته ڇا ارباب اختياريون اهو چاهين ٿيون ته شريف ڀائرن ۽ وزيرن جا نالا 150 ميگا ڪرپشن ڪيسن مان ڪڍي پوءِ سپريم ڪورٽ ۾ رپورٽ پيش ڪئي وڃي ها؟ ان جو مطلب ڪٿي ايئن ته ناهي جو ڪرپشن خلاف ادارن کي ان وقت تائين ڪم ڪرڻ جي اجازت آهي، جيستائين هو حڪمرانن کي ڪليئر قرار ڏئي ڇڏين، جيڪڏهن سپريم ڪورٽ ۾ پيش ڪيل نيب جي رپورٽ تي ڪنهن کي اعتراض آهن يا اها رپورٽ ڪنهن حڪمران خلاف هٿ ٺوڪي آهي ته اهو سڀني جو آئيني حق آهي ته هو عدالت ۾ پيش ٿي ان خلاف ثبوت پيش ڪن، ڪرپشن خلاف هلندڙ ڪارروائين ۾ رڪاوٽ بڻجڻ بجاءِ ملڪ جي سمورين سياسي ڌرين توڙي سرڪاري ڪامورن کي ڪرپشن خلاف ڪارروائين ۾ ادارن جو ساٿ ڏيڻو پوندو، ڇو ته جيستائين ملڪ مان ڪرپشن جو خاتمو نه ايندو، تيستائين هن ملڪ کي نه ترقي ملي سگهي ٿي ۽  نه وري خوشحالي، ان سان گڏوگڏ عوام جا حق به غصب ٿيندا رهندا.

ڏٺو وڃي ته پاڪستان دنيا جي انهيءَ خطي ۾ واقع آهي، جتي قدرت هن ملڪ کي زرعي توڙي معدني وسيلن سان مالامال ڪيو آهي، پر وڏي افسوس جهڙي ڳالهه آهي ته اسان جي قوم کي هر ڀيري اهڙا حڪمران مليا، جن عوام جي خون ۽ پسيني جي ڪمائيءَ سان ڀريل قومي ناڻن کي وڏي چاهه ۽ دلچسپي سان ٻنهي هٿن سان ڦُريو ۽ لُٽيو ۽ انهن عوام جي بنيادي حقن کي اهڙي طرح لتاڙي دفن ڪري ڇڏيو، جنهن جو مثال شايد ئي ڪنهن خطي ۾ ملندو هجي. حقيقت اها آهي ته اسان سچ کي منهن ڏيڻ جي قابل ئي نه رهيا آهيون، رڳو ڪوڙ جي بنياد تي زندگي جيئون پيا، سمجهه کان ڳالهه مٿي آهي ته حڪومت ۾ هوندي به نوازليگ جا اڳواڻ مخالف ڌر جهڙيون ڳالهيون ڪري رهيا آهن، جيڪڏهن نيب جي رپورٽ بي بنياد آهي ته ان تي اثرانداز ٿيڻ بجاءِ متاثر شخصيتن کي پاڻ مٿان لڳندڙ الزامن کان آجو ٿيڻ لاءِ عدالت آڏو پيش ٿيڻو پوندو، ان سان نيب جي پت به وائکي ٿي ويندي ۽ اقتدار ڌڻي توڙي ٻيون ڌريون ڪرپشن جهڙي غليظ الزامن کان آجا به ٿي ويندا.

اسين سمجهون ٿا ته ڀلي ملڪ جو چيف ايگزيڪٽو هجي يا قومي ادارا، انهن کي آئين تحت اهي ئي اختيار مليل آهن ته ڪرپشن خلاف ادارن کي ڪم ڪرڻ ڏنو وڃي، نيب جو اصل احتساب اهو ئي سمجهڻ گهرجي ته ان کي التوا ۾ پيل ڪرپشن ڪيسن جي جاچ مڪمل ڪرڻ ڏني وڃي ۽ ان جي رپورٽ عدالتن ۾ موڪلڻ جو پابند بڻايو وڃي، جيڪڏهن ڪيس بي بنياد هوندا ته يقينن ختم ٿي ويندا، پر جيڪڏهن انهن ۾ سچائي آهي ته ڪير ملڪ جي ڪنهن به منصب تي مقرر ڇو نه هجي، هن خلاف ڪارروائي عمل ۾ آڻڻ گهرجي، چيئرمين نيب وٽ هي سُنهري موقعو آهي ته هو ڪرپشن جي ڪيسن کي صاف ۽ شفاف نموني هلائي اداري کي حقيقي احتساب جي علامت بڻائي، ان سان ماضيءَ ۾ اداري تي لڳل الزامن سان متاثر ٿيل ان جي ساک به بحال ٿيندي. سنڌ ۾ ته گهڻي عرصي کان مختلف صوبائي کاتن خلاف ڪرپشن جي جاچ ۽ سرڪاري ڪامورن جي وٺ پڪڙ جاري آهي، ان ڪري انصاف جي تقاضا اها آهي ته رڳو سنڌ ۾ نه پر سڄي ملڪ ۾ بدعنوانين ۽ بي ضابطگين خلاف جاچ هلڻ گهرجي.

جيڪڏهن ملڪ ۾ ماضيءَ وانگر ڪرپشن جو سلسلو جاري رهيو ته غريب عوام جا حق ساڳي ريت حڪمرانن جي پيرن هيٺان لتاڙجندا رهندا.